ADDICTED_TO_YOU Chapter - 22 By : Msi (Hmeichhe_naupang_tereuhte)

Episode kal lai dah luhna

Moderator: writers

Msi Miluhlulnui
Posts: 274
Joined: October 18th, 2019, 7:46 pm

ADDICTED_TO_YOU Chapter - 22 By : Msi (Hmeichhe_naupang_tereuhte)

Unread post by Msi Miluhlulnui » August 3rd, 2020, 6:51 am

ADDICTED_TO_YOU 💙 #CHAPTER -22

By : Msi, Hmeichhe Naupang tereuhte



Ngaihtuah zui duh lo in ka lu ka thing nghat a, Gate chu hawng in an awmna lam chu ka pan phei nghala Car ngheng chung chuan kekawr ipte zen chungin Damian-a chu alo ding reng, ka kal lai chu min lo en reng a min ti zâm leh lek lek hman tawh.



"In vaiin in lo kal thei em?" A bul ka thlen rual chuan ka ti nghal vat a, mahse chhanna min pek pawh ngailo in a țhiante ho chu Car ațang chuan an lo chhuak nghal sap sap a, an vai chuan ka lo nuih nghal ver ver bawk.



"Oh My God! Chheng mai a, kan Lalnu chu avan chhelo ve a" Sangtea chuan ka bula rawn din pah chuan a rawn ti a, nuih chhuah hak pah hian a banah chuan ka ben sak thlawp a Lb-i pawh chuan min rawn kuah ve nghal thuai bawk.



"Duati... Carter-a a rawn thleng tawh em?" Damian-a chuan a rawn ti sup a.



"Aw... ani chu zan tir lam khan alo thleng daih tawh. Hmingbawihi rualin a lo kal ve nghal a, ka nêl ve vak bawk si lo a chutianga lo biak dan vak pawh ka thiam lo" ka lo ti nghal sap.



"A bialnu awm lai chuan i be thei mai mai lo ang. Thikthu chhe liani ania, hmeichhe dangin nui chunga an bia anih chuan a sual duh nghal mai ang che" Lb-i chuan nuih chhuah hak hak pah hian a rawn ti a, midang pawh chu an lo nui chhuak ve huk bawk.



"Pawn lam chu a vawt ve deuh bawk sia inchhung lamah lut zawk ang u midang chu an la buai lutuk a mahse pawn lam ai chuan a nuam zawk ang. Jephtha nangpawh hmanhmawh deuh a i luh a ngai ania" Ka ti fiam nghala Damian-a bulah a ding bawk sia a awmdan a ti danglam ngam bawk si lo a a khi ve suk ringawt zel.



"Ni e... lut ang u tihtur tih ngai te ala awm tâk in tihpui ve te pawh a țul alawm" Sangtea chuan a ti a. An pathum chuan in lam an pan phei a kal ve ka tum ringawt a mahse Damian-a'n ka ban rêkah rawn vuanin a lamah min pawt phei a, nghet zeta min kuah in ka chhîpah a fawp nghal zeuh.



"Kei ai ka țhiante i ngaipawimawh tlat ka duh lo" lungawi loh hmel zet hian a rawn ti deuh hmuk a, ka nui chhuak nghal hak a.



"I țhiante tal chu thîk em em lo la... bakah khatiang khan lo ti lo ila lo tûm khum hmuk ta ila anih loh pawn lo be mumal lo ta ang ila nuam an ti dawn hleinem Maria-i mah alo kal lo a nuamlo tih tawh sa mah nâk alaiin" ka ti hlak a, a rawn thaw chhuak hawk!.



"Ka hlatah pawh i awm tur ani lo chuan kha mihring kha alo kal em? Tunge... Zodina ami khah?" Ala rawn ti. A hming pawh a hre hleithei der lo nia mawle.



"Aw.. kal nichinah pawh Alu min lak pui a, a hming pawh i hre hleithei bawk si lo a mahse i thîk ve êm êm ringawt bawk si aman hre ngat phei se chuan a nuih a za zawk ang" ka ti fiam a, lungawi lo tih hriat ngawih ngawih hian min melh khui a mahse kei erawh a hmel landan chuan ka nuih a pawt ka ti mai ka nuih a za zual sauh.



"I nui leh anih chuan ka let lehnghal ang tih hre rawh" a rawn ti ve deuh hmuk a, amah phei chu a tûm zui leh hmuk lehnghal.



Rang zet chuan ka hmui ka hup a, min kuahna a phelh thâwl avang chuan ka ding țhaa amah chu ka en. Ala nui duh țhaklo lehnghal a titau ve tak tak amaw ni reuh le, Zodina chu thîk tak meuhin alo thîk tak tak anih dawn hi fiamthu a lak sak chi ani tawh loh tawp mai.



"A țha e... ka sawi fiam tawh lo ang ani nen kha chuan țhian chauh kan ni a i natna tur engmah ka thlen lo ang tih ka tiam bawk a che min ring thei ang" ka kut dah thlak pah chuan ka ti a, a kut chu a kuangkuah a a thaw chhuak nghal ham ham "ring lo ta che ila" mitmeng zîm sun a min en pah chuan ala rawn ti ta deuh deuh.



