TETAKTEI Ch 47 (cont) By Abbra Reo Ririni Khiangte(PitarteiSualfingi)

Episode kal lai dah luhna

Moderator: writers

Abbra Reo Ririni
Posts: 1237
Joined: November 10th, 2016, 8:57 pm

TETAKTEI Ch 47 (cont) By Abbra Reo Ririni Khiangte(PitarteiSualfingi)

Unread post by Abbra Reo Ririni » May 23rd, 2020, 9:36 pm

Chapter 47




Ka mit hmuh lai ngei a kham ațangin Bawihi zuang thla in min țhawn lutuk a vang a ka lungphu leh ngaihtuahna chawl duk a rawn harh chhuah leh meuh chuan inchhirna chhumpui in min zîm mup mup.


Lengkir ri hum hum te... thimchhah mup karah hmeichhe mangang ţap ri te! A pil rei tawh lutuk! tia au tuar tuar thawm te chuan ka lungphu a rawn pump rang dawt dawt a! Min hnawh tawt vek! Awm ngaihna hlawl ka hrelo!

"I nam thla... Lola kha i nam thla"


A sawi dik ang! Keimah teh hrep hian Lalhlimpuii kha zuang thla lo thei lovin ka dang chep a tin ni!

Ka nam thlak a ni!

Pawi khawih tu chu keimah ngei hi ka ni!

"Che suh.. i nupui kham ațang i nam thlak vangin man i ni tawh" tih ri te chuan ka mit hmu a thil thleng zo chiah kha mumang mai a nih loh zia a rawn nem nghet zual sauh! Inchhir luat vang a thinlung ipik zetin ka chhip sam hrawm tawk pah hian ka rum chhuak nghal hrawih.

Ka thluak chu a buai mup a, awm dan tur hlawl ka hrelo, thlan in min rawn bual bawrh bawrh ani ber, Bawihi kham ah a zuangthla! Chutiang thil rapthlak zet chu tilo thei lova nawr lui tu chu keimah ngei hi ka ni! Hun reilote chhung khan pawi ka lova khawh nasa hman teh kher em!


Nazet a ka sam țham leh tawk in ka che leh thut, ka hma ah police pa li ngawt rawn ding nghal khup te chu en in thaza zet hian ka insehruh nghek.

"Min lo dang hlek suh" rilru hmanhmawh vang a thinrim hlur chungin ka ti țhawt. Ka che chhuak leh thut a. Mahse, an pali chuan min rawn chelh bet leh tho a nih chu!

Hmelho phiangsen chu!

"thih in duh em?" Thawk zing phui chur vang a au tuar in an zinga pakhat chu ka hnek let nghal tawp.

"Mai mai che chuan, i nupui kham aţang i nam thlak hnuah tlanchhiat te i tum ngam khanglang elaw?" min rawn hual a. Kan ngaihtuahna in persan lutuk leh rilru beidawng lutuk bawk si chu ka nui chhuak hawk hawk!

Mahse chutia rilru mulehmal pu lo lek a ka nuih lai reng pawh chuan ka ipikna leh hreawn tihna chu rawn zul tulh tulh in ka thluak a buai zual sauh.
Bawihi zuang thla kha rei tak tui chhungah a pil anih ngat chuan thawchham vangin a thi dawn! Tunah te hian tui chhung thuk zet ah a pilbo mek a sin!

"Kutkawl kha bun tir ula, sawlai thingkung ah sawn lova thlung bet rawh u" ti khur khur a police pakhat in a nau te ho a hrilh chuan dawhtheihna tlak chham lutuk vang a thaza zetin min hnaih ber tu police pakhat chu ka hnek let leh nghal tawp. A puakruk pai chu rang zet a chhuhsak in police ho chu ka tin thut a.

"Ka second khat lek pawh min tih khawtlai sak leh anih chuan i thluak bur kha ka thlawh darh ang" ka ti tuar.


Lengkir luang ri hum hum karah chun mipa aw hian "kan la hmu lo... li mawng kan en nawn leh dawn" a tih leh meuh chuan ka chhungril chu hlauthawnna nasa zetin a rawn luh chilh tup tup. Bawihi țhiante lah mangan hmel lutuk in a ţap chhuak hlawp hlawp a.



Thim ipik chu a zual sauh niber hian ka hria.

"An la hmu lo maw? Keichu a thi hman ang tih ka hlau e.. Lalmate, tui chhung ka a vawt awm si, kan lo tlai deuh a ni, min ngaidam rawh aw.." ti a an țhîannu hming lam a an țap ri chuan ka thluak a nghawr nghing leh lawih tawh, ka bing deuh mup a! Minute 5 chhung lek a pil pawn a chuap ah tui a khat a nga!! Nungdam in ka hmu leh tawh lovang!

*ka uire lo..* natna te nen a chau zet a min au khum tu hmeichhia kha li thuk tak ah a la pil bo mek anih chu..

A hmel ah thihna a hlauh loh zia lang chhuak chung a a awn hnung riai riai lai kha chiang lutuk in ka hmu let kuar a! Pawitihna leh inchhiarna rit zetin min delh rih leh chur na vang chuan silai chu paih vutin ka ngaihtuahna buai nuaih ang chiah chuan ka che chhuak thut!



Engthil nge thleng zel tih pawh ka hre mumal lo..

Tui thuk zet leh vawt lutuk ah ka pil vawn vawn tih te, ka beng a tui inchhawk ri hlup hlup leh li thuk lutuk vang a thim mup hnuai ah chuan Bawihi taksa ka zawng mek tih te chu mumang ang ruai in ka hria....

Li thuk zet chhung a lungpui kar a ka thil dap fuh chu ka dap nawn leh ngat!

Bân...

Ka taksa chhung chu a nghing lawih.

Bawihi taksa zawi vek tawh ka hleuh chhuahpui hlawl rual chuan ka thaw kawk kawk! Tui ațang chhuahpui hlawl mahila a chal ațangin thisen a rawn hnam chhuak nghal a! Li kâm a mipui țha hnem zet lo pungkhawm te chuan rang lutuk in min rawn buaipui a, thil thlen hun chhung kha mit khap kar lek ani emaw tih laiin mipui za tel dawn an rawn fuankhawm hman tawh.


"Lalmate!" ti tuar tuar chung a a țhian te'n Bawihi taksa nunna nei tawh lo tih hriat zet a zawi hit vek tawh a rawn bawh rawk rawk lai te chuan thil thleng mek hi hrethiam lo lek a at daih ka chak hluah hluah. Mumang vek nise tihna in ka khat a.


Mahse, tui luang ri hum hum leh mipui phun mur mur te, emergency light eng pup in li thuk zet a chhun dum nguk mai te hian engkim chu a tak ngei a thleng anih zia a ti chiang hle bawk si!
Țîau kam ah ka mut rual te chuan tih mai tur hrelo zetin Bawihi taksa chu ka melh ngut ngut ringawt.

Hetiang hi Lalhlimpui chungah thleng turin ka la dah chhin ngailo! Thih maw? Huh... a thi ang maw?




"A la thaw em? "

"A la thaw em ka tih chu.." ti tuar a na zet a min rawn nam tu chu ka en a. Hlauthawnna nasat zet a hmel ah lang chhuak chungin Nuni chuan min sawi leh nawk nawk.


Chhan ka tum! Ka ngaihtuahna chu a ruak hung

"Ka ngaidam ngailo ang che" ka hmai ah ri zui chawrh, a tha neih zawng zawng sawm khawmin min nam nawk nawk a, Bawihi taksa chu dek ve tlak ka nilo tih te a sawiin ka hria...


" awi, a pil rei tawh lutuk, thawk chhuah tir ru.." mangna a khat hmeichhe au tuar tuar riin Lengkir leh ruam vel chu a khat vek.


"Ramhuaipa! I pawikhawih rapthlak zia hi i hria em?" thinrimna leh natna te nen min au khum tawn tawn in min rawn chum a. Min nam nawk nawk bawk.

