Retyped : Ruata Ralte
BUNG 3
APPIA KAWNG
Code: Select all
Appia kawng lama mi ropui muhil tawhte vap chu an thlan, lungrun taka cheite chuan a veng e.He kawng hmingthang takah hian a sir tuakah thlan lungphun ropui deuh deuh mai a tlar zui mai a. Chung lungphunte chu an chhungte’n fimkhur tak leh uluk taka an enkawlte an ni hlawm a. Kawngpui sir hla deuh hlekah hian khawpui chhung ang maia bitin In a awm tuar mai a, chen lohna ram hmun awl chu hla zet a ni mai. A tawpah chuan kawngkapui (Gate) atanga mel hnih laia hlaa in sang bial lian pui awmna chu a va thleng ta a. Lung chang chher hrawl zet zet mai rema sak a ni a, mawi takin an chei a. A sak vel danah chuan, inrawk leh inrun chin hun lai pawhin a him tawk tura an sak a ni tih a lang hle a ni.
Marcellus-a chu helai hmunah hian a han chawl a, a lehhawi vang vang a. Rom khuaa mikhual tan chuan thlirna lam aplang hi thil thar leh beng lut tak an ni vek mai a. Mak zualbik tak chu, thlanlung tlar zui mai chu a ni. Hmanlaia mi ropui te, mi zahawm te leh mi huaisente an lungphunte chuan, khawvela chawimawina an hlawhte leh an thlarau nun zel dan an thlirna chiangkuang lo tak chu a tilang hle a. An sum leh pai zawng zawngte chu heng thIan lungphun atan hian an tlakral zo ni ngei tur a ni.
Marcellus-a chu Cecilia Mantella thlan lungphun bulah chuan a ding a; a piah hla deuh hlekah Calatinus leh Servilli thlan lung a ding a. A hla leh deuhvah chuan Scipios, classic ziaktu hmingthang thlan lung a ding bawk a. Chuta a awm lai chuan a rilruah Cicero a thuchang – ‘Porta Capena atanga i kal chhuah hunah, Calatinus te, Scipios-te, Servilli te leh Mantella thlante i hmu ang a, an phum taka te chu an hlim lo tih i hmu thei ang em?’ tih hi a lo lut thar leh a. Chutiang lungphun tlar chuan thui zet mai a awh a, Caius Cestius hriatrengna lungphun Pyramid sang pui mai an chhun thleng ruah mai a ni. A vai mai hian an tluka lungphun mawi leh ropui hi khawvelah hmuh tur dang a awm lo a ni.
Kil tin maiah ram chu mihring chennain a khat tlat mai a, a chhan chu hmanlai lehzualin lal ber khawpui chu a hungna a puakdarh a, chu chuan in tam tak a thlawh darh chiam mai a, chuvangin mi an awm darh hlen ta a ni. Khualzin tan phei chuan khawi laiah nge khawpui chu a intan a, kbawiah nge a tawp tih pawh hriat hleih theih a ni lo.
Ral khatah chuan khawpui chhung thawm chu a ri mur mur a, sakawrtawlailir tlan ri bawp bawp thawm te a hriat a, a dinna veil lah chu lungphun ropui tak takin a khat thup mai bawk si a. Mihringte chenna ai mahin mitthi khua, thlanmual chuan mit a la zawk a. Mahse khawvel nun nawmna, tawp leh mai thei leh chuai leh mai thin hlir a kawk a. Chatuan nun rinna lam reng a lang lo. Marcellus-a chuan chutiang te te chu a ngaihtuah neuh neuh lai chuan Cicero thuchang bawk, “An mi phumte hi an hlim lo tih i ring thei em?” tih kha a hrechhuak leh a.
“Heng Kristianho, tuna ka zawn mekte hian, kan hnam finna zawng zawnga ka zawnchhuah theih aia nasa hi anni chuan an hre vek tawhin a lan hi maw le. Thih hlauhna an hneh chauh pawh a ni lo va, lawm taka thih theih dan an zir vek tawh a nih hi. An zinga naupang ber leh chak lo berte pawh tihuaiva, tichak theitu chu eng thiltihtheihna thuruk tak chu ni ang maw? An hla thu awmziate kha erg nge maw ni dawn chu aw? Ka sakhua ve hi chuan, hlim lovin ka awm lo thei tih min beisei-tir thei chauh va, anni hi chu thihnaah pawh hlimna hla nen a hruai lut thei si a,” tiin Marcellus-a chuan a ngaihtuah neuh neuh va. Mahse, Kristiante a zawnchhuah tur chu eng angin nge a beih zel dawn?