"Chuan... min rin lo i tum tihna ami? Min ring thei ang a lakah engmah feelings pawh ka neilo ka țhian chauh ani țhian chauh" ka ti vak a, tlem chuan ka au ring țep.



"A laka feelings i neilo tih i fiah hunah chauh ka ring ang che. A en țhin dan che hi ka hmuh hmaih hauh lo khata țang khan nangpawn feelings eng emaw chu i nei thei reng, i neih theihna chance a sang zawk" ala rawn ti leh hmuk. Avan ti deuh mah mah tawh tak.



"Min ring ngamlo tawp anih kha, țhian chauh kan ni ti mawlh mawlh a țhian chauh kan ni tih midangin sawi ta se i bulah i âwih leh chuang âwm tawp si lo. Min ringlo bawk a a țha lawm, a lakah feelings ka neilo tih leh ka țhian chauh ani tih i hriat hunah chuan indawm kûn tlawk tlawk ang che" ka ti ve deuh ta hmak a.



"Hmh..." tih pah chuan ka hawisan hmak, inchhung lam chu pan tum in ka inher a mahse amah zawkin ka hnunglam ațangin min rawn kuah a ka kut lek chhuah ka tum rual in ka tihtur hre sa ni âwm fahran hian a rawn hûm bet zui chawt!.



"I thinrim em ni?" A rawn ti zâwi sup.



"Rim e.. rim e, a rim loh i ring ami? I duh leh lo kal bawk suh min ringlo bawk a inah rilru hah deuhin lo va awm rawh. Lo fiam lo tawp che ila țha tur" ka ti leh deuh țhat a ka tâl ngam bawk si lo. Ka tâl anih chuan ka ban hi ka tisual ani nghal mai dawn a in dan na tur engmah ka neilo.



"Sorry! Ka tih thinrim che avangin, khapa ka thîk zia kha i hria hre reng siin min fiam lui zel a thîkna rilru nen chuan i thusawi kha âwih a har asin rilru fîm ka pu tawh ngailo. Khapa hming i lam rîk phei kha chuan i kutah a vuan em, i taksa a khawih em tih ringawt hian min luh chilh tawh țhin" a rawn ti hnawk ve deuh țuak a, a thusawi pah te chuan a dang te pawh a âwk ve titih țep.



"Hrim hrim in ani berkher han thîk. Kar khatah pawh tih palh thil thu pawn vawikhat te kan inhmu țâwk ania. Heti lamah a hna avangin Post-ah a awm ania hmuh khât ber i thîk a" ka ti a, a rawn nui nghawr dat.



"In inhmu khât tih ka hria mahse ka thîk tlat si anih hi, kha mihring Joshua, na taka siamtu che kha chuan thîk takngial pawh a phulo kha mihring kha chuan a lem a thîk pawh 1% vel chauh phu ang ani" a rawn ti a, ka nghawnga țhi chhanah chuan rawn fawp zeuh in "hemi ni a ka thusawi kha hrereng ang che" a rawn ti tel a, ka sam chu a hnîm zui vang vang.



"I lakah hi chuan thinrim ngaihna pawh ka hre țhin lo. Han thinrim ve dawn viau țhin pawh ni ilang ka theilo reilotê ah Cream vawikhat nem a a lo nêm pulh țhin ang mai hian ka nêm lehnghal zel, mahse ka thinrim tawh vêk vêk anih chuan ka ngaihtuah hmasak ang ang in ka che tawp țhin" ka ti chhuak ta nghal hap bawk.



"Tah hian kan fa tur awm tawh se ka ti ngawt mai, mipa ani emaw hmeichhia ani emaw phir pawh nise" Tiin ka kawr chhanah ka dul chu a rawn chûl a chupawh duhtawk lo chuan ka kawr chhungah a rawn zen lut țalh a, a kut lawng chuan ka dul chu a rawn dawm nghal vut bawk a.



"I fel viau chuan ala awm ve dawn alawm ka thinrim țhat leh hma in lut vat ang a vawt ka ti dawn țan ruah te a sur leh ang tih a hlauhawm" ka ti a, nui chhuak hawk hawk in ka bengah a rawn fawp a ka kawngah rawn kuah in in lam pan in kan phei dun nghal a.



Inchhung kan luh chuan Maria-i chu a iptê ațanga Box tê rawn phawrh chhuakin a pe a. Maria-i lah chuan 'i len nen nen min pe tê emai' a ngam tlâk ve êm avang chuan a tih khum ta ringawt a, Damian-a phei chuan chhan ngaihna a hrelo nge ni a nui ta ringawt. Mahse a chhunga awm han hre ngat se chuan a lawm dawn lutuk hi sawi ngaihna pawh ka hrelo zawk.



"Intur i duh dawn em?" Music an play rin êm avang chuan ka han ti vak a, mahse ka țawng a hrelo nge ni hmalam a melh ngur ngur. Dingdihlîp in a bengah chuan "Damian..." ka ti leh vak a, min rawn en ve ta zeuh bawk a.



"Nâ i nei ami?" A rawn ti a, "aih" ka lo ti leh vat.



"Intur i duh lo ami ka ti dawn a, kan thlen ațang khan i in âwm pawh ka la hrelo" ka ti zui a.



