KA HMANGAIHPA ZORAMCHHANA By Abbra Reo Ririni Khiangte (PitarteiSualfingi)

Moderator: Abbra Reo Ririni

Abbra Reo Ririni
Posts: 1237
Joined: November 10th, 2016, 8:57 pm

Re: KA HMANGAIHPA ZORAMCHHANA By Abbra Reo Ririni Khiangte(PitarteiSualfingi)

Unread post by Abbra Reo Ririni » January 24th, 2021, 11:09 pm

Typos a tam em? Chhiar dan min thiam sak rawh u ka tih kha aw, phone ațanga type hi chuan mit in a lo hmu kim thei tawh țhin lo.








Zoramchhana thil sawi zawh chiah a vang chuan ka lungphu chu a rik hian a ri nghal dawt dawt. A mitmeng thuk ruih ah chuan fiamthu thawhna ka hmu lo a, khap hlek lova duat hmel lutuk a min melh vung vungna chuan ka rilru a ti no zual sauh bawk. Hetiang hian țum dang ah pawh min lo en fo tawh țhin ang a, kei hian ka lo hmu thiam ngailo zawk em ni?


Chu ka ngaihtuahna chu rawn hre vek thei ang hrim in akut pakhat chu a lo lek chhuak a, 'tun ah chuan i hmu thiam ve ta a lawm' ti ang hrim in ka bek sam lo chul in min nuih suk bawk. Kei erawh țah chhuah hawk hlau in ka kâ hup bet in thawk ka chelh nghal fan fan mai.


Ka en chho a, țawng miah lovin min lo en let ve vung vung a, thu tam tak sawi se; tun hnai a ka thlahlel ta ngawih ngawih te hi a chhan puh tur țha tak min siam se ka duh laiin ngawih a chhuh tlat mai bawk si!



" eng maw i sawi kha.." ka ti chhuak thei țawk. Atthlak lutuk in amah ka thlakhlehna zual sauh chuan pangchanna min siam a, kha bak thu tam zawk sawi belh leh tur a ka duh luat avangin ka mittui a lo tla leh ringawt bawk. Thu tam zawk a lak ațang hriat belh leh ka chak em avangin ka mittui tla pawh chu thup nachang ka hre tawh lo.




"I thik ve tho amaw?" ka han ti leh a. "Ramchhan, Dinpuia i thik, a dik tiraw? Keiin Jenny ka thik ang chiah khan Dinpuia i thik, a awmzia chu... " bah niai a ka tihilai chuan lo rum chhuak hawk pahin a vanvadak a, min chhang lovin a inhum ruh ngawt ngawt bawk. Khua chu vawt hle mah se vawt tihna reng ka nei tawh lo, Zoramchhana chetphung engkim mai chuan min uap lum pup pup ani ber.



"Zoramchhan" tipaha ka pan hnaih chuan a lo tawlh hnung hrut lawi si a nih chu! Zawhna ngah deuh a ka en chhoh chuan muangchangin min en lo en ve ta ruai ruai a. "Mi nupui tur i ni tawh" a lo ti chhuak khawlh. Chu thu chu sawi chhuah harsa a tih hmel nangiang bawk. Lu thing a ka an ziau chuan thawk la Hawkin a maimitchhing a, a hmel rorum tak phen a natna lo lang chhuak chu ka en ta tlawk tlawk mai. Pan hnaih a a taksa lian pui mai chu nghet tak a kuah mai lo turin ka inthunun țang țang bawk.



"Ka.." ka han ti a, sawi leh mai tur hrelo zet hian Zoramchhana chu en in ka thaw chhuak ve hak tho.



Aih! Diktak a sawi chuan tun hnai a Zoramchhana lak a ka rilru put hmang hi sawifiah ngaihna reng ka hrelo! Mipa ang a ka en ngai miah loh. Vin leh țawng-kam huatthla zet a țawng khumna hun chang ran a ka en țhin mipa hi engvang ngawt a thlahlel ta em em nge ka nih? Hmeichhe dang duat tak a a enkawl lai engvang a hmu thei miah lo nge ka ni? Tinge, Ka ngaihzawng hmasa ber ka pasal a nih loh hlau a hmeichhe dang nen an inbiakna ka hmuh chang pawh a tlawm chuah a ka chelh beh țang țang țhin mipa kha engvangin nge tunah hian neih ka hreh tak ngawt? Engtin nge ka hma a ding mek mipa kiang ah hian hmeichhe dang a ngaihsak in ka thik țhin thu ka sawi chhuah ve rikngawt?



Thikthu tilang ngam tur khawp in vawi khat mah inhnaih tak in kan awm dun ngai bawk silo! Kan pahnih chungah hian engthil nge maw thleng ta mai le?




"Lut rawh, engkim kha theihnghilh vek ang che" lo ti thum dut in a lo meng chhuak a, chuta min melh rual a a mitmeng awm dan chu a mak lutuk! Varțîan eng paw riai hnuai a ka hmuh thiam chhun erawh NATNA ani!



Ka thlang kawngpui ah an in lam pan a Zoramchhana kal pawk pawk chu ka thlir tlawk tlawk mai. A hla tulh tulh a, nasa lutuk a ka lungphu rawn rang dawt dawt chuan chhan ka hriatthiam siloh in ka mittui a ko chhuak a. A chhan ka hriatthiam siloh avang bawk in ka awm chhung chu rawn na in Zoramchhana hming lam chhuak in țap chhuak ta hawk!



Rang lutukin ka kâ ka hup bet a, ka mittui lo luang thla zung zung kar ațang chuan an sumhmun a lut chho mek mipa chu ka thlir ta ngawih ngawih a. Min duh thu tak ngial pawh a sawi lo a mah se ka mittui erawh amah vangin a tla tho bawk si! Min lo ngaihzawn ruk thu tak ngial pawh sawi chhuak hauh silo Mipa kha ka vei ta tet tet a! Ka eng hi nge maw diklo zo ta mai le?


Kawngkapui a hawn hma chuan a ding chawl rih a. Amah thlahlel ta reng reng ka thinlung chuan vawi khat tal lo hawi let turin a be mawlh mawlh bawk.



Hnuai lam bih in 'a thaw chhuak hawk' tih hriat tak mai hian a taksa lianpui chu a che kawk a. Rei fe hnu ah kawngkhar chu pawt hawngin a lut ta a. Nimin tuk ang bawk khan ka ruak leh huai tawh. A nun a mipawimawh takin a kalbo san tak ang mai in....



"engkim kha theihnghilh vek ang che" a tih apiang khan engatinge ka chhungril a mangan tlat zel le?


Chhungrilah khawharna in a chenchilh chungin Leihkapui ah chuan ka țhu a, Ar khung al al ri te, ei siam tur a țhenawm tlangval lo thawk chhuak te'n kawt ah mei chhem a thawm an siam nak nak ri te chuan ka ngaihtuahna an la peng hleithei lo.




Zoramchhana kha chaw ei turin a lo kal ve leh ang em? tih ngaihtuah in an in lam bawk chu ka lo thlir leh veng veng ţhin a, a room light eng teng teng ringawt te chuan amah ka ngai lutuk chu min hnem deuh te in ka hre hial bawk.




Ka puan lum bah(t) a inkhuh țha sauh sauh in ka maimitchhing a, an ramvak an lo thlen hlima min zawng tih hriat taka a lo hawi kual lai kha chiang tak in ka hmu let a, a nui suk lai ka mitthla rual chuan nui chhuak ve seih in ka mittui lum zet a rawn hnam chhuak nghal ţîam ţîam bawk.


'Ngatinge ka vei tak em em che a Zoramchhana. Ngatinge?' ka rilru a ti mawlh mawlh in ka kut hit zet chuan ka mittui lum pap chu ka tuai hul a, a zun ah ka uai ta lutuk chu ka zuau phah a, Dinpuia takngial pawh ka ngaih luat a vangin ka țap chhin ngailo a sin le. Zoramchhan erawh a dan a dang kher mai. A hming ka ngaihtuah chhuah rual ringawt pawhin chhungril ah hian min fan tu awmin ka rilru a no nghal zel a, ka mittui in lo luan chhuah a inpeih nghal zel mai bawk si!



Ka ngaihtuahna vak kual thui lutuk chu Zoramchhana kiang ah bak a tawp thei chuang lo. 'A mut hmun ah sawn min ngaihtuah chungin em ni a zal ang' tih te chu ngaihtuah kual in ka suangtuahna vak vel chu a kiang bawk a thleng zel, atthlak lutuk in ka pasal han ni se, kut hnathawk in eizawn ngai dawn mahila huphurh miah lohna rilru te ka pu a, ka â zo ta ni ber hian ka hria.





Bawng rual bû ûl ûl-ri ah chuan ka harh hlawl a, ka ngum lo mu chuah chuah avang chuan ner sak in ka țhu mar a, ni a lo chhuak siar siar tawh a, kawmthlang kawng a pa pakhat Bawng rual khalh chu chaw-tlang lian lerh lawrh dawm chungin mipa naupang in an lo zui dam dam a.



Buh la chhek zo ve lo te'n buh thiar tur a khaw dang ami an Sakawr chah luh pawh lo lam panin an in zui diah diah a. Ka pa te tual ah pawh thawm a lo țha tawh ngang mai.



Rang taktin Zoramchhana te in lam bawk chu ka va thlir leh a, a room ligh kha a lo eng tawh lo va, hetah a lo phei ve tawh anih ringin phur ru takin ka țhutna ațang chuan ka tho chhuak nghal a, kawtzawl ah ka zuk chhuk ve chu țhenawm hnai tlangval te chuan min lo be sap sap a. Ka hnathawh vang nge ni; Dinpuia nen kan inngaizawng tih an hriat ve vek vang zawk ka hre chiah lo nangin khawtual tlangval te hian min chhaih vel te hi an ti ngai miah lo.



"In va siam tui hmel em em ve" ka tih chuan "ei laiin lei lem tel lo tur a fimkhur a ngai viau ang" an lo ti a. Kan nui tlang ham ham mai. Sakhi ruhkawl leh a ti țha lai deuh chu an lo chhum hluah a, a mi sa deuh chu phuihnam leh sawhthing te nen thak tui hmel zetin an lo bai bawk.



Eirawngbawl a vir buai zing ah chuan Zoramchhana ka zawng ru viau a mah se ka hmu mai lo. Inchhung lamah a awm a nih beiseiin Ka pa te inchhung ah chuan ka lut nghal a, patling țhenkhat thingpui hang no dawm in an lo țhu far a, inchhung ah pawh Zoramchhana hmel hmuh tur a awm tak loh ah chuan ka ruak leh tlawk tlawk tawh.



"Mate..." tih ri ah chuan u Dtei lam chu ka en phei thuai a.

Zikhlum chan sin mawlh mawlh paha "Hei, purunsen hi lo chan ve rawh, Chawțanni tur" a tih tak ah chuan ka pan chho thuai a.

"Khawnge u Ngaihsak a?" tia satliah hmel deuh a ka zawh chuan "A mu rih a nih kha, chau a inti deuh a" alo ti a, Zoramchhana pawh a la mu hahdam ve rih ah ngaiin ka rilru a dam ta deuh huai e.


Chemte dahna ami chemte la a uDtei thil channa lamah ka let leh chu chik em em mai hian min lo en a. Henu fing lutuk leh thil hrethiam chak lutuk hi chu ka hlau lek lek țhin.


Rin ang chiahin a bul a ka let leh chu "I țha em?'' A lo ti ta reng.

"Umm.. ngatinge?" nui lui ngial pah hian ka tilet a.


"Țap hrep i ang a lawm" a tih chuan ka mit a thip ur tih ka hre chiah.

"Awiawm loh e" ka titak nanga min en chik bawk nen "I mit a sen vek a, i mit ko lah sen țal in mittui chhuah inring rengin a lawm a awm" a lo ti leh khauh a.

"I ninawm, thil te hi hrethei viau suh" ka ti hlak tak ah chuan min nuih ta rah rah a. A fin dan em em hi chu a hlauhawm lam hret zel. A fanu te pahnih hian dawt an hrilh thei ngaiin ka ringlo.


"Bahkhawr kan nei tawh lo a nih hi, chawtani hi chu Bahkhawr tello chuan a tui duh lo" tibarh barh pahin "Lalat, apa Ramchhana te huan a mi bahkhawr lak va dil teh u" tiin naupang ho chu a tir zui a.


Zoramchhana te in ah Lalati te an kal dawn tih ka hriat chuan kal ve ka chak ut ut a, va kal ngawt ila Zoramchhana nen inhmu ta si ila sawi tur ka hre lo emaw, at-pui tur khawp a ka ngai ta lutuk leh thlahlel thar ta thut; inthunun dan thiam bawk silo chu ka ţap leh ringawt emaw te a ni awm sia.





Rilru bet lo leh Zoramchhana lo lan ve mai beisei ru reng chungin eirawngbawlna ah chuan ka phe buai ve a. Chaw lo ei tur te'n chaw chhum sa an lo ken dawn a vangin sakhi sa deuh chiah chu kan buaipui a. Maipawl an tlak a, țawkte pum an thlak bawk. Dekchi lian ah an chhuang so vut vut a, a tui hang hawp a chakawm tawh kher mai







Dar 8 rik dawn ah ka u te nupa pawh thophang hlim tih hriat takin an lo chho leh ta a, u Nathan-a chu a sil viau ni tur a ni, a kal char deuh auh mai. Reilote hnu ah Dinpuia pawh a lo chhuk thla ve a, mei lum ai pah a Tlangval țhenkhat te nen kan lo țhutna lam chu lo pan ding nghalin ka hnung chiah ah a lo țhu a, a bawp in min kap kar nghal zat bawk.




"I nuam lo a mi a?" ka dar ah khabe lo nghat pahin a rawn ti a, midang awm lai a chutia a rawn che chu a țullo takzet a ni.



A ruk a nghawk sawk pah a "Aih... ka țha" ka tih pawh in hrethiam duh loin "a va vawt ve" a ti lar lar a, ka zak hnuai ah a ban a lo rawlh lut a, mei ah chuan a kut hem in ka kut vawt zet chu a rawn hum pah vel a.


"I kut a vawt lutuk, khawsik i nei leh palh ang e" midang awm ve te veng thawng lo zet chuan ka kut te chu a hum lum vel thul. Han khak chiam dawn lahin midang an awm ve huang tho bawk sia.




A tawp a tawp ah chuan tlangval eisiam ho chu 'an in a chaw lak' chhuanlamin an kal darh ta phak phak a.

"Khawi teh, a vawt ka ti tawh lo" ti hlak in Dinpuia chu ka nghawk leh sawk a.


Nui hawk in min thlah ve ta mai a, a țhu țha mai dawn emaw ka tih lai chuan ka khabe ah rawn vuan in min kuai her thut a. "Dinpui" ka ti deuh hlur mai.


Chik deuh a ka hmai tlang chu min thlek kual in "ngatinge i damlo em ni? Nge, mitna i kai dawn?" a ti a.


"Engmah a nilo. In lo haw a ka harh kha ka mu ve leh tawh hleinem" ka tih let laia a lo nui kher chu hmu lo der hmak in ka țhutna ațang chuan ka tho chhuak a. Mahse ka ban rek ah a rawn man leh chawt tho.


"A mak, khawi teh, u Dtei te pawh puih an ngai ang" ka sawi zo hman lo. Min pawt țhu leh chawrh a, ngei fe a ka melh rual chuan ka hmai bul chet ah a lo awm hnai a.



"Kan inneih tur thu i u te ho ka hrilh hmasa kha i la lungawiloh pui reng em ni?" Engmah hriatthiam loh hmel tak hian a ti a.

"Dinpui, inneih chungchang kha" rang deuh in ka lo ti nghal zat, Mit tizim in min melh nghal khai mai.

"Inneih chungchang kha inngaihtuah nawn leh phawt ka duh" ka ti ta a. Dik tak chuan inneih chungchang a sawi lai khan Ahmai nen ka rinhleh lai vel a nia, rinhlehawma a awm ngai loh zia finfiah nan inneih chungchang kha sawi chhuak a ni bawk. A hunlai khan engmah ka ngaihtuah thui lo a, rinhleh ngai a awm tawh lo tur a ka duh em vang te pawh a ni mah na, a rinawmzia a fiah theihna tur a nih chuan tiin ka aw ve ta tawp kha a nia. Mahse,... nie, Mahse, ka pasal turin Dinpuia hi ka duh reng em tih takngial pawh ka chiang ngam tawh lo.




"Inngaihtuah nawn i mamawh in ka ring lo" ka sam lo uaithla ka beng ah lo zeh paha a tih chuan hrethiam lo deuh in ka melh ran a. Dinpuia erawh a nui thung.



A nui hmel lem tak avang chuan ka harhchhuak thut a ni ber. Thinphu rang nghal dawt dawt si, inring ru ran chung si hian ka hawi chhuak ta a. Chuta ka mihring va hmuh dun te avang chuan ka nghing nghal dawt tho.




Ka inhum ruh nghal fan fan a, ka țah nasat lutuk tawh vanga ka mit bui deuh lak ațang chuan mittui a lo chhuak thei mai dawn a ka hriat avangin rang tak in mei alh hluah hluah lam chu ka en nghal daih.



"A changtunu tello chuan sa-lu lawm a kim thei nang ka tih reng kha" Dinpuia ti lawng lawng ri leh lai tak a Jenny nui ri te avang chuan ka mittui chu a lo hnam tho.


Mahse, rang deuh ka tuai hul nghal a, chhungril lam ah thikna in min țham ut ut avang a ka hmai lo sa chhuak pap pap chu mei sa in min hliau leh bawk nen ka awm dan chu ahreawm vel vek.



"I ram chhuak dawn tih ka hre ve miah lo a. Ka hriat ve meuh chuan sa-lu lawm tur a lo awm reng tawh sia" Jenny chuan a lo ti a. Hawi chhuak in nuih luih ngial ka tum a. Jenny hnung a Zoramchhana lo ding run ka han melh rual chuan ka mittui vangin a hmel pawh ka hmu phe riai. Kawrlum hma-pum a nghawng bial var chhan ah jacket dum a hak hnan a, a pian lian țha thelh-thawlh ti lang chiang zual turin Jeans kekawr pawl hlui lam tawh a ha bawk. Chutia ka han en chho chu chiang fahran in min lo en let run tih ka hre thei bawk.



"Keini pawn nizan chu ramhnuai ah hun kan hmang dawn emaw kan ti hman a lawm. Mahse, kha.. a changtupa khan kar lovah a kap ta mai sia" ka dul ah a min kuah pah in Dinpuia chuan a ti leh duah.



Ka mualpho takngial dawn inhria in mei alh lam chu ka en leh nghal daih, ka mittui lo hnam ţîam ţîam chu kei leh Zoramchhana chiah in kan hria ang.



"Eee, Ramchhan, Jenny chu i va hruai thei maw, anu pawh lo hruai ve tur che alawm" u Ngaihsaka tho phang lo chhuak ve chiah pawn a rawn ti nghal lawng lawng.



"Eirawng kan lo bawl vek tawh sia, ka nu chuan in lam ah ka lo ei mai ang a ti tlat a"


"A induh thlak lutuk, chaw lo chawi tawp mai tur a lawm. I nu chu a hranpa in ka la hau ang" u Ngaihsaka'n a tih hluk chuan an nui ho dar dar a.



Mei lam ngawt ka en lai chuan ka mit sir in mei ai pah a Zoramchhana lo țhu hniam thla chu ka hmu thei a, min biak miau loh avangin biak tumna pawh ka nei biklo. Mahse... a lakah ka pangchang tlat tawh ka tih kha... ka thik tih a hriatthiam vek tawh hnu ah Jenny a lo va hruai leh kher chuan min vilh ngut ngut a ni ber, hauh hrep mai te ka chak hial bawk.



"I mu ve leh miah lo mi a?" Zoramchhana chuan a lo ti dut. A țawng zawih em avang leh midang chu fiamthu sawi a an rik bawk bawk a vangin keimah min bia tih ka hrethiam nghal mai a.




Chhang lovin alam ah ka hawi phei a, chal tichuar deuh in ngunthluk tak hian min lo en run a, ka hmel a hmuh chian rual erawh in hreawm tihtakzetna a hmel ah chuan ka hmu thei.



Thaw la deuh hawk chunginn min en vung vung a, ka ţap nasa tih a hai biklo a ni ang, min khawngaihna ni awm tak a mitah chuan ka chhiar thei bawk, rei țhu lovin ngawi reng hian a tho chhuak vut a. Ka en zui duh tawh biklo. Mei lum bul ațang chuan a kal sawn tih erawh ka hre thei.




Țhenawm hnai zual te leh Zoramchhana chhungte an lo kal kim hnu chuan Ka Pa te inchhung ah kan lut khawm a. Ka Pa in thusawina tawite a nei a. Chawlh hmang a Aizawl a kan haw thla tur min thlahna ni pah-fawm a chaw ei ho na chu nei kan ni tih te a sawi a, Zoramchhana sa lak theih a zarah țhenawm khaw vengte kan tlai leh tur thu a sawi tel luam a. Țawngţaina a hman zawh hnu ah chaw ei turin pawn ah kan chhuak darh ta sang sang a.


Naupang lam bawk in nuam an ti ngang mai. Naupang ta na na na chu an inrawt phur chawp a, chhun ah Țangţíal veh a kal chhuah a tlai ah ' inbaitelem chhuan' an rawt tlu nghal der a.



Chaw dawh pah a naupang ho an in nek buai nak nak lai te chuan Jenny leh Zoramchhana te lam ngawt chu ka lo en leh ngawt ngawt țhin a, min be tu an awm pawn ka chhang let hleithei lo. Ka tawt up up reng a, ka awm dan chu mi â ka ang viau ta ve ang.




"Mate, saw saw Ramchhana bialnu em ni?" ka bengbul ah uLateii'n a lo tih chuan "A niang" ka ti nghat ringawt.


"Min la hre ve em tih tal hriat ka chak e, ka be chhin dawn e" a ti niah niah a, nizan a a thu min hrilh te kha ka hrechhuak rauh rauh a. Andria nen inneih an lo tum hial tawh tak e!


"Ka hrelo... i duh leh bia la" ka ti a, chutih lai chuan Zoramchhana te chu fatu ho in nu nau leh upa deuh te'n an dawh zawh tawh a vangin dawh nghal turin an lo hrilh ve mek a.


Zoramchhana chuan a hma ah Jenny a dawh tir a, Jenny zawh ah dawh ve leh in engkim mai Jenny nen an ti dun vek te chu ka thik hlur tawh.


Dinpuia leh u Nathan-a'n min lo fin ve a, Dinpuia hmel phur deuh sur chu ka mil lo takzet bawk. Kan dawh ve lai chuan Zoramchhana leh Jenny te chu Leihkapui ah an lawn chho a, ka țhutna țhin ah Jenny chu a țhu chat a, chungte mai mai chuan ka țah zu han tichhuak a maw le! (?)




U Lateii'n mei bulah ei a rawt avangin mei bulah keini chuan kan ei a. Leihkapui a ei ve dang te'n Jenny leh Ramchhana te an chhaih fiam thawm ka hre pha vek a. Chumai pawh nilo a ngaihsak hmel deuh a jenny-i'n Zoramchhana thil ei a thli-thlai uluk lutuk te chu ka lo insanmar phah țeuh zel a.


"Ni 20 kha kan chawlh neih theih hun a ni tak nang a damlo damdawi in pan ngai khawp an vang ta bawk a, ni18 hian kan haw thei ang" Dinpuia'n a lo ti a.


Ni18 ah maw? A awmzia chu naktuk tuk leh ah Aizawl ah kan chhuk tawh dawn tihna!


"A remchan hlauh chu" u Nathan-a'n a lo ti ve bawk. Ka haw chak reng em tih pawh ka inhrethiam ve tawh lo.


Thaw chuak hak pah a ka hawi chhuah rual chuan Jenny'n a maipawl tlak tui hang awmna no Zoramchhana a pe chiah lai hi ka zuk hmu a, Zoramchhana pawn lo ban a a in khawlh rual chuan kei mah a thikna nasa lutuk chuan min ti â vek a ni ber.


Ka țhutna ațang chuan ka tho hluai a. U Lateii'n 'ngatinge?' a lo tihna pawh chu ka chhang let mumal lo " ka puar tawh" ka ti ta in ka hria. Inchhung pan a ka kal nghal daih chu Zoramchhana pawn min rawn hmu ve chiah bawk.




Thleng silna hmun tlang chu chelh in thawk ka la vak vak ringawt, ka hmai sa hut hut ah chuan mittui a lo luangthla ngiai ngiai a, ka kut chu silfai sawk sawk in ka biang chu ka tuai a, mahse, ka mittui chu a lo tla zel tho.




Țah chhuah hlawp hlawp ka chak lutuk bawk si nen kan inthunun thei lo lek lek zel. Chutia sil hmun ah rilru na zet a ka lo țap ru hliam hliam chu tu emaw hian hnung lam ațangin ka mittui hru lai ban rek ah chuan a rawn man chawt a.



Ka ban rek a lo deh rual a a taksa lumna ațang chuan tunge anih ka hre nghal thei.


Inthup buai tawh lo in mittui tling pam Chung chuan ka hawi let a, min hmuh chian hnu chuan thawk la huaiin ka ban rek chu a lo hmer nghet zual sauh a.


Zawi ang reng tak vin ru hle si hian "Eng nge i duh?" ka tih khum nghat, Jenny ka thik thu ka sawi hnu ah pawh min tina belh turin ka hmuh theih ah a lo hruai leh ngat a! Tun ah kher hi chuan hepa hian min fiam kual mai mai ni hial in ka ngai tawh!



Zoramchhana chuan engmah sawi lovin min kai nghal dawr dawr a, țan buai nachang pawh ka hrelo, u Ngaihsaka te mut pindan kawngkhar chu nam hawngin min kai lut a, kawngkhar chu chhunglam ah kalhin kawngka ngheng chuan min din tir nghal hmiah bawk.


Thaw chhuak huai chung a ka kut chu thlah a min en chhuk run takah chuan ka thinrim lutuk nge? ka ngai lutuk zawk nge? ka thik tur a a awm nawn leh kherin min tina lutuk zawk tih pawh thliar hrang theih loh khawp hian ka chawmawlh vek.


"Zoramchhan, i sual lutuk" ka tih khum deuh tuar a. Midangin kan thawm an hriat loh nan a kutchal a hmui ah nawr siin min lo khap thuai thung.



Keilah ka mumal lo tulh tulh, "awm sawn rawh ka chhuak dawn" ka ti chiah chu min pawt hrawk in a awm ah nghet lutuk in min kuah bet ta hmiah a! A lungphu dawt dawt zawn ah chuan ka bei thlawp, a kutphah lum thup chuan ka sam lo chuin lehlam in ka hnung zang a chul nghal hauh hauh bawk.




Tun ah chuan chiang takin engkim ka hrethiam ta. A taksa lian leh nghet țha zet ah hian min kuah beh hun ka lo thlahlel lutuk, tukin pawh khan nghet tak a min kuah turin ka lo beisei tawh a. Mahse, tilo in min kalsan daih a, chu chuan ka thinlung a tina a, vawi khat lek chauh pawh min kuahna ka thlakhlelh em avang a 'Amah' ka ngaihtuah rual a lungchhe nghal em em zel kha ka ni.



"Misualpa... Ngatinge...?" ka ti țuau a, ka insut chhuak hlawp hlawp tawh, ngawi reng a min kuah ngheh zual sauh pahin a thaw chhuak ham ham mai.




Eng emaw tal sawi tur a ka duh em avangin "Min kuah tawh suh, i duh leh Jenny kha va kuah rawh" tiin ka tal laih laih a, ngawi ngul a min kuahna a tih ngheh zual sauh avangin thawk lak a harsa vek bawk.



A awm ah hmai phum paha "Ka thik tih i hrereng a, i lo hruai lui leh kher a... i lo hruai dawn te chuan min hrilh la in ah ka lo awm mai dawn a lawm" rilru na deuh a ka tih leh chuan ka taksa chu a kang nghal nawlh a.




Zo zet a min pawm chung chuan u Ngaihsaka te khum lam min pan phei pui a, khum tlangah chuan a țhu thla a, a malchung ah amah hmachhawn zawng a min nghah hnu chuan min nawr hla hlek a, hmeichhe naupang huaibak zet ang mai ka mittui tla tawp hleithei bawk silo chu dam zet a min en chungin "ka tihpalh" a rawn ti chhuak dut.



"Engvang chuan maw?" Thinrim țun hian ka tih khum hlar thung.


"Thawm dim deuh rawh, midangin kan thawm an hria ang e" tiin a awmah chuna min kuah bei a han tum leh a. Kei lahin a thusawi chu ka lo ngai kawi tlat pek a.


"Mi hriat i hlauh te chuan ngatinge i lo kal..." rilru na lutuk a a ka han ti leh zet chu.. !! Rum chhuak hawk pahin a kutphah lianpui pahnih chuan ka biang a rawn dawm a. Ka inrin hman hma huah in na zetin ka hmui ah a rawn fawp nghal siah a nih chu!




Ka thisen zam a țek chuai a! Ka lungphu pawh inthumrawn nghal dup dup in ka ngawng nghal chuah chuah mai...



Duhthawh lutuk a zei taka a min fawh mawlh mawlh tak ah chuan ka thinsen luan dan danglam vek leh sosang ta lutuk chu a rapthlak tih piah lam a ni. A ban rek ah vuan paha ka chhan let ve meuh chuan Zoramchhana chu a lo rum chhuak nghut a.


A hma aia duhthawh leh uar zawkin a che zawm nghal zat bawk. Ka tukhum ah a dawm a, a kut lehlam in ka khabe ah dawm telin zei tak chuan ka kâ chhung ah chet a la zawm mawlh mawlh a, kan awm insi chet chunga kan lungphu ve ve phu rang dun lutuk te chuan min tiphur zual sauh ni ber hian ka hria.




"Nilo... Nilo.. nilo...'' harh chhuak thut tih hriat takin min fawhna chu a tawp a, thawk rang hlawp hlawp a ka hawi chhuah rual chuan a chal a ka chal lo tauh ri bawp in a rum hawk mai.




Harsa tizet hian "Khathil kha thlen tir tur ka ni lo a sin" lo ti sup sup in a thaw chhuak hulh hulh a, ka chalh ah a rawn fawp a, nghet lutukin a lungphu dawt dawt zawn ah chuan min kuah bet leh hlu hlu a.


Min tih ang ang chuan a awmah ka bei hle hle a. Hepa hi a pawn lam landan ațang ringawt pawn a pa in a rorum em em a, belhchian phei chuan mipa nihna zawng zawng hi amah ah hian phawh chhuah tur a tam tulh tulh mai bawk si. Mipa nihphung sawifiah nan chuan Zoramchhana lan dan leh a chetphung tluk a sawifiahna tur țha hi ka hre tawh pawh in ka ring lo.




Ngunthluk takin a lungphu rang ve dawt dawt chu ka ngaithla a. A awm lum thur thur nghengin ngaihngam takin ka bei mek a ni tih chu ka awi thei lo lek lek, kan thil tih zawh chiah kha ka hrefiah tial tial a, pawn lama chaw ei ho ri laih laih leh thleng inkhak ri te. Mut pindan indaidanna bang pan te chhan mai a patling ho titi map map thawm te chu a hnai ta riau hian ka hria.


Chuan, Tun lawk khan Zoramchhana nen kan infawp! Kan hmui a intawh chiah lai ka mitthla let zawng ringawt pawn ka thin chhung chu zu han sa pup pup thei a maw le! In kiss a zei zia leh duhthawh zia lah kha.



Ka ngaihtuahna avang chuan tawm chawiin a taksa chu ka kuah nghet vak a. Ani erawh ngaihthat hmel tak a ngawi vung vung rengin khnung ah duat tak hian in min chul hauh hauh a.




Engmah a sawi leh dawn a ka hriat loh avangin "Theihnghilh tur in min ti leh dawn em?" a awmah hmai phum kak chungin ka tih khum ta kher. A lo nui che dawt a. Pangtilum a ngah zia mai chu!


Ka beisei loh dan deuh hian min chhang let ta a, "Aih.. kha chu hrereng rawh" nuihza insum tih hriat taka min chhan let chuan ka che ta hrat. Tuna a hmel landan hi ka hmu chak lutuk.



Țhu mar a a hmai bul chet ah ka awm hnaih rualin a kutzungpui in ka hmui chu a lo nul nghal thuak a, a hmel lang pa lutuk leh a mitmeng thim ruih lang de sawr sawr lawi bawk si te avang chuan ka vai riai a ni ber.



" engtiang chiah a fawh nuam nge a nih ang tih ka lo ngaihtuah fo țhin a, ngaihtuahna ngawt ai chuan a tak ngei a fawh a lo nuam zawk a nih hi" a ti bul blu a, kutzungpuiin ka hmui a la tuai reng bawk si, a mitah phurna lang chhuak chungin min en vung vung bawk a. Tinge, tun hma zawng khan hetiang ang mipa, min chawk phur thiam lutuk hi a ni tih ka hmuh thiam ngailoh tiin ka indem dawn dawn mai a lawm.


"Min fawh i lo chak țhin amaw?"lai ru deuh tak a ka zawh lah chuan pa zet hian min lo nuih mai thung.

He pasalțha-a hian min lo suangtuah țhin a ni tih han hriat chu a mi fan dan a tak raih mai, ka ngaihtuahna avang a ka biang lo sa hat hat chu a kut a lo nul thuak n chiang takin min en leh ngat a.



Mahse, vawi leh khatah a mitmeng chu a lo dur khup a. Ka hmui a nul kual dun dunna kutzungpui pawh chu tawp chutin a hmel chu a lang rum nghal ul bawk.

Chhumbung deuh tak a "I pasal tur lakah inthiam loh a va na duh ve" a lo ti nghut takah chuan rum zet hian ka melh hrep a.



"Ka pasal tur a nilo, ka nei dawn bawk lo" ti hmak in ka hawi sawn nghal daih, ka mittui a hnai leh kuar ringawt tawh.



"I nei ngei tur a ni" nghet zet a lo ti sup tu chu ka melh nghal kawk mai. Amah pawn chiang takin min lo en ve a. "I uang tiraw?" Ring ngam chiah lo a ka tih țiau chuan lu a lo thing nghut. Ka awi thei lo zawk! Kan infawh zawh chiah hnu ah Dinpuia nei turin min hrilh leh thei a nih chu!


Ka melh ngawt ngawt hnuah a mal chung ațang thinrim tak a ka chhuk tur chu ka biang ah lo dawm in "min en rawh" a ti a. Kei erawh in tal hran ka tum ngat ngat thung.



"No, Min en rawh..." chang zet a a lo tih leh hrawk chuan ka melh ta hram, "Ka insum theih loh avang a thil thleng ah khan thiam lohna i nei lo.. chuan, Dinpuia hi nei rawh" ati charh charh a, "Mahse...." ka tih lai chuan zawldawh taka min en in ka biang a dawmna chu a lo ti nghet salh a.



"Kum tam tak chhung i hriat tawh mipa a ni a, a bulah chuan nuamsa takin i khawsa thei bawk ang" a ti bul bul a, a sawi tawp lam erawh sawi harsa a tih hmel takzet. A sawi tum chu ka man thiam deuh bawk.



" ka nei duh hleinem" ka lo ti a.

"Keimah vang em ni?" Ka mitah tak min en pah a a lo tih chuan ka lakah a inrintawk zia chu a mitah ka hmu thei, Ani hian kei ngei pawhin a ka hriatthiam hauh loh ka thinlung chhungril hi a lo va hrechiang bik em. Zep ka tum buai peih tawh lo. "Aw" ka ti hmak, lo thaw huaiin kan chal a insik tir a, "pawi ka va khawih thui hman ve mawle" a ti zawi ruih bawk.

"I thiam loh a nilo... ka"

"Nilo, Ramhmangaih, Dinpuia chu i nei ngei tur a ni. Kei chu min theihnghilh ang che" a lo tih khawlh chuan țah insum tak hian "Min theihnghilh thei bik dawn ami?" ka ti a, a niin thawk a lo la hawk bawk. Min chhan mai loh avang chuan eng emaw chen chu kan ngawi dun ta rauh rauh a. Nakin deuh ah chuan a awmah bawk min kuah bet leh a, a tih ang ang chuan ka awm ve tawp. Ka hnungzang chu na lo te te a beng dat dat in ka chip ah khabe a lo nghat a.




