KA LALBERA CHAPTER - 5 By Ahmangaihi violette khiangte

Episode kal lai dah luhna

Moderator: writers

Ahmangaihi violette
Posts: 69
Joined: February 1st, 2020, 3:14 pm

KA LALBERA CHAPTER - 5 By Ahmangaihi violette khiangte

Unread post by Ahmangaihi violette » June 29th, 2020, 10:23 pm

CHAPTER - 5








Hmanhmawh takin kawngpui lampanin ka kal a, ka nun kum 25 ka hmanral tawh ah hetiang reng renga zahna hi ka la tawng ngailo ka bing chûk chûk a, ka rilru ana bawk. Ka awmchhung tawt zet chu chum dat datin ka ṭah a chhuak ṭeuh mai. "Lo ding teh" vin hluk a hnunglam aṭanga a rawn tih chuan ka hawilêt a Remtluangan min rawn umzui chu niin, thawk la sak sak chung chuan ka kallui zela, ka hnunglama a rawn pen ri hlawp hlawp chu ngaipawimawh duhloin Taxi phar tur ka melh kual nghal ruai.








"Lo ding teh ka ti a nilawm ni" tih lehzat pahin ka banah a rawn phih sawk a, ka thinrim luata ka ṭawngchhuak hleithei derlo, thîp zetin ka melh ngar a, chutiang bawkin a nipawn.








"Ka ṭhiante zinga min tih zah zia kha i hria em" nelawmloh zetin a ti hluk, tih zah maw? Chupawh keiman! Thaw hak chungin ka en a, thinrim tur zawk ka nih laiin chutiang thu chu engtin nge a sawingam zawk, mi puitling tak niin ka lo ngaia mahse, ka ngaihdan ang chu a lo nilo kher mai.








"Min thlah rawh" tih leh ka ban a chelhna chu thinthlak ka rual, kal mai tuma ka inher chu ka samah a rawn ṭham ṭawk a, ka rak chhuak ṭhat.








"Chutia kal i duh viau chuan lo kal rawh, ka va hruai ang che" ka tal vaka, ka sam a ṭham na chu thlahin ka banah min hmer leh vak a, a hmel nelawm tak ṭhin kha hmuhtur a awm tawhlo. A ṭhiante In lamhawia min pawh phei a tum chu duhloin ka lo ṭang a, a thinur zual sauh bawk.








Ka zui duhlo ṭang leh anin min pawh luih tum chu kawngpuiah chuan kan inpawt chawt chawt a, kawngkal ho lahin min en duh nasa, ka thinrim bawk si zak bawk si, ka mittui a hnam ṭiam ṭiam a; na zetin a banah ka chumsak nghek nghek ringawt.








"Min thlahvat rawh hmela" ringzetin ka ti ta nghek, midang mitmei a veng lo a keipawn ka veng reng thei bik tawhlo, ka sual lêt buan buan a hmaiah te chuan ka ham zui bawrh bawrh, chutah rum hrawih chungin min nam kat dawrh a, a biang thi ser ser chu khawih pahin "Rapthlak reuh lutuk, kal vang vang rawh" a ti vin hluk a, rum lutuka melh chungin ka hnungchhawn zui nghal.








Khatiang mizia kha a nei ang tih ka lo ringpha hauhlo, amah ka ngaihdan chu a inthlak chiang hle bawk. Taxi hman tur ka hmu mailo a, ding khawmuang tawhlo chuan ke in ka kal zawm zel a, ka lungphu mumallo lutuk vang chuan ka ipik ṭup mai.








Motor pakhatin min rawn tlanpel a, ka hma lawkah chuan ding zuiin a hnung light a rawn ti êng a, ngaihsaklo zetin ka kalpel thuak a, mipa naupang aw fiah zetin "Ânu vîte" a rawn ti tak lauh ah chuan ka hawilêt rang hle, Gabriela Motor a ni!









Steering vuan chungin a ban a rawn vai zauh a, Chumi rualin ka dinna lamah a rawn tawlh phei zui a, a Seat aṭanga dingkang meuhin Cedd-an min lo ban bawk "Naute duat khawiah nge âpa nen in kala?" nuisang chungin ka lo ti a, min lo ban nghal chung avangin rem leh remloin ka pawm chhuak a, "In ina len angen a, lokal kan lo tum mek a" Gabrielan a lo tih chuan ka lo thaw chhuak hliai.









Cedric chu pawmin Seat hmaah chuan ka ṭhutpui a "Joani te nufa an tel ve nange?" ka tih chuan "An hritlang deuh a, kha i naua kha a ninhlei lutuka ka lo chhuahpui ringawt anih kha" Gabrielan a lo tisup, kan tlan chhuah hnu chuan "Ânu vîte i ṭap a mi?" phawk zeta min en chungin Cedd chuan a ti a, "Ṭap teuh nang a, keite chu puitling ka nia ka ṭap ve ngai miahlo" ka tarmit a rawin kawihkau deuh chu vauh ṭhat sawk sawk pahin ka aw ka thian zui kharh.








"Khawnge i kal a?" Gabrielan a rawn ti a, "Sawlai deuh lawkah sawn kan ṭhiante inah ka kal lawk" ka lo ti liampuat.








Cedric-a ṭawng barh barh chu ka ngaithla a, a harh bawk a a che zawk zawk reng mai, a sam tuaisak ka tum chu a phallo nasa mai lehnghal a, ka nui zui chiam a an ni pafa ka hmu chu ka hahdam sawng sawng thei.









"Champhaiah insawn kan tum thu kha a hrilh tawh che em?" Gabrielan a rawn tih chuan phawk zetin a lam ka hawi a, chutiang thu reng reng Margaret-in ka hnena a sawi awm ka hrelo "Engtikah maw Ti nge â!" ka lo ti nghal hluai. A nui suk a "Aman a rawn hrilhthuai ang che" tih zawngin min chhang.








Kan In kan thlen chuan Ka nu leh Dodo-a an lo awm a, Dodo-an Cedd chu min lo chhuhsak nghalthuai, thingpui ka lum a sitting room ah ṭhuin TV en pah chuan kan in a, "Hna lam i tluang em?" ka ti a, a bu nghat nghat mai, "I ṭhiannu zawk hi a buaithlak khawp a ni, Anxiety a nei a" a ti zawi sup.