"Kalbo rawh... kan țhiannu chung a i thil tih man hi i la hmu ang.. en teh, hmeichhe khawngaihthlak zet chung a i thil tih rapthlak zia hi" Bawihi taksa zawi vek chu kawk in khur dawt dawt hian Nuni chu a rawn au leh tuar tuar.


"Reh hlum i tum a.. a thi thei silo kha kham ah hian i paithla leh zel a maw? I va nunrawng em em ve.. a hrawk leh hmai a i kutthlakna hnuhma te hi engtin nge i sawifiah dawn.."

Sawi tur hlawl ka hrelo! Ka thluak te chu a â mup. Bawihi hrawk duk chur te chu hmuh a hreawm hluah hluah, sawtiang thil saw ka tih ngei chu ani bawk si!


Tu pawh chuan tualthat tu leh thi ve nghal tlak melh in min melh vek! Bawihi chu va hnaih ka tum lahin huatna mitmeng kha zet a min en in a țhiante chuan ka khawih ve pawh an phal tawh lo!!!

Ka sam huh hnuang chu tuai chho puat in ka rum chhuak kawk;

"Ka.. ka nupui kha a thi thei lo" ti chhuak sup in pan hnaih ka tum vut, a thi theilo tak zet!

"I nupui a ni tawh lo!"

"Chutiang thil sawi hlek suh" ka ti țhawt! Mahse, Nuni chu a nui hak a.

A nui hmel a min huatna nasa lo langve chuan thil tam tak min hriat chhuah tir zut zut!

"I nupui a ni tawh lo . Hre reng rawh.. tun dinhmun a a awm chhan pawh hi nangmah vang teh hrep hi ani tih hria la, i kut hmawr pawh in rawn tawk ve tawh suh" a țap zui hlawp hlawp.

Keimah vang ani tih ka chian em vang chuan insehruh țeuh in ka inhum khur ngawt ngawt





"I kut ngei a thah chungchang i sawi lai khan i tih tak tak ka ring lo a sin.. mahse...." insut hlawp hlawp chungin min en a.

"He hmeichhe khawngaih thlak zetin a lo hmangaih che hi chu khawvel a thil pawi ber a ni... a hringnun ah i lo lang ve kher te, amah hmangaihtu leh ngaihsaktu i ni emaw tia i lakah rinna pumhlum nghat a i angchhungah a lo tlu lut ta mai te kha khawvel a thil pawi tawpkhawk ber ani! Nang chuan a nun tihchhiatsak vek bak engmah tih i nei silo.... a nghawng a rehna hnuhma te... A hmai benna vang a duk vek te hi Lola hian a phu in i hria em?" a ti a, min uire sanna vang a ka thinrim lutuk leh thinlung na lutukin thawk pawh thaw thei lova ka reh nghek lai a Bawihi mitmeng thlaphang zet mai kha ka hmu let leh kuar.



Thlam chhung ah khan a changin ngaihdam na thinlung ka pu a, thawk leh khatah tualthah chakna in ka tuihal leh lawi si! Kei ngei pawh hian ka chet dan kha hriat a lawi ka neilo! Ka tih ngei ani ang tih erawh ka chiang! Min uire sanna leh sex video teh hrep khan min țhawngna teh thlawt em a! Video ka dawn ni ațang phei kha chuan ka ngaihtuahna leh nitin hun hman dan kha ka hrelo tawp tawp zel!

"Zahngai la, i thah tum taksa tal saw chu i kut hmawr pawn khawih ve tawh suh!" Min huatna nen a min melh in a rawn ti sehchilh nawk.

Țap hlawp hlawp chung a Bawihi an bawisawmna lam a pan phei lai te chuan â mup in ka ding ngawi reng.



"... maw.. a marphu.. a marphu a awm tawh lo maw?" ti a mangan zet a au ri vang chuan lei ah ka țhu hnawk.

"Lalmate.. a theih loh, a theih lo.. khawngaih in eng emaw tal ti r'u..."





Hun te chu a ding țhup mai hian ka hria. Thawk chhuah tir tum a Bawihi awmah an nam mawlh mawlh lai chuan inchhirna a khat ka thinlung chu a rum kawk kawk.

"A pasal kha a lo tlanbo a nge, kutkawl bun tir ula, thahna ah hruai rawh u"


Police in ka kut an rawn hnung khirh mawlh mawlh a, bawihsawm tu te kar ațang nunna nei tawh lo ang mai Bawihi taksa zawi ngiai chu ka hmu thei a, a vun chu tui vawt zet ah a awm rei lutuk vangin a dang var béi a, a hmui dukte, kut ka thlakna vang in a biang leh hrawk a duk ruih a, mahni nunna la duh tur khawp a beidawng leh na in ka siam ani tih ka hriatchhuah meuh chuan engkim a tlai zo vek tawh!




Min phih tho lawp a, Bawihi chu ka melh țawk țawk, a hrawk duk kual ruih leh a biang duk chur te chuan thihpui tham khawp a na min vilh ngut ngut! Min uire san vang a ka thinrim khawhmu lo khan hetiang tak a nasa hian ka lo sawisa chu a nia!



Tualthah tum ah min ngaih miau vangin police leh mipui rawn pungkhawm țhahnem zet in kut min thlak a, nâ ka hrelo! Bawihi marphu an hmu tawh lo tih ngawt chu min khawih rawn lai pawn ka thluak ah a ri tluk tluk. Ka hmeichhe hmangaih ber nunna chu ka tihtawp sak!

"Hetiang mihring nunrawng lutuk hi him pial a chhuah loh tur" ti bul bul chungin ka taksa chu a ri chawrh chawrh, ka rilru chawmawlh lutuk leh inchhirna vang a ka thinlung rum tlawk tlawk bak engmah hriat ka neilo! Tihluihna in Bawihi chanchin kimchang ka hriat ve hma in min hruai hrang ta daih.

InShot_20200523_182838646.jpg
InShot_20200523_182838646.jpg (71.12 KiB) Viewed 32833 times

Ngaihtuahna buai zet in ka thaw chhuak hawlh hawlh reng a! Ka thinlung chu a ipik a, inchhiarna chhumpui chhah zetin ka chhehvel chu thawk lak harsa khawp in a rawn zîm tuau tuau a! Bawihi kha a thi nge a dam tih ka hre zui hauh silo! Lung zîm mup chung in Jail chhung ah chuan ka vei tawn chhen, a chang leh beidawng lutuk in ka rum chhuak a. Thim in min tuam ani ber!

"Thi suh, thi miah suh.. hremna min pe tur talin tuar chhuak rawh" ti chhuak sup sup in ka vanvadak a.


*Hetah hian engkim tawp rawh se* khawvel ah beisei tur a nei tawh hlawl lo tih hriat zet a mit a chhing lai kha ching fahran in a rawn lang uar... ka kut kha chelh ka tum a! Ka tlai a nih kha!


Hrep a!


Cement bang chu chum bur in ka tauh chawrh chawrh! A kut kha ka chelh hman lo... mahni hmangaihte kut pawh chelh nghet zo lo chu eng ang mi nge ni ngai!

*a marphu a awm tawh lo maw?* Lengkir tui inkhawh thla hum hum kar kha ka thlarau chu hnutchhiah a awm in, Bawihi chung a ka chet dan nunrawng zet te khan an nghaisa luai luai niber in ka hria.


Na ngut ngut siin ka lungphu chu an ri dawt dawt a, pawitihna leh inchhir lutuk vang a tisenzam pawng chhuak țawlh țawlhin ka taksa chu a sa chhuak vek... ka thinlung chu a rum a, Bawihi hmel chiang zet a ka hmuh leh chuan a lakah inchhir lutuk vangin ka mittui a rawn luang chhuak hial bawk! Țah chhuah vak a, au nghek ka chak hluah hluah, chu tal pawh chu ka pawikhawih lian tham lutuk vang a hremna ka dawn vangin ka ti thei chuang lo!




/


*Ka uire a vangin min ngaiam rawh... chutiang chu i sawi dan tur a ni lo maw?* thinlung kehsawm vek a min huatna te nen a min melh tu thusawi chuan min tina ngawih ngawih.