"Hun rei tak i kawp tawh mipa a ni a, inchhungkaw hnih pawh in inpawhin in inhrechiang tawn tawh hle ang. Hmeichhe tan mahni lawi luhna tur chhungkua hriatchian tluk a pawimawh a awm lo. Chuan, Dinpuia chuan a siam nuamsa thei ber ang che. Keimah ang mai mai avangin i hmalam hun tur tichhe suh, khawpui nula, thiamna sang tak nei i ni a, khawpui mi vek nei la, khua rei ah pawh i inchhir lo zawk ang" a ti dut dut a, a awri a min thlakhlelhna bakah min duatna ri tel ve chu ka hai lo. Ka tan tlinglo ang ah a inngaihna te hlei hlei chuan ka thinlung a hneh sauh tihreng a hrethiam mang silo...




" mikhual ang ah min ngai la, keipawn chutiang ang a ngaih theih hram che ka tum bawk ang. Mikhual chu chamhlen tur a ruat kan ni silo a" ti leh in ka chhip ah a lo fawp vang vang a. Ka chhan let hma chuan u Ngaihsaka te nupa mut pindan kawngkhar chu a rawn ri ta rawk mai le!



Phu nghek a ka tawm chawih laiin Zoramchhana thung chuan min kuahna chu a ti nghet zual sauh a.


"Tunge awm?" U Dtei aw ri in a rawn ti ta mai a.


Ramchhana chuan "Dte, keimah... " ti let dut a.

"A nih mai mai chu a" u Dtei pawn lo tiin nui bawk bawk a a kal sawn thawm in a zui a, ka inthlah dul ve riai riai a.


"Chhuak hmasa rawh, midang in kan chhuak dun min lo hmuh chuan an hmu diklo vek ang che" ti sup in min kuahna chu a phelh thawl a.



A hmel ka en rual chuan nichin lawk a duat tak a min kuah hlu hlu tu kha a lo ang leh tawh lo. Hmelhriat ngailoh ang mai a min en tak ah chuan ka rilru a na leh ut ut tawh.


"I tan a țha ber tur a ni tih hrethiam hram rawh" ti bul bul in khum ațang chuan a tho chhuak nghal daih. Thlang lam tukverh awmna chu a pan ding a. Khum bul a ka ding chu min ngaihven duh tawh miah lo bawk. Tukverh aţang a pawm lam thlir a mipa ding ngawi vung vung landan chu uluk lutuk hian ka thlir a, a taksa lianpui chu hnunglam aţang a va kuah leh mai lo turin ka inthunun nasa hle mai.




Mikhual angin maw ka ngaih ang?


Mikhual te pawh reilo te chhung thleng turin mi in ah an lawi lut a, mikhual an nih miau avangin an thlen in-ah khan hlimna nasa tak emaw pawh va thlen in an thlenin te nen lo i ngaina hman em em pawh nise; chu a thlen in ațang chuan a kal chhuah țul hun a awm leh țhin!







Aizawl kan chhuk ni tur a lo thlen chuan min thlah tur a lo kal khawm an tam kher mai. A țhenin buhban fai te min pe țawk a. Mai; Maipawl leh bal chen a min hawn tir tawk lah bang lo.



Zoramchhana ka zawng ru țhin nangin a ni erawh a reh vung vung lawi a.


Car hma lam ah ka u leh Dinpuia an țhu lut a, ka țhu lut ve tur pitar pakhat sam țuak var vo tawh thu lo sawi a vang chuan ka hawi let leh rih a.


"Mami, tluang deuh in Aizawl chu thleng ula, damtlang takin christmas leh kumthar inchhungte nen in hman hnu ah damtak in lo haw leh rawh aw" a ti a. Amah chu ka han en a, puan lum hian a intuam hlan a, lukhum phiar sendang a khum bawk.


*Lo haw leh rawh aw* tih thumal chuan ka hnuk a tiulh tlat mai. He khua ami te hian thinlung takin min lo ngaina ve hman tawh tak zet tih ka hriat phah bawk.


"Ka lo haw leh vat dawn a nia, nangni pawh Christmas leh kumthar hlim takin lo hmang ula, tumah lo damlo suh u aw" ka tih chuan an nui dar dar hlawm a, min la chibai lo tu te nen kan inchibai leh sap sap hnu ah car hnung ah u Latei bul ah chuan ka țhu lut ve a.




Zoramchhana chu ka zawng ru deuh cheu nangin hmuh tur a awm chuang lo.



Dinpuia'n engine a tih nun takah chuan naupang ho in au tûng pahin min bye bye lauh lauh hlawm a. Kan tlan țan hnu thleng pawh in Zoramchhana chu ka la beisei fan tho. Mahse, kawchhung kan tlan pelh hnu thleng pawh in a lo lang ve ta lo.





Ka lu leh hmai chu puan panin ka tuam tlat a, glass ka bun daih bawk. Ka u te titi mawlh mawlh pawh chu ka zawm ve chak lem lo.


Kawngsir a sign borad ah chiang tak a *Ngopa i pel ta, dam takin le* tih lo in tar kulh chuan ka hnuk a ti ulh leh tlat pek a.



'Zoramchhan, lo in enkawl țha ang che' ka rilru chuan ka ti sep sep a. Tukin a min thlah liam tu te nen khan damtakin kan inhmu leh thei ang em?


Ka phone ka phawrh a, earphone ka connect leh a, u Ngaihsaka'n ka u a lo call tho avangin chanchin hrilh nawn leh an ngai tawh chuang lo bawk tiin whatsapp status ka en kual mai mai a.


Zoramchhana chuan status a lo nei ve reng chu niin. Mak ka tih bawk si, en tur nge en loh tur ti a ka inngaihtuah fe hnu ah ka view ta nge nge a.



C Sanga hla, Guitar per chung a aman a sak Tawnmang Lasi chu uluk zetin ka ngaithla a.


*Zankhua a reilo ngei e maw
Zawlnu nangnen tawnmang ramah
Chhawlthing hnuai ah i sakhmel
Sensiar nuimawi thlir nan


A liam ta maw? Zing țianah
Bawhar zai ri mual min dan tu
Theihchang ve se kumtluang thai
Ka tan chang teh sela.



Link:
BBcode:
HTML:
Hide post links
Show post links

Abbra Reo Ririni
Posts: 1237
Joined: November 10th, 2016, 8:57 pm

Unread post by Abbra Reo Ririni » January 26th, 2021, 11:28 pm

Ni chhuah hma a tlan chhuak kan ni bawk a, Zinkawng chu a dam duk a, dai vanga kawngpui huh dup chuan boruak a ti hit zualin a vawt vin kher mai. Zoramchhana zai tawite chu download in ka ngaithla nawn tluk tluk a, a aw thum lian leh pa ruih mai a natna inphum ru chu ka thinlung in a hriatthiam sak tlat vang pawh a ni ta ve ang, thawm chhuah hlau tak a insehruh chungin ka mittui a tla reng mai, a hmel landan tur ka mitthla ah a lo lan changte chuan tawt up up in ka awm chhung hi alo na ngut ngut zel.




Kan pahnih inkar a danglamna lo thleng ta thut hi engvang ber nge ka hre hauh lo. Ka hriat zawng erawh MIKHUAL angah ngai tur a min chahtupa kha ka thinlung chhungril berah a chamreng tawh dawn tih hi.



Ka puan inkhuhna hnuai ațang chuan phone chu ka hmet eng a, ka mittui vangin ka hmu phe ruai bawk, chutichung chuan Zoramchhana number ah ka lut a.

*tinge min thlah tur tal a i lo kal ve loh?* tih chu mitttui nen ka type a. Thawm siam ka hlau lutuk bawk nen ka hrawk chhung leh hnar vel a na ut ut mai.



Message chu send ka tum zet a mah se tlawm thlak ka ti ve tho bawk si. Rilru na deuh hian 'min lo biak ve tal tur che lawm? Ka ngai che tih i hrelo mi' ka ti rilru mawlh mawlh.


Ka message type sa chu ka deleted leh a.

*ka ngai che, Zoramchhan* chu pawh chu ka delete leh nghal tho.


A last seen ringawt chu rei fe en ngawih ngawih in ka rilru chuan 'khawi lai nge kan thlen tawh tih tal min lo zawt rawh' ka ti mawlh mawlh bawk.

Mahse, ani erawh a reh vung vung mai bawk si.



*Mikhual kha a va thlenna In neitu khan cham hlen turin ngen ta ngawih ngawih se, a cham-hlen angem?* tih chu status ah hmangin phone chu ka hmet thim a.


Ka mittui tla nasa lutuk leh thawm siam hlauhluat vanga ka thaw ip ngar ngar chuan ka hnar a ti ping vek tawh bawk.



".... matei chu a muhil leh ngawt em mawnile?" uLatei chuan a ti a, țawng ka chak loh em avangin muhil ang chuan min ngai law law se ka duh zawk. Che lovin ka țhu ngai chuan ka țhu ngat ngat a.



"Kan harh hma lutuk a, a mut a chuak leh tawh a niang" u Nathan-a'n a lo ti bul bul bawk. "Puan lum kha sin tir rawh, vawt a tipalh ang" u Nathan-a vek in min duat tih hriat taka a lo tih lai te chuan Zoramchhana daih ka lo ngaihtuah leh tawh. Duat deuh a min biakna leh kuahna kha ka thinlung hian a la kham lo. Puan-nuam a min lo khuh pahin u Latei pawn "A mut theih chuan muhil rih teh se" a ti a, puan min khuhna chu a tlak mai loh nan a bag in ka taksa a lo nghen beh tir leh thlap bawk.



Rei tak chhung ka hmuh tawh loh ka u te nupa nen kan chhungkaw awmna panin kan tlan mek a. Hlim a, phur tak a ri lelu tur ka nih laiin ka rilru leh ngaihtuah zawng zawng Zoramchhana kiang ah a awm tlat a vang chuan lusun nen ka awm dan chu a danglam lo hial ang.



Ring vak lovin Christmas hla an play a, u Nathan-a bawk in ka nu chanchin hrilhin a bia a, u Latei leh Dinpuia an titi mawlh mawlh bawk a. An titi kalphung ațang chuan Aizawl thlen hlan an nghahhleh hmel tawh kher mai.



A khat tawkin Aizawl pan a tlan Sumo in min lo tlan pel a, ka hmai tuamna puan pan zet chhan ațang chuanin tukverh lam ka thlir a, tun ah hian Zoramchhana'n engnge a tih ang? U Ngaihsaka te leihkapui ah khan țhu in min lo ngaihtuah zui ve a ngem le?




Pawlrang kan thlen chuan Ni a lo chhuak ve ut tawh a, thingpui in pah a chawlh zawk an rawt avangin ka u leh Dinpuia chu an chhuak a. Kei erawh in hriat chak bawk si leh huphurh ru bawk siin phone ka hmet eng a. Whatsapp ah ka luh rual a Zoramchhana message lo awm vu ka hmu chiah chu ka țah nuih lo chauh.


Mak tih hmel zet in a bag hai a u Latei kun mek pawh chuan min en heu mai.


"Aaa.. lo han kal rawh, ka lo chhuak ve ang" ti bah nakin ka lungphu rang dawt dawt zawn ah phone chu ka pawm bet a.

U Latei pawn 'lo chhuak vat rawh aw, tlan chhuah kha an rawt leh tut tut dawn nia' ti pahin min chhuah san a.


Rang zetin Zoramchhana message chu ka han open a. *mikhual chu mikhual ani miau a. A nihna a hriat a ngai a lawm* tih zawngin ka status kha a lo reply. Thaw chhuak hawk in phone chu ka hum nghet vak ringawt.


*kan thlen chin pawh min zawh i tum miah lo a mi?* tih chu ka insum thei thlawt lo chuan ka thawn ta hram a. Ka thinlung hian a lak ațangin beisei a ngah si, ani lah hian nasa lutuk in ka beiseina te chu min duh belh zual tir thei hlirin min chhang let a. Ka duh lutuk hian ka haw lek lek tawh zawk.



*pawlrang in thleng tawh em?* a message ka hmuh rual chuan meng zau kawkin ka hawi kual nghal ruai a. Kan chuan na Car piah ah chuan Ngopa sumo a ding a, thingpui in turin an chawl ve tho a nih ka ring.


"Min hmu thei a mi?* tih ka thawn a, ka lungphu chu a rang nghal dawt dawt.


Ka message a seen lawk loh avangin car ațang chuan ka chhuak a, Ngopa sumo dinna lam ah chuan Zoramchhana hmuh thut inbeisei ru tak hian ka phei nghal hlawk hlawk bawk.



Sumo chhung chu ka han bih a, nu pakhat naute hnute pe lai lo țhu chu a lo phu deuh zuk bawk. "Awi! Kan Nurse ni rengin, thingpui i in ve tawh em?" a lo ti var a.


" In dawn chiah? A damlo a mi?" a naute lu ah chul sak zeuh pah chuan ka ti ve ngial bawk.

"Motor hi a rui ve deuh a niang, a ţap char char a, a din lai hian a mutthilh theih takin tiin hnute ka pe chhin a nih hi" a lo tive siam siam a, kan inbiak leh luam hnu ah rilru hmanhmawh takin thingpui dawr lam ka pan san ta a.


Mahse, thingpui dawr chhungah pawh chuan Zoramchhana hmel awm reng ka hmu ta chuang lo. Ka message tone a lo rik kauh rual chuan rang fe in phone chu ka hmet eng a.



*in tlan hun chhung ngaihtuah in Pawlrang chu luh tawh awm tak* hnual rawih in Zoramchhana message chu ka melh rum ngang mai. Chutih rual erawhin kan chhuah hun a lo hre thlap erawh chuan min hnem leh deuh a.



A message tur ka type leh dawn lai mekin Jenny message a lo thleng ve leh chiah bawk.

*A pawi e, in lo chhuak hman tawh a* tiin ka in-luah kawngkhar inkalh țhiap tlalak hi min lo thawn a.


*nia, ka u te'n traffic tawt zual hma a thlen hman an duh sia*


*tluang deuh in thleng ru aw. Thawh ka hai a, ka hmuh hman ta lo che😟* a lo ti let leh a.


*a pawilo, ka lo haw leh vat dawn alawm*

*christmas thing keuh tur phur a ngai dawn a, vawiin chu i ngaihawm zual dawn hle mai* a message ka chhiar rual chuan ka na ru leh veng veng tawh. Zoramchhana nen an inzui leh ngei dawn tih ka hriatchian em avangin ka tawt ul mai.

*fimkhur la aw* tih zawng ka thawn let a. Zoramchhana message lo awm vu chu ka en leh a.

*pawlrang chu in thleng tawh em?* tih hi.


Jenny nen Biak-in a thawh tur thing an la dun dawn tih ka hriat tak avangin Zoramchhana lak ah chuan ka thinrim nghal hlur ringawt.

*thleng tawh* tih zawng thawn in phone chu ka hmet thim hmak a. Thingpui dawr ațanga Ka u lo chhuak in 'inhnawhpuar ve vat vat tur' a min hrilh tak ah chuan phur lo zet in thingpui leh chhang chu ka ei ve a.


.


Ngopa ațang khan chhuak hma viau mah ila Zemabawk kan tlan luh ațangin traffic thui zet ah kan tang ta ngat ngat. Khua a thim ruih a, boruak a vawt zual sauh bawk nen lunglenna bawk in min rawn tuam leh a.



Zoramchhana leh Jenny te pawh thing la tur in an kal chhuak tih ka hria. Ka thik lutuk vang a ni ber ang Zoramchhana biak chakna pawh ka nei tawh lo. Ka ngaihtuahna ațang erawh ka paih bo thei chuang lo.




Phone ka hmeh en chuan zan dar6 a lo pel duai tawh. "Kan tang rei dawn hle mai" ka u chuan a ti hluk hluk a.

Tukverh darthlalang ațang chuan Aizawl khawpui eng uar leh inzar pharh duai chu ka thlir a, ka ngaihtuahna erawh Ngopa ah a awm daih thung. Tun ang hun ah te hian khawlai ah naupang an ri nak nak zel a. 'Kan carol e' an tia, an duh duh in kawt ah an zai a. A țhenin pawisa an pek laiin țhenkhat in buhfai te, bal te an pe a, an pawisa hmuh ang ang chuan RUM PUM te leiin an chhum khawm a, an bal dawn te erawh a tuk tlaiah inbailem chhuan nan an hmang nghal daih zel.




A tawp a tawpah kan in chu zan dar 8 rik dawn an kan thleng ta hram a. Kan inchhung eng ut mai ka luh rual chuan ka chhungte chu an lo ri teng tung mai a. Min ngai tih hriat takin ka nu in min lo kuah vawng vawng a, kum-khat dawn zet kan inhmu miah lo a, keipawn ka ngai ve takzet a ni. Ka pa hi mizo pa ve tak mai a nia, hnathawk a kan awm hrang huam anih chuan intlawh chhen ang te hi a remti ngai hauh lo.


"Ka fanu duat hi, ka ngai em em lutuk mai" hlimna avang a țah chhuak tih hriat deuhin ka hnung ah a beng dat dat a. Nu nge nge.

"Keipawn ka ngai che, nu" ka awm hran rual chuan a tarmit kar ațang a mittui a hru zeuh a. Ka u te ho pawh an nupui fanau te nen an kim țhep țhawp viau. Ka pa erawh in single sofa lian zet ah țhu run chungin min lo nuih ve suk suk mai.


Ka vahte ho pawn min bawh ve chak chak reuh a, mipa naupang lam erawh an zak ve deuh nge zum deuh in an unaunu te kiang ah an lo ding sawi ve lat lat hlawm a.


An mahni awmtu te lamin room dangah an kal hranpui tak ah chuan ka pa țhutna sofa ban ah țhu in ka pa chu ka kuah a. Țawngka in min ngaih thu chhakchhuak luam ngailo mah se ka ban chu a lo beng thek thek a. Ka thawhna khua chhanchin min zawt nasa leh viau tawh.

"Mambawihi te sakhi sa rep lo hawn chu kan han phit tir leh phawt mai dawn mi?" Ka pa rawn pahin ka nu chuan a ti a. Ka pa a buk tak nghut nghut ah chuan choka ah a lut phei a.



" thlalak aiin inchhung chu a nalh zawk daih" ka ti hliai. Interior designer ruai in an khawih țha vek a, thlalak aidaihin a lang changkang bawk si.
"Keipawn a nalh ka ti tawp, kan in saw khawih tir ve ka chak a nia" u Mami chuan a lo ti ve a.

"Haha.. u Mark-a pa hmel a dur kual tup tup dawn, tumlo zawk rawh" ka tih chuan u Mark-a chu a lo nui chhuak hawk.


U Mami pasal pa hi MLA nilai mek a nia. U Mark-a hi an fapa mal a lo ni leh zel bawk nen inpui ah an cheng ho vek a. Pa ber lah mahni thu duh ve tak, inchhung a țhu tum deuh bur ang chi hi a ni a. An in lian leh ropui zet saw tunlai rem a khawih danglam dawn pawn a rem tihna lak thlap a ngai a, u Mami lah hian inchhung siksawi kual vel nuam a ti ropui bawk sia. A pasal te in a a tih ngam lo hi kan inchhung ah a ti hmiah hmiah a. A duh ang thlap a kan inchhung a khawih danglam tir meuh chuan in thar te pawh a ang rum rum hial mai.



Sakhi sa rep an chhum leh avang in intifai tur in ka room lam ah ka chho a, inchung țhutkhawmna lam pawh an lo chei danglam nalh ngang mai. Christmas tree gold rawng vek a chei lian zet a lo inhung a, a karah chuan thingro light gold rawng a vial hi a lo in thiat fir fer bawk a. A lan dan class ru zet ațang chu u Mami chei vek a nih ka ring nghal hmiah.



Ngopa a ka in luah pumpui aia lian daih ka mut pindan chhung ah chuan ka lut a, inchhung cheibawl nuam tizet u neih man a awm leh ta.



Ka khum puan phah pawh gold rawng vek in a lo thlak a, teddy bear sendang lianpui a lo țhut tir run bawk. Dressing table ah lah light a lo vuah tir vek a, christmas tree lian lo te vur bawh pawt lak ang mai a var chek chek ah chuan light var thlianghlim zet a det tir zauh zauh bawk.




Ka inbual zawh hnu lawk ah min awmpuitu nula in chaw ei turin min lo au a. Ka chhuk thlak chuan ka nuilo thei lo. Kan chhungkaw rual lutuk leh ka u te fate ho tlan kawi nak nak chu an hmuhnawm thlawt.


Ka pa in lungawi hmel deuh a a tu te infiam lai a lo thlir vung vung ka hmuh rual chuan Zoramchhana bawk ka hrechhuak zawk mai.



Ka nui tawp riai riai a.

Amah nen a fa neih ka chak ve lutuk leh thil thleng theilo tawp tur a nihna erawh chuan min ti chau rawih rawih.

Zanriah kan kil lai chuan u Nathan-a'n Zoramchhana chanchin a sawi uar nang mai. Chhuang ru takin keipawn ka lo sawi bel ve leh zauh țhin a. 'Mipa mah niila Ramchhana ne pawh kha kan ek pha lo ang' a tih sup chuan kan nui tlang ta dar dar a.



*zanin chu ka lo phei lo mai ang, ka chhungte ho an lo leng khawm a* Dinpuia message chu *ok* tih tawp in ka reply.



Kan colony te pawh an lo leng lut nak nak a, ka cousin te chuan 'ka thu zia' an sawi hluai a, naktuk a chhuah an rawt nghal chuk chuk bawk. Keipawn lei ngai neuh neuh ka ngah avangin ka hnial ta biklo.




Ka motor chuang chau chu ka muthilh nghal mai ka rin teh lul nen, khum ah ka mut meuh chuan ka harh tulh tulh a, phone banin ka han hmet eng a, Zoramchhana hnen ațang eng message mah ka dawng lo. U Ngaihsaka message lo awm va chu ka open a.

*Aizawl thlen tak vang maiin induh loh tur aw😜* emoji lei chhuah lem awm tel message chu u Dtei anih ka ring nghal hmiah. Dar7pm a min thawn daih tawh a lo ni leh nghal. Dar11 hnai kuar tawh mah se ka reply ta tho.





"Tho teh, tho teh" ti thawm in min ti harh a, peih loh zet a mit ka men chuan ka cousin te chu ka khum tlangah an lo țhu far tawh.


"I va hma hlawm tak" ti nui nui a ka thawh chhuah chuan dar8 a ri ţep tih ka hre zawm a.

" dar10:30 a tan appoinment kan siam vek tawh, che zung zung rawh" an lo la tizui.

"Khawi ah maw?" ka ti hu a.

"Carine ah"

"Leh thawr mai chuan.."

"I thu em a lawm, ngo set setna BBglow an discount lai a nia, kan vaiin ti vek ang u" an ti a. A țhen hi chuan thawh chhuah an la nei ve chiah lo. Mahse, an nu leh pa te hian an duat hleuh hleuh bawk a, an sum hman pawh a na țhin hle.



Inhnuai ah kan inzui thla diah diah a. Ka pa leh Dinpuia khunkhat hmel taka an lo țhu dun ka hmuh rual chuan ka thin phu a rang nghal vek.



Inneih chungchang a sawi pui em nile?


Kan thawm hria in Dinpuia a lo hawi chhuak thuai a, min nuih sak in ka pa chu a buk khum nghut a. A lo tho chhuak nghal bawk.

"Good morning" lo tiin kan awmna lam a lo pan phei a. Ka cousin te nen pawh an innel tawh em avangin a bulah chuan duh duh an sawi ngam tawh.

"Engnge i lo tih a?" ka zawhna chu a nalh vak lo tih ka hre tho nangin ka pa nen inbiakna an neih chhan kha ka hre chak miau tlat.


"naktuk zan hian ka țhian te'n party an siam a, i pa hnen ah phalna ka dil. An beisei che a" a ti duah. Ka thaw huai nangin party na a kal ka chak lo lutuk chu ka ipik leh țun tho.


"A nuam ngawt ang, u Dinpui, kan kal ve thei em?" Ka cousin te lah chu an lo phur rapthlak si.


"Thei ang.. mahse, kan rual chuan a theih lo" a ti nghut a. An khek chul mai.


"... pawilo nasa. Venu?" an han tih chuan "Falkland ah" Dinpuia'n a tih let ruallin phur zetin an khek leh rai hlawm a,

"Nangni unau chu tihtur in nei em ni?" tih zawm zat in midang ho chu a melh kual nghal thuak bawk.


"Kan hruai chhuak dawn.. Thingtlang ah in tawm bo char char a, vawiin chu siamtharna hun kan va neihpui ange" an ti a. An nui hak hak hlawm mai.


"Ride in mamawh em? " ban phar hluai in Dinpuia chuan a ti a. Țullo ti fe a ka melhna ngaipawimawh loh zet chuan ka cousin te ho in 'driver ah țang rawh' an tihna chu lu a buk khum nghut nghut a.




Chhun lamah chuan upper khatla a Carnie LM nail and lash bar dawr lun zet ah kan awm der tawh. A dawr neitunu U Mami hi kan chhungkaw hmelhriat țha tak a ni a. A thiam em avang leh a thil tih reng reng ah a duh uluk țhin avang hian kan unau hi chuan amah chiah kan pan țhin. Mizo hmeichhia niawm lo tak hian a hleitling in a mawngbawr a chhing lah a, a vun nung nalh zet leh a kawng vaw hnap a a sam sei dum hlap mai nen hi chuan hnam dang hmeichhia a ang lek lek fo. BBglow min tih sak zawh ah eyelash extention ka tih tir leh a, ka sam erawh ka țhiannu Remremi khawih tir kher ka duh țhin.



Nileng in kan shopping ani ber! Ka cousin te chuan duh an ngah si, kan sum hman pawh a na leh par par viau. Dawr pakhat ah kan luh leh dawn chuan Dinpuia phone a lo ri a. "Ka'n chhang lawk ang" tiin mit min siai zeuh in dawr sir corridoor ah a kal sawn pui nghal daih.



Dinpuia pawh ngaihven zuai ta lo chuan dawr chhungah kan lut tlang a Leather chi hrang hrang chu ka en kual thuak thuak a, quality țha law law a nih vangin a man pawh a sang hlawm kher mai.


"Mambawih, hei a in ang in la ang" Leather Jacket in ang khai va va pahin Sawmpuii chuan a ti lang lang a. A fitting dik zet chuan ka mit a la nghal zat bawk.

"Engzat man nge?" Ka tih chuan meng kual ralhin price tag a en a. A kuttin sei zet a chep va paha ka hmuh theih tur a a lo tih la chuan ka nui tawi tak ringawt. Cheng sing khat sang li man lawih!


Ka to tilutuk hmel a lo hmuh rualin ka Laizawnnu lah chuan "God... Ka lei ngam lo ti reng reng suh aw" min ti vin hlar ta mai a, "A Hausa ber si hian sum hman uikawm viau zel suh" a la ti ta deuh deuh a, min khak zawm chiam ka hlauh avangin nui hawk hawk in ka lak tur thu ka sawi a, ka han hak chhin pawn a leather puan chu a țha in a fitting a dik bawk si, Kan lei ve poh a niang chu.. Sawmpui chuan thawveng zetin a pahnih chuan bill pekna lam ah a kalpui nghal a.



Mipa Jacket zing a pakhat chuan ka mit a la kher mai. Rang tak hian ka pan a, A țhui dan pa lutuk chu Zoramchhana'n ha se a inhmeh ngawt ang.



"Hei ka lo la tel ang" ka tih rualin dawr neitupa chuan a la thla vat a.

"han ha chhin lawk teh" ka tih chuan nui hawk hawk in a ha ve mai bawk. A thawl deuh hnuk avang chuan Zoramchhana'n a tawk vel chiah dawn tih ka hrethiam nghal a. Ka lei dawn khawp mai.


"Mambawih, kha chu Dinpuia tan a lian awm e" Jenifer-i pek chuan min lo hmu reng ni chuan! Dinpuia ta tur a nilo lutuk tih chu hrilh kher ka tum lo.


"I hre bawk lo, mipa hi chu en ai ngawt hian an lo lian duh phian a nia" ti pahin dawr neitupa chu min pack sak turin ka hrilh zung zung a, Dinpuia lo let hma ngei a in-khai fel hman ka duh.


Ankle leather boot pa deuh pawh Zoramchhana tan awh zet ka nei. A pheikhawk size ka hriat mai loh avangin hei chu nidang ah keimah chiah a ka chhuah theih hun ah ka lei ang.



A man kan inpek fel hnu ah Dinpuia pawh a lo lut ve ta hlawl a. Wallet phawrh pahin "engzat man nge?" a ti a, kan bill chu pek atum a nih hmel.

Rang zet in ka pe fel tawh tih ka hrilh a, Zoramchhana Jacket tur chu ka bag ah ka thun nghal daih bawk

Jenifer-i a țawng thei ang tih hlau tak chuan ka melh ngar ngar a, Dinpuia ta tur ka leisak ang ah a ngaih miau avangin min chhaih chak deuh in a lo nui tet tet reng zui.


ka unau te ho chuan puan bih lam chi en kawi an duhthu an la sawi cheu a. Hemi te sum hmanna hre lutuk hi chu ka fate nise chuan ka hrek ngar ngar zel ang.



Dawr ațang kan chhuah hma deuh in Dinpuia chuan mi tu emaw hmu tur a kal lawk a ngaih thu min hrilh a. ka thaw huai mai. "A pawilo, a hmahmawh thlak chuan kal mai la" ka ti var, "Mahse.." a tih leh laiin "Driver kan call mai dawn alawm" ka lo ti let vat a, Dinpuia chu a nui ta sak nangin a hmel chu a pha deuh dui hian ka hria. Eng vang tak chu ni ang maw?


Dinpuia kal hnu ah chuan puan kan en kual leh zung zung a, Remremi ka biak lawk tawh tho avangin Sawmpui nen Remremi thawhna lam kan pan a. Midang te erawh in shopping an thlang mauh mai.

"Dinpuia nen hian in țha em?" Sawmpuii'n a tih chuan "Aw, ngatinge?" ka ti let thuai a, min melh ralhin hmui a seh niap niap a. "Ka hrelo... i danglam ka ti"

"Naa, chutiang sawi lo teh, awi, a chep bawk si, LalRemremi chuan midang a lo khawih vel mek chuan a chak lo ang" ka ti nghal bawrh bawrh.



Remremi te dawr ah kan luh rual chuan phur zetin min lo kuah chuk chuk a. "Kan inhmu lo rei tawh si" a tih lai a " lo zin duh hek lo che" ka tih chuan ner nak in chair ah min nam țhu nghal zat.

"Ka buai ve thei em a lawm, Ngopa lam ah khian customer awmse chuan ka lo kal chiang viau ang, ka khaw kal chakna ber a nih khi" a ti chiam a.

"Haha, story a changtupa te vang leh bawk a niang chu" nuih vak pah a ka tih chuan a story chhiar lai a'n sawi zawm tak tak mai a.



Utopia girl atih mai țhin thawnthu ziah a changtupate a atchilh lutuk hi a buaithlak țhin a nia, a tak ram ah aiin suangtuahna ah a cheng tam a, a kawm tlak tak tak țhin lo.






Kar lo ah ka sam rangkachak rawng ni ţhin kha a uk buang dal raih in min chhuah sak a, ka hnar ngul sang vah leh ka hmui phir deuh țhai chu a kap langsar vek mai hian ka hria.



"Tikha chuan Thingtlang ațang a lo thleng hlim hlawl i ni tih a hriat miah loh" Sawmpui thusawi vang chuan ner nangin ka sam thar chu ka'n tiche kual vel a.



"I chhoh leh hun ah customer tur min lo zawn sak la, Ngopa chu ka lo thleng chho ve nghal ang, Ka thinlung Lalpa te ho dintu tual lenna hmuh fan kual ka chak zia chu i hriat kha" kan haw dawn ah Remremi chuan a ti lawm lawm mai.


Zan ah chuan hna țul avangin ka pa a kal chhuak a, ka nu nen an khum ah kan mu dun a. Ac kan hman vek avangin khaw vawt pawh a hriat lem loh.

U Dtei nen zanriah eikham a kan inbiak khan Leikhapui ah Zoramchhana a awm tih alo sawi a, min lo biak hmasak a tum ngai miah loh avangin ka ngaihtuahna ah cham reng mah se ka be hmasa duh ta biklo a. Mahse, ka vei in ka ngaihtuahna chhung chenchilh loh lai a nei ngailo.


"Nu" zawite a ka han tih chuan ka nu muhil lek lek tawh chu a lo meng leh diar diar a, "Ka pa nen hian in inngaizawng rei em?" tia ka zawhna chu a nuihpui kar kar a..

A mut dan siam rem sat paha " kan inngaizawng hman pawh in ka hrelo" a tih chuan ka hrechiang chak zual sauh. "Dinpuia nen hian kum 2 kum 3 dawn a ni maw in inzui ve tawh?" a tih leh chuan ka nui tawi tak mai a ni.


"Ka pa nen chuan..." ka han ti leh thuai a, inhmatawn in kan mu a, ngaihngam takin ka kuah hle hle bawk.

"Thla khat pawh kan inngaizawng hman lo" min țhawn lutuk avangin ka thlawk chhuak lo chauh! "Maw?" Ka ti deuh hu a, ka nu chu a nuihzat hmel kher mai.

"Umm, nie, a mak a sin, i pa hi hna vangin Lunglei ah a lo awm ren rawn a, a insawn hma thla khat vel ațang kan inhmel duh a, inzui leh em em pawh awm tawh lovin kan innei zui nghal mai" a timial mial a, hriatchian belh chak tamtak ka nei ta bawk. "a nih leh ka pa chu thla-khat chhung chuan i hmangaih hman a mi?" ka ti leh zel a.


"Ka hrethiam chiah lo... mahse, hei kum45 dawn chu nupa inthlahlel tak niin kan la inneih tluang zel chu a nih hi" a ti ta sep sep a. A sawi dik chiah. Nupa ințhenna awm miah lovin silver jubilee pawh an lawm tawh a nih kha.


"Hmangaihna chu inzui rei avang te, mizia a inmil em avang ringawt te in a piang chhuak ngawt lo a, mi pahnih inkar ah hmangaihna lo pian chhuah nan ni khat lek a tawk changte a awm a, a pawimawh ber chu in hmangaih turin eng chen a rei nge kan mamawh tih aiin kan inhmangaihna hian damchhung daih se, nitin Kan in hmangaihna a chak zel theih nan inrintawnna te in hmangaihna kha chawm dun ila, chu chuan nupa hlimna a siam ber in ka hria'' ka beng ah ka sam lo zep țha mial mial pa a ka nu'n a tih sep sep chuan ka mitthla ah Zoramchhana a lo lang iar iar a. Ani kha ka hmangaih tihna em ni?




Tui taka ka nu muhil chu ka thlir dauh dauh a, ka rilru put hmang hi hrilh ta ila min hrethiam ang em le? A fanu thinglung ah Doctor pa aiin Thingtlang tlangval zawk in hmun a khuar thuk tawh tih hi min pawmpui thei angem?


Thaw chhuak hak in khum chu ka thawh san ta nge nge a, lukham hnuai a phone chu ka la chhuak a, ka nu te room bathlar ah ka chhuak a, thlasik thli vawt var chuan min lo chhem nghal a, Van ah chuan thlasik kawng lo zam paw chak chak in Siruk-la pawh an lo eng fiah em em a, Earphone chu ka beng ah hnawh lut in Zoramchhana sak fo țhin C Sanga hla Tawnmang Lasi chu ka play a.


Vanvadak in van a thlasik kawng zam paw chak mai leh Arsi pe tuar chu ka thlir veng veng a. He thinlung hlauhthawnna ngah tak hian huaisenna ava mamawh si em. Ka chhungte kiang ah hlim taka ka awm lai hian vawi leh khat ah ka chhungril ațang eng emaw hian min lo fan a, hetah nilo, Ngopa ah zawk awm tur ni tlat a inhriatna ka nei fo a. Chu kawng zawh tur erawh thung chuan ka huaisen tawk zo silo.



Kan inchhung ropui tak ka thlir kual lai rengte hian ka In luah te takte, bang lining-na pawh awm lo a bangrel lang țhap mai te kha ka mitthla ah an lo lang a, inpawh tak a ka unau te leh Dinpuia te an titi ho bawrh bawrh lai in; fiah lo ruai hian u Ngaihsaka te leikhapui ah Zoramchhana te nen țhu khawm a ram chhuah kan rel laih laih țhin te kha a lo lang fo a.



