MIRANDA Chapter10 & Last Chapter by Tetakte-i

Episode kal lai dah luhna

Moderator: writers

Tetakte-i
Posts: 13
Joined: July 3rd, 2020, 3:21 pm

MIRANDA Chapter10 & Last Chapter by Tetakte-i

Unread post by Tetakte-i » September 15th, 2020, 11:15 pm

MIRANDA









Chapter10 & Last Chapter











By


Tetakte-i









🌼🌼🌼

Miranda Pov








Muhil thei loin ka inlet ka inlet a, engtin nge ka tih ang? Ka duh tihna mi? Ni lo, ni lo...a ni pawh Zorinpuia ang in ka ngaina ringawt, ka duh lo ang..ka duh tihna a ni kher lo.

Ngaihtuahna buai zet chuan ka inlettawn sek a. Naktukah Delhi ah a let dawn chuan engtik ah nge ka hmuh leh ang tih pawh ka hre si lo. Mahse, kal lo tura ngen chu ka duh bawk si lo, ni lo, duh chu ka duh a mahse, ka hreh a ni, ka hreh takzet.



Ni lo ni lo, Zorinsanga sawi kha hei hi em ni? I kain I duh loh thu sawi mahse I thinlung chuan a pawm thlap ang.


Ahh...ngati nge ka thin hi a phut dut dut le?








🌼🌼🌼










"Miranda. …...Miranda….., Rinpuia let tur I hria em?" files pawimawh ka en fel mawlh mawlh lai chuan Zorinan a rawn ti lut hlawp hlawp a, a hah hmel kher mai.

"Hria e" ka lo ti hmuk chu


"Kal lo turin I dang lo em ni?" dem lek lek hian min ti nghal tawng

"Eng aiah nge ka dan ngawt ang?" ka ṭawngka chhuak chu mawi fahran lo mahse ka rilru a hlauthawng tak zet.


"Miranda, mahni thinlung duhzawng pawh ti ngam lo, mi dawih zep tak I ni.." vin deuh hleka a tih chuan a aia vinin

"Zorinsang.." ka ti hrawk..

"I thin a rim em ni? Hah…..I thinrim reng ang chu, Miranda, vawi khat chauh chu I thinlung sak lutuk kha han ti nem ve teh...vawi khat chauh…"
a tir lam ngeiawm viau mahse a tawp lam chu ngenna aw a ni. Ni e, ka duh a lawm...mahse engtin nge ka tih chuan ang. Tunah chuan a thlawk chhuak daih tawh mai thei a sin.

"Eng nge tih tur pawh ka hre lo" zawi zet chuan ka ti sap a, ka dar a hmer vang vangin

"Miranda … nangmah I inhuat lehna tur thil engmah ti suh, aw…...tunah hian Lengpui lam panin a kal mek..I la dang hman a nia"

A tih chuan hmanhmawh zetin ka tlan chhuak a, car chahbi pawh ka Keng lo...let ka tum chuan Zorinan min pe hlauh.


Hmanhmawh rilru zetin Lengpui lam pan chuan ka inkhalh chhuak a, kawng laka trafic zam leh zeuh thin te chu ka ngei hlur tawh.



Vaivakawn ka pel fel tihah phone call ka dawng a, Ka chhan rual ruala Rinpuia accident thu hlauthawng zeta Zorinsangan a rawn sawi chuan

Car ka tiding nghal dawt. A sawi pawh ka hre zawm tawh lo. Mu mal ka nei pawhin ka hre lo..engtin nge a nih theih..a thi lo ang..a accident ringawt, engtinmah a awm lo..a ṭha vek, a thi lo, a ṭha vek.








🌼🌼🌼









"Rinpui, kal suh...min kalsan suh..I tello chuan ka khua a har lutuk ang. Mawh….lo kir leh vat rawh tih pawn ka ngen loh che hi.

Vawikhat min kalsan tawh a, engtin nge min kalsan I tum nawn leh theih. Rinhlupui..kal lo turin ka ngen che a nih chu. I sawi kha I hre tawh lo mi, kir leh tura min tih chuan ka kalsan ngai lo ang I tih kha….


Min fiam tiraw… I fiamthu thawh hi a nuihzat thlak miah lo a nia aw…"


Damdawiin khuma Rinpuia engmah hre lo a mu chu tap pur chungin ka an khum a, nutei leh Patea ten lainat hmel taka min lo melh te chuan ka tah an tichhuak zual.








