Page 1 of 1

QUEEN BEE EPISODE-13 by INIROS 16

Posted: May 23rd, 2020, 12:11 am
by INIROS 16
QUEEN BEE
EPISODE-13
__________________________
Malsawmhlu, Tluanga hi i duh tak tak em ni? I ṭhianpa lo ni ta kher lo se kawng a awlsam zawk ang em?

__________________________
MALSAWMHLUI's POV



George nen chuan kan in aṭang chuan kan in phur chuak ta nge nge...

Thui vak lo kan tlan hman a
"Hlu, invuan nghet rawh aw" a rawn ti phut a,



A bike chu a phih nghal dawr bawk, ka lo inring hman loh vang chuan ka kut leh ke ka khai lawp a



"Lo in vuan ṭha rawh ka tih che kha, i na em?" a rawn ti vin ṭhak a, side glass chu a bih zawk a, chhan pawh ka chhang hmanlo



"Hmel ho chuh, hlu, ka kawng ah khan vuan la, min kuah nghet rawh aw" tih leh a hma aia tlanchak chu a rual nghal a.


A hma ang kha chuan ka mawl duh biklo, a sawi rual chuan ka kuah nghet sauh...


Thui fe kan tlan hnu chuan, kan college kawng kan tlan pel ta daih a


"George, kan college kan tlan pel daih a nia"


"Ka hria alawm"a ti mai bawk a


A speed erawh a la thlah duh miah lo...



"George, ding teh, khawiah nge min hruai i tum reng reng"


"Lo tal suh, nakin ah ka hrilhfiah ang che" a ti leh mai a


Motor lian leh te kar ah chuan kan inzep phei pawp pawp a, car hlir ah ka chuang thang si , bike chuan hi ka lo la zei vak lo bawk nen, George a hnung ah chuan ka bet tai mai....



A side glass a en leh zeuh a, kawngpeng pakhat, kawnghnuai pawh theihna lam ah chuan min kawipui ta daih a.



Kawnghnuai atang chuan kan kual chhuak leh a, kan college lam kan pan leh ta.



Kan tlai ta nge nge, college gate a lo in kalh tawh a.



Huiham, ka tihdan hlui ka hman leh ngei a ngai dâwn nih hi.

George chu kan college bang sang, ka tlai apianga ka lawn liamna ṭhin ah ngei mai khan ka hruai a.


Ngawi rengin min zui ve mai bawk.

"Bang ah hian lawn turin min duh tihna em ni?"


"Aw, tih theih kan nei chuang hlei nem" ka ti sam et a



"Kan lawn liam theih ka va ring lo eee, engtin nge niang?"


Ka han hawi vual vual a, kan piah a brick pali panga vel chu ka va la a


"Hei hian han tum chhin teh ang hmiang, Tluanga chu awm se ka leilawn hman thiam kha a rawn phawrh leh mai tur hi a nia" ngaihtuah hran lem lo chuan ka lo ti ngawt pek a



"I bialpa bulah i ṭhianpa chanchin i sawi reng hian ka tan a nawm loh dan tur i hre miah lo ami" a ti hmuk a



"George, ka tihpalh, Tluanga hi chu ka tet te aṭanga ka ṭhianpa ve a nia, ka nun ah hian a bet nghet tawh lutuk a"



"Anih chuan ti nge ani thlang lo a kei min thlan" a ti leh deuh hmuk a



"Ka hrelo, bakah Tluanga te chu ka ṭhianpa a nia, ka ṭhian ṭha ber,nang erawh ka bialpa, " bialpa ka tih lai te chuan ka rilru ah hian eng emawni min mawlh tlat tu awm ang hian ka hre tlat a.


"A ka fiam mai mai che anih kha" a tider tih hriat tak chuan a nui a


"Hawh inhau hman kan nilo, class kal dan tur chu ngaihtuah phawt mai teh ang"


"Awle, mahse, engtin nge ni ang a?" a lo ti hawl a


"I bike saw hmang mai ila, mahse i phal loh chuan tihdan dang kan zawng mai dawn nia"


"Umm, ka phal alawm, ka va la ang e" tih leh kal chu a rual nghal a.



