LOVE IS NEVER ENOUGH CHAPTER - 9 by Amy Cck

Episode kal lai dah luhna

Moderator: writers

Amy
Posts: 432
Joined: May 15th, 2019, 8:49 pm

LOVE IS NEVER ENOUGH CHAPTER - 9 by Amy Cck

Unread post by Amy » August 3rd, 2020, 11:10 pm

CHAPTER - 9 💘 by Amy Cck









* REUBEN ZOMUANPUIA POV *









" Reuben ! " Ka office kawngka rawn nem hawng rawk rawk a rawn ti tu chu ngai thei lo zet a phun hluk in ka melh nghal khui a. Opi hmel erawh in thiam loh na lam ai chuan hlau thawng hmel a pu zawk.









" Op hna ka thawh mek hi. Kawngka tal kha i rawn kik hmasa thei lo a mi? " Ti chhuak hmuk in ka pen ken lai chu dawhkanah ka dah thla zui nghal hmuk bawk.









" Ihhh..... Angeli phone atang in min rawn bia a tunah damdawiin lam pan in an in phur chhuak chiah. An be tlang thei lo che a nih hmel. " Opi thu sawi lai chu ka melh run a, a sawi zawh rual in hlauh thawn hmel zet in a thaw chhuak zui nghal halh.









" Ka phone... " Ti sup a ka in dap kual vut chu ka hmu zo thak lo. Tukin zing motor a Nautei leh ka pa an in biak zawh khan motor hmaah Nautein a dah kha office ka thlen in ka la miah lo tih ka hre chhuak chiah bawk.









Hman hmawh zet in office atang chuan ka chhuak a, damdawiin lam pan chuan ka in khalh chhuak zui nghal bawk. Engtiang a chak in nge ka tlan pawh hre lo chuan ka in khalh a ni ber. Motor khalh chung chuan Nautei phone ah ka call a van neih thlak tak in Babyin min lo chhang hloh.









Opi khan sawi tho mahse an awmna tak ka zawt nawn leh a. Damdawiin an thlen tawh thu leh Nautei pawh doctor ten an en nghal thu a sawi a. Ka damdawiin thawhna ni lo in civil ah zawk an awm avang chuan ka pan ve nghal a. Hetiang hian awm fo thin mahse a awm a piang hian ka hlauh thawn dan a ngai reng ziah tho, hrep tak hian!









" U Reuben! " Babyin min hmuh rual in min lo ko vat a. Oxygen hmang a khum a hmeichhe thawk la sak sak doctor ten an buaipui mek chu ka hmuh rual in mit ka chhing sawk.









" Eng tin nge a thlen theih! " In hum ruh ngawt ngawt chuan ka ti chhuak hrawk. Kan bul a midang awm ve ho chu an ngawi dak hlawm a. Mipa pahnih leh Baby-i leh an thiannu sam tawi te kha an awm ve.









" Ihh.... A thawk a rawn buai thut a. Chuan a awm zawn kha na a ti lutuk a. A tir chuan a tha em tih leh na a nei em tih ka zawh pawn ka tha a ti tlat a. Thaw hah a neih avang khan lam ri hut hut leh boruak uap kha a zo lo a nih ring in pawnah ka chhuah pui a, a taksa a hit thler a mahse thlan tui khan a rawn bual zawih zawih bawk sia, chuan a rawn buai nghal deuh tawp a. " Babyi chuan a ti nghal vat a. A tawng ri bah deuh nak nak leh awm dan atang chuan a la hlau thawng tih ka hre bawk.









Mipa pahnih awm ve chu an college SU te an ni a, college week nuam zet in a thian te nen an hmang zo ve thak a. Ka rilru a lo hahdam ve teh lul nen class pawh an kal leh tawh zawk a. Vawinah week closing an hmang dawn a, nuam ti zet a a awm ka rin lai a damdawiin bawk a a tawp leh chu a dam zawk pawh ni mah i la ka lo na ve vawng vawng tho.









Thian ngainat em em a chhar thar a, Thenzawl a kan kal khan Babyi a ngainat zia kha ka hmu vek miau. Zing karah a thiannu hruai tur in driver tirh a tum a, vawi hnih lai a la hma deuh thu ka hrilh nghe nghe a. A tawpah erawh in sum thei lo in a va hruai tir ta nge nge a. Motor seat hma lam ah pawh rawn thu duh lo in a thiannu in nuam a tih loh hlau in hnung lamah an thu dun a, an thian dun a an in kawm kha front glass atang a melh in ka lo nui ve suk thin.









Kha tiang a Nautein pangai tak a thian a kawm a, a tawng a za tak tak a a nui lai hmel kha ka hmuh zen zen loh thil a ni miau. Engkimah a thiannu kha a ngaihsak em em a, a nun a pangai ve tan a, a hrisel a a hlim ve tan chiah a mahse a tet lai ang tho in a tawpah damdawiin bawkah a lut leh a, rei tak hlim hi a phu ve tak zet a sin!