Ka taksa chu ka chhungte bulah awm mah se ka ngaihtuahna te erawh 'An ni' kiangah khan a awm daih thung. Thingtlang ah... A kiangah.. Zoramchhana kiangah khan. Sawi chhuak lo mahila, hmangaihna kawng zawh pui tura ka thlan chu ani kha a ni tih han inhria se aw..

Link:
BBcode:
HTML:
Hide post links
Show post links

Abbra Reo Ririni
Posts: 1237
Joined: November 10th, 2016, 8:57 pm

Unread post by Abbra Reo Ririni » January 31st, 2021, 6:50 pm

Lungleng mite lunglenna kai tho zual tur taka ni tla tur eng sen suar suar chu thlir in ka nui sen sen a. A taksa lumna ngah lutuk chu ka ngheng a, kulhbang nghet tak ang mai hian a bawp hrawl zet pahnih inkar a ka țhu chu min kuah bet hlu hlu bawk.


Thlifim thaw heuh heuh in ka sam a lo chhem leng siau siau te, he taksa thahrui ngah zet mai ngheng leh thei a ka awm chu min lawmpui ang hrim a kan chheh vel a phengphehlep leh sava thlawk kual te chu an hmuhnawm dangdai takzet. Lûang-rai; lapua ang mai a nem bawk si te pawh boruak ah chuan an leng kual chem chem a.


Chu mipa chuan" tham ral tawh suh aw" a lo ti thum dut, nghet leh zualin a awm ah chuan chuan min kuah bet sauh a. Min thlakhlelna te nen a a lungphu phu dup dup in ka taksa a nghawr che chu a nuam ka ti.


Min kuah bet hlu hlu tupa in ka samah a hmai lo phum a thawk a la huai chu ngheng na zual sauh in ka nui chhuak hak bawk. "Engnge i tih?" ti a zawtin thlek let in ka nuih a.


Kham loh hmel lutuk a ka sam karah thawk la leh chung chuan "ka lasi nula zawl mek hi engtiang chiah a rimtui nge a nih tih ka ngaihtuah a" a lo ti thum bul bul.

"Lasi a ni?" tiin ka fiam hlak, ka khabe ah lo dawm pah chuan thlakhleh hmel deuh in min melh vung vung a, a hmel rorum lutuk a min duhna leh min duat chakna hlir lo lang chhuakte avang chuan mit lasawn leklo n keipawn ka melh let veng veng mai.




"Lasi nula hmelțha leh duhawm zet..." ti chhuk sup in ka hmui hnuai chu a kut zungpuiin a lo nul tel thuak bawk.


"Lasi?" ka tih ve rual chuan a tak ram ah ka let țan riai riai mai!


Chutah zet chuan ka lungphu chu hepa lak aţang awm hran hlauhna nasa lutuk avangin alo phu rang nghal dawt dawt a.



Chu Mipa vek chuan "Lasi hmelțha leh duhawmna a khat" fan ruih hian a lo tia. Ka zunah a uai zo tawh tih haitheih rual loh khawp a thuk leh ril hian min melh tlawk tlawk bawk. A mitmeng a tih mai mai loh zia ka hmuh lehlek phei chuan a hlat ata awm hran chu ka hreh zual a.



Thlakhleh hmel tak a min en chungin "tawngmang ram ah chiah kan leng dun thei erawh ka haw hle thung" a lo ti khawlh a. Chutihmek lai te chuan ka ral tiai tial lai chu chiang takin ka inhmu thei a nih chu! Kawharna leh lunglenna a khat Zoramchhana hmel ngui lutuk te pawh!



"I kal a hun tawh" hreh hmel taka lo tiin a hmai chuan ka bek ah alo nul a, a hnar a ka mit leh a bul vel a lo nul kual dun dun lai te pawn ka mumang ram ațanga ka chhuak riai riai lai chu ka in hmu zel tho


"Ka kal duh hleinem..." ka sawi zo hman lo, ka hmui sir ah a hmui lum thup a min lo nul thawi thuakna avang chuan ka taksa pumpui chu a lum chhuak pup pup a . Ka awm ang thoin a awm ve tih hriat lutuk in a ban tha chakpui chuan ka dul ah a kuah nghet zual sauh bawk.


"Kal tir tur che a thluthlukna siam a țul țhin hi ka hua a sin" lo ti khawlh in ka hmui ah chuan a lo fawp thuak a, "chelh beh tlat che tluk a duh dang ka neilo" a ti leh laiin "A nih chuan min kal tir suh, aww? Ka.. kal lo tur a min chelhbeh tlat chuan..." ngenngawl deuh a ka ti mek chu min lo pawtchat a.


"Lasi a lawm i nih? Nang leh kei min țhen hrang țhintu hi mihring emaw sa emaw zawk ni ngatse zawng kan inkar a inrawlh leh thei tawh ngailo turin ka nuai bo daih tawh ang.. Mahse, mihring tharum hmang a beihlet theih loh 'khawfing chat' a ni miau a" ti dut dut pahin ka beksam alo țham salh a, kan chal chu nawr siin a thaw ham ham mai.




Thil ri dawt ah chuan ka harh chhuak hlawl a. Mit ka men chhuah rual deuh thaw chuan lunglenna nasa lutuk in min rawn tuam hlup hlup a, țah chhuah hlau zet a ka puan sin laia ka kâ ka hup beh rual chuan ka mumang kha ka lo tah chuahpui daih tawh tih ka hre chiah. ka biang huh chu ka tuai hul nghal thuak thuak a. "Khawvar hi ka haw lutuk" ka ti chhuak țiau bawk.

Zoramchhana ngaih luat vang a ka thin chhung na kual rawih rawih zawn chu ka chum a. Ka bek a mittui luangthla ngiai ngiai pawh chu hruk hul tumna ka nei tawh lo.



Ka țah chhuak lutuk chu tihtawp ka tum ngial pawn ka hrawk chhung chu a rawn tawt zual tulh tulh a, ka mumang a Zoramchhana'n thlakhlelh hmel lutuk a ka hmai a nul kual dun dun lai kha mitthla let in ka hmui chu ka khawih a, a mitmeng mawlh mai kha! Mumang mai nitur a tan chuan a takin a chiang lutuk mah mah a ni.




Ka biang huh hlap chu tuai hul thuak thuak in mit ka chhing leh vang vang mai. Ka mumang a Zoramchhana hmel kha ngai zet a mitthla let leh in a hming chu ka lam chhuak sep sep a.




Lu rit bur in ka nu te khum lum nuam zet chu ka thawh san a, bathroom ah lut a toilet ka hman zawh hnu chuan darthlalang lianpui a ka lan dan chu khap hlek lovin ka in melh veng veng a, ka hnar sen tek te, mittui a hnai tih hriat lutuk a mit hnuai sen tar mai te leh mitmeng a tu emaw ngaihna nasa lutuk lo lang chhuak te chu min hriatthiam saktu an awm lo ang.




Lukham bul a ka phone lo let ngat chu ka ban a, atthlak takin Zoramchhana message awm beisei in whatsApp ah ka lut nghal a, ka beiseina neihve chhun thamral rang lutuk erawh ka inkawngaih letling hial zawk.


"Ka vei lutuk vang zawk che in nangmah ah danglamna ka thlen niin ka inngai chawp mai mai zawk a ni tiraw?" ti rilru in screen a Zoramchhana DP chu ka melh ngawih ngawih.


Min duh ve takzet a nih chuan Dinpuia neitur in min hrilh miah lo ang tih vel ka ngaihtuah zawm leh nghal ngut ngut tawh.


Chutihlai chuan *online ve tehmial a, message i hmu har thei si* u Ngaihsaka number ațang uDtei message a lo thleng hlawl a.


Rang deuh hian *chaw in ei tawh em?* ka ti let nghal a. December Ni20 a ni tawh a, Ngopa boruak tur chu ka mitthla ah hmu thiam uar uar hian ka inhria.

*ei kham chiah... tu emaw in chaw a ei ve tawh em tih ka hrilh tel kher dawn che em?* tiin min lo fiam kher a. Emoji lei chhuah lem pathum ngawt ka thawn let a


*A eikham ve tawh, ram kal a tum in ka hria, e, a status kha han en teh, a upload chhan ber chu i hrechiang tur ah ka ngai😝* a lo tih tak duah ah chuan rang zet in status ah ka lut nghal a.


Zoramchhana status ah ka luh hma chuan țullo ah beiseina ka neih phah lehna mai mai tur a ni tiin en lo turin ka inhrilh ru mawlh mawlh nangin ka lut ta tho.


Zan a ni tih hriat takin a thim deuh ruih a, guitar kuah in camera hnungchhawn in a țhu bawk. A ruangam mipa bik lutuk ringawt pawh chuan amah min ngaihzual tir rawih rawih mai

Caption ah *Ka D tawn hun tur* tih a dah tel. Atthlak takin ka lo inhmehbel leh hmanhmawh tawh


* Suihlung len changin invangkhua thlir a,
Ka chhingmit lenin ka hawi ruai ruai a,
Sakhmel hlimte a bahsam leng siau in,
Phaikhawpui mawi a i tualchai tur chu


Chhunni herliam nan kumpuisul vei rawh
Hun leh ni chhiar a ka D tawn hun tur
Herchhuak thuai thuai se ka suihlung dumtu
Ka tawng leh mahna


A aw ri a lunglenna nasa tak chu ka thinlung â zet chuan keimah vang tur ah bawk a ngai leh ringawt tawh. Mahse, 'engnge ka an?' tih tal pawh vawi khatmah min lo zawh ngai miau loh avangin ka tan a nih chu rin chhin pawh ka duh tawh lo.



Youtube ah lut in *Ka D tawn hun tur* tih chu ka zawng nghal a. Cfla video a lo intlar thla tuar a, ka play chuan Zoramchhana sak ngei kha a ni tih hria in ka download nghal tho.






Ka nu te mut pindan kawngkhar ka pawh hawn rual chuan "Awi, an inhlei lutuk a, an tiharh che em ni?" Kan upa ber uJonathan-a nupui chuan inthlahrun hmel tak hian lo ti nghal mawlh mawlh.



Mut pindan pawn a ka vah te lo infiam chu en in ka nuih var var hlawm a.


"An car lian lutuk saw khalh dan an la thiam lo in kawngkhar kha an lo su pek mawle" a tihleh lai chuan "min ti harh chuang lo.. ka van mu rei reuh ber" ka tih zawm nghal a. U Maruati chuan nui hak hak chungin thingpui in turin min hrilh a.


Inhnuai ka chhuk thlak hmain ka vahte infiamna ah chuan ka tawi khawmuang leh rih a. Naupang chuan tak tak theihna car lem leh JCB lian pui pui chu inchung hall zau zet ah chuan an khalh kual a, theihpatawp a kan duat rawn an ni hlawm bawk nen toys pawh an neih țha hlawm ngang bawk.


Ka lam pan a a sam che siau siau a Brandon-a lo tlan phei chu ka lo en reng a, hah hmel zet a ka hma ah lo din pah chuan a kawrlum ban chu a pawt tawm cho ve ngei a.

"Anite, ka car ah ka lo phur ve ang che" a tih chuan ka nui hawk.

"Ka leng ve dawn mi?" Ka fiam a.

"Ka car chu a țha rap mai! Apa pawh a chuang thei a lawm. Mahse, apa a chuan ve chuan a tlan muang thei lutuk" uar fe a a car min kawhhmuh chung a a tih chuan ka nui lo thei lo.



Hmeichhe naupang te lah kitchen tak tak ang a cheibawl ah chuan an lo buai ve em em mai.


"Tho ve tawh maw?" thawven hmel zet a kailawn a Jenifer-i lo chhuak cho hlawl chu ka lo ner khum nang a.



"Chhuah rawn rawt miah suh" ka lo ti kha kha a.


"Tak takin zanin Party kha" a rawn tinghal tho.Ni dawn tak! Dinpuia ţhiante party buatsaih ah kal kan ngai tak e.


"A vawt dawn si ka peih lo e" ka tih chuan
"Awi.. i mak lutuk, a vawt ang a, kan lam ang a, a lum mai dawn alawm. Thlingtlang nun boring deuh hi ngatinge i lo hawn tel tlat a" a tih tak chiam chuan teddy bear pakhat chu chharin ka vawm nghal chawrh.

"A ni lawm mawle" ka vawm fuh loh avang a lei chhuah hlawi chung hian a lo la ti cheu.


U maruati pan pah a "U Maruat, i tive tho em? Tun țum Mambawihi lo haw hi a mizia a danglam vek, a inla thingtlang nula lutuk hi ka ei thlawt lo" a tih leh hlawih hlawih chuan u Maruati pawh a nui kar kar mai.


"Chhe lutuk suh, thingtlang nun tello in khawpui nun a awm ngawt thei biklo aw" ka tih chuan ei loh hmel zetin hmui a ti sawi hman hman a.


"Chupawh nise, nangte chu thingtlang nula pawh i nilo, ka pa te unau zingah pawh a hausa ber fanu i nih kha" uang zet a a lo tih leh chuan pan phei hlawk hlawk in a nghawng ah ka kuah a, kuai kun vak pah chuan a sam ka tuai thur sak nghek.


Kan Jennifer-i lah chuan "Ka sawi diklo a mi? Ka pa te unau zingah chuan pa Puia hi a hausa ber" a la rawn ti chel chul tho. "Ngawi mai mai teh" ka thlah fel meuh chuan a sam enkawl uluk tak chu hnung lam ah then let in dim lutuk in an in huimam vel a.



Kan tet lai ațang tawh 'ka pa te unau ah chuan i pa hi a hausa ber a, i hausa ber tih na' tih a ching a, cousin dangte nen hian ka thuamhnaw min neih sak chiam zel.


"New year chu Dubai ah hman ka chak tawp" thawveng fe hian ati leh ta daih.

Mak ka ti hran lo. Kum khat ah țum hnih țum thum India ram pawn Dubai, Paris tih vel a chawlh hmang a kal thei chhungkua Mizoram ah hian an tam tawh lutuk. Mi hausa apiang in an kalna hmun te an zep a. Miin khawi a sum in nge an kal tih zawhna an neih duh lovin an sum lakluh tam zia thup hram hram an duh lai hian, inla hausa chawp ho chuan an kalna apiang social media ah an pho chhuak a. Țhenkhat lah an nihna nilo lutuk baksak a insawi hausa leh lian te zu han awm țhin a mawle!


"U Maruat, u Jonathana-a hi kheuh zeuh le, kum thar chu unau ho in Dubai kal tum teh ang u" a la ti ta deuh deuh.

"Chi dawn mi?" nui chungin u Maruati'n a lo chhang let a.

"Chi lohna a awm lo, u Jonathana-a ber in a sawi chuan kan chhungte tumah in an hnial dawn lo, inpa hi chu kan nu leh pa te thleng pawn an ring hliah hliah e" ti duah a u Maruati rilru hmin sak tum zetin a bulah a țhu nghal tharh.


.








a kan in ah a lo awm leh reng tawh. Ka u te ho nen tualzawl ah nilum aia pah a an lo titi mawlh mawlh ka va hmuh chuan thaw chhuak hak in Jenifer-i chu ka zui chhuak ve a.



"Nau-i chu i tho ve thei maw?" Kan upa ber chuan a lo ti sup. Ka nui a hmuh chuan min lo nuih let ve suk bawk. Kum40 lai ani ve tawh a, kan unau kual ah chuan a thuthlukna hi kan ngaichang ber zel.



"A lo hnar bawrh bawrh lai ka han sawi harh a nih hi" Jennifer-i'n a tih chuan an nui dar dar a.
"Thawh hrelo thei reuh lutuk" tipaha u Nathan-a lo ding hluai chuan a țhutna ah min nawr țhu nghal zat, ka țhutna chair ban ah a lo țhu ve leh nghal mai bawk.

"Mambawih, ka chhuk dawn, vawiin kha lo insiam peih hma rawh aw" zangkhai zet hian a ti a. "E, u Dinpui, zanin ami tur kha ka phur tawh teh mai nia, cancel leh awi miah lo" a tih leh zet chuan ka u te ho pawn an nuih hawk hawk.


Jennifer-i haw thlak hnu chuan ka u te pawn kan fin hma a an thil lo sawi bawk chu sawi chhunzawmin an inhnial tlang nak nak mai.



Sum thawh khawm a, sumdawn na huang dang zauh an duh tih chu an țawng vel dan ațang ka hrethiam a, en hranna nei hauh lova unau thurelna ah Dinpuia an tel tir ve dan aţang chuan an in ngainat tlan zia a chiang viau ang.

Ka u te ho kiang ah hian Ramchhana țhu ve ta se, en hranna nei hauh lovin an kawm ve thei a ngemle?


"Mate" u Nathan-a'n ka dar ah a lo sawi dat chuan ka harh chhuak thut a. "Engnge?" ka ti nghal hu bawk a.

Ka u te chuan min lo en chik tlang bawk si nen hrethiam lo zetin ka en kual haw haw hlawm mai.


"Kan sawi kha i ngaithla ve reng emaw tia, kum thar lam ah chuan nurse hna hi chawlh san la, i u Maruati nen 'pharmacy run' ve tawh zawk ula" ti charh charh tu uJonathan-a chu ka en ta reng a. A thutak hmel lutuk a vang chuan ka awm zel dan tur pawh ka hmu lawk thiam deuh uar bawk.



"Pharmacy maw?"

"Umm, nurse hnathawh ai chuan a hlawk daih zawk tih i hriat kha" a tih nghut chuan thuthlukna a siam fel vek tawh tih ka unau dangte pawn an hai lovang.


"Mahse, nurse nih ka chak avangin ka zir a, bansan ka duh hleinem" tim deuh daih in ka ti let a. Hetiang boruak hi ka beisei loh lutuk avangin ka tim dai a, chhantu mamawh zetin ka u te chu ka en kual a, ka nu leh pa licence hmang in damdawi dawr lian leh changtlung tak kan siam thei reng tih chu ka hre ve. Damdawi zawrh hlawk zia leh hlep a chhe chhin ngai miah lo tih ka hrechiang ve hle bawk.


" ka hria, chuvang tak chuan a lawm pharmacy business lam khawih zui la ka duh" alo ti nghet churh. Midang chu engmah sawi tur hmel an put loh avang chuan ka rilru a na ru kher mai.



"U, nurse hnathawh leh damdawi dawr enkawl chu a hrang daih a lawm.." ka tive leh ngat a.


"Hmanhmawh suh, i lo ngaihtuah zui dawn nia" nghet zet a a lo tih leh meuh chuan hnial zui engang mah ila a sawt dawn chuang lo tih ka hming ka hriatchian tluk in ka hrechiang.


Ka u mitmeng tak ngul chu en rei duh lovin glass table kual raih a pangpar inkhawi chu hmu hlei lovin ka melh ta ngawt ngawt a. Ka nun ah hian thuneihna an lantir mai mai ngailo. Mahse, ka nun ah lo inrawlh a ka tan ruahmanna an nei tawh a nih chuan ka tan zawmloh a theih tawh ngailo thung.





"Mamte, a reng reng ah tun țum ilo haw hi i zia a danglam e" au Mami'n a lo ti phawng a, "țum dang a i lo haw i ang miah lo" u mami thusawi avang chuan mipa lam pawn min en chik zual sauh tih ka hria.



Thudik tak sawi mai chu a țha zawk a hriaiin "Dik tak chuan Ngopa ka ngai.." ka ti let ta a, an zavai mai chuan mak ti hmel an pu vek! Tunah lehlek phei hi chuan kha khua kha ka ngai zual takzet a ni!

"u Ngaihsaka te, ka nu leh pa te... ka ngai hlawm reuh lutuk" nui deuh pahin ka ti leh lai mekin "I pianpui unaute i bulah kan awm lai rengin midang i ngai daih amaw?" Min fiam pah si, lungawi loh hmel zet hian u Mami chuan a lo ti hluai a. Mipa te pawh an nui ham ham nangin za lo zet a Dinpuia ner sak chu ka hmu hram.


"I kiang ah kan awm ve reng hi, i rilru kha hrang tlat suh se" ka kut ah lo hum in u Mami chuan a ti mial mial a.



Keipawn ka rilru hi ka hrethiam biklo. Ka chhungkua te kiang ah ngei ka awm a, mahse, ka bet hlawl lo. Tunah lehlek phei hi chuan an unau zing ami pawh nilo in an hna duh zawng thawk tur an an chawm seilen mai mai hi ka intehkhin deuh tlat tawh.


"Nakum lam ah chuan hmun hran ah awm tawh loh tur tihna anih kha, i awmna hmun a hran deuh avangin kan inhmu khat a, hrang angin i inngai ta tlat, a diklo" thinrim ni hauh silo nelawm lem loh takin u Jonathan-a chuan a ti nghut. Ka en deuh dawrh chuan țhen lui suk in tho chhuak vut a. Inchhung pan a a kal nghal vut chu ka en reng mai.



"Kan unau zing a tlum ber, i pian tlai bik vang a kan duat rawn kha i ni ve a, beh loh hmel zet a kan kiang ah i awm in a tilungawi lo ve deuh a nih kha" u Mami chuan ka u awm dan chu sawi fiah zung zungin ka kut chu a beng thek thek a.


"Christmas thlen hma in unau a chhuah ho na hun kan nei dawn nia" kan boruak tihzangkhai nan a u Nathana-a thil lo sawi chu an zawi zui nghal zat a. Kan resort ah kal an rawt chuan ka hnial ta biklo.


Dinpuia haw dawn ah chuan midang chuan min luh san ta diak a, ngawi rengin gate pan chuan ka zui phei a.

"I mize danglam chu kei chiah nilo i unau te pawn an lawm vak lo a nih kha" rum zet in ka en a, ka melh rumna hrelo ang hmak chuan a lo la nui zui.


Ka u te thuthlukna kha amah hian eng emaw an kiangah sawi a neih vang anih ka ring ta bur bawk.


"Ka u te kiang ah khan sawi i nei em?" Ka ti chang fak.

"Nope.. " hmui tisawi a ban phar hluai a a tih chuan huatna in min hnawh up up tawh.

"Dinpui, nurse hna min bansan tir duh khawp a ka u te kiang ah fin phakar chhuah a, ka hna thawh min bansan tir i tum a nih chuan i tisual chiang ngawt ang" chang zet a ka tih chuan insehruh chungin min melh let ve run mai.

Inher hmak a ka pen chiah erawh chu a thu lo sawi vangin ka tawp leh chawt.


"..... thuthlukna a siam tawh Jonathan-a'n a sawhsawn tawh ngailo tih chu i hriat kha" a ti a, thinrim zet a ka hawi let chuan pawisawi loh hmel fe in min lo la nuih zui.


"Hei tak hi a lawm Jonathan-a ka ngainat bik riauna... a farnu tan a țha ni a a rin chu a kaltlangpui mai țhin" ti leh ngat in a car kawngkhar chu a pawt hawng a.


"Zanin kha dar8 vel ah ka lo lam ang che" lo tiin a la nui cheu bawk. Ka pa bulah min hruai chhuak dawn tih a hrilh vek tawh avangin hnial in awmzia a nei dawnlo tih ka hria.




Kan tual zawl ațang a tlan chhuak chu thinrim lutuk in ka melh zui ngawt ngawt ringawt.




"Nu, Jennifer nen kan chhuak dawn" insiam peih sa vek in room aţang ka chhuak a.


"Driver kha call chawp a va ngai awm ve" a tih chuan tlawn zet a melh in ka nui tel rah rah bawk.

"Keiman ka khalh dawn"

"Het! A ngai reng reng lo, i u te tal in hruai tir r'u" ti tung a chahbi inkhai ka ban chu min um nghal ruai mai.



"Ka u te nen a chhuah chu a ninawm em a lawm, parking a vang si an tia, an phun chhen zel a" ka tih a. Ka nu remtilo lutuk hmel ziaawm deuh ka hmuh chuan "duh ang pawh kan in lei hman ngai lo a, an rual a kal ai chuan chhuah loh ka duh. Mamawh in lei kim lo mah ila pawilo" ka ti leh hmak.

Ka melh kar a, 'nia, kal chhuak lo mai rawh' a tih tak tak erawh ka hlauru tak zet.

"Anih fimkhur ang che. I licence i keng em?" a tih rual chuan ka lam lo chauh.


Ka bag a licence chu phawrh in ka lek khum va va a. Rilru dam fel lo zet in SUV an lo lak thar ngei mai kawngkhar ka hawng lai chu min en ngawih ngawih.



Jennifer-i te hi kan kawmthlang ah an awm a, an kawmthlang kawpui ah inkhalh thla in car nen an kawmthlang ah ka ngahthu ka hrilh chiah chu a lo phur ngang mai.


"Awi, i u te strick lutuk khan engtin nge an khalh tir phal che a" a rawn ti nghal bawrh bawrh.


Min tih fo dang ang a "I sawi fo kha.. an fanu duat a lawm ka nih" ka ti chiah chu ei loh hmel zet in min en a. Ka nuih let sawng bawk.



Ka phone leh car music system chu ka connect a, C FLA hla leh C Sanga hla ka play chhawk tluk tluk mai. A khat tawk a Zoramchhana zai tawite lo in play tel ve țhin chu Jennifer meuh pawn zaithiam a tih thu a sawi chhen a. Atthlak zet in nuam ka lo ti ve em em mai ni.



Nimin lam a kan kalna dawr ngai ah bawk khan Jen chu ka hruai a, u Dtei bulah u Ngaihsaka pheikhawk number ka zawt a, Zoramchhana min chhaih peih a zarah uang zet in u Ngaihsaka ké aia Zoramchhana ké a len thu a lo sawi hlauh anih kha.



Mipa boots kê rek thleng chu ka thlek vang vang a, a material chu Zoramchhana ngainat tur tak a niin ka hre bawk.

Jen-i'n "Khatiang Dinpuia' n a bun tawk dawn a mi?'' a tih chuan nuih sak ringawt in counter lam ah ka kalpui nghal a.


"Ka va han ten tak che Ramhmangaih, i ta tur a chengsing khat pawh sen harsa tiviau si, Dinpuia pheikhawk lei nan chuan sum i va ui lo em em ve" ti chiam a bill a bih chuan hrelo ti zet in ka nuih vak ringawt.


MC ah kan kal kual a, u Dtei over coat tur leh ka nu leh pa Khawla chawlhni thuamhnaw tlak deuh ka lei sak leh hnu ah 'Christina V' dawrah ka kawr order tawh sa kan lam kawi nghal bawk. Aizawl ah ka awm lai a ka dawr fo țhin a nih vangin sunday thuamhnaw chu Ngopa ațang pawn a bulah hlir ka order țang țang zel.


"Awi! Ka thimrim lutuk" mit sen ram chung a phone hmet thim nghal hmak tu chu ka en a.

"Ngatinge?" Ka tih chuan a bialpa leh hmeichhe dang an chhuak dun lai hmutu an awm tih min hrilh a. Ka thaw chhuak hak mai.

"I țhen dawn em?"
"A teuh lo" a ti a, mak ti zet a ka en chuan lem zet a nui chungin min lo en ve a.

"Tun anglai ah te chuan mi pakhat a rinawm hi tupawn harsa an ti vek tawh a lawm, chulo ah kawp tak tak a tan keimah bak a duhlo. A future a bright a, fapa mal ani leh nghal, dai sual palh vang a ka țhen ngawt in ka chan nasa lutuk dawn si"


"Mahse..."

"Aaaa, sawi tawh lo ang, tunlai mi zawng zawng deuh thaw tih dan vek a lawm. Mi hausa nupa tuakthar tam tak te hi belhchian chhuan maw, lo in cheat ve zeuh zeuh hi an tam a nia, hmeichhiate hi an â duh tawh lova, hetiang in cheat na thleng zeuh vangin nakin lawk a an nawm sakna tur tuman an tichhe duh tawh hleinem" ti sep a a rilţam thu a sawi nghal daih chuan tawite in ka nui ringawt.



Hausak chakna nun in a ken tel ani miau tawh in keipawn ka hre hial tawh!


"Jen?"

"Umm"

"Andria, kha, kan veng a Andria kha, model chhelo zet kha tunlai a chanchin i hria em?" Bawngsa-ti chan mawlh mawlh lai chu a tawp chawt a.


"Vai millioner nen a innei kha maw?"

"Ummm"

"Tehdaih che chuan...lawks" tih pahin a phone a ban a. A hmeh en pap rual a a thu lo sawi vang chuan ka thinphu a che dawt!

"A pasal nen khan an ințhen! Mahse, ințhen zawng zawng ah a la hlawk ber ang, a pasal ro sum ațang 40% a chang vek a lawm!"


"An ințhen maw?"

"I la hreve nange.. naaa, engtin nge i hriat ngawt ang, i awm bo char char tak e. Tunah hian Aizawl ah a awm, an ințhenna sum a chen ani ringawt" nui hak pah a tiin a phone chu ka lam ah a rawn nawr phei a.

Ig a Andria wall ka scroll kual chiah chu mak tihna hlir in ka khat ani tawp mai.

"Fa an la neilo law?"

"Mipa an nei. Mahse, a pasal in a chang" a ti leh mai a.


A chhiat loh zia leh pian nalh zia a inhrechiang bawk a, in pose uchuak thei tak ani tawp! Chuan, mipa la upa lem lo tih hriat tak nen an thlalak a pho chhuak tam hle a, comment dukdak lo tak tak pawh a dawng tam țhin khawp mai.


"Khapa kha a bialpa a nih kha" sawi tur hrelo in ka nui tawi tak ringawt.

"Kha kha lawm hmeichhe fing chu, pasal neih dawn chuan hausa deuh law law neih tur, ințhen hun ah pawh damchhung daih sum phut theihna tur" fiamthu titak zet a a tih chuan a phone chu ka pe let a.



Zoramchhana'n an ințhen tih a hre ve tawh a ngem? tih ka ngaihtuah daih thung!





"Wow" ti sup in a phone chu a kekawr ipte ah a thun nghal zat. Room ațang chuan ka pen chhuak a, Zoramchhana'n hetiang a ka inchei lai hi min hmuve ta se engtin nge a awm ang tih ka ngaihtuah rauh rauh mai.


Ka lam pan a muangchang a Dinpuia lo pen phei chu ral riai riai in Zoramchhana nui hmel pa lutuk in min nuih suk lai ka hmu chiah chu ka lungphu a tawp lo chauh.



"I chhelo tak zet" a ti sup, ka hma ah lo ding in nui hmel pa zet pu reng chung hian min melh chhuk run a.

"Nang.. nang maw?"

"Keimah lo beisei i nei mi?" Lo kun hniam a ka hmai bul chet a Dinpuia lo nui suk ka hmuh rual chuan ka tawlh hnung nghal dawrh mai!

"Babe?" mak ti zet hian ka ban ah a lo chelh nghal thuai bawk.

Kei erawh chil lem dawk in kan inchhung ah chuan Zoramchhana zawngin ka hawi kual nghal chiam ringawt.


"Babe?" Ka biang ah lo dawmtu an awm rual chuan rang zet in ka nam sawn a.

"Ugh, ka.. A vawt viau a ngem?" Ka ti bah niai. Dinpuia chuan ka lan dan chu uluk zet a min en chhuak vek in min nuih ta suk.

"Hall chhung ah kan awm daih dawn a, vawt lovang" bu nghat in ka room kawngkhar chu ka pawt khar a. Satin Gold rawng dal raih kawrfual malte thleng ka ha a, a chungah coat fual zangkhai fahran ka hak thuah bawk.



Ngawi rengin party-na hmun tur lam pan chuan kan tlan chhuak a, kan inkar seat a phone inkhaikhup a awm lo eng pup pup chu mak ti zet hian ka en a.



"I.. i phone kha chu i ak ani lawm ni?" ti sep in Dinpuia chu ka en ha. Seat inkar a phone eng pup pup a hmu chuan a mitmeng chu a buai deuh nak hian ka hria.


"Uhh," a ti a. Phone chu rang zet a la kangin a chhang a.

"Dude, kawng ah kan lo tlan mek" a ti nghal thawr.


"Kan reilo ang.." ti sup in phone chu a titawp a

"Ka țhiante an nih kha" ti pah in jacket ipte ah phone chu a ak leh nghal daih.


Ka bu ta nghat ringawg.

A khat tawk in Dinpuia chuan min en leh zauh țhin, ka sam uk buang theng pawh tikawi deuh in ka vial tawm a, ka bek sam tlemte, kawi deuh nghial in ka uai thlak tir bawk.

"Ka inchei dan hi a uchuak viau a mi?"

"Teuh lo.." min chhang rang lutuk chu ka nui hak. "I nghawng lang sexy lutuk khan min tibuai deuh a lawm" a tih pah a ka nghawng a lo melh zuk chuan ner deuh nangin ka en a. A lo nui suk ringawt.



Ka taksa lang tam thei leh ka ruangam langchiang thei zawngin ka inchei khat a, nurse uniform hi ani deuh tawp zel. School kan kal lai ațang tawh 'i pian hi a Barbie' min tifiam fo ţhin. Jennifer-i vek hian unau riah khawm chang pawn min chei chiam zel. Thawmhnaw chi hran hran min hak kual tir a, kan cousin kual riahkawmna album ringawt pawh chhah zet zet in pasarih vel lai chu a siam hial tak kha mawle!



Party na tur kan thlen meuh chuan an lo ri luih luih tawh. Dinpuia sawi ang chiah in a chhung kan luh chuan thlasik khawvawh hun lai ani tih hriat loh lek in a lo lum nuam reuh phian a. Hmeichhe țhenkhat phei chu an kawrfual hak chhingte leh ban nei mumal hleilo te nen an lo phusa suau suau tawh mai.



Dinpuia chuan a țhiante nen min inhmelhriat kual tir a, kei ai mah a ka u te ho lo hre țha zawk an awm fur. Doctor hlawhtling tak tak te leh thlahtu te aţang a mihausa thlah kal zet te an nih hlawm avang in an titi duh zawng pawn a hrawmhraw hlawm khawp mai.



An nupui leh bialnu te lahin chawlh hmang a India rampawn an kal tawhna te ho an sawi a, an nuam tih zualna te inhrilh in kal ho te an rawt leh rum rum thul. A rei hnuah phei chuan an boruak chu ka zo lo țan lek lek.



"Ka kalsawn lawk dawn" ka dar ah kuah a, lian zet a țawng lawng lawng tupa bulah chuan ka ti sep.

Uluk zet a min en rual chuan ka ner zeuh a.

"Ka rei dawn lo" bu nghut in ka dara a ban nghah chu a la sawn hram



Washroom ah ka lut a, toilet erawh hman tumna ka nei țhak lo! Ka make up ka in endik mawlh mawlh lai chuan ruih neih tih hriat zet in toilet ațangin Andria a rawn chhuak hlawl.


Ka lo tim deuh chawi ringawt.



Darthlalang hma ah chuan lo ding ve in kut a sil nawk nawk a, a kut a tui far tluk tluk chung chuan a sam chu a hui kiang a. A la hmelțha tak zet mai! Mahse, tuitang loh rukna riau a nei tlat lawi!


"Hey, ka hria che em?" Mitmeng phi chiai hian min lo en a.


"Ka hrelo le.." ka nuih luih a.

Chik zet a min en chhuah vek hnu ah hmui a pet sawi ta zeuh.

"Ka chiang tawh lo.. zan in chu ka high lutuk a" nui pah in a kutțang a bek zawn ah a ti vir kual pah hian a lo ti hak. Ka nuih let ve hak hak bawk.


"Ka kal san ang che.. Enjoy Mate, i nghawng leh i hmui kha a sexy tak zet" ti hram a vei neih loh hmel zet a min kalsan tak ah chuan ka thaw huai ringawt.



"A hna vang a a nunah harsatna lian tak a hmachhawn laiin Zoramchhana kha kalsan lo la ni tur" ti sep in basin sir a a phone theihnghilh chu ka la kang a.



Ka tum loh deuh in washroom kawngkhar lianpui ka pawh hawn rual chuan Andria phone sir lam chu ka hmet palh a. Screen lo en pap rual a ka thil hmuh vang erawh in ka khawng nghal vek!


Washroom kawngkhar chu a in vaw ri deuh bur a! Kuttha khur ru dar dar chung hian Andria phone screen chu ka melh ngawt ngawt.



Zoramchhana nen birthday cake chawi chung a an lakna thlalak wallpaper ah a hmang a nih chu!

Thlalak chu a rei ve deuh tawh tih hriat zet in Zoramchhana pawn hmeichhia te vei rawn ngawih ngawih theih tur hmel a la pu a, a biang ah chuan hmul a țo dap tho nangin tun ang em em hian a la rorum lo. Andria chuan cake a candle inchhi chu a melh a, duh hmel zetin Zoramchhana'n Andria a en thung.


