THLAMUANZUALA Chapter-14

Episode kal lai dah luhna

Moderator: writers

Hmuakteii Fanai
Posts: 95
Joined: May 18th, 2020, 7:27 pm

THLAMUANZUALA Chapter-14

Unread post by Hmuakteii Fanai » August 4th, 2020, 8:57 pm

THLAMUANZUALA








Chapter-14








THUNDER  THLAMUANZUALA  POV








"Min kalsan suh" mipa ka nihna anga ka chapona zawng zawng dah ṭhain min hlat zawnga ke pen tum mek hmeichhia chu ka ngen anih chu. Hetiang khawp hian ka inphahhniam thei ang tih ka hre lo. Ka sumdawnna kawngah ka rorum em em a mahse hmeichhe pakhat ve mai hmaah ka tlawm leh em em thung si.






"Ka tihpalh" ti sepin hmalam melh ngar chungin a pen chhuak a, chuti chung pawn kala um zui fan.






Pawna Leumas ding reng ka hmuh rualin ka ding nghal dawt. Chuan hepa hi min kalsan a duh chhan anih ka ring nghet hmak bawk.






Engmah hre lo leka an pahniha sawisak chaknain ka thisen zungzam a fan ngut ngut chu ka thunun theih piahlam a ni.






Engtik laiin nge an dindunna ka thlen phei hman pawh ka hre lo. Leumas kawr nghawng a ṭhamin ka inhrosa khur khur hi a ni ber. Ka kawchhung thinrimna avanga sa pup pup hi engti kawng mahin ka bengdai thei dawn lo tih ka hre chiang hle.






A kawr nghawng ka ṭhamna aphihthlak hlawk rualin ka kut ka hum ruh ngat ngat chu a thlawk nghal fua.






Nui suka a hnar a thi luang nguai nguai tuai zauhin a kuttum ka dawng let ve nghal zat a. Ka ka chhung a al nghal puat.






Ka kut ka lek leh chiah tihin lovie kan inkarah a rawn ding nghal zat chu rum ulin ka melh zui a.






"Duh tawk rawh" hlauhthawm hmel lutukin ati chhuak nawk nawk chu pawisak neih loh hmel fe in ka nui chhuak nghal hawk. Chal ti chuar nanga melh ngurin ka hmui thi ka tuai zui nghal zat.






Ka kut lehlama Leumas ka ṭhamna ka thlah a. Ka tawlh hnung nghal dat. Tuna ka insum lo anihchuan helai hmunah hian ruang pahnih a chhuak mai ang.







"Hlim ang che" ngawi datin ka sam ka tuai chho puata. "Chuan ka fa kha i hrin ruala chhuhsak nghal i ni bawk ang, tun aṭanga hian lo inbuatsaih lawk ang che" ti kha fakin amitah tak ka melh ngur.






A mitmeng hlauhthawmna kha rilru natna ni awm takin a inthlak hlawk.






Engvangin nge tuna takah a rilru anat thar leh vel ang. Keiaiin mipa dang thlang zawkin min kalsan a tum a, chuvangin a rilru ana thei lo hulhual. Ka ngaihtuahna avangin ka nui ro hawk.






"Helai hmun aṭang hian chhuak rawh u" ka kuta gate lam kawh pahin ka ti khur khur a. Ka inhersan zui hmak bawk.






Inchhungah tawt ṭunin ka penlut a. Couch lam pan phei pawk pawkin ka tlawh her nghal sawk. Ka thin tawt lutuk bengdaih dan ka hre lo lutuk chu ka inchhung bungruaah ka ṭuan ta vak.






Choka lama lut pheiin fridge ka hawng zui zata tui vawt la chhuakin ka in nghal pawp pawp. Ka kawchhung sa huam huam atidai thei chuang der lo lehnghal.





Ka room a ka zu dah phawrhin glass ah ka thlichhuak a ka thawk khat nghal pawp. Chhum lo chat lova ka inchung pawn kha mi tenawm pahnih khan ka thluak bur hi an chhuahsan thei chuang lo. Ka in nasat poh leh ka thinrimna leh rilru natna azual tulh tulh bawk.






Tlawm ka inti a, hmeichhia min kalsan duhtu khatianga chelhbeh tum khan ka khawsa ang tih ka ring pha ngai lo, mahse a thleng miau.