" Dr Reubena chu! " Nautei en tu doctor in min hmuh rual chuan a rawn ti vat a. Kan training chhuah pui a lo ni hloh bawk chu Nautei din hmun ka zawt nghal sup chu tunah rih chuan a that deuh tawh thu leh oxygen pawh vuah rei sak a ngaih loh tur thu in min chhang zui nghal a. Kan damdawiin lamah in sawn phei ka duh thu ka sawi chuan min hnial lem lo. Mahse tun tut tut ah erawh a thei lo a Nautei a rawn harh phawt a ngai.









Helai ai chuan kan damdawiin lamah kan cabin hman reng a awm a, a hahdam thlak in a hmun pawh a thawveng zawk a. Chubakah kei mah ngeiin ka enkawl thei dawn bawk avang in in sawn rawt ka ni a. Chubakah civil hi chu khum in daih loh a na ve bawk nen an rem tih loh chhan tur a vang viau.









" Nang ni pawh va haw tawh ru, Angeli in lo ngaihtuah a nang ni ang thian a nei hi a vannei tak zet. " Angeli rawn kal pui ve tu mipa pahnih haw hnu chuan Babyi te thian dun en chuan ka ti sup. darkar li lai a liam tawh a, Angeli pawh a thawk a pangai tawh avang in oxigen an phelh sak a, damdawi vang in harh erawh a la harh chiah lo.









" Tih tur kan nei chuang lo a, a harh hun kan lo nghak ve ang. " Sam tawi te khan a rawn ti vat.









" Nia, a harh chuan hospital dangah sawn I tum sia kan lo awm ve rih ang. " Babyi pawh in a rawn ti vat a. Damlo bulah pakhat bak a awm theih miau loh avang in Nautei bulah ka luh san leh a. A bulah thu thla in a kut chu ka hum sak vang vang a, damlo a a mut ringawt pawh hian ka lo nat puiin ka thawk thleng in a lo buai ve vek zel a nia. He tiang chuan engtikah mah ka hlat theih ka ring lo!









" U.... " Rawn ti tham chel tu chu ka melh vut a. A mit meng dul raih chu a chauh hmel in a lainat awm ngawih ngawih bawk. A ti thin dan bawk in a damlo a harh hian kei mah min ko hmasa ber ziah. Chuvang chuan a nat a piang hian eng thil pawimawh leh hman hmawh thlak pawh awm mahse engkim kal san in Nautei ka pan nghal vat thin. Min koh a piang a a bul a lo awm thei tur in leh min hmuh loh avang a lungawi lo leh baih vai deuh a a awm ka phal loh vang in.









" Na i la nei em ka Naute? " Ti sup in a hmai hit thler chu ka chul sak zauh a, a thlan tui in a bual huhna a sam vel te chu a la hnawm chap a, a thaw ringawt buai lo in a awm zawn ba tel ang a Babyin a sawi avang khan ka hlau thawng ru viau a mahse lu a rawn thin takah chuan ka thaw chhuak ve suai suai.









" Babyin I awm a na i tih thu a sawi a, tunah a na tawh lo maw? " Ka ti nawn leh sup.









" Umm... " Ti chauh in min chhang a, a mittui a rawn chhuak ringawt chu hrethiam lo in na a neih leh neih loh ka zawt nawn mawlh mawlh a mahse a neih loh thu chiah a sawi a nih chu.









" Ih.... A lum ka ti lutuk a ! " A rawn ti tham chel chu a chal leh nghawng, taksa vel a dai dap bawk si a damdawi vang a nih thu a chhang in a dam tan dawn vang tiin ka hrilh sup a. Doctor rawn kal in a rawn check a. Lehkha ti fel in kan hospital lamah kan phei pui thei thu a sawi chuan Babyi te ko in lehkha pawimawh ka tih fel chhung lo awm pui tur in ka ti nghal sup.









" Ka rei lo ang! " Ti sup in Nautei chalah chuan ka fawp zauh a. A mittui tling reng chuan ka awm a ti nuam theih lo viau a rei lo te kal san pawh min ti huphurh vek nghe nghe.









Motor hnungah Babyin nen thu in Nautei taksa zawi ngiai chuan Babyi darah lu a nghat a. A mit meng dul raih chuan a melh ngai melh in reng in a biang a a mittui rawn chhuak leh thin darthlalang a ka hmuh theih miau avang in pik zet in thawk ka la leh hawk thin. An thiannu Ji erawh in scooty in min rawn zui ve thung .









Ka thawhna hospital kawt a ding in driver seat atang a chhuak vut in Nautei thutna lam chu ka pawt hawng a. A taksa zawi ngiai chu pawm chhuak in damdawiin lam ka pan pui zui nghal pawk pawk a. Staff ho in min hmuh rual in min lo buai pui zui nghal a. Kan damdawiin ah hi chuan kan lut ngun mawlh mawlh thin bawk a hna thawk te pawh engmah hrilh ngai lo in an che vat vat thin reng a.









Kan damdawiin nei tu hi ka pa thian tha tak a nih avang in kei pawh min hrethiam thin ka tih tawh kha. Kan cabin lam pan in kan phei a. Khum a Nautei mut in doctor in check vek tawh in hlauh thawn awm a awm tawh lo ti mahse kei mah ngeiin ka en lo chuan ka rilru a nuam leh dawn miau lo a. Ka mamawh tur ang ho nurse bulah sawiin Nautei chu ka check nawn leh vek a.









