BONUS CHAPTER-3 (LAST)
BY
KENNELLY BAWITLUNG
__________________________________
U Remruata Doctor lo kal ṭum chuan tihian min hrilh a, "A rilru hi tihhlim hram hram in lo tum dawn a nia. A englamin thlir luih tir tum tlat bawk ula, a rilru kawm ngawt ngawt lo se a ṭha ang. Hetiang a nihchuan hma kan sawn thei lovang. Chuan kal pawh lo zir ṭan rawh ula a pawi lo ang," a ti dap dap a.
Tunlai chu a ngui thei riau a, ngaihte pawh a ti ṭhalo ṭhin reng a ni. Doctor chu ka nu ten pawn thleng an thlah a, chokaah intur lain ka pindanah ka chho tlang nghal a. Kawngkhar in hawng aṭang chuan ka pasalin khuma ṭhu chunga a fanu a lo lawm chu hmuhnawm ti takin ka thlir leh veng veng..
A fanu bula a nuih ang sawn nui rengin thinglung takin hlim reng se ka ti ngawt mai. Kawngkhar chu ka kik ri dat a, a lo hawi chuan min nuih suk a. Khum sira dawhkanah theitui chu ka dah a, Bawihtei pawh thla hnih a tling ve reng tawh a, hnute a duh kuang kuang bawka chum ṭha mat mat tak a ni.
A patea te pahnih hian zei lo zet hian an inpuak chhawk ve lawp lawp zel a, an zei lo dun si kan nuihpui tam ber a ni. U Tetea'n fual zeta a puakna video ka lak pawh kha ka la nei reng tak alawm. Khami ṭum zet kha chu pum na ṭhumin ka nu hovin kan han nui tak tak a nih kha.
Khami ni aṭang khan u Tetea chuan a paw duh tawh ṭhaklo, mahse a lawm ve em a, pawm hi chu a pawm zing khawp mai.
Levi-a pawh hian a pawm thle lawp lawp zel, "Bawihtei chu a zawi si ka pawm chuan ka hah ṭun zel!" A ti ve ziah.
Bawihtei hi chu lak chhawktu tur ka ngah bawka ka pasal hi ka ngaihsak lehzual ngai ber chu niin ka hria...
"A pain a chheih chuan kan naute chu ava nui ṭha duh har har ve aw...," tiin kan fanu biangah chuan ka piai zeuhva. A chuma a lawmawm viau rual hian chheih hian a nui ṭha duh der lo va. A mitmeng lian deuh hian mi a melh kalh zel a, zam chhiat mai tepawh awl tak a ni.
Mahse hei, apain a han chheih tawh hi chuan a khek ring thei a nia! "A pa lalfanu kha a nia lawm tiraw...ka fanu hmelṭha hi..!" Tia u Remruata'n a kutbenga a han lawm vel te chuan a eng berin nge a nuih ti za pawh hriat va nih chu a ka tereuh te chuan a nui ang diai diai a, a ke a leng bat bat bawk a, ka ngei reuh lutuk.
"A ril a ṭam tawh ang vawiin chu a mu tlem bawk sia, a nu ne ne kha hne ṭeuh rawh aw ka fanu duhawm te," tiin ka mal chungah Bawihtei chu a rawn mut a. Khumah chuam ṭhu ṭhain hnute ka pe a, a duh kuang kuang a nia aw...Hnute tui ka ngah hlauh hi chu ka vannei tak tak a ni.
"Kha theitui kha in rawh Sêntei sawr thar hlim hlawt a nih kha," ka tihchuan a in ve mai a. A fanu hnute hne lai chu lungawi hmel tak hian a thlek leh vang vang ṭhin a, a kut tereuhte chuan a pa kutzungte chu a hum bet ve ṭai bawk a. Pafa diktak chu an lo nih hi...rei pawh an awm hrang thei lo.