"Amak thei e..innu hi engmah ka hnenah hian a sawi ngai tawhlo, kan inbe khat lutuk tunlai phei chu" ka tichhuak hliai.








"Lo kal a tum ṭhin a, Joan-i a damṭhalo reng a nangmah zawkin rawn tlawh rawh" a thingpui inlai lem khalh pah chuan a ti leh a, "Nidawn tak, keimah zawk hi rawn kal tur zawk ka ni tak alawm, tunkar chho ah, chaw ei turin ka lo kal dawn nia" ka ti zui a, choka lama Dodo-a leh Cedd-a inchhaih ri chuan rilru a la peng thuai.








"Doo...Ice cream kha a ngeihlo a nia tam deuh eitir suh" ka ti zui lang lang a "Ânu vîte ka eitamlo" a lo ti leh lauh mai, apa nen kan nui zui hak.









"Hna i zawng tih ka lo hria a" a tih chuan ka lo nui ro halh a "Ka zawng deuh a mahse, ka pa in Competitive exam hmachhawn turin min ti leh bur sia" lu thing nar nar chung chuan ka ti a "I tan hna chu a tam viau tho anga, i mamawh anih chuan min hrilh dawn nia" a lo ti sup.









Margaret- in ahmain a sawithawi thuak tawh, Gabriela Secretary hna aruak a interview turin min duh anih kha a tirah kha chuan ka tum hman ut ut a ka pa vangin ka ṭhulh leh ta kha a nia.








"Vawin chu khawiah chiah maw i kal a?" nuisuk chungin a rawn ti leh a, min rinhlelh hmel riau lehnghal. "Ka sawi tawh khâ" ka tih lai chuan ka ban a rawn melh zauh a, ka ban ka en chu a lo vung duk raih mai, Cedd a ka pawm lai khan a na veng veng ka ti reng a ni.








"Malsawmhlua nen inchhuak a mi?" zawi supin a ti a, a bula han sawi vak ka duhlo tehreng nen min zawt thutak mai bawk si.







"Midang zawk a nia, Lalbera chungchang vangin kan inhau a?"







"Ngaihzawng i nei tak" a rawn tih chuan ka lo bu nghat.







"Kut a thlak che a mi?" chîk zeta min en chungin a ti leh a "Thlak lo e, ka ṭha lawm" zangkhai thei ang berin ka lo ti a, a awih loh hmel nasa mai "Engemaw ti tura min duh a nih chuan....." a sawi zawh hmain ka lo nui hak "Engmah chutiang serious a awmlo, a hrim hrimin buaina hi cho viau zel suh, Jail luh leh te kha hlau hle rawh, i lut leh a nih teh chuan " ka lo ti zui duah a, a ni pawh a nui chhuak hawk.








"Lalbera in tlawh ngai em, tukinah damdawiinah an lut a" ka ti a.








"Ka kal zeuh zeuh, min hrelo bawk nen keiphei chu kan inmilloh hunlaiah khan a cheng bawk sia a chhungte hnenah a chanchin ka zawt ringawt mai" a ti a, an ni nupa tan hi chuan han buaipui vak ngaihna a awmlo ve em ani, Margareti erawhin a tlawh fo a, naute nen an nih vangin a buaipui zui thei chiam silo a "Ka awm alawm, ka kutah dah rawh" a bulah ka lo ti nghe nghe a nih kha.








Tlai chaw ei dawn ṭepah an haw a, an Motor dahna thlengin ka thlah a "Lo be fo rawh tunlai chu a talbuai ru riau a, i hriat angin hun harsa tak a paltlang a, apa thlan helamah sawn kan tuma, keini kan chhoh leh mai angai bawk si a" a tih chuan "Zaninah ka lo be dawn nia" ka lo ti vat a, Motora Cedd- a mutchhuak zet a hlan luh lai chuan "Champhaia awm kher chu a ngai a mi, helamah pawh i buai viau sia" ka lo ti hap.









"Keima rawt a nilo ama rawt a nia, ka pa hnenah a lo dil a, amah sawipui rawh Branch pumpui hi heta ṭangin ka enkawla, hunawl ka nei manglo, Champhai Branch ringawta insawrbing thei pawh ka nilo" a lu tuaivut pahin a ti a, a rilru a buai hmel viau mai.








"Anih chuan ti nge in awmchhoh kher angaih a?" hriatthiamloh hmelzetin ka lo ti leh.








"Keipawn ka hrebiklo Maggie zawt rawh" nui suk chungin a ti leh a, "Ânu vîte ilo chhuang dawnlo a mi?" Cedd-an a rawn tih chuan a biangah ka lo piaisak a, a mutchhuak chu a meng siar siar tawh "Ka naute tunkarah chawei turin ka lo kal ang, thil tui tâwk ka lo ken ang che aw" a biangah ka fawp zauh a, a bu ve nghat mai.








Inchung ka luh leh hnu chuan ka nu eirawngbawl ka pui a, chhung inkhawm kan nei zui nghal bawk, "Zanin chu ka chau emai, ka inkhawmlo mai teh ang" chaw ei laia ka tih chuan ka nuin min melh rum nasa mai "I lehkhazir chhung zawngin kohhranah i inhmang manglo a, i zir zawhhnu te hi chuan CTP lam hi belbul ve chawt rawh" a ti zui zat.








"A pawilo chhunah a inkhawm tho alawm, Exam hmachhawn tur a nei a, inkhung tam a mamawh zawk, CTP member hnathawh neilo kohhrana Active hlur nih aichuan a ṭha zawk daih" ka pa in a lo ti nghut a, kei erawh ka ngawi reng "Naupang thuṭha hrilh laihian a engemaw zawng hian lo fuihpawrh teivet ṭhin suh, inkhawm tura fuih sauh sauh zawk tur i nih kha Leader ve lai si" ka nu chuan a ti zui hlak a.









"Ka sawidik alawm Exam a han bei anga, a tling a nih teh chuan khîtah ania miin an hmuh dawn ni, kohhrana a inhman leh inhman loh lam tuman an ngaihtuah dawn lo, Officer chin chu e kohhran ah pawh an lal nghal em em dawn" chaw bar mawlh mawlh paha ka pa in a tih chher chher lai chuan ka lo nui tawi tak a, ka inkhawm peihloh chhan chu thildang daih a ni, Remtluanga hmuh ka duhlo a, inkhawm banah ṭawngṭai hona neih ani dawn zui bawk nen lohtheihloha kan inhmuh a ngaidawn a chu chu ka hreh vang a ni.








