☆TE DOY 15K☆ CH-24 By Abbra Reo Ririni Khiangte(Pitartei)

[Abbra Reo Ririni]

Jayden chu zing dar 7 velah a rawn harh ve ta chiah a, ka lo muhil leh hman țep bawk.
"Mum, khawnge apa?" A mit pawh la meng mang hlei lo chuan a rawn ti ve țiak a!
"Jay, Good morning." Ka chhan hma in Zothana zawk in a rawn chhang vat a, Jayden pawh a in perh tho ve nghal vat a, khum mawng lam a Zothana rawn țhu kai ve chu a bawh ve ta rak rak a!
"Apa, hei kan new house ami?"
Zothana nui deuh suk chu en zui duh lo in puansin chuan ka in lukhup zui hmak a, Jayden nen chuan an inbe zui ta reng a, Kei erawh ka pik țun mai!
Zico bulah ka bag ve kha ka hnutchhiah ta daih si a, tah khan ka lehkha pawimawh leh bank book zawng zawng pawh a awm vek! Khang ho tello chuan engmah ka ti thei dawn der mai silo.
"Mamma?" Pangchang zet a Jayden a rawn țawng ve ngâng ngâng tak ah chuan thawk ka la halh a.
"Apa in mall ah kal ang u a ti.." ka puansin lai rawn keu hawn ve rak rak pah chuan a rawn ti a.
"Jay, kal chhuahna tur kan nei, hmun danga kal a țullo.."
"Bawihi..?" Zothana rawn phun sup chu ka melh duh lo reng reng, hna ka zawn tur thu kha ka ti mai mai lo a, duhleh online hmang pawh in MBSC ah ka lehkha pawimawh ho kha ka dil mai ang.
"Mamma hi a intifai lawk a nga, kan kal chhuak dawn nia." Ka ti a, Jayden chu a nur nâng a, khum ațang ka tho chu ka banrekah Zothana'n a rawn man chawt a.
"Inbe teh ang." Hnial luih ngam miah loh a fiah hian a rawn ti zui nghut bawk! Ka nui lui hak a.
"Kan inbe reng lo a mi?"
"Bawihi?"
"Ka hmanhmawh, hlawh ka neih ve hunah he hotel awm man pawh hi ka rul let ang che " ka ti kher a, a thinrim in control tum tih hriat zet hian a rawn thawchhuak ham ham a! Ka kut a vawn chu ka thing thla zui nghal nawk bawk.

Washroom ah ka lut a, mamawh a awm vek a, hotel a emergency ti ila ka sawisual lo ang, thuamhnaw hak thlak lo awm sa chu ka enkual leh thuak a, an hotel hming chuanna shirt var leh pajama var hi ani deuh tawp mai!

Tui lum in ka inphuh sar sar a, Ka bank book ve ah khan pawisa awm tam lo mahse hna țha ka thawh ve hma a kan nufa in enkawl na khawp chu a awm a, mahse chu pawh chu ka kutah a awm leh tawh bawk silo, Ka hna zawnna tur hmun pan tur pawn taxi emaw auto emaw ka lak a ngai dawn a, chumi tur takngial pawh chu ka nei chuang silo a.
Ka thaw hawk a, midang te nun a awlsam bik em em lai hian ka nun ve hi chu a harsa mah mah zel, ka kut ah cheng khat pawh ka kawllo a, keimah mai nilo in fapa ka la nei tel zui bawk! Zothana hnen ațang engmah dawn ka duh tawh lo a, Hah! Nonoi kum 5 chhung a lo enkawl tawh tih lah nichin mai khan ka hre ve chiah a, a pawi tawp lo e, khawvel ah hian mihring tlem te ka hre ve a, chung ka mihring ka hriat awmchhun te lah natna min pe tu te vek an ni!