"Ka uire lo, keihi ka uire lo.. kan chhungkaw keh darh vek phahna leh ka nu nunna in a tawrh phahna khawp a thil sual rapthlak hi kei hian ka thlen tir ve lul lo.." min puhna chu na ka tih em vang a thinlung na zetin ka ti a. Ka mittui a luang zawih zawih bawk.




"hmeichhe chhel tak i nih kha, lo harh chhuak vat rawh" ti sup a ka bek a mittui luang thla lo fawp tu hmui lum chu ka la hriat ngailoh ani.

"Lola, harh chhuak tawh rawh" ti nawn leh sup in ka bekah bawk a rawn nawr tawk, ka hriat ngailoh lumna nimahse ka hahdampui ngawih ngawih.





Ka meng chhuak riai riai a, phe ruai in eng lo lut chu ka hmu a, mit chhing leh in ka thluak leh taksa ngawng chuah chuah chu tih harh ka tuma; mit ka men nawn leh chuan ka khawhmuh pawh a fiah ta deuh.




Khawl kîu ri leh thawm ri vung vung ka hre hmasa ber. Ka mitmu chu chet kual in ka awmna hmun chu ka en kual a, ka hriat ngailoh pindan chhung tih zawng ka hmu thiam.

"Awi! Lalmate i lo harh tawh maw?" awilohna leh hlimna inpawlh tel nawk aw ri ka hriat rual chuan Nuni hmel a rawn lang hlawl a. Kimkima leh Remremi te pawh an rawn lang nghal zat.



"Mit a rawn meng tawh, a va lawmawm em? Lalmate, min hrethei em?" mittui tling khat vek chungin ka biang an rawn khawih a, țah insum tih hriat zet a min en ngawih ngawih chu hrethiam lo zet in ka en let hu ringawt.

"Kimkim doctor va ko rawh" Nuni chuan a ti a, ka biang ah lo chul leh thuak in Kimkima chu a tlan chhuak nghal a.


Reilote hnu ah Doctor leh nurse te nen an rawn let a, in min rawn check a, ngaihțhat hmel zet a lu bu nghut nghut in khawl țhenkhat chu a laksawn theih thu nurse te a hrilh a, an che nghal zung zung, ka țhiante pathum erawh in mitthi tho leh ang mai hian min en in ka hria! Hlim bawk si, awi loh hmel pu chung siin an inkuah khawm a, an awm dan hrethiam lo zet a ka en na chu an nuihpui a, an țap tel tho bawk!


"Hei hi eng zat nge?" A kutzungțang pathum ti pir pahin Doctor chuan a ti sup. Engzawhna nge maw ni ngai le.

"Pathum"
A bu nghut a.
"Anih hei hi.."

"Pakhat" nui sakin ka dar ah kut a rawn nghat a.
"Awm hahdam la, nakin deuh ah test kan nei dawn nia.. i rawn harh chhuak leh chu a lawmawm hle mai, i țhiante hian nikhat lek pawh an thlahthlam miah lo che a nia" ti leh sup in ka țhiante pathum chu va melh thuak in min nuih a.


🤪Hemi thleng hi nizan khan ka type hman a, ka lo muthlu daih a. 😂 Nilengin Ahma ka buaipui leh sia. Zanin dar 11 rik dawn ah ka type belh leh sawk sawk! 🤣 U Mawii in lo hau em? 🤣🤣



Doctor chhuah hnu chuan ka țhiante pathum chu khum tlang ah leh chair ah te lo țhu hnaiin min han thlek vang vang a.

"U Hriatpuia pawh i harh tih kan hrilh a, a lo thleng țep ang. Darkar khat kal ta khan chawl hahdam turin kan hrilh a, a haw deuh chiah mawle.."


Ka bu nghat ringawt.

"Awi! Lalmate ka lawm e, kar hnih chhung khan vawi khatmah i lo harh bawk silo a, kan mangang hman a lawm" Kimkima chuan min kuah chung chung chak hmel zet hian a ti a.

"Kar hnih chhung ka harh chhuak lo a maw!"

"Aw, kan hlauthawn hman zia chu!!! Social media lamah lah Prof Msa nen inchungchang hlir an khel a, țhenkhat in i thi an lo ti thul.."

"Prof Msa..." ka tih ve sep rual chuan ka chhungril hi hlauhna nasa zetin a rawn tuam a, khawl ang a chakin Lengkir bul a thil thleng te leh kha zan kut min thlak lai te, min sual luih lai te kha a rawn lang nghal zut zut!

Ka taksa pum chu a vawt hit nghal vek ni mai hian ka hria.

"Police kutah a la awm, tuman an be țawng zo lo" Nuni chu ka melh zeuh a.

"Kan tihpalh lutuk aw, kan rawn tlai hret a... Ruah sur lai khan huan hnathawk tu in i hlauh leh hlauh loh lo zawh che tum in i riahna thlam kawngkhar kha a rawn sawi a.." a tih lai chuan ka ip nghal chawi.


Prof Msa'n ka kâ a hup bet a! Thawm ka siam anih chuan keimah mai nilo huan enkawltu te chhungkua pawh a thah vek hreh loh thu a sawi miau vangin engmah ti ngam lovin ka tuar tlawk tlawk a nih kha!!


"..... i chhang thei silo a, a tir chuan i mut ngheh vang ah ngaiin a let san leh che a. Mahse, ruah hán (ban) deuh hnu ah gate pui a inkalh țha ngei em tih a va ennawn leh khan gate pawn ah bolero inhung reng a va hmu ta a... ngaihțhat lohna pawh a la nei chuang lo. Mahse, keimah i chanchin ngaichangin ka rawn call a, tah chuan bolero a hmuh thu chu a sawi tel satliah a. Mahse, prof Msa bak anih ka ring ta lo a, a țawngkam hman duh dan te ka ngaihtuah let leh in hnathawk tu inkawngkhar a lo sawi a, i chhang miah lo te khan thil maksak pui pui min ngaihtuah kual tir a, police pun in kan rawn kal ta tawp... kha ai khan lo thleng hma hret ila chuan kham ah khan a nam thla miah lo ang che, Lengkir pan a um lai che kha kan rawn hmu hman a lawm. Mahse, kan rawn thlen ve meuh chuan..." sawi zo thei lovin a thaw kawk a!


Kei ngei pawh engkim kha chiang zet in ka la feel let vek theih vangin ka thawk a chham ti tih der!


"I hlau ngawt ang, a nam thlakna che kha a sang si! I thih lo kha a mak a sin! Tui chhung ah khan i pil rei lutuk! Tui a lian in a vawt bawk si... kha ramhuaipa kha i lo harh chhuak tawh bawk a, damchhung a tan tir dan kan ngaihtuah dawn nia" thinrim zet hian a ti sehchilh nawk nawk.


"Kham ah khan min nam thla hleinem!" ka tih chuan ramhuai an hmu ta mai emaw tih tur khawp a phawk in min melh kawk mai!


"Lalmate..."

"Min nam thla lo, ka zuang thla alawm" ti sep in mit ka chhing a. An pathum chuan an reh tlawk tlawk.

"Mahse, prof Msa pawn a pha hleinem, ka tih awmzia chu kut a thlak che a.. kan hmuh tirh che phei chuan i nghawng kha a duk kual vek, i hmai te nen... i taksa dang pawh..'' țah chhuak zetin ka insehruh nghek ringawt.

"I hrawk a rehna hnuhma te kha amah tih vek tih kan hria, kham ah khan nam thla lo che mahse tuar tir ve rawh! A nunrawng e mai, court ah a chungthu ngaihtuah tur a nia , i harh chhuah rih loh vangin Jail ah an la khung rih.."


"Court.." ti sep a ka men chuan an lo thaw hak a.




Kha zan a thil thlengin mipui a țhawn nasat zia te leh vawiin ni thleng a social media a an chaw tui ber kan la nih thu te, prof Msa phei chu a hna ațang a bang tur a tihna te leh na tak tak a a chungchang khel rawn a nih thu te an sawi a! Tupawn Lengkir sang zet ațang a kut a thlak hrep hnu a nupui ruk thar a nam thla thei kha rapthlak an ti vek!