Engkim a tha vek ang chuan lang mahse a mah hrim hrim a zawiin damdawiin kan chhuah san atang khan a la tawng leh miah lo, kei tak ngial pawh min ko tawh miah lo chuan ka awm a ti nuam lo. Rei vak lo hnuah Babyi te pawh an haw a, an unau in an ni bawk a, scooty an nei bawk nen thlah ka tum ta lo.









Eng emaw ri deuh khat khat vang chuan ka hawi chhuak a. Nautei khum a lo thu chhuak in a kawr hak chu a pawt deuh nawk nawk chu ka pan vut a. Rei lo te ka lo chhing ve zawk a nih hmel.









" Eng thil nge i tih? " Ti sup in a kawr a pawt vak lai chu ka vuan bet nghal hmuk a. A thil tih tur a ti thei lo chu ning zet hian a kawr chu a thlah hnak a. Thawk la halh in a in sut zui nghal faih.









" Naute! " Ti sup a a hma zawn a ka thingthi thla ruai ruai chu a mit chhing sawk in a biangah mittui bawk a rawn luang leh a nih chu.









" Ka phelh thei lo ! Ka bei ngial a mahse ka phelh thei lo. Ka taksa a ti sa hal vek a ka hak chuan ka muhil thei bawk si lo! " Tap aw tiau hian a rawn ti chhuak vak a. A sawi zawh rual in a thei ang a na chuan a kawr hak chu a pawt leh nghal hlak. Vanlalthinchhetei kha a ni miau a. Chuan ka bulah chiah hian a thin hi a teuh hlar thin, a pang chang vang in!









" Khawi... Kei man ! " Ti sup in a kut chu a mal chungah ka dah sak a, a thawmhnaw hak ho chu phelh sak in kawr bah dum sin zet leh a kekawr chhan a a hak kekawrbul dum a taksa phuar vek nen chauh chuan a awm a. A taksa a ban deuh chap avang chuan zanlai a in bual a tan a tih chi si lo a, towel ti huh in a taksa chu ka hruk sak nghal zat bawk.









" Na i neih chuan zep miah loh tur tih i hriat kha, i mittui rawn chhuah reng chhan kha ka hriat a ngai a nia. " Damdawiin kawr ka hak tir zo chu a khum sirah thu in ka ti sup. Tap chhuak duh si lo a a in sut reng a vang in a hnar leh beng a sen hlar a, a mit pawh a bui lak tawh. Hetia a awm reng chuan a nat zual ka hlau bawk.












" Engmah a na tawh lo, ka nu ka ngai thut a lawm . " A rawn ti thawp sap chu awi lo zet in ka melh run. Mahse engmah dang a sawi belh leh tawh lo chu thaw chhuak hawk a ka thut dan siam rem in Nautei taksa dai raih chu dim zet in ka mal chungah ka pawt sawn a. Ka awm zawnah tawm kak in a taksa che ak chuan thawk a rawn la ve halh.









" Naktuk zingah kan be dawn a nia! Muhil phawt la! " Ti sup in ka hmuiin a chalah ka nawr vang vang a. Hmanni deuh a tang khan a nun ram a nguai in ka hre deuh a mahse engmah dik lo a awm lo a tih avang in ka ngaih em chu a tha lo lem lo. Mahse vawin a awm dan atang erawh in natna dang in a tlak buak leh dawn a nih ka ring rum rum . Chu erawh thleng lo hram se.



*


*



" Morning! Nizan chu naute lian chi ka pawm zan khua a ka taksa a na deuh thum in ka hria! " Khum a thu chung a min en kar tu chu melh in ka ti sup a. A ni erawh chuan ka kut a syringe chiah a melh thung. Nizanah a khua a sik deuh reng a, mut mu ka tuah meuh lo zingkarah ka nu te ka bia a kar leh hi Nautei birthday a ni tawh bawk nen vawinah ka nu leh pa, leh ka pi pawh an pathum in rawn chhuk an tum a. Ka nu erawh Nautei damdawiin a awm leh tih a hria a a awm mai mai thei tawh lo tih ka pa in a rawn sawi tel hram.









College a luh ni kha chu lo chhuk lo tur in ka be hmin thei hram a, tun tum erawh Nautei meuh in tap chung in ka nu a ngaih thu a sawi miau a. Rawn chhuk ngei se kei pawn ka duh.









" Vawi engzat nge min chiu dawn? " A rawn ti sap chu min hmu thei lo bawk a ka then suk. Vawi engzat nge hriau lian tak tak a jection a tawh tawh ka chhiar seng lo mahse syringe a hmuh a piang in ngaiah a nei thei lo chu a ni ber. Thisen lak phei chu a hlau lutuk tlat thi suk a neih avang hian. Mahse loh theih loh na hi a nawr ve zawk a.









" I sual chuan vawi hnih! " Ka ti sup chu min rawn melh chho kiau a , nuih te pawh a ti za zawk.









" A nih ka fel in... " A rawn ti sap chu ka khi suk.









" Vawi hnih tho! " Ka lu thle buk a ka ti sup chu ner nang in a hawi sawn hmak.









