LIBRARY - 9

Episode kal lai dah luhna

Moderator: writers

Esi Taylor97
Posts: 71
Joined: May 15th, 2020, 10:54 pm

LIBRARY - 9

Unread post by Esi Taylor97 » May 24th, 2020, 8:41 pm

LIBRARY - 9
BY Esi Taylor






Kan awmdun reng lai pawn min ngaihthu a sawi chuan min ti hlim, chuan a romantic riau bawk.



Ka kut chu a hum vang vang a, engmah a sawi tawh lo a, ka sawi bik lo.. Mahse kan inkar ah chuan engemaw boruak a awm, kan inpawh hliah hliah hian ka hria, ka sawi chhuak thiam lo zawk.




"I chho duh tawh em? " darkar chanve dawn kan din hnu ah a rawn ti chhuak sup



"Ummm duh ve tho Zamzamin rei min ti tawh ang"



"Mahse ka la ngai che" a ti thawp leh sup a, min chelh na chu a ti nghet leh sauh



"Keipawn ka ngai che"

....


"Chho rawh ka lo thlir ang che" muangchangin min vawnna chu a phelh a, a bul a awm ka la chak zia chu



Thawm ka hriat avangin 'ka kal aw" ka ti nghal vut a, hosteller dang ten min hmuh ka duhlo.



"Umm ka lo bia ang che" atih chuan ka bu nghut a, chak zet in step ah ka pen chho nghal hlawk hlawk.



Warden tawng ri ka hriat zui avang in ka thaw huai thei! Hre mahse Ani chuan engmah a sawi ve dawn lo.




Zamzami bul ah kan thil eilai a thil thleng vel ka hrilh mawlh mawlh a


"LalTommy chu ava che hitlo teuh ve" a ti hliai



"Awiii sawi lo zawk teh Maman a hriat ka hlauh zia chu! "



"Ala hre dawn alawm"



"Nia nakin ah, tunah chuan hre rihlo se atha zawk"



"Kan hrilh teh ang" ka khum ah a mu pharh diai a



"Ve che a, abiak che pawn i laih em kha" ka ti nghek a, lei min chhuah khum chiam ringawt.



"Taktak in I u Rinpuia hi ka dreamland a Lalfapa kha a ni dawn in ka hria"



"Nimaw? "


"Awiiiii amah kha a smart si, hey lo sawi na teh i chak lo ang" min melh leh nghal rawm rawm a,



"Mawli ka u nitur in ka duh lo che aw"



"Ve che, ka nau ila ni maithei, monu sual zet ka la rawnni dawn" za zet in kan nui dun hawk hawk a


......


"Hey tho teh! " Zamzamin ka dar ah a rawn sawi nawk nawk a, Tommy nen nizan khan kan inbe rei lutuk a mut ka kham thlawtlo



"Chaw ei ang"


"Ka eipeih rihlo! "



"Tho vat mai teh" tih pahin min pawt tho nghal lawp , ka rak thawt mai



"Inkhawm kan tlai ang".



"Inkhawm lo mai ang"



"Pastor nupui tur ka la nih hmel sia, inkhawm ngei ngei ka ngai" awihlo zet in ka nuih tawp



"Ka unaupa hetiang emem a vei tu hi amah hian hria se aw, tha e kan inkhawm chiang viau ang" ka ti nghek



Khua a lum bawk nen ka muthlu lawp lawp a, ngatinge inkhawm lai hian mut hi a chhuah duh emem ka hre biklo.


"Hey girls! "


Jimm ka hmuh chuan ka meng nghal kawk , sunday ah hian ka la hmu ngailo hrim hrim.



Maroon colour duk tha zet Coat suit a ha a, amah a sang tha bawk si. A kamis var thianghlim zet hak chuan a ti lang fresh ngawih ngawih, k-pop drama vel a achangtupa ni awm a ni. A chhelo ve thlawt. Khawlum zawng zawng a ti dai vek in ka hria, hmuh a nuam in a hahdamthlak ngawih ngawih.



Tommy hetiang hian inchei ve ta se, ka ngaihtuah duh lo zawk, ka tuiral nghal vek ang!!!