An lo rin ang a mipa zahawm leh puitling a nih loh chu mak an tih tluk zetin diriamna a tawk nasa tih te an sawi a, post țhenkhat min en tir an tum chuan ka en ngam tlat lo!





Diktak chuan min rehhlum a tum vang te, min benna te leh sual luihna te vang khan ka hua a, dam ka thlakhlehna te an bo vek anih kha! Chu chu remchang ah la in prof Msa ngei pawn a pha bawk silo nen kham ațang min nam thla tiin rei tak chhung jail ah ka tan tir thei reng... mahse, zuan thlak kha ka duhthlanna ani a. Ka nun beidawng lutuk leh beisei tur awm tawh lo vang a thih thlang ka ni! Vanduai thlak ka ti dawn nge... thi lovin ka harh chhuak leh tho a! Ka nunna lak ka tum vang a midangin hremna an tawrh daih kha ka duhlo! Aman ka nun a tih hremawm lutuk vang a intihhlum tum nimahila a nam thlak ka ni miau lo!






"Ka pa a lo kal ve țhin em?" Prof Msa chungchang ngawt hriat duh lovin thil dang ka sawi ta daih.





"Ughg, aw, kal țhin e, a ngaihtuah lutuk che a lawm... " Remremi chuan a lo ti thuai a. Mahse, a thusawi chu amah ngei pawn a awi bik chai lovang.




"Jordan phei chuan kar hmasa chhung zawng khan a awm chilh chawt che a. Mahse, a mawhphurhna a lian tham tawh sia, tunkar ațang kha chu hna a khawih ve leh tawh a, i harh tih kan hrilh tawh a, a lo lang ve țep ang"



"Ka hmu chak tawh reuh" ka ti sep a.




"A lawm ngawt ang, a ngaihtuah lutuk che kha hmuh a hreawm zawk.. e, Kimbawihi nen khan an innei leh dawn lo te an tiin ka hria"




"Maw?"



"Ka chiang biklo.. ka hrethiam teh nuaih lo e, Kimbawihi erawh in thlah a tum loh hmel khawp mai. Jordan hian ngaihsakna chetemah a nei tawh pawn ka hrelo!" A ti leh a.



Ka harh chhuah loh chhungin thil thleng a lo va tam hman em ka ti rilru a, Jordan chu ka la bia ang! Chutiang ngawt a inhual na a neihpui tawh nen an inzawmna tihchah ngawt chu thil dik pawh a nilo



"A u Jail ah a tang bawk sia, an chhungkua chu an mualpho ve khawp mai" thawk ip tlat in ka inhum ruh leh nghek tawh!.





Sex video a keimah ang zet hmeichhe chungchang kha chu ka pa lo kal hun a zawhfiah ah tiin ka sawi chhuak ta lo.





"E! Lalmate, kha, Zodika nen khan in lo inhre reng elaw, awi, a chhelo rapthlak si" Kimkima'n a lo tih tak duaih ah chuan mak ti zet hian ka en a.



"Zodika maw?"



"Awi! Enteh, a ngaihtuah zia che kha hmu ve mahla" a ti a, kut thing nawk nawk in an thaw leh hak phawt a, Nuni te pahnih chuan an lo nuih tet tet.



"A cool si, pro Pastor tur a ni leh nghal, a rawn tlawh awl lo che a, a lo kal apiang in rose par a lo keng ziah leh nghal, hei pawh hi tukin a a lo ken sak che a nih hi" ti pah in khum bul dawhkan sang a rose parsen nalh zet inkhawi chu a ban a.



Mak ti fe hian ka lo en reng ringawt. Ani kha chu Ngopa ah a haw daih tawh lo em ni?




"Engtin nge in lo inhriat hman a, a number pawh min pe; i chanchin a lo ngaihven ve reng a, tukin khan a chhungte'n an lo chah nasa ve tawh si a, Ngopa ah a haw chho ta anih kha, a kal hma in a rawn tlawh hram che mawle.." ler zet a meng kual chungin a ti lawng lawng a.




Rose par chu nui var var in ka hmai in ka nawr a, pangpar hi ka la dawng ngai miah lo.



"Ngopa ah a haw daih tawh emaw ka tia.."



"Haw lo, thil thlen zan khan khawpui hi in luah khat nghal vek, Zodika pawn a lo hria a, hospital kan luh hnu ah a lo kal nghal a lawm.." phur zet hian a ti a. Nuni te pawh Kimkima phur lutuk vang chuan an nui an nui mai.




/





"Ka naute" ti sup a u Mama'n a awm lum nuam zet ah min kuah khawm hlu hlu meuh chuan ka țah a rawn chhuak ut ut.




"I lo harh tawh dawn lo emaw kan ti hman a lawm" ti leh sup in ka bekah a fawp a, chumi rual chuan ka mumang emaw ni a ka bek a mittui luang lo fawp tu kha ka hre chuak nghal zawk.





Ka u rual in ka pa pawh a lo kal ve a, Becki pawh damdawi in ațangin a lo chhuak tawh a. Amah in a chetsawn theih vang loh vangin Muani'n a awmpui a, a lo kal ve thei rih lo tih a sawi sup a.






Ka u chuan duat zetin ka sam a chul hluau hluau reng a, min chan tawh mai dawn emaw a tih vang a an lo hlauthawn zia thu a sawi lai te chuan ka pa chu ka mit sirin ka en țhin a. Ka harh chhuah lawk loh vangin a talbuai ve pawn ka hrelo.





"Pa, phirpui ka nei em?" ka tih chhuah phawng chuan ka pa chuan min en deuh dawrh a.




"Neih awm ka hrelo... ngatinge nia?"




Ka u leh ka țhiante pawh chuan mak tih hmel zetin min en a, phir pui ka neih siloh chuan video a hmeichhia kha tunge nita ang le? Kan inang tak zet!





"Mate.." ti sup a ka u in ka darah a lo vawn chuan tawite a nuih in ka thaw chhuak hak a.






Ka thil hriat ang ang chu ka hrilh ta vek; Prof Msa'n video leh thlalak a dawn thu te, kei ngei pawn video a hmeichhia chu ka hmu ve a, kan danglamna ka hmu lo tih ka sawi chuan mak an tih hmel kher mai!






Prof Msa sawi kha a dik anih chuan video a dawn ațang a inthlak danglam vek! Ka uire san emaw a ti a.. a thinlung ka tih nat zia a sawi lai a a rum ri kha ka bengah hian a la cham reng bawk.





"I pian zan kha vanduaina a thleng nasa lutuk a, damdawi in hnathawk te pawh kha an talbuai ani ber, i nu in thisa a nau a hrin hnu lawk ah.. aa, tikhan i nu a rawn lum lut a, raicheh in a boral ve leh nghal a, tute pawh kha an talbuai tlang ani ber ang chu... doctor kha chu nangmah chiah hi kan enkawl tur khan min sawi hmuh a, i nu khan phir nge a hrin nangmah chiah tih a sawi tel hauh lo" a ti churh churh a.





Ka hriat duh tak ka hriat tak loh vang nge ka thaw ham ham ringawt.






Test te kan han nei leh a, ka harh chhuah lawk loh chhan kha doctor te pawn sawi fak tur an hrelo! Ka lu ah hliam chu ka tuar ngei a, li thuk zet ah force na lutuk a ka tlak luh rual khan lung ah ka intauh. Mahse, kha khan luruh khî leh hliampui dang min siam em lo.







"I ti thei ang maw?" Min ngaihtuah hmel zet in ka u chuan min en a. Nuih lui in lu ka bu nghat.





Damdawi in kawr chungah chuan ka kawrlum min hak thuah tir a. Jail a prof Msa tang hmu turin kan kal dawn.




Ka hrahchhuah ațang ni 2 a liam leh tawh a. Damdawi in ațangin ka chhuak theih rih lo nangin, thudik lo hmang a prof Msa'n Jail a tan reng hi a dik ka tilo, min mawlh run a, police hnen ah thudik ka sawi a nga, chhuah an rem tih chuan a chhuah theih mai ka beisei.





