Chapter8
Rawmawl hringduk a ken chu laksakin ka en chiang a, a tlang sira pangpar lem inṭhui chu ka zut kual zar zar a, a tawpa 'Da' tih inṭhui tel ka hmuh chuan ka meng nghal kawk! thil theih a ni lo. Hei hi….
"Engtin nge i neih?"
"Engtin nge i neih ka tih che chu" min chhan mai loh avang chuan ka vin tuarh a
"Ka neihna a rei tawh" a ti liam puat chu duh khawp lo zetin
"Engtin nge i neih theih?" Ka ti nawn leh a
"Mak i va tiawm ve...a in ang palh a ni ve mai a"
A tih chuan lu thing na na in "thil theih a ni lo, ka kut ngeia ka ṭhui a nih hi". Kanu'n Hand embroidery min zirtir lai chu ka mit thlaah a lang zui nghal zat.
Ka kut ngeia ka ṭhui hmasak ber, engtin ge hepa hian a neih theih.
"Kha hmeichhe naupang kha i ni maw" mak tih hmel zeta a rawn tih chuan a ngaihna hre lo lutukin "Maw!" ka lo ti let ha a
"Rawmawl min petu hmeichhe naupang kha nangmah hi maw?"
"ka pe che maw?"
"I ni em? I ni tiraw…..mahse aih aih, i ni lo..a ni kha chuan samkir mawi zet leh mitmu uk fim kak a nei..mahse nang chu i sam a ngilin i mitmu rawng a dum ṭha hle si a
Miranda..aw ni tak, Mirandai a ni tak e…
Mahse nang hi engtin nge i nih theih?" Min bia nge amah a inbia pawh ka hre hrang lo
"phun nuah nuah suh. Rawmawl hi chu ka la dawn"
Ka tih chuan a phal lo nasa. "A ngai lo, hmeichhia ka hriat tawh a zawnga ngilnei ber min pek a nih hi ka phal lo" a ti deuh tlat.
"Naupang kha i ti sia"
"Naupang mai mah ni se, a ngilnei em em a, a ṭawng duhin a hlim thei em em bawk. Engtik lai mai pawh hian a nui sen sen reng ṭhin". a tih chuan ka meng tal tap a, ka thinphu pawh a rang kher mai.
"An tualzawla infiamte kha nuam a ti em em a, a tlankual lai a chhungten an lo thlir chang phei chuan a intithei tak ṭhin". Suangtuahnaah a cheng tih hriat tak hian a nui deuh var var a,
"Eh...i ṭap elaw!" a rawn tih chuan Ka bianga mittui luang chu hru sawk sawkin "tunge ṭap" ka ti hlar a
"Kha naupang kha ṭhangkhat lian zet ka hmu ta lo. Engtiangin nge a ṭhan chhoh a nga, engtiangin nge a nun a hman ang tiin zantin ka ngaihtuah ṭhin.
Titeh….mi chanchin rigawt kan sawi a, kan kal chhan ber kan theihnghilh dawn a lawm"
Restaurant ah chuan min luh puiin thlanglam tukverh bula dawhkan ruakah chuan kan ṭhu a,
"Miranda, engtin nge tiang hian i inthlak danglam theih?" mitmeng hriatthiam har zeta min en ngur tu chu chhang loin tukverh lam ka hawisan.
'Miranda...ngati nge tu pawh mai hian an ngainat che le. Eng ngati nge keimah hian hmuh an la tum tlat che. I thi tawh, nang chu I thi tawh. Tuna Mirandai hi chu mi dang daih a ni tawh. Nangmah ang min nih tir hi eng ngati nge an tum vek'.
Mipa naupang pahnih leh hmeichhe naupang samkir zet nui sen sen lai thlalak chu enin ka phun sap sap a.
'Hmeichhe naupang hlim thei tak kha ka ni tawh lo tih eng ngati nge an hriatthiam theih loh, eng vangin nge ka rilru Tina thar leh tura an rawn sawi chhuah thin che..'