"Ka in i phal chiah lo in ka hriaa chuvang ka ring dik em?" Mit ko sân ak pah hian a rawn ti a, min lo vengthawng ve reng amaw ni dawn le.



"Dik ve deuh tho e... mahse chutiang em em chuan ka phallo ani miah lo nasa deuh leh tam deuh rui deuh ang te a in ka phallo ani mai chu zawng chu i duh chuan i in ve thei ang" ka ti a, min chhan a tum lo nge maw ni min en vung vung.



"I duh lo anih chuan tih luih ka duh lo bakah chutiang em em a chak ka ni chuang lo bawk a, ka in loh avangin rilru nuamlo takin awm suh ang che i rilru a țha si. Kan tana țha tur chu keini ai chuan midang in an hre hnem zawk bawk a, ani lawm ni? I duh loh thil tih a tih lungawi loh che ka duh lo chu chuan i zawhna kha a chhang em?" A rawn ti dam dap a.



Țawngkâa chhang lo chuan min chhang tih hriat nan a biangah rang zet hian ka han fawhsak a, ka țhu thla lehnghal amah lah chu a nui ri suk a. Ka kut a hûm chu la kângin a phah chu a fawp ri nghal zeuh bawk a.



Zan a rei tak tak hma in tiin hun kan hmang a pa Hruai-a'n țnawngțainain kan hun min hawn sak a kan ti zui mawp mawp ani ber a țhen an hlim laiin hmeichhia a in ti no deuh te chu an bialpa te lakah an lo titau ve leh deuh țhin a thlem chhung nen chu chuan kan hun a ti hek.



"Ka lo riak lo mai ang chuan naktukah Zotlangah pitei te inah min lo kalpui ka tih kha aw tihtur i neih loh chuan" kawta kan din hnu chuan Maria-i bulah chuan ka ti a.



"Aw mahse naktuk te lo thleng phawt se. Pathian zara kan dam chuan ka thei ang kan kal dawn nia chuan Tei kha be rawh aw zanin khan a sawi thâwi fua mai naktuk tlai lama thlawh thlak leh thut a ngaih hmel a. A thil zir kha Class an țan thut dawn a tiin ka hria chuvang ania a haw nghal daih i buai lutuka ka hrilh duh lo che anih kha" a rawn ti a, ka lo bu nghat nghat.



"Call ka lo tum hrim hrim a, alo thlen khan ka lo be bawk si lo a ka lakah a titau amaw ka lo ti hman a ilo sawi a ka thâwl huai thei" ka ti zo chiah Damian-a chuan ka zâwna Car rawn din tir pah chuan "i inpeih tawh em?" A rawn ti nghal zat.



"Peih lo peih lo, chung chung zela che kan la inkawm ve duh a nangma ta chauh pawh ani bik lo, in awmdun hian in pahnih chauha awmfâl leh hun nghakhlel thei leh lutuk mai. Ka zo lo che, ka bialpa chu ni la ka tlawh hrep țhin ang che mawle" a ti ta roh va. Damian-a chu za zet hian a nui chhuak nghal hawk hawk.



"Aw... tiang hun țha te hi zawn ve a ngai alawm i upat hunah bialpa te i neih ve hunah ila hrethiam mai ang. Naupang ho tak hi chu... pawl 10-ah țhu țha leh ta la tuna i mizia nen in in hmeh tawk dawn chiah anih kha" tiin Damian-a chuan ngeiawm ru zet hian a fiam let ve leh a Maria-i lah chuan a melh rum ta ngang mai chutiang chiahin keipawh ka nui ta ringawt.



"A tlai zel ka kal dawn ania naktuk chu lo hman tum ngei ngei rawh aw Damdawiinah te min kalkawi pui a ngai dawn a. Tihfel tur ila ngah si lut rawh" ka ti a.



"Aw, ka lut dawn mek Mangțha aw Damian-a tello in chuan ni e, a tlai zel kal tawh rawh u remchang ka hmuh hunah ka la țhuai hrep ang che mawle" Damian-a en zui pah chuan a ti zui leh hram a nui chhuak hak in a hnungzângah ka nem phei a keipawh chu Car lam ka pan phei ve nghal bawk.



"Kan inhmuh chuan kan inchhaih thinrim reng dawn a ang ta hle mai a, engtin nge maw in inkawm theih zawk le" Motor kawnga kan tlan lai chuan Damian-a chuan a rawn ti hluk a, Maria-i chungchang a sawina ani tih ka hria.



"Kan inkawm ve thei mai alawm a ngam tlâk che a a fiam bawrh bawrh ngam che a țha ka ti zawk mipa na zawng nêl a duh ngailo, Joshua tih lo ah chuan chutianga mipa han nêl a nei lem lo Hmingbawihi bialpa Carter-a kha nang angin a nêl ve reng reng hleinem biak pawh a be peih lo" ka ti a, alo nui suk ringawt.