"... uire na in a mi den a nat zia chu ka tawng ve tawh a, a rapthlak tih bak sawi chiam dan ka hre lo! Kei ngei pawn Melo-i kha thah daih hial ka chak rum rum. A chhungte khan la hrang vat lo pheise chuan ka sat hlum duh hial ang. Msa pawn video a dawng si a, uirena kaihnawih anih tawh chuan puitling tak a engkim ngaihtuah fim a harsa tih hrechiang ber tu ka ni... video a hmeichhia kha nangmah nilo mahla nang pawn indanglamna hmuh tur i hrelo anih chuan i pasal tan phei chuan rin tawp loh chu tih theih a vang viau ang... kut a thlak che a, a sawisa che kha a dik ka tilo! Ka farnu kut a thlak vang pawn a lakah ka lungawi lo tak zet! Mahse, a dinhmun ah inchan a, a rilru kehsawm dan tur ngaihtuahpui chuan hriatthiamna thui tak ka nei lawi! Ngaidam a, in inneih zui leh zui loh chu i thuthlukna ni rawh se.." tiin ka u in nizan khan min hrilh a.





Nikhawhrelo a ka awm chhung khan prof Msa hmu turin Jail ah a lo han tlawh fo a. Mahse, a be țawng zo lo. Tui sik tak ngial pawh in lovin leh amah leh amah intina zawng hlirin a khawsa a, Jail chhung ah an dah luh ațang tumah in a be țawng tawh lo tih te chu kalkawng ah min hrilh mual mual a.




Police station kan hnaih tulh tulh a. Khami zan a prof Msa chetphung rapthlak lutuk leh a mize inthlakthleng thut thut vang a rilru buai ang a a khawsa kual vel ka mitthla let phei chuan min hmuh hun ah kut min lo thlak hrep mai hluahna hian ka khat a!




Ka chhungril chu a khur dar dar, let leh daih mai duhna hian ka khat bawk.



Link:
BBcode:
HTML:
Hide post links
Show post links

Abbra Reo Ririni
Posts: 1237
Joined: November 10th, 2016, 8:57 pm

Unread post by Abbra Reo Ririni » May 25th, 2020, 10:25 pm

A tawp note i chhiar rawh aw😢😢 Hei Ahma rawn chauh thut hma a ka type hman zawng



Rilru mumal pawh pu hleithei lo chuan hma lam ka melh ngawt ngawt.


Ka u pawh chuan biak vak chi ka nilo tih hria in ngawi reng hian motor chu a khalh a.




Engtin nge prof Msa khan ka hmel ang tak te sex video kha a dawn ngawt theih?



Tu pek nge ni ang?


A pe tu chuan engvang a pe nge a nih?

Prof Msa'n video kha a hmu a nih chuan keimah emaw tiin uire ngaihin min ngai nghal dawn tih a hriatsa vek ka ring! Chuthil chu a duh leh tum ber pawh a lo ni thei.



Prof Msa nen kan ințhen rual a hlawkna lo tel thei an awm em?

Pa Saia.

A ni khan a fapa nupui a tan min duh ngai hauh lo! Thinrim engphiar in Malsawma ngeiin in ațangin min hnawhchhuah tur thu a sawi hial tawh bawk.

Heng thil zawng zawng phen a mi hi Pa Saia vek ani thei mai a ngem? tih vel chu lungphu sa bulh bulh chung hian ka ngaihtuah ngut ngut a.




Prof Msa video thawntu khan chiang takin video a hmeichhia kha a hre ngei bawk ang! Chumi hnen ațang vek chuan rapthlak khawp a ka hmel an pui nen khan inzawmna kan nei em tih pawh ka hriat theih ka ring.


Ka tih hmasa ber tur chu prof Msa hnen a sex video thawntu kha a rang thei ang ber a zawn chhuah a, video a hmeichhia kha tu chiah nge a nih tih chhui zui; khawvel ah hian sawifiah hleih theih loh khawp a hmai tlang in ang tak tak an tam tawh. Mizo te ah pawh thisen inzawmna nei miah lo. Mahse, in ang em em si sawi tur an awm nual. Chutiang a ka an pui mai mai chung nge nia ang, ka phirpui tih hriat chuah ka duh tak zet!

Mit ka chhing a, chiang zetin kha zan a video min en tir laia prof Msa hmel a natna lo lang chhuak kha ka la hmu let thei!



Thinlung kehsawm ve tih hriat zetin min rum khum a, na a tih zia a sawi thlawt bawk a nih kha!



"Mate"


Phu nghek in chik fê a min lo melh tu chu ka en dawrh.
"I țha em?" ka darah a kutphah lian zet a lo hmer pah chuan a ti leh sup.


Ka thaw hak a, lu ka bu nghat.


station kawtah car a lo ding tawh a, ni sa țang ut in station kawt a motor inhung darthlalang a chhun tlet sur te chuan rilru nawm loh na nasa zet min thlen in ka lungphu chu a rang nghal dawt dawt.



Ka hriatthiam loh engthil enaw hian min mawlh tlat a, ka thlan deuh hluam bawk.

"I duh chuan keimah in police te chu ka dawr thei tho a nia. Ka hruai let leh mai ang che aw" ka sam tla lo hui sawn pah chuan a ti a.

"I hmel lan dan hi a țha miah lo, thi dang mai tur hmel i pu.." ti sup a mit zîm sun a min en chuan tawite hian ka nuih lui a.


"Nangmah a police i hmachhawn chuan thu min zawt fiah turin an lo kal leh dawn tho a sia... ka țha" thaw hak in Police station nelawm loh zet chu ka melh a.


"Ka ti thei ang" ti leh halh in ka kut cher zet chuan seat belt ka hmet phelh a. Ka u chu a chhuak nghal vut.


Ka insangmar țeuh a.



kham sang zet hlauhawm zia ngaihtuah thiam lo lek a min ching rethei a; nung dam a awm aia thihna țíhbaiawm zet thlan awm zawk hial khawp a min ngaihtirtu mihring ka hmawchhawn leh tur chuan ka chhung lam hi khawsik tur ang maiin a rawn țham ur ur thei mai lawm.


Motor hunna ațang in station chu kê in kan pan leh a, sex video kha darh ta se mi zawng zawng in keimah emaw tiin ka mualpho viau ang tih thleng in ka ngaihtuahna chu a kal bing leh ngut ngut tawh.


"Lola..."

Kan ding dat a, ka darah ka u in min rawn kuah a, aw lo chhuahna lam ka en phei chuan ka thaw chhuak hak mai.

Rsa leh Jacob te chu kan unau lo dinna lam pan chuan an rawn kal phei a. Prof Msa țhiante ngei ka beisei loh lutuk a ka hmu thut chu ka hamhaih vek hian ka hria.



"I țha zel maw?" ti sup in kan bul ah an rawn ding nghal khup.

"Ummm"

"Thil thleng vel hi a zialo khawp mai, nanglah nikhawhrelo in i awm zui ta reng sia... mang in ti ang dun khawp mai" Rsa vek chuan ti churh in ipik hmel zet hian a thaw hawk


An pahnih hmel chu ka en a, mut mu hmu țha lo tih hriat zetin an hmel te chu a thîm khup a, a sawi ang tak takin mangang a talbuai hrep hmel hi an pu.


"Msa-a chu eng nge a an a?" Ka u in a ti ta hlauh.

"a la ngai, kan be țawng zo bawk silo, tukin pawn anu eitur siam kan ken sak a, melh pawh a lo melh duh lo! A awm dan hi a mangan thlak em a ni!" ti hulh ipik hmel zetin a kutphah lian zet chuan hmai a tuai nghal puat.



