IKAW AT AKO -53 By Ahmangaihi violette khiangte

Episode kal lai dah luhna

Moderator: writers

Ahmangaihi violette
Posts: 56
Joined: February 1st, 2020, 3:14 pm

IKAW AT AKO -53 By Ahmangaihi violette khiangte

Unread post by Ahmangaihi violette » May 22nd, 2020, 11:22 pm

CHHAPTER - 53



images - 2020-05-19T095410.722.jpeg
images - 2020-05-19T095410.722.jpeg (32.96 KiB) Viewed 4923 times




Margaret - Pov





"J...min lo ngaihven sak mai rawh aw" tiin thil thlen dan chu ka hrilh zung zung a, hlauh thawnna nasa takin ka chhungrilah min ṭham tlat avangin ka tiril a khur dar dar.






"Lo Hlauthawng suh...chanchin ka rawn hrilh leh vat ang che" J.malan a rawn tih chuan ngaihṭha lo deuh chung chuan Cabin lamah ka let a, Patea leh Nu Partei chuan maktih hmel fêin ka lût chu minlo en a.






"Nu Parte va mu leh rawh Patea hi ka lo men pui dawn nia" khum tlanga ṭhutpahin ka ti a, "Zan reiah te tinge ilo kal duh reng reng, i Patea a zual pawh a nisilo a ngaihtuah vak a ngailo a sin" puansin tur min rawn pek pahin Nu Partei chuan a ti a, kan thilsawi vel te kha a hreve lo hlauh.






Nu Partei mut leh hnu chuan Patea nen kan titi chhunzawm a, ka thil hriat ang ang ka han hrilh hnu phei chuan a tuar thiamlo kher mai.







"Dorothy chungah chutiang thil chu Ben-an a lo ti a maw, rilru na taka ka hnen a lo pan lai te khan a naupai titla tur khan ka lo ti a..." kun ngaih chunga Patea ṭap tlawk tlawk chu han hnem ngaihna vak ka hrelo.






"Nangma tih vek angin Gabriela hi a hrilh a, tunah bumin a awm tih a inhre chauh si a, a rilru na lutuk tur hi ka ngaihtuah a ni khang a chunga thil thleng ringawt pawh khan a nun a tih hrehawm tawh tehlul nen" ka sawi zawng ringawt pawhin a rilru nat dan tur chu ka feel pui ve theiin ka hria, ka tha te hi a ti zawi vek.







"Heng thil te hi keimah vang vek a ni..Doro ka van inchhir tehlul em.." kun tlawk tlawk chung chuan a rum chhuak kawk a , a tukkhum dawmin a khupah a lu chu a tauh chawrh chawrh a ; ṭah insum zet chunga a thinlung rumri chuan kei ngei pawh min ti na ve "I thiamloh vek a nilo Pate, Benedict-a zawk a ni" ka lo tih chuan a lu a thing vut vut a, a puansin tlang a hum khur ngar2 te chu hmuh a hrehawm kher mai, lehlam hawiin thawk ka la hawk a ka ipik ṭeuh.







"Pate... Benedict-a khan engvanga Dorothy chunga hetiang thil hi ti nge anih ang, a chunga khatiang a tih hnu ah phuba lak tumin nang a rawn bei leh bawk che sia" hrethiamlo zeta ka zawh chuan ṭah insum zeta hmui khur dar dar chungin a rawn hawi chhuak a "Kan chhungkaw chhiatna a duh vang chauh a ti a ni, sum itna in a mit a ti dela, Dorothy neih a tum chhan pawh kha kei min huatna vang bawk a ni" khabe sai dar dar chungin a ti a, Lalbera rindan kha a lo dik chiah a ni 'A bialnu thihna vanga phuba lak tum a nih ka ringlo' a tih kha, ka chhungte nen hian thildang vangin inhuatna an lo nei reng zawk a nih chu..!






"Ka pa hian Ben-a hi kan hnena khawsa turin a rawn hruai a, khawilam mi nge a nih pawh kan hrelo, ka pa sumdawnna ah khan a pui ṭhin a, dan phalloh thil tam tak tiin Damdawi leh Rangkachak te Burma aṭangin an tawlh ru a, chutah chuan Ben-a kha ka pa kut ke ber a ni bawk.






Kum engemaw zat kan hnena a awm hnu khan sum in sem chung changah ka pa nen khan an inhmu thiamlo a, ka pa chuan thlauhthlain kei hi a aiawh turin min dah a, sumdawnna chu keiin ka khawih zui a, ani kha a kalbo ta vang vang emaw kan tih hnuah rawn lêt lehin Dorothy pa kha a rawn bel bul a, khatih lai khan ka pa sumdawnna khan rinhlelh a kai a, Police hoin an veh reng lai a ni bawk nen Dorothy Pa leh ka pa inkar kha a ṭhalo hle a, keini pahnih inlaichinna pawn a chhiat phah a, ka chhung ten nupui nei turin min ti zui ta bawk.







Dorothy nen chuan Farm lamah kan tlandun a, chutah chuan Ben-a leh Police rawn kalin min rawn nangching a, kei chu min phuar hlawmin Ben-a leh ka bialnu pa chuan min sawisak hrep hnuah Dorothy duhlo chung chu an hruai lêt a, kha kha Dorothy nena kan inkar tawpna chu a ni.







Ka pa sawmdawnna engkim Ben-an a hrilh vek a, finfiahna chiang tak an neihloh vang chuahin an manlo, Ben-an a kawhhmuh angin ka pa sumdawnpui tam zawk chu an man a, keini erawh kha Benedict-a vang khan kan him a, a chhan pawh ka pa sum neih zat ve chu ata angah a angaih vangin leh neih lêt leh ngei a duh vangin a ni, Dorothy pa chuan a fanu ka hnaih leh a nih chuan ka pa manah min vau zui a Benedicta nen chuan inneihtir a tum zui ta bawk a, chuvang chuan a nia tuilo tak chunga Janice-i nu hi ka neih tak ni.







I pa nupui tura an biak zawk tak a nia mahse, i pa kha hmeichhe dang nen an tlan dun ta daih sia, Janice-i nu kha Police hotu sângtak fanu a lo ni vei bawk nen, kan inhumhim nan khan kan mamawh si a..." a ṭawnglai chuan a rawn khuh nghal bawrh bawrh a, ka lo vuan tur chu ka kut a rawn man chawt.







