LEHKHATHAWN (Malsawmpari)

[Rosie L Ralte]

LEHKHATHAWN
( Malsawmpari )

Buai tak maia ka hun ka hman kar lakah chuan han thut hahchawlh pahin facebook lamah ka han dak ve leh zuaih a. Ka tih fo thin angin ka notification chu ka han en hmasa leh ber a. Ka status zinga pakhat, viewers atana public tia ka thlanchhuah zinga like tu hming lo lang ka hmuh chuan ka thaw dep dep a, ka ngaihbel nge ni ka thin phu tepawh a rang ta deuh sawtin ka hre hial. Hun hei leh chen hnuah pawh maw!?

Ka status te leh thlalak ilo ka post ve hian ka friend list amite chauh hmuh turin ka ti tlangpui a. Ka status thenkhat chu miin min belhchian duh emaw tunge ka niha enge ka rilru sukthlek zawng an hriat theih nan public hmuh theiha dah ka nei nual.

Chumi hnuah chuan friend request pakhat lo awm ve bal chu ka en a, ka rinlawk ang ngeiin amah a lo ni. Amah ngei a ni dawn tih ka hrechiang lutuk kha mak ka inti hial! Inngaihtuah nawn chhin eih lovin ka accept nghal var a. Kei ve akar hian group hrang hranga ka activities thenkhat avangin request hi chu ka dawng ve awl lova, kawm tlak ka awm loh nen ka ti ve fo. Mahse keima mimal ngaihdan thenkhat avang erawhchuan han accept pup erawh ka ti ngai lemlo thung a.

Ka tih tur zualpui ka tih zawh tawh bawk avangin a profile te chu ka va en let mai mai a. Amah pa tawng tam lutuklo a nih ang ngeiin status pawh a update khat hle bawk. Han hmuha han hriatbelh em em theih ka nei lemlo. Thil pakhat, hmangaih tak a tawngin an hlim a ni tih nemnghehna thlalak thenkhat erawh ka hmuh hmaih hauh lo! Hei hi chu a hma pawhin ka lo hmu tawh.

Hun kal tawh, kum 15 vel zet liam tawha kan hun lo hman tawh, theihnghilh hmak ka tum pawha ka theihnghilh hleihtheih loh fo chu nimin lawka thil thleng ang maiin ka hmaah hian a rawn inlar leh ta zut zut a. Ka inthiam hauhlo, pasal ka neihna pawh kum 10 dawn a ni tawh! Ka phu lova min hmangaiha min ngaihlu em emtu pasal neiin leh fanau malsawmna dawngin kan hlim ve em em a, chutih laia hun kal tawhin min thing let chu dik theiin ka hre lo thung. A tawp nan tak tak nunhlui lamah let leh ang hmiang. Nunhlui thin let chu a na a ni a na!

Zaithiam ka ni ve lem lo naa zaithiam ho nen eng kawng emawa inkaihhnawihna kan neih avangin chu tlangval zaithiam, TV a ka lo en thin atanga ka lo 'star' em em thin leh midang thenkhatte nena kan han inhmelhriat thei ta chu ka lawm em em mai a. Nula chhuak tan tir, zaktheilo ru ve viau e ti lova zeilo em em mai chi ka nih avangin han ngaihzawn enah pawh ka en chuang lova. A bul hnaia han chet tlata, a titi ngaihthlak ruala lo nuih ve awr awr pawh chu ka lawm tawk a tling ve em em a.

Eng engemaw prohramme avangin kan inhmu fovin kan innel chho ta em em a, mahse mak deuh maiin amah chu ka 'star' nasat thin vei nen a taka ka la hmuh ve loh, chhuang tak maia a chanchin a sawi thin ka ngaihthlak atang chauha ka suangtuah thiam a unaupa, a u chuan mi hip ta riauva. A chhan pawh, ka tleirawl chhuah, ngaihzawng neihna chang rilru ka hriat theih tirh atanga ka lo suangtuah ve thin, ka duhthusam mize pu a nih vang a ni ber awm e. Ka duhthusam ang thlap tak tak! Mipa tawng tam lemlo tak mahse fiamthu duh viau lawi si, pa lian, a hun taka huaisen tak mahse dam thlup si.. aa.. ka duhthusam ziahchhuahna ang thlap a ni mai! Kut themthiam em em bawk!

Chu ka hmelhriatloh 'star' thar chu vawi hnih khat chu rem leh rem lova hmuhna hun ka nei ta mai reng bawk a. Han inpawha han inbiak bawrh bawrhna chi erawh a ni lemlo. A hmel chu a hma atanga ka lo 'star ruk zawk' a nau nen an inang fu. Ka sawi tawh angin a mizia leh a chetdan thenkhat ka ngaihthlak avanga min hneh a ni ka tih tawh kha.

Tichuan chu zaithiam tlangvalte nen chuan kan inkawmngeih chho ta viau a. Ka sawi tawh angin a hmaa ka lo star ve na thin rilru kha a inthlak ta daih a, thian leh unau ang bakin ka enzui ta lova. An inah pawh kan chuangkai ve zeuh zeuh a. Vanduaithlak tak maiin an nu ber a han boral ta hlauh mai a! Thihna zawng a mi deh a na a ni! An tawrhnate tlem tala hnem theih inbeiseiin keini thianho pawh an inah kan chuangkai zing ta viau a. Keimah tak phei chuan kan veng chhuahna lam kawnga an awm avangin han pen luh mai a remchan a vangin kan thiante aiin ka lawilut tam awm e.

Vanduai karah kan ti dawn nge ni chutia kan han len luh chuan kei veng hla deuh kha thlah ngaiin ka awm fova. Chutah tak chuan ngawirengin a u zawk chu a lo insiam peih at mai thin a nih chu! Min thlah haw pawhin kalkawngah thu holam mai mai sawiin kan nui kur kur thin a, inngaihzawnna lam hawi kan sawiri ngai lemlo. Hmangaih thu thlum emaw pakhatmah awm lo khan kan rilru kha a inpawh ve em em tawh a. Chumi hun tak chu kan inngaihzawn tan ni han tih tur nei miahlo khan kan inzui chho ta zel a.

Kei aiin a upa deuh fe a, mahse kan va inmil si em! Ka sawi tawh kha.. ka duhthusam mize pu mipa a ni ka tih tawh kha. Thianghlim tak, tuma mit tikham lo leh fianrial kan neih dun zawng zawng pawh hlim taka titi nan kan hmang zui zel a. Kei chang ka nilo, ka chhungte lakah thleng a tha em em a. Kan vaiin kan ngainat rawn a ni ber mai. Hmeichhe fing fel dak thlarh ka ni lova, ka titi vawrh tur hriat vete pawh a nawi thei viau. Mahse a va ngaithla ulukin a va hlimpui thiam thei si em!