THE RAPSAGYAN FAMILY Chapter-46 Becky Rafa Renthlei

[Becky Rafa Renthlei]

46.THE RAPSAGYAN FAMILY

Becky Rafa Renthlei(-BRR)


Chapter-46

[Duatbiki]

Kan insuih ṭhat ni tur a lo thleng ta a.

He mi kâr tluan hian Zosanga a rawn lang mang lo! Ka lo rin dan chuan kan inrem leh tawh si a , zan tin a lo kal ka ring deuh kha a ni a, tun hmaa inhmuh sek duhna ang rilru kha a pu ta lo nge, ka rin aiin a rawn lang khât a. Thil ṭul pawimawhah phone-in min rawn be zauh zauh thung.



Kan thawmhnaw inbel turah kan buai deuh a, kawr fual hâk ve ngei ka duh laiin Zosanga'n a phal ta lo. "Mizo puanchei bih ula, a kawr lam chu in duh duh dan dan a ni mai, tun laiah kawrfual hâk an intih hmuha thil ṭul ber a ni lo," a ti deuh tlat.


A tîrah chuan Spi nen kan han hnial deuh a; mahse, ka nu leh pa pawh Zosanga lamah an ṭang ta si a, ka hnial thla zo ta lo. Hmanhmawh takin kan kawr hâk tur kan ṭhui tîr a, a mai mai kan duh lo ve khanglâng nen kan insên phah hrep.


Keiin Cream rawng ka hâk tur atan ka thlang a, Spi'n a pâwl a thlang thung, kan vun a ngo dun ve ve a, rin ai tak chuan kan inhmeh phian! Ka fa te pahnih pawhin Cream rawng kawrfual an inbel a, a pa an chhuna an sam a dum hlap.


Ho deuhvin kan nam liam mai dawn emaw tih laiin rin aiin mi an sawm zau a, ka zâm thar hnuhnawh viau. Ka nu thawhpui eng emaw zât Vety directorate aṭangin an lo kal a, Zosanga te workshop-a thawk leh training lai zawng zawng, nu Muanpuii thawhpui police lam an ṭhahnem bawk.


Chu mai bâkah ṭhenrual ṭha leh kan chhungte Lunglei lam an rawn kim viau a, ka pa unaute pawh an lo kal kim thawkhat. Patea Vaphaia awm erawh a rawn kal ve leh pek lo a, a nupui chhungte hian an control hneh nge a unaute lam a rawn ngaihsak lo khawp mai.


Chawhma dâr 11:00 a invuan tur kan ni a, Rafaela nizanah a rawn thleng tawh bawk a, kan kim viau.


"U Duat, kan hmangaih che a, tunah chuan pathian hriatpuina ngei ni tawh rawh se aw, kristian chhungkua indin hi ka duh ber a ni," tia a sawi chuan ka hnuk a ulh ringawt.


Ani zawng, khawvel thil kalsanin Pathian rawngbawl a thlang a, a farnu eng mah ni lo te min chhawmdawlin min fuih a, kan tân innghahna tlâk a ni. Diktei rawn tel thei lo tur pawi kan ti hle, Red ribbon Choir competition-ah an kohhran zaipawl an tel ve a, vawiin hi an zai hun tak a ni si a, Rafaela'n tlailama chaw ei tur talin a hruai tur thu a sawi.


Valpuia pawh a phur hle a, "Nula chhe lo deuh han dinpui tur i nei îk lovem ni? Spi te chu nu a ni si a," a'n ti ve ngeiah, Saitei a nui ṭha duh vak lo.


Ka pu in a pension pawisa aṭangin vawk pakhat man a rawn tum a, ka pa farnu, Kenedy-a nu hi Vawk pakhat man a rawn tum ve bawk a, dân anga ka nei lo chung pawhin min hlutsakin min ngaihsak hlawm em em a, ka thinlung takin ka lawm.


Hall chhung uluk tak, simple angreng zeta an cheiah chuan kan ṭhu tlar ṭhâm a, Zosanga leh Valpuia an nalh khawp mai. Suit buang uk deuh kharh an inbel ve ve a, an sâng ṭha dun sia an chhe lo thlâwt.


Kan fate pahnih ka nu leh nu Muanpuiin an pawm a, rin aiin thâwm bengchheng an chhuah lo. Hmeichhe fa annih vang nge an zia hi a zâwi ve khawp mai.