A bike chu bang ngheng zawngin a han hung a


"Ladies first" a tih tlat avang chuan ka lawm hmasa a, awlsam te in ka lawn ve mai bawk a.



"Hawh le, George, lo lawn rawh le" ka han ti ve leh a, mahse min chhang lo


Bike thum dat dat ri hi ka hre nghal bawk a.


"George" "George lo kal ta che" thawm dim fahran in bang lam hawi pah chuan ka ti a, min chhang eih lo...

Bang lamah chuan ka beng ka va dawh a, eng ri mah ka hrelo, bang chu ka kik dat dat a


"George" zawi te, thawm dim fahran chuan ka han ti leh a... min chhang leh chuang lo...



Class a luhsan chu ka tum ta ringawt a....


"Malsawmhlu, i vannei lel lawl hle mai, miss Bethsy a lo la lut lo hlauh a, khawnge George hi?"


"Ka hrelo, kan lo kal rual a, ka lawnliam hmasa a, min lo zui ve mai dawn maw ka tia, mahse, a thlarau pawh ka hmu ta lo chu nih hi"


"Aw, hawww, enge in tih em em in va rawn tlai dun ve"


"Engmah,.... ka hre biklo, college hi min helpui ringawt a lawm"


"A ṭhat hram beisei teh ang aw"

"Ni e, vawiin Anil-a chhuah ni a ni tawh tak ti raw" ka ti ta daih a

"Umm, mahse, ka kal theih hmel loh tawp, chawhnu ah an chhuak dawn sia, tlai chu drama zir ve tawh ngei ka duh bawk si"


"Nia, kal lo mah la i thiam awm tawh tho, bakah i zirlai ngaihtuah hmasa phawt rawh"


"Ni e" a lo ti ve mai bawk a



George chu engtin nge a awm tak ang le, khawiah tak kal ni maw....




Nileng chuan George chu a bo hmak a, phone lah a la thei mang bawk silo, hei hi bialpa te tih dan tur em ni ngai?





Tlai lamah chuan drama pawh George tello in kan zir zo a, Miss Bethsy bulah chuan George a dam lo tiin chhuanlam kan han siam ta ngawt a...




Kan ban hnu chuan Tluanga chu ka phone a, min lo hruai theih leh theih loh tur thu ka zawt a.




A theih tur thu leh a lo haw dawn chiah thu min hrilh a, ka va lawm tak...



Gate ah chuan Tluanga chu ka lo nghak ran a, George-a'n min lo call, ka chhang peih rihlo, vawiin a min tih dan kha ka la ngei rih tlat...



Tluanga chu a hnu rei vak lo ah chuan a rawn thleng ve ta....


"Tluang" tih leh tlan a amah kuah chu ka rual nghal a,




Ka hlim lutuk, min lo hruai duh loh mawlh kha ka hlau,bakah ka ṭhiana hi ka ngai tawh lutuk tlats.



Ka kuah hnu chuan min lo kuah let ve vat, kan inthlah hnu chuan kan han in nuih leh ren rawn a.



Kan mit leh mit han in tawng fuh chu ka ṭek chhuai chhuai te hian ka in hria....


Chutah muang chang hian Tluanga chu a rawn kun hniam a, ka thinphu ran zia mai chu,



A hmui leh ka hmui pawh a inzawn chiah tawh, a thaw lum ham ham te chuan ka thinphu a ti rang takzet.


A ran lutuk vang hian thlawk thei se chu a phut ran lutuk vangin ka thinlung hi a thlawk chhuak daih ang mawle...


Min rawn fawp ta,a hmui han nem zia te chu, ka lo dang bik miah lo, ka mipa fawh hmasak ber anih vang chuan han chhan let dan tur pawh ka hrelo a, ka lo dawh deuh tawp mai.



Chutah a rawn duhthawh telh telh, chhanlet dan tur pawh ka lo hre ve deuh tawh, ka lo fawp let ve ta sak, nuam dangdai tawp, kan vawikhatna a ni bawk sia, thil thar vek a ni ka tan chuan..



College gate eng dim ruih mai hnuai ah chuan duh thawh takin kan in fawp ta...