"Lola, nangtal chuan thudik sawi chhuak hram teh aw.... Mipuiin an diriamna zozai pawh hi a rapthlak lutuk, i lakah tih dikloh tam tak chu a nei ang tih ka hria! Chungchu ngaidam rawh ka ti hauh lo! Mahse, kan țhianpa hian kham ațangin a nam thlalo che tih tal chu sawi chhuak ang hram teh! A nam thla lo che tih ka chian lutuk zetin ngangpawn i chiang tih ka hria. Marawh chu Malsawma rilru buai sawn a nam thlak i ni ah a ngai tlat a, i hmel a hmuh hun chuan țawng chhuah nachang te pawh a hre ve tawh mahna, kha zan a in nupa inkara thil thleng kha engmah kan hriatpui ve lo che u, i hriat a tan ka duh erawh i chung a a thil tih vang khan saw mihring saw a inchhir hlum lo chauh tih leh a rilru lam thlengin a nghawng tih tal hria la, thudik zep țhen lovin engkim sawi chhuak ang che... i duh leh i chung a a tihsual dangte vang chuan case ziak lut rawh, kan dang lo ang che... thudiklo vang a mipui in an dem rawn luai luai erawh hriat a hreawm e mai" a țhianpa tan a thanat hmel zet hian a ti hawk a!


A ipik zia leh dawt hmang a an țhianpa an sawichhe luai luai mai ná a tihpui zia chu patling țhankin tawh nimahse thup ngaihna a hre bik hlawl lo ani mahna!


Ngenngawl zet a min en tlawk tlawk in a thaw hulh hulh mai.


Kan kalsan dawn thleng pawh chuan 'thudik sawi hram teh aw' ti ang hrim hian min en zui a.

"Jail ah Msa an dah luh zan ațang khan station ah hian an tal deuh tawp tawh, nang lah thudik sawi turin i harh chhuak thei bawk silo a. Kan tan tak pawh a nuam lo, tihhlum tum che a kham ațang a nam thlak i lo nilo leh zel bawk nen tunah chuan boruak rit lutuk pawh a ziaawm tawh tur ah ngai ang" ka u chuan a ti nghut.






/

Ka hma Police officer hmel nelawm loh zet chu melh in ka kut thlah huh dap chu ka hum tawmin ka ti pharh sek a. Ka thusawi chu uluk fê a ngaithla in min melh run, police pakhat in ka thusawi apiang chu lehkha phek ah a ziak lut zung zung bawk.



Kham ațang khan prof Msa nam thlak ka nilo tih ka sawi lai chuan report ziak tu police chuan awi loh hmel zetin min rawn en phawk kawk a.


"Mami, vau tu i nei em?" venthawn hmel zet a Officer Carlos-a melh zawk pah chuan a rawn ti hlawl.

Lu ka thing nghat a. Officer Carlos-a hmel ah erawh mak tihna a lang chhuak ve lo! Prof Msa tih a ringlo sa hrim hrim te pawh ani mahna.


"Mipui thinrim lungawi lo hian i thusawi hi an ring miah lo ang. Vau tu i nei anih chuan Police lamin hma kan la nghal thei a nia" report ziaktu bawk chuan a ti leh nghut.

"Thudik a lawm ka sawi..." ka ti a, min ringngam chiah lo hmel pu chungin a thaw ta huai ringawt.


"... umm, Kham ațang Malsawma'n a nam thla lo che. Mahse, i hrawk a rehna hnuhma leh i hmai a kut thlakna duk te kha a tih ngei a nih chuan case dang pawh i file leh thei tho" officer Carlos-a chuan a rawn ti ta nghut.


Police pa kut aţang chuan report ziahna lehkha chu a la vut a. Dawhkan ah dah thlawp in min en nghal run.

"Aih, report siam vel kha ka mamawh lo!" Ka u in nghet zetin ka kut a rawn hum nghal zat.


Police officer room ah kan awm lai chuan police pakhat a lo lut a.



"Sir, mi tang chu i sawi ang khan rawn hruai chhuah kan tum a, awmzia a awm lo" a rawn ti.


Officer Carlos-a chuan min melh zawk a. Mahse, rei min en lovin kawngkhar a police chu a buk khum nghut ringawt.


"Nangmah ngeiin i pasal chu va hmu la a fin thlak zawkin ka ring" ti sup a kan unau a min en thuak chuan ka taksa pum pui chu a sa chhuak leh vek tawh!


Hman zan a rilru buai ang mai a chet dan kha ka hmu let zut zut a! Pawisak nei lo zet a min rek ngawt ngawt chung a vawt zet a min nuih lai hmel te!


"Duatte" ti chung a ngaihdam min dil hnu lawkah lungdam lo tih hriat zet a min beng leh chawrh mai te kha ka thisen hian a la theinghilh reng reng lo!


"Ka hruai ang che u" ti nghut in police officer chu a ding vut.

Chiaia zetin ka u chu ka en a, lu a lo buk nghut chuan ka hreh lutuk vangin ka thidang lo chauh ani ber.


"Ka... ka hmu duh lo" ka ti chhuak țîau.

"Mate..."



Lu thing nawk nawk in ka u chu ka en a, ka țah a chhuak ut ut, diktak chuan ka hlau ani! Inhmachhawn leh ngat phei chu a țîh hian ka ţîh hluah hluah.




Thinrim thut a a chet duh dan kha a rapthlak lulai lutuk a, a hmuh theih leh khawih theih ah ka awm anih chuan min that mai ang tih ka hlau!

"Hmu lawk ila, ka hruai haw ang che" ti sup in ka u chuan ka kut chu a hmer nghet zual sauh.


Police station chhung ah meuh pawh min that tur ang a ka ngai chu țhenkhat tan chuan a atthlak hle ang tih ka hria.


Mahse, kha zan a a chet dan rapthlak lutuk leh țîhbaiawm zet khan ka tiril a la ti khur a! Ka hmel hmu leh chiah se, inthunun hman lo lek in kut min thlak leh chawrh mai ang tih hlauhna hian ka khat leh vek tawh!!






Cell dang dang chu kan kal pel zel, tha khur dar dar hian ka u kut chu nghet zetin ka hum bet tlat.


Kan hma a Police officer kal khup khup chu ka thihna tur a min hruai tu ni mai te hian ka hria!




Bang kila Cell tawp ber kawngkhar zawn ah chuan ding nghutin cell inkalh chu a hawng a, thir inkhak ruai ruai ri te chuan ka tiril a țham za zawr zawr.


Officer chuan kawngkhar chu a nam hawng a, a chhung ațang chuan rawn che thutin min rawn khawih nghal mai ang tih hlau ru zet a tîm chawi chung hian ka u phen deuh ah chuan ka biru dai!

Ka ku chuan min kal hnaih pui leh deuh a!

Mahse....



Cell kawngkhar inhawng huau chhung a ngawingul a mipa lo țhu kun run ka hmu chiah chu a lan dan in min țhawn em avang chuan ka thawk a tawp chawt!!!


Awilo zet hian ka u chu ka en chho dawrh a!

A chhung a mi saw prof Msa ani ang maw?


Ka u chu ka ngaihtuahna hrethei ang hrim in a lo bu nghut a, kei erawh eng nge ngaihtuah ber tur hrelo in ka thaw chhuak hawk.



Thirkawngkhar chu ri bur khawp in Officer Carlos-a chuan bang ah a nam vaw bur. Ka phu nghek a.


Mahse, cell chhung a mipa bawrchhawr zet chu chhete pawh in a che lo.



"A chhuak thei tih hrilh la, i duh chuan i kal san thei ang" ti nghut in cell chhung lam ah chuan a thle nghut.



Thaw dep dep in ka u chu ka en a. Hmelhmuh hahdam thlak zet a min nuih suk in ka kut chu a thlah a.

"Va lut rawh, a tina lo ang che" a ti sup bawk.

Ka hmel a hmuh rual dimlo zet a kut min thlak leh chawrh mai loh nan a rilru țawngțaina nei mawlh mawlh chungin ka pen lut a.



Khum chung a pa lian zet chhuat bih a țhu kun ngul chuan kan thawm chu a hria pawh in a lang lo!




Rilru buai, țawng nachang pawh hrelo, a chhehvel a thil awm ngaihsak lo lek a rilru kawm ngut ngut țhin hi a ang ber.



A hma chiah ah chuan ka va ding a, thir kawngkhar inhlap bur ri vang a chhete pawh a che hlek lo mipa kun ngul chuan muang ruih in a kutphah hrawl zet suih zawm chu a phelh a.