"In va fel ve a" Jimm bawk



"Nang a lawm fel le" ka ti hliai a, a nui hak, a inkhawm khat tihhi ka hrechiang emai.



"Kan in ah lo chawl ula, thil vawt tawk ei ang u" chhan hma hma in Zamzami a kai nghal dawrh dawrh anih chu hnial vak ngaihna hi a awm lo reng reng




Jimmy te in chhung kan lut chu pawn lam nen boruak a hrang hlak, a dai nghal duk a, ka hahdam nghal sawng sawng.



"Wow " Zamzamin a ti hliai a, a nuam ve bawk em a ni



Leather sofa lian zet ah chuan ka thu awn nghal duai a, an inchhung chu a chung lam chauh kha ka la hmu a, a hnuai lam pawh a bawn ngawih ngawih. A ropui hi ani tawp mai, thil bal chu a awm ve ngai pawh a rinawm loh.



Hmeichhe upat hmel lam tawh hmeltha zet hi kan thutna ah a rawn lut a,

"Inlo leng alaw" nui sang hian min en a, a nelawm emem lehnghal


."umm kan lo kal ve tawp" ka ti bah nawk



"Inva fel ve, ka thil siam in ei ve duh angem? "



"Tehreng mai" ka ti hliai a, hlim hmel zet hian a nui leh var var a "lo kal ru" a ti leh sawk sawk a, Zamzami nen choka ah kan zui phei a, a tawng duh sia, a bula awm a nuam tawp hi nimai.




"Mango ice cream hi ei phawt ang u ka siam anihhi hi aw" glass bowl nalh zet ah hian a suak chhuak mawlh mawlh a,



"Tihian eitur hi ka siam a, tu amah hian min eipui peih thin lo a, thil siam ve pawh hian awmzia a nei lo" ati leh nghal bawrh bawrh a



Tui ti zet in kan ei a, Zamzami lah in tui a tih zia sawiin a fak char char a. A siam dan te an in hrilh a, an inkawm dan vel chu bestfriend ni awm an ni.



"Umam ka thiante annih hi" Jimm chu inbual zo tih hriat zet hian a sam a hnawng chap a, hepa lo chhiatloh reuh zia emem hi.



"A tui in ti em? " ka bul ah chiah a rawn thu thla a, ka lo bu nghat a "tui lutuk mah mah" ka ti hliai



"Umami hi kan monu anihhi, kan chhungkua chuan a thil siam hi tui kan tiber ania" Jimm bawk,



"Pizza ka siam dawnnia ei ang u" phur zet in Umami chu a che nghal sawk sawk a


"Awii pizza pawh i siam thiam law" Zamzamin a tih chuan



"Thiam ve mai zel e, lo kal rawh siamdun ang a har lo lutuk, cheese tam deuhhian ka duh thin a " Zamzami pawh a tho nghal hluai, hetiang hian thil siam hi nuam a ti tih pawh ka lo la hre reng reng lo.


.....


Doorbell a rawn ri ral ral a


"Mapui lo va hawng teh" Umamin chuan a ti lang lang a, choka a kan awm daih avangin tunge a biak ka hre lem hlei lova.



"Ehe Tommy" hnung lam ka hawi chu Tommy a lo ding run, min hmuh chuan anui suk lehnghal



"Lo va thleng hma deuhve" Jimman atih chuan alo va hrilh anih ka ring ta deuh ber.



"I nalh lutuk" ka beng bul ah a rawn ti sup a, Zamzami thutna ah a rawn thu thla a, min si nghal chet bawk




"Ee u mam heihi Isabella ania chuan i bul a mi kha Zamzami"



"Awii Isabella chu maw? I hming hi kan hre ngun khawp a" Jimm chu ka melh nghal vat a, Tommy a rum ri nghut thung.



Chhan mai ngaihna ka hriat loh avangin ka nui sang tawp, Zamzami zawk in sawitur a rawn chhawp chhuak zung zung zel a, boruak pawh anuam viau.



Chawei nghal tur in Umamin min sawm nasa viau na in kan hnial thei hram, Jimm te in a kan awm chhung khan a nu leh pa bak ah midang hrim hrim pawh tumah ka hmulo, ka zawt inthlahrung deuh bawk nen.