"Tah khan i thuamhnaw tur a awm." Washroom ka chhuahsan rual chuan Zothana chuan alo ti sup a, a ban lek vutna lam chu ka en a, cabinet lian vaklo khum bul ami chuan ka mit a la nghal chat bawk.
"Nono-i thuamhnaw hlui maw?" Nui lui sak chung in ka ti a, a mit ko a chuar táp a, min melh zui khûi bawk!
"In ha la eitur siam ang che.." ti hmuk pah in a inher zui vut a, ka sam huh hrukna towel hian vawm zui pawp mai ka duh rum rum, choka zau vak lo hi alo awm ve reng a, Jayden chu stool sangah a țhu a, Zothana pawh phone hmang chung in Jayden bulah chuan a ding ve a.
"Mum?" Zothana zawk a rawn in her zui vut a, min hmuh rual chuan phun luk pahin phone chu a ti tawp a.
"Cabinet ah sawn i thuamhnaw hak tur a awm ka tih kha..!" Hrelo ka ni reng reng lo, haksak ka tum loh vang zawk ani!
"Ka mamawh lo." Awlsam zet in ka ti liam puat a, ka pen lut ve a, a thaw ri hawk bawk!
Gas lam ka pan a, coffee lumna bik ah chuan tui ka dah lut a, artui leh chhangthawp ur thar hlim chu basket ah tui hnai zet in a lo inchhawp sa thlap bawk.

"Jay, Apa phone hi keng la, khum ah lo zuk awm rawh aw, Mamma leh apa hi kan inbiak lawk angai a." Zothana aw ri dam thlup vang chuan ka lo in sangmar vak a, Jayden tlan ve terh terh thawm ri hla ta tial tial chuan ka thawk a tirang vek bawk.

Boruak dang ta hlawk vang chuan ka zam ru ta kher mai!
" Ka chet dan eng khan nge i lung ti awilo a?" A rawn ti sup a, coffee tui rawn so chu ka ngaihven san daih a!
A ni thin in alo tuar leh tawh bik silo.
Ka darah na zet in a rawn țham zui ta sawk a, ka ang zâwk thei!
"Min ngaipawimawh lo viau zel suh." Ti sup pahin amah hmachhawn turin min pawt her ta nawk a!
" I call kha ka duh vang a chhang lo ka nilo tiin vawikhat tal i ngaihtuah chhin em?" Gas hunna in dawhsang bik a min nawr bet pah chuan a rawn ti sup a, a țawng zawih danah chuan Jayden a vengthawng hle in ka hria!
"I duh vang nilo se kha hmeichhia kha i chhan tir lo ang.."
Ka hnung a gas inhunna chu a rawn beng ri deuh dàwp a, ka la phu zawk zui!
" Nono-i kha ka chhan tir lul lo.. Phone ka inah ka theihnghilh vang zawk alawm.." a rawn ti țhawt a! Dawheh lutuk!
"Oh.. chuti maw? "
"I ring emaw, ringlo emaw pawh nila i call chhang turin midang ka hrilh lo, chuan , i hriat loh a Nono-i ka buaipui pawh kha sawina hun a awm reng reng em? Tinge engmah ngaihtuah chiang hmasa lo hian min runluih zawng a khawsak phet i tum țalh a, ani ka lo enkawl pawh chu a sual viau a mi?" A thusawi tawp chuan min chhun zawk! Thal mu in taksa a chhun tlang záwk ang chiah hian ka na a, a țan hlum lo chauh tih lah a chiang reng mai!

"A suallo, i duh duh i ti thei.." Ka nui lui sak a, Hman ațang a tum ber ţhin chu a nei ta bawk e! Ka lak ațang Zothana lakhran kha a tum ngawrh bawk a! Tunah chuan a nei ta alawm.
Ving zet in choka ațang chuan ka kal chhuak hlawk hlawk a, Jayden bula kal ta mai lo chuan balcony ah ka kal chhuak a, boruak ka hip lut zui nghal kawk kawk a! A țha e. Ka nun aţang hian kal chhuak vek rawh se.. an vaiin , an zavai hian kal chhuak vek se, tu nen mah inzawmna neih ka duh tawh lo , tumah hian min lo ngaihtuah ve tak tak ngailo bawk! Ka hlat tak ah kal bo vek rawh se!

Nimin lam a ka thuamhnaw hak ho chu ka inbel sawk sawk a, he hotel ah pawh hian ka awm tawh lo ang, a duhtawk in kha hmeichhia kha va ngaihsak rawh se!

Ka thinrim bawk si chu ka insut leh hraih ţhin a, Ka thuamhnaw pangngai ka inbel zawh vek hnu chuan khum a Jayden games khel lai chu ka pawm kang zui nawlh a, a lo hrethiam lo nasa mai si.
"Mamma,"
"I chappal bun rawh.." lei ah ka nghat thla a, khum bul a a chappal chu a ke tereuhte ah chuan ka thawlh sak nghal sawk sawk a, Nu ka ni a, ka fapa nen kan ei khawp lek chu ka thawk chhuak ve thei em em ang!

