CHAPTER - 7
San Francisco Museum Of Modern Art.
151 Third Street.
"Aw lo lût rawh..."
Rawn luh pah chuan Rachel chuan kawngka chu a khâr lehnghal a.
Mr.Mark Greenmill- Office chhûngah an pahnih chuan an ṭhu dûn rial a.
"Vawiin chu inlêng i nei lo a ni maw..."
"Khanglang chuan, hna lamah kal angai anih hi." a ti tawi tak a.
"Tak tak in, ngaihzawng thar ka nei tawh asin,..." Mark- chuan a ti deuh hluai a, chumi pah chuan dawhkân a bell chu a hmet ri zauh a.
Coffee no hnih an rawn dah lai chuan eng thu mah an sawi dûn lo.
Coffee rawn chawi lut tu nula a chhuah hnu chuan Rachel chuan, " chuan...nizanah em ni..."
"Aw, Eisheth-i ania, a chhe lo kher mai..."
"Wow...chuti chu kei chu min bân dêr tihna a ni ang chu maw.." Coffee no lâk pah chuan a ti a.
"Teuh nang, nangte chu....tak a, thil hriatthiam loh ka nei.." a ner deuh nûng a.
"A eng a chu maw.." a ti deuh hâ a.
Mark chuan, " Zawhte ania....ka..." a sawi lai mek chuan Rachel chuan a thusawi a lo pawtchat a.
"i hrethiam mai ang, zawhte angin an rawn inlâr ṭhîn alawm, nakinah chuan i zawhte khawi ang maiin in inah a chêng ve mai ang..." a lo ti a.
"Ok..anih chu, ka buai deuh hman alawm le, i zâr ah ka fing leh ta sawt e." Coffee chu a lem khawlh a.
Chumi zân chuan succubus nula îtawm Eisheth-i chuan Mark chu a rawn tlawh leh a.
A zân leh ah pawh chuan rawn kal leh in kâr khat chhûng lai zantin a rawn kal ziah a, chu pawh a hun ngaiah chiah lehnghal.
Chuvang chuan a nupui Sandra nen pawh sex an hmang dûn tlêm in biak pawh an in biak tlêm phah deuh hial mai.
Mahsela a hma ang tho chuan an in pawh êm êm tho a, Sandra chuan châk mahsela Mark chuan nasa tak a Succubus nen a an hman dun ṭhin avângin a peih loh san fo ṭhîn..
Zan khat chu mu tûr a Sandra-i bedroom a a lût chu a ṭê ṭhawt a, rang tak in Mark- pawh chu lehkha chhiarna room aṭang chuan bedroom lamah a tlân thuai a.
An khum chungah chuan zawhte dum lian tak hi a lo mu a..
"Mark, paih chhuak vat rawh, zawhte hi ka nêl lo tih pawh i hriat kha..."
"Hmnn..Awm ve mai mai rawh se, tikhan a kalbo ve mai ang..." Mark chuan a ti deuh tlat a.
Lungawi lo angreng tak hian Sandra chuan, "Ka duh lo, an êk a uih si, chubakah hmuntin hmun tang a vâk an ni a, an thianghlim lo.." a ti vîn ṭhak a.
Khum lamah chuan Mark chu a phei a, zawhte chuan chiang mangkhêng hian a mit takah a lo melh a.
"Sandra....tihian awm se, a chhuak ve mai..."
"Ka duh lo, ka duh lo." Drawer bul a baseball stick intung chu a la lawk a, zawhte vuak tum chuan a pan nghal a.
"A chhuah duh loh paw'n ka vaw chhuak tho tho dawn."
Vuak tum a a kut a lek kân lai tak chuan Mark- chuan a bânah arawn man a, chu veleh zawhte chu a zuang zawk a, room aṭang chuan a tlânchhuak daih a.
"Enge min lo dan, ka hua...zawhte ka ngaina lo tih i hre reng a ni lawmni.." a ti vîn hlur a.
" Ti kha a ni mai alawm, kan mut dâwn te chuan a chhuak ve mai ang chu." Mark - chuan a ti dam hluai a, khum tlângah chuan a ṭhu zui a.
"Ka hua ka tih chu, in aṭang hian ka ûm chhuak nghal dâwn." tih leh zawhte tlânna lam ah chuan a kal zui ve nghal a.