Ka chhungte inkhawm tura an kalhnu chuan ka room ah ka chhozuia, lehkha chhiar pawh ka tum hranlo, ka phone ka hmet kuala, Remlalan a fapa thlalak minlo thawn te chu ka en a, keimahin ka nui suk suk mai, ṭhiante fa kan pawm kual sek tawh mai chu a nia, chulai karin keiin ngaihzawng ka la ṭhen chêk chêk thunga.







Usangpuia ka call a, vawin lam chungchang vanga pawi ka tih thu te ka thiam ang tawkin ka va sawi a, amah zawk a lo inthlahrung ngang mai "Vîte kan ti buai nasa mah mah che a ni, kha lampang kha ngaihtuah nachang pawh ka lo hrelo a, keima thiamloh liau liau ani, i bialpain a hrethiamlo pawh kha ka dem hauhlo ania" a rawn ti damthluam.








Remtluanga mizia diktak ka hriat phaha pawi ka ti ta lo zawk mah tawh, Usangpuia rawn inthlahrung zawk lutuk chu han chhanlêt vak ngaihna pawh ka hrelo "Ezra chu enge a an tawh a?" ka ti zui a "Aṭha lutuk, inah pawh a awm leh tawhlo, Nancy te ṭhianhoin an rawn kan a an rualin a chhuak anih kha" a tih chuan ka meng nur nasa mai, a serious viau anga khumah a mu zawi reng turah ka lo ngaih laiin chutia a fawr leh thei tawh a nih chuan ṭawngṭaipui chiam pawh a ngaihloh chu ka lo ti rilru hmanhmawh.








Kan inbiak zawh chuan ka ngaihtuah zui a, khawiah nge an kal anga, enge an tih ang tih te thlengin ka rilru ah a rawn lang zut, Nancy a tel a nih chuan Faktei pawh a tel ngei ang, Faktei kha atan tu chiah nge maw a nih tak tak le? Margaretin a hriat ka ring deuh tlat.








Ka ngaihtuah laimekin a call a rawn lut a, phur zetin phone chu ka la a "Vawin kha rawn kal ve ka tum viau nain Joan-i a tleilo lutuka, ka hritlang ve bawk si a an pafa in ka rawn kaltir ringawt mai anih kha" a rawn ti nghal duah.








"Tui huin in steam la damdawite i ei em, inchhungkua khan inhritlang mai ange in enkawl dam vat rawh" ka ti ve nghal a, Gabriela thil min hrilh kha ka hrechhuak zawk bawk.








"Pawlnu Champhaia pêm in tum em ni?" ring deuh tak chuan ka zawt a, "Hrilh che ka tum mêk a " a rawn ti zawi sap.








"Enga tinge, inpa pawn pêm a chak miahlo ania, nangma thuin i ti hmiah hmiah tih ka hrereng" ka ti zui bawrh bawrh a.







"Lawk aw..." zawi te in a rawn ti a, fianrialah a kal anih ka ring.








"Vi....ka rilru hi a hah a ni, Donna-i kha i la hria em...Gabriela case a thuhretu kha" a aw aṭangin Bathroom ah a lût tih ka hrethei, Donna-i chu a hmel ka hre chiahlo nain a hming chu ka hre khawp mai, ka hriat thu ka hrilh chuan thawk a la zui ham ham a.








"Ka pa Saian thuhretu a hman dawn khan thil engemaw tihsak a lo tiam a, chu chu remchangah lain Gabriela hnuaia a rawn thawk a, a ngaizawng deuh tlat lehnghal a, buaina kan nei dawnin ka hria, an niho mizia leh pawisak an neihloh zia chu i hriat kha, a hma ang buaina kha kan neih leh ka hlau a ni, naupang an awm tawh bawk si a" ṭap titih hian a rawn ti a, thaw hah vei ang mai hian a thaw ri hrawih hrawih bawk.








"Pawlnu...inpa chu i ringhlel deuh ami, tinge i hlauhthawn nghal em em a?" ka lo ti hliai, a awmdan vang chuan ka lo hlauthawng ve ringawt bawk.








"Ka ringhlello, Gabe hi chu ka ring lutuk ka hrethiam tawh biklo, thihna hi a hnaiin ka hria, a hma pawn" a ṭap zui ta ringawt a, Anxiety a neih thu Gabrielan a sawi kha ka hrethiam ta kuar.








"Margaret i pasal kha ring tawp rawh, i harsatna te kha engmah zeploin sawipui la, i ngaihdan leh duhdan te pawh sawi la, a thu kha awih hram hram bawk rawh aw" keiin a ka lo sawipui ve chiam aichuan a pasal bulah sawi sela a ṭhain ka hria, Gabriela aia amah hmangaiha ngaihsaktu an awm chuanglo.








"A rilru tih hah ka duhlo alawm, a hna ah a buai bawk si a, a lo haw a naupang ho nen kan chimbuai reng bawk si, zan rei tak tak thleng hna a thawk a, a hah lutuka lo belhchhah ka duhlo a lawm" ṭap ṭiau chungin a rawn ti a, a rilru tur chu ka hrethiam tho mai.







"Anih Donna-i chu enge i hlauh ringawt chhan ni a?" ka ti leh ringawt.







"Thiltum leh beisei engemaw neiloin ka pa kha a pui ringawt hleinem, Hotel ah hna a dil a, chu pawh Gabriela Office ah kher leh nghal, a Secretary hna kha a beiseia ka pa lahin a lo pe mai bawk si a" khai a! Hei vang hi anih chiah hi hman ni deuh khan "Gabriela Secretary hna a ruak a, lo dil rawh" ti a min lo tur sek sek chhan.







"Chuan engtin zel?" ka ti leh vat.







"A rawn call ziah, hnathawh hunbi nitawhlo zan rei hnu ah te hian, a call pawh ka lo chhang fo mai, Gabe pawn duhtawk turin a hrilh tawh a, diktak chuan maw ṭhiannu chân tur thil ka ngah tawh lutuka hlauhthawnna hlirin ka khat, Donna-i te chu i hriat kha, Gabriela pawh silaiin a kap tawh a" a ṭap leh ta, a va han buaithlak tak, chhuat dungah chuan ka veitawn seka awm ngaihna min ti hrelo zo vek.