'A va mak, Jennifer khan bialpa a nei' a ti reng sia. Nge ni a, Zoramchhana pawn tun thleng a a la theihnghilh theih loh ang bawk hian Andria pawh hian theihnghilh thei biklo in Zoramchhana neih let leh theih inbeisei in a pasal a țhen tihna ani thei mai a ngem?


Washroom kawngkhar lo in nam hawng thut vang chuan harh chhuak zawk in phone chu ka hmet thim leh nghal hmiah.


Ka kal chhuak nghal a, mihring zi nuaih nuaih kar ah pawh Andria chu a lo langsar bik nalh tho.


"I theihnghilh a" ka ti sep, rawlthar rual karah zahpah nei vak lova a lo in la sexy kual vel chu a lo hawi chhuak rang hle bawk.


Thawveng zet hian "thanks aw Mate... nghawng sexy nu" a rawn ti hram!


Thli vawt zet in min chhem rual chuan ka harh deuh hawk. Mahse, party- neihna hall hlat zawng chuan ka pen hlawk hlawk tho.


Thufe ka kal hnu chuan thingkung lian zet hi a lo awm a. Chu mi chu pan in țhutthleng lo awm ah chuan ka țhu a, chu hmun ațang chuan Aizawl khawpui eng ut chu a chhoh thlir theih.



Mahse, chu khawpui eng nalh zet chu ka hmufiah lo tial tial a, ka hmai lo sa nghal hut hut chu duh lo tehmah ila ka thunun thei lo.



'Zoramchhan, Andria kha i la duh em?' Chu zawhna chu ka rilru in vawi za chuang ka sawi nawn tawh. Andria te ințhen hi a hriat vek tawh vang em ni kei kha pasal nei tur a min lo duh em em?


'Aih, chutiang mi chu Zoramchhana a nilo' lu thing nak in phone ka phawrh a, ka be chak a, ka ngai ngawih ngawih reng bawk. A chang phei chuan mi â ang maiin ka bul vel ah a awm ve emaw tih hial țumte ka nei ţhin a. Mahse, ani lah a reh tlat a! Ngatinge ka lakah hetiang hian sual a chhuah tlat le?



'A message tal ka dawng hmasa a nihloh chuan ka be hmasa biklo vang' ti a ka infuihna chu bawhchhia in a number ah chuan ka call ta nge nge a.


Rei ngial a ring hnu ah a pickup ta hram.

"Hello" hmeichhe aw in a rawn ti mai chu ka thlarau in ka taksa a thlawh chhuah san lo chauh!


"Ramhma?" a rawn ti leh a. Ka lungphu rang nghal dawt dawt chuan *Jenny* ani tih a hre chawp chilh nghal zat.

"Jenny.." ka aw chu a ri chhuak chang chang. Tun ah zan dar 11 a hnai tawh, engtin nge Zoramchhana phone a lo chhan theih?


"Aw, keimah, i dam em? I reh lutuk, i chhungte an dam țha em?" a lo ti nghal mawlh mawlh.

Mumal in ka chhang pawn ka hrelo. Zoramchhana nen an lo in ru ta mai em ni?


"Khaw.. khawi ah nge Zoramchhana?" ka ti tham chhal a! Ka sawi thiam lo, ka kawngaihthlak ka inti! Ka â hle bawk!

"Khaw nge maw a lo kal hman ni?" ka mittui lo luang thla lum pap chu rang zet a tuai hul in ka kã ațangin ka thaw chhuak ham ham mai.


"A pawimawh viau em? Ka bul a sawi ve chi te a ni em?" nui hak hak a Jenny'n a lo tih leh meuh chuan ka thinlung na lutuk chu a rawn thler chhuak dawn ni mai hian ka hria.


"Aaa.. chu lam a nilo" ka nui lui a. "Ih, a lo haw.." mit ka chhing sawk. "Aa.. a lo let leh vel ah min lo call se, uggg, pawi i tih loh chuan..." ka ti bah nuaih a. Jenny min chhan letna pawh chu ka hre mumal lo.


Rang lutuk a phone chu hmet tawp hmak in thaw chhuak hawk hian ka thin zawn chu ka țham vak a! Zoramchhana leh Jenny innei tur leh inkhat a cheng dun tur a ka mitthla rikngawt pawn ka thinlungna lutuk chu at daih hial ka duh!


Thaw chhuak ham ham chung a ka bul a lo țhu thla mek in ka kut a lo hum rual chuan rang zet in ka phih let dawrh a.

Ka ding chhuak nghal zat bawk.

"Ka.. kan haw thei tawh em?" khur ru dar dar a tiin ka biang huh niai chu ka tuai hul nghal sawk sawk bawk.


"Haw mai ila Ka duh, car bul ah ka lo nghak ang che" ti leh sep a ka kal sawn tur chiah chu Dinpuia chuan ka ban ah a rawn man chawt a.

"Min thlah teh" ka ti nghal țhat.


"Khapa khan a chhai kual vel mai mai che tih hi engtik ah nge i hmuh thiam dawn?" a lo ti a rum lutuk hian ka melh nghek ringawt.


amah v3k chuan "A diklo em ni? Tunah pawh Jenny nen an awm dun lai tlawm thlak zet in i han bia. Ni em?" inseh ruh chungin ka melh ngawt ngawt ringawt.



"Babe" ti sup a min kuah a tum rual chuan nasa lutuk in ka tal nghal nawk nawk a. Daahtheihna tlachham lutuk in "Duhtawk teh" a lo ti hrawih bawk "a hria... khapa a vang a i danglam ta hi engkim ka hrevek. Mahse, a chhaih kual mai mai che tih erawh pawm thiam tawh rawh" ti nghut nghut a nghet lutuk a a awm ah min kuah beh rual chuan țah chhuah hlau lutuk in a jacket chu ka țham ngawt ngawt.



"Theinghilh tawh rawh, i tleirawl rilru remchang ah la in a chhaih kual mai mai che a nih hi, keipawn engkim theihnghilh in engmah thleng lo angin ka ngai ang, Zoramchhana bumna che lak ațang i tal chhuah fel hma chu thik buai hauh lovin ka țanpui zel ang che" ti sup sup a ka hnungah a lo ben dat dat chuan thinlung na lutuk in ka ţap chhuak ta hlawp hlawp.


"A pawilo... Ka theinghilh sak vek ang che, ka lak ah inthiam lohna nei a țul miah lo a nia" a ti a, ka kawchhung ațang min lo hnawh tawt up up tu chu Dinpuia thusawi vang nilo in Zoramchhana ka la thlakhleh ngawih ngawih vang ani tih ka hria.





.


A hma zawng aiin Dinpuia'n min ngaihsak zual sauh a, kan in ah a tal deuh tawp ani ber, Christmas pawh damtlang tak in kan hmang zo va. Jennifer-i rawtna angin Dubai kal pawh an rel thlu fel der. Chu erawh kum thar zawh hna țan leh hma siin an ti thung.



Sawi nawn tawh kher lo mah se u Jonathan-a pawn ka hna bansan tur ang ah min ngai nghet hmiah tawh tih chu family new year plan țum in a chiang ta viau! Ka rilru buai mup reng vang erawh in hnial na ka neilo a, bansan ka duh reng em tih pawh ka hre chuang lo.


Khami zan khan vawi khatmah Zoramchhana'n min lo call let lova. Vawiin ni thleng hian min lo call let hun ka la nghak ru fan tih chu tlawm thlak hle mah se thudik ani tlat lawi si!



Theihnghilh tawh turin ka thinlung chu ka hrilh fo a. Inngaizawng pawh kan nilo a, kei ngei pawn bialpa nghet ka nei a, ani chu ngaihven tawh lo tur ka nih zia ka inhria. Mahse, min duhthu vawi khatmah sawi chhuak lo mipa chet dan engkim kha ka thinlung a lutuk hian *DUHNA LANCHHUAH TIRNA* ah a ngai tlat a. A chet dang engkim mipa ngawih ngawih bawk si kha theinghilh tur a tan a ui hluah hluah!



"Room ah ka chho tlang dawn" ka ti a. Ka vah te ho an toys nen a infiam nghak hlel lutuk a kailawn a tlan chho that that te chu ka um chho a.


"Mate, ka hritlang i tih kha, damdawi ei nghal rawh aw" ka nu in a rawn ti zui lang lang mai.



Chau zetin ka khum dup nuam zet ah chuan ka bawk nghal thlawp. Family outing kan nei a, kan chhungkaw resort ah ni hnih kan va riak a. Dinpuia pawh lo tel ve zel in kan inkar in a hma a an leh theih nan țan a la nasa hle bawk.




Ka phone chu hmet eng pap in 29/12 tih lo lang kulh chu ka en ngawt ngawt.


31 hi Dinpuia nu birthday ani a, tah chuan inneih kan duh thu chhungkaw ho hriattir a tum bawk a nih kha!



Hnial chhan tur lah ka neilo! (?)



Insehruh nghek in khum ațang chuan ka tho chhuak a. Inbual zawh a hak tur lak chhuah tumin ka thuamhnaw bawm ka pawt hawng a.


Mahse, ka hnawh na lam ah chuar a awm palh ang tih hlau zet a Zoramchhana Jacket tur ka khai chhuah lo lang va ka hmuh chuan ka mittui a lo hnam leh ţiam ţiam tawh.



Thaw ham ham in Jacket chu ka la thla a, 'i inhmeh dawn sin' at hmel zet a ti sep in Jacket chu ka awm ah ka kuah bet nghal tlat.




Amah mitthla tel tlat a ka lei sak anih vang nge? Hetia ka kuah chang hian Zoramchhana ka ngai lutuk țhin pawh a ziawm deuh țhin!



"Awi awi awi, a tawp a tawp ah chuan i lo lang thei ta hram e" Dinpuia nen an inchhung ah kan inzui luh rual chuan anu chu a lo hlim ngang mai.


"I dam țha em?" ka ti a, kan inchibai zo chu ka kut a thlah duh ta hlek lo. Ka bul a Dinpuia ding chuan min nuih sak in țhutkhawmna lamah zui turin min mit mei a.




Midang pawn min hmu chu an lo lawm thiam ngang mai.


"E, a lo nula ve tak tak ta!" Dinpuia Patea'n a tih chuan an nui dar dar a.

"Pate, chu.. naupang emaw ka ngaizawn i lo ti țhin elaw?" Dinpuia'n a tih let chuan ka melh rawm a.


"Naupang hmelțha deuh kha nula hmelțha zet a lo ni tawh a nih hi, Aizawl ah awm tam phei la chuan magazin cover vel a tan thlalatu te ho in an veh sek lo che maw" a tih leh duah a. Chhan let ngaihna hrelo zet a ka nuih tawi tak lai chuan chaw ei an peih thu an lo sawi ta hlauh.




Chaw ei lai pawn Dinpuia nu in a bul ah min țhut tir a, chawhmeh tui țha țha min suah sak chang in uang zet in thik hmel deuh a Dinpuia lo țawng leh țhin chu kan nuihpui leh hak zel.


"Nu, i bul a țhu khan i birthday ah thil țha deuh present tur che a nei a nia aw" Dinpuia chu ka va melh deuh kawk a. A lo la nui ruh ruh zui.


"Ani maw? Thil man to lutuk te kha min pek i lo tum a nge, a ngai miah lo a nia aw" ti dam diai in min en a.


" a present tur che i hriat hun chuan tlawm i tih lutuk vangin a man i pek belh hial duh ang" Dinpuia vek in a lo tih leh, țullo ti zet hian ka va melh a.


"Chutiang man tlawm si, țha bawk si chu hriat a va chakawm tawh ve"

"Naaa.. a uang vel mai mai a nih kha" ka ti ta ringawt.



Chawi eikham thingpui hang inzawh hnu ah Dinpuia room ah kan chho a.
'Ka inbual lawk a nga, in in ah kan phei dawn nia' a ti a. Washroom ah a luh hnu chuan lehkhachhiarna dawhkan bul bang a thlalak intar ho chu ka en kual diat diat a.



A school kal lai te, u Nathana-a nen an lakna a tam ber a, amah nen ka tet lai a kan lak pawh a lo intar, nui hak in ka star țan tirh lai deuh a kan in a Christmas kan hman hona thlalak chu ka chul zeuh a.



Chutih lai tak chuan phone vibrate ri ka hre ta thut mai.

Phu zawk a ka bag ka zen chuan ka phone ni maih lo. Dinpuia lah in khum ah a phone a kal san a. A phone pawh chu ani chuang miah lo.


A rik nghawr chur chur avang chuan a bengchheng phian bawk sia, thawm lo chhuahna chu uluk deuh a ka ngaihthlak chuan dawhkan pawhdawh chhung ațang tih hria in rang zet hian ka pawt hawng a.



Pawhdawh chhung a phone lo la in ring mek chu hrethiam lo zet in ka la kang a, screen ah chuan *Nuthlawi Ahmai* tih a lo lang kulh!


Phone ring chu a tawp a. Khum chung a Dinpuia phone chu en țha leh ngat in a phone thuhruk chu ka hmet eng leh a.



Ka hriatchhuah a rin loh lutuk vang nge zu han lock hlek lova mawle.



Lock chu ka open a, contact ah ka luh rual chuan ka luak a chhuak hlui.
Nuthlawi hlir a contact list ah chuan an lo awm!

WhatApp ah ka lut leh a, Ahmai chiah nilo hmeichhe dang nen an in chats na țawngkam bawlhhlawh zet zet a lo tam ngang mai.



Rawlthar ler lutuk ho te hian phone pahnih pathum an nei ru țhin, hmeichhe hran hran biak nan number ngai an hmang ngailo. Mahse, rawlthar pawh nitawh lo. Doctor meuh, chupawh țawng lian ve thei tak mai hetiang tak a a che mai chu mak ka ti tak zet!

Ka rilru ni deuh nuaih a lo fim telh telh rual chuan za lo zet in ka nui ta sak mai!



Washroom kawngkhar ri rak ah chuan ka hawi phei thuai a! Dinpuia pawh in ka kut a ka phone leh phone dang ka lo keng va chu a rawn hmu rang kher mai!



"Babe?" rang fahran a min pan tu mitmeng pha dui chu tawite a lo nuih in a phone thuhruk zawk chu dawhkan ah ka thehthla hmak.


"Babe.. ka.. ka sawifiah thei.."

"Nah!" Ner zeuh in ka nuih a. "Ka hmu vek tawh, insawifiah i mamawh lo" ti sap in ka kal sawn a.

Mahse, ka kut ah a lo man chawt rual chuan ka sa ta phat.

"I kut bawlhhlawh zet khan min khawih suh" ka aw chu a fiak țhak.


"Ka sawifiah thei ka ti a lawm. Min ngaithla la.."

"Oh, hmeichhe dang biak nan phone hran i nei, Ngopa a kan awm lai ațang daih tawh khan ka man chhuah loh nan chhe phone pahnih i lo nei tawh. Ka rinhlehna che a nasat em hnu khan i rinawmzia fiah tur in min ngen a nih kha... Mahse,.. ka rinhleh loh nan che leh i hmeichhe biak țhin sim thei chuang bawk silo in phone dang i lo hmang tel reng.. hah, a fiah tawk viau em?"



Nuih hak a ka kal leh tur chu min lo la pawt let hram.

"Dinpui?"

"Hey... ka thusawi hi ngaithla ve phawt la" a ti a, a hmel pha dui leh mitmeng dawi nghal vek ka hmuh chian em avangin nep ti fe in ka ner khum nang nang thung



"... Engkim ka theihnghilh sak ang che, ani nuthlawi khan a chhaih kual vel mai mai che a nih hi ka tih ve i beisei em ni?" Hman zan a a țawngkam hman ang chiah ka sawi ve meuh chuan ka kut chu a thlah a.


"Ka tih ve chu ring hauh suh. Dawhthei ber ang a ka diklohna te min sawi lan sak lai khan i thuruk lian tham lutuk hi a lan chhuah loh nan i țawngțai ru hial in a nia ka rin" ka ti leh kher bawk.



Ka hmuhchin kha a fiah em avangin sawi dun tur kan nei tawh lo. Chak takin a room kawngkhar lam chu ka pan mawp mawp a.


Dinpuia'n "kha thingtlang tlangval nen khan i chhungte'n in inkawp an rem tih chu ring miah suh"a lo tih chuan ka ding dat a, Ka in her let chu tifuh intih hmel zet hian min lo nuih sak bawk. "hmeichhe dang biak nan phone nei hrang thlap mipa pawh ka neih an rem tih kher ka ringlo" ti ve nghat in ka chuah san nghal nal nal.










kan Inchhung ka luh chuan a lo reh țhiap a. Mak ti zet in min awmpuitu nula chu ka zawt a.


"Pi leh pu te chu an room ah an awm, i u Nathan-a kha chu Dinpuia'n a lo call a, hmu turin a chhuak" ka nui tawi tak ringawt.


An in ațang kê in ka haw a, ka u a lo call chhuak hman tho.


"U Jonathan-a te chu u Mapui nu te in ah an leng phei tiraw?"

"Aw"



Kailawn ah ka tlan chho that that a, țhutkhawmna zau zet kan thlen rual chuan ka ding dat.


U Nathan-a nen an inhmu a nih chuan ka u rilru hmin theihna tur anih phawt chuan dawt a sawi hreh hauh lovang. Ngatinge nichin khan thlalak dukdak lo tak tak an inthawn ho kha video tal a ka lo record loh leh.


A inti zet in ka room ah ka lut a, ka jacket hak phelh a, thuamhnaw bawm ah ka khaih luh rual a Mipa Jacket dum pa zet ka hmuh chuan ka thaw hak a.


"Nu, pa, Ngopa ah ka chho dawn" ka tih chuan ka nu a lo țe deuh tuar ani ber.

"Engnga, engvang chuan maw?"

"An indaih lo deuh a.." ka ti a, hmanhmawh hmel zet in ka awm lui tlat, diktak chuan ka unau te hian nurse hna min thawh zui tir tawh dawn lo tih ka hria. An awm loh lai a Ngopa chhoh dan kawng ka dap lo anih chuan engtik ah mah Zoramchhana ka hmuh leh theih ka ring tawh lo.


U Nathan leh Dinpuia inhmu hian rah țha a chhuah ka ring bawk hek lo.


"Zan zan ah hian maw?" ka nu vek chuan a ti a. Ka pa hmel tak ngul chuan a remtih loh ka hlau tak zet.

"Aw, ka zan kal loh chuan.. ih, hunpui boruak vang hian insual buai leh accident vel a awm ve reng a.." ka tibah nuaih a.

"Ngopa a chho tur dang an awm ve em?"

"Aw, Bawngkawn ah ka lam phei ang" dawt chiang lutuk a ka sawi chu nuam ka tilo.

"I u te tal in han thlah che se la.."


"Kal rawh se." Ka pa in a lo tih sup chuan ka phu deuh zawk.

"Puitling ani tawh a, ngaihtuah awm ani nang" a tih leh zet chuan va kuah chuk chuk mai ka chak hial.


U Nathan-a lo let hman hlau zet in mamawh ka inkhung zung zung a, suv ah ka inhlan luh fel chuan ka nu in țawngțaina neih a han rawt leh a, ka pa nen min țawngțai sak hnu chuan ka inkhalh chhuak nghal par par.



Ka u te'n min lo umzui ang tih erawh ka hlau ru tak zet!


Thil puak țhawt ri vang chuan hlauthawng lutuk a brake rap tuar in car chu ka dintir chawt! Engine ka tih hlum rual deuh thaw chuan ka chheh vel zawng zawng chu a reh nghal duk bawk nen ka lungphu chu a rik hian a ri nghal dawt dawt thei mai!




"Engthil nge thleng a?" Chil lem khalh pah chuan thawk ka la vak a. Ramhnuai reh zet ah zan reiah keimah chiah a tlan ka nih vang a rilru a ralmuan loh tawh tehreng nen, chuta kar a thil puak ri nelawm loh zet ka hre thut bawk si chuan ka awm a tinuam lo tak zet.




Car chhung chu ka thlek kual thuak thuak a, diklo a awm in ka hrelo. Headlight in a chhun en phak bak kawngpui sir hnim buk zet thim khup chu melh kual hrek hrek in engine chu ka start leh a. Ka tlan chhuah dawn a car body nghing che lawih vang chuan inringlo lutuk in ka khek chhuak țhat!


"Engthil chiah nge ka chungah hian thleng a?" ti chhuak hak in mangang zet in ka hawi kual ruai tawh!


Zan a khaw kar kawng tlan țhin te mihring nge ramhuai tih hriat hleih loin in a tihbuai țhin thu an sawi te chu țullo zet in ka ngaihtuahna ah a lo lut nghal zut zut a nih chu! Kopang thim khup lam chu tim zet hian ka han melh dek dek a. Engthil danglam mah ka hmuh tak loh ah chuan thaw huai in steering chu ka hum vak a.


"Kristian ka nih hi, ramhuai sual ho ngamloh Pathian nung be tu ka ni" ti a keimah leh keimah inhrilh mawlh mawlh in thawk ka han la leh te te a. Ngaihngam lo zetin car kawngkhar chu ka nam hawng a, thlasik zan boruak vawt hit zet chuan min țham vawt nghal sung sung mai.



Car hma a ka phone dah chu ban in ramhnuai nelawm loh zet mai chu melh kual hrek hrek pahin ka chhuak a, ka sir lam thim mup leh ka hnungchhawn lam apiang chu ka țîh ru em em tho! Rannung hram ri chiah chiah te, headlight eng paw luk khawp a vaivut nawi zam mum mum te chu an nelawm loh tak zet. Ka hmelhriat ngailoh mipa lian zet a lo lang thut mai ang tih ka ngaihtuahna ah a lo luh rual chuan lu thing nawk in ka in hum ruh vak a.


Boruak vawt lutuk leh hlauhna avang a tha khur ru dar dar in car hma lam ah ka pen phei a, phone torch chu tieng in car ke chu ka chhun kual thuak thuak a, a ké chhak hmalam zawk lo thep suai mai ka hmu chiah chu țullo tih lutuk hian ké ka per nghek.



Țah insum zet in ka phone a dar zat chu ka en a. Zinglam dar 3:30 a pel chiah. Ngopa khua lah KM 8 zet in ka la hlat tih ka hriat rual lehlek phei chuan țah a chhuak ut ut tawh.


Phone signal lah a bo vek a, signal zawng a kal kual tur tak ngial pawn huaisenna ka neilo. Kawng chhak thim zet ațangin eng ramsa nge tih pawh ka hriat ngailoh lo hram thut avang chuan ka thlarau in ka taksa a thlawh chhuah san lo chauh!


Thawm ka chhuah chuan kawngpui ah a lo țum thla a nga, min bei mai ang tih ka hlauh em avang chuan khur ru hlawk hlawk in car kawngkhar ka pawt hawng a, țhu lut chawrh in kawngkhar chu ka pawt khar nghal dawp.



Thawm chu a awm reng bawk si nen thlaphang lutuk in mit ka chhing a, ka țawngțai dawn a, sawi tur ka hrelo! Ka tih ngaihna hrelo hlau lutuk bawk si chuan Zoramchhana hming ka lam ta mawlh mawlh!

Eng emaw chen hnu ah thing ro in rap tliak țhak țhak leh ramsa thawm chu a reh tial tial a, ka inthlah dul meuh chuan ka tha țang nasa lutuk vangin ka zawi hnawk mai.



Driver seat ah chuan țhu tawm kak in thawm awm hlek ah ka hawi dawrh dawrh a, ka rilru chuan Zoramchhana a au ru mawlh mawlh mai, mahse, Ngopa pan in ka zan chhuah tih a hre miah lo tih ka hriatchian em avang in ka rilru chu a beidawng tak zet, motor dang lo tlan an awm mai ka rin tehlul nen darkar chanve zet ka țhut hnu ah pawh eng motor mah a lo tlan bawk silo. Lo tlan ta tehreng pawh nise rampalaileng ah hmeichhia mahni chiah a lo awm nawlh lehnghal lakah chuan rilru țha tak an pu kher a ngem tih lah ka hre hauh lo!



Ngopa hi Manipur truck lian pui pui in a paltlang țhin tih ka hria. Truck driver te hi Vai leh Meitei an ni tlangpui a, khawvel a ka nel loh ber te an ni bawk!



Maimitchhing in ka chet dan atthlak lutuk te chu ka ngaihtuah let a. Jenny'n a phone a lo chhan sak khan ka na ngawih ngawih a nih kha! Chumi hnu ah vawi khat pawh min lo biak pawh tumna nei lo mipa ka hmuh chak em avangin Aizawl ațang heilai thleng hian keimah in zan ah lehnghal ka inkhalh thlen chhoh dan te chu ka ngaihtuah let a! Â ka inti tak zet! Chutih rual chuan Zoramchhana ka ngai lutuk leh hmuh ka thlakhlehna nasa lutuk chu ka inhaw ngawih ngawih bawk.


"Ramhmangaih, i â e mai!" ti sep in ka biang hit zet a mittui lo luangthla lum pap chu ka khup ah ka nul tawk.

'Lo biak che pawh a tum ngailo. Chutichung chuan ngatinge i pan dawr dawr a' rilru na zet a ti chhuak leh țiau a ka hawi chhuah rual chuan meng phawk kawk in ka tawm nghal chawi!



Rang lutuk in ka mittui chu ka tuai hul sawk sawk a. Motor headlight in a chhun thlen phak loh, kawngpui thim khup leh țiau chhum zam chiai chiaina kar ah mihring ruangam lo lang chu thawk pawh thaw chhuak ngam lo in ka lo melh ngawt ngawt!


Hetiang rampalaileng khawfing chah fel hma lehnghal in ke a kal mihring veivak an awm ka ring hauh bawk silo!



Lungphu rang dawt dawt leh ka chung a thil lo thleng tur chu engpawh nise huaisen tak a hmachhawn tur a inhrilh ru mawlh mawlh chungin ka inhum ruh a.


Chu ruangam lian zet mai car headlight in a chhun phak ah a lo thleng chiah mai chu khawvel hi a chawl țhup mai hian ka hria!


Car kawngkhar chu ka nam hawng nghal pawp a, a ramvah thuamhnaw inbel a silai ak a mipa lo pen pawk pawk chu thinrim vang nge, țah chhuah lutuk vang pawh ka thlir hrang thiam tehhrep lo, inhum ruh fan fan hian ka lo melh ngawt ngawt mai.


A lo pen hnai zel a. Light in a mitah a chhun khalh miau avangin mit ti zim deuh sun hian "puih in ngai em?" a rawn ti thum sup. A aw lian leh pa zet mai ka hre leh chiah chu ka thawk a tawp lo chauh!



"In motor a chiang lo em ni?" ti leh sup a a silai ah a lak thlak lai chuan ngai zet in țah insum lutuk hian ka lo en tlawk tlawk mai.

"Khua a vawt si a, inchhiatna a rei tawh em?"


"Zoramchhan" insum thei lo hian pangchang lutuk in ka ti chhuak ta țíau.


Ka aw a hriat rual chuan min beisei lo lutuk tih hriat zet hian mipa lian leh rorum zet chu a ding ve chawt mai!


"Ngatinge.. ngatinge vawi khatmah min lo biak lo?" rilru na zet hian ka ti leh a! Mihring pakhat in min lo biak mai loh vang a hetileh lutuk a ka na tlat mai hi a lawm ka hriatthiam theih loh chu!

"Mawh? Ngatinge vawi khat tal min lo call loh a"


Chak zet in a rawn pen nghal pawk pawk a, engah ka hmel a hmuh chian rual a a thaw chhuak hawk chu mittui tling pam hian ka lo melh chho a.


"Nang... Hetah.. engthil nge i chung ah thleng?" min ngaihtuah zet in ka taksa chu thlek kual thuak thuak a, kei lah ka țah a chhuak zual tulh tulh.


" ngatinge min lo biak ngailoh ka tih chu?" a kut phah lian zet a ka biang lo khuap a tum rual chuan lo nam per nawlh in ka vin nghal tuar. Ka mittui a tla reng bawk nen Zoramchhana mitmeng chu a buai nuaih tawh.

"Mawh? Ngatinge vawi khatmah min lo biak lo?"



"Ramhmangaih, chuthil chu a pawimawh lo, hetah hian engtin nge i awm theih? I chungah engnge thleng?" ring zet a ramhnuai khawk rum rum khawp a rawn vin țhawt chuan ka hawi sawn nghal hmak. Ka țah chhuak lutuk tehhrep vang chuan ka inhum ruh ve ngat ngat bawk.



Zoramchhana erawh rilru ipik hmel zet a a sam tuai chho pawk in a kâ ațangin a lo thaw chhuak ham ham mai.


Ka chungah thil țha lo tak a thleng ang tih hlauhna in a khat tih ka hre thei bawk.


"Na i nei em?" Inbengdaih tum tih hriat zet hian a rawn ti chhuak leh sup. Min pan hnai a a kutphah lum thur thur pahnih a ka biang ah lo khuap in ngenngawl zetin ka mitah min en a.

"Min han hrilh teh, i chungah thil thleng a awm em?" a ti leh tawk.

"Aih"

Ka chhanna chu a duhkhawp lo tih hriat zetin a rum chhuak hawk mai.


" Ramhmangaih, chhanna țha ka duh! Helai rampalaileng ah khawfing chah dawn tawh ah leh nghal engtin nge i awm theih? Aizawl a awm tur i ni tih i hria em?" dawhtheihna tlachham zet hian a rawn ti chhuak hrawk.


"Sawi rawh, i chungah engnge thleng? Khawihtu che.." insehruh chung a ti hrawk in a ner sawk " khawibuai tu che an awm em?" ka mitah tak min melh chhuk ngur rual chuan "ka ngai che a" ka lo ti țíau a, ka chhanna chu a beisei loh tawp tih hriat lutuk a min melh in țawng tur a a ang zuau pawh engmah sawi lovin a thaw chhuak hawk mai.


"Ka chhungte bulah ka awm lai pawn nangmah chiah ka ngaihtuah che a, ka kalna apiang ah ka hnung lam ațang min rawn au in ka hma ah i rawn in lan mai dawn emaw ka ti țhin. Mahse, vawi khatmah.. vawi khatmah i lo in lan lo..." a taksa lian zet chu rilru na lutuk in ka nam vak a.


" ngatinge min hmu tur a vawi khat lek lo kal kha a harsa a mi? Mawh? Engnge i tih ve ang? Zanin hian mu thei lo khawp a amah ka ngaihtuah ang hian min ngaihtuah ve angngem tiin nangmah hlir ka ngaihtuah che a.. " țah insum zet in ka tha neih zawng zawng te nen a awm ah ka chum vak vak.

"Ngatinge ka țhat leh țhat loh pawh lo ngaihven ngailo tu hi ka ngaihtuah reng che? Ngatinge i awm lohna hmun ah ka awm tawh hnu ah pawh ka rilru i tihbuai reng" ţap hlawp hlawp chung a rilru natna te nen ka au khum chiam chiam chu tawrh harsa zet a min lo melh ngawih ngawih in a lam ah min pawt hnai dawrh a.


"Mi â nu" ti chhuak sup in a awm lum nuam lutuk ah chuan nghetzet in min kuah bet nghal hmiah.


A palian si, a angchhungah nghet zet a min kuah beh tak ah chuan ka famkim leh ngawih ngawih tawh.

"Min ngaih vangin helai thleng thleng i lo in khalh thleng reuh a maw?" a ti thum sup, min duatna aw ri mawlh mai chu a lak ațang dawn reng ka duh.

"Aw" ti ţíau in a ramvah kawr hnung ah chuan ka țham vak a.

"Zantin min ngaihtuah in i mu theilo țhin a?" a awm chhung ațang a țawng zawng chuan min nghawr che dur dur.
"Umm" pangchang zet a ka tih leh chuan ka darah khabe a lo nghat in a thaw chhuak ham ham a. A khaberuhkual pang lum nuam zet leh ka nghawng a insik chuan ka mur chem chem bawk.


"Ka humhim tlat ang che" nghet zet hian a lo ti sup. Ka maimitchhing a, khawfing chat tur boruak vawh zual lai tak ani nangin min humhim tlat tur thu sawitupa ban thangah zet in min kuah hlu hluna avang chuan vawt reng ka hre tawh lo, a lungphu dup dup chu uluk zet a ngaithla in thawk ka la a. Ngopa ka chhuahsan ni ațang zanin thleng a ka hahdam țum ber ani hial ang! A hmui lum a ka beng a lo nawr chuan ka lungphu a rang nghal dat dat bawk.



"Min... min ngai ve miah lo, a dik em?" ka ti a, min chhang let mai lova min kuahna a thlah thawl rual chuan hlauthawng lutuk hian ka melh nghal zat bawk.



Ka ngaihthu ka sawi lai khan min chhang let ve miah lo tih ka hriat rual chuan ka rilruna bawk a lo chhuak a, ngawi vung vung a ka sam lo chul tupa chu țah khum ka inpeih leh der tawh.

"Min ngai ve lo mi? Ka ngai che ka tih kha Zoramchhan" ka tih vak chuan a lo nui suk.



"Ka lo call che pawn i phone Jenny'n a lo chhang a.. zan dar 10 a pel daih tawh, in inru emaw ka ti a.." hrawk chhungna vek hian mittui tla zung zung chungin ka ti ta hliam hliam. Ka rilru na thar lutuk vang chuan ka țawng mumal thei bawk silo, dam thlup leh duat hmel lutuk a min melh chhuk vung vungtu chu en in ka khuh leh rih a.


Ani erawh hahdam leh lungawi hluah hluah hmel a pu, puitlingin dawhthei zet in ţap chung a naupang zualko thil sawi kan ngaithla ang mai hian zawldawh zet hian a laka ka lungawi lohna sawi lai chu min en vung vung.


"... khami hnu pawh khan min lo call ka la ring fan tho. Mahse, vawi khatmah min lo call lo. Zoramchhan, ngatinge mi â ang mai a min siam a.. mawh? Ngatinge vawi khatmah min lo biak lo. Ngatinge ka ngaih ngawih ngawih che.. nangmah vangin hetah... hetah.. zanah..." thawk ka hip let nasat em avang a ka taksa che awk awk chu rum chhuak hawk in a awm ah min hnuk bet leh nghal hrawk mai.


"Ngatinge nangmah ka hmuh chak vang ringawt in zan ah ka lo tlan chuah?" lungchhe fe in ka țah khum leh ringawt tawh.


A taksa lian pui ah chuan nghet zet a min kuah beh sauh sauh pahin duat lutuk in ka hnungah a lo chul leh a. Khang hun chhung zawng a ka ngaihna leh a lakah pangchan ka chakna te zawng zawng kha vawi leh khatah an lo puak darh vek ka tilo thei lo.

"Ka phone a chhia a lawm" a ti sup.

"Chupawh nise.. ngatinge Jenny khan i phone a lo chhan?"


"Kha chu thikthuchhiat vang ah ka ngai thei em?" a lo tih chuan ka tal vak a, nui chhuak hawk in min kuah nghet zual sauh thung.


"Lenkhawmna ah kan kal dun a, thingpui lumna ah ka buai laiin ka phone a lo chhang anih dawn chu" a tih dam thlup chuan rinhlehna chhete mah ka nei tawh lo!



"Mahse.. ka.. min ngailo" nui nghing dawt in ka chhip ah khabe a rawn nghat a. Chutah thutak zet hian "kawvar hma ațang naupang țap thlem nghal char char mai chu!" a ti nghut.


Rang lutuk in ka tal hrang a, inngaihtuah muk hmel zet in nui duh miah lo hian min melh chhuk nghal ngur bawk.

"Ka țap bawk lo.. naupang pawh ka nilo" thle buk in uluk fahran hian min thlek kual vel a nih chu!


"Zoramchhan, i sual e mai" ka kal tau tur chu nui chhuak hawk hawk in ka ban rek ah a rawn man chawt a, min pawt let in a awm ah bawk min kuah bet nghal hlu hlu a. Min kal tir tak tak ka hlau ve tho bawk nen a taksa lian zet ah chuan ka ban pahnih ka suih bet ve vat a.



"Vawi engzat nge ka kuah tawh che?" nuihza insum tih hriat zet a a lo tih chhuah hawk chuan ka ngawi rauh rauh a.


"Vawi thum"

"A dik" ti sup in a hmui lum chuan ka chal a lo nul a " khawvar hma in vawi thum ngawt ka mi huat zawng lungphu ri ngaihthlak ka chak vangin ka kuah duh dawn mi?" a aw rilruih leh a thusawi mal tin chuan ka awm chhung a fan lum rawih rawih.