"A țha mai zel alawm zakzum tak ai chuan"



"Taka... hmanniah Damdawiinah khan Remzuali leh ka țhianpa Joshua kha an inbe lai ka hmu a ka hrilh vat ang che ka tia mahse Joshua zawh chian hmasak phawt ka duh bawk sia. Chuan zaninah in lo thlen hma khan ka zawt a Remzuali nen chuan an inhriaa chhuah pawh an chhuak ho ngei a chuan Dr. Thomas-a kha Remzuali'n a kawhhmuh thu in min chhang a rinhlelhawm deuh a awmin i hre ve em?" Ama lam hawi pah chuan ka ti a.



"Chutiang ringawt chuan hriat ava har duh âwm ve inhmelhriat satliah te pawh an lo ni thei a rinhlelh ngaihna ava awm lo ve. Engthilah nge i rinhlelh a?" A rawn ti a, mahse a sawi dik ve reng Tatoo chungchang kha Remzuali nen hmehbel ani a Joshua nen an inbe lai ka lo hmu leh khanglang bawk nen ka rinhlelhna kha a lian êm ani.



"Țang dun in an bei che amaw ka lo ti hman a, ka țhianpa anih vang nge. Mahse, ngaihtuah chian poh leh ka rinhlelhna a tam tulh tulh a ka țhianpa anih vang nge ni a ka ngaihtuahna hi a diktak zawk alo ni ang" ka ti chhuak hap.



"Enchiang lehzuala chhui chiang lehzual turin min duh em?" A rawn ti sup.



Ka thaw chhuak nghal hak a "a pawi miah lo thudik nge thudik lo tih hriat tal te pawh a țha alawm min kam țûn lo deuh anga mahse i hna tibuai tham chuan ti lo la" ka ti leh a.



"Ka khawih lai nena in zûl zui tho ania lawm" a rawn ti zui leh a.



"Taka Joshua khan nangmah hian min bum a Remzuali nen in la inkawp reng ani tih kha a sawi a chuan Tlanhlua lah khan misual pawl ang deuh a i tel thu a sawi a i sawisakna ni âwm ang zia zângin a hliam te kha a sawi bawk a hmanniah tawh khan ania chutiang..." ka sawi zawh hma hma chuan.



"An thusawi chu i âwih em?" A rawn ti a "Maw?" Ka ti chhuak sap.



"An ni pahnih thusawi chu i âwih reng reng em? Kei hian ka bum che a chuan misual pawla tel te, an ni thusawi chu i âwih reng reng em?" A rawn ti hrâwk a! Motor chu break ri tuarh in a ding nghal dawt a ka lo inring hman lo bawk nen hmalamah chuan ka âwn nghal vak bawk. Ka hawichhuah chuan kan in pêngah kan lo ding tawh.



"Hrep tak chuan, an thusawi kha i âwih em ka tih chu" a rawn ti leh țhawt, muangchangin a lam chu ka hawi phei a.



"Ka âwih i ring ngawt ang tiraw? Mahse ka âwih lo a chhan chu ka rin tawk che, an sawi ang thil i ti dawnlo tih pawh ka hre vek a âwih duh chu ni ilang hlau che in ka hlat daih tawh ang che. Anni pahnih kha rintlak an nih loh zia ka fiah tawh a chuan an thusawi pawh kha a rintlak lo ani tih a chiang bawk" ka ti chhuak dap dap a, thaw chhuak hawk in a sam a tuai chho puat a ka lam chu a rawn hawi a.



Ka biangah chuan rawn dawm in ka chal ah chuan a rawn fawp nghal vang vang. A chal chu nghat in ka mit leh mit inkar chu a rawn fawp leh a "Midang reng reng in i chanchin, ka chanchin emaw kan chanchin engpawh an sawi anih chuan fiah hmasa ziah ang che ka chanchin ani emaw tu chanchin pawh nise fiah hmasa turin ka duh che an sawi ang ang âwih a ring nghal tawp lovin. Chhan hriat si loh va engmah sawifiah bawk si lo a thinrim tawp ang kha ka ngaina lo. Ka thusawi chu i hrethiam ani tiraw?" A rawn ti zâwi sup.



"Ka hria... ka hria alawm lo hrilh lo tawp che ila țha tur ania" ka inthiamlo lutuk chuan ka ti leh ta ringawt.



"A țha... khatianga sawi zel tur khan ka duh che pai reng lo in i hria tiraw?" A rawn ti leh a, ka lo bu nghat nghat bawk.



In thleng min thlah a reilotê a rawn lut kawi leh a ka pa te an Committee avangin rei pawh awm lovin a chhuak lehnghala, ka nu nen chiah kan awm tlawng a ka nau kan video call-a kan pahnih chiah a awm e ti lo chuan zan rei lamah kan nui nasa ta hle bawk.





"Nizana present i dawn ho kha i hawng kim vek tawh em?"



"Aw... hawng kim vek tawh mahse pakhat mak deuh a awm a" a rawn ti a.



"Eng nge mak deuh chu? Chuvang chu ami i mood alo off em em" ka tih zawm leh.



"Um... thlalak ania amak rap tunah pawh ka lo keng Remzuali leh Joshua chungchang daih mawle" a ti a, a thusawi avang chuan rang zetin khumah chuan ka țhu thla ve nghal a "khawi maw thlalak chu ka lo en ve chhin" ka ti nghal vat bawk.