"U Remruat, tunlai hi ngaihtuah nei i ang thei e...rilru kaptu engpawh i nei anih chuan min hrilh hreh suh aw, ka sutkiang sak thei lo che anih pawhin ka lo ngaithlak sak che anga, i inbunruahna nih ka duh tih i hriat kha. I nupui ka ni a, ka lakah engmah zep suh aw," tiin a kut chu a hum sak vang vang.
A chalin ka chal chu a rawn toh dat a, "Nang ka nei che hi mipa vannei tak ka ni, ka hmangaih lutuk che," a ti thawp sup a.
Min lo fawh chuan ka lo chhanglet nghal thuai a, hetia kan awmlohna hi a rei ta bawk a, kan am duh kher mai. Mahse kan fanu te in kan hmui bul velah a kut tereuh te chu rawn rawlh a tum phet a, in ui deuh chunga kan inlak hran a ngaih phah.
"Nangchu apa hi pumbilh vek i tum bik a..a nu hian ka ngai ve tho a nia aw," ka fanu en chungin ka ti nur nang a. U Remruata nuih chu aza khawp mai. Mahse a ni lah tak a, Bawihtei awm tak aṭang hian u Remruata hian a duat lutuk a, a nu zawk hian ka thik lek lek zel alawm..
"Ni e, ka lalfanu a nu hi nangmah ang thoa duat ngai ala nia...lo hrethiam hram hram rawh aw," la nui vur vur chunga a fanu a biak chuan tum vuau chungin ka lo melh thip ram...
"I hnute chu a ṭhan belh a nih hi," tiin Bawihtei hnek loh zawk lam chu a rawn ṭham pah kher a, chungte chu a hriat sa reng a ni sia, "Fa neih hnuah te chuan a len ve bawk lo in...khawih kher kha a ṭullo Bawihtei ta a nih hi," melh ram ram paha ka tihchuan a hmui a lo pet sawi zeuhva.
"Khaia! 'I ta chu ka ta' ka tih tawh kha...Bawihtei chu kum hnih khat chhung atan chiah ka hawh tir rih alawm. I hria tiraw Bawihte, hei hi chu a pa t-"
"I ninawm ngawi mai mai rawh..!" A naka nghawk zeuh pahin a thusawi lai chu ka lo pawt chat a. Mi lah hi a fiam ve ziah mai!
A nui ruh ruh a, "Vawiin chu ka nupui hi ka ngai riau mai, tunlai chu ilang ṭha zual tlat," tiin ka biangte chu a rawn piai thul...mi a chheih vel hi chuan nuam ka ti ṭhin...mahse nuam ti ang chuan ka lang duh chuanglo.
Bawihtei muhil bam mai chu muangchangin ka mut a, "Sêntei ka zuk pui ve lawk ang nge," tiin ka kal hma chuan ka pasal biangah ka fawh sak zeuhva. An pafa chuan ka chhuahsan a, chokaa ka luhchuan Sêntei'n alu a lo vel mek...
"Tun lai chu ka pui thei mang bawk si lo che a i hah thei ngawt ang," ka tihchuan, "Hah lo ve, Bawihtei leh u Remruata buaipui kha hnakhatah nang chuan nei tawp mai rawh. Inchhung chet leh ei rawngbawl te hi chu ka kutah dah tawp la, puih pawh ka ngailo. Naute enkawl hahthlak zia te chu ka hre ve alawm," a lo ti siam siam a. A bula awm hi chuan thaw a veng huai huai zel...
"Mate, Bawihtei chu a muhil em ni?" Ka nu'n a rawn tihchuan muthilh thuin ka lo chhang vat a. "A mut tawh lah hian a mu tui thei mai bawk si a zanah a mu thei lovang tih a va hlauhawm ve aw...," ti nuah nuah chungin kailawn lam ka nu chuan a pan phei a.
Sêntei nen chuan kan che zung zung a, kan inbawl fel meuh chuan dar 5 a ri thuak tawh. Kailawnah ka nuin Bawihtei chu a rawn pawm thla a, a tho chiah a nih hmel a meng khup lap mai.