Ka nuih erawh a za ru viau thung. 'Ka ngai che' tih sawi chhuak ve mai lova 'a taksa ah țum thum ngawt min hnuk dawrh a min kuahbehna' zawk min ngaihzia lan chhuah tir nan a hmang tlat mai chu amah ti Zoramchhana tu dik tak ani!


"Ka ngai che min ti ve mai la" tum deuh pak a ka tih chuan a nui leh suk.


"Mumang mai a nilo tih ka chian hma chu i tal hrang dawn hlek lo a nia" a hmui lum a ka beng lo nawr in a ti thum sup a, ka dul vel chu a țek chuai chuai hial in ka hria.

"Kawvar hun ah ka bo daih ang"


"Sawi hlek suh Ramhmangaih" a tih hrawk chuan ka tawm chawi mai! "Khawvar hi ka hua a nia" ti chhum leh hmuk in ka bo ang tih hlauhmel zet in min kuahna chu a tinghet sauh sauh a.




Ka mumang kha ka hrechhuak uaih uaih bawk!


"A nih, Dinpuia nei turin min ti leh dawn em?"

"Thah che ka awlsam zawk ka ring" ti sup a ro zet a a nuih tel rual chuan ka lo ip chawi thung.



Ka awm hran rei a phal thlawt lo, khawchhung ațang kan awmna a hla bawk a, midang mitmei ven tur a awm lo bawk nen ka chet hlek pawn a taksa ah min man betin min kuah leh hlu hlu țhin a, kei lah in min thlakhleh hmel zet a min en chung a, ka lungawi lo der lai min thlem pah a min kuah leh hmiah țhin chu nuam ka tih em vangin ka tihtauh der khum leh ţhin a.
Ani pui lah chuan ka titau tak tak emaw a tizel sia, duat em em in min sawngbawp ziah bawk nen min tih retheih rei em vang a hremna ang ah ngaiin ka tihtauh der khum bar bar zel a.



Kawvar chian hnu ah erawh motor ke thlak ngai te kan nih avangin min talhran tir a rem tive ta hram.


A uluhbun silai hnum tle hlurh chu seat hnung ah a dah lut a, a iptepui leh chaw fun dah lut tur chu a tawp chut, a chetzia engkim uluk lutuk a ka lo thlir reng chu min lo thlek nghal vut bawk.

"Buhban chhum leh kurtai a awm, i rilțam chuan ei rawh" ti sup in a ipte pui chu min lo pe a.


Nui var var in ka lo ban ve thuai bawk. Khawpui a cheng tam tak chuan țhing an ti ngawt ang. Khawpui tlangval tumah in nula hnen ah hnathawnna a a chaw fun ei turin a hrilh ngai ka ring lo. Khawpui ah chuan kan thawhchhuah aia sang vek in kan khawsa a, kan thawhchhuah mil tawk kan zahpui tlat țhin a. Thingtlang ah erawh kan tharchhuah chhun te hi midang lakah kan zahpui ngailo. keichuan hetiang nun hi nuam ka tiin ka hahdampui takzet zawk


Car hnung a motor ke thar chu zo zetin a la chhuak a, hmanrua dahna box pawh la chhuak leh in comando uniform bantluan chu a kiu thlengin a thlep tawm chho a, a hnuai a kawrbantluan hak a pawh tawm chhoh leh chuan a ban a thahrui leh thisen zam kal chho ruih chu a lang chiang ngang mai. Motor kê thep zawk chu awlsam zet hian a thlawn a.



Hnehsawh zet a a che vel chu a bul lawk kawngpui ah țhu sawp niai in ka lo thlir a.

"Tunțum chiah hi ka ngaidam ang che, țum dangah chuan vawi khatmah atthlak takin che tawh hauh suh" ti chhuak nghut tupa chu nuih var var in lu ka buk khum nghat.


Ani erawh in ka chet dan chu atthlak a ti tih hriat lutuk in lu min thin khum nghut thung.


Keipawn ka ngaihtuah let hian ka chet dan kha atthlak ka ti, motor khalh hi ka thiamna a rei tawh viau nangin zan ah ngat phei chuan ka vawi khat khalh chhuahna ve tho a nia. Chupawh veng țhenawm lawk nilo in KM 100 chuang ka khalh a nia! Accident ka hlau miah lo te kha Zoramchhana zunin min bual at zar liau liau nita ber in ka hria.



"A mak e" ka tih hliai chuan min thlek nghal vut.


"Ih.. i lo lang thut a" ka han ti leh a. Polythene a fun buhban chhum la lum thar thar chu sawk thla in kurtai nen ka ei pawlh nghal zat bawk.


"Ka lo kal dawn tih hriatlawkna i nei chiang lutuk" ka tih leh vak chuan min en lo mah se a nui suk tih ka hria.


"He lam ah hian i ramvak ngai pawn ka hre silo a, engtin nge i lo kal daih theih a?" ka tih lai chuan min lo en in a nui ruh ruh a, "Sihal nupa tla an hmu țhin a, ka chang ang chu ka ti" a lo ti sup erawh ka meng phawk ngang mai.

"Sihal a?" Ka tih deuh vak chuan a lo bu nghut a.

"Khawi lai tak ah?" hawi kual hrek hrek pahin ka ti a, min chhaih zawk nge pawh ka man thiam lo, Zoramchhana chu a han hawi kual ve thuak a.

Chutah ka mitah tak min lo enin "Helai vel ah hian" a ti ta mai a!

Pathian leh!


Zoramchhana lo thlen hma lawk a ka thawm hriat kha chu sihal nupa te chu an ni ngei ngei ang! Kawng chhak ațang an lo hram ri leh thing țang ro a raptliak ri țhak țhak te kha ka ngaihtuah let rual chuan ka țim uaih uaih mai.


"Ka zo ta e" ti sup a lo kun hniam in ka hmui ah a rawn fawp siah a nih chu!

Ka lo inring lo bawk nen phawk zet a ka en chuan ka hmai bul chet ah lo la kun hniam run in pa zet hian a kiai suk a.

"Tunah chuan he hmui fawh nuam zet hi ka ta chiah ani tawh em?" a tih ril ruih chuan ka thin chhung chu a sa leh pup pup tawh.

Zoramchhana lah chuan mit la sawn hlek lovin min melh ngur mai bawk si nen ka hmui hil nghal vek chu ka liak hnawm zauh a.

"Ih.. i hmui kha ka ta tur chiah anih dawn leh dawn loh ani mai" ka ti ve ngat, a mitmeng pa lutuk vang chuan lai hle mah ila dak chhuak vahin a mitah tak ka en lui ve ngar ngar.

"I ta chiah ani reng țhin a, ani reng bawk ang" zawi lutuk a lo ti chhuk sup in a hnarin ka hnar a lo nul thuak a, a hmui lum thur thur a ka hmui a lo hrut thawi leh thuak chuan ka kawchhung hi a lum uaih uaih mai.

"Nang ve?" min kiss miah lo in ka hmui bawk a lo hrut leh thuak a, ka lungphu chu a rik hian a ri dawt dawt mai. A zei lutuk tih chu kan infawh hmasak ber khan ka man thiam vek tawh. Mahse, hetiang leh lutuk a zei leh lungrun deuh a a chet erawh ka beisei ngailo.


A hmai pangtilum in min ur ham ham reng a vang chuan ka thluak te hi a buai nuaih tawh.
"Ih.. ka pasal i nih leh nih loh ani mai.." kan inawmhnaih lutuk vang a ka tal buai vek in a ka thusawi chhuah phawng avang chuan Zoramchhana chu nui rum hawk mai.

A awm hla deuh a, khua a var tawh a, lei lung lang paw vau kar ațang nuihza insum tih hriat lutuk a pa zet a min melhna chuan ka hmai a tisa hat hat.


"Ka sawi diklo a mi? Ka pasal i nih loh te chuan.. uhgg, ka pasal a nia ka fawh hnuhnun ber tur"


"I mipa fawh tawp ber ka ni ngei ang" ti nghut in ka hma ah chuan a khup pakhat a lo țhingțhi hniam ruai ruai in ka biang a rawn khuap a, a mitmeng tawrh har lutuk mai mawlh chu!


Ka mumang ang chiah khan muang ruih in a hnar in min lo nul a, nghet zet in a ban rek ah ka hmet chawt, a nui suk thung.

"Ka sawi chu hrereng rawh, he hmui hi keimah chiah in ka fawp tawh țhin ang" ti sup in rum chhuak hawk chungin ka hmui hnuai a lo pet a, ka thaw ve hak tho. Ka kawchhung za uai uai chuan ka lungphu a ti rang zual sauh a.

Sapui in a sa seh lakah a thuneih zia lan tir a a rum dur dur țhin ang mai hian min fawp lawk silo in ka hmui hnuai chu pet kual in a rum chhuak leh hawk ţhin a. Min fawp tawh se ti zet a nghakhleh lutuk a a hming ka lam sep chuan duhthawh zet in min fawp nghal ngawng ngawng.


A nghawng hnung lam ah chelh bet chawt in ka chhang let nghal zat a, a fawhna ngenngawl lutuk leh a lei lum țha zet che kual vel zei lutuk chu dawh mawl tawp a harsa ngawih ngawih.


Kan inthlah meuh chuan rum chhuak hawk in ka hmui hnuai phir țhai chu a pet a, boruak kham lo lutuk in ka thaw ham ham bawk. Min fawh zawh rual a dimte a ka biang chul pah a lungawi hmel zet a a kiai suk chuan lai zetin lei ka chhuah zeuh a. A nui chhuak hawk bawk.


Ka kut ah lo hum in min kai tho a, kawngsir zau lai deuh ah chuan min kal phei puiin ka hnung ah a ding a, a awm tihrawl lum thur thur ka ngheng theih nan nghet tak a ka kawngah a ban pahnih a suih beh tak ah chuan hahdam fe hian ka ngheng ta hle hle.


Kumin a ni chhuak hnuhnung ber tur lo eng chhuak siar siar chu ngawi rengin ka thlir dun a. Tlang dung a chhum zam chiai mai te pawn ni chhuak mawi zet chu hmun kian ve ang maiin an tham ral riai riai a.



'Zoramchhana nen hian min awm dun tir zel rawh' ka rilru a sawi sep sep ni lo chhuak mek chu ka en a. Nghet tak a min kuah bet tupa nen hian dam chhung a awm dun tluk a thlakhleh ka neilo. A kiang ah ka awm hi chuan ka hlim a, mamawh dang engmah ka nei tawh ngailo.


.

Min sawi dat dat tu an awm avang chuan peih lo zetin ka meng diar diar a, ka bek sam ah kutphah lum nuam zet a lo inzen luh chuan ka nui nghal var var.


"I in ah nge, i u te in ah?" a ti thum sup chuan "Ka mut a chhuak lutuk" zawite in ka lo tih daih, Zoramchhana chu a han a nui suk a.

"Ka hria, khawi ah nge i luh hmasak dawn?" zawi deuh a a lo tih leh chuan "Ka pa te in ah" ka ti let a

"A țha e, lo chhuak la" ti sup in a lo awm hnai a, ka chal ah a lo fawh lai chuan maimitchhing in ka lo nui leh sen sen tawh.

"Ka hmui ah pawh" a awm hrang tur chu rang zet in a kawr awm ah la lo țham chawt.

"Tu emaw mutchhuak chu a harh leh mah mah tawh ani maw?" ti nghut in a nui ruh ruh a nih chu!

"Sual e mai... min fawp hlek s..." ka sawi zawh hmain ka hmui chu a rawn khar nghal hmiah. Uang zet a min fawh lai a "good boy" ka tih chuan nui chhuak hawk in a tawp a.

"I nghal reuh hi mawle" a ti a min chhuk melh vung vung in a fawh zawh chiah ka hmui chu a lo tuai leh thuak bawk.




Driver side ațang a chhuak vut a. Motor a khalh thei mai kha mak ti viau dawn nangin Aizawl ah Police in a awm reng tawh tih ka hrechhuak leh thut a.


"Dte, mikhual in nei dawn a nia" ti hluai pah a car hnung lam a hawn lai chuan mut kham lo zet in ka chhuak ve a.


"Khawlam mikhual.... awi! Ramhmangaih, min tih mangan zia i hria em?" Tukverh ah lo dak in u Dtei chu a au teng tung mai.


Hrethiam lo deuh hian "Humm, ka kal dawn tih pawh an hre der silo" ka ti nuah nuah, ka luggage khai chhuak a car hnung lam khar dawp tupa chu ka melh zeuh a.

"Lo hruai chho teh, ka beng dawn" u Dtei lah chuan a rawn ti hlur mai.

"Min chhan ang che aw" zawite a ka tih chuan Ramchhana chu a nui suk.



"I va a em em ve? Tinge Ngopa i lo pan tih tal i sawi loh? Nichin mai khan i nu mangang in i lo thleng tawh em? tih min lo zawt a, chhan ngaihna kan hre miah hleinem" u Dtei chuan a lo ti nghal bawrh bawrh.


"Â lutuk" ti pah a min tin ziau rual chuan ka hma ah Zoramchhana a lo ding nghal hmiah.


U Dtei tih ngaihna hrelo chuan a phone a phawrh a.

"Khawnge u Ngaihsaka?" Ka tih dek dek chuan "motor hman tur zawng in a chuak, tawhsual tawk in kawnglak ah i lo chesual palh mai ang tih hlau in anih kha a tlan chhuah" a ti hlur mai bawk si.


"Aw, hei, Matei chu a lo thleng hlawl, motor hman tur kha zawn a ngai leh lo" phone a beng ah ngaithla pah chhuan a ti nghal lawng lawng a.


"Aih.. aw, inhliam lo e, Ramchhana zing ramvak nen an in tawng a nih hmel" a ti leh rih a. Ka nu leh pa te pawn min lo zilh ve mial mial a.




Inchhung a UNgaihsaka lo lut hlawl in min hmuh chuan a thaw huai mai. Min ngaihtuah luat vang a an lo talbuai hrep chu ka inthiam lo tak zet.


A duhtawk a rei min hauh ngial hnu ah "i inbual tui tur a so, inbual la, chaw te ei la muhil rawh" u Dtei chuan a ti a.


Zoramchhana haw tur chu uibeh țung chi a ni silo a, ka la ngai em em bawk si nen kawngkhar biang nghengin a haw phal lo zet in ka en lui tlat a. Amah pawh chuan chutiang hmel pu chung a min kalsan chu a hreh tih hriat fe hian a thaw chhuak leh hawk zel.




"Tleirawl inngaizawng nghal lo" u Dtei'n a lo tih tak chiam ah chuan za lo zet a nui chungin Zoramchhana chu step ah a chhuk thla a.



"Nangnu hi, a dik dawn tlat lo, Zoramchhana i ngaih vang a lo kal i ni maw?" ti thut a min melh tak ran ah chuan ka hawi sawn nghal daih.


"Coat ka lo hawn che" tih leh ka luggage awmna lam ah ka kal nghal daih.

Lalati te unau pawh Barbi te nen hnawk zet a in pawm in an lo haw hlawl a, min hmu chiah chu an ri nghal teng tung mai.


Ka thil hawn thar ho chu hlim zet in an tlan chhuahpui leh nghal a, u Ngaihsaka pawn a pheikhawk chu lungawi hmel zet in a thlek a thlek ve mai.



"Mate, duh leh kan khum ah khan va mu hahdam rawh. Kum hlui thlah zan te a nia, zan ah i mengrei ve leh duh ang" u Dtei chuan a tia.



Thuawi zet in an khum ah chuan ka mu hahdam siai siai mai.


"Ramchhana kha a cher i ti em?" pindan ah a lo luh ve rual chuan a ti nghal thawr.


"Aa.. ka hrethiam lo. Chulam ka lo ngaihtuah lo a" ka ti tak tak, kan inhmuh tirh ațang khan ka la pangngai hleithei lo.


"I u Ngaihsaka phei chuan a fiam a fiam a lawm. A lungleng lutuk awm ngaihna hrelo a ni ber ang, zing dar3-4 vel ah ramhnuai ah a kal chhuak a, khawchhung ah a awm leh i kawngkhar inkalh țhiap mai khu a thlir tlawk tlawk zel" nui miah lo in a ti ta duah a.



"A thil tur ka lo hawn sak a sin" ka ti sep a, u Dtei lah chuan nghal em em hian "Eehhh" alo ti fan vel a.

"Hey, khatikhan lo ti zel suh.. ih nangman min pek sak la.." lai deuh a ka tih pawn "I pe ang chu le" a la ti țo tho

"Aih, ka zak ve tho alawm, nangman min pek sak rawh aw" ngen takte a ka ngen chiam tak ah chuan a remti ta hram.


Ka mutthilh tak tak hma in tukverh parda chu keu hawngin Zoramchhana te in lam chu ka va thlir leh hram bawk.





Thil ri deuh dawt dawt vangin ka harh a, ka awmna ka hre mai lo. Mitchhing a ka men țhat leh chuan ka fim ta deuh.


Lalsangzuali hla 'kumhlui' mike ah meuh play in Khawchhung chu a lo ri nuaih nuaih tawh.



A khat tawkin 'inkhel țan ani țep tawh a, players la kim lo te chuan field i pan kawm tawh ang u' tiin an au lauh lauh reng bawk.


Boruak lo vawt sur vang chuan a puan lum hmuh hmasak ber chu bat in ka tho chhuak nghal tawp. Kawt zawl ah chuan chhang deng an awm tih hriat zet in an lo ri laih laih a. Ka chhuah hma a kawngkharpui inhawng huau ațang Leihkapui ah Zoramchhana leh u Ngaihsaka te ho an țhu ka hmuh chuan ka lai ta tlat ringawt a.



Zoramchhana chu va biak a, a bulah va awm ve ka chak rual rual in ka lai ru em em tho bawk si.

"I lo haw leh tawh reng a, i chau em?" Chhang hri mek nu pakhat in a lo tih chuan rang lutuk in Zoramchhana lak ațang mit ka la sawn a, a lo hawi ve chiah tih erawh ka hmu thawi thuak.


"Chau hran lo e, ka mu char char a" ka ti a. Ka lungphu ri nghal dawt dawt leh ka biang sa nghal hut hut chuan min ti khur thei nia mawle.



"In awm lo chu in ngaihawm hman a sin aw" a ti leh mial mial a.


Nui hak a ka hawi chhuah chuan uluk fahran a min lo thlir reng tawh tupa nen chuan kan mit a intawng nghal siah mai. Ka lai lutuk tih ngaihna hrelo chuan ka hriat loh karin lei ka chhuah khum vak ringawt a.


Atthlak tih hmel lutuk a nui suk in Zoramchhana pawh a hawi sawn vut.

Ka va han che chukchu tak.


Reilote hnu ah Zoramchhana ding vut chu ka va hmu a. Phawk deuh tak a ka en laiin nui ruh ruh hian tualzawl lam chu a lo pan ta mai.

'Lo kal suh, lo kal suh' ka rilru chuan ka ti mawlh mawlh.

"Hah khat chiah maw awm tawh?" ti sup in suk chu a hum nghal vut a.

"Aw, a dang chu a mawngmu tur ani tawh mai"


"Țhat chu" a ti sup a. Chutah ka lai chhe lutuk awm mai dan tur hrelo chu min lo en in nghal zet hian mit alo siai a.
"Thingpui min lo lum la" a lo ti leh sup bawk.
"Aw" rang deuh a ti pah in inchung ah ka tlan lut nghal daih.


.
.


Ngopa khua hian kumtin: Christmas leh kumthar inkar ah tournament an buatsaih țhin a. Finalist team 2 chu ni 31 tlai ah chak zawk inel leh in field ah khawpum puiin an ri hut hut țhin. Inkhelh a zawh a, lawmman te an sem fel vek hnu ah music play in field zau zet ah chuan an lam hut hut a. Ni tla tur chu a huho in an thlir liam țhin anih ber chu.



"Mate, insiam la, field ah cho ve ang u, haw hun ah chawhmeh țhing chhuan lum tawp ani mai" u Dtei'n a tih chuan Zoramchhana chu ka melh vat a.


A lo bu nghut.

Rang zet in room ah ka tlan lut a, boruak a vawh em avangin han inphelh meuh chuan a lo vawt kher mai. Turtle neck dum ka ha a, jeans kekawr pawl tak zet ha leh in malte chen booth dum ka bun bawk. Leather Jacket ka in thawlh leh a, rimtui in kap in na lo te hian peach rawng kai deuh in mekeup ka inhnawih a. Ka hmui pawh peach rawng tho ka hnawih.

"Camera hi keng ila a tihchi ngawt ang" ka tih chuan "Keng tak rawh, thla kan la țeuh dawn nia" uDtei pawn a lo ti var.

"Car khu kan hmang duh a ngem?" ka ti leh ang hehaw a
"I khalh ah chuan ka chuang duh lo phawt a" nghal zet hian a lo ti hlak. Melh ralh pahin "Zoramchhana'n a khalh thiam reng" ka han tihkhum zet chu min ei loh hmel kher mai.

"Tenawm dun hian" tia min ben tawih chuan lei chhuak vak in camera awrh chungin ka chhuah san a, step ah u Ngaihsaka leh Zoramchhana pawh an lo chhuak chho hlawl.


Ka jacket hawn sak ngei mai Zoramchhana'n a ha zet chu ka lo mitthla dan ai daih in a inhmeh, a pian nalh zet leh pa lian bawk si nen chuan a lang pa hluah hluah ani tawp.


Ban phar hluai hian min kiai khum suk a. Lai zet in "i inhmeh" ka ti sep. U Ngaihsaka'n a pheikhawk bun tur enpui tur a UDtei a auh tak daih ah chuan Zoramchhan chuan min pan hnai a.



Ka lungphu chu a lo rang leh dawt dawt tawh, a hma zawng a ka dul ah nghet zet a min lo man bet in ka sir ah a lo ding a.


"Ka lawm e aw" ka bengbul ah a lo ti sup chuan sawi chiam tur hrelo in "Umm" ka ti ngawt a, a taksa chu a che dawt.

"Zan ah kan tlaivar dawn em?" a lo tih leh sup chuan ka en chho deuh ha a. Chuta min lo melh dan mawlh mai chu!

"Ka chak.. Mahse.. ih.." ka tih niah niah laiin "Kawt ah hian meipui kan chhep ang a, kan tlaivar dawn nia" a lo ti thuai mai.

phur fe hian"Tak tak aw.. zanrei ah i haw vaih?" Ka ti nghal zat. Nui suk in a hmuiin ka chhip ah lo nawr in min kuahna a ti nghet zual sauh bawk.


Field thlen hma a bungkung lian zet bul ah motor kan park a, naupang ațang nutling patling thlengin an lo ri luih luih mai. A țhenin khuang an lo vua a. Chimveng leh hmarveng (Nec Road) ten pakhatna nih an inchhuh țum ani bawk a, boruak chu a țang ut ani ber.


"Kan veng hi chhimveng anih vangin Chhimveng lam țan tur aw" u Dteii'n a tih chuan ka nuih tawp.



An nupa phur lutuk chuan min kal san daih a. Mipui zi nuaih nuaih kar ah chuan kutphah lian zet in ka kut ah a lo hum a, ka en chhoh zeuh chuan mit min lo siai suk in a hum nghet sauh bawk.


Tlang ah min lawn chhoh pui a, phul ah chuan thingzai bung in naupang ho an lo intawlh chak siak a, an lo ri ve nawk nawk bawk.

"I duh duh hi thla lo laksak rawh, keichu ka mut a chhuak e" ka tih chuan ngawi rengin camera chu a ban ve mai a. Thatchhe zet a bul ah ka țhu chu "lo mu rawh" a ti sup.

Ka en deuh dawrh a, a mal chung a melh vut chuan midang ho chu vengthawng zet in ka en kual nghal zat bawk.

"Ngaipawimawh suh" ti sup in amah chuan min pawt dawrh a, țang deuh țungin a malchung ah chuan lu ka nghat ta hram.

"Ni sa i ti em?"
"Aih.. ih, midang hian mak mi ti awm?" ka tih chuan rum hawk in ka hmui a lo hup hmiah. "Muhil rawh" a ti nawn sup bawk.


Saisir a ka mu chu ka beng a khal niap niap a, nizan aţanga tukin thleng a thil thlen dan vel ka ngaihtuah kual a, ka lungphu chu hlimna te, laihna te leh nuam tihna te avangin a phu rang nghal dawt dawt bawk. He mipa rorum leh nelawm loh zet a lang hian engtiang takin nge hmeichhia a dimdawi thiam tih lah a hrechiang ber tu ka ni hial ang. Thu tamtak sawi duah lo mah se min kuahna ringawt pawn amah ah rinna nasa lutuk min neih tir a, ka belhchian poh leh a mize nghet churh si, vei awm ru riau bawk si ka chhar chhuah belh zel bawk a, hmeichhia te'n kan duhthusam a mipa ziarang kan duan kual zawng zawng chu amah ah hian a kim vek ka tilo thei lo.


"Tho rawh le" Zoramchhana aw thum sup chu ka hre riai riai.

"Kumin ni tla tawp ber tur hi i hmuh ve duh ka ring" a ti leh sup a, a kutphah lum thup in ka khabe ah lo khuap a, na vak lova a lo hmeh chuan ka meng diar diar a. Mit ka men chhuah rual a Zoramchhana mitmeng pa zet mai ka hmuh chiah chu reilote chhung ka thawk a tawp hial mai.



Khap hlek lova ka en tak reng ah chuan kiai suk in ka khabe ruhkual chu a lo hmer leh salh.
"Oh.." lai zet in ka nui a. Min melhna mitmeng tawrhhlehawm lutuk mawlh mai chu!

"Inkhel a zo tawh mi? Tute nge chak?" tih bah niai a ka hawi kual chuan a lo nui nghawr dawt. Thatchhe zet hian ka en leh ha bawk.


"Nge?" Ka tia.

Ner suk in lu a thing mai.

"Tute zawk nge chak?" ka tih lahin "Nangmah ngeiin zawng chhuak la a țhat zawk ka ring" ti nghut a, a kutzungpui a ka hmui hnuai a lo nul thuak chuan ner sak in ka hawi kual leh a. Kan awmna bul vel ah chuan mipui an lo zi hut hut mai.


Ka tho chhuak tur chu min lo pui thuai bawk.


Eng phut khawp a kawlkil lehlam tlangdung a ni tlawlh liam tur mawi danglam zet ka hmu chiah chu mumang a ang takzet.


"A mawi lutuk" ka ti hliai a.

Zoramchhana chuan min kai tho a, tute mai pawh chu thlala in an ri tengtung. Inngaizawng tih hriat tak mai induh hmel zet a ni tla tur thlalakpui a ding dun te chu kal pelh pah in Zoramchhana chu ka melh leh zeuh țhin a. Mit la sawn hlek lova min lo en reng tawh țhin vang nge kan mit a intawng chiang thei ngang bawk.


"Nangni pahnih kha, khawnge in bo char char, kan thla lo la rawh u" mipui kar ațang u Dtei'n a lo tih vak chuan Zoramchhana chu a phun hluk.


Camera chu aman a chang chawt a, naupang țhenkhat in 'apa Ramchhana ka thla min lak ve' an lo ti ve tung bawk nen a sir a țang ka lo nuih hawk hawk reng mai.


Field leh tlang dung vel a mipui zi nuaih nuaih te chu ka thlir kual a, khawpui angin dinner man to zet ei tur a kal chhuah kher ngailova lungawi na hlir an hmel a lang chhuak te chu a hmuhnawm dangdai tak zet.




"Ni lam saw en rawh" a lo tih hluai chuan rang zet in ni tla tur lam chu ka thlir a, camera a de nghal zawk. Ka pan phei nghal thuai a. Screen chu ka hmuh theih in a lo keng hniam deuh a.

"A va nalh" ka ti sep.

"Ka mumang a lasi nula ka hmuh fo țhin nen kha zu han danglam hlek lo a" a tih sup chuan lei chhuah zeuh in ka han en a. Pa zet a kiai suk hian min lo en ve run bawk.



.
.
Ka kawngkharpui inpawt hawng ri ka hriat chuan a ngaihna ka hrelo kher mai.



Zanriah kan eikham tawh a, khua a tlai tak tak hma a khawchhung ah ride kual u Ngaihsaka te nupa in an rawt leh vangin ka in vel enfel pahin ka in luah ah ka chhuk thla zawk a. Chutia lo lut tawp tur chu an awmawm ka hre bawk silo.

"Tunge?" ka ti a. Ké pen ri ka hriat chuan rang zet in pindan kawngkhar lam ka pan nghal zat bawk.


Kawngkhar bul ka thlen hma chiah a Parda lo inkeu hawng a Dinpuia hmel lo lang hlawh chu phawk zet hian ka en a!

"Hetah engnge i lo tih?" ka ti nghal tuar ringawt.


Pawisak neih loh hmel zet a a țhen suk ka hmuh rual chuan pindan chhung ațang pen chhuak pahin a awm ah ka nam nghal dawt.

"Chhuak rawh"


"Babe, min lo lawm dan chu leh?" ti hluk in min rawn dinchilh leh nghal hmiah bawk.


"Chhuak rawh, thil a buaichuar zawng in kalpui lo teh ang" ti nghat in kawngkharpui lam chu ka kawk nghal va bawk.



"Nangmah hmu chak che in helai thleng hi ka rawn kal a, min lo dawnsawn dan tehhep pawh chu"


"Kan inkarah engmah a awm tawh lo!" chang fak a ti a kawngkharpui pan ka tum chuan hneh lutuk in min lo pawt let dawrh a, a taksa ah ka in tauh chawrh rual deuh thaw a mipa aw nghet zet ka hria chu ka thaw huai mai.



"Chhuak tur a hrilh che chuan țha takin chhuak mai rawh" kawngkharpui a Zoramchhana lo pen lut khup khup chu hmuhsit hmel zetin Dinpuia chuan a lo ner khum sak.


"Lo inrawlh ve lo zawk ta che" ti kher in ka ban rek a hum chu a man nghet zual sauh bawk.


"Dinpui, mipa tak in le" ring hauh silo, khawng zet a ti sup chungin ka ban bulah a rawn man a, a taksa lian zet ah min hnuk bet nghal hrawk bawk.


Dinpuia lo che chhuak phut chu a kut khingkhat lek in a Jacket awm ah a lo țham nghal bawrh! Hnehsawh lutuk a hrawk kang dawrh pah chuan a melh chhuk ngur a.


" i hnenah kal turin țum khat ka nawr tawh, a zui reng bawk che. Mahse, a duhthlanna ngei a lo kir leh a nih vangin ka venhim tur a ni tawh... chu chu hrereng rawh" ti hrawk in Dinpuia jacket awm a țhamna chu a thlah nawk, Dinpuia pai khut khut chu a mitsir pawh a melh zui tawh lo hian "i țha em?" a ti sup a, uluk zet a min en in ka dar tawn tawn ah a man nghal hmiah bawk.



"Tenawm dun lutuk.." ti nek a Dinpuia ding ngil leh chu dur khup hian a melh run a.


"I thutiam ah ding nghet la, mipa diktak i ni ve mai ang" Zoramchhana'n a tih nghut rual a Dinpuia hmel pha deuh dui chu hrethiam lo zet hian ka en a.


An ni pahnih hian eng thutiam nge an neih?


"Helai thingtlang kawmkar zet ah chuan i inla mipa ve hle mai maw? Mahse, hrereng rawh, i hmeichhe vawn mek chhungkua khan nangang kha an fanu neih a tan an duh hauh lovang che" huatthlala zet a nui sawng hian a la rawn ti cheu.


Zoramchhana inhum ruh nasa lutuk chuan kut a thawh nghal bur ang tih hlauthawng zet hian ka melh a.


"Chu zawng nang a lo buai ve na tur a nih tawh loh chu! Mambawihi chungkuang leh keima inkar a ni tawh chu" ti sup in ka darah a rawn kuah a.


Dinpuia thil sawi vang a nuam tilo zet a ka melh chhoh tim dai chuan min lo nuih suk thung.


"Kal ang le" a ti a, min inherpui chuan hnial nachang pawh ka hrelo. Kan hnungchhawn rual a ngeiawm zet a Dinpuia nui hmel chu a rapawm letling hial zawk.



Kawngkharpui lo inpawt hawng zau a u Jonathan-a lo pen lut nen kan inhmachhawn thut mai chu nghet lutuk in Zoramchhana Jacket tlang ah ka man bet nghal tlat.



Hlauthawn nasa lutuk in min rawn țham a, ka u hmel thim khup leh ka lakah a lawmlo tih hriat lutuk a a mitmeng thip zet chu rei eng ngam lovin Zoramchhana chu ka melh chho a.


Hetah u Jonathana hian engnge a lo tih ve dawn?

Link:
BBcode:
HTML:
Hide post links
Show post links

Abbra Reo Ririni
Posts: 1237
Joined: November 10th, 2016, 8:57 pm

Unread post by Abbra Reo Ririni » April 3rd, 2021, 6:31 am

Kan hma a mipa ding mek chu tunge a nih a hre hauh lo tih hriat tak in Zoramchhana chuan danglamna nei miah lo hian min lo melh a.



A mitmeng pa zet, pawisawi lo lutuk bawk si chu rei ka en ngam lo. He mipa pawisawi lo lutuk hian keimah vangin tun lawkah khan pai dam harsa tak țawngkam a dawng tawh!

Chuan, tunah ka u, rilru lian leh mahni thu duh zet a hmachhawn zui leh nghal zat bawk dawn chu a nisia.

" U... " zawite hian ka ti chhuak a, Ka tiril khur dar dar mai tihreh nan chuan Zoramchhana kutphah lian zet chu tim dai hian ka ban a, ka u ka hmuh rual a ka dikloh nghal vek zia a hrethei a ni mahna, nghet zetin ka kut chu a lo hum a, kei erawh chuan thawk ka chelh nghal tlat.



Ka lak ațang mit la sawn in nghet lutuk a ka kut hum chung chuan ka u chu a melh ruai ruai a. Zoramchhana hmusit zawng a ka u a țawng chhuah lohna turin rilru țawngțaina ka nei mawlh mawlh bawk.

"Țhian i lo nei elaw?" u Jonathan-a chu țawng chhuak hmasa ah ațang. A aw nelawm loh zet vang erawh chuan ka hahdam phah der chuang lo.



"Ummm, in lo kal dawn tih in lo sawi silo a" pangngai tak a lan tum hian ka nui lui a, min vin let hrep ka hlau lutuk erawh ka lungphu a ri dawt dawt.

"Zanlai ah hmeichhia mahni chiah in i inkhalh chhuak a, chanchin i rawn sawi bawk silo nen i țha ngei em tih rawn fiah chu i u tihtur a ni dawn lo mi?" nui lui suk hian a ti duah. A mitmeng la rum ul a Zoramchhana nen min en dun pah a a nuih luih leh suk chuan ka tawt up up.



Leather jacket uk khup a hak chu a hma a zipp phui vek a, leather kutkawr a bun run bawk nen ka lak a a lungawilohna mitmeng tur zet te chuan ka dang a ti ro a; Keimah chiah hi chu min hau hrep pawh nise pawi tihna ka neilo. Mahse, thamlohna mitmeng a Zoramchhana a zir chiang vel chu Zoramchhana tan a hreawm dawn lutuk.





"Tluang takin i thleng a, a lawmawm e" ti leh nghut a Zoramchhana'n ka kut a hum bo vek a melh leh kher tak ah chuan ka thisen a hi a hik uai uai.







"U, inchau ang, lo lut la, țhu hahchawl rawh" tham țiak hian ka ti halh, chuta ka u lo ner deuh sawk chu hrelo der luiin "thingpui ka'n lum ang. Chuan, hei Zoramchhana a nih hi" ka ti zung zunga, ka u chu ka nuih lui hram bawk. Inthiamlo deuh a Zoramchhana han melh chhoh zeuh pah chuan "Ramchhan, hei, kan upa ber u Jonathana-a a nih" ka ti ve leh a.





Chutih lai tak chuan u Ngaihsaka te nupa an lo lut ve hlawl bawk. An nupa hmel ka hmu chiah chu meiling vam țha zet a tuisik leih ang mai hian ka hahdam huai thei.





"Mate, hei, i u te an lo thleng leh ta si a, an zan-riah tur kan bawl loh chuan" u Dtei'n a rawn ti lut nghal bawrh bawrh a, chu chuan kan boruak lo țang ru lutuk pawh kha a ti ziaawm ta bawk.