Pastor a rawn ding chhuak a, fuihna thu sawi hmasain inneihna programme kan hmang zui nghal a, a hma khan inneih zungbun ka bun lo hrim hrim a, tun ṭumah erawh chuan Rangkachak kual simple zet ka bun ve ta. A chhungah 'D&Z' tih leh kan inneih ni, thla leh kum a chuang kalh a. Zosanga'n min bun tîr lai chuan ka kut a khûr dar dar.


'Kei Zosangmawia hian, nang Lalhmangaihzuali hi.." tia inneih thutiam a chham ri chu a zâwi lem lo. Kei erawh ka zak lutuka ka ṭawng zâwi khawp mai.


Zosangmawia a thu tak ngang mai. A thawhpui lo kal zingah Hlimi pawh ka hmu zuaia he nu hian boruak a ngam khawp mai. Nautê en tura a lo kala min ṭawngkhum dan ngaihtuah phei kha chuan lo lang ve lo tawp mah se pawi tihna ka nei lo.



Inkhawm bânah thlalâkna hun rei vak lo kan hmang a, a zawng aza kha kan dinpui ta lo. Kan fanu te pahnihin pawmtu an ngah ngei mai.


"Duati, zanin chu Bawihpuii te unau kan lo riahpui ang a," Spi'n ka beng bulah min rawn hrilh a.


"In buaipui thei lo ang, pahnih em em chu," ka ti a.


"Anih Bawihpuii tal kan lo riahpui ang aw, in che ṭha thei lo palh ang," tiin a nui kar kar a, ka va ngei reuh tak.


Kan in lamah thlahna hun pangngai takin kan hmang a, nimin tlaiah keini lam chuan chaw ei kan siam tawh a, vawiin hian Zosanga inah ei tur a ni ve thung. A nu leh pa in kha an han ti zet a; mahse, Zosanga'n, "In ka nei ve tawh a, Duati lo luhna tur a ni bawk a," tiin a ina chaw ei siam a hauh deuh tlat.


An in puiah lâwi lut lovin a in tharah ka lût ta zawk a.


Inlêng neuh neuh kan nei bawk si a, kan ri luai luai mai. "Bawihpuii hi Spi ten riahpui an duh deuh a," tia Zosanga ka hrilh chuan, "Zanin chu chhungkaw kimin awm ve phawt ila naktuk zan aṭangin duh leh hruai phei se la.." a ti ta a.


Spi ka hrilh leh vat a, "A pawi lo, in awmho lehna hmasaber tur a ni a, a âwm ve tho," a ti ṭha ve mai.

Ka nu leh nu Muanpuii pawhin riahpui an tum a; mahse, Zosanga'n a remti lo tih ka sawi a, an hre thiam lutuk tlat.


In lêng an haw zo a, Valpuia pawh a haw fel chiah. Ka chau lutuk bawk nen khumah ka let tawp a, Bawihpuii te unau a pi te'n an paw muhil hlauh zawk a, chuti ni lo phei se chuan paw tur pawhin thâ alawi ka nei tawh hleinem maw le.


"Vawiin kha i nalh takzet," khumah a rawn ṭhu a, min en vang vangin, "I chau a nih kha, shower nei zuai ila kan mu daih dawn nia," a ti a.


"Hetia muthilh nghal mai hi ka duh," tih pahin ka hâm zui bài bài a, "Ni lo e, intifai rawh le, lokal rawh," tiin ka inrin hman hma hian min rawn pawm nawlh a, bathroom ah min pawm lût ta a.


"Bawihtei te.." hlauthâwng aw deuhva ka tih chuan, "An harh hman lo ang, muangchâng lo ila," ti supin a thawmhnaw inbel a hlip nghal zung zung a, kei pawh zak ru deuh hlek chung hian ka inphelh ve ta a.


A rûk tak chuan ka zak. Ka biang asa hat hatin ka hria.


Inchhung bungrua kan rem fel ni khân bathroom-ah towel leh bathrobe vel a thar hlak kan chhawp vek a, "Duati.." shower gel min rawn chulhin ka hnung ruak kâng chu a tuai hauh hauh a, "Hey, inbual vat vat ang," ka ti ta a. A nui suk ringawt.