Ke in muangchang in hostel lam kan pan a, kan in bun sang deuh bawk nen kal chak a har viau hrim hrim, Zamzami leh Jimmy kan hma ah an kal a, Tommy chu min se chet hian a kal a, min si reng a awm a duh hi ni ringawt.



Ka kut vawn tlat a tum erawh ka hnial fithla thak, atum zui bik lemlo



"Saturday kha aw" ahma pawn a sawi tawh avangin ka bu nghat nghat a



"Enge kan tih ang" ka en chho ha a, "kan indate ang chu"



"Khawi ah maw"


"Khawi ah nge i duh? "



"Naaa... Nangman chungte chu i ngaihtuah tur lawm" ka ti hliai a, kan kal na tur min zawh leh daih te chuan


"Khawi a kal nge i duh? Hetiang lam hi ka hre vak lo a, nuam i tihna leh i duhna hmun sawi la kan kal zel ang" ka nuih hak a, angaihna hreklo zet in min en thung



"Khawi hmun pawh ka duh vek"


"Taktak maw?"


"Ummm nangman ngaihtuah la, min hruai tawp dawnnia" ka tih chuan a bu ve nghat nghat, a bialnu hmasa ber chu ka ni tak tak anih te ka ring, mahse hmeichhe dang nen vawi tamtak hmuh dun tur an awm bawk sia, naaa ka hrethiam tawh rih biklo.



Hostel gate bul ah Zamzami leh Jimm anlo ding dun a, kan kal muang an tih hmel emem lehnghal. Chuan, Jimm hian Tommy nen a kan inkar hi a hre vek tawh, ka hrilh lo a, a awmzia chu Tomman a hrilh tihna.



"Lalpek einchhhh, VAnlalzam " kan awmna floor kan hawi chho a, Biakhnapi leh Lalmuani ten minlo bye bye lauh lauh a,zawhna kan dawng hnem leh dawn mange


"Kal tawh mai ru" ka ti nghal vat a, khimi te khian an ka an chip leh thei dawn lo



"Kan lo leng" Tommy chu phawk zet hian ka en a, "nidang ah" ka ti nghal vut a, a chal a ti chuar leh tap tawh . A va han pa ngawih ngawih thei tak



Kan chho san a, Biaki leh Mamuani ten minlo din chilh nghal run


"In pahnih leh anni pahnih kha awiiii... Thian dang an la nei em? " Biakin a ti chiam chiam a,


"Hmelchhe suh" Zamzamin a ti nghek ringawt.



"Ka thiannu bul ah ka bialpa angin kan sawi teh ang, a â lo chauh ang, lo len tir rawh thla ka lak pui duh" Biaki bawk



"I bialpa bul ah khan va awm maimai la nih chu" ka tih chuan ala nui chiam zui, Biaki hi class12 chauh ala nia, a thawveng emem mai ni. Lehkha lah hi a thiamthei phian lehnghal a.



.......

Tommy nghakin hostel gate bul ah Zamzami nen kan ding a, min rawn hruai ziah avang hian be lawk lemlo hian kan lo nghak tawp zel, a rei phian lehnghal a



"Nizan ka mumang ah I u Mama nen kan lo inhmangaih nasa mai"



"Maw? " phawk zet in ka en a, ka chhang mai theilo ka nui leh rih


"Mama chuan alo hmangaih ve che mi? "




"Kei ai pawn min hmangaihna kha a lungrun zawk"



"I va vei tak e aw"



"Vei ee... Ka kherh thlu dawn" awihlo lutuk in ka melh tawp, aman chet a lak hmasak viau angai ang



"In monu ka ni dawn! Inchhungkua ka rawn chawkbuai dawn che u"




"Ve che, monu tirh kual char char tur ka duh dawn reng a ni"



"Inva nui nasa ve" Jimm chu kan bul ah a rawn ding dat a,


"Nangmaw? "


A motor atanga rawn chhuak lovin a rawn dak a, "lo lut ru" a tih zawm nghal zat



"Aaa Tommy kanlo nghak a"



"Alo kal hmanlo niang, hruai mai tur che u in min rawn tia a in la boss a nia"



"Animaw" ka ti sap a, kanlo nghak rei ve tawh bawk nen ka lung a awilo nghal tun mai.