Mipui chu an insul zut zut mai a; mahse amah han tanpui thei awm tumah a hmu lo va. A velah chuan in lian pui pui te, thlan lungphun ropui tak takte awm khup mah se, Catacomb nena han inpawhna awm thei hmun reng reng a hmu thei lo va, tihngaihna reng reng a hre ta lo.
Kawtthler lamah a chhuk a, muang zet hian a kal a, a mi tawh apiang chu ngun takin a thlir vawng vavvng zel a. Pawn lam lang theiah chuan Catacomb han kal pawh theihna tur awm reng reng a hmu thei lo. Ni lah chu a liam sawt hlein, khua a tlai mai tawh dawn si. Catacomb luhna kawngka chu tam tak a awm tih a hre reng si a, a zawng zel a, khaw thim hma a hmuhchhuah talh a tum a.
A tawp a tawpah chuan a zawn chu a hlawhtling ta. Hmuntin a fan kual hnuah, niin kawl a liam tep tawh tihah hian kawng lehlam panga mi pakhat kal, mipa naupang tein a zui lai hi a han hmu a. Chu pa chu a inchei tawp hle a, a kawr ahte chuan lei a kai luam mai a. A hmel chu lung ina rei tak khung tawh hnu ang maiin a dang duau mai a. An lam pan chuan a kal ta vat a, a kokiah a va vuan chawt a. “Lei laitu i nih hi, lo kal teh,” a ti a. Chu pa chuan a han en a, sipai officer hmel a han hmuh chuan a hlau ta hle mai a. A tal thut a, Marcellus-a’n a man zui hma chuan kawmkar chepah a tlanlut bo ta daih mai a. Mahse, Marcellus-a chuan mipa naupang chu a man lui ta a. “Nang chu ka hnenah i lo kal tur a ni,” a ti a. Mipa naupang chuan lungngai leh thlaphang hmel zet hian a en a, Marcellus-a pawh chuan a khawngaih rilru hle mai a. “Ka nu avang chauhvin zah ngai teh, min man chuan lungngaiin a thi thei hial ang,” tiin mipa naupang chuan thin phu hlawp hlawp chungin a ngen a. Marcellus-a chuan, “Ka vel dawn hleinem che. Lokal teh,” tiin mi vei lohna lai hmun fianrial deuhvah a hruai hrang ta a.
“Khai le, thudik tak min hrilh teh. Tunge I nih?” a ti a. Naupang chuan, “Ka hming chu Polio a ni,” a lo ti a.
“Khawia awm nge I nih?”
“Rom khuaah,”
"He laiah hian eng nge i tih?”
"Miin min tir a ni.”
“Nichina mi kha tu nge ni?”
"Lei laitu a nih kha.”
“Miin min tir a ni,”
“Nichina mi kha tunge ni?”
“Lei laitu anih kha,”
"Ani nen khan eng nge in tih?”
"Englo fun min kensak a ni.”
"Eng fun nge?”
‘ Ei tur thilte.”
"Tu tan nge in ken a?”
"He khaw pawn lama mi rethei tan.”
“Khawiah nge a awm a?”
“Heta tanga hla vak lovah hian.”
"A nih leh tlangval, thu dik tak min hrilh teh, Catacomb chanchin hriat i nei reng em?”
“Tlem azawng chu hria e,” naupang chuan a ti sap a.
"Chutah chuan i lut tawh reng em?”
"Hmun thenkhatah chuan lut tawh e.”
"Chuta chengte chu tu emaw tal hriat i nei em?”
“Thenkhat chu hria e, lei laitute chutah chuan an khawsa a ni,”
"Chuti chu a rual khan Catacomb-ah i kal dawn a ni maw?”
“Tun ang hunah eng nge ka va tih ang?”
"Chu chu ania hriat ka duh chu ni, chutah chuan i kal ang em?”
“Danin a khap tlat si a, engtin nge chutah chuan ka kal ngam ang?”
Marcellus-a chuan, “E, khua a tlai ta, ti rawh, sawlai temple ah sawn tlai inkhawmah min va kalpui lawk rawh,” a ti ta thut a. Naupang chuan hreh fe hian, “Ka hmanhmawh viau asin maw le,” a ti a. Marcellus-a chuan, “Ka man miau tawh si che alawm. Pathian biak hi ka thlahthlam ngai lo va, min kalpui ngei ngei tur a ni,” a ti a. Naupang chuan, “Ka kal thei lo,” a ti tlat mai a.
“Eng vangin nge i theih loh?”
