TOXIC_LIPS Chapter - 9 By : Msi (Hmeichhe Naupang Tereuhte)

Episode kal lai dah luhna

Moderator: writers

Msi Miluhlulnui
Posts: 274
Joined: October 18th, 2019, 7:46 pm

TOXIC_LIPS Chapter - 9 By : Msi (Hmeichhe Naupang Tereuhte)

Unread post by Msi Miluhlulnui » October 17th, 2020, 10:41 pm

TOXIC_LIPS #CHAPTER -9

By : Msi (Hmeichhe Naupang Tereuhte)


IMG_20201017_223608.jpg
IMG_20201017_223608.jpg (36.42 KiB) Viewed 5988 times



Bag dang chu ka en leh tah pawh chuan ka bungrua tho alo la awm bawk. Kawngkhar chu ka hawng sawk sawk a inchhungah chuan ka tlan lut nghal a ka hawikual nghal ruai bawk. Inchung panna step ațanga ka bag ngei mai ka pa ngeiin a rawn khai thla lai ka hmuh chuan ka ding chawt a, a hnungah ka nu in a rawn zui bawk.



"Engthil nge in tih hi? Engvanga ka thawmhnaw te saw pawn lama dah nge in nih?" Ka ti țhat, ka aw an hriat rual chuan an pahnih chuan an rawn hawi a step-ah chuan an ding ve ve "i rawn thleng hman a a lawmawm e... i bungrua kan lak thlak hmaih ho khi han la thla ve nghal rawh" ka pa ngei chuan a rawn ti a nih chu, ka thaw chhuak hak.



"Thil awmzia hi sawifiah rawh u.... ka bungrua te hi ka phalna tello in ngatinge in lo khawih ve ngawt" ka ti leh țhat a, ka thusawi ngaipawimawh lo zet hian an rawn chhuk a min kal pelh a tum rual chiah chuan a banah vuanin ka lo pawt ding chawt!. "Sawi ta che u" ka ti leh vak a, an pahnih chuan ka en tawn zak zak bawk.



"I thawm dîm rawh, bengchheng siam lo la aw ka vîn hmang bawk suh. Tunah hian i nu in i nau tur a pai mek he inchhungah hian aw ka vîn hmang tawh suh" tiin ka pa chuan chiang zet hian min hrilh, a thu min hrilh ka hriat rual rual chuan engkim chu a reh nghal dûk ni maiin ka hria. Ka pa ka en a, ka nu ka en a, an pahnih chuan ka en tawn zak zak a a tawpah chuan ka nu pum chu ka en a alo dawm rân bawk.



"Chuan.. a nih engvanga ka thawmhnaw pawn lama dah chhuak nge in nih? Ka nu rai nen hian enge inzawmna an neih?" a hma ai zawngin ka aw pawh ka bei nêm a mahse tunah hian thinrim chak zek zek na in ka khat thung. "I nu in naute a neih hma chu khawiah emaw riak chhuak mai rawh Hotel-a i riak duh a nih chuan i awm man ka pek sak vek ang che. In a i awm a nih chuan aw ka vîn i hmang anga i nau lo piang tur tan a țhalo ang chuvang chuan ka thusawi hi âwih la zâwm mai rawh" tiin ka hmaah tak chiang zet chuan min hrilh a.



A thusawi zawh chiah avang chuan na zet hian ka thaw chhuak nghal hawk! Ka nu a rai a chuan kei in ațang min chhuah tir thung a naute tan ka țhalo ang ah ngaiin. Ka pa ngeiin chutiang thu chu ka hmaah tîm chhinna pawh nei miah lo in a sawi a chuan ka thawmnaw te pawh pawnlamah an lo dah vek bawk.



"Engtin nge i theih zawk?" Ka rilru na lutuk chuan ka ti chhuak țâwk! A ban a ka vawnna ka kut chu rang zet hian ka la sawn nghal bawk "a hma pawn ka hrilh tawh che kha ka thusawi i zawm lo a nih chuan ka duh apiang ka ti thei ka tih kha chuan tunah hian ka ti bawk. I nau tur alo pian hunah kan ngaihtuah țha leh dawn nia" a rawn ti leh chat a, ka tawlh hnung dâwrh! Ka âwm chu ka dawm nghal bawk a ka â vekin ka hria.