Engthil nge maw awmzia ni tinge anni pahnih chungchang chu Maria-in a dawn daih daih theih zawk ni.





Remzuali leh Joshua inbe lai thlalak hi a iptê ațang chuan a rawn phawrh chhuak a, âng phuau chungin amah chu ka en chho a ani zawk lah chuan hrethiam lo tih hriat fahran hian thlalak lam a melh zauh.



"Tu lo pek che nge a inziak miah lo ami?" Thlalak lek kân pah chuan ka ti a.



"Aw... alo kal ho zawng zawng ti ila Damian-a te țhianho tih loh kha chu ka zawt vek a min pek ho pawh ka dah hrang diat diat a. Damian-a țhiante kha chu biak pawh dan pawh ka hrelo mahse anni min lo pek kha chu a hlawmin lianpui in an dah a anni chu an ni theilo chuan a vai tih loh ah khan tuna mi chiah hi a neitu awm lo awmchhun ani" a rawn ti a, ka lo bu nghat.



"Hei chu Damdawiin bula thingpui dawr kha ani bawk sia mahse tu in nge anni pahnih thlalak te lo pe daih daih ang che le. Nge ni a tu emaw hian kan chhui ru tih an hria anga tiang khan min lo ti zawk niang le" ka ti leh a, ani pawh a ngaihtuahna a kal thui ngang aniang thlalak chu a en ve vang vang ringawt a.



"Midang chu an nih ka ring lo nang in i hrilh ngawt te anih loh chuan, kei chuan ka lo theihnghilh leh hmak tawh, kan pahnih bak in kan hre bawk si lo a Tei lah a chhuk daih tawh bawk si rilru a tibuai tham ve reuh" a rawn ti ve leh a, thlalak chu chiang zawkin ka en leh a a hnung te chu ka en leh țhin tu lo thawn ve rikngawt ve niang le awm a ti nuamlo rum rum thei alawm mawle.



"Hei chu nakinah kan sawidun leh zawk dawn nia tunah chuan chhuak phawt ang midang rinhlelh rûk deuh pawh ka nei a kal pahin ka hrilh ang che" tih pah in ka pawt tho a, rawn tho ve leh mai in thlalak chu a ak țhaa ka pa pawh room-ah a rawn lut ve leh chiah bawk.



"I pitei chu ka be zo chiah a buh ban chu alo dah tawh a chuan lehkha ka sawi kha i rawn hâwn bawk dawn nia aw" a rawn ti a, bu nghat in chair-a ka Jacket dah chu ka ban nghal zawk a.



"Pitei chu alo awm dawn nge an in a lehkha zir hmeichhia kha alo awm dawn?" Ka ti leh hram.



"Chawhnu lamah ka chhuak dawn atia in va nang hman tho ang Taxi khan kal mai ula chuan Duty-naah min rawn pe kawi mai dawn nia ka submit nghal a ngai dawn a. Maria-i chu kha i pa te an dam țha maw?" A tih zawm zat.



"Aw... dam țha ani mai tunlai chu a buai ve lutuk a inah pawh a awm hman mang lo"



"Anih ka ring, niminah khan kan inhmu a file te kha a pawm țûn lehnghala rei pawh kan inbe hman hleinem, hrim hrim in i rawn leng khât bawk si tlaiah chaw lo ei ta che" ka pa bawk chuan a ti leh a.



"Ka hrelo le, ka pa te ka lo be phawt dawn nia" Maria-i chuan a ti țha ve lehnghal mai bawk a. Ka pa lah chuan Hruaizela nena fiam zui zeuh in a chhuak lehnghala a sir ațang chuan ka lo nuih char char.



"I pa hi chu ah...! Hruaizela kha a hre lak lawh a a rei tawh tawh nen min la fiam char char peih a ni lo lo ala hre lehnghal bawk si tuna a sawi te kha" Maria-i chuan a rawn ti nui nui a, nuih pah chuan a hnungah chuan ka beng dat dat a.



"Ngaiah nei tawh mai rawh ka pa mizia chu i hriatchian kha Tei rawn kal ngat phei se chuan hmana mi kha a sawi hrim hrim ang ila vannei zawk alawm le" ka ti a, Tei'n Bathroom-ah ka awm amaw a tih a ka pa bula a star pa chungchang a lo hrilh kha kan sawichhuak a țullo ah kan nui chiam ringawt bawk. Ka pa zawk kha Bathroom-ah alo awm reng sia.



Pitei te kawmthlangah Taxi kan din tira Step-ah chuan titi chungin kan chho dun tûrh tûrh a.



"Pite... kan lo thleng" tiin inchhungah kan inzui lut a, ka aw hriaiin ani pawh Room ațangin Bawihtei a rawn pawm chhuak tel bawk a Sofa-ah chuan kan țhu thla nghal vat



"In lo va thleng hma leh si ve lo țhu ula thingpui ka lo lum ang che u chaw kan ei kham na pawh ala reilo. Chuan kha, i ban te chu eng nge a an a?" a rawn ti nghal zung zung a, Maria-i chuan Bawihtei chu alo laksak nghal chat a



"A țha ve tawh lutuk hmannia ka tihsual leh avang vek khan a dam har phah vek alawm. Putea te ho an dam țha em?" Ka ti nghal zat a.



