NUTTY GIRL
CHAPTER-4
NICOLAS ZOMUANKIMA POV.
Ka khuma hmeichhe mu ngat chu ka en. A lu a hliam a tuarna vangin nikhawhrelo in a la awm. A ke ruh a tliak leh a lua a hliamte tih loh chu na lutuk vak a awm lo. A taksa a chak that theih na turin drip ka khai sak. A hliama damdawi ka hnawih sak hnu chuan room ruakah chawl hahdam turin ka phei.A la hma lutuk mah mah.
Muhi thei lo chuan ka in let sek.Ka hmeichhe ngaih ang ngawt chu a ni lo a nih hmel. Sum lam chu an tlachham lo viau ang. Mipa mamawh pawh nise hausa tak tak kawp tur an tam lutuk tlat.
"Nang te reuh vang hian kan mut theihloh hrep chu le,"ka khuma hmeichhe mu chu ka en run. A mit a chhin hi chuan a kawlhsen hmel loh viau hi. Kan inhmuh zana ka hmui a seh vak tak kha mawle,ka ngaihtuahna vang chuan ka khi suk.
- 21-34-03-images.jpg (24.4 KiB) Viewed 4815 times
Officer Daniel
2 DAYS LATER.
"A rawn harh tawh em?" Daniel hian nitin a chanchin min rawn zawt ziah. "Aih la harh lo mahse ngaihtuah awm lutuk chu a ni lo. A lu a hliam vang chauh a nih hi,"a rawn nui deuh huk.
"Engnge?"ka ti nghal hmuk,fiamthu ka thawh pawh ni lo.
"Dude,enteh i pain doctor zir tura a tih lai che leh doctor i zir lai pawh khan in hmeh ka ti hlawl lo che. Mahse tunah chuan doctor tha tak te pawh i an ve tawh kha mawle," ka doctor zir kha chu a fiamthu ve na ber thin a ni reng a ni.
"Ka dah,ka hman tawh lo,"tiin ka dah nghal. Phone call a in biak tih vel hi chu ka ngaina viau lo,text leh lek phei chu. Ka chhungten min rawn biak hian a ni leh mai. A tul viauah lo chuan ka peih meuh lo.. Mahse henute vang hian ka ti ka ti ve ta mai chu nia.
Shower ka neih zawh chuan nidanga ka tih thin ang bawkin bucket teah chuan tui dahin ka khuma hmeichhe mu lam chu ka pan. Heng thil zawng zawng hi ka tih ka in ring ngai lo. A hmai chu hruk sakin. A ban leh a kete chu ka hruk fai sak leh.
"Hey dude," Daniel rawn lut chuan nui thuin a rawn tih chuan ka nuih let ve sak. Tuna ka thil tih hi ka tih a ring bik lo ngei ang.
" Ti kha chuan ka hriat thin Zomuankima kha zawn chawp ka ngai dawn hialin ka hria." A nuih a za telh telh emaw tih tur a ni.
"I hna min pek vang chauh a nih hi,lo fiamthu reng suh."
"A nangmah lo em a lawm,lo hawi teh," a va tul thin lo tak. "I mamawh hun pawh a la awm maithei,i bialnu hian hmu se a thik fia fia ang chu aw."
"Case chu engnge a an dawn?"a sawi tam hma chuan thupui dangah ka pakai vat.
"Umm...lo hrilh tur che in ka lo kal. Anu leh pa ruang chu hmuh a ni tawh. Han ei mai chuan sawisak hlum an ni tih a hriat. Hma lak ngaihna vak a la awm lo mahse a ni hi chu ama him nan thup a tha zawk in ka hria,"a tih chuan ka bu nghut. Ni e,atan a tha zawk hrih ang,ani hi a dam chhuak tih hre ta se engtinnge chet an lak dawn a hriat loh.
