2 STATES, Chapter - 24

[Ngaia]

2 STATES, Chapter - 24
(A story by Chetan Bhagat)

Ngaia aKa Hector

Ananya te choka atanga chawhmeh kan rim chi hrang hrang a rawn nam chhuah dan atangin eng emaw hun pawimawh deuh bik tak a ni tih ka hrethiam mai a. Ananya nau Manju nen tuition kan inpekna pawh thla 2 a lo tling ve der tawh a. Exam a hmachhawn hunah IIT ah chuan a tling dawn chiang khawp mai, naupang bright tak a ni a, a taimak na leh ka puihna tlem avang chuan thiam tak a ni tawh.

"Eng nge in tih dawn a?" hmarcha kan rim avanga hahchhiau that that pahin ka ti a.

"Khualtha tan special food" a zirlai ziah mawlh mawlh pahin manju chuan a ti a.

"Tu?"

"Harish"

"Khawi a mi?"A zirlai lam chu bihin a thiam loh lai min zawt nghal a.

A zirlaibu chu lak sakin ka khup ta daih a.

"Aiyo, what?" mak tih hmel zet in a rawn ti a.

"Eng nge Harish chuan a rawn tih a, min hrilh rawh, a nih loh chuan i nu hnenah blue film i en thin tih ka hrilh dawn a nia"
(blue film tih aia p0rn tih a hmang a mahse mizo chuan blue film tih hi kan hriat dan a ni ve tlat)

"Ka en ngai lo hrim hrim"

"Dawt sawi suh" ka risk mai mai a ni na a, mipa p0rn en ngai lo an awm lo.

"vawikhat chiah a lawm ka la en, chu pawh ka thiante in ah tih palh liau liau in ka en ve a lawm" a hlauhthawn hmel tawh kher mai.

"Tihpalh in film a en theih ngai em ni?"

"Ka thianpa pa ta a nia, please in ka nu hrilh suh aw" A mangang hmel kher mai.

"Harish chungchang vel chu min hrilh vek phawt rawh"

Manju chuan a chanchin tlangpui chu min hrilh ta a, Harish, an Tamilian makpa duhthusam ang chu Radha aunty in kum 2 chhung a lo kherh ngat ngat tawh hi a lo ni a. An ai en na lam thil Nakshatram a lo in mil thlap bawk nen, nupui atan an rawn bia a. Tamilian a ni a, Brahmin a lo ni kher bawk nen. IIT chennai atang zir chhuakin 9.45 GPA a scored bawk a. A score zat te nen lam in zawrh nan an rawn hmang a nih chu!

MS zir turin full scholarship hmu pha ngat a ni a, tunah chuan Cisco Systems ah a thawk mek a, zu leh sa lam reng reng a ti ngai lo a, zuk leh hmuan a ti lo bawk ( hlimna reng reng a ti ngai lo bawk ang chu), San francisco ah in a nei a; tin, Honda Accord zawng zawng nen. Manju te ang tan chuan a u duhpui loh theih pawh a ni lo.

An lo awmkhawm laih laih na kal pelin an in ka chhuahsan dawn lai takin a pa in min rawn hmu a.

"Uncle, ka haw dawn chiah, sorry, manju tuition pe tur a rawn kal ka ni e"

"Breakfast i ei tawh em?" min ti a

"Aih"

"Nih chuan thu ve nghal rawh" thupe aw taka min tih chuan a thu zawm lo thei ka ni lo.

Min ko turin manju a rawn kal a, a physic thiam loh engemaw min zawt leh dawn a nih ringin, "Eng nge?" ka lo ti a.

A room a ka va luhphei chuan Ananya chu khumah a lo thu a.

"Kal rawh, i pasal hualin a nghak che" ka ti nghal tawng a.

"Manju, pawnah lo va chhuak lawk teh" Ananya chuan a ti a.

Manju chu a lehkha zirna dawhkanah a lo thu leh hman tawh a, "Aiyo, khawiah nge ka kal ang a"

"Kan mikhualte lo va be rawh, nih loh pawn choka ah ka nu va puih ve mai rawh"

Manju chhuah hnu chuan, "I'm sorry"

"Sorry tih hi tu hmuhchhuah teh hrep nge maw a nih le? Miin a thil tihsual zawng zawng sawi fel na turin thumal khat lek eng tin nge a awm theih zawk le? Naktukah pasal i nei ang a, sorry i tia nga a fel leh vek a ni mai. Eng nge ka sawi ve tak ang?

"I phawklek mai mai a nih kha, Shobha aunty tih lawmnan ka ti ve mai mai a lawm, thuthlukna chu keima siam tur tho a la nia, ka duh loh thu ka sawi ang"

"A hmate khan min hrilh daih tawh tur che lawm"

"A chhan chu a pawimawh loh vang. Nang pawhin petrol pump neitute fanu i hmuh ve tho kha"

"A hnuah ka hrilh leh tho che a lawm, bakah dan ang thlap pawh a ni lo hrim hrim a, ka nu in a va tlawh satliah ang chauh a nia"

"Hei pawh hi dan ang thlap a ni bik hleinem, Harish te chhungkua an rawn leng satliah mai mai ang chauh a lawm"

"Ananya" tiin hnuai lam atangin an rawn au a.

"I love you" min ti a, "Ka kal a ngai" tih leh kal a rual nghal a.

"Anih ti nge i sari man to chi i in bel si?" kawngkhar kalhna vuan ran chungin ka ti a.

"Ka nu in min thlak sak vang mai mai a lawm, tunah ka kal thei tawh ang em nge ka pa a rawn chhoh hun kan nghak dawn?"

"In ru mai ang"

"La beidawng rih lo phawt ang" dingdi hlip ak ak chungin min rawn muah zeuh a.

Hei bak chu ti ti vel mai mai a nia, a story ah pawimawhna a nei tawh hran lo, ka cut leh ta mai