Rei tawk fang kan in fawh hnu chuan, ka ngaihtuah na aṭangin thil pakhat in min rawn kai harh zawk....



Eng thil nge ka tih tak, bialpa nei lai ka ni, ka duh vak lo pawh a ni thei, mahse a tan ka rinawm tur a ni dawn lawm ni.



Mipa pawh hmeichia pawh in ngaihzawn na a lerh leh rinawm lo hi ka huat teh lul nen, ka mi huat leh ngainat loh ber ang chuan ka awm ta....



Eng vanga Tluanga kha fawp let nge ka nih le, kei hian Tluanga hi ka lo duh ve der tawh a ni lo maw...



Ka thluak chuan hnar tum mahse, ka thinlung leh ka taksa hian a haw mawlh silo alawm le..



George hi ka ṭhen mai ang a, Tluanga hi ka nihpui zawk mai dawn nge?


Tluanga hi lo nihpui ta ila, lo duh leh ta silo ila, ka ṭhiana rilru hi a keh chhe vek awm si a.



Nilo e, ka ṭhianpa rilru ti na duh tur khawpa hmeichhe sual leh tenawm chu ka la ni bik lo asin.




Kan infawh zawh chuan kan lai duh asin,
Tluanga chuan a hrawk a thian kharh kharh a, haw a rawt avangin kan haw ta...




Haw kawngah chuan a tu amah mah kan ṭawng leh ta lo va, kan ngawi kar, sawi tur kan neih dun ve ve chu ka ring
"Malsawmhlu, George hi ṭhen la, Tluanga hi nihpui daih rawh
Nilo, Malsawmhlu, George i ngaihtuah lo ami, i dinhmunah in dah ve chhin la na i ti lo ang maw"
"Malsawmhlu, ṭhen mai rawh, i duh tak tak loh kha George hi i ti khawngaihthlak mai mai"


Keimah leh keimah chu ka ngaihtuahna ah chuan ka in be mawlh mawlh a


"Hlute, in kan thleng e"


"Uh, kan thleng leh der tawh maw, muttui mangṭha aw Tluang" tih leh car aṭanga chhuah chu ka rual nghal a.



Kan thiltih tak avang te pawh khan ka zak ve deuh pawh a ni mahna....



In ka haw chu ka nu hian baloon te, eng eng emaw hi a lo chap hnawk nuai a, ka pa leh ka unaupa ten an lo pui bawk a


"Nu, eng nge i tih" ka nu chu ka han zawt a


"Malsawmhlu, I lo va haw har ve, han inthlak vat la, min lo pui ve rawh"


"Eng atan"


"Zawhna zawt lo khan han inthlak vat la a ni mai, rei suh aw"


"Awle"


Ka inthlak zawh ah chuan ka chhuk thla leh a.


"Eng eng emaw chu Tluanga room hlui ah chuan an lo chawi phei mawlh mawlh a"


"Kha, Malsawmhlu, hei hi lo va dah ve rawh" tih leh min nam phei chu a rual nghal a...


Tun ang hun, ka nu mood on lai hi chu tih thinrim chi a nilo tawp tih ka hriat tawh avangin ka hnial duh lo law law a ni.


"Pa, eng nge kan tih dawn, ti nge kan chei vak a room hi" ka ti hawl a


"Naktuk hi, Tluanga birthday a nia, i nu in surprise party throw a duh a"


Ehe, Tluanga birthday naktuk maw, eng tin nge ka theihnghilh theih zawk, Malsawmhlu i lo mawl hle mai, mahni ṭhiante birthday pawh hriat loh.



"Malsawmhlu, ding mai mai lo khan balloon te hi lo ham ve rawh" ka nu chuan rawn luh pahin a rawn ti nghal vat bawk a



"Awle awle, pi ber"



Room chu duh thala kan chei hnu chuan kan chhuahsan a, mut a lo hun ṭep tawh...


Ka room ah ka chho a, ka phone ka en chu Aadvika-i number atangin missed call 10 leh George atangin 7...


An sawi tur a pawimawh vak ka rin loh avangin ka han inbual te te a...


Ka inbual chhung te chuan zanin a Tluanga nen a kan awm dan te kha ka ngaihtuah a, ka lo nui leh ver ver ṭhin.....