"Aw... Pathian zarah kan dam țha e nangni in dam țha maw? Maria nangni pawh i chhungte an dam țha maw?" A rawn ti a.



An dam țhat thu in kan chhang ve ve.



"Awm ve reng rih ula kan chhuak rual dawn nia thingpui chu ka va lum phawt ang che u" a ti a, Choka lamah chuan a phei zui nghal ti tih.



"Bawihte... eitur ka lo lei theihnghilh daih che a eng nge i duh le? Hei, Au Maria-i pawh alo leng leh tawh ania" Bawihtei bianga piai zeuh pah chuan ka ti a, Maria-i chu a en chho ang hê hâw a.



"Coco lala a duh" fiah lo deuh hian a rawn ti a. Maria-i chu a nui chhuak nghal hak hak.


"Engmaw i duh? Ring deuhin han sawi leh teh le chuan kan lei ang in in bulah dawr a awm a" Maria-i chuan a ti leh.



"Coco lala a duh coco lala" a hma aia ring ve deuh hlek hian a rawn ti a, mahse chutiang lutuk in ala țawngfiah chuang lo. Maria-i chuan a lawm ngang aniang a pawm kâng a a sâwi ta vak ringawt Bawihtei lah chu a nui khêk ve raih raih bawk a kan ri chûl a ni ta ber.



Bawihtei chu Maria-i nen chuan Coco Lala lei turin an chhuak dun a keipawh Choka lamah chuan ka phei a pitei chuan thleng alo sil mek "Aw... khawnge lehkha zira in awmpui hmeichhia kha" ka ti a, thingpui rawn so chu ka off nghal vat.



"Coaching a kal a, alo haw țep tawh ang ka sil turah lo dah rawh a tia mahse sil loh a awm reng ai chuan tiin ka lo sil mai mai anih hi. Lehkha i hawn tur kha ak fimkhur rawh aw i tibo anih chuan a dang a awm tawh lo ania i pa a sa viau ang" a rawn ti a, thleng a dahna tur chhuar chu ka lo hawnsak nghal vat vat.



"Ka iptê hi a phui țha alawm. Bawihtei saw avan țawngthei ve reuh tawh em em la țawngfiah vak lo mahse a lawmawm hranpa ve hrim hrim"



"Nia... țawng a zir ve nasa tawh, chhuar-ah khan plate a awm a lo la chhuak teh tah khan kurtai a awm" a rawn ti a, chhuar chu ka hawng a a sang ve reuh bawk sia ka la ban phak țha mang lo lehnghal stool ka dawh ta tawp.



Kurtai ka dahthla zo chiah chu ka phone a rawn ri a Damian-a anih avang chuan chhang turin pawn lamah ka chhuak phei a ka iptê lah chu ka la zen țha thei lawk lo lehnghal amak mah mah ngawt mai.



"Aw..." tiin call chu ka chhang ta tawp a, Maria-i te rawn lut chu inchhung lama lut turin ka signal nghal zeuh bawk.



"Eng nge i tih a?" thatchhiat hmel zet hian a rawn ti a.



"Pitei te inah Zotlangah kan kal a ka pa lehkha pawimawh la turin i van chauh hmel em em i aw zâwi lutuk" ka ti nghal zat.



"Chau ve ang reng e zingkar ațangin engmah ka la eilo tih i hria em? Tunah hian ka dawhkanah hian hna hlirin min hmuak" peih loh hmel zet hian a rawn ti a, ka chet zui hlak.
"Ngatinge engmah ila ei miah loh? Buai viau pawh ni la ei ziah rawh ka tih kha... khawnge Jephtha kha eng emaw tal lak tir rawh nge keimah ka lo kal zawk dawn" ka ti lehnghal vat.



"A hnuhnung zawka i sawi kha 100% in ka pawm nangmah lo kal zawk rawh ka ngai tawh che eitur ai chuan nangmah kha ka ngai zawk che" a rawn ti thûm sup a, ka țhutna ațang chuan ka ding chhuak nghal bawk a.



"Hna ngah viau mah la a pawimawh vak lo chu lo khawih tawh rih suh ang che eitur ka lo lei phei anga ka lo kal ang ka sawi chu i hria tiraw? " ka ti a, inchhungah chuan ka lut phei nghal vat.



"I sawi rual khan ka mawng hi țhutthlengah hian a inchar bet nghal ka mit in pawn lam a en reng bawk a kawngkhar ani zawk ang chu ka Office bungrua te pawh hian 'lo thleng tawh se' an ti ve bawk a" a rawn tih rual chuan ka nui chhuak nghal hak a, ani pawh a nui ve tho.



"Nizanah Maria-i'n Remzuali leh Joshua thlalak Birthday present-ah khan a dawng nawlh a, Joshua pek anih kan ring deuh a ka lo thlen hunah chiang zawkin ka hrilh ang che" ka ti a. Maria-i bulah chuan ka țhu thla ve nghal zat.



"Jephtha ka lo enfiah tir dawn nia chuan i bulah khan Maria a awm chuan ka lo be dawn em ni a tana thu lawmawm tur tak mai kan hrilh ang e" a rawn ti a, Jephtha chungchang ani tih ka hre mai.