"Ih.. professor, i chhuak thei tawh...." khur dar dar hian ka ti a, a lo hawi chhuak ruai ruai


"Kham ațang khan i nam thlak ka nilo tih ka sawi tawh a, i chhuak thei tawh" ka sawi zawh rual a mipa lo hawi chhuak hmel ka hmu chiang chiah chu ka chhung lam hi a na nghing lawih!

A chal chu a duk thluah a, thisen duk zet in a lo hnam chhuak tel bawk, a hmai leh bek thlengin hmul a țo khat vek a, chu mai pawh nilo in a mitmeng chu a â ruai.


Ka hmel a hmu chiang chiah chu engkaw sawi set set lovin ka kut ah lo man lawp in min phih thut a! Na lúa awm lova kut min thlak leh chawrh hlau zetin ka khek nghal tuar!


Mahse, chutiang thil chu engmah a thleng ta lo!

Ka bawh rawk a, a malpuiah ka țhu thla a, nghet zet hian min kuah bet nghal hrawk.

"Duatte" ti hrawih in a rum hawk bawk.


A awm dan vang chuan hlauthawnna nasa lutuk in min tuam chhuak nghal vek, a mizia second kar lek a danglam thut thut țhin ang khan rawva zetin a che leh dawn a ka hriatna chuan ka tiril a ti khur ti tih der.



"Duatte.. min kuah teh" a ti leh sup, thil dang sawi leh a tum a. Mahse, hrawk chhung ri hrawih in a aia nghet chuan min kuah bet a, tîm zet in a lungphu ri dawt dawt chu ka ngaithla a. Prof Msa erawh hahdam huai ang mai hian a thaw suai suai.

"ka thlarau thleng a rethei zet a min siam i tum em ni?" ti hrawih a, a taksa ah min kuah beh tulh tulh chuan ka lo îp chawi.


"Min kuah teh.. mawh?" rawl lian zetin a ngen hian min ngen ani ber.

ka kutin a awm ah ka nam a, min kuahna ban tha chakzet ațang tal chhuah ka tum rual chuan amah zawkin min kuah behna chu a thlah hlawk, a thinrim leh thut emaw ti a hlau zet a ka tawm nghal chawi chu rang zet hian ka biang ah rawn dawm nghal zat.

Țîm sawk in nghet zet hian kut ka hum ruh chawt chawt.


Mumalo zet a thawk la hrawk hrawk chungin a mitmeng â ruai chuan min en kual nghal ruai a, ka biang a chul a, ka hrawk a rehna hnu te kha en ngurin a dim zetin a rawn chul leh a. Ka tiril chu a țîm uai uai, chet pawh che ngam lovin rapthlak ti zet hian ka dawh tawp.

"Ka rehna kha..." mit ka chhing nghal sawk mai.

"Duatte... ka tina che.." ti leh sup in a kut tha khur dur dur chu ka beksam ah a rawn zen lut leh tawk.

"Min ngaidam hram rawh.." ipik hmel zet a a lo tih tawk chuan ka meng chhuak a, prof Msa hmel chu a thim mup hi a niber!

Sawi tur tam tak nei hmel pu siin a hrawk chu a chilh tlat lawi tih hriat zet hian insehruh ngawt ngawt in min melh ngawt ngawt.



"Pathian hmingin ka ngen a che, khatiang thil atthlak zet kha ti tawh ngai suh, min en teh, kei hi engtin nge awm se min tih?" rum hrawih in a mitmeng thim ruih chuan min melh ngur ngur.


A mitmeng â ruai kha mahni inthiam lohna a khat in a lo thim mup tawh a, hreawm tihna, inchhirna leh pawitihna ka hmu dawt zut!



Eng emaw rawn sawi tur ang maiin hian kâ a ang leh zuau. Mahse.. Duatte tih rit zet a lam chhuak in mitchhing chung hian ka bek ah a rawn fawp tawk.


"Min ngaidam rawh" a tih leh sup chuan a thinrim thin thawk thut a lo chhuah leh hma ngei a inthiarfihlim tum chuan ka che phut a.



A lo inrin lawk bikloh avang in a malchung ațang chuan rang zetin ka tho a, min rawn ban nghal thuak.

"Aih..." ka ti deuh tuar. Prof Msa chuan rilru nat hmel zet in min en ngut ngut.


Kawngkhar lam ah ka tawlh hnung hrat a, chutia amah hlat a ka tawlh hnung te chu tawrharhsa tih hmel fe in insehruh in a kâ ațangin a thaw chhuak hawk.


"I chhuak thei tawh... ka.. ka kal tawh dawn" ka inher fel hman chiah engtik laiin nge a thlen hman tih hriat theih loh khawp a rang hian ka ban bul ah a rawn man lawp a nih chu!



Hlau zet in ka khek chhuak tuar a. Ka hnung ațang chuan nghet zetin min rawn kuah bet a, officer Carlos-a rawn lut nghal vut chu chhantu mamawh lutuk hian ka lo melh nghal ruai bawk.




"Ms" rawn ti sup in keichu hahdam tur in min mitmei a.



"Duatte, in ah haw ang " ti sup in ka beng ah a rawn fawp tawk, Officer Carlos-a chu awm ve lo ang in a ngai hmiah.



"Haw ang le, kan in ah.. kan nupa in ah khan" ti sup sup in nghet zet a min kuahna chu a phelh thawl a, rangfê a ka che tur chu a phih hian min phih leh dawrh.




Mahse, officer Carlos-a chu a rawn che ve ta phut.



"Kan in ah haw ang ka ti ani lawm ni?" ring zet hian a ti tuar! Ka hawi let a, kan inkarah officer Carlos-a a lo ding tawh. Prof Msa hmel lan dan buai vek leh mitmeng â ruai chu en in lu ka thing nawk ringawt.





"No.. khatikhan awm suh.." thinrim hmel zet a ti leh țhawt in a ban lian pui chuan min rawn ban fua bawk.




"Malsawm, inthunun rawh" ti fiak țhawt in officer Carlos-a chuan a darah a man bet tlat. Min rawn thlek in lu a buk nghut chuan ka inthiarfihlim a hun tih ka hria.





Kawngkhar ah rang lutuk a ka tlan chhuak tur chu beidawnna a khat mipa rum ri hawk vang chuan ka ding leh dat a.




"Kal tawh suh.. Min kal san tawh suh" ti tawk a prof Msa rum ri chuan ka chhungril hi a hmet na ut ut. Min mamawh hmel in a aw thuk zet chu min chan hlauhna hlir hian a khat a! Mahse, engnge ka tih theih chuan... hmeichhe dangin a fa an pai tawh..



Ka hawi let a, thapui nen officer Carlos-a chuan a lo man bet.


A mitmeng a natna thuk zet inphumru chung a prof Msa'n ngenna te nen min lo melh tlawk tlawk ka hmuh chuan ka thin chhung a na ve ngut ngut tho.




"I hria em? Jordan chungchang nilo thil dang i lakah zep ka la nei" ti sep in ka insehruh nghal fan fan.


"A pawilo... Bawihi, a pawi lo, kal bo tawh lo la ani mai"


Țah insum zet hian ka nui lui a. Officer Carlos-a chuan man bet tlat lose chuan rawn tal chhuak phutin ka biang ah khuap chungin kal bo tawh lo turin min ngen hial ang tih theih kawpin a hmel ah chuan ngenngawlna ka hmu thei.





"Nau ka pai thei lo... vawi tam tak hrilh tur che ani em tih ka ngaihtuah țhin a...."




"A pawi lo.. Lalhlimpui, engtin pawn awm rawh, nau i pai theih loh pawn a pawi lo, mipa dang min kawp san mahla engkim ka theinghilh ang.. haw ang, kan in ah haw ang" thawk zin hmel zet hian a rawn ti tuar, lu ka thing a hmuh chuan "khawngaih in" a ti sup a, ka rilru min thlak tir theih beisei hmel zetin min nuih bawk.



"Nang chuan May i nei tawh a lawm"




Insehruh țeuh a a rum chhuah hawk rual chuan rang zetin cell chhung ațang chuan ka tlan chhuak nghal hawk hlawk.