"Aiah!" Mipa naupang min umtu chu a tlu a, hmanhawm deuhin alamah ka tlan phei vat. "A thi a nia, I khup kha a thi a ni" chiâi zeta ka tih chuan
"a na lo Curly.. a tuamna tur min pe la a dam leh vat mai ang" ka lua rawn tuai zeuh chuan a ti sup a
Ka sam tawnkhawmna rawmawl chu pawt thlain a khup chu ka tuam sak mawlh mawlh a,
"tikha chuan a na tawh miah lo a nia aw.." a tih chuan ka lo nuih nghal sen sen. Ka biang puar lai rawn khawih pahin "ka lawm e" a ti sup a "rawmawl kha chu nei nghal mai rawh" nuih sen sen chuan ka ti let vat,
"tlan rawh le! ka rawn man dawn che a nia" a tih chuan a khup a na tih pawh hre chang tawh loin ka tlan leh nghal vat.
Theihai kung lian vak lo buk zet hnuaiah thuin ka lo nghak a, a rawn thleng chu phaitualhnim chungah chuan muin thawk a la deuh vang vang, a bulah chuan keipawh ka mu ve nghal tharh..
"Lo haw leh vat vat rawh aw…….." car tukverh atanga mipa naupang rawn dak chhuak chu ka theih tawka ringin ka au vak..
"Ka lo let leh thuai ang…..min lo nghak reng rawh" tia rawmawl ka pek a rawn vai chuan ka kut vai let vat a, an tlan liam thleng chuan ka thlir zui vang vang.
Kawngka kik dat dat thawmah chuan peih lo zetin ka meng chhuak a..
"Bawihi...I dam lo em ni?"
A rawn tih chuan rangzetin ka thu chhuak hlawl, vawiin chu inrinni a ni tak, ka chawlh ni.. zawi zetin ka mu thla leh nghal hnak.
"Bawihi...bawihi….kawngka lo hawng teh !"
" Ninawm" ti hlukin kawngka chu ka va hawng a,
"nute…. " Kawngka bula ding ka hmuh chuan ka ti vak
"Vak vak a che, min tihlauthawng a lawm"
Ka pang deh mawlh mawlh pah chuan a ti a
'I khua a sik bawk si lo a, mangchhia I nei leh tawh em ni?" a tih chuan lu thing na nain ka kuah nghal
"Eng nge maw I hriat reuh le!" a tih chuan "thil ṭha" ka ti liam puat.
"Kha hei hi in rawh, I khum saw ka va siam a nge"
A thil min pek chu lain ka tem zeuh a
"Hei hi eng nge a?"
"Khawizu leh nimbu tui leh tuilum lep lep chawhpawlh, sawi nawi lo khan in ang che"
"Nute...engtin nge i lo luh theih?"
"He thlalak chuh!"
"Bawihi enteh I nuih nasat zia hi" ka zawhna pawh chhang loa a thu rawn sawi vang chuan lawm lo zetin
"Ka hria ka hria" ka ti hmuk a.
"Damdawi in atanga I patea a chhuah hunah chaw la ei ho ila a ṭha ang" a tih chuan
"Nia nia" ka ti leh hmuk.
"A mak ṭhin bawihi..hlim taka nun hman tum ve tawh la, eng ngati nge i inkharkhip tlat mai le"
"Nute.. .ka"
"Kanu! Chaw ei kan peih tawh e, rawn chhuk ru" tia rawn au lawng lawng vang chuan ka ṭawng tawp chawt
"Nute.." ka mit kan ak ak chu hrethiam vatin
"Vawiin I chawl dawn tih kan hria a, kan rawn vai kal" a ti nghal zung zung a.
Zorinsanga leh Patea ṭhut khawmnaah chuan an lo ṭhu ngawi dun kar a, nutei nen kan chhuk min rawn hmuh chuan min nuih nghal var var.
Doorbell riah chuan ka tho vat a,
"Lo lut rawh" tih paha kawng ka Hawn chuan mak tiin ka ang phau
"Tho a lut a nge" nui sanga a tih chuan ka chip nghal vat a.
"Min luh tir i tum leh si lo em ni?" a tih chuan
"Tum lo" tih pahin kawngka ka khar khum a, hmel tum bara ka let phei chuan nutein tunge tih min zawt nghal vat, tumah tihlukin ka ṭhu tum bur a, Rinhlupuia chimawm lutuk mai.