A pu nen an in lo in awm a, u Tetea lo hawng chuan a intihfai chhungin chaw ei kan lo siam a. A rawn chhuk meuh chuan kan lo peih fel der tawh. U Remruata pawh crutcher nen chuan pindan chhung chu a tei ve hrut hrut thei tawh a, step chhuk em hi chu kan la phal lo bawk nen chaw hi chu kan pahnih ei turin ka keng chho mai ṭhin.
"Nichin khan Isaac-a'n min rawn call a, naktuk tlai hian an naupai lawmnan an ina zanriah ei khawm an rawt a, kal ve ngei turin min rawn sawm a nih chu," chaw kan ei laiin u Remruata chuan a ti a. "An lawm har ka ti rengah...kan va lan ve ngei a ngai dawn a nih chu," ka tihchuan engmah sawilo hian chaw chu a ei zawm mawlh mawlh a.
"I chak vak lo em ni?" Ka tihchuan a lu thing chung hian, "Chutiang lam pawh a nilo, tuna ka dinhmun nen hi chuan nangmah i buai zawk mai mai ang," tiin a nui lui a. Hetiang zawng hian alawm ngai tawh lo se ka tih.
"I nupui ka nia ka buai ve bawk ang chu...khatiang zawng khan ngaihtuah tawh suh ka tih ṭhin kha ka lungawi miah lo a nia..!" Ka hmelah pawh chuan ka lungawilohzia a hmu thei ngei ang.
"Ka tihpalh i hah lutuk ka hlauh vang mai a nia...," inthiamlo hmel zeta a tihchuan ka khawngaih leh vat lawi a. "Chhuah harh te pawh i mamawh ve alawm, che theilo tawp pawh i ni lova, Doctor pawhin kal zir i mamawh a tih tawh kha...muangchangin kan zir ang nga, ngai i awh leh vat mai ang. Chuan ka phurrit leh hnawksak angin ka ngai ngailo che tih hi hre rawh aw, hrisel lai leh bawrhsawm lai pawhin i kiangah ka awm zel ang tiin Pathian leh mipui hmaah ka intiam tawh a, ka hmangaih che a, i tan chuan engkim ka huam tih hi min hriat sak nawk dawn nia," thutak zetin ka ti charh charh a. Ka thusawi mal tin chu ka thinlung chhungril ber aṭanga sawi chhuak ka ni.
Kan chaw ei lai theihnghilh ṭhak khawpin kan boruak chu a inthlak hneh a, ka thusawi chuan ka hmaa ṭhu ka pasal hi a khawih takzet tih min en danah ka hre thei a...ka lawm hle bawk.
"Kan kal dawn a nia," a ti ve ta sup a. Keipawh chu ka nui ta var var, inah a tawm reng ṭhin bawk nen han hawi khawthawng pui pawh kha ka duh hrim hrim a, a inngaihtuah nasa lutuk tur te pawh a zia awm phah mahna.
A tukah chuan Isaac-a te nupa pek tur eng emaw tal lei ve ka duh si a, han chhuah daih lah a rem ṭeuh bawk si lo nen u Tetea office kal tur chu Sêntei ka zui tir a, kei aiin lei tur awm an hre zawk ang. Tikhan chance ka pe pah ni mai rawh se.
Ka nu a lo leng phei a, kan chhungte ve ve aṭanga an tu hmuh hmasak ber a ni bawk nen ka nu te pawh hian Bawihtei hi an ngai ve thei lutuk a. Tihian a chang changin a rawn leng phei ve ṭhin. Bawihtei han changkang ve deuhse u Remruata dam ṭhat hunah te chuan ka la lenpui fo ang, ka pa pawhin a ngai ve thei em maia, ka khawngaih ṭhin.
Nilengin a pite pahnihin an awm bawka keichuan inchhung sekrek neuh neuh ka khawih zung zung a. Bawihtei thawmhnaw leh puante ka su a, khua a vawt tawh bawk nen a zung reng mai a. Insuk tur hi a tam thei a nia aw...