🌼🌼🌼









"Miranda...a tha leh vek mai ang". Cabin chhungah chuan ka vei nghauh nghauh a, Zorina thu sawi chu ka ngei hle.



"A tha mai ang in tia, karkhat lai a ni tawh… a la harh miah loh hi" ka ti hlar a.


Min chhan a tum lai takin Doctor a rawn lut a, Doctor chu pan vatin tun thlenga a la harh lohna chhan ka zawt nghal thuai.



"Amahah hian harsatna em em engmah a awm tawh lo, a chhan kan la hre bik lo.
Mahse in thusawi te a hre thei vek a nia, fimkhur ang che u. A tan ngaihthlak nuam lo thu sawi lo u la",
Drip khai endik mawlh mawlh pah chuan a ti a, a taksa eng eng emaw lai a en kual leh hnuah a chhuak zui nghal mai a.






"Miranda…..engtikah nge a harhchhuah dawn kan hre si lo a" Zorinsangan

A tih chuan ka lungchhe nghal em em ringawt.

"Miranda….I rilrua I paite kha inbun ruah nan hmang rawh. I sawi a hre thei a nih chuan a ngaithla che tihna a nia".

Ka darah beng thek thekin min chhuah san zui nghal.


'Ka ngaihtuahna te maw! Ka rilrua awm maw!'


Rinpuia mutna bula ṭhuthlengah ṭhuin a hmel dang lep te chu ka en a, a hmui hrisel tih hriat ngawih ngawiha sen deuh chek ṭhin kha a dang lep a, a hmelṭha tak ti ṭha leh zual tura a nui hmel hmuh tur awm lo chuan lung a ti awi lo takzet.

A kal tawh tur thu a sawi Laia ka ngaihsak loh vanga a rilru na hmel kha ka theihnghilh thei lo.


A hmai cher deuh riak chu ka chul a, a mit ko atang a hnarkawn te, ka kutin ka thai riak riak a.




"Rinpui, harh ve tawh la...aw...I muhil rei tawh e. I lo harh hunah chuan maw thil tam tak hrilh tur che ka nei a, zawh duh che leh ngen duh che te….

Ti hian khumah min muthilh san reng I tum em ni a, a fair lo aw….

Nangmah vanga ka rilru buai zia hi I hria em?, I lo harh hun ka nghak char char thin tih I hre lo em ni? Tui taka I muthilh lai hian khawhar takin hun ka hmang a sin.


I hria em ka hmuh hmasak ber che khan ka ngaina nghal em em che a, min man tuma min um kual thin lai te, I bula infiam ve ka duh vanga ka ṭah thin lai te...Khang hun kha ka nuna hun duhawm ber an ni a sin, min kalsan ni khan nasa takin ka ṭap a, zanah ka mu thei lo a, chaw ka ei tui lo a, infiampui tur pawh ka nei ngai lo. Mahse ka lo ṭhanglian ve zel a, ṭhian pawh ka nei ve zel a, ka khua pawh a har tawh ngai lo a, ka chaw ei pawh a tui a, ṭah pawh ka ṭap ngai tawh lo.


Tu nge i nih pawh ka hre ta mang lo che a, Mahse chuti chung chuan theihai kung buk hnuaiah khan nitin ka kal ziah ṭhin. Min lo nghak reng rawh tia ka benga rawn sawith an awm thin vangin.


A rualin ka nu leh pa ka chan a, ka pi leh pu leh ka ṭhianṭha ber ka chan bawk a. Tleirawl duhawm tak, nun duhawm tak neia hlim reng thin kha nun ṭihbaiawm takin a thlak a, tleirawl hlim thei tak kha a nui ngai ta mang lo a, duhawm tak ni ṭhin kha tawrhhlelhawm tak a lo ni ta a ni. Hma hun eng tak thlira duhthu sam thin khan hun thim leh lungchhiat thlak chu a hmachhawn a ngai a, tlanchhiat san duh mahse a chhungte phuba la turin chung chu a hneh vek a ngai si.






Vawikhat pawh ka ngaihtuah ngai lo che a, hriat pawh ka hre tawh hek lo che.

