I Love you 3000 -11 by Remruati Bawitlung (Haylor)

Episode kal lai dah luhna

Moderator: writers

Remruati (Haylor)
Posts: 680
Joined: June 22nd, 2016, 9:24 pm

I Love you 3000 -11 by Remruati Bawitlung (Haylor)

Unread post by Remruati (Haylor) » May 26th, 2020, 10:49 pm

20200521_140439_compress58.jpg
20200521_140439_compress58.jpg (59.28 KiB) Viewed 6242 times
Chapter-11

“I love you without knowing how, or when, or from where. I love you straightforwardly, without complexities or pride; so I love you because I know no other way.“
-Pablo Neruda


Tunah khan min duh thu a sawi tiraw !! Ka mumang te pawh a ang zawk .

Reilote chu tih ât in ka awm hman ,Dr .Noel hian min duh emaw duh lo emaw hmeichhe dang nen an in hnim hnaih chhung chuan ka inthiar fihlim zel dawn .

" Chuan .."

A rin loh dan deuha ka chhan avang chuan mak ti hmel te pawh a pu .

" ka duh che " tih ringawt in min chhang leh tawh, ka duh thu hi hrilh let ve chak viau mah ila min ti na leh lo ang tih ka hre tlat lo .

"Ka duh ve lo che" ka lo ti hmak , hetiang thil ka kâ aṭanga a chhuak ta mai hi kei ngei pawh hian ka awi lo, hun pawt let leh thei ila chu ka duh thu ka hrilh tawh ngei ngei ang .

"I thusawi kha i chiang chiah maw ?"

Inringtawk tak hian min zawt a ,hepa hian ka duh a ni tih hi a inhria te a ni lo maw ?

Chiang zetin min en renga ,ka rilru a hriat ka hlauh avangin ka tawlh hnung vat a ,ka kun nghal daih bawk .

"Chu chu ka buaina tur a ni lo , ka kal dawn " tih sap pahin ka inher vut a ," min duh nge duh lo chu kan la hria ang chu " a ti ri ka hriat phei chuan in lam panin ka tlan thla nghal nal nal .

Kha aia rei kha awm ni ngat ila chu ka inpuang hman ngei ngei ang ,mahse Carine nena kawp kual duh khawpa rilru hniam ka pu lo.

Ka thil lei chu dawhkanah ka dah sawk sawk a ,ka room ah ka tlan lut nghal. Ka ṭhu mai mai te hi ka khur der der a ,Dr. Noel hian min duh ve ang tih hi rin deuhna chu lo nei ṭhin mahila a kã aṭang ngeia hriat nen chuan a danglam takzet .

Muani ngaihṭha lo chu a rawn lut nghal a engkim hrilh vek ila ani tal hi chuan tihdan te pawh a hre mahna.

" Tete ...kha in ve rawh " tih pahin sprite chu ka dawhkanah a rawn dah a ,ka awm dan a hmuh chuan a chhan min zawt nghal zat bawk .

" sawi mai mai teh "

Kawngkhar bulah inkuangkuah chung hian a ding sawi laih a , ka ṭawng a ngaichang ran bawk .

" ih ! Dr. Noel'an min duh thu min hrilh a " bakilh senno chu ka kheuh niap niap pah a.

" Engmaw ? Sawi zel teh " hriat chak hmel takin chair ah a ṭhu sawn a.

" a rang teh thut lutuk a ,ka duh loh thu ka hrilh "

" Enga!! I van â tak "

" chutiang te a min tih , min play thu min hrilh ziah kha " ka ti let tan tan a .

" mahse tun te chu a dan a dang alawm "

" Nurse Carine a kuah lai ka hmu a , lerh lo se a kuah tawp nang "

" ni ve tho "

Muani meuh in tih ngaihna a hriat loh takah chuan thaw halh in khumah ka let tawp a ," ka rilru hi a buai vek tawh "

" mu mai mai rawh , i duh a nih te chuan hrilh mai la " tih hmuk pahin a chhuak daih a anih chu !! Eng nge maw ti kawng zawng takin min puih ka lo beisei asin .


EMERGENCY ROOM

Dr .Noel vangin zankhua in ka mut theih loh phah chutah kan duty dun lehnghal . Ngatinge kan duty dun theih em em le ,a bik takin tun ang hunah ngat phei hi chuan a hun lo takzet, mahse vawiin chu Carine a duty lo hlauh.