Ka u in min lo kuah bet chawt a, a awm ah hmai phum a, țah ka chak viau nangin chutiang tih khawmuan nan hun pawh kan neilo..


"U, kal ang, kal ang.." a ban ah kaiin ka kal chhuah pui nghal dawr dawr.


"Bawihi..." mipa aw lian zet in jail chhung kawk rum rum khawp a min au zui țawk țawk ri chu ngaihthlak hreawm ka ti tak zet!


"Duatte... I tello chuan engtin nge kan nupa in ah khan ka haw a nga..." a tih leh meuh chuan ka thinlung chu a puak darh hawk,
Țap chhuak hawk in a hma aia chak in ka u chu ka kalpui dawr dawr a.




Hospital khum ah chau zet a ka mut hlawm tawp hnu thleng pawn prof Msa beidawng aw kha ka beng ah a cham reng.



/


"Awi... a lo call" phi cheng chung hian Kimkima chuan a phone chu ka hma ah a rawn lek a.

Zodika..


Lei ka chhuah zeuh ringawt.


Phur zet in a chhang a. A lai vel leh nghal in ka hria.


"Hello.. kan pu-a chuan engnge ni a duh a?" ti pah chuan a kut chu a kâ bul ah hum ruh in mit a chhing vak. Nuni te ne chuan kan lo nuih nghek bawk.


"Dah ring rawh" an lo ti a.

"... Kimkim, i țhiannu kha a țha zel em tih ka hre duh a.." Zodika chuan a ti dam thlup. Ler zet in Kimkima chuan min rawn melh a.

"A țhalo tita ila, i rawn chhuk thla nghal dawn mi?" a ti a. Zodika chu a rawn nui hawk.

Ngei zetin Kimkima chu ka melh rawm rawm a.


"Tak tak in a țha tawh lutuk, naktuk hian damdawi in ațang in a chhuak tawh dawn a, phone thar te pawh a nei ve tawh bawk a nga, a phone aţang in inbe thei tawh ang chu..." a ti duai duai a.


Zodika chuan sawi tur a hre tawh lo te pawh a ni ang, a ngawi vung vung.

"Amah i be duh em?" Kimkima bawk in a tih leh chuan rum tawk a melh in lu ka thin khum a. Kimkima hi ka chanchin a lo zawt ziah zel a. Keimah nen tak erawh kan inbe leh tawh lo.


"Umm, a bulah i awm remchan chuan ka lo bia ang chu?" Zodika chuan a ti ta mai! Sawi tur ka hre dawn lo nasa mai sia!


"Kan pe a nge.. Lalmateee, phone ah an be duh che" ka bul chiah ah awm siin ring zet in min au kher anih chu! Nuni leh Remremi te chu an lo nui dir char char.



Phone chu la tau nghat in ka ti zawi hmiah a.


Han biak țan dan tur ka hrelo bawk si nen thaw chhuak hak in ka beng bul ah ka dah hnai a. Rang fe in Kimkima chuan phone bulah a beng a rawn dawh hnai ve vat.


"Hello" ka ti sep.


"I țhianpa khan naktuk ah i chhuak tawh dawn a ti a.." a rawn ti sup. Phone ațang mipa dang ka vawi khat biakna anih vang nge mawni ka lai deuh tlat leh nghal.

"Nia, naktuk hian ka chhuak thei tawh a... i van fel"

Zodika chu a rawn nui suk mai.

"Engvang chuan?" a rawn ti sup. Sawifuh lo inti lutuk in Kimkima malpui chu ka sawk tawk a.
"Uggg... i lo call a" ka chanchin i lo ngaihven a tih vel chu sawi ka duh bik bõ lo.

"Ka lo call a..." ti nghut a a nuih tel suk vang chuan lei ka chhuah vak ringawt.


"Ka sawi tum i hriat reng kha aw.. i chhungte chu an lo dam țha em?" ka ti ta daih a. Ka țhiante chuan nui rah rah hian min en zauh zauh leh nghal a.


"Pathian zarah an lo dam țha, hei, zan dar 11 a pel tawh si a, damlo te chu mut a hun tawh viau a sin"


"Kan mu tawh dawn lawm.." ka ti vat a.

"Good girl, i mut tlai chuan naktuk zing ah i BP a hniam leh si a nga, i chhuah an phal leh lo mai ang" nuihzat hmel zet a a lo tih chuan huan a ka kal pel tur nuihza insum zet a min en run a, lu min thin khum nghut lai kha ka mitthla ah ka hmu a. Mak tak maiin ka nui chhuak nghal ver ver.





"Hei Lalmate i ta tur a a upload ani chiang lutuk" phur hmel lutuk hian Kimkima chuan a phone chu min pe a, zanin chu amah chiah in min riahpui a.


"Eng nge a?"

"Zodika status.."

Phone chu ka en a.


*a hmel țha zet leh mitmeng zun ngah danglam bik lutuk ka hmuh rual khan 'Zo, nupui i nei a nga, fa tam tawk neiin ka nu leh pa te lungleng hman lo lekin i fa te chu i lo va tihbuai tir țhin ang' tia ka naute in thu min chah kha chiang zetin ka bengah a rawn ri a! Ka nuate in min pawmpui thlap hmeichhia ani tih ka ring nghet nghal hmiah. Mahse... ani erawh mi ta a ni tawh*



"A upload chhan chiang lutuk che"

"Naa, ringawt a che aw, a bialnu a boral tawh a, Zodika hian a hmangaih lutuk bawk" ka ti ve vat.


"Hummm.. chupawh nise, hei, a bialnu thu chah angin tu emaw duh chu a nei. Mahse, midangta ani tawh a ti a.. nangmah hi i ni chiang lutuk"

"Mu mai mai teh, khawimaw i phone kha ka ig ah ka lut dawn" ti hlak in a phone chu ka lak sak a.


Thuawi deuh chuan a inkhuh țha ve ta mai a.


Prof Msa ka hmuh ațang in ni 5 a liam leh tawh a, Jail ațang a țhiante khan an hruai haw tih ka u in min hrilh a, engtin nge a awm zui zel ka hrelo.


Police pa sawi ang tak tak in thu kal zel ah pawh keiin kham ațang prof Msa'n min nam thla lo tih ka sawi kha țhenkhat in thu an zeldin kual a.


Kan chhungkua in Ex MLA family ațang thamna dawng ang hial ten min chhuah let a. Țhenkhat lah in an vau bet a niang tih zawng ten thu an la thul


Mizo mipuiin mahni ngaihdan a dik ber ah ngai a thu zeldin chiam chiam kan hrat zia ka hriatchian phah a! Kan thu zeldin kual chu thudik ang maiin Social media ah kan in post siak sup sup a. Thudik chhui chhuah tum chu mi tlemte chiah kan ni.



Ig ah ka lut a, țullo zet in prof Msa ka check a. Mahse, post thar engmah a siam lo. A post siam hnuhnun ber a kei leh Bruno couch a kan țhu lai chu ka zoom kual ka zoom kual a.

*Ka nupui, min thunun hnehsawh em em-i leh kan fapa Bruno* tih te mai hi caption ah a hmang bawk.



Kan inkar chhiar țan hma lawk kha anih vangin kei pawn ka comment a, lei chhuah vak lai ka dah țeuh a. *ka zawhte note* tiin min rawn reply a. Kan țhiante ho an rawn che over zui ta chiam bawk.



Thaw hak in a thlalak dang chu ka en kual a. Ka ngai in thlakhlehna tam tak ka la nei tih ka pha chhin lo.


#Comment (in comment chhiar a nuam țhin a)

#Share with link #Dar24 chhungin ads vawi2 click tur..

❎ Storyfb ah ka dah loh tur thu ka post zet tawh. Mahse, ka type hman ho hi ka lo dah mai. Ka khawngaih ve tho bawk si che u a. Ka ter enkawl lai hi a rawn luak thut a. A chau hle bawk. Hei bak hi ka type hman lo, ka buaipui a ngai sia. Chhiar dan lo thiam ula... 😘😘😘

Link:
BBcode:
HTML:
Hide post links
Show post links

ADVERTISEMENT (A hnuai a milem hi a nia hmeh zeuh tur chu)