Huatnaa khat thinlung chu thunun dan ka thiam lo a, ni lo...ka inhneh tir a ni zawk mah..ka chhungte tan phuba lak ka bat a ni a, ka hriatrengna duhawm tak tak te, ka thinlung leh ka ngaihtuahna zawng zawngte nen khan phuba ka la thei ngai dawn lo tih ka hriat avangin ka thinlung huatna chu ka hmachhuan ta a ni.



Kum tam tak hnua ka hmuh leh hmasak ber che khan ka haw em em che a, a chhan chu fapa laktlak loh mahni chhungkaw sumdawnna pawh humhim zo lo angah ka ngai che a, mahse India rama advocate ṭha ber pawl I lo ni reng a. I hria em, I hna chung chang ka hriat tirha ka awih loh zia chu maw... mize harhvang tak leh thawveng ve tak, enghelh em em nei bawk si lo kha engtin nge advocate a nih theih?

Mahse ka lo hrechiang lo takzet che tih ka hriat phah a, hun kan hmang dun tam telh telh a, ka huatna che kha ngainatna in a thlak a. I bulah chuan keimah intheihnghilh ṭhak khawpa ka khawsak chang a awm ṭhin..min ti nui a, min ti ṭap a, min thlem leh a, a tithei tu awm chhun I la ni.

Nangmah rinchhana ke pen chu ka duh lutuk a lawm, mahse ka hlau a ni. I hrethiam kher lo ang tiraw...eng ber nge ka hlauh hriat si lohin hlauhthawnna in ka khat tlat a, chuvang a nia ka thei lo ti a ka chhan che.


I kal tur thu I sawi lai khan ka mangang tak zet a sin. Engtin nge ka awm ang? Khawhar takin ka awm leh dawn em ni? A hma ang tho khan a lo kir leh tawh lo a ngem? Zawhna hlirin ka khat a, mahse, ka chapona vang bawkin kal lo tura tih che kha ka thei lo.


Rinhlupui, ka duh che...i hria em ka duh thu che ka sawi a nih chu, lo harh ve tawh la" ka biak mawlh mawlh lai a



"Kei pawhin" thawp supa rawn titu chu phawk lutukin ka en a, fiah em em hian min lo en ngur a nih chu.

"Nang...Nang hi" hamhaih zeta ka tih chuan


"Harh turin min ti sia, ka rawn harh" a ti sam et.

"I harh maw! Ni lo ni lo, na te i nei em?" A rawn harh vang chuan ka lawm takzet. Mahse tunah teh thut ngati nge a harh le

A pang te ka dep a, a taksa ka thlek kual nghal zung zung

"Engmah na ka nei lo, tunah chuan a na ber ka thinlung pawh a dam tawh"

"Maw!"

"En la hei, ka ṭha vek...na ka nei lo"



Kut beng chunga Zorina rawn lut chu ngaihna hre lo lutukin ka en reng ringawt


"Eng nge hei hi a awm zia?"

"Miranda..Miranda… chak lohna lai i nei ve tih i pawm tawh a"
Min tih el nge, a lawm vang pawh ka hre lo a awka chhuak chu a nung deuh sarh a, mahse kei erawh ka la hamhaih hle thung

"Maw!" Mak ti zeta ka tih chuan


Rinpuia accident tak tak loh thu a sawi nghal zat. Chu phei phei chuan mak min tih tir leh zual
"Eng…"

"Kan ruahmanna mai mai a lawm.."

"Nang.."


"Ka nau duhtak, mal tak leh khawhar taka i nun hmang zel turin ka duh hlei nem che"

ka sawi tur pawh ka sawi zawh hma hma chuan min lo sawi khalh zung zung a.

A nih chuan accident kha a lem maw..

"mahse karkhat chhung lai nikhaw hre loin i awm sia"


"Curly….nikhaw hre loa awm der te chu ka thei lutuk a lawm, i tan a nih phawt chuan kum za pawh ni se ka awm thei ang chu"
Nuih za lek leka a tih chuan min ti lawm lo takzet. Hauh hrep tuma ka ang zuau tawh chu min lo ṭawngkhalh vangin ka chip leh hmak




"Delhi ah let ka la tum reng reng hlei nem curly, i mal lo a ni tih i hriat a, i kianga mi te hian enkawl che kan duh a, hmangaih che kan duh a ni tih i hriatthiama i pawm theih nan lem kan chang ringawt a lawm..