"Pa... engtin nge hetiang hi ka chungah i tih theih zawk? I fanu ka nih hi... chuan i fanu chu a nau lo la piang chhuak tur vangin in ațang i hnawt chhuak a engtin nge i theih zawk pa?" Ka ti tuarh, ka rilru na lutuk avang chuan ka țah a rawn chhuak nghal ut ut bawk.



"Hetiang ti tura min nawr lui tu chu nangmah ini nangmah hi!. Ka fanu ini, i pa thu i zawm tur a ni bawk, mahse chutiang chuan pakhat mah in i awm lo i sual em em a pa te i hnial pâng pâng bawk a mahni nu ngei pawh ngeiawm tak tak in i țawngkhum bawk a khatiang kha ka fanu atan ka pawm theilo. Ka fanu ini duh a nih chuan ka thusawi zawm ang che, i nu hi zah takin bia la thil thleng te kha theihnghilh vek la chumi i thei dawn a nih chuan he in a i awm hi ka phal chauh ang i thei dawnlo a nih erawh chuan i chhuak ang tunah hian min nawr luih a min chhaih kawlh tum hlek suh ang che" a rawn ti leh phiar phiar, a thusawi zawng zawng chu a mal te te in ka chhinchhiah nghal vek ni berin ka hria.



"Duhtak... i ti mah mah in ka hria i fanu ve tho a nih hi" ka nu chuan ka pa ban a rawn vawn pah chuan no zet hian a rawn ti ve leh a ka pa chuan nghet zetin a kut alo hûm sak chu chu ka melh ngar ngar thung.



"Ti mah mah lo, lo țan kha a țul bawk lo ang, a tana țha tur a ni hmeichhia a ni a hmeichhia a ni tih inhria se a nundan tur dik takin nung bawk rawh se hetiang nun țawp lutuk hi ka fanu atan ka duh lo ka beng ka lo chhu ngawng rei mah mah a ni khawtlangah pawh min ti zak zozai tawh" a rawn ti lehnghal zat a an pahnih chuan min en kalh reng bawk.



"Ava mak ve..." a thusawi zawng zawng a rapthlak lutuk avang chuan ka ti ringawt, nuih luih ngial ka tum a mahse harsa ka van ti teh lul em! Ka țah a chhuak ut ut zawk, engtin nge in awm ve ang in pa ten in hmaah khatiang thu kha hrilh ve ta cheu sela engtin nge in awm ve ang?? Nuih luih han tum teh u kei ang tho hian harsa in ti ve tho ang tiraw?.



Ka sual a, mi reng reng han zah pah vak ka nei ngai lemlo tih ka hria ka nu leh pa te ngei pawh zah lo tak tak in ka be țhin, ka nundan a sawi zawng zawng kha pakhat mah kha phat tumna ka neilo thudik a ni miau mahse an mahni hi loh theih loh a hetiang a min siamtu hi an ni tih engtin nge an in hriat loh theih. Fanu sual tak ni mah ila zah tlak nu leh pa angin nung ve se chuan sual tak ni mah ila ka zah ngawih ngawih ang mahse chutiang chuan an nung bik tawp si lo. Ka nundan chauh an sawisel a mahse enge an nih bik engmah an ni bik tawp si lo.



Ka nundan țhalo lai point out tur an hre țeuh, chutiang chiahin keipawn ka hria mahse pakhat mah ka la sawi chhuak ve lo, khami ni a thil thleng zawng chiah kha ni ka la sawichhuah ve ni, kei erawh chu ka nun dan ka sualna zawng zawng pawh ka hmaah tak an sawi siah siah thei vek a hrechiang ber âwm ang zia zângin an sawi thei vek bawk a kei erawh chuan pakhat mah in ka la țawngkhum ve lo.



