I Love you 3000 -10 by Remruati Bawitlung (Haylor)

Episode kal lai dah luhna

Moderator: writers

Remruati (Haylor)
Posts: 680
Joined: June 22nd, 2016, 9:24 pm

I Love you 3000 -10 by Remruati Bawitlung (Haylor)

Unread post by Remruati (Haylor) » May 25th, 2020, 10:42 pm

20200521_140326_compress62.jpg
20200521_140326_compress62.jpg (47.28 KiB) Viewed 6484 times
Chapter-10

“I love you and I don’t want to lose you. Because my life has been better since the day I found out."


In tih harh pahin kitchen ah zial ka zu a ,nizan zankhua in ka mu lo lehnghal a ka ṭhu mai mai pawh ka muthlu lo chauh kha a nia.

Carine chu ngawi rengin kitchen ah a rawn lut a ,nidang ang bawkin min rawn nuih leh ver ver tawh ,ka nuih let ve lo thung .

" Noel ka car ka keng lova min thlah thei angem?"

"Hmun dangah kalkawi na tur ka nei " ka zial zuk lai chu ka paih hmak a, a mitmeng ah hian a rilru a na tih pawh ka hria ,beiseina pek ka duh loh vang zawk a ni.

" hmm...a nih chuan i rualin chutah chuan ka kal ve zel mai ang "

" Carine " a lakah ṭawngkam vin ka hmang ngai lova mak a ti hle .

" i bula kal pawh chu ngatinge i phal loh viau? I pawi ka sawi em ni ?" ṭah aw ṭuau hian a ti a ,hnem leh beisei takin min rawn melh a ,ka kekawr ipte zen chungin amah hnungchhawn zawngin ka ding hmak .

" hmeichhe dang duh ka nei "

Ka hrilh nawn leh a ,tunah chuan a awi tawh ngei ang ,a laka ka rilru put hmang hi a danglam tawh tih a hriat ngei angai .

" nanghi ...hmeichhe dang duh i nei tak tak em ni ? Chunu chu tunge ? Anih kei ve hi? " vawikhatah zawhna min zawt hnem mah mah, chhan kher pawh ngai in ka hrelo .

Hmeichhe awmnem zawk lakah hian hetiang hian awm ka duh lo ,ka awm ngai hek lo mahse Carine erawh ka hrechiang a hetiang anga ka tih loh chuan min kalsan mai mai dawn lo tih pawh ka hria .

Ka kal tur chu hnunglam aṭangin min rawn kuah thut a, ka ngaih ang ngawt a hnar awlsam a ni dawn lo tlat .

" Noel hetiang hian awm suh, keimah zawkin ka ṭhen che a ka kalsan che tih pawh ka hria ,kha ka thutlukna avang khan tun thlengin ka la inchhir asin "

Ka hnungzangah a bei hle hle a, ka chhan hma chuan ," ka la hmangaih reng che asin " a ti zui sap a ,min hmangaih thu min hrilh lai tak chu Tete'in a rawn hre hman !!

Ka hlauh ang ngeiin thil a thleng ta a nih hi !

" Tete " ka ti ram hmaih a , Carine kut chu ka phelh a Tetei ka umzui nghal .

"Ding rawh "

Ka thusawi... nilo ka thupek chu zawm lovin a hma aia chak in a pen hlawk hlawk a ,ka chelh hman dawn lo nia ka hriat takah chuan a kawrah ka ṭham pawp a bangah ka nawr bet chawt a," ding rawh ka tih chu " ka ti vin tuarh a,a mitmeng ah hlauhna ka hmu nghal.

Tih hlauh hi ka duh dan a ni lo , hreptak chuan engvanga hetianga awm phiangsen nge ka nih ?

" min thlah rawh "a rawn ti let hlar a, a thinrim theihtawpin a thinrim niin a lang .Takzet hian !

Tawlh pit a tum a mahse a ban tawn tawn ah ka man bet a,bangah ka nawr bet tlat.

" Engthil nge i tih..."