"Hlauthawng suh chutiang engmah a thleng dawnlo, inpa kha ring em em tawp rawh" ka ti leh ringawt, Champhaia chhoh a duh chhan chu ka hrethiam deuh ta kuar mai, Donna-i lak aṭanga awmhlat a lo duh lek chu niin, hetianga thil a ngaihtuah tluk tluk a nih chuan a hriselna atan pawh a ṭha dawnlo, Doctor rawn ve sela a ṭha ang.








"Margaret...Doctor ṭha deuh.." ka sawilai mekin "Maggie..." Gabrielan a tih ri ka hria a, ka ṭawng tawp chawt a, ka ṭhiannu ṭap insut pawh a hreh hmiah mai, tui herhhaw riin a zawm a "Bawihte...kawngkhar lo hawng teh le" thumduta Gabrielan a tih ri ka hriat chuan ka lo nuisuk.








"Inpa kha engkim i rilru a awm zawng zawng kha sawipui vek la, a hnenah khan inbun ruak rawh, i hlauhthawnna te pawh hrilh la " ka ti nghal zung zunga "Umm...kan inbe leh dawn nia" tiin Call chu a ti tawp a, ka thaw chhuak huai mai.








Ka awmdan chu ka sawithiamlo ka ni deuh nghulh! Rilru tih thawven tumin zai ka Play-a ring deuh deuhin ka zaipuia, heng Anxiety/panic disorder, Depression tih vel a talbuai hi ka hlau takzet, hetiang natna vei te hi ka lainat takzet bawk, chuvangin keichuan rilru hrisel tak ka put reng theihnan theihtawp chhuah ka tum a ni.








Ka chhungte inkhawm bang an rawn haw a, ka nuin inhnuailam aṭangin min rawn au lawng lawnga, zai rât rât chunga ka chhukthla chu Remtluanga hmel ka hmuh rualin ka tawp nghal hmuk, hmaipilh deuh nian chungin minlo en a, "Nu Zomuan pem thar damdawi in kawl mial em?" min en rûn pahin a ti deuh kher a, eilo zetin ka lo ner sawk.








Ka pa inkhawm bang a rawn lut ve chiah bawk a "Eh...Remtluanga chu minlo thlen khalh a ni maw, zanin in zaihruai chu mipui in ṭhâp ṭha hle mai" a rawn ti zui luam.







"Bawihi thingpui han lum la, Rema nen kan lo in a nge" ka pa in a tih leh chuan tum bar chungin Choka lam ka pana, ka thingpui siam ka va pek laichuan Ka nuin pemthar damdawi a lo hnawihsak a "Engtia i tihpilh nge ni a?" ka nuin a ti a, nuisuk chungin min lo en a, ten zetin ka lo en lêt, engtin nge a lo la kal leh ngam zawk le! Kan ina damdawi a rawn lam kher te chu Over ka ti a, a landan inla Cool ruih te chu ka ten hlur ringawt tawh.










"Ka chho dawn ania lehkha chhiar ka ngai a" ka pa lamhawi chuan ka ti deuh kher a, Remtluanga lo hawi vut chu ka hria, "Han chhiar rawh, chhiar tam luat a awmlo inbuatsaih sauh sauh mai rawh" ka pa chuan alo ti ta rêng, ka nu chuan ti âwm anglo min ti deuh nge ni min melh tûr viau mai a, Remtluanga hmel tum bar ka hmuh chuan tifuh inti zetin ka chho zui nghal.









Ka room dawhkana ka ṭhufel chiah chu Message ka dawng a "Vawin kha ka tihpalh anih kha, khatiang kha ka ti tawhlo ang" tih Remtluanga hnen aṭangin a ni.







"I tih tawh hauhlo ang, a chhanchu kan inkar a tawp tawh" tih ka thawnlet a, Message dang a rawn thlen belh nghal zung zung a, phun hluk chungin ka phone chu ka dah a, a Screen khi ka hmuh ringawt pawhin thin ati rim thar leh tut tut thei a lawm mawle.








Dar kar chanve zen zawn a liam tih a Call a rawn lut leh zui a, ka ngei lutuk chu ka sa pup pup thei mai, ka chhang duhlo a en pawh en duhloin ka thil chhiarlai ka bih ngar a, a rawn ri nawn a; a ri nawn leh ṭhin. Ka thintertek a chhuak a, ka lehkhabu chhiar lai hnawl tawm nawk pahin dawhkan sira ka phone chu ka ban a "Enge i duh.....rawn call rawn call pawh a ngai tawh ami ka sawi tawh kha" ring lenglawng chuan ka ti nghek a "Khaii...i aw han sexy dan chuh, ava rorum em em ve le" nuisuk chunga a rawn tih chuan ka Phone Screen chu phawkzetin ka en!







"Vanlalber...!!"





"Pawnah ka awm..." a rawn ti zawi sup a, Balcony a ka chhuak phei chu kawtah a Bike chunga ṭhuin a lo hawi chho vuah vuah a, damlo hmel a pulo a rawn nui vur vur mai.







"Lo chhuk la thilpek tur che ka nei a nia" engthil emaw ni hi a rawn leka ka hmuchiang thei mailo "Lo awm rawh" tihpahin room ah ka lut a, kawrchung hain inhnuailamah ka chhuk zuia, Remtluanga pawh a lo haw fel der tawh, sitting room ah ka pa chu a muthlu lup lup a, midang tumah ka hmulo.







Dimtein kawngkhar ka hawnga, kawngpui ka thlenthlak chuan a Bike a lo hungfel ve meka, a bul ka thlen hmain a rimtui inkah rim chuan min zem nghal chem chem mai.







Thawmhnaw dum vekin a inthuam a, han en mai pawn khawilai mihausa fa emaw ani tih chu a incheina aṭangpawn a hriat theih nghal, ka lamhawiin a rawn inher vut a a hmelṭha hrep mai.