Kan ṭhut khawm ṭhap lai chuan Irene chuan ," Vawiin hi Sir duty tawp na ni tur a ni tawh a , min be ngai lo mahse a awm ve hrim hrim hian a nuam "

" Maw ? A duty tawh dawn lo maw " ka lo ti hu a ,a ruk tak chuan ka lungngai hle .

" aw ....a û ai a kal kha vawiin hi a tawpna ania, ER ah duty tawh dawn lo mahse Department ah a duty dawn tal a "

Department lamah duty mahse ER ah a duty dawn chuang lova ka hlim phah lo , a nih chuan ka hmu khat tawh viau ang nilo ka hmu ngai tawh lo maithei .

Engkim mai hian ka rilru a ti hah vel vek, thil hi a thleng rang teh thut lutuk a han hmachhawn mai dan tur pawh ka hrelo.

Nizanah lah Dr. Noel ka hnawl zo chiah a tunah a awmlo tur hi ka lungngai leh hle si. Arghh...Duh thlan tur ka hrelo ,Dr. Noel hi pawm ta ila ka rilru a ti na leh mai mai anga, hnawl ta ila ka damchhung in ka inchhir maithei bawk si.

Duty room aṭang chuan Dr. Noel chu file en mawlh mawlh pah hian a rawn chhuak a, chair a ṭhut pah chuan Irene chu a rawn ko a , kei nilovin Irene a ko ta daih chu ka lawm lo ru hle .

" nidangah chuan keimah hlir min ko ṭhin sia " tuma hriat loh in ka phun sap a.

Sister Pi Elizabeth chuan damlo card min rawn pek pah hian
"heihi Noel va hmuh lawk teh " a ti ta mai , ngatinge kei kher ?

Ka theih chen chen pehhel ka tum asin .

Hreh tak chung chuan card chu ka la a ,Dr. Noel dawhkana dah pah chuan zawi sap hian ," Sir , hei " ka ti ringawt a , Sir tia han koh ringawt te hian ka lai ṭut .

A natna a zirin en pawh min en lovin damdawi hming chu a ziak nghal mawlh mawlh a, engmah sawi lovin card chu ka lamah a rawn ti tawlh phei a Irene chu a pe leh hmak a nih chu !!

Inhum ruh ṭunin card chu ka la pawp a , khatiang anga ka chunga a awm thut nachhan kha ka hre lo .Nizanah min duh thu min hrilh a tunah lah min hre lo ang hmakin a awm leh sia.

Ka rilru zawng zawng a chawhbuai vek laia engmah thleng lo ang maia a awm hian min ti thinrim in ,ka duh loh thu ka hrilh kha ka lawm leh hnuhnawh .

Kan ṭhenawmpa Pa Sanga chu an nu nen ER ah chuan an rawn lut hlawl a , ka hmelhriat te an ni bawka kan lo ngaihven nghal vata .

" Pi Puii ngatinge Pa Sanga chu ?"

" hei ka lu a hai atia ,amah hi a chau bawk sia ka ngaihṭha lovin ka rawn kalpui a nih hi "

" hetah hian lo ṭhu rawh u " tih pahin ṭhutna tur ka lo kawh hmuh nghal zung zung a .

A RBS leh BP te chu ka lo check sak zung zung a , a BP - 190/ 120 a nih vang a nih dawn hi a chauh em em nachhan,a stroke hman lo hi a vannei takzet.

" Pa Sang ,i chau sia sawtah sawn lo va mu rawh " ka tih chuan an nupa chuan an inzui phei dat dat a , hetiang em em hian Pa Sanga BP hi a sang ang tih ka ring pha ngai lo .

Dr. Noel damdawi chawh ho chu leitir turin lehkha te ah ka ziak thla nghal zung zung a mahse a BP sang tih hniam nan Drip maw ? Nilo pa Sanga hi lung ṭhalo a ni a ,Drip an khai chuan a thihpui thei .

" Sir , damlo saw lung ṭha lo ania " ka tih takah chuan alo hrethiam nghal , a ngaite bawkin ngawi rengin a damdawi chu a thlak nghal mawlh mawlh a , vawiin a Dr. Noel awmdan hi ka hrethiam lo .