Malsawmhlu, Tluanga hi i duh tak tak em ni? I ṭhianpa lo ni ta kher lo se kawng a awlsam zawk ang em? Tih te chuan keimah chu ka inzawt ka inzawt a


Ka inbual zawh chuan Aadvika-i number chu ka dial ta...


"Malsawmhlu, min tih mangang zia hi i hria em? Engtin nge tiang hian ka chung ah i tih theih zawk" call a pick up rual rual chuan min lo vin hrep a


"Sorry, ka phone ka silent daih alawm le"



"George-a'n a lo be tawh che em?"



"Umm, missed call a lo awm a, mahse ka la be lo"


"Tinge, i bialpa anih kha be ta che"



"Nia, teh Addu, George hi ka ṭhen mai dâwn emawni le ka ti hial"


"Eng ah ngawt chuan maw?Hey, Duh dang i nei a nilo maw nang hi"


"Neilo, mahse, nichin lawk khan, ihh" ka ti ban chap a



"Aw, sawikual duah zel lo la, min ti hrechak a nia"



"Ihh, Tluanga nen kan in fawp a" huiha atawp atawp ah chuan ka sawi ta



"Mawww!!!! Engtiiiin?Malsawmhlu, i thil tih hi i hre chiang em?"



"Hrechiang lo"


"Aw, chuan engtin nge Tluanga chuan nang Malsawmhlui hi a fawh theih zawk che"


"Nia, a mak khawp, min lo fawp a, ka lo dang miah lo, chuan min fawp rei telh telh a ka fawp let ve" tim deuh dai chuan ka han hrilh a




"Awii!!! Malsawmhlu, nang hi chuan sawi tur hi min ti hrelo ṭhin mang e"



"Nia, ti khan ka hrilh vek ta che a, eng tin nge ka tih dawn tak le"



"Aaa... Ka hrethiam tawh lo"



"I va rawntlak loh tak" ka ti hmuk a


"A rang teh thut lutuk a, ka ngaihtuah hman lo alawm, mahse maw Malsawmhlu, George ai chuan Tluanga hi i tan a ṭha zawk tih ka hrilh tawp ang che, hlim pawh i hlim zawk ang"



"Ka tan chuan ṭha zawk mahse, ka ṭhianpa a ni bawk si a lawm"



"George pawh i ṭhian tho alawm, Anil-a min hrilh danin Tluanga hian a nghak rei lutuk tawh che, bialnu pawh a la neih loh phah ṭhak a nia hei"


"Nia, ka thiamloh vek a ni, tak ana Anil-a enge a an?"



"Subject thlak lah hi i tum ve ziah mai, a ni chu a ṭha, tlai ah khan min lo nghah vangin a lo la chhuak lo hlauh a"


"A ṭhat hlauh chu, ka ṭhiannu bialpa a ni bawk a, ka duat tawh viau ang"



"Lo duat lo in lo vinphar ve vaih teh, i chaklo ang aw, chuan ka dah dawn nia, keichuan i thutlukna siam apiang kha ka pawm vek e" phone chu a dah ta a...


Kei hian George-a lakah thil lian tak ka ti sual niin ka hria, ka hmangaih leh ka duh thei miah lo tur chu ka nihpui a, mahse, ka thinlung erawh chuan mipa dang a duh daih thung si.... Engtin nge ka tih tak ang????
_______________________________________________

ZOTHANTLUANGA's POV


Ka phone a rawn ri ral ral, tun ang hunah chuan Hlutei bakin min call ngai loh vangin a mah ani tih chiang takin ka ring nghal bur.



Ka phone ka en chuan ka rinna ti nghet zual sauh turin a hming a lo inziak lang kalh mai, ka va hlim reuh tak...



A phone call vang ringawt pawh hian ka hlim a nia, ka bialnu han ni leh lek phei se chu ka va hlim dawn rua emm...



Call chu ka pic up thuai a,
"Hello, Tluang"


"Hello, Young Mistress oh Hlute"


"Tluang, i buai viau em?" in thlahrun hmel deuh hian a rawn ti a


Ka buai anih pawhin i tan kher hi chuan ka buai lutuk ngai hauh lo ang...