Kan inbual zawh hnuah naute hnute siamna tur tui lum flash ah ka dah leh tê tê a, ka kalna apiangah min zui zel, "Lo va mu rawh," ka tih chuan, "A rualin le, zanin chu kum khat chhunga min hremna man pêk i ngaih kha," tiin ka kâwngah a rawn kuah a, Zosangmawia chimawm zia hi chu(h).


"Kiri..i chhia.." ka tih chuan a nui chhuak hawk a, "Ka chhe lo a niang, min duh êm kha.." a la ti zui.


Chu mi hnu chuan mu turin kan inbuatsaih ta a, kan khum feet 7 zet ah chuan kan thâwl ṭha khawp mai. Bawihpuii te unau a kil lamah a sawn chho a, "Lo harh miah suh u aw.." tiin a fate biangah a fâwp zauh a, chutah ka mutna lamah rawn tawlh pheiin a mah si chêt hian min kuah a.


Ka taksa chûl lâwr dan danin min fawp pah bawk a, tun ṭum chu nupa nun dik tak Vantlang leh Pathian hriatpuinain kan hmang dawn ta.


"Kan tlaivar ang.." a ti sup a.


"I zak lo siah.." tiin a nghâwngah ka lo kuah a, "Zak tur ka ni em ni, pa din hmun dik tak luah turin hma ka hruai a ngai alawm," a ti a.

Ni e, keini nupa tân zahthlâk a awm lo a, inpawh taka hmangaihna kan chen dun zawh meuh chuan meng tur pawh ka awm tawh lo.


Muthilh tumin ka chhing ta riai riai a.


Zinga ka harhin Zosanga te pafa an lo tho tawh a, keimah chauhvin khumah ka lo mu!


Choka lamah thâwm a awm nak nak a, Walker-ah a chuantir a nih ka ring ringawt, Valpuia ṭawng ri pawh ka hria, min kai tho lo chu mak ka ti deuh a.


Nimin tlaiah ruai ṭheh tam viau mah se chaw hmeh vel a bâng nual a, ka nu te in hnih kan suah bâkah ṭhenawm hnaivai kan sem ve bawk.


Khum thawhsanin ka chhuak phei ve ta a, ka rin aiin an lo awm tam. Ka nî te nupa an rawn lût ve chiah bawk a, an fa neih chhun hi Goa ah lehkha zirin a awm a, tlâi khawhnu-a anneih a nih vangin keh thei dawmin an dawm tak meuh.


Ka nu hian a duat em em a, a zirna senso pawh kan tum nual a, Rafaela aiin kum 5 zetin a naupang.


Ka pu pawh a lo ṭhu ve a, rei an châm thei dawn si lova vawiin chawhnu hian Lungleiah an lêt phei leh dawn a ni. Ka ngai dawn viau a ni.


Zosanga'n ka chhuak phei min lo hmuh chuan, "I mutui lutuka ka kái tho duh lo che a nih kha," a lo ti a.


"Keini a rualin kan tho thlap thlap a nia kan va inang lo deuh ve," Valpuia'n a ti a, ka nuih aza hle, Saitei a duat zia kan hre vek a, khawi kipah an inzui zel ringawt. Ni Arini phei chuan, "An ti ve mah mah," ati nghe nghe.


Zosanga nen kan inṭhen hma pawh khan khawlaia inkaih leh induat vel kha kan ti meuh lo, mi mit a kham hma tih ka hria a, ka duh lo hulhual.


Chawhmeh a chuang tam bawk sia, kan inlêng te ho chaw eiah kan sâwm ta vek a, chaw kan chhum belh nghal a, mihrang teh chiam an awm lo bawk a, a awlsam phian.


Chaw eikhamah Bawihpuii te unau Spi'n a rawn la a, ka nu leh pa te an rawn lang miah lo. Nu Muanpuii te pawh an lo kal chuang lo a, an ngaih a ṭha ta te pawh a ni mahna.


"Duati, i pu te hi kan va thlah dawn em ni ang," tiin Zosanga'n min rawn ko a, an chhuah a lo hun dêr tawh chu niin.


Ka nîin, "Nu i ni tawh a, i pasal i tih thiam leh i nihlawh a ni mai, i hna pawh thawk duh tawh suh, Zosanga hlawh a tam a, in khawsa thei tho ang," tiin min hrilh.


