VARGHESE - 18

[Elty Hnamte]

VARGHESE - 18
www.storyfb.com

ELTY LUHLUL AUG HNAMTE


' Hi.... Ka hming chu Randy M.s Varghese ania, i bul a thut ve i phal avangin ka lawm e' tihpah chuan a kut a rawn phar chhuak a, mipa smart tak ani. A ha a var rual em em bawk. Tin, Indian a ang lo. Mizo hmel a pu lek lek. Mahse a pian leh a hming erawh a Mizo lo bawk si.


‘ Elty ka nia. Ka ta bik ani hleinem’ nui sang chuang a kut chu ka vuan zauh a, a nuih suk chuan a biangsum chu a lang chiang ngei mai. A khabe hmul to siar siar chuan a tilang pa takzet.


‘ Hetah hna i thawk nge lehkha i zir?’


‘ Hna ka thawk. Nangzawk?’


‘ Ka nu sumdawnna enkawl tur in thla hmasa khan ka rawn kal a, ka accident a, haw ka tum deuh a, mahse ka flight ka nang lova’


‘ Ooohh... Anih chu. Ava pawi ve. Khawi atang nge ilo kal?’


‘ Kerala lam. Nangzawk?’


‘ Keichu Mizoram’ ka tih chuan ka ngaihbel nge a insangmar teuh in ka hria.


‘ Kan inhmu chu ka lawm hle mai. Nu leh pa hmeltha tak i nei anih kha’


‘ Ka lawm e. Ka kalsan phawt ang che. Bazar ka la duh a’ tih pah chuan ka tho hliai a, rang zet chuan a rawn tho a, mahse a au tak thawt ah chuan thutthleng ah chuan a thu leh hnawk a, rang zet chuan a kut ka zuk dawm a, a then chak chak chu ka en reng a, Kima ka mitthla ah a rawn lang. An in ang reuh, a na ti then hmel chu hmuhnawm ka ti riau pek.


‘ Khawi hmun ah nge i chen? Taxi ka koh sak ang che aw...’


‘ A ngai lo ve. Ka driver ka phone tawh a, min rawn lam mai ang. Ka nu chuan hria se min ngaihtuah leh khawp ang le’ a sawi hnuhnung lam chu min bia ani tawh lem lo. A nu nen chuan an in nufa viau ani ngei ang.


‘ Ka lo nghahpui dawn che nia’ tihpah chuan a bulah chuan ka zuk thu ve nghal a, a hmelthat vang pawh ni miah lo in Mizo ka nih ang in mi na tawrh lai a kalsan ka duh hauh lo.


‘ I hna ka tibuai palh ang che. Ka tha, ka na theihnghilh in ka ding thut pek alawm. Kal rawh’ inthlahrun hmel deuh chuan min melh a, mahse kalsan mai ka tum bik lo.


‘ Vawiin chu hna ka chawl alawm. Bazar bak hna ka nei lo’ nui ver ver chuan ka lo ti let vat a, a inthlahrung hmel chu a reh ve nghal.


‘ Khawi hmun ah nge i chen?’ tihpah chuan a ban chu phar in a zi mar ar ar a, a lian rauh sia, a bul ah chuan ka te chem chem ngei mai.

[Elty Hnamte]

‘ Koregaon park lam ah. Nang zawk?’


‘ Wow! Kan chenna area a in ang anih chu. Mahse keichu khawi hmun mah ka la hre lo. Hna vang in chhuahna hun ka la nei lova....’ a tawng duh dan chu kawm a nuam dawn viau in ka hria. Tin, puitling hmel deuh tawh in a rilru ala naupang chhiat ve hmel reuh viau ka ti bawk.


‘ Keipawh ka lo awm thar ve chiah. Engmah ka la hre lo’ tihpah chuan ka awmna lai tak te chu ka hrilh a, mak tak maiin ani pawh ka awmna building ah alo cheng ve reng. Ka awm flat chung chiah ah a awm thu a sawi chuan mak kan ti dun nasa mai.


‘ Anih chuan thian kan ni thei angem?’ tihpah chuan a kut chu a rawn phar a, kan nih theih thu hrilh pah chuan ka kut chu ka pe ve nghal a, a hmel nui sang chu hmuh a nuam kher mai.


A car chah a rawn thlen chuan a rual a kal ve tur leh ka kal duhna hmun a min thlah a tum thu a sawi tlat avang chuan hnial tlat a mawi loh avangin ka kal ve ta nge nge a, a driver-in a biak dan ah chuan mi mai mai anih ka ring lo. Kawng tluan chuan a ti ti bawrh bawrh a, a bul a awm a hahdam kher mai. Ka kal duhna a min drop hnu chuan min kalsan ve nghal a, thian tha tak ka tawng thar chu ka lawm kher mai.