"Buai lo e, ka haw dawn chiah"


"Anih, khawngaihin min lo hruai thei ang em le" a rawn ti leh a...


George nen an in kar ah eng emaw tak a thleng anih ka ring, an in hau emawni le, zing ah kha chuan ka hruai duh lo in George kha a zui a ni si a, tunah lah amah hruai turin min lo be leh bawk si....




Zothantluang, ngaihtuah kual vak vak lo khan office kha chhuahsan mai mai teh...




Car chahbi ka la a, Hlutei te college lam pan chuan ka in khalh chhuak leh ta zal zal a...



Ka phur lutuk vang nge mawni nidang ai ka speed a sang a, an college pawh ka thleng hma ve khawp mai....


An college ka thlen chuan amah te chauh hian riang takin gate kawtah a lo ding hi ka hmu a.




Car aṭang chuan ka chhuak chiah tih ah chuan ka lam pan hian a rawn tlan vat a, min rawn kuah nghal chawt bawk.



Eng thil emaw tak a tawk a, hnemtu tur ṭhian a mamawh a ni tih ka ring, ka lo kuah let ve vat bawk a...


Kan inkuah zawh ah chuan kan han in en leh ren rawn a, kan han nui a, a nui mawi takzet zet ani, a hmel makeup tel lo a fai sar te, a hmui no chek lipstick tel lo a sen hiam mai te chu ka han en a.




An college light dim raih in a hmai a chhun eng vuai a, light in a hnuai a a mit de set set te chuan a hmel a ti ṭha zual, a hmui chu ka han en leh a, mipa ve ta na chuan , ka fawp chak tak zet.



Ka kun hniam de de a, eng pawh thleng dawn se tawrh huamin ka fawp dawn khawp. Min ben hrep dawn pawn ka fawp tho ang ka ti lui ve tlat.



Peka thu min fuih vang kha nge ka hrelo, pa ta riau leh huaisen sawt ni ber hian ka in hria.



A hmui ah chuan ka zu fawp ta, a tal eih lo, mipa a la fawp ngai lo tih ka hre sa, keipawh ka hmeichhe vawi khat fawhna ve tho a ni.


Min chhang let miah ko chuan rei ve deuh chu a dawh tawp a, chutah ka duhthawh zual sauh a, ka han fawp na leh zual sauh a, min lo chhang ve tawh, ka hlim teh asin.




Min fawh let ve dan ah hian a thinlung ah hmun ka chang te vak lo tih ka hre thei mai, George bulah khan lo tir miah lo ila a ṭha tur hi a nia...



Light dim raih hnuaia rei tak kan infawh hnu chuan kham lo takin ka thlah ta... theih chang se kumkhua pawn ka thlah lo ang mawle.


Kan lai duh teh asin,

"Hemm" ka hrawk ka thian kharh kharh a
"Kal ang aw" ka ti chhuak thei hram a


"Umm" a ti ve mai bawk

Kan ngawi dun leh vang vang tawh, sawi tur mai ka hre bik silo, in pawh kan thleng leh ta thuai a, khamlo tak chuan kan in mangṭha leh ta....


____________________________
GEORGE's POV



Hlutei te in aṭanga kan in khalh chhuak chiah chu, car dum hian kan hnung ah min rawn zui leh dat dat.


Ka kal hma kha chuan ka hmu miah silo, min zui ru ani chiang ang....



Hmel ho chuh, Hlutei chu in vuan nghet turin ka ti a,hria ang pawhin a lang lo.
Ka lo sawi zawi deuh nge mawni,



Ka bike chu ka han ti nung hlat hlat a, ka speed ka tihchak rual chuan ka bike chuan min phih dawr a, tlem a tlem ah ka Juliet tei pawh a tla lo chauh alawm le....




Hemi(Black Knight) te hi chuan buaina siam hi an nuam an ti lutuk ringawt, ka college kapui leh ka bul leh a vel ami te an lo him zawk nan college kal loh mai ka rilruk ta ringawt....




Mahse buaina ka nei ka Juliet-i a awm ve tlat, eng tin nge ka tih tak ang....