"Kan in ah in lo kal lai khan kuhva lei in ka lo chhuak daih a, Ngaihsaka ka nia, ka nupui nen hi chuan in lo inhmu tawh tiraw?" ti pahin u Ngaihsaka chuan ka u chibai turin kut a phar chhuak nghal zat.



"aw, ka farnu hnen ațang hian in hming chu ka hre ngun tawh khawp a sin" u Ngaihsaka kut hum sakin ka u pawh a ri ve ta hlut.


"Hei, ka țhianpa leh kan khaw pasalțha Ramchhana a nih hi" ti a u Ngaihsaka'n a sawi rual chuan hawihawm zetin ka u chuan Zoramchhana chibai turin a kut a lek chhuak a, Zoramchhana chu ka han melh a, țha takin ka u chu a chibai ve mai a.


Ka thinlung erawh a na rawih rawih, midang mitmei ven tur awm hma zawng khan ka u in chibai a tum miah lova, mitmei ven tur an awm tak hnu ah chiah a han chibai leh hnuhnawh chu Ramchhana ka lo lainat ngawih ngawih thung.


Ka u chu țhutkhawmna lam panin a kal ta vut, Zoramchhana pawn min nuih suk in ka kut chu a hmer nghet salh a, u Ngaihsaka te nupa pawn ka u chu an zui a, an awmna lam ah ka zuk kal ve dawn a Zoramchhana'n ka kut thlah a tum rual chuan keimah zawkin nghet takin a kutțang ah ka man a. Hrethiam takin a hum bo leh nghal vek bawk.



"Khua a ro mai sia, in lo tlanna kawng a thui bawk si, tui lum in țeuh ang che u" u Dtei'n a ti bawrh bawrh a.

Țhutkhawmna a zahna hre map lova Dinpuia lo țhu chu vuak thluk tawp ka chak ut ut.



U Ngaihsaka'n an Aizawl leh Ngopa khawkar kawng a chhe si a, kawng lakah buaina an tawk em tih te a zawt luam a, u Dtei erawh in an lo luh hma a thil thleng tur ang hrethiam zet in a mit mei in hahdam tur in min hrilh a.



An nupa hian lo kallo ta se, engthil chiah nge thleng ang tih phei chu ka ngaihtuah ngamlo hial zawk. Zoramchhana hi lo awm ve lovin keimah chiah in ka u hi hmachhawn tur nila chuan ka hreh lo. Nasa tak a hnial in nurse hna chawlhsan ka duh lo tih te pawh ka sawi lang ngam ang. Chutiang bawk in Zoramchhana ka duh tih pawh! Engtiang pawn min hau letin Zoramchhana min sawisel sak pawh nise ka hnial a nga, a rilru hmin sak ka tum bawk ang. Mahse, hmaichhan ah ngei mai tham lo tak a a han belchiang vel tur kha hmuh ka ngam thlawt lo.



"Inkhaw tlang dung chu a nawm reuh hi" u Jonathan-a chuan tukverh ațang pawnlam chu a thlir a, Lengteng leh Nauzuarzo tlang inkham phei dul chu hmuhnawm a tih ve hmel tak zet.



"An ti chawk a nia, a bik takin khilam chhak tlangdung lam khian ramngaw an la nei țha a" u Ngaihsaka pawn a lo ti thuai, Dinpui erawh tumahin kan be lem lo.





"Nû-i, Matei u te ei tur hi inbuatsaih nghal loh chuan an rilțam lutuk palh ang" u Ngaihsaka'n a ti nawn leh tak ah chuan u Dtei a che rang kher mai.



"Nie, inpuiah kan lo han inrel a nge, in lo chho ve mai dawn nia, Mate, eirawng han bawl lawk ang, Ramchhan nangpawh ar sa khi min sah sak loh chuan..'' a ti zung zung a.



Kan pathum inzui chhuak tur chu ka u mitmeng fing zet chuan min chik tak zet tih ka hria. Engmah erawh a sawi lo.



Pawn kan chhuah rual a ka thaw chhuak hawk chu u Dteii'n min mitmei thuai a, kawngkharpui nam khar a Zoramchhana lo inher chu melh zeuh in thil dang a sawipui nghal daih bawk.



Kumhlui thlah ni a nia a, damdawi in tlang vel ah te chuan nula leh tlangval inngaizawng leng hmuh tur an tam ngang mai.



"I țha em?" Ka kut ah nghet zet a rawn hum in a ti sup. Leihkapui hnuai ah chuan min pawt ding a. Khua a la thim lo deuh a, thlifim a tam in tlang sang deuh laiah chuan Lehkhachaih (kite) chaih a naupang chambang lah an tam ngang tih van sang a Lehkhachaih leng kual tam zet ațang chuan a hriat theih.

"Ummm"

Ka sam chhawl leng chu ka beng ah lo zep in min din hnaih leh hrut a, ka chhoh en chuan mit tizim sun hian uluk lutuk in min lo melh chhuk ngur.



"Ih, an lo kal dawn tih ka hrelo a, an lo lang thut bawk sia.." nui ro halh a ka tih tak ah chuan Zoramchhana pawh a nui ve ta suk.



" i chet dan a atthlak em a lawm, an ngaihtuah ngawt ang che" ti sup in a khabe kan nghut in min kalpui leh a.



Ka zan tlan vang a min ngaihtuah ang mai ah a ngai tih ka hriat chuan ka thaw huai nangin amah tak hi ka lainat ta ngawih ngawih. Ka u mitmeng a amah thamlohna lo lang chhuak kha a hmu ve lo nge, a rilru a tluangtlam ang bawk a rilru tluangtlam ve tur ah ka u kha a dah tawp zawk?



"Hmeichhia chu zan thil ah ngat phei chuan ngaihtuah in na, ka farnu nila chuan ka hlap hial ang che" nui duh miah lova thutak zet a a sup chuan ka ding dat a, "tawhsual lo tawk palh in hliam te hial lo tuar palh ta la, i u leh i chhungkhat te rilru a na lutuk dawn" a ti leh sup, tawite hian ka nuih a.



Kawtzawl kan chhuak chho a, Pa Khawla leh nu Țhapui pawn ka u te lo kal ve thut mai chu an lo sawi dun ve barh barh mai.



"Ramchhan" ti pah a a ban ah nghet deuh a ka kuah chuan min dinpui leh in chiang tak hian min en a.

"Ka u kha... ih, a sual hmel i ti em?"

Ka zawhna avang chuan a nui huk.

"Naaa, nui lo la, mawh? A sual hmel i ti em?"

"Aih" ti sup in a mithmul buk dum hlap chu a ti kang uk. A nuih erawh a la zat hmel viau.



"A sual hmel i ti miah lo maw? A hmelte kha a rum si, a mitmeng pawh kha a rum tho a" ner deuh nang hian ka ti a, tlang takin u Jonathan-a khirh zia leh a thu a duh zia ka hrilh dawt ngam chiah bawk silo.



" a ngaihtuah hle che tih ka hria" mit min siai suk pah a a tih thum dut chuan a ban bul ah ka chum taih a.



"A țha, ka u khan sual chhuah hle mah se min kal san miah lo ang che" uang zet ang a langin ka ti a, amah pawh ka en ngam tawh chuang lo chuan kal mai ka tum tawh; mahse, hnehsawh zet in min hnuk let dawrh a, talna hman a awm lo.



A taksa lianpui ah min kuah beh hmiah tak ah chuan ka kã ațangin ka thaw chhuak ham ham mai.



"Kal san.. hethumal hi ka hua, i kâ ațang chhuak tawh suh se" ti hrawih in min kuahna chu a ti nghet zual sauh bawk.



Kan ruahmanna ang pawn kan awm thei ta lo! Ka u te'n chaw an ei kham a, kan insengfel leh meuh chuan zan dar8 a pel hle tawh. Lalati te unau pawh an țhiante nen an lo tlan lut țak țak a.



"Anu, dawhthlak zan a la ni em?" a'n rawn ti heu. Kan lo nuih hawk hawk mai.



"Ni tawh nang, dec 24 ah chiah thleng a dawh theih" u Dtei chuan a ti a, meizial a țawn malh malh bawk.



"Naaa, dawhthlak zan ni leh tawh se ka ti" an ti ve nang nang, naupang tan chuan Christmas a ngahhlehawm tluk zet in dawhthlakzan thlen hun tur a ngaihhlehawm em tak bawk a ni. A bik takin thingtlang lam ah phei chuan Birthday lawm a, present inpek tih vel te hi an la uar lutuk silo a, an thilthar neih theih hun chu dawhthlak zan a an thleng a toys lo awm kha ani deuh mai.



"Kan carol dawn" tih leh tlanchhuah an rual leh nghal a. Ka pa te nupa pawn an tute khawsak phung chu hlimpui zetin an sawi zui tung a, thingpui hang an inzawh hnu chuan Dinpuia chu a ding hluai a.



"Ka han chho a nge, Jo, nang chu nakin deuh ah em ni ang" ti a ka u a en chuan u Dtei nen eilo zet in kan lo in melh ralh.



"Umm, nakin deuh ah ka lo chho ang, step a rawn chhoh tlang tawp kha ni lawmni?"



"Aw, ka lo han inbual a nge" a ti a.



"Kawtah hian meipui chheh a, ar hem hmin kan tum a sin, inchauh viau loh chuan in tel ve ang chu.." u Dtei'n ka u en pah chuan a ti nghal zung zung. Henu thluak țha lutuk leh min humhim dan a thiam lutuk hi ka tan pawn duhsak loh a har țhin.



Ka pa te chhungkua awm ve vangnge ka u pawh a pangngai rih viau, ka in luah ah inbual turin kan inzui thla a, min hau miah lova a inbual zawh hnu ah Dinpuia quarter luah ah a chho chu ka lawm ru kher mai.



"I u lo kal tur kha i hrelawk biklo tiraw?" u Dtei chuan a ti sar sar. Leihkapui ah kan țhu dun a, Zoramchhana chu ka u te chaw ei hma a a chhuak kha a lo let leh tawh miah lo. Nula leh tlangval zan lengin Leikhapui ah chuan rawn chawl zawk in thla te an rawn la leh rih thul.



"Hre nang, Dinpuia kha a zaklo tawp, room ah ka awm laiin a lo lut ringawt a"



" in tawp tak chhan hi chiang takin min la hrilh lo a nia" a tih tak ah chuan Aizawl kan thlenthlak ațang a thil thleng chu ka hrilh mial mial a.



"Awi! Christmas bazar turin Ahmai kha Aizawl ah a lo kal tak a sin, car nei an ni bawk a, ni24 zan khan a rawn haw chiah a lawm, 'mi hmuh tur ka nei' pha deuh dui chung a a tih țum ami kha Ahmai chu ani ngei ngei ang" a ti ta hliai a. Keipawn ka ring nghet hmak tawh.





Chuan, a țhiante party na a kan kalzan pawh khan a phone hman țhin kha a ak lai chiang takin ka hmu. Car chhung a phone lo awm ringawt, bah deuh nuaih a achhan pawh kha Ahmai tho anih ka ring tawh.




"Dinpuia'n a kawp che tih i man chhuah hnu ah chiah em ni Ramchhana hi i lo pan a?" a ti a. Ka nui tawi halh mai.





"Diktak chuan Dinpuia leh Ahmai te Dinpuia quarter ah ka han hmuh dun kha ila hria em? A zan ah mitthi lumenna ah kan kal leh kha" ka tih chuan a lo bu nghat a.





"Khami zan ațang tawh khan Zoramchhana hi ka ngaihtuah reng tawh. Mahse, ka thinlung kha ka pawm duhlo a, u Nathana-a te nen an ramchhuah ho dawn țum khan amah ah rilru ka lo pek hneh tawh zia chu ka hrethiam chiah" ka ti sep. Jenny ka thik luat vang a ka țap ringawt mai te, u Dtei te mut pindan ah min kai lut a, kan infawh hmasak ber țum te, kan infawh hnu lawkah Dinpuia neitur a min hrilh lai te chu ka mitthla let iar iar a. Ngopa ațang kan chhuah dawn zingkar hma lutuk a status, Tawngmang Lasi in min velh țah ngawt dan vel te chu u Dtei ka hrilh a, a lo nui hak hak reng a.





"A duhzia che i hmuthiam har lutuk kha ka ngei lek lek țhin che" ti hlak a zarda a țhial țawlh țawlh chuan ka en deuh kawk.





"Hmuthiam har lutuk maw?"





"Aw! Ka chhaih ka chhaih chhan che pawh a duh lutuk che tih tal hrethawi la, a en dan che hi hmuhthiam sak ve la ka duh vang a lawm... Zoramchhana'n a en lai che a a mitmeng a danglam ang hian Dinpuia khan vawikhatmah a en ve ngailo che" a ti a. Lai deuh a ka nui chu ka malpui ah min beng thlawp lehnghal.







"I la hria em? Hna i zawm tirh lai a a kutkak i lo țhui sak kha" a tih chuan rang zet in lu ka bu a. Ka mitthla ah chuan Duty room chhung a rammi ang mai a palian leh țihbaiawm lo țhu run kha ka hmu let a.







"Khata khan a rawn let thla a, kan in ah a rawn lut kawi. Thilnung satliah ang lek a hmeichhia te en mawl tawp țhintupa khan engtin nge a rawn sawi che i hre duh em?" a tih tak ah chuan hriatchakna leh zam rukna vangin ka lungphu a rang nghal dup dup. Ka kawchhung chu a sa kual phulh phulh a, khami zan khan u Dtei te bulah ka chungchang a lo sawi daih tawh maw?



"A kut i tuam sak kha thlek vung vung in a nui suk suk a, khatiang a a nui hmel kha kum 5 zen zawn chu kan hmu tawh lo, i u Ngaihsaka'n 'ngahnge chutia i nuih tak suk suk a?' tia a zawh khan a kut i tuam sak a enna ațang mit la sawn in i u hi a en a, khatiang ang reng a Ramchhana mitmeng a beiseina lo lang chhuak kha ka la hmu ngailo, 'țhianpa, khawchhungah Lasi nula an cheng țhin tih ka lo hre ngai hauh lo va' ti hial in a sawi che" ngainatawm zet a nui chung a a tih chuan hmui ka pet a, ka mittui tling pam mai chu dan kir tum in ka meng kual ralh ralh bawk.



"Ram ah riak tluk tluk țhin mipa khan a hmuh chak vang che in khawchhung a awm tam a zir a, i be ngai miah lo chung pawn nangmah a hnaih theih dan ber che tih hria in Leihkapui ațang hian i chetzia engkim lo thlir kha a duh tawk em em a, a atchilh lutuk che kha Lasi i ni emaw ka ti ve hman tak tak, Lasi zawl țhin te pawh hian hetiang bak a nasa in an zawlnu te an vei chuang lo ang" a tih tak chiam ah chuan kan nui dun hak hak a.




Keihian khazan ațang daih tawh khan amah ah awmzia lo nei tawh in beiseina nei tawh lo mipa khan beiseina a neih leh phahna ka ni tih ka hriat chuan ka hlim takzet. Chutih rual erawh chuan engmah hrethiam lo va ka vin chiam țhin te, tlangval dang ang lo tak a a lan dan bumro leh rorum lutuk avang a țawngkam na deuh deuh a a chanchin ka lo sawi țhin te kha pawi ka ti takzet.




"Min la vei tawk lo a niang, Aizawl ka awm chhung khan min lo call chu sawi loh, vawi khatmah min lo text lo" ka anh ti nghat a, rang fe in u Dtei chuan "A tan a harsa dawn sin" a lo ti a.


"A bialnu, palai hial a tirh tawhna hmeichhia in vai a um san kha i hre ve ta em?" a ti leh ta daih.

"Aw, u Latei nen khan an lo inhre țhin a lawm, ka khawngaih" ka han tih chuan "Khawngaihthlak e, lehlam ah chuan palai a tir kha chhung hnai leh keini chhungkua bakin kan hre rih lo hlauh zawk kha a tihzia a sin" a ti leh a. "In inneih hun ah chuan i sawipui a nga, police dept pawh join leh se, eizawnna ah chuan lungngai duh suh" tia min han en chuan "Awi! Em em a che, i la sawi hla lutuk" ka ti let chiam a.



U Dtei lah a lo dîau duh bik der lo.

"Tak tak a lawm, tun thleng hian calling latter a la dawng ziah, chuvang chuan Ramchhana hi thingtlang kut hnawthawk satliah ringawt a nilo a nia" mit ti kang ak ak in a han ti leh vel a. Ei loh hmel zet in ka lo ner khum nang nang mai.





"Nû-i, kha i nu in a be duh che" inchhung ațanga u Ngaihsaka'n a lo tih tak ah chuan u Dtei chuan min luh san ta a.



Zan boruak chu a thiang in vawt hík vuk a, van zau zet ah lah thla chu eng zet in a leng vung vung a, Arsi lah dumpawl ruih khawp in an tlep tuar leh nghal, thlasik kawng zam paw chak chak chuan Remremi min hriatchhuah tir zawk, rang zet in phone ka phawrh a, thla bul ah chuan Arsi eng lutuk pahnih hi langsar zetin an awm bawk.




Thla leh Arsi engzet thlalak chu ka thawn a. *I Thinlung Lalfapa i hrechhuak leh nasa awm* tih ka caption bawk. A chhan chu Siamsiami'n hla a phuah chhan thawnthu ah khan Thlasik te, Arsi te leh thlasik kawng te hian hmun pawimawh tak an chang a, Thlasik ah Arsi a tam zual sauh tawh hi chuan 'Ka Thinlung lalfapa te vibe bik ngawih ngawih' a ti chiam zel.



*Bawihte* message a reply rang lutuk chu ka nui tawp.

*Story boy ka sawi zui pui hman lo che😝* tiin ka reply a.


*a nih leh Chatuantawi* a rawn ti hmak, henu tak hi chu aw! A thawnthu duh zawng sawipui tur a min duh chuan "Bawihte" hi min tia, sawipui peih loh chuan a duh duh hming hi min phuah a.



*enteh, Arsi eng deuh pahnih khi ka kut a ka thai zawn hian Ka Thinlung lalfapa pawn a thai zawn ve dawn hian ka hre tlat zel* a la rawn tihram!



*harhchhuak la, bialpa nei rawh😞* ti a reply in ka nui kar kar a.



"Engnge i lo tih a?" aw hniam pa chhak ka hriat rual deuh thaw chuan ka hnunglam ațangin nghet zet hian min rawn kuah hmiah, Ka tawm deuh chawih a. Ka darah khabe a lo nghah rual chuan a pangtilum nuam zet chu ka ngheng riai riai a. Min kuah tupa cool em vang pawh a ni mai thei, zam deuh ang mai hian ka tha a khur ru.



"Ka țhiannu ka lo text a" ka phone screen a hmuh theih tur a ka dah rual chuan Zoramchhana chu a nui nghing dawt, ka beng hnuai lum hak avangin ka mur uaih uaih bawk.



"Ka Lasi nula hi Chatuantawi te a lo ti a" ti nghut pahin a hmui lum thur thur chuan ka beng hnuai a lo nul thuak ta mai a. Ka kawchhung thleng a a chet dan in a țham za uaih chu a hriat hlau zetin hmui ka seh vak ringawt.




"A nghal a nia, e, Ngopa lo kal ve a chak tawp a, hunawl han neise a lo zin ve ang" thaw chhuak ham ham in a dar ah lu ka nghat a, van thengreng Arsi in a bawh puat chuk chu en chho in min kuah tupa ban rek chu ka beng thek thek bawk.



"Tleirawl leh țhalai ho in Ngopa an lo kal chak chhan chu nu Peki fanu tereuh thawnthu ziak vang ani tlangpui" a tih deuh hluk laiin "I hre ve ami?" Ka ti chul a.

A khabe hnuai ațang dak chho haw a ka han melh chuan van lam chu a lo thlek ve vung vung a, a hrawk bawk langsar zet leh a khabe ruhkual hrawl zet chu a lang chiang ngang bawk.





"Ngopa khaw ho hian zawhna kan dawng nasa a lawm, college kal rawn tum ta ngawt lah an awm nawk" ti sup a nuihza hmel pa zet a min lo melh chhuk rual chuan Remremi ngaihtuah telin ka nuilo theilo.





"Nangni pahnih kha, Ka fanute leng va hruai haw teh u" u Dtei'n a lo tih tak ah chuan Ramchhana nen chuan in melh in ka innuih ta ringawt.



"Khawnge an awm a?" Kan tih chuan "Pa Tlana te in ah khan a niang" a ti mai a, "mei kan lo nun ang, va tlafal rei lutuk lo ula" a ti leh kher bawk.



Tih vak ngaihna kan hre bawk silo nen Pa Tlana te veng lam pan chuan kan inzui a, kut inkai rial a nula leh tlangval leng hmuh tur an tam a vangin keini pawh chuan midang mitmei kan veng vak bik chuang lo.





Zoramchhana chuan ka kut a hum a, ka kut hum chungin a jacket ipte chu a zen hlun a, ka kumhlui thlah zan hman tawh ah chuan a la romantic ber ang.



"Ei chak i nei em?" a ban bul kuah tel țai chungin ka en chho ha chu a kut lehlam in ka hnar a lo nul thuak a.



"Aih.. ka hrelo.." ka ti chuan a lo nui suk.



"Lalati te unau an lo muhil tawh mai thei a, inpawm bawr chung a dawr luh a buai thlak, in lei fel nghal ang" a ti ta duah.



Ka ei duh min zawt a, kamram vel hi ka ngaina lutuk lo bawk nen sawi mai tur ka hriat tak silo ah chuan lu thing nghut in dawr ah chuan a lut a. Ka luh ve hma chiah a min lo au tu vang chuan ka hawi let rang kher mai.





"Jenny?"



"Tlang ah khan ka hmu che a, mahse, ka biak hma che in in lo bo leh daih sia" ti pahin min pan hnai a.



Dawr chhung a Zoramchhana ding chu ka zuk melh zawk a, amah pawhin min lo en ve chiah, ka țha tih nan mit ka chhin kum zauh tak ah chuan lo chhuak ve lovin Jenny nen chuan hunthawl min pe ta zawk a.





Jenny chuan "Engnge i tih a?" a lo ti leh a.

"Hei, Lalati te unau kan hruai dawn a, tah hian thil kan lei kawi zawk" ka tih let laia dawr chhuak a zuk thlek ve chuan Zoramchhana a zuk hmu tih hriat zetin a nui tawi halh.





"Kan inbe lawk thei a ngem?" a ti ta reng.





Barel lian zet phen ah Jenny nen chuan kan inhmachhawm ta ran mai. Zoramchhana a duh zia ka hria a, kan tihpui deuh reuh tawh hnu ah hetiang a Zoramchhana nen kan inzui leh ta daih hi a lak ah hian ka inthiam lo takzet.





"U Ramchhana nen in inkar ah hian awm a awm tiraw?" tia min en ran chuan ka zam titih der, a rilru tihnat sak hlau deuh hian "Jenny, ka.. englo" ka ti hap a, ani thung chuan nui sang hian min lo en a, chuchuan a lak a ka inthiam lohna a tizual sauh bawk.



"Diktak chuan Zoramchhana hi ka duh" ti chhuak hap in ka thaw hliai a. Jenny chuan ka beisei loh dan ber mai hian "Aih, pawi tiduh suh, diktak chuan ngaihdam dil che ka duh a" a lo ti a, phawk lutuk in ka en kawk mai.





"U Ramchhana hian a duh zia che ka hria a lawm, i duh ve em tih ka zawh hial tawh che kha! Mahse, a lakah rilru dang i pu lo tih i sawi tak ah kha chuan ka theih tawp in a rilru hneh tumin țan ka la a, induh tir kha ka tum nasa lutuk. Mahse, nangmah ah chiah rilru a pe miau a, a tir kha chuan ka haw ngawih ngawih che..." mak ti lutuk a ka en reng chu zalo te hian min nuih a.





"Zan ah i lo call kha i la hria em? Khatihlai pawh khan nangmah theihnghilh tir che tum in ka la talbuai fan a sin. I lo call tih pawh ka hrilh lo. I lo call tih a hriat chuan Aizawl thlengin a lo pan duh mai dawn che khan ka hria a.. ih, a phone kha kan lenkhawmna te bathroom a bucket a tui awmna ah ka thlak sak ta tawp a nih kha, u Ramchhana'n hre pheise chuan min haw ngawt ang " a tih chuan ka thaw chhuak hawk.



Awi lo zet hian "Jenny?" ka ti halh a. Engtin nge midang phone țha lai reng tuiah a thlak sak theih le?




"Ka rapthlak tiraw? A thinlung ah hmun ka chang ve lo tih inhrereng chungin verther ka la chhuah țal a nia. Inbe pawh lo ula ka tih em avangin kha bak kawng dang ka hre hlawl lo! In inbe lo a nih chuan a theihnghilh ve mai che ka ring a... mahse, ka lo ring sual takzet" ti halh a hreawm tih hmel zet a min en chuan sawi mai tur pawh ka la hrelo.





"Ka tihpalh aw, i ta ruksak che tumin in inkar ah te hial ka inrawlh phah a, u Ramchhana thinlung neihsak tawhtu i ni tih hrereng chungin i țhian lem ka chang a" hreawm tih hmel deuh a tia min melh chuan "A pawilo" ka ti hap.

A inthiamlo lutuk chu han hnen vak ngaihna ka hrelo.



"I thiamloh bik a nilo, ka thiamlo ve tho.." a kut vawn sak pahin ka ti leh a, keipawn Zoramchhana nen an in close zel theih nan te ka fiam a, ka sawi phur pui țhin tlat a.



"Mambawih?" rawn tithum sup tupa lam chu kan hawi rual dawrh. Dawr chhung light in a chhun en chin ah chuan Zoramchhana chu a lo ding thim run mai.


"I hman tawh chuan?" ti leh nghutin dar a tikang uk bawk.



"Va kal tawh rawh, min haw lo a ka lawm tak zet" tisep in Jenny chuan ka dar ah a lo beng dat dat a.



Ani pawh chu amah lo nghaktu te awmna lam ah a kal a, a bul ka va thlen rual chuan Zoramchhana chuan min lo en uluk ngang mai.







"I țha em?"





"Ummm, i va lei hnem em em?" tia pah a a banbul ah ka va kuah chawt chuan min a lo siai zeuh a.



"Engnge in sawi a?"



"Hmeichhia chiah hriat chi" ka tih chuan a nui chhuak huk.



"Hmeichhia chiah hriat chi" a tih ve sup chuan ka thlek chho ha a, ka vanneih zia ka ngaihtuah rauh rauh bawk. Hemipa pa lutuk in a vawi khat min hmuhna ațang a min lo vei bur tih ka ngaihtuah tel leh tak ah chuan lai lutuk in lei lam ka bih ta daih.







Lalati te unau chu an lo muhil tak tak, Ramchhana'n a dar lehlam lehlam ah bei tirin a pawm a, a bulah hi chuan tha hman ngaihna lam pawh nise a a mangan thlak ngailoh. A rinchhan tlak bik hluah hluah.




In kan va thlenphei chuan kawtzawl meipui chhehna ah ka u a lo țhu reng tawh. Zoramchhana tan awm nawm loh theihna turin a awm ang tih hlau reng rengin ka hahdam leh thei tawh lo.



Dar10 pelh ah chuan "ka zuk mu tawh ang e, Mambawih, in tlaivar dawn mi?" a ti a.

Tim deuh tak hian "Kan tum deuh a" ka ti sep. Ka u chuan sawi nawi hlek lovin min bum khum nghut a. Mak ka tih rual in ka hlim kher mai.

"Arsa hem lai tal kha ei ve phawt la" u Ngaihsaka'n a ti luam. Mahse, a chauh deuh thu sawiin a chhuk thla a, a lo thlen tirh ang a lungawilo hmel hmuh tur awm lo mah se ka u khawsak phung chuan ngaihțha takin min awm tir theilo.






U Ngaihsaka'n a guiter hlui tawh zet chu mei pui bul ah a rawn keng chho a, u Dtei'n a hla duh zawng a thlang nghal zat. An nupa chuan an inchhaih nui hawk hawk reng a, nupa ka hriat tawh ah chuan an la awhawm ber hial ang. An inpawh em em a, țhian kawm in an inkawm thei a, inngaizawng an la ni emaw tih theih khawp hian an induh thiam in an induat dun em em a, u Dtei'n u Ngaihsak a zah thiam bawk si.





Chutia thawm kan siam tak ah chuan kawlai chuan a leng tleirawl leh rawlthar ho chu an lo kal khawm sap sap a, an zavai mai chu Zoramchhana chu an nel em em vek. U Ngaihsaka hian 'Țhianpa hi zawng Pasalțha mize diktak neitu a ni a, a tlawm ngai a, a chak a, sa a lak theih vang ngawt hian pasalțha a nilo, tu mihring mahin an chhaih thinrim zo ngailo hi pasalțha a nihna diktak zawk chu a ni' a ti fo țhin.





"Bathroom ah ka kal lawk dawn" ka ti a. Ka pa te nupa pawn tv an la en, zanlai inkhawm ve ngei an duh avangin an inthuamlum tawh hle bawk.







Ka zun zawh chuan kut ka sil a, tui lo vawt lutuk avang chuan ka khur dat dat mai. Towel ah kut hru hul a kawngkhar ka pawt hawng chiah chu ka phu nghek.





Zoramchhana chuan min lo nuih suk a. Ka țawng tur chu ka kã lo hup bet in a taksa lian zet chuan bathroom chhuang ah min nawr lut leh hmiah, hrethiam lo zet ka en chuan kawngkhar chu kal in ka kawngah nghet zet a lo man pah hian "ka fawp chak tawh lutuk che" a lo ti thum ta chhak a.



Nichin lawk a vawt ka tih tehlul nen ka thisen chu a rawn lum pup pup a, a taksa lianpui chuan bang ah min nawr bet ta run a, a hmel lan dan pa lutuk leh sexy zet avang chuangin ka lungphu a che dawt dawt.



A ban thachak lutuk a min pawt kang deuh dawrh in a hmui lum chuan ka hmui a rawn nawr si a, ka thisen chu a țek chuai a ni ber,



"Ka Lasi nula" zawi thum sup a tiin duhthawh zetin min fawp nghal ngawng ngawng, a duhthawh in a koham bawk a ka kawchhung chu a lum za pup pup, dingdihlip in a nghawng ah ban ka suih bet a, zei lutuk a a lei hrawl leh sa țha zet a chet kual tir chu ka chhang let ve ngawng ngawng a..



A chet dan cho a duhthawh satliah pawh a nilo, a koham ani tawp mai, ka khabe ah a hmer a zei lutuk a rei zet min fawh ngawr ngawr hnu ah tawp in ka hmui hnuai ah a bur leh a, zei lutuk a seh ner ner phei chuan ka rum chhuak lo chauh zel.



"Zan khua in he bathroom chhung ah hian inkalhhnan pui che ka hreh hauh lo a nia" pa lutuk a ka bengbul ah a lo phun sup chuan a banbul ka țham sak vak a. Ani erawh cool zetin a nui suk thung.

"min fawp rawh ti rawh?" a tih sup chuan nui hakin ka en chho a. A hmui huh hliam mai leh mitmeng lungrun zet te avang chuan ka hmai a sa hat hat.



Ngenngawl tak a zawi ruih hian "mawh, fawp tur che in min ngen rawh?" a tih leh tak ah chuan ka hmui hnuai ka seh a, insum theihloh hmel zet hian a lo rum hrawih.



"Zoramchhan, min fawp leh rawh" lai zet a ka tih leh chuan nui nghing dawt in min kuah nghet sauh.

Ka hmui ah bawk rawn fawp lehin ka hmui hnuai a pet a, ka chhungril sosang lutuk vang chuan ka zawi nguai thei in ka hria, zei fahran a min fawhna a tawp rual chuan thaw ham ham a mit meng chhuak in bang chu ka tukhum chuan ka tauh dat a!



But, SHIT!



Bang chu tiels a nih avangin a ring ta kher mai! Pawn lam a zai thawm a reh tak duk ah phei chuan zah lutuk vangin ka sa chhuak vek.


Rang lutuk in Zoramchhana awm ah hmai ka phum a. "Duhawmnu" lo ti sup in a ban pahnih chuan min lo kuah bet hlu hlu a.

"Nangmah vang vek" ka tih chuan a lo nui che dawt.

"Nui bawk suh.. ka zak lutuk, u Dteii'n a hrethiam leh vek ang" ka zah lutuk a vangin ka țawng te chu a sehchilh nawk nawk mai.



Ani lah chuan ngawi run in ka sam a lo chul hluau hluau a. Ka hmai sa hat hat chuan a lungphu phu dup dup zawn chu ka nawr bet tlat a, Bathroom ah awm reng thu awm silo, chhuah chu thih hreh in ka hreh hlur tawh!

Kan chhuak chu rin lawk nga ngeiin u Dtei chu a lo nui țha mai a, Zoramchhana chuan ka kut ah kaiin meipui bulah min țhutpui a, a kapkar ah min han pawm hlu hlu chuan u Dtei a ner nasa teh a sin.

.

.



*KUM HLUI* Lalsangzuali Sailo zai ring zet in an in play chuah chuah a, in tin ațang deuh thaw 'kum a thar e' tia au ri hriattur a awm bawk.



"Kum thar chibai" pa zet a nui chung a kut lo lek chhuak tupa kut chu ka lo hum vat a.



"Kum thar chibai" nui sen sen a ka tih chuan thaw ham ham in amah hnungchhawn in min dintir a, hnunglam ațang min lo kuah a ka darah khabe a lo nghah tak ah chuan ka nui ta hak.

thaw chhuak ham ham pah hian ka beng hnuai chu a hmuiin a lo nul a, chutah zawi sup hian "I chhungte i be dawn lo em ni?" a ti a.



"Ka nu ka'n call ang aw" ka tih tak ah chuan min kuahna tinghet sauhin a ngawi ta vung vung. ka nu nen kum thar chibai te kan inhlan tawn hnu chuan reilote ka pa ka be ve leh a, ka nu in min hau hlak hlak tak nangin ka ngai thutak tawh lo. Ramchhana nu leh pa pawh ka nu leh pa te zanlai inkhawm a sawm in an lo kal kawi a, kum thar chibai kan inbuk sap sap hlawm a.



Ramchhana nu in min chibaina thlah lawk lova, ka sam ah lo chul a, 'kumthar duhsakna' min hlan mial mial lai chuan uluk zetin Zoramchhana chuan min lo en dun vung vung a.


Anu in 'i hmel te hi a țha si a, nang zawng pasal i neih hun ah fa nei țeuh rawh, hmelțha dang pung thur thur rawh se' a tih lai a a hmui hnuai seh pah a Zoramchhana mitmeng de sawr sawr chuan ka chhungril a țham za chuaih thei.


"amah ang deuh deuh hmeichhia hring ruih se, pasalțha te dawi a tu ah" U Dtei'n a lo tih chuan ka melh hrak a, a lo hrethiamlo lui der hmak leh nghal.

"Ka sawi dik em Ramchhan?" a la tita deuh deuh.


Ramchhana nu chuan a fapa chu a en deuh ha a, țhu mar vutin Zoramchhana lah chuan " amah ang hlir sawm pawh hringse tu pawi mah a sawi nang" ti nghut in a nui suk. Lai ru zet a ka insehruh vak chuan tifuh itizet hian u Dtei chu a lo nui rah rah a. Henu nghal lutuk leh Zoramchhana fiam kual vel nuam ti lutuk hi chu aw!!!



.



Damtlang tak in kum thar ni chu kan chuangkai ta reng mai. U Jonathan-a thawh hma in dawmdawi in ka han tlawh zuai a. Ka sawi fo tawh ang khan khawpui angin damdawi in thawktu kan indaih ve lo a. Doctor pakhat, nurse pahnih leh sister pakhat deuh tlawng kan nih a vang hian khawpui lam angin routin fel fai takin a neih ve theih lo. Mahni chhungkaw tan a hnawthawk ang maiin duhsakna te nen theihtawp a hnathawh a ngai țhin.





Ka haw thlak chuan ka u a lo tho tawh a, min hauh tumna emaw, thil min sawipui tumna aneilo tih hriat takin ka pa te'n nizan ah chaw an ei laia an sawi lawk tawh angin an in ah chaw ei turin kan inzui chho a. Kumthar inkhawm ah ka u pawh a lo inkhawm ve a, ka u a ni tih an hriat chuan an chibai sap sap hlawm a. Tlai ah ruaițhehna ah pawh a lo tel ve zel, ka pa te nen an inzui deuh zawk mah a vangin kei nen tak phei chuan kan inbe tam lo.