Zamzami nen a hnung ah kan thu lut a, ka phone ka en a, a call leh message pakhat tal pawh a awmlo chuan ka thin a ti rim zual.



"Ahma ah hian tu emaw zawk zawk kha rawn thu ve ulaa, in driver ka ang thei e mai" a rawn nui hawk a, a tlanchhuak zui nghal tho.



Kawng tluanin ka tawng ve tawh lo, ka mood a fuh thlawt lo.





College kan thleng a, Jimma in park fel kan nghak leh ran a, Tommy chu ala rawn thleng ve lo tih ka hre thei mai.



Enge maw buaina a nei anih te ka ring leh deuh rum rum, hetiang hian vawikhat mah ala awm ngai tlat lo. A engahmah hma a ka lo thinrim ve emem chu ka in hau ru mawlh mawlh a, keipawn biak ka tum miah bik lo a nia.



Ka phone phawrh in ka call nghal zat a, a la thei miah lo lehnghal!



"Kal ila" Zamzamin a tih chuan Jimm pawh kan lam pan in arawn kal mek



"Tommy hi call a chhang thei miah lo a" ka ti sap a



"Aww arawn kal ve mai ang ngaihtuah suh" Zamzamin a sawi zo chiah a, parking area ah bike in Tommy chu a rawn tlanlut mek.




Chuan Remruati nen lehbawk !!!




Remruati a hruai duh vanga Jimma min hruai tir chuan ka thin a ti rim lutuk



"Kal ang" Zamzami kai in ka kalpui nghal hlawk hlawk a, ka thinrim zia chu pui tak ani.



"Hey ka hah a nia" Zamzamin a tih pawn ka kal ngaiin ka kal hlawk hlawk



Class ah kan lut a, kan thutna thin ah ka bag ka dah thla thuai a, ka thu nghal hnawk



"I thik a nimaw? " Zamzami ka bul ah a rawn thu thla a



"Thik e" ti hmuk in dawhkan ka bawh a, Remruati nen an inphur lai kha hmu kher lo ila ka ti ngawih ngawih
.


"Thil pawimawh te pawh ani ve thei aa" a rawn ti leh hliai a



"Nang ni la engtin nge i tih ang" ka ti hap a, ka thu tha a , ka kut in ka khabe ka dawm a. Ka taksa te hi a zawi vek



"Ka thik ve tho ang" arawn ti ve sap




Ka call a hmu ta nge ni Tommy call chu chhan tumna ka neilo, ka silent a, ka bag ah ka thun nghal hmak.



Reilo te ah sir a rawn lut a, kan lehkhazir chu ka engah mah hian a lut lo. A hmui phun chu mit khap leklo hian ka en ve char char tho.




Class ka nei tawh lo a, Zamzamin english class a la nei thung, Tommy ka hmuhpalh ka hlauh em avangin ka subject nilo mahse ka thu tluan ve ta thak ringawt.



"Thil ei tawh emem ang" sana ka en a, dar 2 a ri tep tawh




"Ummm" ka thaw haka, ka phone ka en chuan Tommy miscall32 alo awm hman. Min biak duh tak tak se chuan kan class ah pawh a rawn kal leh mai ang, tun ah chuan ka la thinrim rih.



Canteen pan in kan kal dun a, ka mood a fuh loh em avangin Zamzami pawn min be biklo,



"Hey minlo nghak teh u" mood fuhlo naklaia Tluanga hmachhawn chu ka peih teuhlo



"Hrelo der rawh" Zamzami chu chak zet in ka kal pui nghal hlawk hlawk abawk


Canteen ah kan lut a, atlai tawh deuh nge mi an tam vak lo ,mahse khawi canteen pawh hian awl lai anei ngailo reng reng



"Chhuak leh ang" Zamzamin a tih chuan hrethiam lo zet hian ka melh haw a



"Hetah lo ei ang" Matthew a hmu anih ka rin avangin ka bu nghut



"Chhuak ang" kan chhuak hman lo , Tluanga a rawn lut ve nghal zat a, pakhat pumpelh kan tum a, pakhat a rawn lang leh nghal zat bawk a



"Ka auh nasat che u nen in hre theilo reng reng"



Kan hre reng kan hrelo der anihkha tih khum chiam mai ka duh a


"Animaw" Zamzami zawkin a ti hliai



"Thil in ei dawn chuan ei rual ang u" awii ka hlauh ang ngei ngei in, mi mah mood fuh tawhlo nak laiin.