Jayden pawm chung chuan kawngkhar lam ka pan zui hlawk hlawk a, choka a Zothana lo ding ngawi ngul kan kalpel lai te chuan hrehawm tih hmel zet hian min lo en ve rûn a! Hah! Ka hmu sual ani ngei ang, hrehawm lo tih chhan tur pakhat te mah a nei lo.
"Mamma, khawnge kan kal dawn?" Kawngkhar ka pawh phui rual chuan Jayden chuan a lo ti vat a! Ka hriat mai bikloh zia sawi khum chiam ka duh lo.
"Hmun nuam deuh ah.." Nui luiin a chalah ka fawp zeuh a.
"Apa kha?" 'Sawi ziah tawh suh' tih vak mai hi ka duh a.
"Ani chu hetah a awm a ngai a lawm." Ka tisep a, ni e.. Heng hmun ah te hian Nunhlimi pawh kha alo hruai ve tawh ngei ang, cabinet ah ka thuamhnaw tur a awm maw? Ani thuamhnaw hnutchhiah bak kha va ni suh!
Inhnuai lamah kan chhuk thla a, phone hman tur ka neilo a, ka kutah cheng khat lek pawh ka neilo! Counter lampang chu ka pan vat a.
"He ta țang hian Bandodkar Marg, Campal a hla em?" Hmeichhe pahnih lo țhu te chu ka zawt a,An rawn nui sang a.
"A hla ve ang reng a, taxi emaw in kalla a fuh ang."an nui sang a, Taxi fare tur takngial pawh ka neilo.
"Ka lawm e.." ka ti sep a. Ngopa a ka awm lai khan Showroom Hostess hnaruak kha ka hmu fuh a, hlawh a chhe hran lo a, hna țha nghah nana lo thawh zawk ka hreh loh vang in thawktu te lam pawh ka be kual zuai tawh nghe nghe.
Jayden pawm chung chuan pawn lamah ka kal chhuak a! Ka țah te hi a chhuak țun mai! Cheng khat pawh neilo in engtinnge ka thlen theih ang!
Ni sat dan a la rum lo a, ka fapa engmah hrethiam ve bawk silo hawi kual veuh veuh chu țah chhuak țun chung hian ka en a, keimah aia nu țha leh nuamsa tak a siam thei tu nei tur zawk ani a sin.
Zothana room ah khan engmah ka ei hman bawk silo a, ka pum chu a ri deuh rawk rawk reng a, Jayden ka ngaihtuah zual sauh bawk.
"Jay, i rilțam em?"
"Aih, apa in cupcake min pe a lawm."
"Ok, a țha e, kan kalna tur a la hla deuh sia, nangmah in kal la. " nui chung hian ka ti a,A bu ve nghat a, lei ah ka nghah thlak rual chuan a ban ka chelhsak zui vat a.
Kan thlenna compound bik kan kal chhuak țep tawh tih ah kan bulah car dum hi a rawn ding chawt a, a chhungah chuan kawrvar vek ha driver hi a lo țhu a, kan thlen hlim a gate vel lo vengtu inthuam dan chiah in kutkawr var a bun tel a, lukhum var a khum bawk.
"Deltin Suites a mikhual te kha in ni tiraw?" Vai awphawi zet sap țawng hian a rawn ti a.
"Aw."
"Kal duhna in neih chuan ka hruai ang che u; Kha suites a thleng te hman a tan free service car hi a awm reng alawm." A rawn ti a. Ka lawm lutuk chu ka mumang emaw ka ti rum rum mai!
Kan țhu lut vat a, kan kal duhna ka sawi chuan a bu nghut a, car hma a phone ah chuan eng emaw hi a type lut a, Google map a hmang chawp ve dawn tho a nih hmel, mahse ke a kal thlen tawp ai chuan a tha zawk tho tho!
Reife kan tlan hnuah Car Showroom lianpui kawt ah kan ding ta ran a, ka lehkha pawimawh tel miah lo in ka kal a, min lo ruai duh kher a ngem?"
Jaydenam kai dat dat chung chuan darthlalang kawngkhar chu ka pawt hawng a, hnathawk tu te chuan min lo chhawn thuai a, kristian ram a dawr nghaktu te ai hian ringlo mite rama dawr nghaktu te hi biak an nuam daih zel!
"Puih theihna che u ka nei em?" Nui sang a min rawn en in Jayden chu a thlek zauh a,Ngainatawm deuh hian a nui zui a.
"Aa.. in manager hi biak lawk ka duh a."
"Ok.. he lamah min lo zui la." A kalna lam ah chuan kan zui a, showroom chhung chu a zau in a thianghlim em em a, car man to zet zet a inhung phui khup mai bawk.
Pindan pakhat ah min luhpui a, Mipa lian angreng lo țhu chuan min lo welcome zui vat a, min hruaitu kha a chhuak zui leh nghal daih bawk.
" Nizan hmasa lam a lo be tawh tu che kha ka ni a." Ka ti a, a meng zui awk a, ka bul a ka fapa țhu ve then chu a melh leh a.
"I lehkha pawimawh vel ka lo en ang." A ti nghut a, min hruaitu nen kha chuan in anglo tak an ni.
"Pawi ka ti lutuk, harsatna vang in ka rawn keng tel thei lo a, mahse he hna hi ka mamawh lutuk a.."
"Lehkha pawimawh tello chuan engmah ka tihsak thei lo che, Mi thiam tak tak lo ka ruai anih chuan ka hna hi ka chan phah thei tih min hriatsak ka ring!"
Tinge maw ka tan hian kawng engkim hi a ping vek mai le.
"Ka lehkha pawimawh ho chu ka theih ang a rang in ka pe ang che, mahse chumi hma chu hnathawh tur ka mamawh lutuk a."
"Madam , pawi ka ti lutuk, mahse lehkha pawimawh tello in mi tu tih hriat loh ka chhawr ngawt theilo."
"Min hriat kha, a hma pawh in ka lo biak tawh che kha.." ka ti a, ka harsatna hi hrethiam hram se ka duh tak zet!
"Sorry, hna rawn diltu dang nen ka hriat pawlh vek che u a, tunge i nih ka hriat loh ang bawk in call lama min rawn be tu hi chu an tam lutuk!"
Ka thaw hawk a! He hna hi ka mamawh tak zet asin!