Hmeichhia min hnaih chak an awm fur chung hian ka lovie chauh khaka thlan awm chhun a ni a. Hmeichhe danga zuang lawr chi ka nih loh avangin ka tan theihnghilh mai mai a harsa dawn. Chuan midangah rilru nghet taka ka pek theih tawh ka ring lo bur bawk.






...............

"Bawiha kha hmeichhe laktlakloh zet pakhat vanga i indawmkun reng hi hmuh hrehawm kava ti tawh tak em." Rilru hah hmel zetin ka nu in ati hliai a. Ni e, hetianga mahni fapate mumal lova awm reng hmuh chu tu nu tan pawh a hreawm vek ang tih ka chiang. Keiaia mipa dang thlang zawktu hmeichhia vangin ka buai zo vek chu anih hi.






"Ka nu kha hmeichhia kha ka hmangaih asin, chuan i duh i hmu tawh min kalsan tawh" beidawng zetin ka ti sup a, ka thaw hawk bawk. Hmeichhe pakhat vangin hetiang hian ka awm ka ring pha ngai lo mahse ka rinphak loh thil a thleng zut zut chu anih si hi.








Ka pa erawhin kara fa hial a awm tawh dawn vangin inṭhen a rem tilo bur. Lovie pawh hun thawl pe hret turin min ti reng bawk a. A rilru te hahdam se a zia ve mai ang, amah rinchhiatna lam nei miah lovin ala ti zui cheu anih chu.







Mahse a rei deuh tak hnu hian ka nu in a hmin ve tepawh animahna engmah a sawi tawh ngailem lo. Hmeichhia hian thil hi anlo ti thei khawp. An thuhnuaiah min dah vek thei chu anih hi.







"Engtik lai pawha i ngaih theih loh hmeichhia kha ka hmangaih" beidawng tih ngaihna hre lo lutukin couch nghenchhan ka tukhumin ka tauh nghal dawt.







"Hmangaih" ati zui hliai a.







"I duhna kha hmangaihna amaw iti anihkha. A rei anga ila hrethiam thuai mai ang. Chuan khatiang hmeichhia khan i ngaihsakna hi a phu lo" a ti zui hmuar hmuar a. Za vak lovin ka ṭhen zui suk. Ni e, kha hmeichhia khan ka hmangaihna hi a phu miah lo.






"Nupui"






"Kha thil kha sawichhuak tei vet suh" ti hrawkin ka zu inna glass ka vawm keh nghal chhuai. Ka nu meng phar deuh awk pawh chu ngaihsak zui peih lovin washroom lamah ka luh bosan nghal hmak. Nupui neih lam a sawi rik tawh phawt chuan ka thin arim nghal ṭun tawh ṭhin.







Lovie min kalsan ni aṭangin nupui tih thumal ringawt pawh hi vawi engzah nge ka beng hriatah a sawilan tawh ang. Ka uksak duh ngai lo mahse a sawi zing tawh mah mah. Remruatfeli vang hian nupui nei tura min nawrtu ka nu ngei pawh ka hrawk hial anihchu.







Keiaia mipa dang a thlan zawk thu min hrilhin min kalsan a. Ka ngai lo tih ka sawi anihchuan dawt chiang takin ka sawi tihna a ni ang.







Ka ngai a, a hmel hmuh ka chak bawk. Ka bula thlamuang zeta a muhil thawri sak sak kha ngaihthlak leh ka chak bawk. Ka theihtawpa duat ka chak a, mahse keiaiin mipa dang a thlang zawk miau.







Min kalsan ni khan ka mangang viau anihkha. Um zui ka duh a ka umzui ngei bawk, kawta Leumas-a'n a nghak tih ka hmuh khan ka sawithiam lovin a vawikhat nan, a vawikhat nan tak tak ka thinlung ana bawk. Lovie chiah hi ka thinlung zawng zawnga ka hmeichhe duh awm chhun a ni.






Min kalsan ni aṭangin Lovie ngaihtuah loh ni ka nei lo. Chuan keihian ka hmangaih a ni tih ka hriatchhuah phah bawk.







Nitin min rawn pan emaw min rawn biak ka beisei reng ṭhin. Mahse kha hmeichhe luhlul lutuk kha areh zui hmak anihchu. Ka tel lova a awm thei bik lutuk te chu ka haw hlur.






An inbulah amah hmuh tumin zan engzah nge ka din ral pawh hi ka hre seng tawh lo. Ka hmuh apiangin hmelhriat lo ang hmaka min kalpel thei tehi ka na.