A ṭawng tam hma in a hmui sen siah ah chuan ka fawp nghal tawn tawn a ,ka dim lo hle bawk .

Hetianga ka chet chhan hi ka hre tawh bik lo,ka hriat zawng chu he hmeichhia hian ka rilru a chawk buai in chan ka hlauh luatah rilru fim ka pu thei lo .

Tal aih aih chungin a theihpatawp a na in ka awmah a lo nem ṭang ṭang a , rum nghutin ka in la hrang nghal , tharum ah hneh mah ila a duh lo chung erawh tih luih ka tum lo .

" min thlah rawh " ka fawh leh loh nan lehlam a hawi hmak .

A ngaihdan nilo lutuk hmel ka hmuh hian keipawh ka inthiam bik lo, ka chet dan mawi lo lutuk avang hian ka inchhir nghal hle .

" Carine nen kan inkarah engmah a awm lo " ka ti sup a, ka hrilh kher chhan erawh ka hrelo .

A hriat ngei hi ṭul ka ti a ,a chhan a awm kher ngai ka ti lo .

" chu chu ka buaina tur a ni lo,kal sawn rawh" min melh kar a ,ha seh chilh ran hian a ti sep a .

Hreptak chuan ! A ṭawngkam leh a mitmeng a thikna awm hi a in mil hlawl lo ,ka rin aiin a tawh khirh dawn tlat.

" khatiang khan min melh suh "

Mi lerh tih melh a min melh hi ka duh lo .

" ka hua che " tih chiah a sawi ,min nam sawn pawp a, a tlan nghal vang vang .

Tetei a liam chiah tih in a chunga ka thil tih dan mawilo tak kha ka ngaihtuah let a ,ka inchhir chu ka lu ka dawm vang vang a ,mipa ka nih vang ringawtin khatianga chet theihna dan kha ka nei lo .

Engkim hi ka ti harsa zo vek .

" khanu kha mi i hmeichhe duh chu ?" Carine chu ka lam panin a rawn pen chhat chhat a ,a ṭawng chu hre lo ang hmakin ka din dan ngaiin ka ding reng thung .

" awlsam takin ka kal tir mai che i ring em ni ?" A nui lui sak a ,ka hriat ṭhin Carine kha a ni tawh lo .

"Buaina thlen sak hauh suh ang che "

" Buaina ? Hahh...Noel ,i fiamthu em ni? Kei nilovin a ni khan buaina kan inkarah a thlen zawk a nih hi "

" kan inkarah eng nge maw la awm nia i hriat chuan chiang takin ka hrilh ang che , min kalsan ni aṭang khan kan inkarah engmah a awm tawh lo "

" in ṭhianṭhat na pawh maw ?"

" chutiang ka rin zawng a ni vek lo " ka ti hmuk a ,ka kal nal nal .

In ṭhen hnua ṭhian anga awm tih vel hi ka rin zawng a ni ve lo , kan inkar chhutchah a ni tawh chuan inzawmna a awm leh tawh tur a ni lo ,chu chu ka rin dan a ni.

ER -a ka luh chuan min duty thlak tur UMamawii pawh a rawn thleng tawh a , midang awm huai huai mahse Tetei leh Nathan te awmdun chuan ka mit a ti kham hle .

" Noel , i thik em ni ?"

uMamawii chuan a rawn ti sap a ,za lo zetin ka khi suk a chhunglam ah erawh ka alh lo chauh.

" i thinrim hmel teh mai ania ,eng nge maw a thleng em ni ?" A ngaihṭha lo chuan a ti leh a.

" engmah a ni lo "

" chutiang ringawt chu a nih ka ring lo , nangni pahnih hi intih thiamlohna in nei te a ni lo maw ?"

A sawi zo chiah chu Carine a rawn lang ve nghal ,thil thlen dan chu hrefiah nghal kuarh niawm takin a bu nghat a .

" i let leh a ni tih min hrilh miah suh " a rawn ti sa sa a , Carine hnena ka let leh loh nan engpawh a ti duh ang .

" ai " ka tih chuan a thaw huai a .