Ka nu hnenah nutei bula ka let tur thu sawi turin ka ti a, nutein a hrilh ngei dawn che tih ka hria...mahse ka let tur thu i hriat hnuah pawh min la pehhel char char tho a, Zorina biain hetiang ruahmanna hi kan siam ta a ni".
A tih chuan thinrim viau angin lang mah i la ka chhungrilah chuan ka lawm takzet a ni.

"Engtin nge karkhat chhung i nat der char char theih zawk a" ka tih chuan

"Hmangaihna duangtu khuanu hian hmangaihnaah hian ngaihtuahna fim hman theihna te, finna te leh thildang hmuh theihna te hi a lo dah tel vek lo a, min en la tunah pawh hmangaihna chuan min bual â zoin hetiang thil min tih tir tak hi" a ti deuh duah..ka man pha ve ṭhak nang..mahse, maw! Hmangaihna a ti em ni?


"Hmangaihna a?"

"Curly….kum sawm mi ka nih lai aṭang tawh kum sawmhnih pali ka nih thleng hian maw le!"


A tih chuan ka meng bial kawk..Min hmangaih a ti a nih chu.

"Mahse naupang mai i la nih kha"

"A hun laite kha chuan ka hrethiam reng hlei nem..tun hnuah chauh hian a lawm ka hriat"

"Rintlak loh" ka ti hluk chu ka kutah rawn vuanin engtin maw a rawn ti nawn sup a.

"Hmeichhe sam tawi mit met, te chum zet bulah khan i sawi ve tho ka ring ka ti mawle"

"Chutiang ka hre lo"


"Rinhlupui..engvangin nge ka pehhel char char che i hre miah lo tak tak a ni maw?"

"I luhlul vang"


"Hah….kha mi ni khan ka rin thu che hrilh tur che in ka rawn kal a, nangmah rinchhana awm ka duh thu hrilh tur che in ka lo kal a, mahse i office kawngka in kharpui lo aṭang khan hmeichhe pakhat nen in inkuah lai ka rawn hmu che u a, ka rilru tur i hrethiam pha em? Rin ai che in rin loh che ka thlang ta zawk a nih kha".


Ka sawi lai pawn ka thin a la rim hlur thei.


"Curly, kha te chuh.."

"Sawi ta che"


Zorinsanga lo nui put put chu ngei zetin ka melh a

"Ka nau duhtak, high school kal rual lek a la nih kha" nuihza insum zeta a tih chuan hmeichhia a ni tho a lawm ka tih khum a


"Curly…..a hmel i hmu em?" a tih chuan lu ka thing na na a, "han hmu la chuan min han pehhel dawn loh tehreng nen" a ti zui nang nang a

"A lo nih tak chu a...i dam ṭha bawka haw tawh rawh.."

"Ka tih chuan i rualin ka haw dawn" a ti hmuk a.


Hotel tlawh ngei ngei ka ngai, vawiin chiah kalna hun tur ka nei tawh a, a bak chu Hotel Maza ah tih tur ka nei tawh rih lo.


"Vawiin chu Hotel-ah kal ka ngai a, naktukah kan inhmu dawn nia".
Ka bag en fel mawlh mawlh paha tiin ka chhuahsan zui nghal.


Mawl dun lutuk mai. Engtin nge thihna te infiam nan an hman theih zawk..atthlak lutuk.








🌼🌼🌼







Hotela ka tih tur ṭul ang zawng zawng ka tih fel hnu chuan hah hnepin in ah ka haw a, rinpuia bula ka awm deuh chawt vangin in ah ka awm mang lo. Zanah lah nise vawikhat pawh ka mutthluk san eih lo. Karkhat chhungin ka mu hil miah lo tihna nih chu.


Sofa ah ka ṭhu awn duai a, ka chau ve takzet a ni ngei ang ngaihtuahna mumal pawh ka hmang thei lo.


Thil rimtui zet nam veng veng chuan ka hnar a verh zar mai, ka pum ri nghal rawih rawih chuan ka rilṭam zia min hriat chhuah tir. Tunah dar9 a ri dawn hnai tawh zanriah tak ngial pawh ka la ei lo.



ka meng diar diar a,engtik laiin nge khumah ka lo mut a, sofa ah khan thatchhe zetin ka ṭhu a, ka lo muhil daih a ni maw...mahse engtin nge khumah ka mut daih theih le


"Curly….Curly…"


min au lawng lawng tu chu tunge tih ka hai lo nasa, mahse engtin nge a lo luh theih.