Ṭawng tuma a ang zuau ṭhin chu a khuh a reh thei mai si lo a "Pate...ṭawng tawh rihlo mai rawh i chauh phah ang" a hnungzanga zut sak pahin ka ti a, tui ka intir hnu chuan lukham ka kam kan sak ngheng chuan zawi zetin a ṭhu awn a, na deuha thawk a lak ruala a awmbawr insep kang awk awk te chu lainat zetin ka lo thlir a, engtia han tih vak ngaihna lah ka hre der lo.






Patea thilsawi te chu ka Phone-ah ka record vek a, Gabrielan ngaithla ve ngei sela ka duh, keichuan a nihna angin ka sawi chhuak leh thiam lo ang.






Mahse, hriatthiamloh pakhat ka la nei, engvangin nge Benedict khan a nupui nimai tur Dorothy chungah khan khatiang thil kha a tih le? a ngaihna ka hre hauhlo. Dorothy pa lahin a fanu nena inneihtir a tum tho bawk si a ka hrethiamlo takzet!!





Dorothy naupai vang a nithei mai angem!?






Ka ngaihtuah lai mekin "Doro-i chunga khatianga a chê kha ka hrethiam theilo a ni?" Patea chuan a lo ti chhuak ve hap.





"I fa a pai vang a ni thei a ngem?"





"Chu ringawt chu a nih ka ringlo, kan hnena a awm lai pawhin Doro-i te nen khan vawitam tak kan inkawm ho tawh a kan inkar pawh a hrechiang viau, a lo ngaizawng ve reng a ni tih ka hriat hnu pawh khan kan chesual dun tawh tih chu a hrereng a mahse, nupuia neih a tum tho" maktihna a hmelah a langa, Benedicta chêt dan chu han rin ngaihna vak a hre biklo anih hmel, keipawn hriatthiam har ka ti takzet!






He thil thlen chhan hi chu Dorothy te chhungkua nena an buaina zawk a nih ka ring ta ringawt.






Khum tlang bawh ran chung chuan ka phone chu ka melh sek renga, Gabriela awmdan khan ka ngaih a ti ṭhalo, thinrimna leh rilru natna nen a talbuai vel kha chiangtakin ka hmu a, Motor lah a khalh chak nasa mai bawk si. Khawilam nge a pan anga engthil nge a va tih ang, chu mawlh chuan ka rilru a kap a ni.






Darkar khat dawn hnuah ka phone chu a rawn eng ta zak zak a, Gabriela number aṭang ngeiin a ni. Patea chu a muthilh tawh avangin thawm dim takin Corridor ah chuan ka chhuak phei a, ka phone ka lakrual chuan thil ri bur ka hre nghal!






"Maggie.." a tih rualin "Mala..!!!" ka lo ti ve ṭhat, kha kha engthawm nge mipa thinrim inhrosa ri chu hla deuh mahse, ka hrechiang ngang mai!!






"Kan lêt chiah Hotel-ah kan awm..."





"Ka lo kal nghal..." phone dah mai ka tum chu "Ngawi teh.." a rawn tihrualin ka tawp chawt a.






"Naktukah rawn hmu zawk rawh, tunah chuan a buai rih emai, i tan hmuh a nuamlo ang" na zetin thawk ka la vak ringawt.






"Engtin nge a awm?" ka ti vat a, ka thinrim lek lekin ka hria, mahni inthunun na tla chham lutuk, thil dangah chuan a insum theilo pawh a nilo a, a thinurna erawh hi chu a thunun thei hlawllo, chu chuan min ti hlauthawng ziah bawk.







"Aa...a ṭhalo a ni tawp mai, ka jection anga a ṭha leh mai ang ngaihtuahlo la, naktukah i rawn hmu zawk dawn nia" a sawi lai mek chuan thil keh ri chhuai ri leh patling au ṭhawt ri a rawn awm a "KA RAWN KAL DAWN" ringzeta tih nghek pahin phone chu ka dah nghal hmiah.





Hotel lam pan chuan chak takin ka inkhalh chhuak a, Minute rei lo tê ah ka thleng zui a, Hotel kawta J-a lo vei vut vut ka hmuh rualin a lampanin ka tlan phei nghal hlawk hlawk.






"Naktukah hmu zawk mai rawh.." ka hmaa rawn din vut pahin a ti a.






"Ngawi rawh..." rum zeta melh pahin Hotel luhchhoh na chu ka pana, ka hnungah min rawn zui nghal thuai. Gabe room ka pan tur chu "Khalamah a awmlo" a rawn tih avang chuan ka ding leh dat a, zawhna mitmenga ka en nghal chuan "I hmuh rihlo a ṭha a sin mawle.." tih nung nung pahin min hui a, inchung chhohna lam a pan chu ka umzui nghal thuai.







Chhawng chung ber Floor kan thlen chhoh rualin thil ri rum rum ri ka hre nghal a, J-a chu ka en phawk nghal hraw mai "Mikhual hoin thawm an hriat a hlauhawm a, a inbengdaih hun nghak rih tawp mai ang" kawngkhar bul kan thlen lai chuan a ti a, room chhung lama thawm ri bur bur bawk si chuan ka thaw a ti hah hluah hlauh a, awm ngaihna pawh min ti hrelo zo.






Thawm a rawn awm rualin ka hawi nghal dawrh zel a, ka thinphu chu rang zaih zaih tak a ni "A beirei hle mai ti raw.." tih sup paha J.mala nui ṭhaw chu awihlo zetin ka en haw ringawt, engtin nge tunah hian fiamthu angah alo lak theih zawk!?







"I rilru tihah suh, a chau ṭep tawh ang" thutak zetin a rawn ti leh lawi a, melh pawh ka melh peih ṭha peih tawhlo "Ka lut dawn" tih leh kawngkhar lampan ka ruala, min rawn pawt ding lehnghal chawt.







"Maggie...tilui suh nghak rih rawh"






"Engtia rei nge nghah ngaidawn a, inchhungah sawn a duhtawkin thil a suasam a, amah a inti na em tih pawh kan hriatloh hi bakah, inthunun tum miahloa hetianga a chê hi ka hua..min thlah teh" min vawnna kut chu ka thing thla sawk a, chutih rual chuan kan awmna lam bang deng dawt khawp chuan engthil emaw hi a rawn ri leh bur a; a keh nghal chhuai bawk!