Ka hau chungin ka lo en a, ka bul a rawn thlen rualin min rawn kuahnghal ringawt bawk, lai zeta a kut lo pawhthlaksak pahin ka nuih a "Enge min pek tur chu" tih pahin ka kut ka dawh a, ka kut chu la kangin ka hmui atawh tir vang vanga, min ti lai chhe der mai.








"I nuih hian i hmelṭha chiang mawle" a la tisup zui.







A jacket ipte aṭangin thilfun engemawni hi a rawn phawrh chhuak a, ka kutah rawn hmehbel pahin "Minlo ngaiviau la, min lo ngaihtuah char char ang che" tih pahin a hmui chu a tipawrh kher a, a va han mawl thei vuk vuk tak. A thil min pek chu ka en a Chocolate a lo ni a ka nuichhuak hak.








"Naaa...Nuts tel chi kha ka duh zawk a sin" phurzet chunga Chocolate kheh rak rak paha ka tih chuan rawn kun hniamin ka hmai zawnah phawk zetin minlo en a "Creamfills i duh a lawm" a ti nghut mai!








"Teuhlo....ahma pawn i lei ṭhin kha lianpui Nuts leh Raisin telna khâ" ka ti lo hap, a ha var rual zet lang ṭhaw chuan a nui zuia "Engemaw i hriat le?" ka ti zui bul bul.








"Ka hre leh si...i tan chocolate ka lei ziah ṭhin tiraw..." a nuihmel chuan ka awm a ti nuamlo zo vek. Class kan kal ho lai khan nitin deuhthaw a Chocolate lei kha ka ei ṭhin, a chhan chu Margareti khan a ngainalo a, a eiduh ngailoh vangin keiman ka chang hlauh ṭhin a.








Min en reng tu vang chuan khang Chocolate zo zai kha lo ei miahlo ila ka ti hnuhnawh hle. Za lo zet chuan ka kiaisak a, ka chocolate ken lai rawn tuaithlak zauh pahin a hmawm tharh a, a che vel chu ka lo en reng, a mit thuar chhahtap te, a hmui sen deuh hiam te a hnar ngul sang vah leh a khabe bawr invuah nalh zet te, hetianga hmelṭha deuh hi engtin ka lo enkan daih theih le, Ohh...chapo hmeltaka a hawisan daih ṭhin vang a nimahna. Mmmm...ani ngei ang, a chapona tlangsanga a ding kha ka hmupha lo miau a lawm.








"Enge i nuih?" ka hmai bula hnai zeta arawn kun chuan ka lo phu deuh zawk lehnghal, ka chil ka lem ri khalh a, a lo nui ri suk mai, ka Chocolate ken lai chu a tuaithla leh a, min barh dawn emaw ka tihlaiin a hmawm leh daih! Reuh chuan.








"Creamfills a nemin a thlumtui hle mai, i hmui ang mai" tih leh min rawn fawh arual a, a Chocolate eilai chu ka ka ah arawn hnawlphei vek, chhak theih pawh anilo min fawh chhunzawm mial mial a, hamhaih lutukin ka lo meng kawk kawk ringawt. Ka lem khawlh mai, a tui veng veng mahse, a va che ṭhing tak "I tenawm lutuk Malsawmhlu" tih leh a sama kheh ka ruala, chuveleh min chawikang nghal nawlh.






"Min lo ngaiviau ang che" tihpahin ka nghawngah a rawn fawp tâwk.







"Aiii...an zahtheihloh zia chu le.." Naua aw ka hriat rualin ka tal nghalchul mai, leia min nghahrual chuan Step tawpa Nau ding chu ka va melh a "Uakkk.." a lo la ti zui.








"Heii...Buddy" ka bula miin a lo tih chuan "Zuheh..." tih pahin step ah a chho zui nghal daih a, ka zak lutuk chu mit chhing sawk chungin ka ṭhen zui nghek.








"Chho la han mu tawh rawh, ka thlen hunah ka lo hrilh ang che" min melh ralh paha a rawn tih leh chuan "Chhurbur" tih pahin a awmah ka lo chum dawp.







"Chhurbura bialnu"





"Ka ni bawk lo e"






"Anih leh Nahaia bialnu"






"Kan inṭhen daih tawh e a" tum loh deuha ka sawichhuak chu ka ip leh chawih a mahse, ka sawi zo vek hman tawh, Ngaihven zetin min rawn en nghal.







"Tak tak maw..?" a mitmenga phurna lo lang chu ka hmuh hmaihlo.







"Vawinah kan inhau alawm mawle" ka ti liampuat a, a nui hmel chuan ka nuih a ti za ve deuh tlat bawk.








"A ṭha lutuk Barbie...naktuk zan aṭangin kan in Date thei anih chu zanin chuan duh leh single rih la" ka lo nuichhuak hawk, hepa ringawt hi! A ngaihna pawh ka hrelo e a.







images - 2020-06-26T110910.098.jpeg
images - 2020-06-26T110910.098.jpeg (26.66 KiB) Viewed 6261 times




CHHUNZAWMNA








"Ka kal a nia" tih leh inher ka rual a, "Naktuk chu aw" nuisang chungin a la rawn ti zui. Chhan pawh chhang tawhloin ka luhsan a, inchung ka lut chiah chu Nau-an min lo melh tûr nasa mai.








"Laptop min lei ang" min en run run chungin a ti a, lehpek chuan he nau hian min vau nan hman atum anih lehpek tawh hi "Pawisa ka nei ngawt ngawt lo" ka lo ti bak hluk.








"Anih Phone thar" thaw hak chungin ka melh rum zui nghek "Khawi aṭangin nge pawisa nei sela min tih a, hna ka neih hunah ka la lei dawn che nia, i sawichhuak anih teh chuan i thi a nimai" kut tum hmuh zauh pahin choka lamah ka luhsan a, min rawn umzui nghalthuai.








"Pawisa i khawl ṭeuh kha, i Scholarship bakah Semester fee 50% an off che kha i khawl zel tih ka hre vek, nuai i nei tling" ka tui inlai ka hak lo chauh!








"Nang mai mai hi, ka Passbook ilo check leh hman tawh a ni maw?" tihpahin a mawngah ka ben sak nghalzawt zawt a, a rak chul zui.