"Hey Isabella"



Zamzami a rawn thaw ri hak, min au tu chu Remruati tih ka hriatchian em avangin hmuh tum in ka inher nghal vut



"Lo kal ru" Remruati bawk, Tommy chuan rum ul hian min lo melh a, anni pahnih saw ka hmu dun peihlo



"Tluanga vang vek" ka beng bul ah Zamzamin a rawn ti sap a, chhuah leh a duh chhan pawh Matthew vang nilo in saw mi te pahnih vang zawk saw




Tommy chu a tho vut a, min rawn pan nghal chat bawk



"Lo kal ru ei ang u" Tluanga lah chuan kan boruak a hre ve der silo



Zamzamin Tluanga a kai phei nghal hlawk hlawk a, zui ve ka tum chu ka bul ah Tommy a rawn thleng hman



"Ka call i chhang theilo a" arawn ti nghut, melh pawh ka melh peihlo



Chhang lovin Zamzami te thutna ka pan san a, Zamzami te lah chu Remruati thut na piah chiah ah anla thu zui a




Ka thu fel chiah a, ka bul ah Tommy a rawn thu thla ve nghal zat, Tluanga pawh a meng phar nghal awk mai



"Enge in ei duh ang" Tomman a tih pawh chuan chhanglovin ka ei duh ka ziak nghal mawlh mawlh a, ngawirengin Tluanga ka pe nghal zat




Angaihna hrelo zet a min en te chuan ka thin a ti rim zual sauh.



"Tommm l ei tawh dawn lo mi? " Remruatin a rawn tih chuan ka lo ner nghal nawk



"Dawnlo" ka bul a mi lah chuan a ti hmuk a, Tluanga eitur lak tum a a tho uaih tawh chu "Isabella ei ang kha ka lo duh ve ang" a ti leh nghut




"Tomm i bag hi" Remruati bawk



Tommy chu a tho vut a, "kal daih rawh" ka lo ti rilru hmanhmawh



Remruati bul a abag awm chu ava la vut a, a rawn thu leh rang emem bawk



"Baby"


Ka hrelo der hmiah



"I thinrim a mi? " ka beng bul ah a rawn ti sup a,



Hrelo der in Zamzami ka be nghal vara, mangan hmel zet hian a thaw ri hawk



Kan boruak hrethiam in Zamzamin Tommy a rawn be ta hlauh, Tommy lah chuan min en run chung in Zamzami biakna chu a rul tawk tete in a chhang a,min en run reng bawk si, anuam bik chuanglo. Mahse ka thinrim emem chung pawh a insawifiah pawh a tum eihloh na te chuan ka thin a ti rim emem lawi bawk si.




Tluanga eitur nen a rawn let a, Tommy chu awmlo ang mai a ngaiin ka ei lui char char a, a hrilhhai hmel te chuan ka thin a ti rim thar emem bawk



"Tomm i la ei sia class ka la nei bawk si ka lo va kal mai ang, tlai ah ka lo nghak ang che" Remruati nui sawng chuan min tihel tih ka hre chiang lutuk


Tomm chuan a hnial ve eih ka ring ania engtin mah a chhanglo


Remruati chhuak zui chu ka melhrum nghek, ka tlawm vawng vawng hian ka in hria



Ei pawh ka ei zo theilo, ka ding hluai a, an pathum chuan min en nghal thap



"Zam lehkhabu kha ka lo va dahlet ang aw" ka tih chuan Zamzami a bu nghat a, ka bag ka la rawk a ka chhuak zui nal nal.







(Comments leh like te kha aw... Chuan lo click leh hram hram ulaaa.... Ka buai viau pawh hian in comment te kan chhiar a phur tawkin ka type leh suah suah thin 😍😍😍😍)



Link:
BBcode:
HTML:
Hide post links
Show post links

ADVERTISEMENT (A hnuai a milem hi a nia hmeh zeuh tur chu)