College bula kawng peng kan thlen dawn dawn hnaih pawh chuan Kan hnung ah chuan min lo zui reng avangin college pan ding nghal kher chu ṭha in ka hre ta lo a...





Kan college chu tlan pel in ka khalh tlang parh mai... Kan him nan ka tih ngei ngei a ngai si a ni



Hlutei chuan mak a ti khawp ang le, hei hi Gang nun chu a ni, kan duh emaw duhlo emaw, mahni inven nana insual leh midang thah, dawihzep vang ni hauh lo a hmelma laka tlanchhiat reng ngai te....



Nizan lama ka bum na ngai ah bawk khan ka in zep phei leh zat zat a, vanneihthlak takin nizan lam aiin motor a tam hlauh a, kan in bum leh thei hram...



Kawng hnuai lam ah kual in college lam chu kan pan leh ta, kan vanduai a siamin college gate lah an lo kalh leh hmak tawh



"Lo kal rawh George" tih leh bike aṭanga chhuk chu a rual nghal a.



College hnung lam ah chuan min hruai a,kan compound hungna bang sang ve tawk tak hma ah chuan kan ding ta ngar mai



A hawi vual vual a, a kalsawn zuai a, brick pali panga vel hi a rawn la a, kan hmuh chhun a nih avangin lawn kan han tum a, a
La hniam lutuk...



Kan thu chawl rih a, a ṭhianpa Tluanga a rawn sawi chhuak kher anih kha, ka thik lutuk hi ka insum zo ṭhin lo, ka ngaih dan dik tak ka han hrilh phawng a, chi loh lutuk...


Kan in hnial ti tih dawn ta mai, kan ṭan hmun ah chuan kan dik ve ve bawk si...


Ka fiamthu ani tiin dawt var ka han hrilh ta ngawt a

Ka bike chu min hrilh dan ang chiah chuan bang nghengin ka tung a, hmeichhia zawk anih avangin bang ah chuan ka lawn hmasak tir a...



Ka lawn ve dawn chiah tih chuan car dum bawk kha a lo lang leh


"Sh*t, hmel ho mai mai chu" tih leh ka bike tih nun chu ka rual nghal a, a rang thei ang berin ka an hmuh loh tur ah ka bi bo leh ta....



College compound ah buaina an siam vaih chuan a pawi dawn em asin...





Min hmuh hma chuan college hnung lam aṭangin ka in khalh a, inah ka haw ta ngawt a.




"Bawiha, in va bang hma ve" ka nu chuan min lo ti vat a


"Pa, in be lawk ang hmiang" ka nu bula ṭhu ka pa chu ka han mitmei zeuh a, ka room lam ka pan ta nghal a


"Awle" tih leh min rawn zui pawh a rual ve nghal bawk a


"Eng nge ni ta ka fapa"


"Pa, ka nu leh ka nau hi hruai haw leh mai ang"


"Ka duh alawm, mahse I nu hian a duh silo a, Paris ah kha chuan ṭhuih hruai kan ngah bawk a, tumah khan min khawih ngam lo a, mahse hei tunah chuan kan mal ṭan ta rih si a, fimkhur hle chu kan ngai dawn ni"




"Nia, khang misual ho vang kha a nia tunah pawh class ka kal theih loh"


"An lo tibuai hle che ani maw"


"Aw, min zui ru lawm, nizan pawh khan min zui tawh a, vawiin pawh khan ka ṭhiannu phur kher lo ila chuan ka khawih hrim hrim ang" ka in hrosa kuk kuk a



"In veng ṭha ang che aw, ka fapa, mu hah dam mai rawh, i chhuah rih loh hi a him a ni"



Ka pa chuan min chhuahsan a, ka inbualfai sar a, ka mu hahdam ta ngawt a, ka Juliet-i hi kalsan ta zawk mai ila, a him zawk ang em tih te chu ka ngaihtuah a.



Mahse, midang ta ni tur chuan ka phal bik bawk silo....



Ka phone vibrate cher cher ri chuan min kai tho chiang khawp mai, ka chhun mu kha tlai thim thleng ka lo mu chu niin, missed call 30 lai a lo awm a, Aadvika-i leh Hlutei hlir an ni.....