A mipa zawk hian ka chapona dahṭhain a duh anga nung tura ka kaltir hmeichhia hi zah pawh sawi lovin ka um zui a. Engtik laipawn a chanchin ka ngaihven reng ṭhin. Khawihmunah nge akal, enge atih ṭhin ka hrefai kelh zel.







Amah ka hmuh apianga Leumas tel ve reng thin hian awm ngaihna hre lovin min siam ṭhin. Mipa dang bula anui hmel ka hmuh hian ka thin arim a, engmah ngaihtuah lova ka chet chhuah mai loh nan ka insum ala ngai zui cheu bawk a. Tunah chuan ka beidawng ve tawh takzet a ni.







Ka tel lova hlim thei, ka awm ve tih pawh hre lo hmeichhia hi ka kaltir tawh ang. Ka nun pangngaia let tura ka beih ngai fe dawn mahse mipa ka ni a ka tum anga ka thei ngei bawk ang. Ka kaltir dawn ka tih vang hian ka theihnghilh hmin ṭhak thei tihna ani chuang lo. Intih buaitir ka duh tawh lo mai zawk.







"Dear, vawiin chu lunch ei chhuak ang" Phone ka pick rualin Lawmi aw tham chhelin a rawn ti zui nghal zat. Nui hawkin ka eichhuahpui tur thu ka hrilh sup a. A au chhuak nghal ṭung.







Ka nu duh angin rilru bet vak lovin Lawmi ka kawpa. Lovie nen tehkhin chang ka ngah ṭhin.







Chhungkaw khawsak pangngai tak an ni a.  A chhelo in a polite bawk. Engtik laipawn ka chhungte lawmna siam athiam em em reng bawk a. Ka nu phei hichuan kei aimah pawn angaihsak zawk amaw tihtur khawpin a mo chei nghal ringawt bawk a.







A bula awm nuam katiin ka hlim ve viau amaw kati chung pawh hian lovie bula ka awm nen tehkhin chi anilo hulhual. Ka thinlunga hmun chang tam ber hmeichhe luhlul leh tihmawh lutuk hi tuman an khum thei chuangin ka ring lo. Mahse theihnghilh ka tum ruh tlat vangin ahma nun mumal lo lutuk kha ka nei tawh ngai lo.







Hmalam ka pan tih Lawmi'n a hriat rualin min vir nghal chuk chuk hi ani ber. Mipa pangngai tan ani ang nula chhelo chu hnar ngawt thu a awm bik lo. Tihian kan inkawp chho chu ani zui mai mahse vawikhat pawh kala tawk lo. Hmeichhe dang khawih chakna ka neilo ni berin ka hria.







Amah zawk in a min nawrlui ngar ngar changlah angah, lovie hre reng chung chuan ka khawih lui thei thlawt lo. Mahse min tih tauh khum ngam chuang lo, ka tan hian a dawhthei viau mai hi mak kati zawk ṭhin. Lovie laka ka dawhtheihna ang chiah kha ani hian anei ni berin ka hria. Keimaha ka inchan chang hian khawngaih chang ka nei fo mai. A niin a zawng zawng min peklaiin keiin hmeichhe pakhat vangin kati ve thei der silo.




................



"Khawia ei nge i duh?" ka malchunga ṭhu chungin ka awm a zutkual zai zai a. Ka zawhna chhan tum lo leka min sawngbawlna chu ka ning ṭan viau bawk.







"Hnathawhna hmun anih hi" ti fakin ka malchung aṭangin ka chawithla a, couch ah ka ṭhutṭhattir nghal zat chu a ner nghal nang nang.







"Khawia ei nge i duh?" Min chhang chuang lo. A ka a chip hmak. Ka khawsak dan avang khan a lungawi zan lo tih ka hria mahse ka ngai pawimawh hran lo. Thlem ngai lova min pan hmasa leh tur chu amah tho hi. Ka lakah rei a lungawi lo ngam lo. Hei tak hi lovie nen an danglamna leh bawk. Ka chunga a lungawi loh emaw a thinrim tawh phawt chuan han thinrim let ve chiam ṭhin mahila keimah bawk hi a thlemtu ka ni ngei ngei ṭhin. A thinrim khan a hrehawm ka tih mai bakah ka awm anuam thei ngai lo kha ania.








Hrep hian! Engvanga tehkhin chiam chiam zel nge ka nih pawh hi ka hre tawh lo ve. Ka thisen zungzam zawng zawngah hian he hmeichhia hi a bet nghet tawh mah mah a ni. Ka hriat miah loh hian kalo tehkhin leh mai ṭhin. Heihi ka duhdan a ni hauh lo, ka in control fe angai bawk ang.