" Ka nu te an rawn chhuk dawn a, tunah an rawn chhuah vel tawh ka ring! " Syringe a ban a ka vih luh rual a ka ti sup chu mit a chhing sawk. Kei pawh ka tet lai a ka dam loh chuan ka nu kher ka ti ngat thin kha a nia. Nautei pawh hian a rawn ching ve chiah.









" Ti nge i sawi vat lo . " Min melh ha a a rawn ti chu ka ner suk.









" I tho chiah a ka hrilh nghal che. Chuan thisen ka la dawn a nia aw! " Ka ti nghal sup chu in hum ruh nghal vak in mit a chhing nghal chawt chawt a, ka nui leh suk. A khawsa zia ah hi chuan damloh hi a tan a ruat a ni tlat lo.









" In awm maw? Helai pawh hi in luah lum hnen lutuk a in in ang maiin ka ngai tawh. " Cabin kawngka rawn kik a rawn ti tu chu ka nuih suk.









" Chawhnu lamah i thu dawn chauh emaw tia! " Ti sup in Rinzuala chu ka nuih a, nizanah Angeli damloh thu ka hrilh avang in a rawn kal hma thu in min chhang a. Kei damlo ka en a hun tawh avang in Angeli lo awm pui rih tur in ka ti a. A hnial lo viau bawk. Ka nu leh pa pawh tlai lamah chuan an rawn lan ka ring.









Damdawiin corridor a kal chung chuan Babyi ka call a, ka va be thut chu mak a lo ti ngang bawk. Nautei hmu tur in tlai lamah rawn kal ve a tum thu a sawi chuan Nautei a hmuh hma a a fal a min hmu tur in ka ti nghal sup a, Nautei mizia dang lam chhan hi ka hriat ngei chu a ngai.




*




" E... Reuben i tih tur i zo tawh a mi? " Ka damlo en tur ka en zo Nautei cabin a ka lut chu ka nu in min lo be nghal vat a. Lu bu nghut in ka pen lut ve nghal chu ka nu in min be zui lang lang. Phone a a rawn hlau thawng viau nan a rin aia Nautei a rawn hmu tha chu a lawm thu leh a hahdam huai thu min hrilh siam siam bawk.









Ka pa pawh a lo thu ve run a. Nautei pawh zing lam ai chuan hmuh a nuam tawh zawk tih ka hre nghal. Ka nu leh pa an rawn thlen tawh vang a ni mahna. Khum chung ah Nautei chu thu in a sir chair ah chuan Sir Rema kha a thu ve bawk a. Cabin ka lut tur min rawn en bak min melh leh tawh lo hrim hrim chu ka lawm lo lek lek.









Ka nu leh pa te nen eng eng emaw kan sawi a. Nautei chung chang te pawh , a awm dan vel avang a ka hlauh thawn ruk avang in test neuh neuh ka neih tir a, result a chhuak hma chu damdawiin ah la awm tur in ka duh thu ka sawi chuan ka nu leh pa pawn min pawm pui ve mai.









A khat tawk in Nautei te lam ka melh leh vung vung thin, Sir Rema nen chuan an in nel hmel in midang a biak ngai lo ang tak in a nui reng a, nimin damdawiin atang a a rawn harh atang khan a nui ka la hmu miah lo bawk nen, an han in thut hnaih deuh chang te chuan ka taksa hi a lo tang deuh tung zel bawk.









Ka nu in in lamah ka pa nen let a va hah chawl ve tur in leh zan in chu Angeli a riah pui tur thu a sawi chuan ka hnial nghal vat.









" Reuben I chau lutuk ang. I nu nen kan rawn thleng ve tawh a, Angeli chu kan buai pui chhawk ang che. Hna nen i kawp rei tawh e mai, hah dam ve tawh rawh! " A rawn ti dam ve dup.









" A tha lawm. Ka va haw a nga mahse zan chu ka rawn riah chhawk ang che. In zin in chau zawk ang khaw lum nen. In lamah ka pi in i tel lo a zan khat hman pawh a hreh leh dawn tih ka hre bawk a! " Nui deuh suk in ka ti let a.









" I nu hi chu a tu a mai pawh hian kan in chuh ti tih vek mai a nih hi! A awm lo ang tih hi a hlauhawm a nia, ka tan hlei hlei hian! " Ka pa in a rawn ti nawn ve sup chu ka nu lai hmel en in ka pa nen kan nui chhuak hawk a. Kum upa lamah pawh ka pa hi chuan ka nu chhawm chhaih kual hi a la sim thei lo.









In lamah ka let a, ka pa erawh nakin deuh ah a rawn let tur thu a sawi thung. Nautei erawh an la hlim dun viau. Chuan hman zan kan in kawt a Sir Rema leh Nautei ka hmuh dun dan avang khan Sir Rema hi ka ngai na ta der lo bawk. Kan gate bulah khan rei tak chhung Nautei kut vuan in a din pui lai ka hmuh khan in atang a chhuak a Nautei va hruai mai lo tur in ka in sum hram hram kha a nia. Zingah Nautei phone atang an in text na ka hmuh leh ngat phei kha chu ni leng in ka mood a chhe vek nghe nghe. Ka duh ai a Nautei a hnaih vang in tul lo zet in ka ngainat loh phah a ni ber.