Hlutei zawk chu ka call a, a ring ral ṭhak... Aadvika-i ka dial leh a, a la thei chuang lo....



Ka lakah a lungawi lo pawh a ni thut thei... Nia, ka thil tih a tan chuan a lungawi loh thlak ngawih ngawih ang chu...


Ka kut a ka phine ken chu a rawn eng zuk... Aadvika-i a lo ni a,


"George, min lo call a mi, chaw ka ei kham chiah missed call a lo awm a"


"Aw, Hlutei hi a haw tawh em? Ka be thei miah lo a"


"Tluanga'n a hruai ka lo ring ve tawp a, in la in be lo ami"


"Umm, ka call a a la thei silo a, in a thlen tawh ka ring bawk sia" in thlahrung fahran chuan ka ti a



"A phone a silent pawh a ni maithei asin, phone ka lo tum ve chhin dawn nia"


"Awle, ka lawm ngawt ang"


"Chuan maw George, Hlutei hi hmeichhe dang anga fiam kual mai mai chi a ni velo a nia, a lan paukhauh ang hi a ni miah lo ania aw, a rilru hi a no ve teh mai nia,vawiin ang te khan ti tawh miah suh, ṭhiante in nih vang in ka hrilh che anih chu" min rawn ti ta zek a




"Nia, ka hria alawm, chuvang chu alawm ka duh em em ni"



"Awle, ka lo phone ve chhin ang"


"Umm, awle, anih aw" ka phone chu ka dah a


Hlutei chu ka call leh a, a la la thei chuang lo reng reng



Ka Juliet min haw tak tak lo ti raw???

____________________________

AADVIKA's POV

Vawiin chu class ka kal tlai ve ngei a, ka kal tlai ber ka ring a, mahse, ka ṭhiante pahnih an lo la thleng lo ve tlat...



Class kan la tan mai lo a, Malsawmhlui lah ka phone a la thei bawk silo, George ka dial leh a la thei chuang baqk silo, hemi te pahnih hian eng nge an tih daih le...




Class ṭan dawn ṭep chuan Malsawmhlu a rawn lang ve hlawl, a tlai thang bawk a, henu tlai hi chu ngai ah ka nei vat...


George erawh ka hmu miah lo thung a, a awmna ka lo zawt vat, an ni tawh a, a chanchin ka zawh pawhin min hnial baqng bawng tawh bik lo


An rawn kal dun thu leh George a bo daih thu min hrilh chuan George chetdan chu awm ang lo ka ti khawo mai....



George hian ka ṭhiannu hi a lo fiamkual mai mai te ka hlau rum rum, ka lo chhaih vak vak ṭhin te kha ka inchhir rum rum mai....


Tlai drama zir zawh thleng chuan George-a hmel hmuh tur lawh a lo la awm miah lo.


Hlutei lah chu lungawi lo hmel pawh hi a pu lo re re, a inthup thei hle anih loh chuan a duh tak tak lo tih na ani mai.



Anil-a a la chhuah loh avang chuan kan ban vel chuan Anil-a tlawh turin damdawiin lam ka pan ding nghal chat a...




"Aadvika bawihi, i chungah hian ka lawm takzet a ni, Anil-a mamawh hunah a kiang ah i awm reng ṭhin avang leh i lo la nghah reng avang hian" Simran Aunty chuan Anil-a discharge card kan nghah dun lai chuan a ti a


"Nilo e, Aunty, Anil-a zawk hian min lo la hmangaih reng avng hian ka lawm zawk asin" ka ti ve leh a



Discharge card chu la in Anil-a chu damdawiin atang chuan kan hruaichhuak ta


Zan lam ah chuan George in min lo phone ve tlat, ka lo hauh leh zek kha, nikhua lo lutuk mai...



Mut dawn hnauh ah Hlutei nen kan in bia, zanin a thil tawn te min hrilh a, ka hrethiam ta, Malsawmhlui hian Tluanga hi a lo duh ru reng mahse a pawm duhlo mai mai ani tih hi.... Mahse tunah chuan an inkar ah George a tlazep tawh tlat bawk si, eng tin nge a talchhuah tak ang le..



______________💠END OF EPISODE-13💠________________