Ka hna bansan kha ka ui viau ṭhin kha a ni a; mahse, tunah chuan thawh chi ni pawhin ka hre tawh lo. Ka nî fapa kha ka ai kal turin kan hrilh tawh a, Spi pa insawipui tir ila a ngheta a thawh theih mai chu ka ring deuh.


Tlai lamah Rafaela leh Diktei chaw ei turin kan sawm a, naktukah ani pawh a kal leh nghal dawn sia, ka ngai lâwk viau.


Ni lêngin lut chhuak kan nei reng a, Spi'n naupang a la phei daih bawk si a, kan room chinfelna hun remchang a ni a, ka bur ta ngar ngar a.


Tlai lam dar li velah Zosanga nu in min lo call a, an ina phei tura min koh thut chuan mak ka ti deuh!

Zosanga ka hrilh vat a, "Tukinah ka pa en tîr turin an kal a, a result a ṭha lo em mawni dawn le?" A ti ta a.


Eng mah ka lo hre ve miah lo! Kumin kum tîr aṭang khan a insawisel neuh neuh reng a, Lawngtlaiah pawh vawi hnih an in check up tawh niawm tak a ni.


Nimin te khan a tâl hah ve sia a nâ a lo chhuak a nih ka ring ve ringawt. A pum lam a sawisel deuh ber.


Rafaela te chanchin hrilhin Zosanga te in lamah kan tlân phei ta a. Kan va thlen chuan an lo awm ṭhap tawh, keima nu leh pa pawh an awm tho.


"Kan lo koh thut nachhan che u chu i pa hi tukinah kan en tîr a, a insawisel zing ang reng sia ka va hruai a, biopsy an la a, a pum lam an ringhlel deuh a nih ka ring," tiin nu Muanpuiin min lo hrilh a, amah ka pa pawh a ṭhu ve tho a, nâ nei hmel pawh a pu lem lo.


Result chhuah hun tur te an sawi a, "Pathian zarah eng êm a ti lovang," ka pain a lo ti ve bawk a, kan ngaih a ṭha zân lo deuh.


Tun laiah Cancer natna a tam tawh si a, a lo ni ve palh ang tih ka hlau takzet.


Dârkâr khat dawn kan awm ve a, Zosanga pawh a rilru a nuam bik chiah lo a nih ka ring, Phai lama kal te a sawi ri deuh a; mahse, nu Muanpui'n, "Biopsy result te chhuak phawt se," a tih deuh avangin a sawi nawn ta lo.


Spi'n Bawihpuii a riahpui dawn ta nge nge a, "Nangni pawhin Bawihtei in kawl dawn tho a," a tih deuh tlat avangin kan hawsan ta a. Hetia an tih an tih chuan an la kawl hlen tak takin a nia ka rin. Mahse, an hmangaih êm a, sawisel sak ka tum lo.


Rafaela leh Diktei te nen zanriah tuihnai tak kan kîl a, "Lo haw hma thei la chuan ṭhianah hman che ka tum nen," Zosanga'n a ti a, "A chi nâng, u Duati i neih tawh kha, min lo be sek tawh lo deuh ang chu," tiin Rafaela'n a fiam ve a. Diktei nen kan nui ṭhâ mai.


Diktei din hmunah hian ka indah chhin a, ka peih loh zawng tak. Mahse, kan mizia leh ani mizia te chu inang hek lo le, Pathian hruaina hnuaiah tluang taka an inneih ngei ka beisei.


Zosanga pa chungchâng te kan sawi a, Rafaela'n, "Lungngai lutuk lo ila, Pathian zarah hlauhthawn awm a nih ka ring lo, biopsy te chu tun laiah an la deuh zel alawm," tia Zosanga bula a sawi chuan, "A awm dan ka enin ka ngaih a ṭha lo deuh alawm le," a ti a.


Zanriah eikham hnuah khawmuang lovin an haw ve ta a, Diktei te ina lên a duh thu a sawi vang a ni pakhat. Zosanga'n a awmnaa a hman turin ₹5000/- a pai a, ala duh lo deuh dâwn a; mahse, keima'n la tura ka tih avangin a la ve ta a.


Kei mah vang kher pawh ni lovin Zosanga nen hi chuan an inkawm ngeih ṭhin a, Ramtei vanga a mualpho chiam pawh khan Zosanga nen an inkawp chawt a nih kha, han lungawi lovin inti thiam lo zeuh mah se tun hma aṭanga unau ang maia seilian dun an ni a, an inhaw hlen tak tak thei lo.