"Bakah a chhungte laka thup bo tur kan ni lova. Mipui leh khawtlang hriat lovin kan ti a ni mai. Amelia nu leh pa hi chhui zui pawn an chhungte awm a hriat loh. Anu pawh hi apa ang tho a fahrah ve tho pawh a ni mahna,"tiin a tho nawlh,room atanga chhuakin a lo let leh chuan beer a lo keng lut va va.
"Va in dah fel phawt teh,pasal tha,"nui huk chungin a ti. Amah vanga tianga che ka ni tih chu a hre lo der hmiah.
"Dude, he case hi a buaithlak dawn riau. Engmah han chhui zui ngaihna a awm lo. Mr. Yadav te pafa hian an bo ani tih an report, Amelia hi kan hmu a,chuan tunah a nu leh pate ruang. Han tih vak ngaihna a la awm hrih lo. A tualthattute an fimkhur em em bawk. Finger print hnutchhiah an duh loh vangin thawmhnaw in bel lovin tuipuia paih kha an ni." Ka lem leh khalh.
"Tu pain nge an manni company ngei a fanu ro chan tur ni loa,mahni unaupa hminga dah ang? Chu pawh a unaupa tak a ni lo bawk. Lehlama thlir chuan Mr Rakesh Yadav puihna rulh let nan a ti ve thei tho bawk. A report tute ngei hi ka mi rinhlelh te ber an ni tlat bawk si. A thu hre tu ber hi lo harh chhuak phawt se,chu chu thil pawimawh ber a ni,"thaw deuh halh chuan a ti.
Ni e rilru hahna tham a tling khawp ang. A report tu te ber hi a mi rin hlelh te ber an ni tlat si a. Engmah chhui zui tur an hnutchhiah lo bawk.
"Umm...hei ka kal leh a ngai tawh. Hei te hi a harhchhuah a pawimawh ber ka tih kha. Pasal tha ber lo ni la chu chu i tih tur a ni mai."
"Ka kal,"tiin min chhuah san zui nghal.
~~~~~~
AMELIA ROSANGPUII POV
Mipa aw ri thum deuh chu ka hre leh thin. Engmah ka hmu thei lo,a thim vek bawk si. Ka nu tap thawm leh ka pa rum ri pawh ka hria. Au chhuah ka tum pawh chuan ka hrawk chu a in hnawh tlat. Ka hrawk a ro huam huam mai bawk si.
Tawng thawm te leh hmeichhe tap thawm te,mipa nui ri te chu a in chawhpawlh nuai nuai. Ka awmna chu a thim vek bawk si. Ka theih tawpin au leh ka tum mahse ka aw ngei pawh chu ka hre thei lo. Thawm chu a reh telh telh, mipa tawng thum bul bul chu a fiah tulh tulh thung.
Ka men chuan light eng va va ka hmu ta mahse a fiah lo hle thung. Ka hrawk chu a thip hlur mai bakah a ro em em bawk. In chung chu rawng var vek a ni,ka khaw hmuh chu a rawn fiah telh telh. Khawi hmunah nge ka awm...Nu...nu,pa khawnge in awm?
Ka nu leh pa chhuata thisen nena an mu ngat te chu ka mitthlaah a rawn lang nghal zut zut. "Apa hi chu a thi chiang tawh...anu pawh hi a chatthla chu a ni mai,"nilo...nu khawnge in awm? Min kalsan thei lo ania. Nilo khang zawng zawng kha mumang mai a ni...Ka kut ka en chuan hruia min phuarna kha a ni... Ni lo...he thil hi a tak a ni thei lo.
"I lo harh tawh maw. Kha hei hi in phawt rawh," nichina mipa aw ka hriat ngei kha a ni. Min rawn tung tho chuan tui chu min in tir. Min khawih chet dan ang ang chuan ka awm mawl tawp.
"Mu hahdam leh phawt rawh. Nachhawknain ka lo chiu ang che,"ka mit ka chhing vang vang. Nu heihi a tak ram a ni lo a ni tiro? Ni e,ka mu anga engkim a rawn pngngai leh vat mai ang. Nachhawknaa min chiu chuan ka chhing ria ria.