“Kristian ka ni alawm,” a ti a.
“E, ka hre ta, Catacomb-ah chuan thiante i nei a, tunah pawh i kal dawn a nih hi,” a ti ta a. Mipa naupang chu a kun ngaih mai a, a rgawi ta reng a.
Marcellus-a chuan, “Tunah hian Catacomb luhna kawngkaah chuan min hruai la ka duh a ni,” a ti a. Naupang chuan, “Aw ka pu, min khawngaih la, chutiang ti tur chuan min tilui lul suh. Ka ti thei lo, ka thiante ka mantir lo vang che,” a ti a. Marcellus-a chuan, “Chutianga i tih a tul lo, lei hnuaia luhna kawngka sang tam tak zinga pakhat chauh min han kawhhmuh chu engmah a ni hleinem. Vengtute chuan mi tinreng an hre lo tih i ring lawm ni?” a tia. Naupang chu a ngawi vang vang a, a tawpah chuanh ruai chu a remti ta a.
Marcellus-a chuan a kutah a vuan a, an inzui dun ta a. Naupang chu Appia kawng dinglam pangah herin hla vak lo an han kal a. Tuma luah loh in an va thleng a. A chhungah chuan an lut a, chhuat hnuaiah chuan englo dah rukna ni awm takah hian an lut a. Kawngkhar a lo awm a, naupang chuan a kawk a, an ding dun ta a. Marcellus-a chuan, “Luh ka duh asin maw le,” a ti tlat mai a, ‘‘Nangmah chauh chuan i lut ngam dawn em ni?” naupang chuan a ti a. Marcellus-a chuan, “Kristian te chuan tual an that ngai lo an ti alawm. Chuti a nih chuan engah nge ka hlauh vang? Khai, hmanhmawh rawh,” a ti a.
‘‘Meichher ka nei hleinem,”
“Keiman ka nei alawm, ka rawn inbuatsaih sa vek asin. Kal zel teh.”
“Ka duh tawh lo,” naupang chuan a ti a.
“I hnial dawn elo?”
“Hnial dawn, ka thiante leh ka laichinte a chhungah hian an awm a, an hnena ka hruai ai che chuan, vawi za pawh thih ka huam zawk e,” naupang chuan a ti ta a.
Marcellus-a chuan, “Tlangval, i huai hle mai, thihna hi eng nge a nih i hre lo a nih hi,” a ti a. Naupang chuan, “Engah nge ka hriat loh ang? Ka thiante thi tam tak ka hmu tawh a, phumnaah pawh ka tel ve tawh thin a, Kristiante chuan thihna an hlau hleinem. Ka hruai zel lo vang che, i duh leh lung inah min khung mai rawh,” tiin letchhuah leh a han tum a. Marcellus-a chuan, “Ka hruai bo che chuan i thianten engtin nge an tih ang? Nu i la nei em?” a han ti a. Naupang chuan a lu a bu nghat a, a nu a han lam chhuah avang chuan a mittui a parawl ta teuh mai a. Marcellus-a chuan, “I nei tih ka hria e, i hmangaih hle nghe nghe anih hi. Min hruai lut la, i nu hnenah chuan i awm dawn nia” a ti a. Mahse naupang chuan, “Ka mantir dawn reng reng lo, ka thi hmasa mai nang e. I duh ang angin min ti mai rawh,” a ti a.
Marcellus-a chuan, “An chunga thil tha lo tih tum ka nih chuan, sipai hruai lova ka kal i ring reng em ni?” a ti a. Naupang chuan, “Sipai te, Praitorian-hote chuan Kristiante chu tihhlum atan lo eng atan tehlul nge an han duh tur ni?“ a ti tlat a. Marcellus a chuan, “Tlangval, an chungah thil tha lo tih ka tum reng reng lo ve, min hruai luh phawt chuan i thiante, i chhungte chungah engmah thil tha lo ka ti lovang tiin chhia ka chham e. A chhunga kan han awm hnuah phei chuan an tan belchhunga sa ang mai ka ni ang a, an duh ang angin min ti thei zawk dawn alawm,” a ti a. Naupang chuan, “Anmahni man reng reng lo turin chhia i chham duh maw?” a ti a. Marcellus-a chuan, “Chham duh e. Kaisara leh pathian thi thei lote hming chhalin chhia ka chham e,” a ti a.
“Chuti chu lo kal rawh le, meichher pawh ken a ngai lovang, fimkhur takin min han zui zel la," tiin naupang chu lei hnuai luhna kaw zim teah chuan a lut ta a.