Saline chu Furosemide inj in a thlak a ,Pi Puii bulah lei nghal turin ka hrilh bawk .

Lung ṭha lo tan hian drip khai hi a haw em em a ,ka Patea pawhin a thih pui tawh avangin khatiang kha thleng nawn tawh lo se ka duh .

Pa Sanga chu Lasix a ka chiu hnu chuan a mu hahchawl vang vang a , a zun a chhuah vat dawn avangin a muhil lem lo .

" A BP a hniam leh vat mai ang , Hei doctor in BP sang damdawi a chawh tawh bawka " Pi Puii bula ṭhut pah chuan ka ti a , thil ho te tihsak mah ila a lawm thiam ṭhin bakah nu ṭawng duh ve tak ania veng chhungah ka hming a ṭhat phah leh ngawt.

" Tete ...i lo awm hlauh chu a tih zia teh e " tih pahin a bag aṭang chuan artui chhum sa hi a rawn phawrh chhuaka ," pa-a hei artui chhum tal hi ei rawh , i damdawi ka lei pahin ka rawn leisak nghal che a "

" nilo ...pi Pui artui te chu lung ṭha lo in a huat ber alawm , a lung a vung vak mai ang " ka lo ti nghal zung zung a.

Chhun thil kan ei zo kitchen-a ka luh chuan Dr. Noel chu dawhkan vuanin a lo ding kun lap a ,a awmdan aṭang hian a awm a nuam lo tih ka hre nghal .

Ngawi rengin a pang chu ka va dep ringawt a ,mak ti takin min rawn en ha thung.

" I khua a sik a nih hi "

" Engmah a ni lo " tih pahin kal daih chu a tum a mahse ka ngaihtuah avangin a banah ka va vuan chawt a ,a kut phah hlai zet hit thlar chu ka kut lum thar thar chuan ka hum sak vang vang a, ka zak duh tawh bik lo .

" i kut a vawh vek hi , damdawi i ei em ?"

Ka hlauthawng hmel a hmuh chuan a rawn nui ve ta nge nge alawm , vawiin a a vawikhat nuihna .

" Min ngaihtuah em ni ?" A rawn ti sap a ,chhan dan tur ka hrelo hman ṭep.

" doctor incharge i nia tupawhin an ngaihtuah vek ang che chu " za lo zet hian a khi suk a ,min en chiang thei lutuk a melh pawh ka melh ṭha ngam lo.

" a nih chuan ..." A kut ka vawnna chu ngeiawm zet hian a zuk melh kher a ,ka thlah rang ngei mai .

" min ngaihtuah loh chuan khatiang thil kha min zawt tawh suh " a ti hmak a ,a kal daih a nih chu !! Ka ngei letling zawk ,keipawhin ngaihtuah reng hi ka duhdan a ni bik hleinem .

Dr. Noel chuan chhunah engmah a ei lova chu aia ka rilru ti hah tu chu tun thlenga nachhawkna ala ei lo hi a ni .

A chau hmel in mut a mamawh takzet tih hai theih a ni lo ,chutichung chuan damlo a enkawl char char tho.

Ka hmu thei tawh thlawt lo ,damdawi leh tui chu a dawhkanah ka va nghat chawrh a , thaw deuh halh pahin min rawn melh khai a , a hmel a rum tawh sa nak alaiin hetianga min melh leh phei hi chuan a hlauhawm zawk .

" ei rawh " lehlam ka hawi hmak .

" ka duh lo " kan in chhang tawk hmak hmak khawp mai .

" i hria em ? Hetianga i awm hian ka ngaihtuah takzet che "

Ka ti hmuk a ,a ni erawh alo nui vur vur thung .

" ka hria lawm " tih pahin damdawi chu a ei nghal a , ka thaw huai bawk .

(Thla 3 dawn hnuah vawiin ah ka chhuak a, ka chhuah ngai loh vang nge ka mut a chhuak reng mai ,ka type sawt lo hle bawk . Chhunah engmah ka type lova zanah lah dar 8 atangin ka type tan chiah a zanin chu min lo hrethiam leh mai rawh u ....chuan fakna hi hmet uar ang u aw.. Xoxo )



Link:
BBcode:
HTML:
Hide post links
Show post links

ADVERTISEMENT (A hnuai a milem hi a nia hmeh zeuh tur chu)