"Anih chuan ei chhuak lo mai ang" ti supin ka ṭhutna aṭangin ka tho chhuak vut a, ka pensawn hmain ka banah a rawn vuan nghal vat. Ka rintawk vel chiah ka lakah a lungawi rei ngam lo ka tih tawh kha.







"Leumas te restaurant-ah kal ila, thil an siam tui mai bakah ahmun kha a hahdamthlak bawk a" ti hliaiin ka nghawngah a kut a rawn suih bet nghal hmiah. Dahthlaksak ka tum tawh lem lo. A hminga inngaizawng hmingpu ve ta chu ka dawh mai angai miau.






"Leumas" ka ti zui sup a. Khapa hmel hmuh kha ka chak hrep lo. Ka ṭhian a ni ṭhin mahse lovie a hnaih ṭhin lutuk vang khan ka ngai thei ta tlat lo. Hmeichhe pakhat vangin ka ṭhian ni ṭhin ka hua anihchu. Mahse Lawmi hnenah hian sawi chhuah kher ka tum lem lo. Ka ngaihtuahna avangin ka nui hawk a. Lawmi'n hriatthiam loh hmel lutuk a min en deuh ha chu ka mit ka siai zauh.







"Hmundang i duh lo ami?"







"No, Leumas te restaurant kha ka duh" pangchang hmel zetin a mit a khap no kual vel chu min kuahna pawh phelhsakin ka ding sawn nghal vut. Lovie min kuahna nise amah zawkin kalsawn duhin min thlah mahse ka phalin ka ring lo. Ka ngaihtuahna vangin ka lu ka thing nghut a. Ka ngaihtuahna, he ka khawvel aṭang hian ka dah bo angai tawh takzet.






"A theih loh" ka ti nghal bur chu min hnial chhunzawm tawh bik lo. Ka aw rik chhuahdan aṭang khan ka pawm loh zia a hrethiam a ni chek ang chu.





..............



REMRUATFELI   POV



Ka dul puar ve ak tawh chuan ka duh aiin chet min ti khawr reuh phian a. Thil tih zung zung ka harsat ṭan riau bawk. Mahse ka thawhna restaurant neitupa hi mifel tak anih tel bawk vang hian min dimdawih a, ka nu ṭhian hlui alo ni leh zel nen min duhsak lutuk tlat. Thawhpui dang te chena min hrethiam lutuk tehi inthlahrun chang ka ngah mai. Min hriatthiam avanga nuamsa taka thawh chu ka tum chuang bik miah lo. Pawisa hlawha chhawr ka nihchuan ka theihtawpa ṭha a thawh hi ka tih tur a ni tih ka hre ve kar.






Ka thawhna restaurant hi a changkang leh ei siam atui theih avang hian pantu angah a chuta kara raipuar ul tawh lo thawk ve hi mak ti a min en zui hu hu tawk lah ka tawng ve nual bawk. Mahse zah a la thei pawh ka ni chiah lo tih ka hria.






Ka nau school fee, ei leh in tur ka thawh chhuah angai tho bawk nen. Chuan ka naute tana ka inkhawl angai bawk a. Ka thla hlawh ve te hi kham dawn loh chang kan ngah ve viau.
Mahse kei ang raipuar che hlei thei lo min chhawr duhtu an awm hi chu ka tan chuan lawmna tawpkhawk hi a ni ringawt. Leumas-a'n a dawra hahdam zawka thawk tur pawn min sawm nasa mahse ka hnial fithla ṭhak. Thlamuanzuala vangin kha chen kha ka tibuai tawh a alakah ka inthlahrunga, chuvanga atibuai lo tur zawnga awm tum hram hram ka ni pakhat bawk.






In sawiselna ka naupai vang hian ka nei nasa. A hma zawng aiin ka taksa a cher a. Ka vung nasa bawk nen ka nuam lo ru ṭun zel. Thlamuanzuala nen kan inkar atawp zui vanga ka tawrhna nen ngai awhtir leh tur chuan ka beih fe angai tawh ang.







In check up turin ka kal zeuh zeuh a, mahse naupai haw chi ka nih hrim hrim vangin hlauhthawn awm a awm loh thuin min lo hrilh ve ziah. Chuti chung chuan vawikhat ka tawnna ni bawk si nen hian kalo hlauthawng leh vak ṭhin.