Ruaițheh zo chu hlim zet in kan inzui haw dam dam a, u Ngaihsaka leh Ramchhana erawh fatu te puiin an awm khawtlai thung a. Ka pa te kawmthlang a Aizawl Taxi lo ding ka hmuh chuan ngaihțhat lohna in min rawn tuam nghal hlup hlup.



Taxi chhung ațang a mipa lo chhuak ka hmuh leh lek phei chuan ding dat in u Dtei banbul ah man a.



"Inlo thleng tluang maw?" ka u chu ka melh ta tlawk tlawk.



"Tluang e, hei, driver te hi pawlrang khua an lo ni reng a, pawlrang ah ruai kan raw țhen fel der" Aizawl a kan driver chhawr chuan a ti let a. ka u in ka hriat miah lohin a lo zuk chah tihna maw?



Ka nu leh pa te bangbo zet a ding țai chu en kual thuak in ka u mit chu keimah a fu ta run bawk.



"Naktuk hian kan let thla dawn a, Mambawihi car lo khalh chhoh hi ani hian kalh let se ka ti a, ka zuk chah a nih hi" ka u chuanin a ti nghut. Ka nu leh pa te chuan hrilhhai hmel buai nak hian min lo en a. Engmah ka hrelawk bik bawk silo nen ka mangang takzet.



"Mambawih, naktukah i chhuk leh mai dawn maw?" Nu Țhapuii'n a lo tih chuan chil ka lem dak a. Ka u chuan warning-na mitmeng zet in min melh khui bawk.

Link:
BBcode:
HTML:
Hide post links
Show post links

Abbra Reo Ririni
Posts: 1237
Joined: November 10th, 2016, 8:57 pm

Unread post by Abbra Reo Ririni » August 23rd, 2021, 8:57 pm

"Mambawihi hian a hna hi chawlhsan se chhungkua in kan duh a ni" vin hauh silo hian ka nu chu min chhan khalh a. Ka nu leh pa te hmel chu mak tihna in a rawn thlak a, U Dtei'n hriatthiam loh hmel zet a min en te chuan thil thlen dan a rang bawk nen ka hawi buai kher mai.


Hetiang leh lutuk a thui hian a kal ang tih reng rin ngaihna ka lo hre lo.

"He lam ah thlen in tur i hria em?" tia Taxi driver a zawh chuan 'a nupui chhungte an awm thu leh zanin pawh chu tah chuan a riah ve dawn thu' in a lo chhang a, kan driver pawn taxi driver chu a zui hreh loh thu a lo sawi ve bawk.



Thinphu dup dup in ka u chetla vel chu ka en tlawk tlawk a, ani lah chu thil danglam thleng lo ang mai hian a khawsa zui a.

"Ka car hi check a ngai mai thei, saw lai deuh ah sawn workshop a awm in ka hria" tiin driver te chu a be zui a. A taksa lianpui leh inthuamna man to zet te chuan thuneitu ber ah a inngaih tir ni mai te in ka hre rum rum mai.


Taxi driver chuan chinchang a hre zawk tih hriat tak hian "workshop neitu te chu ka hmelhriat te a lawm, naktuk ah tlan chhuah nghal induh tih kan sawi chuan zan khawih pawh an hreh lo ang" a lo ti ve nghal zat bawk.

Ka u chuan a car lo khalh chhoh chahbi chu kan driver chu a pe a.
"SUV zawk pawh hi check tir a sual lo ang" tia min lo en run chuan thawk ip ngar ngara en in ka bag ațangin chahbi ka la chhuak a, ka pek rual chuan lo ban vut in driver bawk chu a pe leh nghal zat bawk.


"kan pahnih hian kan khawihpui thei nghal ang a, zan khawih pawh an pawitimiah lo ang" tih zawm in motor chungchang chu an sawi zui a, harsatna awm miah lovin kum thar ni te hmang zoin ruai te kan țheh ho a, inthawt lawkna awm hmasa lo a hetia ka u a che thut mai chu a hamhaih thlak tih piah lam a ni e.



"Mate, kan lo han chho dawn em ni?" Nu Țhapui'n a rawn ti a. Ka rilru chawmawlh vek avang chuan țawng nachang pawh ka hre lo, lu ka bu nghat a, u Dtei chuan ka ban ah a kut lo zen lut in min kalpui a.


"Jo-a chu eng ngati rum rum nge ni le, in hrilh lawk ve awm tak" ka nu chuan a ti niah niah a,


Naktuk ah kan haw dawn mai pawh nilo a Nurse hna ka thawk zui tawh dawn lo tih thleng a chawpchilh lutuk a a sawi chhuak thei kha amak ka ti. Ka duhthlanna min ngaihpawimawh sak miah lova a duh dan a engkim kal tlangpui a tum chu ka haw tak zet bawk. Nge ni a? chhungkaw dangte nen kan awm lai hian ka hnial let chiam dawn lo tih hrelawk sa vekin remchang a lo zawng reng zawk. Tun ah hian hnial in ka chawlhsan loh tur thu sawi ta chiam ila, min lo hmutu te mit ah chuan chhungkaw buaina thuk tak nei angin kan lang ang a, min hmuh dan a dang vek tawh dawn a, chutiang thil chu ka thlen tir duh dawn biklo tih a hriat lawk avangin tun hun hi a hmang țangkai ah ka ngai.




Inchhung ah kan luh thlengin ka nu te pawn engmah an sawi lo va, zawhna min zawt zui tawh lo bawk, u Dtei'n rapchung a thing chu la thla in mei a nun nghal a, khua a thim tawh bawk nen tukverh in kharphui vek mah se inchhung pawh chu a vawt hle tho, ngawi rengin țhutkhawmna lam ah ka chhuk thla a, thuk ah chuan ka nu leh pa te in tur thingpui bel a chhuang kai a, țhutthleng sei ah ke tawm a ka țhu chu min lo pan thla nghal zat bawk.



"Mate, i u thu sawi kha eng nge a awmzia, hna i bansan dawn maw?" a lo ti a, ka bul ah a lo țhut thlak rual chuan engmah sawina hun awm lovin ka u a lo lut ve leh chiah bawk.


Ka u lo lut a hmuh rual chuan insum hman lo in ka nu chuan "Jo-a, Mateii hna chawlhsan te kha i sawi teh nuaih a, eng nge ni a awmzia?" a lo ti ta reng. U Dtei pawn Tapchhak lam chu a thlek rang khawp mai.



"A hma lam a kan hrilh lawk loh che u avangin a țhawng viau ang che u. Mahse, chhungkua kan han inrawn khawm a, unau ah a tlum ber leh nghal khaw dangah hnathawk a a awm bo reng hi țha kan ti lo deuh a ni, Aizawl ah ngei awm ve tawh se tiin damdawi dawr hawn sak kan rilruk a" ka u chuan a ti duah. 'Nurse hna chawlhsan ka duh hlei nem' ti a au khum tuar ka chak lutuk chu ka tawt up up thei.


Tapchhak a ka nu leh pa te țhutna bul ah chuan țhu ve nghal in 'ka tan chhungkaw hlat a awm hran reng chu adik lo thu te, ngaihtuah ka nat thu' te chu a sawi zawm luam a.


Thinrim leh rilru na zet hian ka tan a a ruahmanna te sawi mek tupa chu ka melh ngawt ngawt, tunhun hi ka tan hnial chiam chiamna hun a ni mang silo.


"Ka nu leh pa te pawh an upa ve ta a, Mambawihi nen a hun hman tam te pawh an thlahlel ve tawh a" a ti leh zel a, hna min chawlh tir chu a lo tum nghet tak zet a nih hi.



A thusawi hriatthiam hmel tak chuan Pa Khawla te nupa chu an bu nghat nghat a, insehruh țeuh in ka hawi sawn hmak thung, tun ah hian Zoramchhana hmuh ka mamawh tak zet.



Tukverh ațangin Biakin mual lam chu ka melh ngawt ngawt a, biak in mual chu a awmna a san avangin țiau chhum vawh hmel zet in in a bawh paw chek chek a, ka ngaihtuah na hrethiam zet in u Dtei chuan u Ngaihsaka phone chu lo lek kang in a thaw hap bawk.


Keipawh chu ipik fe in ka thaw chhuak halh a, kan haw dawn khan u Ngaihsaka'n a phone hi u Dtei a pe tak. Zoramchhana lah in phone a nei tawh der bawk silo.



Beidawng zet in țhutthleng sei nghehchhan ah lu nghat in ka maimit chhing a, Biakin mual a fatu te inseng fel pui a Zoramchhana chetla vel tur chu ka mitthla in ka chhui a, ka u nen kan inkar boruak hi hreve ta se engtin nge a tih ang? Min chelh dan kawng a dap ang nge, min beidawn san in ka u thu ang a awm turin min hrilh zawk ang?


"Chutia Matei ber in hna a chawlhsan chuan kan va buai dawn ve aw, i farnu hi a naupang nâ in kan khawtlang chuan kan țangkaipui teh a sin, damlo tu te pawh duat takin a lo bawisawm nghal zel thei a, thingtlang lam hian doctor leh nurse țha, khaw mipuite hriatthiamna nei mi hi kan nei khat a, Doctor leh Nurse thar kan neih dawn te hian mamawh tak si hian kan huphurh ru em em zel, a chhan pawh khawpui Doctor nazawngte hian thingtlang mi te hi min ngaina nghal ngawt țhin silo a... matei hian chung kan ngaihdan zawng zawngte chu min thlak sakin damlo tute pawh a ngaihsak em em vek a. Kan khaw tan chuan channa nasa tak a ni dawn a nih chu..." nu Țhapui chuan a ti vang vang mai.


Zan dar 8 hnai kuar ah u Ngaihsaka a lo haw ta hlawl a, Zoramchhana a lo tel ve ring ru lutuk a kawngkhar lam ka en chuan a lo lang ve ta lawk silo nen ka zawi nghal vek thei, kan boruak hre ve hek lo, a rawn ri lut lawng lawng a.
"Jo-a, i ruaițheh kha i puar ve meuh a maw?" ti pah in mei lum chu a kil ve nghal a, kei erawh in kawngkharpui lam ngawt chu ka en chhen thung.

"Puar mah mah zawk a ni, Beipenek kha ka Beipenek ei tawh ah chuan a la tui ber ang" ka u pawn a ti țha ve mai a, u Dtei'n pawh an pa inbualna tui chhuan sak turin a tho nghal a.

Tapchhak ah ka u a țhut ve run avangin Ramchhana chanchin han zawh nghalna chi ani bawk silo. A lo kal vat lo a nih chuan ka u hian ka in luah ah haw thlak a rawt hman ka hlau bawk nen ka rilru chu a hmanhmawh in a buai ta takzet.




Tui so hnu chuan inbual turin u Ngaihsaka chu bualin ah a lut a, patling dang in leng neuh neuh an lo chuang lut ve leh a, Zoramchhana hmel erawh hmuh tur reng a awm thei lo.



Engtiklai pawh a min hrethiam em em tu u Dtei chuan u Ngaihsaka inbual zo chu an mut pindan ah a zui lut nghal a, reilote hnu ah lo chhuak in chanchin thar a rawn nei thei ta!

Ka bul ah lo țhut pah chuan zawite hian min hrilh ru sar sar a "Ramchhana pawh inbual a duh vangin a haw tlang a, nakin deuh ah a lo leng ang" a tih chuan ka thaw huai tak nangin kan hma a thil lo thleng tur chu a kô zual sauh in ka hre ta tîng.

" ka u hian haw thlak thu a sawi lawk miah lo a sin, mahse driver te kha an lo thleng thut bawk sia," zawite in u Dtei bulah chuan ka ti a.

"A mak teh thut ngawt mai, eng tak chu hria nimaw?" a lo ti ve thuai a. Ka bangbo tluk zet in chhungril ațangin eng emaw hian min mawlh a, ka nuam hlawh lo.



Ka pa Khawla țhian te thingpui pe tur in u Dtei chuan min thawh san leh a, patling ho pawh an titi mam mam a, kum thar ruaițheh zo chiah mahila kumin a an ram țheh tur mual chanchin te chu an sawi ho a, kei erawh bet lo zet a țhu ve in kawngkapui leh bang a sana in-tar chu rilru hmanhawh ru lutuk hian ka melh tawn sek mai.

"A va vawt ve mawle" ti chungin u Ngaihsaka inthlak zo chu tapchhak ah a chho ve nghal a, thingpui hang bel chhin hawng a a thlek duk duk lai te chuan 'Zoramchhana a inbual zo ve tawh ang em?' tih ngawt chu ngaihtuah in ka rilru chu a lo hmanhmawh tut tut a. Ani lah a chu reh vung vung mai si.



"Mambawih, ka chhuk dawn mi? Naktuk kha chhuah hma kan ngaih hmel tlat" ti a ka u a din tak hluai ah chuan ka lungphu chu a tawp duk in ka hre hial nia. Ka hlauh ang ngei chu a thleng ta!


Patling ho titi pawh chu an tawp duk a,
"Naktuk a?" U Ngaihsaka'n a rawn a ti hu chuan "Aw, kan haw thla tawh dawn a" ka u pawn a ti țha ve leh mai a, hriatthiam loh hmel zet a uNgaihsak'n min en kual lai chuan "Mambawih?" lo ti leh nghut in ka u chuan a ban a sana chu a bih a, Zoramchhana nen a inhmuhna hun thawl min pek a tum tawh loh zia chu mi â ber tan pawh hriatthiam loh ngaihna a awm ta lo!

"Eee, kan Nurse hmelțha-i chu Aizawl ah i let leh nghal mai dawn maw?" tiin patling țhenkhat chuan a thuphung in min zawt a, an thu hriat in a țhawn hlawm tluk zet in keipawh min țhawng a, han chhan let vak ngaihna ka hrelo bawk nen tawi deuh in ka nuih hlawm a.


"Keimah hian hna zawm hma te ka ngai dawn a, helam ațang a tlakthlak lam kan hma mai a țul a ni" ka u in a tih lai chuan muangchang in ka tho chhuak a, ka thinlung chuan Zoramchhana a au mawlh mawlh bawk, ka nu pawn 'hna ka zawm tawh dawn loh thu' u Ngaihsaka leh kan inleng te chu hrilh fiah ve mial mial a. Ka u lah chuan dawhtheihna tlachham zet in min melh ngur tawh mai bawk si! A chet dan pawisak nei lo tak chuan hlauthawnglo theiloin min siam a, hmachhawn dan tur ka la hrethiam lo.

"Chutia nang ber in chawlhsan i tum chuan kan khua chu kan va ngaihtuah awm dawn ve aw.." patling ho chuan an ti ve liam liam a.

"Kan farnu aia fel hi a rawn thawk leh thuai mai ang" ka u chuan a ti ve thuai a, kei erawh ka ngawi reng ringawt.

Pawn ah kan chhuah hnu pawn Zoramchhana chu a lo la lang ta chuang lo a, beisei ngam chi a ni ang em tih pawh ka hrethiam tawh lo!


"Jo-a, Tuk țhuan pawh kan in ah in lo ei chho leh dawn a nia" ka nu in a lo ti lar lar a, tualzawl ah lo kal chhuak ve meuh in ka u nen ka in luah pan a kan inzui thla chu min thlir liam a.



Ka u chet dan chu mak an ti rilru ve ngawt ang, nu leh pa ang a en a ka lo belh ve ber te pawh kam thawt na awm hmasa hauh lo a ka hna bansan tur thu chawp chilh zet a a hrilh tawp mai kha an lungawi lo ru viau thei bawk.


Step tuk chawp rem lo zet ațang kawngpui ah kan chhuak thla chiah chu ka ding nghal chawt a, kawngpui street light eng țha vak lo hnui a Zoramchhana rawn kal phei mek ka hmu chiah chu ka lungphu a che dawt dawt a.


Mahse, ka u chuan nghet zet in ka ban rek ah a rawn hum a nih chu mawle!


A chet dan in min barakhaih em avang chuan in ka en nghal dawrh a.
"u?" ka ti dek dek chuan a lo kun hniam deuh a, "atthlak tak in i chet nawn tawh loh hram ka beisei, " ka beng bul ah ti nghut in kawngpui ah chuan min kai thla a nih chu!

Tharum meuh a hmang tel ta mai chu mak ka va titehlul em! Zoramchhana lam chu ka va melh țawk țawk a, a rawn pen chak zual sauh tih ka hmu thei, ka kawngkhar bul kan thlen thlak rual in ka u chuan ka kut chu a thlah a, Ramchhana pawn kan zawn a lo thleng chawp chilh nghal mai bawk.



"Mambawih?" a lo tih sup chuan ka ang ziau a. Mahse, rang lutuk in ka u chu a lo inrawlh nghal a.

"I țhianpa hian naktuk a kan haw tur kha a la hriat ve loh takin hrilh ve ta che, nurse hna i chawlh san dawn tih pawh" Tahla a chabi rawlh lut mawlh mawlh pah hian ka u chuan a ti hmiah hmiah a.


"Eng nge thil awmzia?" tia Zoramchhana'n min lo din hnaih rual a ka u chet dan avang chuan in ka țap chhuak lo chauh chu a ni e.

"Ramchhan, zanin chu in inkawm rih lo mai dawn em ni? Kan unau hian inbiak kan ngai tlat" ti khauh in kawngkharpui chu a pawt hawng a, Zoramchhana ka hmaizah zia chu sawifiah ngaihna a awm lo.

A ngaihna hriat loh hmel zet a Ramchhana tawp chut chu ka melh a, hamhaih leh zawhna ngah hmel taka min lo en chik em avang chuan ka mittui a hnai kuar mai.


Thil thlen mek dan hi ka hre lawk bik lo tih leh ka duh dan ani bik lo tih a hrethiam ang em le?

"lut la, insiam te kan la ngaih kha.." ka u vek in a lo tih leh chuan ka lungphu chu a ri dawt dawt a, a thu ka hnial a nih vaih zawngin buaina lian zawk a chhuak ngei ngei ang.


"Ramchhan, naktuk ah hian ka haw thla dawn a" țah insum zet a ka tih sep chuan mitko ti hnim deuh chungin min en ngur ngur,
"Nurse hna ka bansan dawn bawk, a awmzia chu he khua ah hian ka awm ve tawh dawn lo" tia ka mittui tla mai tur dan kir nan a ka meng kual ralh chu min hnaih leh hrut nangin ka u kawngkhar pawh hawn san ah chuan ka lut daih a.

Ka u pawn Zoramchhana ding ngawi ngul chu nuih lui suk pahin a lo luh san a, "Mang țha aw, Zoramchhan" zawite hian ka ti sep a, țawngkam khat pawn engmah a sawi ve tawh lo.

Ka u'n chhunglam ațang kawngka a pawh phui lai pawn ka hmangaihpa chu a dinna ngai ah chuan che sawn lovin a ding ngur a. Rang zet in room ah ka tlan lut nghal a. Ka khum ah chuan bawk thlawp in lukham ah chuan hmai ka phum a.


Ka mitthla ah chuan ka kawngkhar hma a mipa ding mek hmel hlir chu a lo lang a, zawhna ngah hmel tak a min en na te kha chhanna țha tak pek chak viau mah ila mahni thu duh lutuk ka u hian a tan a dawnsawn nuam lo takin a țawng khum nek ka hlauh bawk si. A hrilhhai hmel kha chiang zet a ka hmuh let rual chuan in ka thinlung mai nilo ka thisen zam thlengin a na kual rawih rawih.


Room a ka u lo lut ve chuan a jacket a hlip nghal sawt sawt a." i bungrua ho hi chu tha thar in kan han la leh mai ang, i mamawh zualpui chiah in keng thla rawh" lo ti nghut in a thuamhnaw dahna bag chu a hawng a.

Kan țawng thawm hre phain kawmchhakah Zoramchhana a la awm reng dawn tih ka hriat avangin ka u chu hnial chak sateh mahilang tun ah tak hi chuan ka ngawih a fin thlak zawk.

"I duh dan in ni thum ngawt i tal tawh a, a tawk tawh viau a nia" min tih khum leh nghut in a kekawr ipte ațangin phone a la chhuak a, ka nu a call nghal bawk, naktuk ah tuk țhuan ei kham hnu a Aizawl kan pan nghal tur thu te chu a hrilh a.

Ka nu chuan eng nge a lo sawi ka hre fuh ve thei mai lo, ka u erawh in a chhang rum hle thung "buaina siam lo e, a ngam chuan han siam chhin teh se," bung zet a a ti riah chuan ka lo ip chawih a!

Ka chungchang nge Zoramchhana chungchang an sawi ka hrethiam lo.

Hlauthawng tak a thaw dep dep chungin an inbe thawm chu ka ngaithla a.

"Aih, ri buan buan lo e, thusawi a la hrethiam viau rih a, tharum hman ngai dawn pawh nise naktuk chuan Aizawl ka rawn hruai thleng tho tho ang" a tih leh tak ah chuan ka chungchang an sawi tih ka hrethiam ta a, marawh chu pawn ah Zoramchhana kha a la awm reng awm si a, kan thawm chu a hriat a tan ka duh lo kher mai.




Ka khum bul sofa ah chuan ka u chu a muhil bawrh bawrh a, kei erawh zan khaw vawt hit zet vang nilo in ka mu meng kar a, ka nu nen an inbiak zawh hnu khan engmah min sawipui zui lo a, ka nu pawn min lo be bik chuang lo.

Nurse hna min chawlh tir an tum vang mai mai nge Zoramchhana nen kan inkawp hi an remtilo lutuk zawk in min rawn um zui tih lah ka hrethiam rih der lo.

Hmeichhia tihtakah ka rilru chu ka vak kual ruai a, tun ah hian zui thla ta ila he khua ah hian ka let leh thei tawh in ka ring lo, Zoramchhana nen kan inkawp hi phal lo in Dinpuia nen min inneih tir tum ta ngat se chuan phone hran ațang a hmeichhe dang a biak dan zawng zawng kha ka sawi chhuak vek ang.


Tun ah hian sawi taila chuan thinrim in ka u nen kan inchhang ngei emaw ani dawn a, Ramchhana hial pawh kangkai in Zoramchhana a hmuh tirh a ka u mitmeng a 'thamlohna' lo lang chhuak te kha ka chawk tho ting tang emaw te a ni ang a, țhenawm khawveng te hma ah Zoramchhana tlawm lutuk tur chu ka ngai ngam ngang bawk silo.


Rilru mumal lo lutuk a ka leh kual sek laiin *mate, i muhil tawh em?* tih message u Dtei hnen ațangin ka dawng hlawl a, dar 12 a pel tawh a, khua chu a vawtin ral leh lam ah chuan kum thar hla play a ri laih laih thawm hriat tur a la awm bawk.

*aih*


*Ramchhana lo chho kha ka lainat tawp* a rawn ti a. Ka ţap chhuak hawk teuh kher mai. A hnaih ah min awm tir a tum loh zia thup hauhloa ka u in a kawsak khum bakah hna ka bansan tur thu hrilh ve tur a min tih sak lai te khan eng rilru nge a put ang? tih chu ka ngaihtuah ngut ngut a.



Ka u nen hian an kum a inrual deuh reng hial ang chu, chutiang chung a khatitak a ka u in zahpah loh hmel taka a chet khumna avang khan ka hmangaihpa khan mahni insitna a neih phah ang em? Nge ni a kan unau hian min haw viau zawk ang?



Inpet ruh fan fan in rizai chuan ka inkhuh țha a, ka khum bul mai a ka u muhil chu tih harh ka hlau tel si nen ka hrawk chhung chu a na ngut ngut mai a ni.

*Zoramchhana chuan eng nge a lo sawi a?* ka tih chuan *Mambawihi u khan keimah vangin Mambawihi kha a hau em ni? a rawn ti lut a, in unau in inhauh loh thu leh i hna chawlhsan tur vel buaipui a i u pawh lo kal a nih thu te, nang leh keini chhung pawh zanin tlai khan min hrilh hriat ve thu te kan lo fah a, mahse, a lungdam hmel chiah loh* a lo tih chuan ka kâ ațangin ka thaw chhuak hak a.

*a haw phei tawh a mi?* ka ti leh a.

*aw, a pheina a la reilo, Leihkapui ațang hian in thawm a ngaithla reng a, mahse țawngkâvin thawm hriat tur a awm tak siloh ah chuan ngaihțha deuh a awm turin i u Ngaihsaka khan a hrilh a, a phei ta a nih kha* a rawn ti leh a. Haw tawh mah se a muhil bik in ka ring lo.

*U Dte, ka rilru a buai em mai, nichin a kan chhuk thla kha Ramchhana nen kan intawk a, ka u in ka kut ah min chelh bet nghal in in lam min pan pui a, khang vel kha a hmu ve vek bawk sia* ka ti let a,

* chuvang a nih dawn chiah chu, a ngaihtuah viau che ni, i u khan Ramchhana nen in inkar hi a hria em?* a lo ti a. *Ramchhana vang hian a ni mai law'ng maw hruai thlak che a tum le?* a lo ti leh nghal zat.

*ka hrethiam bik lo, a lo thlen hlim ațang a zanin thlengin Zoramchhana a duh lohna thu engmah a la sawi lo. Mahse, nichin a a awm dan kha a mak ka ti, ka awm a tinuam lo* ka ti a, ka mitthla ah chuan naupang ang mai a ka u in min kai ta hmiah hmiah lai kha a lo lang zawm zat bawk.

*diktak chuan nurse hna chawlh san hi ka duh lo, Aizawl kan chhuk hlim khan a sawi tawh nangin a tih duh tak tak ka ring lo a, tun ah hian hnial ka chak viau nangin.. aaa, ka hrethiam lo, nurse hna vang chauh nilo in Zoramchhana vang te hi lo ni palh ta se, Ramchhana tan a hriat loh tawp tur țawngkam te hi a nei mai ka hlau vang a hnial rih lo ka ni a* ka sawi tum ber pawh hrethiam lo in ka thawn leh a.

*engpawh thleng se keini nupa chu in lam kan țang tlat dawn a nia* a lo tih chuan nui hak mah ilang ka mittui a tla zel tho.

*nichin khan ka u in Ramchhana lo len luh a phal lo a, keipawn kan haw dawn tih chiah ka hrilh, thil țha lo zawk a thleng palh ang tih ka hlauh vang a ni tih tal a hrethiam ang em le?*

*a hrethiam lutuk ang che, keiman Zotei phone ațang in ka'n be nghal a nge* a lo ti ta a, ka thawl deuh hawk mai.
*Mate mutthilh tum rawh, naktuk zing ah Zoramchhana kan au phei a nga, in inbe dawn a nia* a lo ti leh hnu chuan kan inmangțha ta a. Ka mut erawh a chhuak hlawl lo.


Ka phone a Zoramchhana nen kan thlalak ho chu ka en kual a, kum 2 chhung zet khan engtin nge a zun ah uai lo a, ka lo vei loh țhin zawk tih ka inzawt nawn hial a, video țhen khat ah chuan kei ka țawng a, sir lam ațangin a mitmeng pa tak chuan thuk ruih hian min lo en reng țhin a, hetiang hian min en fo tih u Dtei khan min hrilh tawh a, ka hmuhfiah thiam ve meuh chuan chhungril thlengin min nghawng che pha a, kan thinlung inzawmna la reilo viau mah se a ngaihsakna dawn phak lo na hmun a awm ka thei tawh lo, phat rual a nilo Zoramchhana hi ka hmangaih a ni.

'Zanin tlai a chhanna țha ka pek loh che avang khan min ngaidam rawh aw, ka u khan tham lo tak in a țawngkhum ang che tih ka hlau em a tin a ni' rilru a ti mawlh mawlh in tlai ruaițheh dawn a chaw kan dawh lai thlalak chu ka awm ah ka kuah bet a.


Mipa hausa tak ni ve lo mah se a nun tlawm tak leh nghenchhan tlat zet hi ka chhungte hian hmu thiam se ka van titehlul em. He thingtlang tlangval kiangah hian sum tam tak in a lei phak loh hlimna te, hmeichhia in a mamawh em em thlamuanna te ka hmu in ka nei a, keichuan heng thil hi hausakna ai chuan ka thlang hle zawk.



Bawng țhi in khak buk buk ri ah chuan ka harh hlawl a, ka lungphu chu chawp chilh zet in a su nghal dup dup bawk. Bawng rual thawm a reh fel hnu ah chiah inbeng kang in ka u mutna hnu chu ka en a, a lo ruak huai tawh a.




Lu rit bur a țhu chhuak in phone chu ka hmet eng a, dar 6:30 a.m a lo pel fel chiah, darkar hnih dawn chu ka lo muhil ve hman a nih hi. Phone chu ka connet nghal a, Zoramchhana nen inhmuh ngei ngei kan ngai tichung in ka tho chhuak a. Mut pindan ațang a ka chhuah rual chuan ka u pawh pawnlam ațangin a lo lut ve chiah a.

"I tho thei maw? Che deuh vat vat la aw" a rawn ti dut a, room ah lut tlang in amah pawn a bag vel chu a va khawih ri sawt sawt a, inkhat ah kan chen ho lohna a rei tawh em avangin ka u mizia hi ka hrethiam mai țhin lo.

Tun ah pawh hian thinur in nge min biak tih pawh ka thliar hrang thiam lo.




"Anite.." kawngkharpui ațang a ka chhuah rual in Lalati chuan min lo au nghal chul a, an huan a vawk in hlui ah chuan naupang dangte nen an lo inkhualte lem chu ni in.

"In va tho hma awm ve Lalat"

"Pa Buanga Bawng khalh pawh kan thlah liam daih tawh. Anite kan inpuan lian a" a lo ti leh lar lar a, an nu te puan chehchhawl ni awm tak tak chu vawk in ah chuan an zar hnawk nuaih mai.

Inchhung ațang a ka u lo chhuak pawn Vawk in hlui chhung a u Ngaihsaka fate ho lo awm far a han hmuh chuan a nui ve hawk hawk.

"An rem hre letling phian mai" ti hluk in kawngka chu a kalh nghal a, "Anitei te chuan kan in ah chaw an lo ei leh dawn bik bik, Pa Piana te kawt a motor nalh deuh ding pahnih pawh saw Anitei te ta a nih saw" a țhiante zing ah intithei deuh in Lalati chuan a ti ve zat zat reuh a.

Ka u pawh chu a nui a nui ve mai, step ah kan chho dawn chuan Ramchhana te in lam chu ka va melh zawk a, kawngkharpui lo la inkhar țhiap ka hmuh chuan ka lungphu chu a su dup dup a. Min hmu tur in a lo kal lo mai ang tih hlauhna in ka khat bawk



Inchhung kan luh rual in tapchhak a ka nu leh pa te mei lum - ai na bul ah ka u chu a țhu ve nghal a, heta ka thawk tawh lo tur chu a uithlu ngang te pawh a niang ka nu chuan "Jo-a Matei chuan a thawh zawm tawh lo tak tak ang maw?" a han ti leh ngat a.



Nui deuh hawk hian in ka u pawn "in ui der na hi a lawmawm khawp mai, dik tak chuan chhungte hlat a hmeichhia tlatfal rei lutuk chu ngaihtuah an na zual pakhat em a, pasal te nei in kan hmuh phak ah damdawi dawr te enkawl tawh zawk se ka duh tawh a ni" ti pah a min lo melh kher chuan ka pumpui chu a inlet kual tup tup a.

Ka inrin hman hma in "pasal neih ka duh hleinem" ka ti ta tuar a, kan thawm chu hria in an nupa mut pindan ațangin u Ngaihsaka te nupa pawh an lo chhuak nghal a, ka u chuan min nuih mai leh nghal.


"Ngatinge hetiang hian min nawr luih tak tlat a" ti țiau a ka mittui lo tla ka tuai hul tawk chuan ka u chu ka lam hawiin a țhu rem a.
"Dinpuia nen inneih in tum tih i u Nathan'n a sawi vek tawh.. in tum dan ani lo em ni?" dam dap mah se khauh ru tak si hian a rawn ti ta hmiah, midang chu an ngawi țhap a.

"Dinpuia neih ai chuan lentar pawh ka thlang" ka ti ve kha kha a, ka u chu a ner sawk mai. "Dinpuia kher hi chu ka nei dawn lo, Zoramchhana nen kan inkar ... " ka tih lai mek in "hmeichhe kawlo tak ang mai a zanlai ah i tlan chhuahna chhan kha he Ramchhana vang hi a nih leh lek phei chuan i nei dawn lo tih inhre tawp rawh" ka u chuan a rawn ti hmiah a nih chu!


Rilruna bawk si leh thinrim lutuk a ka chhang let tur chu u Dtei'n ka ban ah a rawn kai a. "Duhtawk rih rawh u, kan inzawng inleng an lo chuangkai thut thut a, mi dangin mak min ti lutuk ang e" a lo ti a, țhutthleng sei lam ah min kai thla a,


"Ka sawi kha hrereng rawh" ka u bawk in a rawn tih zui nghut nghut, "han in en la, kha thingtlang tlangval nen a inkawp kha i zak zawk lo em ni?" a lo tih leh zel chuan u Ngaihsaka chu ka hmaizah hluah hluah, a țhianpa ber hetiang a ka u in a duh loh zia a lan tir chiam hian a tha natpui ngawt ang.



Hnial let ka tum ut ut a, mah se Lalati chu an inkhualtelemna a hman tur puan lak belh turin a lo tlan lut a, kan ngawi ta țhap mai.

Chutia kan țhut ngawih țhiap lai chuan ka u phone chu a lo ri thut a. Thinrim inbeng daih tum zet hian "Kan chhang lawk ang e... " a ti a, tho chhuak in kawmchar lamah a kal chhuah rual chuan ka mittui a lo tla leh ringawt tawh.


Nu Țhapui'n "Mate, i u thu ang chuan zu haw leh phawt mai rawh" a lo tih chuan ka lungchhiat a lo zual nghal sauh a, ka puan sin chuan nghet deuh in ka kâ ka hup bet a. Kan thisen zawmpui dik tak an ni miau silo a, kan unau inkar a lo inrawlh ve chiam chu an tan lah thil mawi ani bawk si lo.


Ka u lo lut leh chuan "Ka motor an siam zo tawh a nih hmel, chaw ei hma in ka va en fel lawk ang chu?" a lo ti leh a, ka nu leh pa te pawn motor te va inlam fel se, chaw ei ah kan lo ngah tur thu an sawi ve thuai a



Ka u in a kal chhuah hma a warning na mitmeng zet a min melh run chu midang ho pawh chuan an hriathiam ve tho ka ring.


"Haw tur in i rilru kha lo siam fel ringawt rawh, chaw ei khamah kan chhuak nghal dawn" ti nghutin in aţang chuan a chhuak nghal nulh.


Ka u chhuah rual chuan beisei nei zet in ka pa te chhungkua chu ka melh kual ngial a, tih vak ngaihna an hrebik lo tih an mitmeng ngui zet ah chuan a chhiar theih reng mai.

"Ramchhana vang hi em ni ang le?" u Dtei chuan a ti chhuak halh a.

"A nih pawh ani ta ve ang, Mambawihi te chhungkua lah Aizawl ah pawh a langsar ber pawl an ni a, an rilru ah vawi khatmah an fanu leh thingtlang lam mi inkawp turin an dah chhin ngai dawn lo a, pawm thiam pawh a awlailo viau ang" ka pa Khawla'n a lo ti dap dap a.

Chungthu te hlei hlei chuan ka hnuk a ti no, " ka haw duh lo tak zet" ti țiau a u Dtei awm ah ka bei chuan min khawngaih fe in ka sam ah a lo chul a.

" hetiang leh lutuk in i chhungte lam an khirh hi ka lo ring chhin lo a sin" a tih sep chuan min vengthawng zet in u Ngaihsaka'n a lo khap thuai mai.



A thusawi kha a diklohna pakhatmah ka hre lo. Keipawh hian hetiang leh lutuk a mi dangte dinhmun a teh ching chhungkua ah ka piang chhuak hi mak ka ti tak zet.

"Ramchhana nen han inbia ula, in tlan duh a nih pawn i thawmhnaw țhenkhat ka khung khawm sak vek tawh che" ka beng bul ah midang hriat loh tur a a lo tih sar sar chuan ka en chho kawk a, "Insuk țhenkhat hawn thlak loh i nei nual a lawm, kan Fû huan ah emaw, khaw țhenawm chul ram ah emaw tlan dun daih rawh u" a ti leh sa sa a. Ka lungphu chu a inthum rawn nghal dup dup.