Ka bul chair a ka fapa rilru thianghlim tak țhu ve at chu ka melh a, ka mit ah chiang zet hian min lo en ve kal a. Amah vang chauh tal pawh hian hna ka mamawh lutuk!
"Sir, khawngaih in.."
"Ka hna hi chan ka duh biklo, lehkha pawimawh tello chuan ka chhawr theilo che." A ti fuk a,
Dil lui engang mahila a rilru ka sawhsawn sak thei ngai dawn lo tih ka hre tawh.
Beidawng zet in Jayden chu ka kai a, a pindan chhung bik ațang chuan muangchang in kan pen chhuak a, ka fapa hi chhunah te a ril lo țam ta se engnge ka eitir ang!
"Jay.." hmai zangthal haw hian a rawn dak chho a, a va han duhawm chiang tak!
"Mamma leh Jay hi vanram ah kal daih ila i duh em?" Fiamthu titak deuh hian ka ti a, ka nun hi a beidawng em a tin ni!
"Mummy hi haw suh aw." Ka ti leh sep a. Nisa vûl hnuaiah chuan pan tur ber pawh hrelo hian ka hawi kual ruai a, kawngpui engemaw ber hi ka zawh a ngai dawn a, mahse ke pen a, zawh țan tur pawn khawi ber nge ka zawh ang tih ka hre chuang silo a.