Buai tak tak hi chuan ni pawh hi rei kan ti hman meuhlo zawng a nih hi. Nu nih hi a lo na mai lo khawp mai! Hetia min lak chhawk rengtu hi nei lo ta ila ka hah theih ngawt ang. Ka vannei em mai pawh a, hmeichhe dang an fa pakhatna pawmte ai thlawt chuan ka hahdam fe zawkin ka ring..
Sêntei lo hawng chuan naute mutna tur ṭha deuh mai hi a rawn pawm hawng a. Bawihtei ta ang deuh tho a ni, "Tu thlan nge?" Tia ka lo zawh chuan u Tetea thlan a nih thu a sawi a, ka rinlawk sa reng a nia..a thlang thiam em mai.
Hmun danga chaw ei tur kan ni bawk nen khaw thim tak tak hmain ka inbualfai a, ka nuin Bawihtei chu a lo tifai ve thung a. U Remruata pawh ka in tihfai pui a, a thawmhnaw hak tur thlan sakin ka hak tir thlap a. Kailawna kan chhuk tur chu Levi-an min rawn pui a, muangchangin kan chhuk hret hret a, eng em tawk lovin kan thleng thla thei mai alawm...
Ka pa driver-in min va thlah dawn a, kan chhuah fel meuh chuan khua a thim fel der tawh.
Isaac-a te gate chhung kan tlan luh chuan motor ka hmuh hnu vek chu a lo ding ṭhap tawh a, ṭhianho chauh an tih avangin tam kan ni lovang.
Bawihtei ka pua a, inchhungah chuan kan inzui lut nghal, "Hei le an rawn thleng ve thei ta hram alawm..! Kha Remruat i va ṭha tawh ve a..!" Julie-i chuan a lo ti hliai a, "Ka ṭha tawh lutuk hei," ka pasal pawh chuan a lo ti ve mai a. A ṭhiante ho chuan an lo pui vat a, an zingah chuan ṭhu vein an nui ho nghal dar dar...
"Awi khawimaw kan hmelṭhatei chu...ka lo nghakhlel tawh lutuk a in rawn kal loh ka hlau teh asin, in ṭhatna lai zawng zawng hi a chhun fai vek emaw tih mai tur a nia...hei te hi chu a piang fuh ve thlawt alawm!" Bawihtei lak pahin Julie-i chuan a ti luam a. A chuk mawlh mawlh mai a, achang leh a sawi leh nawk ṭhin.
"Hey hey hey! Jul-i kan naute neihchhun kha i lo thing khawlo zo ang nge," u Remruata'n a rawn tihchuan ner nang nang pah hian, "Awiah! I over e...mite pawn fa an nei ve tho nang ang em em an ni lo! In pa over zia hi nau ena kan rawn kal ṭuma ka pawm ve te khan 'I thloh ang nge' a lo ti ve chhen a, ka pawm tui lo zo vek zel!" Julie-i chuan a ti deuh hlak hlak a.
Ka lo nui tet tet ringawt, "Aw...fa tir aṭangin tarlam fa a ni nghal a...keh thei dawm tak meuhva an dawm a nih kha lo dim hle rawh," Peka'n a rawn ti ve leh a. An nui nghal dar dar...
"Khawnge Latei hi?" Hawikual thuak thuak pahin ka ti a. Kan thlen tirh aṭang khan hmuh tur ala awmlo reng reng a, "A kawr thlak turin pindanah a lut a ni lawm ni...Isaac, khawnge in nu hi?" Bawihtei pawm ṭhat pahin Isaac-a ṭhutna lam chu a melh a.
"Ka inthiar dawn a tia ni lawm ni?" Pakhat lahin a lo ti let he haw a, ava han manganthlak ṭhin tak. "Aw...hemi te paunih hi chu aw...tirawh pindanah chuan va lut ve daih ang helaiah chuan an bengchheng hlawm em mai," a tih takah chuan Isaac-a te nupa pindan lam chu kan pan dun a.
Kawngkhar chu kik buai lem lo hian Julie-i chuan a hawng tlang hmiah a, Latei chu chhuatah ṭhingṭhi chunga lo ṭhuin a kiu pahnih chu khumah a nghat a. Games bawk a lo khel leh cher cher mai!