"Kha... a be duh che pitei ka va be lawk ang" ka ti a, Bawihtei chu pawm in ka thawh chhuah pui a Choka lamah kan phei nghal bawk.



Pitei bulah chuan hmanhmawh kan ngaih thu ka hrilh a envelop chu min laksak in buh ban fai nen rei pawh an ina awm lo in kan chhuak lehnghala Maria-i chu a nui chhuak vur vur mai.



"Hey! Jephtha khan ka bula awm nuam a tih thu alo sawi anih chu ka van lawm tak! Awi! Ka lawm zia hi i hrefiah thiam pha lo ang chuan tinge kan va chhuak hma em em" a rawn tih zawm lehnghal zat.



"Damian-a te Office lamah kal ka ngai a nangpawh lo kal rawh eitur te lei phei ka ngai zing ațangin engmah ala eilo lehnghal" ka ti a, Scooty hnuai chu hawng in buhban fai vel chu ka dah lut nghal bawk a "Yes! Pawilo, Jephtha hmuhna chance ani mai" ala ti reuh zui lehnghal, khavang tak khan alawm kal ve tura ka duh nachhan ni.



Thingpui dawrah eitur kan lei phei a Coffee kan lei phei bawk. An Building kawtah kan ding a Scooty a dah fel lai chuan a sirah ding in ka lo nghak reng a ka bulah mipa pakhat hi a rawn ding a ka en chho nghal hâw.



Amah hi Damian-a khan kan inah pawh a rawn hruai tawh tak e "Min la hre ve maw Lora?" A rawn ti a, ka lo bu nghat "hre deuh mahse chiang lutuk lo in, eng nge hetah te i rawn tih daih daih a hna in thawk lo ami?" Ka ti a, Maria-i pawh chu ka bulah a rawn ding ve nghal zat.



"Thawk e... mahse Sir in nangmah nghak tur che in min ti a in inpeih chuan kan kal dawn em ni ang hna ka la ngah ang reng bawk si a" a rawn ti a. Maria-i lah chuan ka beng bulah tunge anih tih min rawn zâwt sa sa.



"Aw.. chuan englo Lorenzo., Damian-a chuan zing ațangin engmah ala eilo tak tak ami?"



"Aw... zing dar 6 ațang khan ala buai char char a meeting vawithum a attend tawh a tunah enfel tur a enfel mek bawk. Chawhnu dar 1 hian Mr. Armando te nen meeting an nei leh ang Contract thar an buaipui a tihfel tur a tam deuh a" tiin pangngai tak chuan min rawn hrilh ve mai bawk.



"I zinna chu eng nge a an a? A nuam em?"



"A nuam ani mai ang chu, nuam lo pawh nise nuam han ti ila a dik vek mai zel" a rawn ti leh a, ka nui ta ringawt.



"Ka rin ai a chhung a pui daih i bialpa hi thil alo van ti thei em em" Maria-i chuan ka beng bulah a rawn ti leh sa sa a, amah chu ka melh zui nghal vak "ui... over lo mai teh hepa hi maw Jephtha best anih hi be țha hle rawh a fel lutuk kawm a nuam bawk" ka ti a, kan hmaa Lorenzo ding chu dâk vah hian a en chho.



"Chungte chu a tirah khan sawi ta che mawle iva han mawl tak! Mahse hmeichhe zak theilo deuh ang mai a lo tih huam huam ka duh lo ka nasat hmel dawn emai" a rawn ti leh nui nui tho bawksi, amah a hahthlak lutuk chu ka thaw ta vak ringawt.



Office kan thlen hma in Jephtha a rawn lang a Lorenzo nen an inbe zui bawk. Maria-i a hmuh chuan nui chungin a rawn bia a awi leh! A nui vawikhat ka hmuhna, rapthlak hian.



"Sir chuan Lora chiah a hmu duh dawn bawk si a inchung lamah kan lo awm thawveng dawn mi niang" tiin Maria-i bulah Jephtha chuan a rawn ti a, Maria-i awmdan tur hrelo lutuk chuan ka banah a rawn sik ringawt a ka au chhuak teuh kher mai.



"Lora... ka lo han awm ang aw" tiin min han râwn der ve khanglang bawk a. Heiha, henu han rapthlak dan em em hi engtin nge hetiang em em hian a awm theih zawk ni ka zo thlawt lo "aw... han kal la fimkhur deuhin han țawng kher suh aw" ka ti ve leh kher a, min la rawn melh rum zui hram anih chu.



"Lora... eitur chu ka dah luh tawh kha aw ka hnaah kan let lehnghal ang e i bialpa duat lai sawn min rawn vil leh hma in" Lorenzo chuan a rawn ti hluk.



Damian-a Office lam chu ka pan phei a kawngkhar pawh kik ta lemlo chuan ka hawng a ka lut tlang ta pawp. A țhutna lamah ka hawiphei nghala a țhutthleng ngheng chungin a lo dâk a alo maimichhing vang vang.



Thawm dîm thei ang ber chuan ka pan phei a, ka thawm a hre miah lo nge ni a a muhil zawk.