__________________________________________________









* ANGEL LALRUATPUII POV *









" Week I hmang nasa lutuk a I taksa in a zo lo a ni maw? " U Rinzuala chuan ka sir a thutnaah thu chung chuan a rawn ti a za lo te in ka nui sak. Tunah rih chuan inhnial a, in fiam kual vel tur in tha ka nei thlawt lo. Ka ngaihtuahna hian min hmet chau ngawih ngawih.









* FLASH BACK *









" Heii.... Kal i la. " Ka thutna bulah Kimkimi rawn ding in a bag ak sa thlap in a rawn ti chu thaw hak in ka bag ziper chu ka zip ve nghal.









" Khawnge in kal dawn? Ka lo kal pui dawn che mi? " Babyin Kimkimi melh deuh hrak a a ti chu nui lui sak in lu la thing mat mat. Ji pawn a earphone la thla meuh in min lo melh ve bawk. Ka thian te hian Kimkimi nen kan in mil loh zia chu la rei lo viau mahse an hre hneh tawh viau. College week kan hman chhung zawk pawh khan kan in hmuh emaw hnaih tawh hi chuan kan thu hi a in kalh nghal zel miau.









Class khat ah kan awm miau a in hmuh loh theih lah a ni lo. White house ah kan la awm ho vek zui a. A hma chuan kei pawn tawng kher nei deuh deuh in ka tawng khum ve thin tih ka pha lo mahse ka dang lam tawh a tunah chuan a zawl dawh zawkah ka tang ta rih a. Mahse keiin kan in kar siam that tum viau mah i la pakhat zawk in a duh ve miau loh chuan a harsa lutuk.









Mahse ka rilru ka siam fel tawh a, ka theih tawp in Kimkimi nen kan in kar siam that ka tum ang a. Ka theih ang zawng zawng in hma ka la bawk ang tiin. Chu tah a theih ngang loh a nih chuan ka u lakah in thiam loh na ka nei lo nan. Chuvang chuan vawin hian ka u leh ka pa DNA ka test tir result chhuak tur kan lam dawn.









" Khawi maw ka lo en? " Ka kut a lehkha ka melh tlawk tlawk chu min pawh thlak sak rual in Kimkimin a rawn ti chu ka phu zawk. Thu tam tak chhiar tur pawh a awm lo mahse a in ziak chhun ho erawh ka chhiar nawn reng a, ka chhiar nawn a piang khan min thawn dan a ngai reng thung.









" Ti hian dawt sawi emaw fiamthu thawh ah min la ngai tho em? " Kimkimin nuam tih hmel zet a a rawn ti kha deuh fak chu ka in seh ruh nghal nghek. Kimkimi lam ai chuan engtin nge ka u hi ka pa fapa a nih loh theih? An mahni hmu tu tawh phawt hi chu pafa in ang tak an ni thu an sawi ziah a. Engtin nge pafa an nih loh theih zawk? Zawhna chi hrang hrang ka rilru ah a rawn lut nawk a mahse a chhanna chu Kimkimi lehkha ken hian a chhang nghal vek si.









" Lehkha kha mi pe rawh! " Ti sap in Kimkimi lam chu ka hawi a , a hma zawnah ka kut ka lek nghal bawk. Kei hian eng thil tul lo nge ka tih hi? Kei mah leh kei mah ka in ti na chawp mai mai a ni. Tunah eng thil nge ka tih ang, ka u hi ka pa fapa a ni ve lo tih ka fiah sak ringawt avang hian eng hlawkna nge ka neih?









" Kha.... A copy ka va la leh mai ang. " Ka kut a report rawn dah pah a awl sam zet a a rawn ti deuh kher chu ka melh nghek a. A mit mengah chuan nuam a ti tih bak ka hmu lo.









" Ka u lakah hian tlak tlum i tum min ti thin a ti raw. Mahse nang zawk hi tlak tlum tum zawk chu i ni. Nang leh kei kan dang lamna chu chiang tak in i hre tawh bawk a. I rilru chu a na viau ang tih ka hriat thiam pui che. Mahse i hlawkpui zia kha ngaihtuah la, kum kha ti chen a lo ngaigsakna zawng zawng te kha.









Kei hian ka huat em emna chhan che i hre duh em? Ka u nen in zawmna nei hauh lo in ka u in kei ai pawh a a ngaihsak thin vang ringawt che pawh khan ka hua che. He thil hi ka u hian a la hre lo tih a awm danah hian a chiang reng a. I nu leh pa te erawh in an hria em tih ka sawi thei bik lo.









He lehkha hi ka u ka hmuh a nih chuan a rilru pawh a dang hlawk in ka ring. Chuan nang nen a in in zawmna pawh a ngai ang chuan a tha reng lo mai thei. Huiisss..... Nang nen a ka u kan lo in tawm lo hi ka lawm tiin a tawp ka khar mai ang. " Nui hak a tiin min hnung chhawn a a kal chu ka en zui ngawt ngawt a. Kimkimi awm dan chu a thaw veng tak zet a kei erawh sawi ve tur pakhat mah ka hre lo. Ka ngawng chhuih ringawt in ka hria.