Ka mamawh leh ka ei chak ho te ka lei nual a, chawhmeh erawh ka nu in min lo ken hnem ang reng avangin ka lei ta lo. Fruits lampang erawh ka induham leh tan tan khawp mai. Pantaloons-ah discount lai alo nih hlauh avangin Sandals 3 ngawt ka lei pek. Ka chin tha lo tak chu discount lai a insum thei hauh lo a footwear ka lei thin hi. Ka addict ni ber in ka hre tawh.


Auto atang ka chhuk chu kan in gate bul-ah chuan Randy chu alo ding vang a, min hmu chiah chu alo nuisang a, ka inkhaibawr bawk sia, ka thil khai chu min lo chhawk vat a, ka duhai in min nel mah mah dawn in ka hria. Mahse a mawi lo zawng erawh chuan min be miah lo. Ka thil lei ho chu dinning table-ah chuan kan dah a, sitting room lam a sofa-ah chuan a thu a, tuivawt keng phei in a piah ah chuan ka thu ve nghal a. Ka in luah chu nuam a tih thu leh ka inhmeh thu a sawi ve luam a, ka phone a rik avang chuan ka tho vat a, choka lam a ka dah chu ka pan a, Kima ani tlat.


‘ Aw... Hello’


‘ Chanchin engmah i rawn sawi si lova. I lung a leng em?’


‘ Nia, ka bazar leh nghal daih a. Leng ve bawk e. Hna lam in buai em? Lo kal a ngai em?’

[Elty Hnamte]

‘ Ngai lo ve. In ah i awm tawh ami?’


‘ Aw, ka thlenna ala rei lo’


‘ Zanriah eitur in min sawm dawn em?’ a nui huk huk a, a fiamthu tih ka hrethiam nghal.


‘ I duh phawt chuan’


‘ Ka uang miah lo. Nge ka in lam ah kan ei dun dawn ami?’


‘ Ni lo. Zanin chu hahchawlh ka duh. Mahni a awm ka duh’


‘ Elty, kawngka kik an awm?’ sitting room atang chuan Randy chuan a rawn ti lauh a, ka phone chu ka hup vat. Mahse beng fing lutuk chu ka bum lo anih hmel.


‘ Tunge?’ Kima awri chu a rum ngei mai.


‘ Ka thian thar ania. Building khat ami’


‘ Zanriah ka rawn ei ang’ phone chu a dah hmak a, ka thaw hak a, sitting room lam-ah chuan ka phei nghal a, kawngka ka va hawng chu ka thenawm pitar alo nia. A bathroom tui luanna pipe ah a uite alo tan avangin min rawn pun alo nia, Randy chu a rawn chhuak ve vat a, pitar in Randy a hmu chu mak a tih hmel nasa mai. Randy lah chuan pitar inchhung ah lut in bathroom lam chu a pan nghal a, sawi miah lo a bathroom awmna a hre nghal chu mak ka ti ru viau. Mahse chutiang ngaihtuahna hun a awm lo. Uite chu a chain alo tang alo nia, Randy chuan ala chhuak a, pitar chuan lawmthu a sawi amwlh mawlh a, kan chhuahsan zui lehnghal.


‘ Tichuan zanriah kan kildun dawn em ni niang? Thian nih lawm nan’ sofa-a thut pah chuan Randy chuan nuisang chuan a ti a, mahse ka hnial a ngai thung.


‘ Pawi ka ti. Nidang ah ti mai ang. Engemaw thil pawimawh tihtur ka nei a’ thudik ka sawi mai hreh deuh chu mak ka in ti ru viau. Mahse sawi ila ka boss nen kan inkar a ngai diklo ngei ang. Vawiin a ka hmelhriat chauh ani lehnghal.


‘ Ok. No problem. Nidang ah hun ala tam alawm. Ka chhoh san tawh ang che. Ka nu in min lo call a hun tawh dawn’ tihpah chuan a tho nghal a, nuam lo ka ti ru takzet.


‘ Ala hma alawm. Pawi ka ti lutuk. Mahse nidang ah kan la eidun ngei ngei dawn nia’


‘ Heyyy, chutiang zawng in ngai suh. Keipawh hahdam ka mamawh. Mahse i contact number tal chu min pe ve la’ nuisang chuan alo ti vat a, Ab nen an mizia a in ang ka ti kher mai. Mahse Kima nen an hmel a in ang thung.