NICOLAS ZOMUANKIMA POV.
A rawn harh ka va hmuh chuan a mittui a tling deuh puau. A chunga thli thleng vang pawh a ni ve thei tho tunah chuan hahchawl phawt se,a rilru hahdam hunah zawh chauh a tha ang. Taksa chak lo nen chuan a zawh loh a hlauhawm. Nachhawkna leh mutthilhnaa ka chiu chuan a muhil leh thuai.
Daniel chu thil awm dan hrilh ve a ngai. Ka phone chuan ka call. A ring tawp dawnah chuan a la ve ta chauh ."Aw..nichin deuh lawk khan a lo harh a, nachhawknain ka chiu a,a muhil leh chiah,"ka tih chuan a tho deuh huai.
"Umm...ka lo kal nghal,"min chhanna vang chuan ka nui suk.
"He case hi fel vat vat se i ti tih chu ka hria mahse hmanhmawh lutuk lo deuh la. A chunga thil thlengte pawh a nasa viau thei. A rilru natna pawh a ni ve thei tho bawk,"
"Engtik atang khan nge ka thianpa hian hmeichhe rilru te a care tak viau,"nui hawk hawk chuan a rawn ti.
"Rawn fiamthu reng suh,"ka ti nghal hluk.
"Aw...aw..ka thianpa neih chhun hi ka fiam ve hlak che a nih kha. Umm...tunah chuan a hahdam thlak deuh tawh a lawm. Pawi khawihtu pawh kan man thei thuai tawh ang chu." Rei pawh inbe lo chuan a dah. Keipawh ka thawveng huai tawh.
Kar hnih dawn unconscious in a awm tawh a,a taksa tih chak nan eitur tlema zawng tal a ei ve a ngai. A kaw chhung lamah engmah dik lo leh tha lo a awm lo bawk a,a thil ei chu a pawi vak lo.
Chokaah chuan a ei theih ber tur buh hawp chu ka siam sak. Midang eitur ka vawikhat siamna a ni. Ka phone a rawn vibrate der der.
"Hey, baby. Kan va inhmu khat ve. Pawisa ka rawn transfer fel tawh aw. Chuan ka ngai lutuk che.i bula awm ka chak,"ka khi suk. Ni e, in a damlo engmah hre lo ka chhuah san duh lovangin kar khat dawn tawp ka chhuak tawh lo.
"Umm,kan in hmu vat dawn nia." Kan inhmuh loh vanga a lungawi loh thu a sawi reng. Ka inthiamloh ve deuh avang chuan rei tak kan inbia. A duh tawk a sawi meuh chuan darkar chanve dawn a ni.
A rawn harh chuan a eiturin buh hawp leh tui ka chhawp sak chu ka hrilh. Ka tih tur ka tih zawh tawh vang chuan shower nei turin bathroom ah ka luh san. Ka chhuah leh pawh chuan a engmah a la ei lo. Ceiling chu enin a khap fak fak reng.
"Buhhawp hi ei rawh. I taksa a chak theih nan a ngai a nia,"biak loh ang maiin a awm ngai chuan a awm reng. Amah ka tun thawh chuan ka tih angin a awm vel mai mai ni berin ka hria. Ka zawhna pawh engmah min chhang lo.
Buhhawp chu ka tulh,chutia ka tih chuan a lem ve mai. Bowl khat chu ka eitir tling lo deuh. Engvanga henu laka zawl dawh em em nge ka nih pawh hi ka hre tawh lo. A thil eina leh amah ka tih fai zawh chuan ka Daniel bulah chuan a awm dan chu ka hrilh. Hrilh a hai duh khawp mai. A thil tawn vang pawh a ni mahna le.
Vawiin chu rawn dah loh ai ka rawn dah deuh tawp. Ngaidam leh hram mai ru aw
Ka story min lo chhiar sak thin avangin ka lawm e...