Chapter 9
Rinhlupuia POV.
Ṭah chhuah hlau zeta hmui pet fan fan tu chu ka en reng a, he tiang mize pu hian engtin nge a lo ṭhan len theih.
Kan Hotel-a ruang an chhar aṭang khan hmasawn lam aiin tlakhniam lam Hotel-in a pan telh telh a, remchangah lain Patean Hotel neih a lo tum ve tum hrang bawk nen, kapa lah dam loin damdawi in ah a awm reng mai bawk si. Kanu rilru hah lutukin min chah haw tawp a.
Mahse ka haw hun tur an tih aia hmaah tuma hriat lohin ka haw a, Hotel Miranda-ah room book-in karkhat lai ka khawsa. Khami zan khan eng in nge min mawlh pawh ka hre lo, chhawng chung bera kal kha ka chak tlat a, Mirandai zuanthlak tum lai ka han hmu ta a ni. A tirah chuan amah a ni tih ka hre lo reng reng.
A tukah Delhi lamah let thlain ka haw ni tur an tihah chuan ka thlawk haw leh a,
Hotel chung changah nasa takin ka ngaihtuahna ka seng a, Patean Hotel Miranda nena inzawmna tih tawp a tum tih ka hriat phei kha chuan ka beidawng lek lek. Sumdawnna leh a kaihhnawih thil hi ka ngaina loin thiam pawh ka thiam hek lo. Mase kapa'n tha leh zung senga a theihna a hman ral ṭhakna a nih avangin a tlachhe tur emaw, midang kuta a awm tur emaw pawh ngawi rengin ka thlir mai mai thei lo.
Mahse ka rin loh leh beisei loh lutukin Mirandain mawhphurhna a la a, inzawmna tih tawp chu khawi lamah. Kapa tih lohah chuan Hotel-ah a thu ber maw le.
Delhi-a ka awm lai khan Mizoram lam chanchin hi ka hre ngai meuh lo va, ka hriat chhun chu Mirandai te chhungkaw chhiat tawhna kha a ni. Kanun ṭap chunga min rawn hrilh lai khan ka hrilh hai hle nghe nghe kha a nia. Mirandai pawh thi angin an sawi. Kha hmeichhe naupang hlim thei tak, engtik lai pawha nui reng ṭhin, samkir chiat leh mitmu uk fim kak neitu kha thi tur chuan a uiawm lutuk. Tih theih nei si loin awm hmunah khan ka lo tuar ve em em a, khata ṭang khan a rawmawl min pek hian ka pang depa awm loh lai a nei lo.
In chunga aṭanga zuan thlak tum nu kha ka ngaihtuahna ah a awm reng a, Meeting-naa hmeichhia, mahni inringtawk zeta Hotel dinhmun ngaia hlankai leh a tum thu sawitu Mirandai kha ni tlatin ka hria a. Mahse ka chiang ngam lo.
'in chung aṭang zuanthlak tum tawh suh' inring tawk zeta ka tih khan a hlauthawng nge a ham haih nge pawh ka hre lo. Mahse amah ngei a ni tih ka hriat chian phah.
Mirandai, hmana ka Curly hmeichhe naupang duhawm zet kha a ni tih rawmawl vangin ka hriat phah a. He tiang taka vawt leh mahni inringtawk a ni ta hi ka hrethiam thei lo.
"Curly….." zawi sapa ka koh chuan a harhchhuak thut nge ni a inla hrang nghal vat.
"Curly..i ṭah a chhuak a nih chuan in up reng lo khan i ṭap thei a lawm" dam thlupa ka tih chuan
A mit hnawng chap hru sawk sawk chung chuan "Tu nge ṭah chhuak" a ti hlar a.
"I mit kha ti nge a, a va bui ve" ka tih chuan min chhang loin a theih tawka rum ni awm hrim hian min melh vei kha kha reuh a.
"Min rawn zui rawh" tih leh a banah pawh ka rual
"Khawiah" a ti hman ṭawk ka kai chhuak nghal dawr dawr.
Kan kal pelh a piangin min en zui dauh dauh hlawm a.
"Min thlah teh!" Tiin a ban chu lak a tum ve ngial a, ka hmer nghet telh telh thung si.
"Khawnge min hruai i tum" a ti ṭeu hlar a.