"Feli private room lama order kha lo va pe ta che" Siamsiami'n eitur rem mawlh mawlh pahin a ti lang lang a. A dinna lam ka pan phei zui vat.






Eitur chawi chungin private room lam ka panna. Vawiin zet chu ka ke vung nasa lutuk hian kal atisak vek thei. Nidangah pawh a vung chu awm tho mahse hetiang em em hian ka awm ngai lo. Ka chawnkual chho zawng zawng nen a pawt mar tlat a, a hrehawm kati ru viau nangin ka sawi chhuak lem chuang lo.







"Nangmaw" private room a Lawmi lo ṭhu mak kati lutuk chu ka ang nghal pham. Amah chauh lehnghalin.






"Heta kan rawn kal hi athiang lo a mi?" Min ei loh hmel zet a ner nawngin ati hmuk a. Ka hmui ka chip zui hmak. Mahse kan atihdanah kalpui chu anei ngei anih hmel. Chupawh chu enge maw ka ngaihtuah a ṭulna le. A duh duh a kalpui thiang.






Chuan helai hmuna a rawn kal pawh hi enge mak kalo tih viau ni. Anni ang mi pangngai chunglam tan techuan an kal fo na tur ani tih ring thiam tur ka ni asin le.







Ka eitur chawi table-ah ka hungthla a, inherin pen mai ka tum tawh chu a thusawi vangin ka ding nghal dat.






"I phu loh thila i in tatlut ngawt ngam hi i huaisen kati tak zet" kha fakin a rawn ti a. Insum hram hram turin ka infuih nghal mawlh mawlh.







"Khawngaihin helai hmun hi ka hnathawhna hmun a ni a mimal thil chu sawi chhuak lo hram rawh" pangnai thei ang berin kati chhuak thei hram. Mahni tawka thinchhe mi lo nih nen in control a har ṭep ṭhin.







"Chuan maw enteh ka duh ai hmain i inthiarfihlim hi iti ṭha kati tak zet ania, ka chet chhuah ngai miah lovin Thundera nu in ka kawng tur a rawn su kaw duak chu ani sia" alam ka hawi leh rualin hnehtu chanchang inti lutukin min ṭhen khum sak. Engtin nge hetiang hmeichhe mize thup thei lutuk hi an awm theih zawk. Pawnlam landan chuan apple thlum tui ber ang mai a chhungril hling hlira khat ang chauh anih hi.







"I hur luat chu i tuar dawn ta anihkha. Pa tel lova fa chawi seilen, chuan Thundera nen kan inneih hunah phei chuan kha i fa khan min tihbuai ka duh dawn miah lo ania" a thusawi maltinin min chhun dawt dawt. A heh senhlar pet sawi zauhin a mithmul ati kang zauh a, chhuak turin kut zai zirin min hrilh nghal bawk anihchu.  Ka insum theihna bang zawng zawng a tawngkam leh chetzia hian a ṭhiat vek. Ka mize diktak ka pho lang leh mai aniang chu.







Ka kut hum ruh nghekin a ṭhutna lam ka pan phei a. A hma eitur ka chhawpsakin a kawrah ka theh zui ṭhawt chu ding chhuak zawkin a kawr athing zui nawk nawk.






"Nang mi le lo nu" ti tuarhin min ben tuma a kut lekchhuak chu a banrekah nghet lutukin ka man zui hmiah. A mitmeng ling hlarah leh a hmui khur dawt dawt danah a thimrim thawkhat tih alang vek. Mahse ka taksa chak loh ber lai pawh hian a awmdan pakhatte pawh hian min hlau pha lo.







"Eng thil nge in tih a?" Ka aw hriat ṭhan lutuk ka hriat leh rualin ka awmchhung a mi a che zui nghal dawt dawt.






Lawmi'n ka vawn behna pawtthla hlawkin Thlamuanzuala lampanin a inhnit nghal faih faih anihchu. Hah...lemchan thiam lalnu.






"Thunder en rawh ka kawrah eiturin min theh a chuan kut min thlak ala tum zui bawk a" ti chhuak tiauin  a inhnit zui nghal hlawp hlawp chu za lo lutukin ka nui chhuak nghal hak.