" Naute eng thil nge i ngaihtuah a? Ka rawn luh lai pawh hre lo tur khawp in. " Ka khum tlang a ka thu chu ka u tawng vang chuan ka phu zawk a. Ka hawi chhuah rual in ka u in chik zet in min lo melh run bawk. Ti pawh khian ka pa chiah chiah a ang a mahse engtin nge a nih loh thei.









" I tha em? " A rawn ti leh sup chu nui lui sak in lu ka bu nghat. A awm danah chuan vawinah chawhnu class ka kal lo tih a hre lo a ang viau. Eng tin nge Kimkimi nen kan in then hnu khan in lam ka pan pawh ka hre teh nuai lo. Ka u ka hmuh takah chuan ka rilru chawmawlh vek kha a rawn fiah kuar a. Hlauh thawn na nasa lutuk in min rawn luh chilh a. Kimkimi sawi ang khan ka u hian thisen zawm kan nih loh chuan min kal san duh mai a ngem? A hre ve a nih chuan kan chhungkua atang hian a in la hrang a ngem? A mah hringtu a nu a ngainat lo zia chu hre tho mah i la ka pa fapa a ni lo tih a hriat a, thisen in zawmna kan nei lo tih a hriat chuan loh thei loh in a nu dik tak leh Kimkimi te bulah min kal san a ngem?









Report ka hmuh khan zawhna tam tak ka nei a, tunah ka u ka hmu a a hma ai mah khan zawhna ka ngah in tunah chuan hlauh thawnna nen a in kawp tawh bawk.









" Ka ril a tam. I lo haw har tawh lutuk a ka ngei tlat che! " Melh deuh ram chuan ka ti a, nui suk in a va in ti fai a nga a hman nghal thu sawiin a kal sawn chu ka melh tlawk tlawk ringawt. Dik tak chuan chhe te mah in ka ril a tam lo. Engmah ka u hian a hre lo a, Kimkimi nu khan ka pa lakah mipa dang fa kha a fa a ti a ni mahna, ka pian ve hma thil a ni a engmah hriat ka nei ve bawk lo.









Chuvang chuan ka zep tlat a nih chuan engkim a pangai vek thei tho a lawm. Mahse Kimkimin engkim a hre ve vek. " Kimkimi " Phun chhuak sap in ka phone ka dap nghal rawk rawk a. Kimkimi phone no pawh nei lo khan ka contact ah ka rilru hman hmawh lutuk in ka zawng kual nghek a nih chu. Ka hriat chhuah meuh chuan a in ti lutuk in ka nui hak ringawt.









Class group ah a awm ve tih ka hriat chian avang chuan whatsApp ah lut in ka zawng leh nghal a. Kan class first semester kan tam avang in zawn lah chu a harh phian. Ka phone ka bih mawlh mawlh mai chuan tu emaw hian a rawn pawt hlawk chu ka hawi sawn deuh dawr a. Ka bulah ka u shower nei zo tih hriat zet in a lo ding khawng luah chu ka hmu nghal.









" I ril a tam a ni lawm ni? Ka koh pawh hre lo khawp in phone i lo khawih leh daih a. " Lawm vak lo to hriat zet a a rawn ti hmuk chu chhan mai dan tur ka hriat loh avang in ka ngawi ta tawp.









Ka phone rawn ri thut chu ka u in a ken miau avang in a melh nghal run a. Rang lutuk in a in rin hma a lak sak ve ka tum chu ka hlawh chham chiang ngei mai. Sang zetah a ban a phar nghal vuah a nih chu!









" Hello! " Ka phone chu a beng bulah lek vut in a ti sup chu ka melh ha a. Dah ta mai lo chuan a be zui zel leh nghal. Ka room atang a pen chhuak pawk pawk in a bia chu a hnungah ka zui dat dat a, a rawn be tu hming a lam loh avang in Tu nge tih erawh ka hre thei lo.









" Enge ka phone a nia i chhan daih a! " Choka kan luh rual a ka phone min rawn pe chu ka ti fak.









" Engtik lai in nge Kimkimi nen phone a in be tur khawp a in in kawm ngaih? " A ti sup chu ka ding chawt. Chik zet a min melh ngur chung chuan dawhkan a fanghma in chhawp chu a ban nghal vut.









" Ihh.... Week vel a tang khan tlem in kan in ngeih ve deuh . Kan in kawm pawh a ni chiah lo kan in be ve mai mai. A no pawh ka save loh kha! " Ka ti nghal tawng chu mit ti zim sun in min melh a. Dawt sawi e ti lo chuan ka confi viau leh nghal. Mahse confi lo i la chuan zawhna a ngah dawn lutuk tlat. Vawin chung chang engmah ka u hian a hriat ka duh lo. Ka u ni tur in ka duh a, kan thisen a thu hmun leh thu hmun loh chu engah mah ka ngai lo.



*


*


" Heii.... Enge i an tak zel? " Week closing kan hmang a, bathroom ah kan awm a, Babyi chu a chhungah la awm in kei chu darthlalang ah ka lo in en vel mai mai a, ka bulah Kimkimi chu rawn ding in a rawn ti a, kha mi ni atang khan kan in be tawh miah lo. Ka u a hrilh ve ka ring deuh a mahse engmah a la sawi lo a nih chu.