"Curly.." kawngka rawn hawng tu chu ka melh nghal rawm rawm. "Engtin nge i lo luh theih" Ka ti nghal tawng



"eng ang pawhin hlauh nei loin inveng zo mah la vawikhatmah kawngka kalh theihnghilh tawh ngai suh".
A tih chuan ka ner nak a,



"dar9 a ri dawn i ril a ṭam ve em em lo em ni? Mut i va thei ve"
a tih zawm nghal zat chu ngei lutukin ka melh

"I nat der vang a nih hi"


Ka tih chuan a nui tawi tak a.


"Ka hria e, lo kal rawh….i pum ri reng kha ka hre hne"

In hnuai lamah min kai thla dawrh dawrh a.

Dining table-a eitur lo inchhawp ṭeuh chuan ka chil zu ti put a maw le..zahthlak hian.


"heng hi i siam vek em ni" phur zeta ka tih chuan a bu nghut nghut a.

"A tui takzet"

"I fel chuan nitin ka siam sak ang che" intithei fahrana a tih chuan ka nuih sen sen a.










🌼🌼🌼








"Nu, pa..min lo hmu a ni tirw, tunah chuan khawhar takin ka awm tawh lo a nia aw..pi, pu, in tunu hi a nui ve leh tawh a nia..nangni pawh hlim takin awm ang cheu aw..
Nono, i ṭhiannu hlim hmel hi i hmu tiraw..i thinrim em? I bulah ni lo midang bulah ka nuih i phal ngai loh kha..i telloin hlim takin ka nuih hi..min hau dawn em? Ka ngai lutuk che".

Ka mittui tla chu ka hru zeuh a, Thlan lam hawia Rinpuian


"Nute, pate….in fanu hi ṭha takin ka enkawl ang rawn ngaihtuah reng reng suh u aw..
hlimna zawng zawng erawh ka tiam thei lo, mahse, ka theih tawkin a hlimna tur tih ka tum zel ang".

ka kut hum chunga a tih chuan ka nui deuh sak a.


"Curly..keimahah rinna i nghah chhung chuan ka ti beidawng ngai lo ang che. Hlim tak leh thlamuang takin ka kiangah…"


"Hlim tak leh thlamuang takin i kiangah ka awm zel ang"

Nui var vara ka tih chuan nui sukin min kuah vawng vawng a.





🌼🌼🌼





Huatna hi mihring chaklohna berte zing a mi a ni a, i inhneh tir a nih ngai chuan tal chhuah a harsa hle tawh ang



Huatna chu huatnaa chhanlet a nih chuan a lo punlun ṭhin a, hmangaihna hi huatna tur(poision)thahna ṭha ber a ni.





Tu emaw thinlung taka hmangaihtu che i tawn a, i hmangaih tak i tawn hunah chuan i nun mangchhia ang mai a hreawm harhchhuah san i chak em em ṭhin kha mang duhawm berah a chang thei a.





Kan nuna vanduaina kan tawh te pawh hi a ṭangkaina ngaihtuah chuan duhawm tak a ni ve thei tho.







Tunah chuan keipawh huatna, hlauhna, mi dang rin zawh lohna leh mal ngawih ngawih nia inhriatna te ka nei tawh lo va,





naupang duhawm tak, samkir chiat neitu mi zawng zawng ngainat ṭhin Miranda Saihlupuii kha a lo kir leh ta ni mai hian ka hria.




(🌼a tawp deuh thut a😁 ka ziah tirh aṭanga duhsak taka min chhiar saktu te in chungah ka lawm tak zet zet a, in mi fuihna thu mawlh kha ka tan a hlu, nangmahni vang liau liaua story pakhat ziak zo thei ka ni tih hi min hriat sak u la, ka tan hian in hlu tak zet. Naktuk zan aṭangin regular tawkin 'Chemte Thla' chhiar turin ka rawn dah leh nghal dawn a, min lo chhiarsak leh ṭheuh dawn nia. Chhiartu zawng zawngte in zavaia chungah lawm thu ka sawi mawlh mawlh e🥰🌼)



Link:
BBcode:
HTML:
Hide post links
Show post links

ADVERTISEMENT (A hnuai a milem hi a nia hmeh zeuh tur chu)
Post Reply

Who is online

Users browsing this forum: Google Adsense [Bot] and 116 guests