" anih eng nge i buaina chu ?"

" ka hre tawh bik lo "

Nia , engkim hi a buai mup mup a nih hi .Tetei ka fawp zo chiah a ,engtiang chiaha mi khawlo ah nge min ngaih ang kha hrelo .A laka ka rilru put hmang hi a thianghlim a ka neih hma loh chuan tawpsan ka tum lo.

Duty room ah ka haw hma in tui ka in leh te te phawt a ,ka hnung lam aṭang hian Nathan chuan ," Tetei hi i duh em ni ?" A rawn tih chuan ngawi rengin ka hawi let a .

" aw "ka ti chang fak, zep kual vel hi ka thiam ve lo .

Ka chhanna avang chuan a meng bial kawk a , ka in pawm thlap hi a ring lo te pawh ania nge .

" maw ?"

" chuan engtin nge i tih dawn ?"

Ngeiawm zet hian ka ti a , hepa hi ka khing ang tih ka ring ngai lo tunah chuan a ni aia thik hi ka nei lo .A atthlak takzet .

" hnaih tawh suh ,Tetei hi vawi engzat nge i tih ṭah tawh i hria em? Bansan vat zawk rawh "

" i sawi avang ringawt hian ka bansan i ring emawni le " khik suk pahin tui chu ka in leh a ,a dar ah ka beng thak thak a .A thusawi hian ka ne pawh a khawih lo .

Ka clinic ah damlo inentir tur inziak an tam avangin dar 8 rik dawn ah pawh ka la ṭhu a , eng ang pawhin buai mah ila nilengin Tetei bak ka ngaihtuah lo .

Henu zet hi chuan ka thluak hi a chawk buai ve ngawt mai ,min la tibuai dawn chauh chu a nih hi .

" Noel " Kawngka aṭangin Rinhlua chu a rawn dak dek dek a ,tunah tak hi chuan Rinhlua nilovin Tetei ni hmuh ka duh .

"Pawnah khan min lo nghak rawh ,Patient pakhat chiah ka nei tawh " ka tih chuan a pil nghal zuk a ,a ngaihna awmlo ti takin khik vur vur pahin ka lu ka thing a .

Damlo test na result ka en hnu chuan a rawn kalpui tu hnenah chuan ," a BP a san deuh avangin Furosemide (lasix) hian in chiu phawt ang, A lung hi a vung a a lung huat loh damdawi Tab Dytor-5 hi zing tin mum khat zelin ei rawh se "

Ka ziak pah zela ," A thaw hah hi a lung vung vang hi ania , Budate hi nebulizer in zing leh tlaiah lo hip bawk rawh se ,chuan a pum nuam lo ah hian Rabeprazole DSR hi mut hma in mum khat zel in "

A pawimawh tur awm ang ka hrilh zawh chuan vawiin atan chuan ka zo der ,ka thaw huai bawk .

★Rinhlua's POV★

Joysie nen Noel Clinic ah kan kawi dun a,Joysie erawh damdawi lei tur a neih avangin a chhuak lawk thung .

" Hey ,Bro ....Specialist ho chu in lun char char hle mai " ka ti lut ham ham a ,min lo nuih eng ang mahse a hmelah kap tu a nei tih hai theih a ni lo .

" Eng nge i rawn tih dawn ?"

Hepa tak hi chu tihian min lo zawt hu zel .

" nileng in call i la thei lova ,i thi nge dam pawh ka hre hleinem "

" vawiin chu min tibuai lo teh ' a chair chu a ngheng ar ar a , eng tehhrep in nge tibuai ni hetianga a awm tak .

"ṭhianpa duhtak ,Carine khan a rawn bia che em ?"

" hmela , Engvangin nge ka number i pek ?"

" I duh viau a ni lawm ni " ka tih chuan min chhan a tum loh hmel hle.

" anih chuan Tetei zawk em ni i ngaihtuah ?" Ka ti fiam vela mahse a hmel awmdan aṭang chuan a dik tih ka hria ,kei ngei pawhin ka awih lo hial .