" Kar leh kha i birthday a ni ti raw! Present tur tha deuh ka hual lawk tawh a, kan class ho i sawm tawp dawn tih te ka lo hria a, i chhungte hi chuan an duat ngawt mai che! " Nui sak in a rawn ti a, nui mahse min ti el tih ka hre chiang lutuk tlat.









" Englo.... Thil kha i zep a vang in ka lawm e. " Thawk la halh in ka ti sap chu a ner sak.









" Lawm duh suh. Zep hlen ka tum lo, sawi hun tak ka la nghak zawk a lawm. Chuan I birthday ni hi a fuh dawn riau in ka hria. " In chei tha mawlh mawlh chuan a rawn ti a, sawi tur pawh ka hre lo. Ka thiam loh vek a ni tih bak. Kimkimi thu sawi vang mai mai a kha thil ka lo tih kha ka in chhir a, tunlai phei chu ka u ka hlat phah bawk. A bul a ka awm ngun a nih chuan min hre chiang ber Tu a ni miau a, eng emaw rilru kap tu ka nei tih a hre vat dawn miau.









" Ka zo! Chho ang. " Babyi chuan a rawn ti a. Ka ngaihtuah na atang a ka harh chhuah meuh chuan Kimkimi te thian ho chu hmuh tur an awm tawh lo. Phur vak lo chuan hall lamah kan chho leh a. Jin kan thutna a lo hauh a. Chawhma lam khan professor te an haw vek tawh avang in boruak pawh a hot chho tan viau a. A bik in hall hnung lam a thu ho phei chu an tawng pawng sa hawk ni ber in ka hria. Chung zingah chuan Kimkimi te thian ho pawh an tel bawk.









Music ri dup dup leh mi then khat lap bu suau suau chu kan thutna atang in kan en reng a. Babyi a hot ve ber in hla a lo sak pui a. Ji phei chu a thutnaah thu pil hmak in earphone a vuah hmak thung. Kimkimi te awmna lam ka melh chhoh a piang a min hmusit zet a min lo nuih let sak thin chuan ka thawk lak a ti sak talh a. Boruak ka zo lo deuh nge ka thin phu chu a rawn rang deuh dawt dawt a.











A tir chuan tui in a a reh mai ka ring a mahse ka awm a rawn hnawh up up bakah chem hmawr zum zet a kher ang mai hian a rawn thip vin deuh tur vang chuan ka thlan in min bual tan a. Babyin hall atang a min chhuah pui lai te chuan ka awm zawn hi a na ngawih ngawih a, thawk pawh ka la ngam lo a ni ber.









Mahse nidang ang lo tak in ka harhfim vek a. Midang ko a taxi a damdawiin kan pan lai atang chiah khan ka thawk a buai bawk.









* END of FLASHBACK *









" Angel i nu te an lo thleng a nia! " U Rinzuala tawng avang chuan mit ka meng riai riai a, ka nu leh pa hmel ka hmu chu ka nui ta ver ver. U Rinzuala chu an chibai luam a. U Rinzuala lah chuan ka mutthilh San char char thu a la sawi zui. Dik tak chuan ka muhil ni lo in tumah ka biak peih loh vang a mit chhing a mu mai mai la ni zawk.









Tlai lamah kan thian ten min rawn kan a,class ban ve leh in kan hun a zawh hman hlau in an rawn kal thu an sawi chuan ka mui hak hak. Thian neih hlut zia ka hriat belh a, Babyi leh Ji hi ka tan chuan an tawk chiah ka ti ve hmiah. Rei kan la in hre lo mahse ka ngaina dun tak zet. Ka rin loh deuh in Sir Rema a rawn lang ve hlawl chu mak ka ti viau.









Kan in be ve zauh zauh a phone ah, call lam ni lo text zawk in. Mahse in ngai zawng lam erawh chuan a ni lem lo. Chuvang chuan ka nel ve sawt em em a. Mahse mawi lo khawp un ka nel bik lo. Ka tet te atang in ka pa min zirtir dan a ni lo bawk. Thil chu a hmun leh a hun a awm a ti thin a. Kei pawn college ah chuan kan zirtirtu ang in zah tak in ka bia a, college campus chhungah chuan kan im be thin a kan in nel ve hle tih pawh hriat loh khawp kan ni.









" Duh tawk tawh rawh damlo i nih kha! " Ka phone min rawn lak sak a rawn ti hmuk tu chu ka melh ha.









" Tih tur a awm chuang hlei nem. " Ka ti let nghal zat chu a ban a san a melh nghal vut.









" Mu tawh rawh, a tlai tawh! " A rawn ti leh hmuk a nih chu.









" A la chhuak tawp si lo! " Ka hriat tawk lek in ka phun emaw ka tia Vanalalbengvarbera hian a lo hre leh vek.









" A nih chuan thil kan sawi dun ang. Ka chungah i lawm lo a mi? " A rawn ti sup chu ngawi reng in lu ka thing nak.









" A nih chuan engvang in nge tiang hian i awm a? Hmanniah Kimkimi nen in chhuak dun tih ka hria a, enge sawi belh tur i neih? " A rawn ti leh hmuk chu ka meng buai nak. Mahse rei lo te chhung chiah.