Zorinsanga phone a rawn rik chuan ka en nghal vat a, awle ka lo kal min rawn en chunga a tih chuan ka lo melh rawm rawm
"Zorin, zawhte note khawi thar innei a ni maw" rawn titu chu ngei lutukin ka melh
"Khawi thar lo e, hetah chuan a lalber..zawhte lalramah I rawn tla lut a nia" tia an nui dun hawk hawk chu ka ngei tawk a tling hle.
"Zawhte ka ni lo ve" ti hlukin roomah ka chhoh san leh daih a, chawei an siam peih hunah min rawn ko mai rawh se.
Room kawngka ka hawng tihah chuan luh pawh ka luh hmain hnunglam atang min namtu an awm vangin ka pai lut khut khut a. "Tu phiang.."
"I rak ring" tia beng lo huptu chu a ngalah ka chhir sak a, "Anah!" tih leh dawm a rual nghal..
I chawh tih melh a ka melh lai chuan min rawn man thut a, khumah min ṭhut tirin a ni a ṭhingṭhi thung.
"Nang hian min hre tawh lo tak tak em ni?" a tih chuan ka bu nghat nghat a
A hmel landan inthlak chu ka hmuh hmaih lo nasa, beisei nei hmel kha a reh tial tial a, a kalsawn tur chuan khum bula side table inhung chunga thlalak awm a hmuh vangin a ding leh rih. Thlalak chu la kangin a en vang vang a, nui deuh sukin "hmeichhe naupang ṭap thlem nana kan lak kha a nih hi" a ti sup a.
"Curly, min hre lo tak tak em ni?" a tih chuan
Ka mitmeng a tlanchhe nghal der..
A hma kha chuan ka hre miah lo takzet..
Nizana ka mumanga ka hmuh khan ka hre ve chiah..
"Eng lo, ka..!"
"Nutein chawei a peih tawh a nia, chhuk ang hmiang"
A hnungah chuan ngawi rengin ka zui dat dat a, ka samkir em vang khan Curly tiin min koh phah, min ko tu awm chhun a ni bawk. Thla thum vel chama Champhai an rawn zin chhung khan kan inkawm char char ṭhin a, Zorinsanga pawh a lo tel ve zauh zauh zel. Kum nga mi lek ka nih laiin Kum sawm mi an ni tawh a. An ruala infiam ve kanun a phal ngai loh vang khan ka ṭap ziah a, min thlem nan thla min lakpui ṭhin. Chung zinga pakhat chu tuna ka kawl lai hi a ni a, a dang an kawl nge dahṭhat an ni ve lo tih erawh ka hre lo.
'Hotel-a an ruang chhar kha Lalruattluangi a ni a, Kum 22 mi niin college kal paha inhlawh ṭhin a ni. Mahni inzuar ṭhin a ni a, hnathawk ho sawi dan leh cctv footage-a lang ṭhenkhat chu a in ang vek a, a buaithlak ber chu cctv hi room chhungah dah a ni ve lo tlat a ni.
A ruang an post-mortem na result atang chuan a serh-ah mipa chi(sperm) hmuh a ni a, a taksa a kutthlakna lang thenkhat aṭang chuan a thih hma hian sual luih a ni. Mahse an kutthlakna hi a thih pui ber a ni lo va, OD vanga thi a ni tih a lang Chiang hle..
Mahni inzuar ṭhin ni mahse tihluihnaa sual a nih avangin a rilru a na em em a, a nun ṭawp tak chu a nin em avangin drug a ei lui ta chiam a, chu chu a thihpui ta a ni.
Chuvangin Ruattluangi thihna hian Hotelin mawh a phur lo a ni'.
Chanchinbuah leh tv station hrang hrangah Hotel-in mawh a phur loh thu kan finfiahna te kan tar lang a, comments lamah thu Chiang hre miah lova Hotel Maza an dem rawn luih luih vanga thupha chawina a awm nasa hle.
Hotel Maza hmingchhiatna chu chin fel a ni ta a. Mahse a chhunga hnathawkte leh Hotel kalphung siam ṭhat lai tur neuh neuh tam tak a awm.
Patea pawh damdawi in aṭang a chhuak tawh a. Hotel Maza dinthar lehna leh Patea dam taka damdawi in aṭanga a chhuah lawmna ni pah fawmin Hotel pahnih inkawpin naktuk zanah Party a buatsaih dawn a, hnathawk ho an phur hlawm na ngiang mai. Kei erawh kal loh dan tur ringawt ka ngaihtuah a, eng chhuanlam nge ka hman tak ang. Ka kal lohna chhan tur tling zo reng reng ka ngaihtuah chhuak thei bawk si lo.