"Engkim ka tibuai vek " a thaw hak a ,a lungngai ve tak tak niin a lang .

" A duh loh che mi ?" A melh ngai a melh vung vung a ,chutah thil nithei awm tak chu ka ngaihtuah chhuak a ," nge mipa dang duh a nei zawk?"

" chutiang deuh chu " a ti sup a.

" Anih chuan kal tir rawh ,i hmangaih a nih chuan kaltir rawh " ka ti zung zung a ,thinrim hmel fe hian min rawn melh .

" chutiang chu ka rin zawng a ni ve lo "

Nia ,Noel ngaihdan ah chuan mi i duh a nih chuan i neih theih hma chu i bei mai tur a ni tih hi, i hmangaih anih chuan a hlim nan kal tir rawh tih vel te hi chu engah mah a ngai lo .

" dude , henu hi i duh viau em ni ?"

Carine ai pawhin a duh niin kei chuan ka hria .Carine hian high school kan kal lai aṭang tawh in a rawn be tawh ṭhin a ,Noel an a duh veleh kum khat em pawh an inngaihzawn hma in rinawm loh sanah puh in a ṭhen leh lawi sia. Rilru na takin a kalsan a , khatiang rilru kha ala put reng ringin an pahnih hian an inkawp leh theih nan hma lak ka tum zet na in Noel rilru ah hmeichhe dang an awm tawh tih ka nemnghet chiah .

" ka thinlung zawng zawng in " a tih takah chuan henu te reuh hi a atchilh takzet tawh a ni tih hai theih a ni lo .

Noel hian hmeichhia hi awlsam takin a la duh ngai lo ,tun ṭum erawh henu hian eng dawi nge a hman ni hetiang em em a a uai tak mai.

" hmeichhia i duh hmasak vawikhat na ,record a ni hial ang lawm chi a nih hi" a bulah hi chuan ka la thutak duh lo , ka mit ko chu ka san zeuh a .

Tetei ngaihtuah chuan Carine te hi chu engkimah khitah vek a ni mai .Mizo hmeichhia a chuan hmelṭha ber pawl leh pian nalh ber pawl ti ila ka sawi sual lovang .Ka ngaihtuah chiah pauh leh Tetei a duh hi ka mak tihna a zual .

A khawi lai ber hi nge a duh ni ?

" Taka Joysie nen kan rawn kal asin " a meng bial deuh pap a ,ka thil hrilh leh tur phei hi chuan a ti thidang thei ang.

" Engmaw ?"

" vawiin aṭangin kan ni tawh" ka tih chuan min lawmpui viau mahse Tetei nen a an inkar a ngaihtuah chhuak a ni ngei ang a thaw hulh a.

" in in be chiah a ni lawm ni ?"

Joysie nen hian kan thawh na a inang bawka , hma lak a awlsam bawk em a tin ni .

"Nang ang ka ni lo ,keite chu ka che rang alawm "

" hmela muang changa che tura min hrilh tu i nih kha " haha, engah mah a ngai lo emaw ka tih kha a lo apply tak tak a nih dawn hi .

Keia thurawn tehlul a lak tawh chuan a mangang tawpkhawk tawh a nih dawn hi , hetianga Noel meuh a awm hi kei chuan hmuh nuam ka ti tlat , Tetei hian han ching let tak tak teh se .

" hawh a tlai zel , thil ei ang "

" kalna tur ka nei " a ti hmak , tun ang hunah khawiah tak kal ang maw ?

Tetei's POV

Zanin chu ka pa zurui insawitheih zan te pawh ti ila ka sawi sual lovang . Ka nau nen chuan TV en pahin sofa ah kan ṭhu dun ran a ka pa erawh kan piaha sofa ah a ṭhu daih thung .

Ka pa lah hi a insawithei rem rem khawpa ," kan tlangval lai chuan veng chhungah nula min duh lo tu pawh an awm lo .Zaithiam ,hmelṭha leh tlangval chhelo tih takah Mizoram pawnah pawh sawmna ka dawng ṭeuh a i nu vang hian ka hnawl sak a nih kha .A hun lai kha chuan lar vet vet tak ka ni C. Vansanga te chuan ka ne pawh a tluk lo " a ti ham ham a ,he thu ringawt pawh hi a sawi ngun tawh lutuk a Muani phei chuan a lo sawipui zuah zauh tawh .