"A mak a nia nu ber hi heti hian pubg a khel pur pur zel! Kha i kawr hak te kha bal anga sin ṭhu chho rawh..!" Julie-i chuan a ti hlak hlak a, keichu a che vel hian ka nuih a ti za tlat zel..."Yes! Kan chak e ava nuam em!" ding hluai pah hian Latei chuan ala rawn ti zui a, heidawn hmel fe hian Julie-i chu a thaw halh ringawt.
"Tihian an fa pahnihna tur a pai mek chu a ni sia...ka bei a lo dawng lawk," a ti ta thlawt. "E, Rose in lo kal thei maw, in lo kal loh ka hlau teh a nia Chhurbura pawh ka hrilh nasat kha. Bawihtei chu ava han lian chak em em ve a engtin nge in chawm bik? A biangte hi hei a far lo chauh tawh a nih hi mawle...," tiin Bawihtei biang chu a han piai sak zeuhva.
Kan pathum chuan pindanah kan inkawm ta reng a, "Latpui khawiah nge tv remote hi i thuhruk leh tawh a?" Isaac-a chu kawngkharah lo dakin chal chuar nang hian a nupui chu a rawn melh a. "Aw...sofa karah te khan en ve la...ka thuhruk pawh a nilo i fapa in a khalh bo leh tawh aniang chu va zawn tir mai rawh," ngaihsam fe hian Latei lah chuan alo ti mai a.
"Ṭawng pawh la ṭawng fiah thei lo sawn engtin nge a hriat anga lo kal lawk mai teh inkhel en ka duh a nia..!" Isaac-a lahin dawhtheilo tih hriat zet hian a ti ve tlat a.
"Huiham! Ka tello hian awm thei reng reng lo mai...," thawh kan paha ti sepin an pa lam chu a pan ding nghal a.
"Kal rawh Chhurbur, min ngaih chhuanlam a ṭhing em mai..!" An pa awma nam dat pahin Latei chuan a han ti hram a. Ka lo nui pat pat, "Leh ringawt ṭhin hian a, i mang chhiat chhiat nen eng ramsa nge ka mutpui tak tih mai te pawh awl tak a nia," Isaac-a chuan a ti bul bul a.
"Ka tello chuan i mut theih der loh kha a," pakhat lahin a ti liam puat a. An thawm a reh thleng chuan ka nui khur char char..
"Latei te nupa hi keichu ka lawm e...an bulah hi chuan ka nui chawl lo reng reng," thawk halh pah hian ka ti a. Ka pum a na ṭhum mai alawm..!
"Sawi lo mai teh an che pui thei teh mai a nia.! Latei tlan tur pawh an pain a thlah thlap thlap kha a nia...che common lo nupa thei a nia," Julie-i'n a tihchuan ka beng a verh ang reng khawp mai, "Eng nge i sawi awmzia Latei tlan tur Isaac-a'n a thlah a maw!?" Nuihza si awih harsa leh mak ti bawk siin Julie-i chu a melh ha a.
Nuihzat in sum hmel zet hian, "Latei'n min hrilh a nia, an inneih thla hnih thum hnu velah khan Isaac-a nute zin chhuah hlan hian eng emaw vangin an inhau a ni awm a, chutah Latei raino thinchhiat lai leh rilru tet lai lo ni bawk, a zan a zan khan a thawmhnaw pack a, chhuah a tum ta mai. Zan reh lai a ni bawk nen taxi hman tur phei chu a awmdawnlo chiang mai si a, Latei chu a luhlul ve bawk nen Isaac-a khan a dang thei dawnlo tih a hria a, amaha chhuah tir tawp kha a hreh ve tum hranga an inah ava thlah ringawt alawm," a sawi zawh rual chuan thawm chhuah meuhvin ka nui chhuak nghal hawk hawk.
Nupui te tlan tur thlah ṭhin tu mipa mah ka piana hnulamah ka la hre ngailo.