"Tv nge Laptop?" hnunglam aṭangin J-a chuan a rawn tisup. Kawngkhar vawn ban chu ka vuan a ka khur dar dar mai "Hlau miah suh Margaret i hmangaih kha" keimah chu ka inhrilh mawlh mawlh a mahse, a inhrosa thawm chuan min ti zam chhe lo chauh thung.






Thawm chu a zawi tial tial a, rei vaklo hnuah chuan rehin inchhunglam thawm engmah hriattur a awm ta lo "A luh theih tawh ang, ka lo kalpui dawn che em" J-an a rawn tih chuan "Angailo" ka lo ti vat.






Kawngkhar chu ka pawt hawnga a thim chhah mup mai, light On na ka dap a ka dap fuh vat a mahse, a On na ka hmeh hnu pawhin a engthei hauhlo, ka phone light chu ka ti êng ta zawk a, inchhung chu ka ên kual thuak a, lirnghing tuar hrepna hnu ang maiin engkim mai chu an let rem rum a, chhuat lah chu Darthlalang leh eng engemaw keh nuai vekin a khat, inchung light pawh en ngaihna alo awm reng renglo chhuat laiah a sawm nuai mai.





A chêtna hnu chu rapthlak ti zetin ka ên kual a, ka chek tlat tlat ringawt. Amah lah chu hmuh tur a awm hauhlo lehnghal.





"Gabe..." min chhanglo a, a thawm pakhat mah hriattur awmloin a reh hmiah a, ka thinphu a rawn rang nghal tut tut!






"Gabriel..." Room kil tin chu ka en kual a, a awm hauhlo. Aw Lalpa...!! Thlanglam Balcony chu a inhawng a, saw tah sawn a zuangthla tihna em ni!!??







Thawk pawh ka thaw ṭha ngam tawhlo, rang lutukin Balcony lamah chuan ka tlan phei a ka ṭaplo chauh.







Thaw ri hrawih ri ka hriat rualin Balcony chhuat chu ka Light chuan ka en kual a, kil khata a lo ṭhu sawp nuaih chu ka va hmu a ka thaw huai mai. A kut leh bek bawr velah te chuan thisen a kai niai a, ka Light a ka va chhun chu ngaitheilo zetin a kutin a lo inhliah a, rang zeta êng chu ti thimin ka va pan ruak a, a rawn ding chhuak ve chiah chu ka lo pawm bet rawk a, chu veleh a ban tha chak zet chuan min nam lêt nghal dawrh a, ka rak chhuak nghal ṭhat.






"Bawihte....nangmah em ni?"






Thil chang deuhah ka hnung ka tauh avangin che chang mailo chuan ka ding ngawi reng a, thim zinga Gabriela ding chu hmu chiang theilo mahila, a awmna chin ka hre thei.






"Maggie..."





"Aw...." lungawi zanlo chuan ka chhang a, a thaw hawk mai.






"Oh..God..!!" min rawn ban vut a, a kut chu ka lo vuan nghalthuai. A awm nghengin min kuah hlu hlu a "Nangmah ini tih ka hrelo a, ka tihpalh" damthlupin a ti a, nichin lawka bungrua suasam a, inhrosa chiam kha amah a nilo emaw tih tur hial a ni.






Inhnuai room ah chuan ka chhukthlak pui a, J-a pawn min zui nghal thuai. "Inti fel phawt ula ka rawn Jection mai dawn nia" tiin min chhuahsan leh thuaia, khuma Gabriela ṭhu ngawi ngul chu ka va en a, ngaihtuahna chawmawlh hmelzetin hnuai lam a bih a, a lampana ka kal lai pawh chuan che chang loin ka kun reng a, a lu ka va chul sak lai chuan a rawn hawichhuak a, ka kawngah min rawn kuahin a hmaiin ka dul a rawn nawra, hah hmel zetin thawk a la ham ham a, han hnem a han sawipui chiam ngaihna pawh ka hrelo.






"Intifai la muthilh tum rawh" a sam thur siang chu ka chulsak a, engmah sawilo in a ngawi reng.






"Vawikhat mah ka ringhlel miahlo mawle!!" mahni innuihzat hmel zetin a rawn ti chhuak hrawih a, a aw ah chuan natna tam tak a lang.






"Ringhlel thei dinhmunah i dinglo a lawm" ka lo ti hap a, khatih lai khan naupangtê chauh a ni a, misual te kha tute nge an nih takngial pawh a hriatloh laiin amah ṭanpui tupa kha atan chuan rinhlelh ngaihna a awmlo, Putara khan a thil duh ber a hrilh a, phuba lak chaka a phi ruai laiin engtin nge rinhlelhna rilru a put theih tehlul ang, keichuan ka dem hauhlo.






"Ka zawng chhuak anga ka that ngei ang"





"Nilo Gabriel..hetiang thil hi iti tawh tur a nilo" hriatthiam loh hmel zeta min rawn en lai chuan a biangah ka kut pahnihin ka lo khuap vat a "Khawngaihin duhtawk tawh rawh...heng buaina hian kan zavaiin min ti chhe vek ang, chân che ka duhlo ka bulah hian awmreng la, midang te kaldan anga nun pangngai tak neih ka duh a ni" a mita enkar chung chuan ka ti a, a hmel landan chu hriatthiam har tak a ni.







"I hrethiamlo a ni Maggie, aman a duhtawk dawnlo a zia ka hrechianga hei leh chen a thlenpui anih chuan a tawp thlengin a kaltlang pui ang"






"Nilo e...a thilduh chu kan pe mai dawn a lawm"






"Engtin maw..." phawk zeta a rawn tih lai chuan ka phone phawrhin Putea thilsawi ka record chu ka play a, a ngaihthlak chhung zawng chuan a inhumruh ṭeuh.






"A thil duh chu sum chauh a ni, a duh chu kan pe anga heng buaina hi chu a tawp mai ang" a ngaihdan a nilo tih hriat zetin min rawn en a a lu thing vutin a tho chhuak hluai.





"Gabe..." min hnungchhawn zawnga a ding chu a rawn hawi a "Ka theilo" tihzawng a sawi.