Nun phung pangngai kan zawh chho tawh a, Zosanga hna ṭan hmain Champhaiah zan hnih riaka kal kan tum ta a, Bawihpuii erawh Spi'n hruai a phal lova kan hruai dawn ta lo.


Ka thawhpui Elty te inah thlen kan tum a, ka han phone diam tawh a, a phûr ngei mai. "Naute lo hruai ve ve rawh u aw," a ti a. Mahse, thil awmzia ka hrilh a, a nau zawk chauh kan hruai tur thu ka sawi.


Zosanga motor check tir turin an workshop-ah a kal ve bawk a, a pa result kan la hre lo. Hlauhthawn rûkna nei ṭheuh mah ila atu amahin kan sawi lang lo a, kan inneih ṭhat hnu hian kan in lamah kan la lêng ta miah lo.


Saitei erawh a dam a ṭha meuh lova vawi hnih kan tlawh a, a chêr kiam mai. A chângin drip te an khâi leh a, naupâi a haw lutuk hi a khawngaihthlâk zawk.


Rafaela pawh a zirna hmun panin a kal leh tawh a, tun ṭum a kal tur chu a huphurh tih a sawi ve tlat. Ka pa pawhin a ngai ve deuh a ni ang, "Han zir zo thuai thuai la kan ti hle mai, i nu nen chauh hi chuan kan khua a har ve viau a nia," a ti a.


Kan glass house nitin ka pa'n a nghâk a, upat lam an pan chho ve zela dik tak chuan ka khawngaih. Ka nu leh kan nula awmpui Asiami nen ringawt khan an ni tawh a, an khawhar dan tur ka hrethiam mai.


"Duati, in zin hmain Bawihpuii thawmhnaw lo lâk kan tum a, Kimi ka lo tîr ang aw.." tiin Spi'n min rawn call a, Kimi'n Scooty a neih aṭang hian an ṭangkai pui hle. Ani lahin chhuah vah a lo châk ve bawk nen a rawn lang zing khawp mai.


Pa Faka Lawngtlaiah a phei ve thei ta si lo a, an in sak a laklawh deuh nen nu Muanpuii amahin a phei a, anni nupa pawh 'ka nu ka pa,' tiin ka ko ve thei ta. Ka koh hmasak ber chuan ka lái vel.


Kimi a lo thleng a, Bawihpuii thawmhnaw a keng phei deuh vek.


Kan fanu a nihna a bo dawn chuang lo a, eng kimah an buaipui vek a. Hmanni khan a hritlâng âwmnâ a, Hospital-a hruai ka tumin, Spi'n, "Kei man ka hruai dawn alawm, chanchin ka lo hrilh dawn che nia, kan kuta awm a ni a, lo ngaihtuah duh rêng rêng suh, hahdam tak khan awm rawh," a ti dam thlap.

Lalrinliani hi chu Lawmsangzela te fanu emaw ti an awm nawk. Anni pawhin an sawi chiang duh bîk der lo.


"Duati, hmanhmawh deuh rawh aw, kan chhuak tlâi lutuk ang," Zosanga insiam peih diamin a rawn chhuak a, zing dâr nga a pêl awrh chauh. Champhai panin kan chhuak tawh dawn a, "Kan thlenna inah kan che ngam awm si lova," tiin nizan khan âm takin hmangaihna min chenpui a, ka lung a âwi zân.


Bawihtei ka pawm a, ani'n kan thawmhnaw Car-ah a dah lut a, kan inpeih ta.


Kan inah ka nu leh pa kan tlawh zawk ang a, chumi zawhah Lawmsanga te, Bawihpuii hmu miah lova kal kha Zosanga'n a ngaingam lo deuh a, chuvanga kal chu kan ni.


Kum khat leh a chanve an pum ve tawh a, an inang mai siah. A pu hian a hai leh zauh zel, kan hlimpui thei a nia.


Ka nuin Bawihtei a ngaihtuah hle a, "Zosang, fimkhur theihtawpin khalh ang che, naupang zinpui nân chuan a hla mah mah," A ti a.