"Ka kidnap dawn che" tia ka chhan chuan a lawm lo nasa
"Rinhlupui! Fiam thu lo teh" a ti hlar a
"Awle…" ka tih chuan
"Khawiah nge min hruai i tum.." tiin min zawt nawn leh
"Sawi lai lawkah sawn" ka tih chuan
"Ka kut hi thla tawh teh" a ti deuh sap a, a hah tawh em maw ni dawn le
"I tlanbo palh ang" ka tih chuan a nui hak a, ka pen lai ka tawp nghal chawt.
"Naupang chhia lutuk" a ti zui niah niah chu ka en reng a,
Chutia ka en reng tih a rawn hmuh chuan a nui lai chu a tawp nghal chawt. "A na tawh a nia" bah naka tiin a banrek ka vawn chu a ti che dat dat.
"I nuih khan i hmelṭha lutuk" ka tih chuan "min thlah vat mai teh" a ti hlar a. A kut chu thlahin "tlanchhe miah suh" ka tih chuan ka peih teuh lo a ti hmuk.
A banrek ka vawnna chu a sen kual deuh raih a, ka lo hmerna mah mah a nih dawn tak hi.
Shoping Mall-a ka luhpui dawn chuan min pawt dinga "eng nge kan tih dawn" dingdihlipin ka beng zawna a rawn phun sar sar chu nuih deuh sukin "i hre mai ang" ka tih chuan a ner leh nghal nawng.
Hmeichhe thawmhnaw an zawrhna bikah chuan ka luh pui a, en kual rawh ka tih chuan a en kual ve mai. Ka rei! A thawmhnaw en duh zawng chuh!
"Curly…..naktuk zana i hak tur en rawh, kha tiang en lo khan" ka tih chuan heng bak hak ka tum lo hrim hrim tiin min chhang.
Hahthlak ti zetin ka thaw hawk a, a banah kaiin kawrfual ka thlanchhuah sak mawlh mawlh chu ka ken tir zela sawm vel lai ka thlan sak chu ha chhin tura ka tih chuan a duh lo lutuk chu a ṭeu leh nghal hlar.
" I hak chhin loh chuan keiman ka hak tir ang che" tia ka vau chuan tum burin a va ha chhin a.
" Pakhatmah hi ka duh zawng a awm lo" ning lutuk chuan a ti chhuak hluk. Nui suka lei lo mai tura ka tih chuan min melh rawm rawm a.
"He lamah lo kal teh", tlereuh zawrhna lamah chuan ka kai phei leh
A ban dahkang tura ka tih chuan thuawih takin a rawn dahkang ve mai a, a banrek ka hmerna val kual raih chu a langsar lam mah a nih avangin thup loh chuan naktuk zanah a langsar dawn tlat.
Yellow gold diamond shaped bracelet 1inch-a hlai chu ka buntir a, "ka bun duh lo, a rit" a tih chuan "ngawi mai mai khan bun rawh, naktuk zanah rawn bun ang che" thupe aw zeta ka tih chuan a meng rang nasa.
"Hotel Miranda leh Hotel Maza inzawmna a lo ngheh zual zel theih nan leh, Hotel pahnihte tun dinhmun kan thlen theih nana theih tawp chhuahtu Pi Mirandai chungah lawmthu awm se la, a thawhrimna hlut zia leh a hlawkna teltu Hotel pahnih leh thawktu zawng zawngten lawm thu kan sawi mawlh mawlhin hetiang hruaitu ṭhia kan nei hi kan inchhuang tak zet zet a ni.
Amah Pi Mirandai lo chhuak se la, a hlawhtlinna thuruk min hrilh turte pawh a nei mai thei a sin" programme host tu in a tih chuan kut beng ri dar dar thawmin a zui nghal zat.
Hnunglam kawngka aṭanga hmeichhe rawn pen lut chu kan zavai mai chuan kan thlir ṭhap.
Silk Senduk hlarh a hak chu inhmeh tak a ni ringawt. Mahse duhaiin a taksa a langtam mah mah. Saw kher kher ka lo leisak chu ka inchhir lek lek hial mai.
A sam chunglama a bawk tawm vek vang chuan a kawr ban nei loh vanga a dar ruak kang chu a langsar hle a,a kawrfual sir veilam kak aṭanga a malte lo lang leh zeuh ṭhinte chu ka lo ngaimawh ve em em ringawt. Sawi hmaih theih loh, a bracelet bun sawn a tilang sexy takzet, a man pawh a tlawm fahran lo khawp.