"Ka u chunga khang thil a tih hnu ah ka pa that lehin kei hi min bum a sin, a tana ka thiltih zawng zawng te i hre reng reng em ni, mi nunna engzah nge khapa tan khan ka lak tawh, khapa khan ka nun hi Puppet angin a chaih kual vel a nih hi.....mi â tak ka nih reng lohnan he a thiltih man hi ka pe ngei ang" a ṭawng chu a ringlo a mahse, a khauh hle thung. He thilah kher hi chuan a rilru ka thlaksak thei dawn hauhlo tih ka chiang hle bawk.






J-a rawn lutin mutna damdawia a chiu lai chuan "I riak ang ti raw?" riak tura min duh tihhriat zetin a rawn ti a, chhangloin a bulah chuan ka inthawlh a, nghet deuhin minlo kuah nghal hmiah.





"Engtik ah nge hetiang hun thim hi kan paltlang ang le..?" beidawng zetin ka ti zuai raih a, ka nghawng bula rawn thawk lum ham ham pahin min kuahbet chiala, min chhang dawn lo emaw ka tih hnu ah "A rei tawhlo ang" a rawn ti sup.






"A vanduai zawkah lo ṭang ta la, engtin nge kei hi ka awm ang..." ka ṭah a chhuak hluah hluah mipa min hmangaih em em tu leh ka innghah ngamna ka neihchhun tak meuh a ni, a tello a han awmtura ka inngaihtuah chhin ringawt pawhin ka ruak nghal vekin ka hria.






"Chutiang athleng dawn lo ngaihtuah miah suh he thil hi ka tih zawh hunah chuan i duh engkim ka pe ang che.."






"Ka duh engkim maw...?" zawi te in ka lo ti sep a, "Engkim.." tihpahin a hmui chuan ka ngawng a rawn nul a, duat deuha min kuah hlu hlu chungin a thaw lum ham ham reng a, ka awmdan chu ka sawithiam lo, hlauhthawnna nasa takin min ṭhama Gabriela hi chân dawna inhriatna ka nei.






"Ka duh chu maw...kan pahnih hian inneiin fa te nei ila innuam takah chengin chhungkua din ila"





"In nuam deuh ka leisak ang che" nuisuk chungin a rawn ti a, a aw ah mutchhuak aw a rawn lang ṭan a, a damdawi khan hna a thawk ṭan der tawh tih ka hrethei.





"Inah chuan i cheng ve dawn tih i tiam thei em?" a lamhawia inher pahin ka ti a, thih theihna hmunah kal tur ang maiin ka ngai tawh in ka hria, tu emaw thah a tum a, an ni pawn thah an tum ve ngei dawn tih ka hria.






"Nang leh kan fate nen kan cheng ho ang, i duhthusam ang chiahin" a sawilai chuan ngun deuhin ka lo en a, dawt mai mai min tiam lo se ka ti.








"Thleng thuai se ka van ti ve" za lo zeta nui chungin ka lo ti a, mitmeng dul riâia min rawn enin "Lo nghak rawh a rei tawh dawnlo, kan intur pawh ka lo zawng vat ang" a mit a chhin riai riai lai chuan "Kan intur maw" ka lo ti sap a "I duhthusam in" mit chhing chial chungin a rawn ti leh sup a, a hmel hmuh a hahdam takzet a, kan thil sawi mek chuan a tihlim ve tih ka hrethei.







"Eng ang In nge?" zawi supin a rawn ti leh a, chhungkua a han chen nana In duhthusam ka lo la nei miahlo tih ka hrechhuak chiah, ka mitthla kuala ka duhthusam In chu simple tak a ni.







"In var ni sela, kawngkhar sen nei bawk sela, a kawtah chuan Daisy par vul chêk sela, Daisy ka duhchhan i hria em...Daisy chu Margaret tihna a nia French ṭawnga Marguerite... ka pangpar duh ber a nih chu, kan In chu tlak lamah nisela In chhawng hnih Balcony zau tak nei ni bawk sela, chutah chuan nitla tur kan thlir dun ṭhin anga..." ka mitthla a ka In duhthusam ka sawizawng ringawt pawhin ka hlim veng veng thei, Wine ka in ngailo mahse, ka mitthla ah chuan Balcony ah inkuah riaia ding dunin Gabe nen Wine no chawi chungin nitla tur kan thlir duna a Romantic takzet.







"Engvangin nge In chu Ni chhuahna lam nilo a tlaklam hawi ka duh chhan i hria em..?" phur zeta ka zawh laichuan a lo muhil fel der tawh.






A muhil hmel chu ka en a, ka hmangaih nawn awn awnin ka hria, "Fahrah ve ve kan ni a chhungkua neih chu kan phu ve a lawm ti raw, chuvangin kan duhthusam kan neih ngei theihnan rei tak dam ang che aw" a hmuiah chuan ka fawp a, kum hei leh chen thil tuina hrelo leh mutmu pawh tuah theilo khawp a; a lo vei kha ti hlawhtling ang riaka a inngaih tawh hnuah bum a ni tih a inhre leh chauh a, lo dan beh tlat hi ka tihtur a ni em tih pawh ka hrethiam tawhlo.







Tualthat turin ka duhlo, Pathian hremna tuar tur pawn ka duhlo mahse, enge a tan hian ka tihsak theih chuan le... ṭawngṭaisak tawp bak chu engmah a tan hian tih theih ka neilo. Khumah chuan ṭhingṭhiin ka ṭawngṭai a ka ṭap chhuak hlawp hlawp bawk. A chhan chu ṭawngṭai dan tur pawh ka hrelo a ni, a hmelma te a thah theih nan ka dil dawn em ni? Ni lul lo.







Nge ni a a dam khawchhuak zawka a ṭan theih nan......hmasial tak chunga ka thil dil hi Pathian chuan min pawmsak angem? Eng thil pawh ti sela a tawrh zawhloh tur khawp hremna pe lo turin ka dilsak.




*


*

A thawh hmain ka hawsan a, ka chhung te chuan Damdawiina riak angin min ngai a, Nu Partei lahin a thawh hmaa haw angin min ngai bawk a, insawifiah ka ngailo hlauh.






Monday-ah Patea chu Aizawl lam kan pan puia, Utean engkim a lo buaipui vek theih vangin a tuk aṭangin Class ka ṭan ve nghal a, tu ten emaw min thlithlai reng a, zawtlo mahila Gabrielan min veng tura a mi dah te an ni tih ka hre thei.