A bulah chuan ka va ding a a hmai bulah chuan hmui hup chungin ka kûn hniam a. A dawhkan te chu lehkha hlirin a khat a a dustbin te pawh lehkha hlir in alo khat.



"Ilo țam chhawl hman ami?" A beng bulah chuan ka ti zâwi sap a, ka aw a hria a rawn meng chhuak in min rawn en nghal zat a ka lo nuih nghal ver ver "Ilo thlen lai ka hre miah lo" a rawn tih rual chuan ka lo nui chhuak hak thung, a lamah min pawt phei in a mal chungah chuan min pawm thla a ka hmuiah chuan a rawn fawp nghal zeuh.



"Ka lo thleng ve deuh chiah, i muhil amaw ka tia thawm dîm deuhin ka lo kal alawm i chau tawngkhawng tawh ani maw?" Ka ti a, thaw chhuak hawk in țhutthleng nghenchhan chu a ngheng thla leh dawt a ka rawmawl ah chu phawrh chhuak in a ngawng thlan leh a hmai thlan vel chu la hrûk sak nghal thuak thuak.



"He hna avang hian ka zawi zo tawh anih hi mahse nang ka hmu che a ka chauhna te kha a reh ta vek anih hi ka thlan te i hru bawk a Fan ang chiah ini" a rawn ti leh a, a thusawi awihawm loh lutuk avang chuan ka nui chhuak nghal hak hak a.



"Lo awm hnai rawh" ka ti a, ka kawngah chuan rawn vuanin ka âwmah chuan a hmai a phûm a, a sam chu khawih sak in a bek thlan te chu rawmawl chuan ka hrûksak nghal thuak thuak a.



"Eng nge i pitei te inah chuan in tih a?"



"Ka pa lehkha pawimawh tur kan la a buhban fai nen thingpui min lum sak a mahse in pawh kan in hmanlo kan rawn tlang nghal, engmah ila ei bawk si lo a thil ei phawt rawh taka Coco lala i duh em?" Ka ti a.



"Engmaw?" A rawn ti chhuak hluk mai, a nui chhuak nghal titih bawk.



"Aw... Coco Lala i duh em ka ti anih chu i duh chuan ka lo keng tel a hit ngat" ka ti leh.



"Bawihi" a rawn ti leh a, a nui lehnghal hawk tho.



Ka kut lam chu la lawk in ka hnung lamah a hûm bet zui nghala ka hmuiah chuan a rawn fawp nghal vang vang "min nei turin ka duh che Lora... min nei tawh rawh" ka hmui bul chêt ah chuan a rawn ti thâwp sup a, a thusawi tur chu ka rin lawk loh êm avang chuan ka meng nghal kâwk a han chhan mai dan tur ka hrelo.



"Damian" ka ti chhuak nghal hap.



"He zungbun i bun hian ka ta chauh ini tawh tih a entir a chuan rei tak ka nghah tawh loh nan min nei vat turin ka duh che. He zungbun hi i kut ațanga i phelh anih chuan i phelh ni la la in kan inkarah khi siam in bang lian tak i hûng tawh tih hre bawk turin ka duh che a chutiang chiahin keipawn i phelh lo ang tih min tiam rawh" a rawn ti leh sup a, chumi rual chuan ka kutzungte û ah chuan eng emaw hi a rawn rawlh lut nghal zat bawk.


rps20200805_123448.jpg
rps20200805_123448.jpg (20.19 KiB) Viewed 3199 times


Ka kutzungtê ah chuan a kutzungtê a rawn chep bet a ka mitah chuan chiang tak in min rawn en zui bawk a, a mitmeng ațang chuan min Hmangaih hluah hluahna ka hmu thei hial.


\°•°/




STORY CHHIAR THIN ZAWNG ZAWNGTE TIH VE NGEI NGEI TUR.

STORY a thlawnin chhiar tur nitin kan chhawp chhuahsak che u a, nikhata i chhiar man hi duli man tal ni a i hriat chuan website a advertisement hi i lo click ve thin dawn nia. Online website a story i chhiar theih nan pawisa tam tak kan seng a, i chhiar paha i lo click ve hian i chhiar man i pe ve a ni tih i hre dawn nia.

Mi pangai chuan miin sum senga an tana buaisaih a nih chuan an theih dan ang angin pek let veleh ngei an duh thin. A thlawna dawnga pe let ve tu nih peih tlat loh hi a zahthlak, a changkang lo lutuk, smart phone tha pui pui kan nei a, kan rilru pawh ti smart ve ila. Story in chhair theih nan hian writer te hlawh sing khat ai tlem lo kan pe ziah a, website hrim hrimah hian sang 6 vel kan seng bawk. Story in chhiar man hi chawitir zel dawn che u ila chuan mi tam tak hi chuan story in chhiar theih lohna a rei tawh ang, chuvang chuan a thlawna chhiar liam mai lo in lawmthu sawi nan i lo click ve hi kan phut tlat a ni.

Advertisment hi a chung berah leh a hnuai berah kan dah a, Vawi khat ve ve click a tawk mai. Vawi khat ai click kha awmzia a nei vak lo.



Link:
BBcode:
HTML:
Hide post links
Show post links

ADVERTISEMENT (A hnuai a milem hi a nia hmeh zeuh tur chu)