Ka inhera Thlamuanzuala mitmeng thip lutuk ka melh rualin ka ip zui nghal chawih! Keimah min huatna bak hmuh tur a awm lo. Keiin mipa dang pawh kala melh theih lohna karah hian anichuan hmeichhe dang alo nei fel leh diam tawh bawk a. Na tur ka nilo tih ka hria ka duhdan a kalsan kani mahse ahmel ka hmuh chiah hian ka na tho chu anih si hi.







"Ngaihdam dil rawh" ti hmukin Lawmi hnungah a chul zui hauh hauh a. Lawmi zawk pangchang hmel lutukin Thlamuanzuala nghawngah a kuah chial thung.







"Ka thiam loh ni lovah ngaihdam ka dilna chhan tur ka hre lo" ti ve hmakin ka penlui a. Lawmi kuahna pawh phelhsakin a din hran tir a.






"Ngaihdam dil nghal rawh Remruatfel" ti chhuak hrawkin room ka chhuahsan tur ka banreka vuanin min phih lut nghal rawk rawk chu ka inring lo lutuk leh ka ke nuam lo sa nen pai nawkin ka tlu ṭhelh. Ka banah min rawn vuan hman lo phei se chu ka tlu na viau mai thei.







Min dawmna ka pawtthla a kawngka hawngin ka penchhuak zui hmak. Ka tihsual ni miah lova ngaihdam ka dilna chhan tur a awm lo. Kha nu cho chhuah liau liau kha, kha aia nasa a ka che lo kha lawm viau zawk rawh se.



.............



"Feli in restaurant kawtah ka awm tawh ania, i rawn chhuak hman tawh em?" Phone ka pick rualin Leumas-a'n a rawn ri lawng lawnga. Ka chhuah tur thu a chhangin ka phone ka dah nghal a.







Vawiin check up tura ka kal ni anih vangin boss hnenah chawhnu lam chawlh ka dil a, min lo hrethiam viau bawk nen ka lawm tak zet.







Ka bag lain chhuahna lam panin ka pen phei hlawk hlawk a. Parking lamah ka chhukthla zui zat.







Ka phone lo ri ve chhen nen ka ding deuh dat a. Ka phone phawrhin Julie hming lo lang va va ka hmuh rualin ka nui hak. Ka in check up ni apiang hian alo phi ve cheng zel. Ka kal hma ka kal hnu hian alo phone ve ziah.






Chhan pahin step ah ka penthla bauh bauh a. Hnunglama aṭanga min rawn su dawrh chu ka inthazo lo sa nen step aṭangin ka hlawmthla nghal tawp. Step tawpah ka dul sawh dawtin ka bawkkhup thla a ka pumna na lutuk vangin ka ang nghal pham.






"I ṭha em?" Ti nawk nawkin mipa pakhatin min tung thova.






Ka thuchhuak chiah tihin ka kap lam a lum nghal pap. Ka kekawr hak chhanah ka khawih a ka kuta thisen kai nuai ka hmuh rualin ka kut ka lek khur ngawt ngawt.


STORY CHHIAR THIN ZAWNG ZAWNGTE TIH VE NGEI NGEI TUR.

STORY a thlawnin chhiar tur nitin kan chhawp chhuahsak che u a, nikhata i chhiar man hi duli man tal ni a i hriat chuan website a advertisement hi i lo click ve thin dawn nia. Online website a story i chhiar theih nan pawisa tam tak kan seng a, i chhiar paha i lo click ve hian i chhiar man i pe ve a ni tih i hre dawn nia.

Mi pangai chuan miin sum senga an tana buaisaih a nih chuan an theih dan ang angin pek let veleh ngei an duh thin. A thlawna dawnga pe let ve tu nih peih tlat loh hi a zahthlak, a changkang lo lutuk, smart phone tha pui pui kan nei a, kan rilru pawh ti smart ve ila. Story in chhair theih nan hian writer te hlawh sing khat ai tlem lo kan pe ziah a, website hrim hrimah hian sang 6 vel kan seng bawk. Story in chhiar man hi chawitir zel dawn che u ila chuan mi tam tak hi chuan story in chhiar theih lohna a rei tawh ang, chuvang chuan a thlawna chhiar liam mai lo in lawmthu sawi nan i lo click ve hi kan phut tlat a ni.

Advertisment hi a chung berah leh a hnuai berah kan dah a, Vawi khat ve ve click a tawk mai. Vawi khat ai click kha awmzia a nei vak lo.



Link:
BBcode:
HTML:
Hide post links
Show post links

ADVERTISEMENT (A hnuai a milem hi a nia hmeh zeuh tur chu)