Ka pi phallo chung Hostelah ka lut a, Cancer damdawiin lama an luh daih vangin kan ina va awm kha ka chak lemlo a ni, Vlin Hostelah min riahpui chawta, a chhan pawh kan chhanchin engkim ka hrilh khan a hlauthawng em em a, min ngaihtuah vanga min riahchilh chawt pawh a ni.






Lalbera erawh ka hmu khat ta khawp mai, class a kal mumal lo a ka inhmuh chhunah a rui em em renga a biak mumal theihloh "Champhai aṭanga a lo haw aṭang khan hetiang hian a awm char char" Vlin a tih chuan ka inthiamlo em em ringawt.






Tlai banah Lalfakawmi nena chak deuh deuha an inphur liam ka hmu fo a, a nun ngaiah khan a kir leh ta tih ka hre chiang hle a chhan pawh keimah vang vek a ni.






Hotelah Gabrielan min rawn tlawh fo a, kan exam dawn hnaih a vangin Vlin nena kan eiturin thei leh eitur hrisel tak tak min rawn ken ṭhin a, min duat em em renga engmah chanchin ṭhalo dang a awm rihlo bawk nen thla pawh a muang rih viau mai.






Kan Hotela awmve ho chuan Gabriela chu an lo hre hlawm ngang mai a, Fino Branch chu tute pawn an hria a, An fapa ka bialpa a ni tih an hria chu mak a ti viau bawk, Lalbera kha ka bialpa angah an ngai a an hlimpui viau a Gabriela erawh an ngaisang hluah hluah thung.







Inrinni ah Vlin an inlamah min hawsan a, kei ka patea tlawh turin ka kal thung, Chemo chuan asam a ti tla kawlh ve ṭana, ataksa erawh aṭha sawt emaw tihturin a thau tung a, thil pawh a eithei viau a ngaihtuah awm tak a nilo. Gabrielan veng turin mi adah veka, ngaihṭha takin ka hawsan theih phah bawk.







Bazar ah ka kawi a, Hostel ka thlen meuh chuan khua a thim ṭan der tawh, ka inbuala Hair Dryer a ka sam ka chhem ro tir laimekin Call a lo lût a, Gabe hnen aṭangin a ni, vawin chu kan buai dun em vangin kan la inbe miahlo a ka ngai tawh viau mai, a call chu phur zetin ka chhang a; ka aw ah pawh ka phur zia a lang thei hialin ka ring.






"Khawiah emaw chhuak dun lawk ila" damthlupin a rawn ti a, Hostela min rawn rîm ṭhin bak hi chu kan chhuah dun lohna pawh a rei ta viau. "Khawiah?" phur zetin ka lo ti a, "Hmun nuam deuhah a ni mai, insiam vak pawh angai chuanglo ka lo kal dawn chiah a, kawngpuiah lo chho la" a rawn ti a, phone ka dah hnu chuan rang takin ka insiam nghal sawt sawt.







A lo chhuak deuh chauha a lo la thleng dawnlo tih hretho mahila kawngpuia lo nghah chu a ṭhain ka hria a, Warden hnenah ka chhuah lawk tur thu ka hrilh hnuah ka chhuak chho a, dar kua a rik thuak tawh a vang leh kan Hotel bul kawngpui chu veng penhleh kawngpui mai anih a vangin vei vak an tam lo a, zan thla eng hnuaiah chuan a reh ruih.






Gabe chu ka call a, a Ring hnuah a rawn chhang vata "Lo awm rawh, ka rawn tlan mek" a tih vangin ka dah leh thuai a, ka dinna piah deuha lungrem chungah chuan ka ṭhu a, kawngpui lehlam hla deuh hleka dawr inhawng lam chu ka thlir a, chutihlai chuan ka hma ah bike a rawn ding zawt a, min ti phu nasa em em lehnghal!!






"Ezra...!" phawk zeta ka tih chuan a Helmet phelh pahin "Lalber tirawh" nui vur vur chungin a ti a, a mitmeng sen rumah chuan a rui tih ka hrethei nghal.






"Chhuah i tum em ni?" ka bula Bike hun ṭhat pah chuan a ti a, "Gabe nen kan chhuak dawna" ka tih chuan a ner sawk.






"Hetah nghak loin Hostel ah nghah mai tur che alawm" ngeiawm zeta a hmui pehsawi zauh pahin ka bulah chuan a rawn ṭhu a, zu rim a nam ham ham mai.






"I in leh hlê tawh a ni maw...i cher tlat" ka lo ti zauh a "Hle lo" tih zawngin min chhang.







"Inneih lam te a hnai em?" a ṭawng paha a hmui a petsawi kher zel chu ka lo nuih hak a, "Faktei nen in inkawp leh tawh tih ka hria a nia aw" ka lo ti let zauh a, a mitko a san rulh duh chauh.







"Khawnge kal i tum hrim hrim a?" a dara ben salh pahin ka ti a.







"E le...Chicks phurh tur ka zawng" uang zeta a rawn tih chuan ka lo nui chhuak hak.





"Chu i hmu zo na nge?"






Ka dara min rawn kuah ve salh pahin "Ka hmuh chhun hian midang i nghak daih si a" nuisanga min en chung chuan a ti a, min ti lai lek lek a ni.







Kan piah hla deuh hleka dawr inkhar mek lam chu hawiin "Lo awm rawh, zial ka va lei lawk anga ka lo nghahpui leh ang che" tiin dawr lampan chuan a pen phei zui hlawk hlawk a, ka nuih liam ta ringawt.







Dar zat ka en a, rin aiin Gabe chu a thang rei zek mai, Traffic jam a awm dawn tawp silo a, a tlan muang viau em mawni dawn ni?







Ka bula Bike ding chu ka en vung vunga, a thar a ni tih kha hre thei "Kan mihausa fapa chuangtlaia hian Bike chhuak thar a piang a nei zung zung mai chu a nih hi" tih pahin a Bike thar chu ding meuhin ka thlek kual a, a hnungsang vah chu ka ngainat zawng a nilo nghalpang mai, ka ṭhut peihlohna chi tak ani 'Faktei erawhin a inhmeh leh dawn khawp hi' ti rilru chungin ka nuisak.








"Kan va in zawng nasa deuh ve le" chu aw thum zet ka hriat rual chuan ka hawi lêt dawrh a, chuveleh min pawt her lawpin ka hmai a rawn hup nghal hmiah, ka au chhuak thei der lo, ka ke ka leng bat bat a thil rim danglam tak ka hriatrualin ka lu a hai muai muai a, ka taksa a zawia ka khaw hmuh pawh a fiahlo nghal a, reilo teah chuan engkim chu a thim ta vek mai!!!