"In infawp lai kha Pic ka nei a nia aw, phone min lei loh chuan i mualpho ve viau ang" tlanchhiat pahin ala rawn ti hram a, "Min va han ti mualpho awmlo tak" ti a phun hlak chungin room lamah ka chho zui a, chu nau mai mai chuan ka awm a tinuamlo zo vek, lehkha ka chhiar a ka rilru ah alut thei hlawllo, ka infawp laikha Nau an thla a lo la tak tak anih teh chuan a mawl bawk si a, chhungkaw group ah te lo Post leh ringawt ta se! Awiii..ka thi a ni ringawt, ka pa in min vaw hrep duh ang.








Tih dan tur ka ngaihtuah ngut nguta a muthilh hlana Delete sak chu a ṭha berin ka hria, a mu nghet thei bawk a, a harh teuhlo emai a, ngaihtuah chhuakfuh inti zeta nui ruh ruh chungin Lehkha ka chhiar zawm a, ka ṭan deuh chauh tih ah Lalbera Message a lo thleng a , In a thlen tawh thu min rawn hrilh thlap!









Chhang lêt loin phone chu ka dah a, reilote lehkha ka chhiar lehzet hnuah Naua a muthilh tawh ringin a room lam ka pan phei ṭhem ṭhem a, a lo la muhillo nasa mai, khum ah ṭhuchungin Games a lo khel a, earphone a vuah a vangin ka thawm a hrelo hlauh.








Lêt leh mai tuma ka inher chu "Heih..." a lo tih thut vang chuan ka phu dawrh a, awmdawm meuhin ka hawilet a, minlo en awzawng lo "Ka thi ka thî..." tihpahin khumah chuan a ke a leng vela, ka lo meng rang nasa. "Mawla ka ruang kha hai ta che, nang aiin silai ka neiṭha zawk, ka zung lawk anga lo Chicken ngei ngei ang che u" tih pahin a thokang hluaia, chu veleh kawngkhar phenah ka biru nghalvat.








Bathroom a luh veleh thawmdim lutukin ka lut a, khum chunga a phone dah chu ka la vata, a lo la êng va va bawk. A phone Gallery chu ka enkual zung zunga, kan thlalak chu alo awm chiang ngei mai, Delete tuma kut ka tin vang vang laichuan ka han bih nawn leh kher a, kawngpui reh laitakin Street light hnuaiah Biker chhelozet leh nula samkir inpawm kang meuha an infawp lai chu a lang Romantic in Delete mai atan chuan a uihawmin ka hre ta tlat pek anih chu!





Ti teh suh khaiii!!!






"Hrep chuan leh! Vanlal i â tawh a nih hi" ti rilru mawlh mawlh chungin ka inthawn a, Nau-a Gallery aṭangin ka Delete nghalzat thung, Bathroom lam thawm a rawn awm a, phone chu khuma thehthlak leh tlanchhuah ka ruala, ka room ka thlen chuan ka nui kur kur. Thlalak chu ka en a ka ennawn leh ṭhin, a nalh takzet, en ringawt pawhin minti mur uai uai thei lehnghal, a hunlai ang maiin ka feel thei a ka biang a sa nghal hat hat.







Hepa hi ka duh ringawt ta anih hi!!








Ka rilru zahve chuan nuamlo tihna ka nei a, ka inthlahrungin ka hlauthawng bawk mahse, a zahve erawh chuan ka hlim veng veng, tleirawl star nei thar hlim ang maiin a lawm ka awm le, ka ngaihtuah chhuah a piangin zak takin ka ṭhen nghek a ka hik chhuak mup thei zel lehnghal, a nawmdan chu a hrehawm dangdai vel niberin ka hria.








Ka muhil chu ka phone ri vangin ka harh hlawl a, Side table a ka tarmit chu meng mangloin ka ban nghal rawk rawk bawk. Min lo call tu ka hmuh chuan aw thian lehzetin ka chhang a "Good morning ka bialnu" zangkhai zetin a rawn ti a, ka lai ringawt nia!







Insum zet chunga ṭhutchhuah pahin "I bialnu ka ni ngawt lo e" ka ti hluk a, hmuhloh lamah ka ṭhenzui sak. "Ahh...nizanah kan sawifel tawh kha" a rawn tih chuan ka lo nui hak.







"I sawi avang mai khan ka ni tihna a ni hleinem, bakah ka bialpa nen niminah kan inṭhen ve chauh a, ngaihzawng neih pawh ka peihtawh lo" ka ti leh a "Hmmh" a lo ti deuh hmuk.







"Min hnar deuh bur elaw?" hah hmelzeta thaw ri hrawih hrawih chunga a rawn tih chuan " Vanlalber..engtin nge i awma i ṭha maw?" ka lo ti nghal chul a, "Ka ṭha chiahlo, hnawl zawh chiah ang hian ka awm" a aw ri te chu a diklo nasa mai. Ka hlauthawnga minti chîai bawk!







"I bulah i chhungte an awmhnailo ami?" tih leh khum aṭanga thawh ka rual.







"Chutiang ka mamawhlo nangmah a lawm ka mamawh che" a rawn thaw ring zual sauh a, a rum chhuak hrawih bawk. A va han buaithlak tak "I u call la" ka ti leh rih.







"In date ang" thawk pangngailo zet chuan a rawn ti leh a, lo duh ve sa tho bawk nen ka aw lo theilo. "Nia...kan in date ang, a ṭha em?" ka ti hap.







A ngawi vung vung a, nikhaw hreloin a awm anih ka ring deuha ka hlauthawng lutuk chu ka thinphu a ranga, chhuatdungah ka vei tawn sek ringawt tawh.







"Lalber i ṭha em, engtin nge i awm?" ka ti mawlh mawlh a, chutihlaiin mi tute emaw inbe thawm chu chianglo zetin ka hre pha " Barbie...Ka u Gym ah ka awm a tunah tak hian Barbell rit lutuk takmai ka chawi mêk, nakinah ka lo be leh ang che" a rawn tih chuan ka pen lai ka tawp chawt!







Phiangsen chuan "Hmel varung...." ring zetin ka ti ngheng.








"I au ring lutuk, ka bengah ka vuah a nia" ala rawn ti sup zui, reuh chuan a! Tu emaw biain "Ka Earpod vuahlai hi minlo lakthlak sak lawk teh" a ti zui a, ka ngei lutuk chu ka lo inpetruh ṭeuh, duh ringawt mahila inngaihzawn pui kher kher hi chu ka tum hauhlo a sin mawle.