"Tikhan a tuk lawkah Latei'n hruai turin ava ti leh a, inthlem buai pawh hi a ngailo reng reng...ni hnih lek pawh awm hrang thei mang si lo hi an inhau ve reng a, an chhungte pawh hian an enliam vel mai mai tawh alawm. An inhauh pawh hian thu tak hla taka lakpui chi pawh an ni lo," Julie-i chuan a tileh siam siam a, ka lo ngaithla uluk viau mai a. Nupa dangdai ve tak chu an nih ngei dawn hi.
Dar 7 velah chaw kan ei a, Latei te fapa chu a han harhvang mai mai khawp a, a nu thleng chu a lo zen pui ve zel a, a biangah te chuan buh mal a kai nian nuan tawh.
"Awi a hahthlak em mai nang nena chaw eidun chu a! Ei pawh kan ei puar ve thei dawn hleinem...hei en rawh ka kawr pawh a balh vek tawh hi..!" Tiin Latei chuan a fapa chu a han melh rum kha kha a, pakhat lah chuan engah mah ngailo hian anṭam kuang chu a bianga a lo vaw bet thlep thlep a.
"Khawi ka lo la ang va in tifai la ei ṭha leh mai rawh," Isaac-a chuan a rawn ti ra hlauh va. Latei a han thawh chuan a mal chunga a fapain chawmal a ham thlak zawng zawng chu a rawn tla thla ur ur a. "Min hrethiam mai teh u hepa nen hi chuan ei fel fai theih pawh a ni lo," tiin a thleng chu a la a.
"A ho lutuk keini pawh khatiang chiah kha kan ni mai," Manghaka nupui chuan a lo ti thuai a. An fapa te chu apain a awm ta bawka a inhlei lutuk tawh lo. A hmelṭhain a chum reuh bawk si piai nawk nawk hi a chakawm reuh a nia!
Hun nuam tak kan hman ho hnuah dar 9 bawr velah kan hawng a, kan thilpek pawh Latei chuan ṭha a tiin a lo lawm thiam khawp kha.
U Remruata chuan nitinin hma a sawn chho ve zel a, han fuih phur luam dan hrelo mah ila ka theihtawpin ka pui a. Ka thiam danin ka enkawl a, ka thinlung zawng zawngin ka hmangaih bawk.
Christmas-ah chuan Jaden-a pawh a rawn hawng chho ve ta a, a lo ṭhangbelh nasa mai a, a tleirawl hmel te pawh a paih ve hlawk mai alawm. Bawihtei a han hmu chu a pawm ve ngei a. U Tetea leh Levi-a ai thlawt chuan a awm zei e.
Chutiang ang chuan hlim takin chhungkaw kimin hunpui kan hmang liam a, ka pasal pawhin inlam aṭangin hna a khawih thei tawh bawk a u Tetea chuan a hna a zawm leh ta a. U Remruata thawh theih loh chhung zawng khan ṭha takin a lo thawk a, engkim chu a kal tluang rih viau mai.
Sêntei chuan Christmas helama a hman avangin kum thar chu an khawlamah a hmag ve dawn a, u Tetea'n Sêntei te khaw bul lawk thingtlang khaw pakhata an biakin chhung a khawih sak dawn avangin a thlah nghal dawn a ni.
An kal hma khan ka pa chuan u Tetea chu tu te nge a zinna tur khuaah chuan lo va tlawh ngei ngei tur leh an chan chanchin ngaihven turin a chah mawlh mawlh a. A ṭhianṭha tak ṭhin nupui fanau te niin a hria...
Kum thar ni chuan chhungkuain kan inkhawm hlawm a, Bawihtei pawh a pi kawrmawi leisak hain a puk ve chhap mai.
"Ti rawh u mi hawng rem deuh hnuah thla kan la ve dawn a nia," ka nu'n a tihchuan biakin chhungah kan ṭhu kawi a. La tur an tam si a, kan nghak rei viau maithei a ni.
"I pa nen inhnuaiah thingpui kan lo zu in ang nge min lo ko mai dawn a nia," tiin ka pa leh ka nute an inzui chhuak ta daih a, Bawihtei chu a patea te pahnihin an in pawm chhawk a, kan naute neih chhun a ni bawk nen an lawm ngang mai. An hmuam lo chauh hi a ni ber....