CHHUNZAWMNA







Thei leh theiloin ka meng ṭawk ṭawk a, ka taksa zawi vek leh ka meng hleithei miahlo chu ka hrethiamlo kher mai, ka mutna insawi vel leh thawm ri ṭuk ṭuk ah chuan Motor tlan mek chhungah ka awm tih erawh ka hre thei. Ka vai riai a ka lu chu a chhahtup nimaiin ka hria, chetsawn lah ka thei derlo.







Kha paliana khan ka ka a rawn hup rual khan engthil emaw chuan min hrai rui a ni, hlauhthawnna in chhungrilah min ṭhama ka mangang takzet. Han au chhuahvak mai ka tum a chu pawh chu ka la theilo cheu! Reifê chu Motor hnung seatah chuan che theiloin ka let hlawm reng a, Motor a din rual chuan ka tiril a khur dar dar.






Ka ke ah rawn chelhin min pawt sawk a, boruaka ka kan dawrhlai chuan mumallo zetin ka ṭe chhuak ruaia, a koki hrawl zetah chuan dimlo baksakin min bang nghal hnawk.







"Thih i duhloh chuan ngawi hmak rawh" vin zeta tih hluk pahin ka mawngah a rawn beng thlawp a, ka taksa zawi lutuk vang chuan ka ṭang thei eih bawk silo a, mitthi ruang ang maia min pu lawp lawp chungin min kalpui hlawk hlawk a, thla êng dul zet hnuaiah chuan a ke pen hnunglam leh lei vir muai muai chauh chu ka thilhmuh theih chhun a ni.







Matress niawm takah hian min paih thla hnawk a, ka chêt theihloh vang chuan min paih ang ang chuan ka let hlawm reng, ka lu chêt theilo mahila ka hmuh theihchin chu ka melh kual ruai a, room chhung thim mup leh eng dul riaiah ka awm tih ka hria, min mantupa huhang na zet chuan min uap churh a, ka bul maiah a awm tih ka hria a, a hmel hmulo chung pawhin a huhang chu na tak a ni. Enge ka chungah tih a tum, min that dawn em ni? ka hlau a, ka mangang tak zet!!







"Kan mi laktlakloh pain a lo atchilh em em che pawh hi a thiamawm e, i lo nalh hrep tak anih hi" aw thum dûta tih pahin ka ke zawi zeta uaithla reng chu Matress chungah a rawn dah kang lawp a, kha Tatoo neipa kha a ni tih ka hre chawpchilh nghal a, ka chunga a thil tih duh tur ka hre zui nen; ka thinphu a rang nghal zawih zawih!






'Gabe...' a hming chu ka lam ruai a, au chhuah nghek tumin ka theihtawp ka chhuah a, ka aw chuan a thleng thuilo kher ang, kan awmna hmun chu hrelo mahila hmun fal tak a ni tih erawh ka hria a ni.







Chhuat dungah chuan a pen ri khup khup a, Zial a ṭan nge ni Lighter talh ri khap khap riin a zui a, a hnu deuhah chuan phone-in tu emaw a bia a, a ṭawng thum dût dût chu chiang takin ka hretheilo a "Ka that dawn em?" a tihri erawh ka hrechhiang ngang mai! ka che thei bawk silo, ka hlau a, ka khur a, ka chîai takzet.






Pen ri chu ka lamah a rawn hnai zela "Ka hnialloh zawng tak a nih chu" nuisuk chunga tih thum dût pahin a phone chu ka mutna Matress ah chuan a rawn thehthla tawp a, hlauh lutuk vang chuan thawk ka la kawk kawk, ka thi dawn, min that ngei dawn tih ka hria.







"Gabe.." ka mitthla ah a rawn langa, ka mittui a luang zung zung.







"Ṭah a hunlo hmelṭhanu, tun hi nawmchen hun zawk a ni" rapthlak lutuka nui hawk chungin min rawn bawh thuta, ka kawr haklai chu a pawt ṭet nghal hrawk bawk.







A taksa lianpui chuan min delh bet run a, Ka hrawkah na zeta rawn rekin a lei tenawm zet chuan ka khabe leh biangvel chu a rawn liak kual a, a thiltih tum ka hria mahse, engmah tihtheih ka neilo, ka au chhuak ṭhat a chuveleh ka hrawk a rawn rek na zual sawt a, nui ri hawk chungin ka hmui a rawn fawp a, dimlo lutukin a rawn pet ngawng ngawng a ka mittui a sur zung zung.







Ṭap hlawp hlawp chungin ka rilruin Gabriela ka au ruai a, min ṭanpui turin ka mamawh takzet, hetiang hian ka awm tih hria sela engtin nge a tih ang le, min ṭanpui tur chuan engpawh a ti duh ngei ang tih ka hria mahse, hetiang hi ka chungah a thleng mek tih tak ngial pawh a hre awm silo, ka lo nghahna hmunah khan a thleng tawh anga ka lo awm siloh vangin hawihai zetin a awm mêk zawk ang chu.







Ka ngaihtuahna chu a vak thui hman lutuk, Pathian hremna ka tuar ta niin ka inhria; a chhan pawh pasal ka neih hma chu ka thianghlimna vawnghim turin ka intiam vang a ni, Pathian hnenah chuan misual leh tawhsual tawh palh theihna reng reng laka min venghim turin ka dil bawk a mahse, ka thu tiam te kha ka hlen zo ta silo a, hremna ka tuar ta anih ka ring hial mai.







"Ngaithla rawh hmeichhia...a hming kha ka hriatah ilam ri leh a nih chuan i ring ruh hi ka ṭhuai tliak nghal ang tih hre rawh" na zeta ka hrawka rawn reh leh chawt pah chuan a ti a, thawk pawh ka thaw ṭha thei tawhlo, min rehna a thlah dul rualin ka khuh chuak bawrh bawrh a, khamlo zetin boruak ka hip lut nghal kawk kawk bawk.