*


*

Chawhma lamah Coaching class ka kal a, Maths lam kan zir a ka tithei zul vek mai a, rinai takin a phurawm bawk. Ka bula ṭhu nula samtawi nen chuan kan inmil phian a, hming te inhrilhin kan titi zui luam, reilo teah inbe tlangnelin kan phone number te kan inpe a, Class banah thil eiturin kan inzui nghal chawt bawk.








"Nangchu ka hre sa tawh che College khatah kan kal ho tawh a, Political Science Department ah khan ka awm a" a ti a, college khatah kan kal tawh tih reng reng ka lo hrelo "University i zawm lo mi?" min ti zui a, "Zawm e..ICFAI ah ka kal a nang le?" ka lo ti ve nghal var.








"MZU ah ka kal a college ah te kha chuan a ilar em a kan hrefur che alawm" nuisang a tih chuan ka ṭhensak a "Min hai anilo maw?" ka lo ti hliai.







"Hai teuhlo SU member i nia, Top ah i lang ziah bawk sia i chhelo bawk si i lar ve e" nui hak hak chunga a tih chuan ka lo nui tawi tak mai. "Ka hawi zaulo lutuka, ṭhian ka kawm zim bawk sia mi ka hrelo thei lutuk" inthlahrung angreng zet chuan ka ti leh sap a, kan eitur chah a lo thleng chu ka lo ban nghal sawk sawk bawk.







"I ṭhiannu sang deuh College Miss kha engtin nge a awm ve tak" thil ei mawlh mawlh pah chuan a ti a, "Pasal ṭha deuh neiin fa pahnih anei tawh" nuisang chungin ka lo ti a, "Kan class mipa hoin an Star thei a sin aw" a ti zuizat.







Ka phone a rawn ri a "Kan mimawla" tihsup pahin ka la a "Khawilai Coaching class ah maw i kal?" ringzetin a rawn ti a, ka chhuah dawn khan kan intext a ka hrilh reng a sin mawle, chhang ṭha ta mai biklo chuan "I message kha chhiar nawn leh mai la" ka lo ti deuh kher.







"Vawi 4 ka chhiar tawh, i sawina hmunah khan ka awm a, i va awmsi lo ve" lawmloh hmelzetin a rawn ti a, rang lutukin pawnlam ka hawichhuak nghal.







"Tinge a?" ka ṭhiannuin a lo tih chuan "Traffic point chhaka dawrah khan thil kan eimek" ka ṭhiannu nuihsak pah chuan ka ti a "Ok" tihpahin call chu a ti tawp zui.






"Min hruaitu tur a lo kal a" ka ṭhiannu lamhawi chuan ka ti a "Scooty i neilo a mi?" a lo ti nghalvat.







Ka lu ka bu nghat a, Scooty chu kan nei ve ngei maia, mahniin a pumbilh theihloh tlat thung, ka nau te pahnih pawn an inchuh rap rap reng a nia. Mamawhna tehchiam neiin ka inhrelo vei nen lei enah ka lo en ngai lemlo bawk.








Lalbera chu a rawn thleng ve mai dawn emaw ka tihlaiin a rawn thleng ta lawklo a, thil kan eizawh hnu pawh a ala rawn lan loh cheu avangin pawnah lo nghah mai ka rilruk a, ka ṭhiannu nen chuan inzui chhuakin Traffic point chhak Bus stand ah chuan kan ding renrawn a "I duhleh min hawsan la" ka ti zuia, "Naktukah kan inhmu dawnnia" tih pahin a Scooty dahna lamah min kalsan zui thuai.







Ka phone a rawn ri a amah ani, a lo lang mai dawn emaw tih tawh laia min lo la Call cheu chuh!






"Khawnge i awm..." pawr zetin ka lo ti a "I thlangah" a rawn ti zawi sup.






Ka hawikual ruai a "Kha lam nilo i hmazawn lo en rawh" a rawn tih chuan ka inher vut a "Traffic point opposite chiah" nuisuk chungin a ti leh a, ka hawi vung vung a ka hmu hleithei derlo mai, ni a sa ṭang at mai bawk si a, min phet deuh tlat bawk nen thui tak chu chiangkuangin ka hmu theilo.








Ka en ngial a a phe deuh ruai ringawt, mihring ding te chu ka hmu nawk tho a amah tak chu tuber nge ka hrehrang derlo, lu thaklo pui hiat chung chuan ka hawi veng veng a "I va chhelo ve a, bialpa nei tharnu" a la rawn ti zui.








Ka tarmit chu ka tuai thuak thuak a ka vuah ṭha leh zet a, beidawng zetin ka nui ta ringawt, "Lalber...khawiber kha nge i nih pawh ka hrelo" zawi sapin ka ti a, "A hmelṭha ber i hmuh kan dawn a maw?" uangzetin a la rawn ti zui a.








"Nî khian min phet tlat a lawm" ka lo ti leh, a ngawi vung vung a " Lo en la" a rawn tih chuan ka hmazawn tak kawngpui thlanglam a ding chuan a ban a rawn pharchhuak vah mai, ka bula ding te pawh an lo nui hak a "I hmu thei tawh em?" a rawn ti lawng lawng a, Motor horn ri tuar tuar karah pawh a ṭawng chu a ring em em lehnghal, ka zak ram ram mai a ban chu dahthla mai loin a rawn vai zui lauh lauh a "Mawla khatia i ban phar vak vak lo khan rawn phei ve mai ta che mawle" ka phone thukru ṭut ṭut chung chuan ka ti a, ka bula miten min nuih tet tet vang chuan ka hawichhuak ṭha ngam tawhlo.








"Hetah ka Bike ka dah a, kawng lo kan la a awlsam zawk" a rawn ti ve leh tlat. Phunhluk chung chuan kawngpui chu ka kan a, Motor kawng kan hi ka thil nuam tihloh zawng tak a ni, kawngpui sir lehlam ka thlenphei rual chuan thawk ka la zui kawk.