Ka pa pawhin, "Kan hnenah awm rih mai se, in nupain han kal zawk ula ṭha tur a nia," tiin Bawihtei chu rei vak lo a pawm zawk a, pa Faka dam ṭhat loh aṭang hian ka pa nun pawh hi a dul deuh ruihin ka hria. Ka ngaihbel vang nge ka hre lo a.


"An pahnih hniha kalsan chu kan ngaingam lo deuh maw le," tiin Zosanga'n a chhâng a, ka nu leh pa pawhin eng mah an sawi zui tawh bik lo.

Kan inthlah fel hnuah Zosanga te in kan pan leh ta a, an la thawh ka rin loh avangin Spi ka call hmasa ta a.


Kan va thlen laiin Bawihpuii a la muhil a, ka pa Faka pawh a lo tho chhuak ve a, "Pa, i ṭha em?" Tia ka zawh chuan, "Nizan lam chu ka mu ṭha ve reng, min ngaihtuah suh u, fimkhur tak khan kal ula aw Bawiha," a ti dam thluam.


Zosanga'n Bawihpuii kaihthawh a tum chuan ka phal lo a, "A suakbâk mai mai, kan kalsan leh daih anga Spi te tan a buaithlâk," ka ti a, a kài tho lui ta lo.


An vaiin min thlaha kan lan theih chhung ka pa'n min thlir reng. Zosanga hi a fa hmasaber a nih angin a duat em em a, khatia suahsual rawng a bâwl lai pawh khan a chanchin a ngaihven reng ṭhin.


Nu Zomuani thlânah vawi khat chiah ka la kal a, Zosanga'n, "Naupang lian deuh se ka nu seilenna hmun Lawngtlai kan tlawh dawn nia," a ti nghe nghe.


Kawng lakah kan châwl hran lo a, kan tlân chak lêm lo. Bawihtei a muhil deuh char char a, Kâwlkulh kan thlenin rei vak lo kan châwl a, Bawihtei a luak nasa kher mai. A che buai chi ka ni lo hlauh a, a zia tak a awm. Zosanga erawh a mangang khu chûk a, ka'n hau hlak kha.


Elty in min lo hmuak a, Zosanga a hmuh chuan chibaiin kan inneihnaa a lo kal theih loh avanga pawi a tih thu a sawi ve luam a, Bawihtei pawm a tum chuan a duh ṭhak lo.


A châuin a zawk hnak mai a, hnute pawh a hne duh lo a, Zosanga a mangang leh ringawt tawh. Damdawi ina kalpui a rawt a; mahse, "Motor a rui a nih hi, a reh ve mai ang," ka ti a, a lung a awi chiah lo deuh.


Elty te hi a nau nen chauhva khawsa an ni a, an phuisui reuh viau. Aman hnathawh a nei a, a nau hi chuan Class a la kal thung. Mikhual room ah kan inhnawh lût ve ta a.


Zan riah kan eikham hnu lawkah Lawmsanga'n a û a rawn call a, "Ka pa pum a na leha damdawi inah kan kal mek," a rawn tih chuan kan rilru a nuam thei tawh lo.


Zosanga'n a nu a phone nghal a, kan tân tih theih awm hek suh, ka nu leh pa ka zuk be ringawt a, anni pawh Damdawi in panin an lo tlân ve mêk a, "Lo ngaihtuah suh u, kan awm alawm," an rawn tih chuan tlêmin ka thlâ a muang deuh.


Ka pa hian zan khat mit chhin lo tâwk palh ta se, ka nu a khawngaihthlâk dawn lutuk a, ka ngaihtuah ngam lo. Zosanga pawh kan zin châu deuh bawk nen a nguai ruih a, ka pa a ngaihtuah tih ka hre mai.


"I rilru ti hrehawm suh aw, eng tin mah a awm lo ang," tiin ka hnêm a.


"Tukin kan kal dawna a hmel ka hmuh khân ka ngaih a ṭha lo rêng a ni," a ti sup a.


"Pathian zarah eng êm a ti lo turah ngai ila, haw leh dawn ila Bawihtei a ngaihtuahawm si, naktukah office dawr kan tum anga kan inpeih hma dan a zirin kan haw dawn nia," ka ti ta a.


"Matea te nupa ringawt an awm sia ka ngaihtuah êm a ni, Bawihpuii buaipui a ngai ngei dawn a, eng tin nge an awm ang aw.." rilru hah hmel takin a ti leh a.