"Engtin mah a rawn ṭanpui theilo che mahse, lungngai suh mipa diktak chêt dan ka hmuhtir hunah che chuan kha mi laktlakloh pa kha chu i theihnghilh hmiah mai ang" ti a phun bul bul chungin a nui hawk a, a aw ri te chuan min ti ṭim uai uai thei, ka kekawr kilhna a rawn phelh lai chuan ka inpetruh ṭang ṭang a "Ṭap tawhlo turin ka tih che kha" tih hluk pahin ka hmaiah a rawn beng nghal ṭhuai a, na zetin ka awmbawr a rawn ṭham nghal sawk bawk, ka hlau a mahse, ka insum thei chuanglo, chhuak lutukin ka ṭap hlawp hlawp a, ka nghawnga a rawn rék leh chiah chu ka taksa chung aṭangin a kang nghal dawrh!







"Ka that dawn khawp che" Gabrielan a tih ri ka hriat rualin a ka thaw chhuak hawk, an thawm chu ka hria an hmel ka hmu theilo, kut an inthlak a, an insual nasa hle tih zawng ka hria.







"Margie" tihpahin ka biangah vuanin a lamah min kuai her a, Lalbera hmel ka hmu nghalzat.







"Hrep chuan leh.." tih hluk pahin min tung tho a, zawi zetin a awm ka nghenga, ka ṭah nasat vangin ka thawk a la pangngai theilo, a jacket phelhin min haktir mawlh mawlh a, ka sam hnawk te chu a rawn siamṭha nghal zung zung bawk.







"I ṭha a nia, hlau miah suh" ka mittui luang rawn tuai hul pahin a ti a, Room pawn lama thawm ri bur bur chuan ka ngaihtuahna a la peng rang kher mai.







"Gabriela..!" ka ti chhuak hap a, rangzetin min pawm kang nghal nawlh a Room pawna kan chhuak chiah chu Paliana chu sawp nuaiin chhuatah a lo tlu a, a hmai chu thisenin a bual huh vek bawk.







Chuti chung chuan Gabriela chuan a hnek mawlh mawlh a chutiang em em a; a thinrim hmel chu ka la hmu ngailo, Paliana chu a chhip samah ṭhamin a kuai dak sawk a, a chemte ken laia a hrawk a tin chiah chu ka lo rak chhuak vak.







"Tisuh..." ka lo tih vak chuan maktih hmel zetin min rawn en a, a hmel chu a dur khup mai, a inpetruh ṭeuh a mitmengah pawh a thinurna nasat zia chu a langthei.







"Hepa hian dam a phulo.." a rawn ti chhuak hrawih a, a kut a chet zui chiah chu "Tisuh.." ka lo ti leh nghek.







"Bawihte...!!" ti hliai in ka lo dang chu mak min tih hmelzetin min rawn en a, a chetdan chu rapthlak ti lutukin ka lo en ve thung.






"A tawk tawh Gabriel Police kutah dah rawh" Lalberan a lo ti ve bawk.







Harsa tih hmel zeta ner sawk chungin a rum chhuak hrawih a, Paliana lu chu chhuatah a tauh zui chawrh a, a ke in a la rap zui hram.








A chemte ken a dah tak hnu chuan ka lo thaw huai mai a, a ni erawh mitchhing chungin thawk ala ham ham a inbengdaih a tum ve mêk niin ka hria, chutah ka lam a rawn hawi a, tlem chuan a landan chu a zia ta deuh, min rawn panhnaiin a kut a rawn phar a, ban pawh ka ban thei chuanglo.







"A taksa hi a zawi vek" Lalberan a lo tih chuan rangzetin Lalbera kut aṭangin min la thla nghal a, a awm nghenga min pawm chuan ka hahdam nghal sawng sawng thei.







"Ka tihpalh aw...ka lo thleng har lutuk a" tih sup pahin ka chalah a hmuiin a rawn nawr vang vang a, a ang chhungah chuan chawp leh chilhin ka hlauhthawnna te kha an bo nghal vek.







"I ṭha tiraw..a khawihna hman che em?" rilru nat hmelzeta min en chungin a ti a, a mitmengah chuan a hlauhthawn zia ka hmu thei bawk, a tan chuan pawngsual thu hla kher hi chu palzam mai a har khawp ang tih ka hria, tunah pawh insum hmanlo lêkin Paliana kha thah nghal mai a tum bawk a nia, hriatthiam tum viau mahila tualthah kher chu ka remti lo a ni.







"Ka ṭha vek..a hun takah inlo thleng hman a, engtin mah min khawih hmanlo" ka tih chuan ka chal a rawn tauh dat a, mitchhing chungin thawk a la ham ham bawk.







Chhuata Paliana let ngût lam chu hawiin a inpetruh leh ṭeuh a, a la lungawi thei nganglo tih a hriat reng mai.







"Ezra...Maggie hi pawnah lo va chhuahpui rawh" a tih rual chuan phawk zetin ka lo en a "Ka that dawnlo" tih nghut pahin Lalbera kutah min hlan nghal hmiah.







'Ka that dawnlo' a tih chu ka ring thlap a, Lalberan pawna min pawm chhuah lai chuan engmah ka sawi zuilo, kan chhuak fel chiah chu Motor dahna lam min pan pui a tum a "Hetah lo nghak ang" ka lo tih vat avang chuan a ding leh ta zawk a, min pawm chung chuan ngun zetin min en vung vung a, a hmel ner nawng reng chu ka mit ka chhinsan daih.







"I biang kha ala na viau em?" min pawm nghehsalh pahin a ti a "Na tawhlo" ka lo ti vat, a la thip ṭhum danah a duk ruih loh chuan a sen ṭul talin ka ring, a palian bawk a a kutthlak chu natak a ni.







Inchhung lama thawm ri deuh ṭawk ṭawk avang chuan min inherpui vut a, a ngaihna hriatloh hmelzetin min rawn melh nghal ralh.







"Kal hnai deuh teh" ngaihṭhat zan lohna ka neih avang chuan ka ti a, an inhnial thinrim anga Gabe lah thinrim thin thawk thut chi a ni bawk nen tumloh deuh pawn a that ringawt thei, kan chhuahsan daih ringawt pawh hi a ṭha chiahlo deuh chuan ka hria.







"I lo tum lawk sa a maw..." nui hawk chunga paliana ṭawng ri dut chu kutthlak riin a zui a, nat hmel zetin a rum ṭiah ṭiah bawk.