"Intlan dun ngawt te a nih loh chuan i u kha a hnungtawlh duh in ka ring lo, zep loh ah chuan thingtlang tlangval hna nei bawk silo chu a ngaihsan hmel loh em mai" a ti a, "Ramchhana hi ka khawngaih, ka u in a duh loh zia inhre ve ta se..." ti țîau a u Dteii ka en chuan a darah min kuah bet leh ringawt a.

"Keipawn chu chu ka hlau ber a ni, aaa,, inchhungkaw dinhmun a inthlau lutuk hi inbuai phah hle dawn a ang tlat" a ti fan raih a, Zoramchhana kiang ah ka awm chang a ka rilru in hahdamna a hmuhte, mipain a hmeichhe hnen ah thlamuanna leh ngaihngamna a tawn tir theih chin a a sang ber zel min tawn tir țhinna te hi kei chuan sum a lei zawh rual a niin ka hre ve lo.

Kan chhungkaw dinhmun avangin ka chhungte lam an buai ani mahna le, ka thlan tur kawng erawh ka hrechiang ve viau in ka hria.


"Țhianpa" u Ngaihsaka tih supna ri avang chuan rang zet a țhu ngil in kawngkharpui lam ka en nghal dawrh.

Mutmu a hmu țha bik miah lo tih hriat lutuk a Zoramchhana lo pen lut mek ka hmu chiah chu insum hman leklo in ka ţap chhuak ta hawk a.


A lam pan a ka tlan chho rawk rawk chu nghet lutuk in min lo kuah bet chawt a.
" nizan khan khatiang teh tawp a chet kha ka tum bik lo a nia aw" ka ti a, hrilhhai hmel zet a min en lai a ka luh bo san kha buaina chinfel dan țha ber nimahse a lakah ka inthiam thei thlawt lo.


"Ka hria a lawm" a lo ti zawi ruih, a aw thum dut a min hriatthiamna nasa lutuk lo ri chhuak tel ve mawlh mai chu, a hmeichhia nih a hahdam thlak hluah hluah.


"Zoramchhan, ka haw duh lo, ka haw loh nan eng amaw tal tirawh aw?" pangchang deuh a tiin a nghawng ah chuan ka ban pahnih ka suih bet nghal tlat a.


A hmel hmu thei lo mahilang a taksa lianpui țang nghal țeuh leh a kâ ațang a thaw chhuak hul chu hre thei in nghet leh zual in ka kuah bet sauh sauh a.


"Hawh teh, tuk-țhuan ei hma in pi Roi damlo kha i va kan ang hmiang" ti a nu Țhapuii'n ka pa a sawm tak ah chuan Zoramchhana pawh in kan awm dan chu thil mawi a nilo tih hria in a nghawng a ka kuah beh tlat chu a lo pawt phelh a.

"Țhianpa?" ti sup a u Ngaihsaka a melh chuan u Ngaihsaka pawh a lo bu nghut.


Ramchhana chuan u Ngaihsaka te nupa mut pindan lam ah bawk min kai phei a, tlan dun rawt ta pawh nise ka hnial lo chiang ngawt ang.


Fianrial kan mamawh tih hria in u Ngaihsaka pawn "Khawnge kan thing eh sa neih pawh a zo tawh dawn a lawm, nu-i hreipui leh thir khen kha min lo lak teh" a ti a, pawn ah an nupa chuan an inzui chhuak ve ta daih a.




Pindan chhung kan luh rual chuan kawngka chu nam phui in a kalh a, min lo en leh rual chuan mittui tling pam in Zoramchhana chu ka melh chho a, min kal tir lo tur a ka duh lutuk vangin a jacket tlangah ka țham tlat bawk.


Thaw chhuak hawk pahin " țap țhin lo teh Mambawih" ti zawi sup in ka biang a lo khuap a. A kutzungpuiin ka mittui a tuai hul nghal thuak bawk.

"Ka u khan.." ka tih rual chuan ka biang a dawmna chu ti nghet sauh in ka chal ah a rawn fawp vang vang a, a awm rinchhan tlak khawp a lian leh lum thur thur ah chuan min kuah bet leh rih phawt a. Nghet tak a min kuah chung a a ngawih vung vung hnu ah " i țah chhuak hi reh phawt rawh se" a ti leh sup bawk.

" tlanbo mai ang... awww? ka duh ang che hian min duh ve tho tiraw? A nih chuan tlanbo mai ang!" ngenngawl zet in ka tita thlawt.

Tal hrang hlek in Zoramchhana rum chhuak hawk chu beisei nei lutuk in ka melh chho ngawih ngawih a, ka u thusawi kha hmaichhan ah ka hrilh tawlh ngam ngang bik silo.



" inramvah țum a kan inneih tur thu Dinpuia'n a sawi kha u Nathan'n ka u kha a lo hrilh vek tawh a, Dinpuia nei turin min duh, Tlanbo mai ang... mawh?" A khabe ruhkual ah dawm sak in ka thlem ngawih ngawih a ni tak ber chu! A mitmeng pa zet chu a buai ru ve nuaih tho.


Hmeichhia ka nihna angin ka khawsak dan chu a zahpuiawm tak zet tih ka hria. Mahse, Zoramchhana kiang ah awm thei tawh ngailo tur a ka ngaihtuah rual a ka rilru natna leh hlauhthawnna nasa lutuk te a vang hian eng nge hmeichhe tih a tana mawi a mawilo tih pawh ka thliar hrang thiam tawh lo!


" tlanbo chu i duh ang maw? Mahse, i mualpho dawn a sin" a lo ti zawi sup, ro zet a nui lui sukin a biang ka dawmna kut chu a lo hum hnan a, a hmer nghet hle bawk.


"Pawi ka tihleinem, tun ah kan tlanbo lo a nih chuan..." ka sawi zawm leh dawn a, ka hrawk chhungna lutuk avang chuan ka sawi duh pawh sawi hlei thei lovin ka dang a awk vek.

".. kan awm dun thei tawh dawn lo a sin, kan pahnih a awm dun i duh ve miah lo a mi? Mawh? Ka u hian min hruaithla a nih chuan.... i bul ah ka awm thei tawh ngai dawn lo, chuthil chu ka duhlo, i bulah lo ka awm duh hleinem.." chiaia lutuk a țap chung a ka țawnglai chu thinlung tawt hmel zet hian min lo melh let tlawk tlawk bawk.


"Min tlanbo pui mai rawh Zoramchhan" ti țiau in a awm chu ka chal in ka nawr a, thawk la hrawk in nghet lutuk in min kuah bet nghal hmiah bawk.

"Min ring em?" a lo tih rual chuan rang lutuk in ka dak chhuak a.
Ka khabe ah lo dawm in a awm a ka bei reng chu ngunthluk lutuk in min melh chhuk run a, a mitmeng dum tak zet ah chuan melh let ve kal in " ka ring che a lawm... " ka ti a.

Link:
BBcode:
HTML:
Hide post links
Show post links

Local Advertisement

MOBILE SIAM ZIR DUH TAN!!!

Tech-Inn Mobile Repairing Traning Centre, Bazar bungkawn

Kum tin mi za chuang eizawnna kan siamsak a, Eizawnna tlaka thiam turin kan zirtir thin

Mizorama mobile siam zirna hmasa ber changtlung ber kan ni. Hrechiang duh tan Contact : 9612099411 / 9862016122


Abbra Reo Ririni
Posts: 1237
Joined: November 10th, 2016, 8:57 pm

Unread post by Abbra Reo Ririni » August 24th, 2021, 11:29 pm

A lo sawi leh tur chu nghakhlel tak in ka melh kal a, a kutzungpui in ka hmui chu a lo tuai rauh rauh a, min tawhna dam dup ang lo takin a mitmeng thim ruih chu ngunthluk tak a ngaihtuahna hmang tih hriat takin a muk ruih thung. UDtei te khum chungah lah ka thuamhnaw a lo siam peih diam tawh niawm tak chu bag dum ah a awm ran bawk a. Min hruai a duh chuan ka zui nghal ang.


A lo țawng chhuah tak mai lo avang chuan a awm lum vung vungah chuan beiin mit ka chhing a, a lungphu dup dup ri chuan ka thisen zungzam thlengin a fan, ramhnuaiah kan pahnih a tlanbo tur ang a ka suangtuah zawng ngawt pawn hlauh a hnehin ka cho sar leh ta nghal a.


Chu ramngawpilril leh reh tak ah chuan kan pahnih chiah in kan khawsa ang a, ka thinlungin a zawm tawh mipa hi tumah rengin ka tan ațha tawk zo lo tiin min selsak thei tawh bawk lo ang.


"Mambawih" zawi sup a Zoramchhana'n a lo tih chuan meng chhuak in rilru hmanhmaw ru zet hian ka en a, ka u lo let leh hma ngei a kan chhuah fel a țul tih ka hrethiam ve miau a.

"i u hi zui haw ang che aw, tihluihna a hman ngailo in thuawi takin awm la" dam dap hian a ti a, ka phu dawrh lo chauh!


"Maw?" ka ti chhuak thei hram, Zoramchhana mitmeng dam thlup mai chu melh let ngawt ngawt in ka tawlh hnung nghal hrat bawk.

"Ka u ka zui ang maw? Ka zui thla a nih chuan ka lo let thei tawh ngai dawn lo ka tih tawh kha, chu chu i thlen tir ang maw?" ka aw chu a khur titih, min kal tir a remti awlsam lutuk chuan ka rilru a tina ngut ngut bawk.


"Ka lo beisei nen a van inang lo ve" ti țiau a ka nui lui hak chu min kuah beh a tum leh ngial pawn nasa lutuk in ka sual let a. A tawp min thlenpui a lo duh ngai miah lo a nih dawn hi! tih ngaihtuahna te chuan min rawn zim tup tup in ka thinlung chu a na kher mai!


"Mambawih, min ngaithla hmasa phawt teh" tia ka ban rek ah ve ve chelh a min thin nawk chuan rilru na tak chung hian ka melh chho a.

"Min hmangaih ve lo" thana zet a ka tih khum chuan chal ti chuar in lu a lo thing nghut nghut. Kan awm dun theih dawn loh avang a ka nat em em laiin ani hmel erawh a pangngai reng a, chungte hlei hlei chuan min tina zual tîng mai.

"A nih te chuan ngatinge min kal tir i tum? Ka venghim ang che i tih tawh kha..." țap ţiau chungin a awm ah ka nam a, ani erawh a lo thaw chhuak hawk thung.



" tlanbo pui tur che a min ringngam a nih chuan i chhungte rawn be turin min ringngam rawh" nghet zet a a tih chuan "Maw?" ka ti hû mai! Ka u zui haw tur a min hrilh laiai fê khan a thu lo sawi chuan min țhawng zawk.


"Rukbo mai mai tur a tan chuan ka lasi nula hi ka hmangaih mah mah tlat che, zahawm takin i pa remtihna thlap nen ka nupui ah ka siam dawn che" pa zet hian min nuih a, ka kut chu hum in uNgaihsaka te khum lam ah chuan min kai phei a.



Ka ngawi reng nangin ka ngaihtuahna erawh a vak thui ngang thung, ka chhungte a rawn bia ang maw? A ngaih ang ngawt a awlsam a ni dawn in ka hre ve thei tlat lo.


Khum tlangah a țhut thlak rual in a malchungah min pawt țhu ve a, nghet zet in a awm ah min kuah bet leh hlu hlu a. Ka u in amah leh lek phei chu ka neih loh tur zia a sawi kha ka hrilh dawt mai dawn em ni?



Kei leh ka chhungte avang a insitna thinlung a put ka phal hauh silo, Zoramchhan, ka rilru i va tibuai ve mawle.


Thaw chhuak lum ham ham a ka bekah a lo fawh vang vang rual erawh in ka inthlahdul ve ta a, Ramchhana hi ka rinngam tur a ni, kei angin a kum a naupangchhia ve tawh lo a, ngaihtuahna pawh a hmang uluk thiam zawk dawn. Hetitak a a zunah ka uainachhan pawh hi a mize nghet churh leh nghing ve mai mai ngailo vang ani lawm ni? Remruatna a nei a nih chuan chu chu kei a ngaihtuah thlen theih chian aiin a zawh tlak zawk ang chu.


"Inruk chu kawng dang a awm nganglo ni a a lan hun ah chiah ni rawh se" awki dam thlup hian a lo ti ta a, a kutphah hrawl zet in ka kut chu a lo hum in a hmer vang vang bawk.

"Thuawi takin i u i zui thla rih phawt ang a, motor remchang a awm vel ah ka lo chhuk thla ve nghal ang a i chhungte ka rawn bia ang" a ti leh dap dap a.

"Aizawl ah i lo chhuk ve ang maw?" ti a ka en chhoh chuan dimte in ka hmui ah a lo fawp a, ka thisen zungzam thlengin a fan kual raih raih mai. A inlakhran dawn chuan keimah zawk in ka fawp let ve ngat a, Zoramchhana chuan kiai suk pahin ka biang a lo khuap a, ril lutuk in min fawp let ta ngawr ngawr a.

Kan lungphu inthum rawn dup dup a kan thisen a lum vek hma chuan a tawp lo, rei ngial hnu ah erawh a rum hawk a, a inlahrang chu a thawklak a rangin a lungphu pawh a che dawt dawt hial a.

Mitmeng de sawt sawt a min en in ka sam chu ka bek ah min zeh sak a, a kutzungpui in ka biang a lo nul hauh hauh bawk, "Ka lo chhuk ang, ka rawn lan hma chu i chhungte thusawi apiang lo zawm la, i lakah tihluihna an hman ngai turin awm lo la, keimah vang a an zilh che a nih pawn i thinlung ah ka thutiam che hi vawng tlat chungin i lo intichak zawk dawn a nia, i hnial let a nih chuan țawngkam vin te an hman khum ngei ang che chuthil chu a thlen ka rem ti lo" a tih chuan chhungril thlengin min fan rawih rawih, amah ka rin tluk zet in keimah avang a paltlang tur kô tham zet a nei chu ka lainat.


"Lo kal har suh aw" ti țiau in a khabe ah ka chal a ka nawr chuan a khabe ruhkual chu tiche deuh in ka chhalah a rawn fawp vang vang a. "I lo kal har chuan ka ngai dawn che a sin" pangchang zet a ka ti leh sep chuan a nui nghing ta dawt.

"Ka reilo tur ah ngai ang, chhungkua kan inrawn khawm ang a, ka lo tla thla ve nghal ani mai" ka hnung ah chul hauh hauh pah a a tih chuan țhu ngil in a hmai bul chet ah ka melh a.

Zoramchhana erawh a lo kiai suk thung a. "Nupui ka nei duh a nih chuan chhungkua kan inrawn khawm hmasa ve phawt tur ani dawn lawmni?" mit min siai zauh a, ka biang sa hat hat avang chuan lai zet in a awm ah ka bei nghal daih, nui huk huk in a ban pahnih chuan min kuah bet a.

"Kan chhuak tawh dawn mi?" Min ngaichang zet hian a lo ti sup.
"Aih" ti vak pahin a zak hnuai ah ka zen lut a, a taksa lian zet chu nghet deuh in ka kuah ve ngial a, chu chu a lawm hle a nih hmel Zoramchhana chu a nui suk suk a.


"Vawiin ah kan chhuk ang a, naktuk ah i lo chhuk ve hman ang em?" ngenngawl deuh in a awm ah hmai phum pahin ka ti a, a lungphu ri chu hriat hmaih palh hlau in ka ngaithla uluk hle bawk.

"Hman in ka ring lo, Mawmbawih, neih che ka duh, chutihrual erawh in inpuahchah ve deuh ka ngai dawn thung, i pa bul ah 'Sial leh Bawng pawh kan inneih ni a khawn thluk tur ka thlung lawk tawh' tia min hnial thei miah lo tur a a ka siam theih nan hun reilote chu ka mamawh ang" a ti sup sup a, a sawi tawp lam ah erawh fiamthu a zep tel tih hriat zet in a nui tel suk.


Kan innei dawn!

Zoramchhana nen innei tur ang a ka in ngaihtuah chhinna ringawt pawh chuan lungphu a ti rang zawih zawih thei.

"I thlen thlak hun ah pawh ka thusawi hi theihnghil suh ang che. Mambawih, ka ngaihtuah na in a umzui reng dawn che a, ngaihtuahawm lutuk in kawsa lo ang che aw" a lo tih chuan a awm ațang inla hrang hlek in ka en a.

"Ka sawi awmzia chu, i chhungte hnial let in nangmah leh nangmah i intihhreawm ka hlau a ni, chutiang thil chu lo thlentir miah suh ang che, ka hmuh phak loh ah i mittui a tlak ka rem ti hlek lo a nia" tiin mit ti zim sûnin ka mitah tak min en a. Amah vang a ka chhungte'n min hauh a remtilo bur tih a hmel ah chuan a lang reng, min chhan a pe na lutuk chuan min ti hlim veng veng.



"Yes Sir" ka tih khauh chuan nui suk in kan bul khum chung a bag lam ah chuan mit a kan uk a. Lei chhuah zeuh pah a 'intlan duh tak in a ti a, u Dteii'n ka thuamhnaw a lo siam lawk a nih hi' ka tih chuan nui ruh ruh in bag chu a ban a.


"I UDtei hi zawng nang ai ai hian a la â mai a" a tih hluk chuan ka lo nui ve tho.

"Tlanbo te kha ama rawt chhuah ani em?" tiin bag ațang a kut la let vut in min en a, a nuihza insum hmel pa lutuk chuan min ti lai lek lek zel!

"Ka sawi duh bawk lo e a" ka lo ti hlur, nichin te kha chuan țap chungin tlanbo pui ah ka sawm anih kha, tun ah tak hi chuan min ti zak phah dawn der a lawm.


"I u lo let hma a kan chhuah fel lo chuan?" a ti ta sup a, ka nui tawp riai riai chu rum nghut in duhthawh lutuk hian min fawp ta thut a, ka pa remtihna kan hmuh hma lo chu a tawpna tur ani rih tih kan hrechiang dun bawk nen kan duhthawh dun kher mai.

Min fawhna thlah miah loin a malchung a ka țhu reng chu min thawhpui deuh nawlh in khum ah chuan min bawh bet a, ka kut pahnih man kawp a ka lu chung ah a nam beh rual chuan a kut chu ka kawr chhung ah zen lutin ka dul nem lai chu a chul dun dun a, ka kawchhung za țim chuai avang chuan ka lum nghal pup pup.


Zoramchhana chuan min fawhna chu a tawp a, boruak kham lo lutuk a awm bawr che awk awk khawp a ka thawk la chu hmuhnawm tih hmel zet in min lo en chhuk vung vung mai.


Ka kawr chhung a a kutphah chu chet nawn leh ngat in ka hnute bu hnuai thleng a chul chho a, ka chhungril khur nasa lutuk vangin ka thaw hlawp hlawp tawh, kan mitah tak thunei zet a min en ngur chungin min khawih kual zel a, a kutphah lum leh thap deuh hruih in a thlenna chin apiang chu a sa pup pup zel.


Muang ruih in min bawh bet zual sauh a, a hmui a ka biang lo nul thuak in ka beng bul ah chuan "ka nupui tur a ka lo dil hun ah che min lo hnar hlek suh ang che" lo ti sup in ka beng hnuai chu a fawp nghal tawk, ka nui hak nangin a chet phung zei lutuk avang khan ka thawk erawh a la pangngai lo.


A inbengkang a, khum a ka la mu reng chu min en run pahin a jacket a hlip a, kawrlum nghawng bial a hak lai chu a hlip leh sawt sawt a, ngawi reng a min lo thawlh chuan dan nachang pawh ka hrelo, min tung tho nawlh in a nghawng ațang ka sam chu a la chhuak a.


"Chhuak tawh ang le" tiin a jacket chu a inthawlh leh mawlh mawlh a, ka u a hlauh vang nilo in amah vang a ka u in keimah min hau a, min thunun tur a duh loh vang a ni tih ka hrethiam tawh.



A kawrlum dum lian zet ka hak chu a awm ah țham in ka hnim deuh vang vang a, a rim mipa zet pawh a lo la chambang a, kawngkhar chu a kalh kha a va hawng hmasa phawt a.

"Ka chhuak hmasa ang aw" tia min ngaihtuah hmel zet a min en chuan ka lungphu a che zawih zawih.


Ka rilru chu hrethiam tak in a lo let phei leh a. Khum tlang a ka țhu chu lo kunhniam in ka chal ah a lo fawp leh vang vang a,

"Ka thu chah che kha hrereng la, ka hmuh phak loh ah awm mahla ka hmangaihna erawh in a umzui reng dawn che, min ngaih vangin țap lo ang che i mittui hruhul turin i kiang ah ka awm dawn rih silo a.."


U Dteii mut pindan tukverk ațang chuan in kawmthlang kawngpui ah an in pan a Zoramchhana kal phei chu ka thlir zui reng a, amah a inrintawkna nasa lutuk awm kha ka ngaisan thar phah in a hmangaih ka ni thei chu vannei ka intithar tak zet bawk.


"I țha em?" hnunglam ațang ka dar ah lo khawih pahin uDtei chuan a lo ti sap, Ramchhana pawh chu an veranda ah a lawn chho mek a. "Umm" zawite a ka tih tak ah chuan ka darah lo beng dat in khum lam chu a pan phei a.

"Intlan dun dawn tak siloh ah chuan..." a tih fan raih tak chuan a lam chu ka hawi thuai a, a lo nui tet tet zui a.


" 'Inruk chu kawng dang a awm nganglo ni a a lan hun ah chiah ni rawh se' a ti a" ka tilai te chuan chiang takin ka mitthla ah Ramchhana hmel pa zet chu a lo lang a, a mize nghet leh zahawm lutuk kha a ropui ka ti ngawt mai.


"A tih ka ring sa reng a" uDtei chuan a lo ti ta mai a.
"Eng a? Inruk a duh dawn lo tih hresa vek in min sawi hmuh a maw?" ka ti hlur a, a la nui pawt pawt zui leh nghal a... Khai leh! Henu hian min bawl kual mai mai a lo ni maw?


"I va â tak em aw, ka zak lutuk" tichiam pah a ka chum tak dawt dawt ah chuan a nui ta uar uar a, ka ngei bawk si, ngei thei ka ni bik chiah bawk silo nen ka melh kha kha reng a.

"Khatia ka tih mai loh chuan i rilru kha a buai em a lawm, Ramchhana lah in amah vang a hauh i tuar a hlau em em bawk a, mahni pawh inngaihtuah lo in in inngaituah tawn dun chiam chiam a, rilru lak pen in mamawh a lawm" a ti sam then a, han hnial let vak ngaihna pawh ka hre lo.


Tukțhuan eikham rual in Dinpuia pawh a lo chhuk thla a, ka u nen ding dun a an inbe lai te chu ten zet hian ka melh rawm rawm a, ka haw thla tur chu nuam a tih hmel in a phur hmel sur sur viau leh nghal,

Motor ah kan inhlang lut a, SUV khalh in kan driver a tlan chhuak hmasa a, ni chu tlangsang tawh viau mah se boruak chu a vawt in Ramchhana kawrlum chung ah Denim jacket ka hak thuah a, ka țhut luhna tur a Dinpuia'n ka u motor kawngkhar min pawh hawn sak lai chuan "i ngaih ti țha vak duh suh, engkim ka chhungte ka hrilh vek dawn" ka lo ti hmiah.



Ka ban rek ah a lo man dat a, mahse khik khum sawng in a kut chu pawt phelh in ka țhu lut a, a lo thlen thlak tirh a a hmel phur sur kha a bo nghal vek tih ka hriat chuan ka lawm veng veng.



Aizawl ka thlen thlak zan chuan engthil mah a thleng lo a, a tuk zan ațang erawh kan chhungkaw boruak chu a rit hluah hluah. Ka nu leh pa te mut pindan ah kan chhungkaw bik chu kan awm hrang a, Dinpuia nen inneih chungchang an sawi lai chuan Zoramchhana thu min chah angin ka awm thei ta thlawt lo.

Ka nu'n "Dinpuia te lam ațang Palai hmel kan hmuh hmel a, hnialna tur a awm dawn em ni tiraw Mambawih?" a ti a, an zavai mit chu keimah ah a fu deuh țhup.


"Dinpuia hi ka nei dawn lo" tia ka chhungte ka melh kual dan dan chuan u Jonathan-a chu a lo ner sawk a.

"Ka hrilh chian tawh che kha, I thingtlang tlangval kha theihnghilh rang rawh" a lo ti chang ve rap bawk. Mahse, ka ngawi duh ta bik lo. "Kei lo hmeichhe dang biak a ngah lutuk, kan inzuilai reng pawn phone dang te nei ru in nuthlawi a be reng a, khatiang mipa kha pasal a tan neih ka tum lo bur" ka ti let leh ngat a.

"I chiang a maw?" U Nathan'n a lo ti ve khauh.

"In school kalpui țhin Ahmangaihi nen pawh khan khua ah sawi hat khawp in boruak an nei, ka sawi ngailo mai mai zawk a lawm" uar zet hian ka ti hmawk hmawk a, "ka chhoh zan a Dinpuia'n a ko chhuah che khan eng chungchang nge insawi chu ka hrelo, Mahse, kha zan khan a room chhung ah ngei phone dang ka hmu chhuak a, nuthlawi leh thlawi lo deuh te nen an in chats na tuitang lo zet zet ka man chhuah tak avang a kan inkar engkim chhuchat ka ni bawk" ka ti a.


"Palai an lo tir a nih pawn kei chuan neih ka tum lo" ti a ka tho chhuak chu "țhu rawh" u Jo-a'n a lo ti nghut a.

"Dinpuia nen in innei emaw innei lo pawh ni ula i ngaihzawng pa thar kha chu i nei dawn chuang lo" a lo tih leh chuan nghet deuh in ka inhum ruh a.

"Engvang chuan? A retheih vangin maw?" ka tih lai mek in u Mami chuan min lo khap in ngawi tawh turin ka ban bul ah a lo pawt salh salh a,

"I sawi dik, khatiang thingtlang ram hnathawk nen a lo inngaihzawn ngawt pawh kha i zak miah lo ami?" ka u in a lo ti leh zet chu ka sa tak zet, ka venthawn ber țhin Ramchhana a awm hnai lo bawk nen Zoramchhana min hmuhsit sak lutuk hi tuar mai mai ka tum tawh biklo.


"Mihring ve tho a ni a, eng vang chuan nge ka zah bik ngawt ang, a damkhawchhuah nan nitin ram hna a thawk a, chutah chuan tihsual a nei em ni" ka ti chiah chu a țhutna ațangin u Jonathan-a chu a lo ding chhuak hluai a.

"Mama, insum rawh" u Mami zawk in a lo ti deuh tuar a, u Nathan-a pawn ka u darah chuan kuah in a pawt hnung a,
"i va han zakthei lo mai mai e aw, khang kha mahni u te chhan let dan tur ani em? Kha Rammi khan engtiang tak in nge i thluak a lo suk sak che hi i hria em?" a rawn ti khu khu a, ka pa pawn ban chuar in "duhtawk rawh u, nu leh pa te awm lai reng a khatiang a chet kha zak rawh u" a lo ti ve hluk bawk.


Ka u thinurna ngaipawimawh lo zet in ka pa chu ka en a, "Pa, engtik ni ah emaw... a rei tawh lo ang, chutah chuan nangmah hmu turin Ramchhana a lo kal dawn a, Doctor i ni a, nang chuan mihring nun hlut zia i hrethiam tiraw? A lo kal hun ah chuan hmusit deuh in lo dawngsawng ve suh aw, ka pa i nih kha, mihring nun hlut tu" tiin tawite hian ka nuih a.


"I va han zahpui awm e aw, kan in ah hian rawn tihtur pakhatmah a neilo" ka u vek chuan a lo ti nghut.

"A nei, a nupui a tan min dil tur in ka pa a rawn be dawn" ka tih chuan ngeiawm lutuk in ka u chu a lo nui vel hawk a nih chu!


"Nurse ațangin kut hnathawktu nupui ah maw i țan dawn a, i dinhmun duh zawng te chu a va han hniam sawt ta em em ve... i unau dangte hnen ah reu reu i sawi ang e, inngaihtuahna a inthlau vai vai em mai, an nuihzat viau ang che" min elsen zet a u Jo-a'n a lo tihna pawh chu ngaiven lo in room ațang chuan ka chhuak nalh nalh.

U Mami chuan rang zet in min lo umzui a, ka ban bulah lo man pahin "mate, Ramchhana chu i u Latei laizawnu bialpa hlui kha tiraw?" a tih chuan ka melh deuh renrawn phawt a, "Police ni țhin kha.." a tih leh tak zel ah chuan ka bu ta nghat.

Mahse a thu lo sawi leh chuan min țhawng kher mai.

"Kan chhungkaw thuruk ni rawhse, Jo-a hi rangkachak tawlhrukna ah a inhnamhnawih ve țhin a, i la naupang a, i hrechiang ve lo ang, a lehkhazir laiin a ni a, khang hun laia an rangkachak kha Ramchhana hian a man sak vek a lawm" a lo ti ta mai a!



"Eng maw?" Mak ti zet hian ka ti deuh tuar, uMami lak ațang mit la sawn in ka nu leh pa te mut pindan lam chu ka va melh a, chutah u Mami ka en leh chuan ani pawn min lo la en ve ran a, uang hmel a pu lo va, a thusawi in min țhawn em avang a ka nghil dup chu tawite in min nuih a.


"Ka hrilh chiang ang che" ti sep in ka ban bul ah a lo man a, ka mut pindan lam ah min kai phei nghal bawk.



A thusawi kha rin tur ani em tih pawh ka thliar hrang thiam lo, engvang ngawt chuan nge sawrkar phal loh zawngin u Jo-a hi a sumdawn ngawt ang, rethei bakberh in kan awm ngailo a, a inzir chhuah hnu ah lah MCS ah inziak tlingin tun ah hian Secretary, P& S hna a chelh mek bawk a, engtin tehlul nge Zoramchhana rangkachak man neitu kha a nih theih ang?



Rilru insual kual nasa lutuk a ka ngawi ngut ngut chu " țhu la, tui hi in phawt teh" u Mami'n a lo ti a, ka khum tlang ah min țhut tir a, tui bottle chhin inhawng sa min pek chu lo ban in ka lem nghal khawlh khawlh a.

"U Jonathan-a hi Rangkachak hmangin a sumdawng țhin a maw?" hamhaih deuhin ka u chu ka en a.

" ngatinge engmah ka hriat ve loh, lehkha a zirlai lah in sum a tlachham ngai silo a" ka ti nghal mawlh mawlh bawk, thudiklo nise ka ti takzet a ni, thudik a lo nih vaih zawngin ka u leh Zoramchhana inkar hi ka rinthiam phak bak aia nasa in a chhe zawk daih dawn tlat.


"U?" dawhtheihna tlachham zet a ka tih deuh tâwk chuan ka bulah lo țhu in ka malh chung a ka kut chu a lo hum a, thawk a la deuh vang vang bawk.


"Ka pa a inhnamhnawih ve em?" hlauhthawnna avang a thinphu dep dep hian ka ti a.
"a teuh lo" ti hluai in lu a thing nak.

"A nih leh sawrkar dan kalh in u Jo-a a sumdawng țhin tih an hriatpui em?" ka titim leh dai, ka nu leh pa te hian eizawnna thianghlim lo ber kher hi chu an ngaithei in ka ring silo a, mahse u Jo-a a inhnamhnawih a nih chuan an tel veloh pawn an hriatpui tal chu ka ring.


"Ka nu leh pa te hian a tir ah chuan an hriatpui lo, kan chhungkua zing a mi a tu mahin kan hriatpui lo" a ti halh a. "Rangkachak man a nih thu news hrang hrang ah a darh hnu ah chiah khan a lawm keini pawn kan hriat" tipah a min lo en chuan "In hriat" ka lo ti sap.


Thaw halh in ka u chu a bu nghat nghat a, "i la naupang a, chulo reng ah Jo-a hming kha a lang ve chuang lo a, nang kha chuan i hrethiam ve ta lo zawk a" a sawi dik, khatih hunlai khan kum 17 bawr vel a upa ka ni a, rangkachak man thu leng vel kha chuan zoram a chiah hneh bawk a, ka hrechiang ve khawp mai, a kawltu te pawh an in ațang a an hruai chhuak lai te, an rangkachak dah țhatna bag dangdai zet police ho in an zai thler lai te pawh news channel ah an ti chhuak chuai chuai a, ka u hming erawh vawi khatmah a lang ve lo, hnam dang hming vek a nih kha lang.



"Ka u hming a lang silo a, engtin nge a tel ve tih inhriatchhuah a?" dilchhut deuh in ka ti leh hram.

"A talbuai a lawm, vaibelchhia... han ngaihtuah teh, vaibelhchhe tel man a lawm khami țum khan an man sak ni, police kut ah rangkachak a la awm lai khan engtin tin emaw an intham lungawi theih ringin kha case la tu police kha a tlawh fo a, inkhat a cheng tlang ta reng chu kan hriatpui lo thei ta lo a, nang erawh nurse zirtur a i inbuatsaih choh țan lai vel kha ani ta in ka hria, i la naupang a i hriat ve kher a țul kan tilo a nih kha" a ti duah a, ipik zet in kan unau chuan kan thaw dun hawk bawk.


"Eng tin nge danin a phalloh sumdawnna ah a in hnamhnawih ve theih le? A mak ka ti em mai, smuggling lam te hi chu pawisak neilo mi tawrawt tak tak te tihtur ah chiah ka lo dah țhin a sin" ka ti thlawt, thuruk kum tam tak chhung an lo vawn tawh mah nise min hnawh ûl tho.



"Jo-a mizia chu i hriatchian kha, a tumruh tluk zet in a thu a duh, kan unau zingah pawh a mizia a danglam fal nalh hi, Mumbai-ah lehkha a zirlai khan hnam dang țhian tam tak a chhar a, chung a țhiante zing ah chuan smuggler thil tithei leh hung tak tak fa te pawh an tel, țhian ni a inkawm nasa ta chu mizia te an han inhriatchian tak hnu ah chuan kawnghmang te a hre ve ta zel a, tikhan sum a tlakchham vang ni hauh lo in Gold smuggling lam ah a inrawlh chho ta a ni mai, amah tak chuan a ngial a ngan in Gold a khawih che kual velo, hlawhfa a chhawr țhin, sawrkar lam in an chhui a an man ta a nih pawn an tan aia tang tur a rawih an neih vek, tikhan Zarkawt police department khan an man sak ta si a, a hming lang in mualpho ve kher lo mah se sum tam tak a hloh miau a, i hriat kha, Jo-a hian engkawng ah pawh chaklo leh chantu nih a thiam lo, Gold smuggling lam ah inhnamhnawih tawh lo mah se a sumdawnna kal tluang lai meivap a chantir tu chu a tan chuan damchhung hmelma a ni tawh mai" a tih laiin "mahse, Gold ho kha police in CID kut ah an hlan vek kha" ka lo ti thuai a.

Chutih rual erawh in thil hriatchhuah zawk ka nei! Mipui nawlhpui in an Gold man police ten CID kut ah an hlan tih an hriat ve miah loh laiin khami zan khan u Latei pawn CID kut ah Gold kha hlan ani tih a sawi tawh tak! U Jo-a inhnmahnawih ve chu rin duh lo viau mahila khatih lai khan u Lateii leh uNathana nen an innei tawh tlat a, engkim a lo hre ve vek tawh tihna.



"Nichiah e" ka u'n a tih chuan "a nih leh ngatinge ka u hian Zoramchhana a huat em em a, duh leh CID te kha hua se" ka ti nghal chiam a. Tawite a u Mami nui chu a sawi leh tur ka hrethiam nghal ruak lawi!


"Case la tu Jo-a'n a dawr fo țhin kha SI Zoramchhana a ni miau a lawm, ani khan a lo pe chhuak duh bik silo a..." a nui tawi tak tak viau.

"Mahse, Zoramchhana thiam lohna a awm hleinem, dan kalh in ka u a che a, Zoramchhana chuan police a nihna angin hma a la ani mai lawm..." Zoramchhana thlavang hauh zet chuan ka ti let hlur. Thil sual titu zawk in hetitak mai a Zoramchhana a haw zawk tlat hi a dik ka ti ve thei tlat lo.



"Chu chu Jo-a'n a ngaipawimawh ve tawh hleinem" dar kan âk a a tih chuan amah chu ka ngei lek lek zawk hial mai.

Link:
BBcode:
HTML:
Hide post links
Show post links

ADVERTISEMENT (A hnuai a milem hi a nia hmeh zeuh tur chu)