"Saw k'u Hmelṭha mi awmloh lai tak sawn va ding vat rawh ka laksak ang che," tia nauan min kaihthawh lawp chuan, "A...mahni chuan ka duh biklo nakinah kan a ho zawk dawn nia," tiin ka ṭang ve ṭung a.
"Tumah vak an awm tawh loh hi va kal rawh," ka pasal chuan a lo ti ve bawk a. An unau nau a min nawr tak sekah chuan hnial sen an ni lo. Keimahin maicham hmaah chuan ka ding ta ran a, Levi-a chuan a camera awrh chuan min tin ran a.
A hnunga ka pasal leh fanu ten min lo thlir reng a ni tih ka hmuh chuan ka nui seih a,
"Aw ṭha lutuk tikhan! A nalh, a nalh!" Naua chuan a ti hlut a. Ka zak dawn dawn...
"Tunah chuan inchhungkuain aw," Jaden-a'n a rawn ti ve a. Naua hnunglam chu ka en vat a, ka pasal chuan Bawihtei chu a pawm a, a ṭhutna aṭang chuan muangchangin a tho chhuak a...thinphu dep dep hian ka lo thlir reng ringawt.
Tunah hian ka hlimna hi eng nen mah ka thleng phal lo vang.
Ka khawvel, ka engkim, ka nunna leh damchhan ka pasal leh fanu neihchhunin tunah hian ka lam panin an lo kal mek a, hlim luatah mittui a hnai kuar a, a ke pahnih ngei maia ka pasal a kal pangngai leh thei ta tih ka hmuh chuan hnuk a ti ulh ṭeuh mai.
"I mithnawih a pherh ang ṭah awih loh," ka hmaa an lo din rualin ka pasal chuan a lo ti sup a. Ṭah nuih hakin ka bu nghat nghat a, "Kan chhungkuain thla la ve ang aw...," tiin Bawihtei zawk a en a, ka sirah lo dingin ka ban puar laiah a rawn hmer vang vang a.
"Le, helam lo hawi rawh u le...in mawi chhungkua lutuk," Levi-an a tihchuan hmalam hawiin kan insiam rem a.
Ni e, hei hi ka chhungkua, ka hmangaih em em te an ni. Khami ni ka pasal tur a ni tih ka hriat ni khan hmeichhe vannei tak ka ni tih ka lo inhre ngai hauh lo va, ka duhthlanna siam hi ka inchhir lo hle bawk.
Kha duhthlanna kha ka lo siamlo ang tih ka hlau tawh zawk hial a ni.
Kan inhmangaihna thing kan phun chuan thuk takin zung a khaih zel a, a zar te lo pharhin hnah thar a chhuah a. Thlipui leh ruahpui ten a nuai chang pawhin a dinna ngaiah nghet takin a ding reng fo tawh anga, kum tam tak a ding reng ang a, a nghet tawlh tawlh bawk ang.
He ka thinlung pakhat hian hmangaih pakhat a nei ṭhin a, tunah chuan pahnih an ni ta...tawp chin nei lo ve ve a ka damchhunga ka hmangaih tawh tur ka pasal Remruatfela leh ka fanu Rosemary Varampeki-te hi chung Pathianin min pek avangin a hnenah lawmthu sawi ka bang tawh lo vang...
*********A TAWP TA*********
Tihian '1 HEART 1 LOVE' chu a lo tawp tak tak ta a, induhthusamin a tawp lo pawh a ni maithei a, inhriatthiamna ka rawn ngen nghal bawk e. Min chhiar saktu leh nghakhlel taka lo chang ṭhintute nangmah ni vang liau liau a he story hi zo thei ka ni a, thinglung takin lawmthu ka sawi a, ka story kal lai 'Thingtlang mistiri leh Kei' tihah khan kan insawrbing tawh ang a, in lo chhiar leh ṭeuh dawn nia...