"Ka beisei ang aiin i che nalh tlat, i bialnu tawktarha i hman hi chu ka lo ring miahlo, inhmuh in rawtna kha mak ka ti deuh réng a ni" Palianan atih chher chher lai chuan ka ngaihtuahna alo buai nasa mai, Lalbera chu ka en chho vuta, maktih hmel deuhin a lo meng kalh rulh a engmah sawilo chuan ka ngawi dâk ringawt.







"Donnai i rin zawhlohna remchangah ka hmang anih hi, Maggie hmel i hmuh khan nidang atan i khek dawnlo tih ka hre reng a lawm, nangang mimawl lutuk thlem chhuah hi chu thil awlsam lutuk a ni, i Boss Putara pawh ka pawt chhuak thuai ang" tih paha Gabriela nuisuk ri chuan min tina vawng vawng mai.








"Chupa mai mai chu lehh...." Lalberan a lo ti te chuan ka ṭah a chhuak hluah hluah.






"Min nghat rawh, ka che thei tawhin ka hria" ṭah chhuak insum deuh chung chuan ka ti a, Gabriela Police call ṭawng ri ringawt pawh chuan ka awmah min vilh ngut ngut niberin ka hria.







Leia min nghah rual chuan ka ṭhuthla hnawk a "Khawi ka pawm leh ang che" a rawn tih chuan ka lo namsawn a, ka mittui a rawn luang lehta. Ka tha la chaklo zet sawmkhawmin ka inbeng kang a, ka awm tawt up up chu ka chum dawt dawt.






"Margie....!" tih paha min rawn chelhvut tu Lalbera chu en in "Ka ṭha" ka ti tham ṭuak a, ka mittui tla nasa lutuk chuan ka khaw hmuh a ti phe zo vek.






Rei pawh kan awm hmain J-a leh Police ṭhenkhat an rawn tleng a, misual an rawn lak lai te chuan chawmawlh zetin a sirah ka lo ding ngawi reng, Gabriela che vel chu ka thlir tlawk tlawk a, ka lampana a rawn kal lai te chuan ka chhungril hi a so bulh bulh ni tawh maiin ka hria.






"Bawihte.." a rawn tih rual chiah chuan a biangah ka beng nghal sawk.






Ka ben na chu a dawm vung vung a, a makti hmel te chu haw zetin ka en let a, "Enge a chhan?" a rawn tih te chuan ben leh chakna in min tur et et.






"Engtin nge i hmeichhe hmangaih hi i hmelma bum chhuah nana tawktarhah i hman theih zawk?" Lalberan a ti chang khawla, ka ben chhan a hre thiam ta aniang a meng kang awk mai.






"Ka sawifiah thei min ring rawh" ka dara a rawn vawn na chu ka lo thing thla leh hmiah.






"Duhtawk teh Zoremsang i thiltih vanga Margie dinhmun hlauhthawn awmzia kha i hria em?" Lalberan a rawn tih leh chuan mahni inkhawngaihna hlirin ka khat.






Engtin nge Gabe hian hetiang hian ka chungah a tih theih? len chhuah puiah min sawma keilah chuan ring em em in ka lo 'aw' mai a mahse, a hmelma pa a man theih nana tawktarhah lek minlo hmang reng a...ohh...a na takzet...na ka ti lutuka ka â thei mai dawnin ka hria.







"Ka sawifiah ang.....aw...maggie..." min rawn ban leh a tum chu ka lo tawlh hnung nghal dawrh a, ka ṭap chhuak hawk, hepa hian ka chunga a thiltih te kha ṭawngkam hnih khata sawifiah a tum em ni? minute tlem te pawhin rawn tlai sela ka chunga thil thleng thei kha a hria em!







Lalberan min rawn kuah laichuan a awmah ka lo bei thlawp a, ka ṭah nasat lutuk avangin ka aw pawh a chhuak hleithei tawhlo, ka awm chumin ka ka hmang chuan ka thaw kawk kawk a, ka thin a thip hlur bawk.







"Bawihte.." tia min rawn ko tu chu awihlo zetin ka en a, engvanga rilru na hmel pu ve ngawt nge a nih lah ka hre derlo, a lakah hian thlamuanna ka lo nei ṭhina tunah erawh ka tana thlamuanna tlak a nihloh zia a lantir thung, hmeichhe dang laka min phatsana min ṭhen lai aikhan tuna ka na hi a na daih zawk bawk.






"I chungah thil ṭhalo engmah ka thlen tirlo ang, chu chu i ring ti raw..nangmah tihnat tum tu te chu engtin nge ka tih chu nichin pawn i hriat kha" insum theilo zet a lu tuai vut pah chuan a ti a, "Lo kal teh le..." ti a ngenngawl zeta min en chungin a kut ala rawn phar chhuak cheu!







"Ezra....min hruai haw tawh rawh" ka ti sap a, chuveleh rangzetin Lalbera chu ka hmaah a rawn ding nghal.







"I ruilo tih ka hria...mahse, i fimlo takzet khawnge i thluak ṭha zet ṭhin te kha i dah tak? he thil hi chu i ti mah mah deuh a ni, chuvangin min dang buailoin kiang vat rawh" ti a Lalbera ṭawng ri chu a ringlo a; a chang ṭha hle thung.






"In hnungah ka rawn zui ang che u" Gabrielan a tih sup chuan ka lo thaw hak.







"I nun hi buaina hlirin a khat Gabriel, muanna a awmlo...tunah phei chuan inrintawnna pawh a awm tawhlo ang chutiang kara awm chu ka theilo chuvangin i nunah hian tel ve ka duh tawhlo" ka tihlai chuan ka hmaah dingin a inhumruh nghek a "Ka tihpalh" a rawn tihsup rualin ka mit ka chhing sawk...aw...tunah ngei khan thildiklo tak a ti tih chu amah pawn a pawm thlap a..mahse chu chuan min tih lawm phahlo, minti hrehawm zual sauh zawk.







"Maggie.." a rawn tih leh rual chuan a mita enkal chungin "Ka ṭhen ta che" ka lo ti sap a. Milim ang maia a ding khawng luah chu kalsan zuiin ka hawilet leh tawh lo.






images - 2020-04-03T184439.151.jpeg
images - 2020-04-03T184439.151.jpeg (8.36 KiB) Viewed 2202 times



Link:
BBcode:
HTML:
Hide post links
Show post links

ADVERTISEMENT (A hnuai a milem hi a nia hmeh zeuh tur chu)
Post Reply

Who is online

Users browsing this forum: Sangsangii and 56 guests