"Kimi ka'n phone ang e," tih pahin phone ka ban nghal a, Lawmsanga te nupain ka pa an buaipui a ngai ang a, Bawihpuii a nute Saii hnenah dah mai turin ka hrilh ta a.


Saitei pawh a dam ṭha lo viau nain tihngaihna awm hek lo. Ka nu leh pa damdawi inah an kal bawk si a, zankhuaa Kimi kuta dah kha ka ngaingam lo a ni.


Elty pawh engkim ka hrilh vek.


Zosanga a kil berah a mu a, a dawtah kei, a sîr berah Bawihtei a mu a, "Zo.." tia ka koh chuan ka lam hawiin a rawn inher a, a thu tak rûn mai.


"Duati, kan innei hman hlauh chu a tihzia hle mai, tun ang hunah te hian alawm i kianga awm ka thlâkhlelh ṭhin. Ka lungngaihna leh hrehawmna, ka natna te min ṭawmpui ṭhin tih ka hria a, i tel venaah hi chuan ka thlâ a muang ṭhin." Tiin min rawn kuah a, ka lo kuah lêt ve nghal vat.


Lawmsanga'n a rawn call laiin naute hnute ka pe a, Zosanga'n loudspeaker-ah a dah vangin a ṭawng ka lo hre ve vek.

"U, ka pa chu emergency-in an zai dawn a nih chu, ka nu pawh a rawn haw mêk, ṭawngṭai bâk tihtheih kan nei si lo a," a rawn ti a.


"Ni e, a ni khawp mai. Keini pawh kan lo ṭawngṭai dawn nia, thlaphâng rêng rêng suh u aw, eng tin mah a awm lo ang. Bawihpuii kha damdawi inah in hruai ve em ni?" Tiin a zawt a.


"A tîrah kan hruai a, Duati nuin a nute Saii hnenah a va dah ta a nih kha, damdawi in boruak a hrisel si lo a, awmpui ngam pawh a ni lo," a ti leh a.


Rei vak lo an inbiak leh hnuah phone a dah ta a.


Ama rilru pawh a hrehawm dawn teh reng nen a nau ala ṭawng thlamuan ve ṭâng ṭâng a nia. Zosanga nge nge, a puitling chho zel a ni e.


Ṭawngṭai a rawt a, a vawi khat nân kan nupain a ri hian kan ṭawngṭai dun ta a.


Manganna leh lungngaihna, harsatna kan tawh hian Pathian hnena tlûk luh a him ber.


Ka pa an zai chhungin kan muhil bik lo hrim hrim a, Bawihtei a tlei duh si lo a, kan inpuak chhawk a, kan zin chau bawk nen ka luak a chhuak hlui tawh.


"Duatnu, nang tal muthilh tum la, i chau lutuk ang," a fanu âwi chungin a ti a.


"Nang mah mu zawk rawh, motor i khalh thui ropui si," ka tih chuan, "Kan vaiin kan mu thei tihna.." tiin khumah a rawn lâwn a, a fanu a lo âwi mu diam tawh.


Mipaah pawh pa tak khan a fanu a âwi mu thlap a nia, a fel ve hrim hrim.


Ka pa an zai aṭanga darkar li hnuah ka nu'n min lo call a, ṭha taka zai a nih thu te, a pumpui pân lai pawh biopsy lâk nawn tur tih vel a rawn sawi a, a harh tawh em tih ka zawh chuan, a la harh loh thu a sawi a, ngaihtuahawm lutuk a ni lo a nih hmel.


"Naktukah inpeih fel hman tum ula, muang khawtlai lovin lo haw mai rawh u," a ti ta a.


Ka nu meuhvin haw tura min ti a nih chuan eng emaw min hrilh duh loh an nei a nih ka ring nghet tlat. Ralkhat aṭanga inhrilh an duh lo tepawh a ni mahna.


Kan inbiak zawha Zosanga ka va en chuan a lo muhil dér tawh!


A chau ve deuh a nih ka ring.


A hmêl dam thlup chu ka en reng a, a hmaia chûlin, "I kiangah ka awm zel dawn tih hria la, rilru ti hrehawm suh aw, ka hmangaih che," tiin ka phun chhuak sap a.


Zosangmawia'n kei min nei hi a inchhîr miah loh na turin theih tawp ka chhuah ang.


B+>[BeckirafARenthleI]<+®®