"Chibai ule…. Thu tamtak sawi ka tum lova, Diktak leh Rinawm takin, hnathawktu satliah ang ni lo in, nangmahni ta ang chiaha ngaiin Hotel pahnih hi a ṭhanzel theih nan hma min lakpui turin ka sawm duh che u. He tiang dinhmuna kan din theihna chhan chu keimah vang ni lo in, nangmahni vang zawk a ni. In tello chuan heng zawng zawng hi kan thleng thei lo. Chuvangin rinawm takin mahni ta ang chiaha min enkawlpui turin ka sawm tak zet che u"
A tih chuan kut beng ri a ring ṭhain mipui lam an lawm takzet a ni.
"Ka thawmhnaw inbel hi ka kham takzet tawh" ka hmaa phun hlak hlak chunga coke in mek chu ka en reng a.
"i nalh ka lo ti viau a" ka tih chuan a ner deuh sawk.
"Hetiang thawmhnaw ka hak dawna ka buai zia pawh i hre hrep lo" tum bara a tih chuan ka lo nuih var var a.
"Min nuih suh, eng nge tiangte i rawn dah tir" a tih chuan
"En mah la, helaia awm zawng zawng zingah i nalhber hi" hawi kual vel paha ka tih chu ṭul a tih loh hmel ngei mai.
"Rinhlupui" sehchilh zeta a tih chuan a ngei tur tawk lekin
"Umm" ka ti fan raih a.
"I hmelchhe lutuk"
A tih chuan amah pawh a nui lek lek
"Dawt i sawi a nia Curly" nuihza aw lek lek a ka tih chuan
"teuh lo" a ti hlar a.
"En mah la, helaia hmeichhe awm zawng zawng mit ka chungah a fu tih i hmu lo em ni?" intithei deuha ka tih chuan ner sawkin
"Teuh lo"a ti leh hmuk.
"Curly, Mizo mipa man to ber zinga a ṭha ber i bulah ka awm a nia, vannei inti hle rawh" ka tih chuan
"I mumang a nih chu" a ti duh lek chauh.
Dawt ka hrilh pawh a ni tawp si lo a, Nikum khan Diktawn monthly news paper-in Mizorama tlangval manto an thlanna ah min rawn thlang ve ngei a lawm.
"Rinpui", min rawn kotu lam ka hawi chuan Zorina leh Sentei an lo ding ran a, "Ehe! In va tawn tlai awm ve, tunah kan inhmu chauh a" ka tih chuan an rawn thlen ve chiah thu a sawi vat. Curly en pahin inhmuh lohna a rei tawh hle mai a ti sup a
Curly chuan ngawi rengin a lo en reng ringawt.
A mit aṭang ringawt chuan a ngaihtuah tur awm pawh a hriat theih loh. A fiah em em ringawt.
"Miranda" nui sen sena Sentein a tih chuan a bu nghut a,
" Ti rawh u, in rawn thleng tawh bawk a, puitling ho bulah i kal tawh ang u"
Ka tih chuan an bu nghut hlawm a, heta awm reng zawng boruak a nuam lo ru riau.
Puitling hoin min lo hmuh chuan an phul hlut a. "Keini ai pawn in naupan chhiat hmel zawk" ka tih chuan hmeichhe ho chu an nui har har hlawm.
"Rinpui engtikah nge i let thlak leh ang?"
Zorina nuin a tih chuan ka hriat mai rih loh thuin ka chhang a.
"Zorina leh Sentei chu inneih lamte in sawi tawh em?" Kanun a tih chuan an zak ve deuh em maw ni nui var varin an bu nghut ringawt.
"Nute, Pate….kei chu ka tihtur ka tizo tawh a, ka thawmhnaw hak hi ka ning tawh lutuk! Ka lo va haw ang" ti tu chu ka melh deuh rawm rawm a, hrethiam angin a awm duh ṭhak lo leh nghal.
"Thu i sawi lai khan i lang cool teh mai a nia" kanun a tih chuan "nute, zanin chu ka smart lo tiraw.. hepa vang vek hi" min rawn melh paha a ti deuh hlar chu an nuih var var hlawm a.
"Miranda…….tumahin i thawmhnaw hak tur kan thlansak theih loh lai che in eng tin nge Rinpuia hian a thlan sak theih che a?"
Zorina nuin a tih chuan a meng buai nghal nak. "Nute...ka…."
"Ka va thlah a nge" ka tih chuan a thawhuai tih ka hria. Ngawi rengin kan inzui chhuak a.