Ka hmaah rawn dingin ka sam a rawn tuai thuak a "Duhawm lutuk" tihsup pahin ka darah min rawn kuah deuh sawk. A incheidan chu ka lo en chho diat diat a, Sleeveless var leh Pants dum pheikhawk manto hmelzet nen, a ban puam sek ṭalh ka dara arawn nghah chu ka lo enzui vut bawk a, a sang ṭha bawk si vawin zet chu nidang zawng aiin ka la hmu hmelṭha zui, min rawn enrualin rang lutukin ka mit ka la sawn nghal a, ka en leh lai chuan hma lam enin a lo hawisang vah a, hmeichhe tleirawl kan kalpelh ho chuan an enduh hlawm nasa mai.







"Ui..a chhelo lutuk" ti a an inhrilhru sap sap pawh ka la hrepha.








A Bike dahna kan thlen rualin "Khawiah emaw ni ka hruaidawn che a nia" a ti zui sup a "Khawi ah maw...?" ka lo ti haw, lu thing nar nar chungin a mit a tizim sun a, hmeichhe hmuia awhawm khawp hian a hmui lah hi ala hrisel hmel zui lehnghal a.








"Bruuuuhhh" ngaihtuah loh tawp tur ka ngaihtuah lehta. Ka phone Gallery a ka thlalak neih chu ka hrechhuak zui rauh rauh. "Hlân kher i phut em?" a rawn tih chuan ka hawi chhuak zawk a, a Bike ah a lo ṭhu fel der tawh.








A Bike Seat a sang bawk si, kekawr tight ka ha bawk nen lawn mai ka tum chu ka kar hleithei meuhlo, ka bawp ka hlang zuau tawh chu ka tlin ta tlatlo a, hawi kualzuk zuk chunga ka bawp la thla lehin Seat chu ka vuan ṭung ringawt.








"Sorry" tihsup pahin Bike chu a rawn ti awn a "Thanks " a dara benthawk pahin ka lawnkai zui a, "Welcome my dear" tih leh tlanchhuah a rual a, a tlanchhuak thut bawk a a hnungah ka bei thlawp mai.








"Ṭang ṭung suh ka khalhchak dawnlo" a rawn tih chuan ka inthlahdul riai riai a, a kawngah ka vuan ṭai bawk, heti te mai hian kan inngaihzawng ta ringawt tihna em mawni le!?








"I ṭhu hnung lutuk" khawchhung kan pelh hnu chuan a rawn ti lawng lawng a, hnunglam aṭanga melh rum nghek chungin ka tawlh hma a, ka kut rawn banin amah sichet khawpin min la pawt zui, a Steering vawn lai thlah chuan ka kut chu a a dulzawnah min suihtir a, "Chelh rawh, chelh rawh" ka lo ti nghal chul, thlamuang takin he Bike ah hian ka chuang thei hlawllo.








A dul ka vawnna kut chu a thlandap tawh, ka zam ru riau lehnghal "Robot ang maia ṭhu khawng auh renglo khan ka hnungah khan han bei deuh hnap teh le" uang zeta Side glass aṭanga min rawn thlek pah chuan a ti a, "Hma lam en rawh" ka lo ti vin hlur.







"I thu ber" tih nghut pahin hmalam a en a, thui pawh kan tlan hmain a ding ri hrawih a, mawng kang dawrh khawpin a hnungah chuan ka bei leh thlawp!






"Uang uang suh Vanlalber..." ring zetin ka ti leh nghek a, a lo nui ri dawt mai.







"I tawlh hnung leh anih chuan ka ti leh dawn a nia" a la rawn ti zui a, a dulah ka sik sawk.







Min hruai tumna hmun kan thlen chuan "Lo che suh" tih pahin Bike a hung ṭha a, kan piah lawka kham niawmtak lam chu phawk zetin ka lo en a "Lokal rawh le" tih leh min chawithlak a rual a, kut khingkhat chauh hmanga min chawi kher chu eilo zetin ka melh zui rawm. "Kg 45" a lo tisup chu ka melh rang nasa mai a ala sawidik chiah lehnghal a!





IMG_20200630_233723.jpg
IMG_20200630_233723.jpg (54.5 KiB) Viewed 3362 times




Ka banah kaiin min kalpui hmawk hmawk a, khamko sang zeta kan ding chiah chu thawk ka la zui ham ham, a mawi tak zet, khawpui chu kan chhuk thlir thei a, a pe un mai. Ral lehlamah tlang sang deuh deuh a ding ngirkhup a Romeiin a bawh chiai bawk a, thlifim a rawn thaw heuh heuh zui bawk nen, ka lo nui chhuak hak.







Ka hnunglam aṭangin min rawn kuah a, ka darah a khabe rawn nghatin ngun zetin min thlek a, a lam ka hawi chiah chu kan hnar a insi lo chauh. Aw thian kharh chungin hmalam ka melh zui nghalthuai a, ka thinphu a rang nghal dawt dawt mai!







"A mawi em?" zawi supa tih pahin ka biang a rawn nawk a, min kuah nghet salh salh bawk, vawt ka ti hauhlo mahse, ka khur lo chauh chu a ni.







"I chanchin tam tak ka theihnghilh a, kan hun hman ṭhin dan te pawh mahse, reilo teah ka hrechiang thuai ang che, Margareti hnenah ka zawt a lehkha i zir nasat lutuk vangin hawi khawthawn na hun takngial pawh i nei ngailo a, tunah chuan nun hi engangtaka nuam leh hlimawm nge anih theih ka entir dawn che nia" nui ri suk chungin ka biang a rawn fawp a, ka lo ṭang ṭung ringawt.







"Ṭhianpa" ip ngar ngar chunga ka tih chuan "No" a lo ti nghut a, ka thaw chhuak hap.






"Ṭhian chu ti lo teh khai...." uangzeta tih leh pahin ka nghawng a rawn nul nghal thuak.








Kan inngaizawng tak tak tawh a nih hi, kan awmdan hi ṭhian awmdan chu a ni tawh hlawllo, ka rilru hria niawm takin "Ṭhian kan nilo" a rawn ti leh sup a, ka nghawng a rawn fawp tâwk bawk.








"Vanlalber..." aw khur dar dar chunga ka tih chuan "Ka Barbie" tihpahin alamah in kuaiher nghalzat.









(A CHIANG TA E)



Link:
BBcode:
HTML:
Hide post links
Show post links

ADVERTISEMENT (A hnuai a milem hi a nia hmeh zeuh tur chu)
Post Reply

Who is online

Users browsing this forum: No registered users and 47 guests