"A ho lutuk...a tlan chhuak daih tawh ang, lo kal tawh i mu tawh ang.." tiin khumah chuan a tlu zâl zui nghal a.
Khum a mu chung chuan, "Sandra...Sandra...Honey...lo kal rawh..."
"Zawhte a kâr a a dum hlang lehnghal, a malsawm lo emai, ka ûm chhuak nghal dawn..." ti a phun nuah nuah pah in Corridor ah chuan a phei hmawk hmawk a, a baseball stick ken lai chu a lek kâng vû a.
Inhnuai pan na step tawntirh ah chuan dingin a hawikual a,
"Khawnge maw a bi bo hman khanglân chu le, ka ûm chhuak tho tho ang.." thinrim takin a phun nuah nuah a.
A hnunglam a zawhte hrâm ri a hriat rual chuan a phu zawk a.
Zawhte chu Corridor tâwp, step kiang lawk a steel bookself in hûng chungah chuan a lo awm reng chu niin.
Sandra-i'n a a rawn hmuh rual chiah, zawhte lama a inher rual chiah chuan zawhte chuan hrâm chungin arawn zuan nghal a, a hmai ah chuan a tin hriam tak chuan a ham a.
Sandra-i chu step ah chuan hnung zâwngin a tlu thla a, step chu cement a siam, a vawnbân thing uk khak a siam, ze mawi tak hi a ni a.
Chutia a tlu thla chu a ṭê tuarh a, step vawnbân ah chuan a tukkhum tauh in step ah chuan a in bin thla nghal tawp tawp a.
In hnuai chhuat, step tâwp a thlen thlâk chuan a thaw ri hrâwk a...
An nu au ri a hriat rual in a bedroom aṭang chuan a tlân chhuak nghâl a, kailawn chhukna tâwp chhuat a Sandra, thisen nen a nikhaw hre lova let reng a hmuh chuan a hminga ko mawlh mawlh chungin a tlân thla nghal rawk rawk a.
Chutih lai chuan zawhte dum chu Sitting room lam ah a tlân phei zuai a...
A hnâr leh beng aṭang chuan thisen a rawn chhuak nguai nguai a, a hnâr ruh pawh a sawh tliak niawm tak a ni.
Duat tak a pawm kâng in a sam ah chuan a chûl hlau hliau a, a ko mawlh mawlh bawk a.
Chumi pah chuan a kekawr ipte a a phone a dap rawk rawk a, 911- a call nghal a.
"Tunah in lo kal nghal thei em,tunah...Ambulance rawn tîr rawh u, ka nupui in tawhsual a tâwk a...Ok,....Carolina Street...ah....House no....."
Minute 15- velah chuan Ambulance siren ri ruai ruai chungin a rawn thleng ta.
An rawn thawk rip khawp a, Mark- chu a hamhaih khawp a, engmah lo tih nachâng pawh a hre lo, chhuat a ṭhusawp nuaih in a nupui thichhâwng a let reng chu a kuah a, zawi te te in a ko sep sek a, Medical team an rawn thlen lai pawh chuan....
An ni chuan hnêm chungin an kaihkuah hrang a.
Emergency light êng phe nuaih nuaih kâr ah Sandra- chu an zâwn phei a.
An thâwm hria chuan an in bul a mi te ho pawh chu an rawn bâwr khâwm deuh tuau tuau a.
San Francisco General Hospital, Vermont street lamah chuan chak tak in an in phur chhuak ta a.
"Eng maw i sawi..."
"Damdawiin in rawn thlen pui khân a boral tawh sa alawm..."
"Ah...Ka hria alawm, mahse..."
"Chhan hman an beisei awm vek ṭhîn alawm, chûng chu mihringte beisei na a ni ve miau a..."
"Ok...ka hrethiam e..."
Nawr lirh ah dah in mi pali lukhum pâwl khum hian hmanhmawh fê hian inzaina pindan ah an nawr lût a.
Zai tû Doctor te chuan a beisei awm tawh loh tih an hre sa tho.
Chu chu an in zai zawh chuan Medical team zíng a mi nen pawh chuan an sawi dûn rêng a.
Chumi zân chuan Sandra- chu a boral a, mahse a ruang erawh Morgue- ah an dah rih thung a.
Mark- chuan a hrethiam lo ngei mai, damdawiin tual ah chuan lungchhe takin zankhua in a ṭhû a.