"Miss Zo?" Showroom ațang manager kha a rawn tlanchhuak a, a hah hmel kher mai!
" Aa... hna i mamawh viau chuan kawhhmuh theih che ka nei." A rawn ti a, ka thaw vak a, ka hlim lutuk chu au chhuah vak mai ka duh tawh.
"Ka lawm lutuk.. Vawiin ațang ka thawk țan nghal thei em?"
"Thei e.. A.. Mahse i fapa.!"
"Ani chu buaina tur anilo, i hna sawi chu min hrilh hram la.." nui pah chuan ka ti a.
A'n thawchhuak hawk phawt a.
"Spa lampang ania."
"Oh?" Ka ti ro halh a.
"I landan ah hi chuan sum i mamawh tak tak a ang a, chuvang chuan ka hmelhriat pakhat ka biak sak che a, a bulah chuan kalla a țanpui thei ang che "
"Ka lawm lutuk, engtinnge an awmna ka zawn hmuh theih ang!" Ka lawm zia chu a hrethiam lo zawk ang, spa a ka thawh ka ring ngailo a chu tunah chuan duhthlang thei ka ni lo.
"Ka'n call leh ange, a hnathawk tu emaw in a rawn hruai thei ang che u, sum a tam a, i thawh duh dan a zirin darkar khat lek chhung in cheng sang fe ila lut nghal mai ang " khi deuh suk pah chuan a ti a, a kekawr ipte ațang phone a la chhuak zui zat a, ka țawng hriatthiam loh in an inbia a, a țawng pah chuan min rawn en zauh zauh zel a, Jayden chanchin pawh a sawi tel ve ani mai thei!
Minute 3 hnu velah chuan an inbe zo ta hram a, " Cafe ah sawn lo nghak ula, a rawn thlen veleh ka rawn kalpui ang. " a ti a. Kan piah deuh a cafe chu a kawk zauh a, mahse pawisa engmah ka neilo a, Jaydena'n eitur lo ngen palh ta si se.
"Aaa.. Hetah kan lo nghak mai ang.." ka ti a; chu pa chuan min en deuh vang vang a, chil a lem zui ta khawlh a!
"Pawisa i nei miah lo ami?" A rawn ti a, ka nui tawi tak mai!
"Pawi ti duh suh, i hnathawhna turah hian i fin thiam chuan sum a tam dawn lawm." Mit siai zauh pah in Jayden sam ah chuan a rawn khawih thuak a! He mihring hi rin tur a ni em tih pawh ka hrelo, mahse tunah rih chuan rinna aiin sum ka mamawh a, darkar reilote a liam leh chuan ka fapa hi a ril a rawn țam anga, chuta a thil eitur leina chu ka mamawh tak zet!
Kan bulah car a rawn ding dat a! Ka zam ru lutuk chu ka kut a thlan huh dap tawh.Vai palian pui, lukawlh mul si, a chal a thilsen in hnawih hi a rawn chhuak ta vut a, ka bula manager nen chuan an han in nuih kher a.
"Miss Zo-i maw?" A dul a kiar deuh luah a, a kutphah chum buang mai chu a kutphah lehlam nen a hmer kawp a, min en chik ngang bawk!
"Aw.."
"Hei i fapa a mi?"
"Aw."
"Naupang nen hnathawh kan phal ngailo a, mahse i hnathawh țhat dan a zirin i fapa pawh hi nitin i rawn hruai ve ka remti ang!" Vai aw phawi zet broken english deuh hian a rawn ti a.. Jayden ka kianga hruai ve zel min phalsak chu ka lawm hluah hluah!
"Aw le, ka theihtawp ka chhuah ang.."

"A țha e, Kan kal dawn mi?" Ka darah a kut a rawn nghat zawk a, mahse amah zawk pawhin hria ang in a awm lo a, a la sawn leh mai bawk a, manager nen chuan vai țawng bawk in an inbe leh rih a , an thusawi ka hrethiam lo a chu an nuih huah huah dan ah an hlim hle chu ani phawt ang!
" My friend get in the car." Jayden a ding zum reng chawh phur tum pah chuan a rawn ti zui lawng lawng a, ka nun a thleng thei ngai pawh a ka lo la dahloh chu a thleng mek zel chu ania. Car kawngkhar chu a rawn pawt hawng a, car chhung a seat dup nawm hmel zet chu ka melh a, cell phone ka nei lo a, ka id card ka kawllo bawk, tu tih hriat loh leh mihring ka vawikhat hmuhna lehnghal hi nunphung pangngai a ka din lai kha nise chuan ka zui ngailo ang!
Mahse tunah hi chuan ka fapa rilțam hunah eitur pek ka ngai dawn a, ka kut ah lah cheng khat lek pawh ka nei silo!
"Jay, lut ang le.." ka ti sep a, mahse kei ngei pawh chu engtinemaw tak hian ka tîm dâi a.
" Vawiin a i thawh țhat phawt chuan i tan ni ropui tak ani ngei ang... Darkar reilo te chhung in sum i siam țeuh thei dawn nia.!" Vaipa chuan a rawn ti leh a. Car chhung a lut tur chuan a ban phar zauh in min hrilh nawn leh a.