"Lunch ei a hun" rawn titu chu ka en vat a, nui sanga min en reng vang chuan ka che khawr deuh riau leh nghal. Ka lai ve khanglang em mawni! Lu thing nak nakin ka rilvṭam loh thuin ka chhang a, ka sawi zawh rual ruala ka pum rawn ri ruk ruk chu ka dawm nghal vat, a va hun lo kher em! Mahni in ngei zet chuan ka pum chu ka hmer vak ringawt.
"Ngati nge I biang kha a sen vek a" hnai zeta min rawn bih paha a tih chuan "tu nge sen?" ka ti hlar.
Ka hnar piai zeuh pah chuan "duhawm lutuk" a ti deuh sup a.
"I ka ṭam lo mah se I ril chu a ṭam a nih kha, I pum a ri ruk ruk a lawm
Kha a lum lai hian lo ei vat vat rawh"
A tih chuan inzep buai loin dawhkana a thil chhawp chu ka en a,
"Ehh"
"Kanuin min pai tir a, ei zo vek ang che" a tih chuan ner nawngin ka ei zui nghal.
A va tui kher em!
"Rinpui.."
"Umm" thawp suta min chhangtu chu ka melh reng a
"Sawi ta che" a rawn tih chuan
"Ka rawn let vat ang I tih vang khan I lo let thuai turah ka ngai a",
Ka tih chuan a thil ei lai dahin min rawn en a
"Kum sawm ni lo, Kum sawmpanga ka nih thleng khan I lo kir hun tur ka nghak char char che a sin.
Ka chhungte zawng zawng leh ka ṭhianṭha ber ka chan a, thi lek leka ka awm lai pawh khan ka nghak reng che.
Kum li liam taa ka thil tawn rapthlak tak khan ka rilru leh taksa thlengin nghawng a nei nasa em em a, theihnghilh atana ka duh ngawih ngawih thil hriat reng ka nei a, hriat chhuah theih miah loh nun duhawm tak tak ka nei bawk.
Chung zingah chuan I lo tel ve reng a, kapa diary-a thlalak ka hmuh khan Zorinan tu nge i nih a sawi a, mahse ka hrechhuak thei miah lo, thlalak ka en ngial pawh khan kan lak hun lai awm ka hre thei lo va, rawmawl pawh kha I lo nei ringawt kha mak ka tih zia chu, keima siam a nih avangin a ang pakhatmah a awm thei lo hrim hrim a, hmeichhe naupangin a pe che tih I sawi pawh khan a ngaihna ka hre lo takzet.
"Curly…" A rawn tih thawp sut chuan ka nui deuh sak a
"Mahse ka in a chaw I rawn ei ṭum kha, kha mi hma chiah zanah khan ka mumangah ka hmu a, hlim taka kan infiam laite, min umna lamah I khup I sawh thi lai te, rawmawla ka tuamsak lai che te,' ka lo kir leh vat ang min lo nghak rawh' I tih lai te kha Chiang takin ka hmu a, tah chuan ka hre ve chiah che"
Ka tih chuan ka kut a rawn hum a, duh loin ka la sawn vat.
" Nangmah nghak reng ṭhintu Mirandai, ni lo, I Curly kha chu a thi tawh. A theihnghilh ni aṭang che khan Curly chu a thi tawh..
Khami zan, in chung aṭanga zuan thlak ka tum khan dam chhan nei tawh lo ah ka in ngai a, he Khawvela ka tihtur ti zo tawh angah ka inngaih avangin zuan thlak ka tum a nih kha. Mahse ka zuan thlak hmain min rawn dang a, ka huat zia che kha I hrethiam lo ang.
'Eng ang pawhin I nun beidawngin harsa mahse huaisen takin I hmalam hun I hmachhawn tur a ni dawn lawm ni' tia i thusawi kha ka vawng reng a…"
"Shhhhh...a tawk tawh e, ka hre tawh..ka hre vek tawh, engmah sawi belh tawh suh"
Ka hnunga beng thek thek chunga a rawn tih chuan ka mittui a hnam ṭiam ṭiam a.