"Tuman i thawmhnaw hak tur an thlan sak thei loh lai che in ka thei bik a nia, ka van intithei tak em" ka tih chuan ngawi mai mai rawh a ti hmuk.
Ṭawngkam te hi nei chhumbung ve thei tak a ni.
"Zorina nen in inkarah eng nge awm?"
Thutak zawka ka tih chuan a ngawi deuh vang vang a.
"Curly…" min chhang mai dawn emaw ka tih hnuah min chhan loh vang chuan ka ko deuh sup
"Engmah a awm lo"
"I en dan kha ka hre vek"
"Engtin nge ka en a?"
"Romantic deuhin" titau aw lek leka
Ka tih chuan a nui deuh hak hak a
"Curly, i nui mawi tak hi engtia rei nge i thup tawh?" ka tih chuan i sawi awm zia ka hre lo a ti deuh hluai a.
"Rinpui, Delhi ah chuan i let leh dawn em ni?"
Kan ngawih vang vang hnu chuan a rawn ti deuh sap a.
"Ti nge, min ngai dawn a ni maw"
"Uang lo teh"
"Haha..tak takah chuan, i driver-a ṭang mek tlangval hmelṭha lutuk, chu mai pawh ni lo pian la nalh tel cheu hian hna ka nei ve a!
Ka tih chuan eih loh hmel zetin a lo ner nawng a.
"Engtikah nge i kal ang?"
"Hmeichhe pakhat, a nun hluite theihnghilh a, ama thiam loh a ni lo tih a pawm hunah leh hma lam pana a inkharkhipna zawng zawng a hawn hunah"
Ka tih chuan a hmel chu a ngui deuh riai a
"Chuan engtikah nge i lo kir leh ang?"
"engkim a pawm thiam a, a nui hmel mawi tak nen 'lo kir leh vat rawh aw' tia min auh leh hun chuan ka kal lui kher a ngem ka hre lo"
"chimawm viau suh"
"Curly, kir leh tura kalsan che ka duh tawh lo. Chuvangin i inkharkhip tlatna a ta lo chhuakin vawikhat chiah keimah min rinchhanin ke i pen leh thei lo em ni?"
"Engvangin nge hetia i tih" lungchhe aw lek leka a tih chuan
"I khawharnate ka hmuh hmaih lo, mal ngawih ngawiha i inhriat tlatna te hi ṭhiah sak che ka duh. Famkim lo nia i inhriatna lak ata hruai chhuah che ka duh a, i nun hlim taka hmang turin ka duh che.
I ṭah changa hnem tur che in, i lungngaihna ṭawmpui che a, i hlimnaah lawmpui tur che in keimah ah rinna i nghat thei lo em ni?" ngenngawl zet chuan ka ti a.
"Kawng kha en uluk rawh"
A tih chuan "pehhel suh" ka ti hmuk a.
"Miranda…" min chhang loa a ngawih reng vang chuan ka ti hluk
"Ka thei lo.."
Zawi sapa a tih chuan ka thaw chhuak hawk a.
engtin nge a rilru sak leh thinlung khauh lutuk hi ka tih nem tak ang.
Karkhat dawn lai chu min pehhel dan a zawng ngar ngar a, min pehhel char char i ti zawk teh ang. Naktuk-ah ka let tawh dawn avangin biak ngei ngei ka duh teh lul nen. Mahse ka biak tur chu sawi loh ka hmuh theih turin a inlan duh eih lo.
A phone number tak ngial pawh ka lo nei lo hrim hrim tih ka hre chiah. Zorina ka dil mai a ngai dawn a ni.
Hotel kawta ka tei nghauh nghauh lai chuan a rawn chhuak hlawl a. Min hmuh thut vanga kal sawn leh nghal a tum chu ring leng lawnga ka koh vang chuan kal lui tawh loin a ding ran a.
A dinna ka va thlen chuan "eng nge i duh?" bak hlar chuan a lo ti a, "engmah" ti supin a ban vei lamah ka vuan nghal zat. "Eng thil nge i…. "
"Curly, naktukah ka let dawn" a sawi zawh hma chuan ka lo tih khalh a.
"Tunge pawi ti?"
"Nangmah.."
"Teuh lo"
"Pawi i tih leh tih loh hre turin ka hrilh lo che, ngawi renga kal ka duh loh vangin ka hrilh che a nih chu".
"I kal leh kal loh ka ngaihven lo"
luhlul zeta a tih chuan thudanga chhang tawh loin
"lo in enkawl ṭha ang che" tiin ka kalsan a.