A tak tak a ni em tih erawh ngaihtuah fe angai .

" Pa , i la sawi rei dawn sia ei tur lei ila " Muan'in alo ti hmanhmawh .

"Eng nge in ei duh ,kha zuk lei rawh u" tih pahin Rs100 hi a rawn phawrh chhuak a .

" Sprite leh Lays ka duh , nizanah ka kal tawh han kal ve tawh rawh " min rawn melh a ,henu tak hi chu a û zawk hi min tir kal dawr dawr zel .

" Fanta ka duh keichuan ,a kal tu tur ka nia ka duh duh ka lei ang " ka ti ve ngat a ,pawisa chu ka la a kawn ah ka tlan chho nghal vang vang .

Vawiin nileng in Dr. Noel ringawt ka rilru ah a awm , min duh lo nise min fawh ngawt nachhan tur a awmlo mahse Carine nen an inkuah lai chiang takin ka hmu leh bawk sia ,eng nge a rilru ah awm ka hrelo .

Hepa hian min bum kual mai mai thei lovang ,min duh ve emaw ka lo ti hman a mahse ka hrechhuak hma hlauh hi ka lawm letling zawk .

Aaaaa....hepa hian min ti â thei takngial dawn , a mitmeng ,a rim leh a fawh te kha ka thluak aṭang hian ka paih chhuak thei thlawt lo .

Ka nau hi ngeiawm viau ṭhin mah se Fanta nilovin Sprite chu ka lei ta nge nge a , ka ngaihtuahna aṭangin Dr .Noel paihchhuah tumin ka zai thla rat rat a , theihnghilh chu sawi loh kan in luh thlakna bulah chuan Dr. Noel car ang chiah chiah hi ka hmu thut mai !!

" ka thluak a buai tawh a nih hi " tih sap pahin kal leh mai ka tum a ,mahse Dr. Noel message ka dawng hlawl!

*ding rawh * tih ringawt hi a lo ni a , phawk fe hian car lam chu ka hawiphei nak chuan a chhungah Dr. Noel chu a lo ṭhu reng chu niin ,ka hamhaih nghal der .

" ka mitvai chu a ni si lo "

Car aṭang chuan a rawn chhuak a ,a tshirt var plain chu inhmeh tak a ni mahse a hmel ah erawh hlim hmel a awm lo thung, a ha ui ngho lang var in nui leh phei se chuan a ṭha zual ang mawle .

" tun ang zan reiah engvangin nge i chhuah ?" A ti ram hmuk a.

Zawhna nilovin thupek te pawh a ang zawk .

" Eng nge hetah i rawn tih ?" Ka ti let ve sak .

" kha ..." Tih sap pahin a kekawr ipte aṭang chuan bakilh senno bawk kha a rawn phawrh chhuak a , tukin zingah khan ka ngei em avangin tum reng vangin a dawhkanah ka dah kha a nia .

" ka duh lo "

He thil vang ringawt hian Ranhlun N aṭangin Mission Vengah a rawn kal chu a ni em lovang .

" i duh loh chuan nangman paih mai rawh " tih hmuk pahin ka sam chu a rawn ṭawn nghal mawlh mawlh a ,rang takin a kut chu ka lo paih thla vat thung .

" Engvanga he thil hi ti nge i nih ?"

Ka lo tal ve chhen avang chuan ka dar tawn tawn ah nghet takin a vuan a ,amah en lo thei lovin min siam .

" min thlah rawh " ka ti leh a .

"Ka duh che " a rawn ti ta thut mai! ka bing nghal mup mup nimai hian ka hria



Link:
BBcode:
HTML:
Hide post links
Show post links

ADVERTISEMENT (A hnuai a milem hi a nia hmeh zeuh tur chu)