‘ Ok, lo type la..... 769*******’


‘ Thanks. Ok, hahdam tawh rawh. Kan inhmuh leh vat ka beisei’ tihpah chuan a chhuak zui nghal a, hnunglam atang chuan a pian chu a nalh kher mai. Huisss, mipa pian sexy deuh hi chu ka lawm ve riau ania.


Ka door bell rik mawlh mawlh ah chuan ka tho vat a, ka hawn dawn chuan ka thawhak. Tunge lo kal tur hi ka hrechiang em ani.


‘ Khawnge i thian thar chu?’ kawngka rawn pen luh pah chuan a ti vin that a, mahse ka zam hauh lo. A bialnu ka ni miau lova.


‘ Enteh, ka thian neih lehzel ah chuan min control tum hauh suh. He hmun a ka rawn kal hi ka tisual ni in ka hria’ zam map lo chuan a mit ah ka en kal a, ka duh alawm. Mahse ka duhna hi sex partner chauh ni tur in ani lo. A ta nih a, ka ta anih ve ka duh tlat a, a duh ngang si lova.


‘ Oooh.... Ka tihsual anih chu’ tihpah chuan sofa-ah chuan a thu a, a chauh hmel takzet ani. Mahse a awmdan hi ka huat zawng tak anih vang hian ka khawngaih lo.


‘ Inluah tur ka hmuh veleh i in hi ka chhuahsan ang’ ka sawi tum ni miah lo chu ka sawi phawng a, makti lutuk a min rawn en ka hmuh erawh chuan ka inchhir lo kher mai.


‘ Tunge chhuak tur in ti che?’


‘ Tuman. Mahse i in a chen reng hi ka tum lo. Ab vang ni lo se he hna pawh hi ka zawm hauh lovang. I awmdan hian min ti hah. Enge ka ngaihdan pawh ngaichang hauh lovin helai a ni reilote ka awm chhung lek hian min tikual nasa tawh lutuk. Ka tlin tawh lo’ ka aw ri chu a dam dap a, mahse ka taksa erawh a khur dar dar thung.


‘ Chuvang ami mipa thian ilo zawn vat vat’ a ner sawk a, a ngaihdan tenawm lutuk chu ka rap zawk.


‘ I ngaih ang kha engmah a awm lo. Mahse i thil engmah hi tawm che ka duh lo’


‘ Chuti em em a min haw tur in enge ka tihsual? Inzawmna nghet ka duh loh vang hian ami?’ a chang hi chuan a mizia tlang leh lutuk hian a zawhna chhan ati har hrep zel.


‘ Ka haw lo che. Mahse mahni a nun ka duh. Nangpawh i duh ang in nung la, inngaizawng pawh kan ni lo. Mahni kawng ve ve zawh ang’


‘ Ka duhdan ang a ka nun dawn chuan ka bul ah cheng rawh’ ka zuk melh kawk a, a hmel chu a uang loo nasa mai.


‘ Infiamna ang lek ah min ngai tawh suh’ ka thinrim lutuk chu ka vun te hi a thip sup sup theiin ka hria.


‘ Enteh, ka fiam lo che. Mahse ka bul ah cheng la ka duh ani. Kan inhiptawn zia pawh kan hre ve ve. Hlimtak in kan awmdun thei ang’ a aw ri chu a dam dup tawh a, a inrintawk hmel em em bawk.


‘ Hmeichhe dang i kawp ang chi kha ka ni lo tih ka hrilh ang che. Chuan, i bul a cheng tur chu i hmeichhe kawp dang te kha sawm la ti nia. Nang leh kei hian eng inzawmna mah kan nei ngai lovang. Min chhuahsan thei tawh angem?’ ka thinrim vang a ka aw khur dar dar chu thup pawh ka thup thei tawh lo. Mahni a awm a tah vak vak mai ka duh.


‘ I luhlul ngei mai. I ngaih ang vek hi ka ni lo tih ila hre ve mai ang chu’ tihpah chuan a tho a, a haw dawn amaw ka ti chu ka ring sual chiang ngei mai. Kitchen lam ah kal in mini-fridge-a beer chu a phawrh a, balcony lam ah chuan a ding vang vang a, ngawireng in ka en a, ka phone a rawn rik chuan ka en vta a, ka number hriat loh ani.


‘ Hello’


‘ Hi... Elty, it’s me Randy’


‘ Hi.... Hei hi i number ami?’


‘ Aw, lo save la. I hnathawk ka tibuai che em?’


‘ Aaaa.... ka la buai rih a, nakin ah kan inbe dawn nia’ ka phone ka dah chiah chu Kima chuan uluk em em in min lo en a, a hmel chu sakeibaknei thinrim ai pawn a hlauhawm zawk ang.