" Kan duh duh kan ti ve ang chu! Nang pawh i thil tih ka zawt ka zawt bik lo che. U Opi nen ka ngaihthat nan in kawp ang deuh in i lang a mahse hmeichhe dang i chhuah pui tih te pawh ka hre ve bawk. " Ka ti let ve tan tan chu a nui ro hawk a nih chu.








" Fa nei tawh leh nghal! " Ka ti leh sap . U Opin min hrilh vek sia, ka sawi chhuak duh lo mai pawh a.









" Chu chu i buai vena tur a ni ve lo. Chuan Sir Rema nen in in kar hi..... Hnaih chin tawk hria ang che! I zirtirtu a ni a, chu tiang bak chu in in karah awm tir suh. I thian ni tur chuan a upa tawh mah mah! " Ti hmuk in room a chhuah san chu ka melh mawl tawp.









" Phakar thei si! Suala " Ti hlak in ka thu ter at ringawt. A chung chang a sawi tha ve duh ngai tawp si lo, ka chung chang ve hi chu a hriat loh tur a ka ngaih pawh hi a lo hre vek bik ziah. Tih tur awm tawh hek lo ka phone lah ka u in a keng chhuak daih bawk nen ka mu deuh than a. Nichin kha chuan thinrim mah i la tunah erawh ka nui sak sak reng thung.









Kimkimi thu sawi vel vang khan ka u lakah ka in thlahrung tlat a ka be tha ngam lo kha a nia. Mahse tun lawk khan ka an khum leh chiam a, kha tia tih kha nuam ka ti bawk. Kan in pawh hmel bik. Mahse ka birthday a lo thlen hun ah erawh .... Ngaihtuah ngam lo chuan thawk ka la hak.









Test neuh neuh result a chhuak a ka tha vek chu ka chhungte mai bakah kei mah pawh hi ka lawm ve ngawih ngawih. College ka kal chin hi ka dam tha ve sawt riau hian ka in hre tlat a mahse ka u doctor a hian tha min ti ve vak lo a niang ka damdawi eitur a pun leh a. Mahse ka in ngaih danah chuan ka tha a ni tawp.









Ka chhungte bulah ka la nawm sam lo chhuan lam in ka birthday kan lawm tur kha thulh ka dil a, an phal thlap bawk. Ka hriselna ka chhuan lam ber hi an ngai pawimawh tih ka hre ve miau a. Ka chhungril tak erawh chuan dawi zep ka in ti tak zet. Kimkimi thil sawi ka hlauh vang a ni miau.









Kan chhungkaw bil chauh in kan lawm a, ka thiante ti tur ka neih ve tawh miau avang in an ni chu ka hmaih thei lo. Ka pu te chhung leh Faith-i te unau. Chuan U Rinzuala pawh tiam in. Mi tam tak sawm a rilru thla phang a awm ai chuan he tiang a hun hman hi a nuam zawk.









" Ka u chu a van rei tak! " Ti hlak in common room a tha lai ho kan thu a kan ti ti laih laih chu ka u ngaihven tur in in chung lam ka pan a. Ka dam loh chhung khan note leh thil pawimawh vel an lo la nual a Babyi note ho copy tur in ka hawh sak a. Ka u room ah a chho tho a a lo chhuk pah a rawn la tur a ka ti kha a hmu lo nge a rawn chhuk har riau a. Baby i ten haw an duh tawh bawk nen.









" U! " Ka room ka lut chu ka u pawh a lo a ngei a. Ka computer hma a chair ah chuan lo thu kun ngur in a kutah lehkha a keng bawk! A lehkha ken ka hmuh rual in rang zet in a lam ka pan nghal hlak hlak a. A lehkha ken ka lak sak tu chu a keng sawn hmuk.









" Khawi.... Ka lehkha kha min pe rawh! " Ti leh lak sak tur a ban nawn leh ka rual a mahse lungbang sut tlang tum ang vel a ni.









" U..! Ka thil kha min pe rawh ka tih chu! " Rilru na leh hlau thawn na aw in pawl nawk chuan ka ti that.









" I thil maw? Hrep che chuan hei hi i ta ni lo in ka ta tur a ni zawk lo maw? " A rawn ti chhuak hrawk chu ka khawng awt a ni ber. A thinrim chu ka hmu ve thin mahse tun ang em em a, mit meng huatna leh natna in pawlh nuk hi ka la hmu ngai lo a, chutiang mit meng chuan vawi khat mah min la eng ngai lo. Chu chuan min ti na tak zet.









" U... "









" Hrep chuan! " A rawn ti leh hrawk a chu mi rual in a lehkha ken chu ka dinna bulah a rawn theh thla nawk a. Phu chiam in ka tawlh hnung dawr chu thinrim tih hriat zet a phun hluk in min chhuah san zui hmuk a. Ka room kawngka in khar ri chawrh ka hriat rual in chhuatah ka thu thla nghal hnawk.



Link:
BBcode:
HTML:
Hide post links
Show post links

ADVERTISEMENT (A hnuai a milem hi a nia hmeh zeuh tur chu)