"I awmdan ka enliam mai mai rei mah mah a ni, nizanah pawh i nu Sawmpuii a rawn kal a i thil tih țawp tak hmang bawkin a pasal ilo awmpui a ni âwm a veng mipuite hmaah min ti zak lutuk. Hmeichhia i nih kha zahna chang hre ve rawh... mi zawng zawng in keimahni min dem hi rilru mumal tak pu a mahni nundan pawh siam țha rual ini tawh hetiang mai mai hian nung tawh suh... mipa hrang hrang hnena inzuar kual lo in hna țha tak...."



"Duhtawk rawh! Sawi tawh suh!" A sawi zawh hma hma chuan ka lo ti nghal tuarh, ka țah a rawn chhuak nghal ut ut a ka kut a khur ru dar dar bawk "bawihi pa, i thusawi kha...." ka nu pawh chuan a lo ti ve nghal zat a ka pa pawh chuan a thusawi a hrechhuak leh a ni mahna a che hrut a mahse ka kut phar chhuakin ka lo dang a, ka danna kut ka phar chhuah chu a khur dar dar 'mipa hrang hrang hnena inzuar kual....' ka thusawi chu ka bengah a ri nawn tluk tluk a, khur ru dar dar chungin mit ka chhing sawk!.



"Bawihi.. ka..." ka pa chuan a rawn ti a, kei erawh chuan ka lu lo thing nghek "khati pawh khan min ko tawh suh... chuan ngaihdam min dil pawh tum buai duh suh" ka ti khur dar dar, ka mittui a rawn tling nghal ruak a ka țah chhuah loh nan ka hmui hnuailam na zetin ka seh a ana zui bawk.



"Bawihi" a rawn ti leh.



"Aih... khati pawh khan min au tawh suh... khati pawh khan min au tawh suh engmah sawi tawh suh" ka ti leh tuarh a, na zetin ka beng chu ka hup nghal bawk a ka țap chhuak teuh kher lehnghal "ka tuar hnem tawk tawh in ti ve lo em ni ngatinge ka natna min la tih belh chhah sak?. Khatiang zawng zawng ka tuar kha in tan ala tawk em em lo em ni ngatinge natna min la siam sak belh zel a. Hmeichhe sual tak ka ni tih ka hria sawi nawn reng pawh a ngai lo chuan ka nihna pawh zêp buai ka tum lo ka nihna a ni zêp neih engmah ka tum lo ngatinge in fanu nundan chu fiah pawh fiah hmasa lo a khatianga in sawi phiar phiar theih zawk.



Kha mihring kha.. kha mihring kha.... keimah ngeiin ka sawm lui ami chutiang chuan an hrilh che u mi... oh! An va rapthlak ve, kha mihring laka in ba zawng zawng rul tur khan vawi engzah nge hna hah tak tak a ka thawh a mut mu pawh tuah lo a zan rei tak tak thleng ka men țhin in hria em? In mualpho hlau em em in hreawm takin hna ka thawk asin... mahse nangni erawh chuan ka nundan chu pawh a chhe lai chauh in hmu a. Khang hreawm tam tak leh natna tam tak tuar a ka țah lai te zawng zawng khan khawiah nge in awm? Ka kiangah min hnem tur pawhin in awm em? In awm lo.... zanah ka țap tlaivar țhak țhin a nangmahni ka ngai em em cheu a mahse.. nangni chuan in hmalam hun chiah in ngaihtuah a..." ka sawi hleithei lo, ka mittui a rawn luang thla a kut khur dar dar in ka hru leh tâwk.



"In thil tih avanga vengchhung sawiselna leh demna zawng zawng keimah ah an bur bun vek a vawi engzat nge vengchhung ațanga chhuak tura min hrilh țhin in hria em? Nangni chuan engmah in hre ve lo tak ang. Chung karah pawh chuan in mualpho hlau in in thlavang ka la hauh ve țang țang țhin asin... in zu in na man leh ba awm zawng zawng ka rulh theih nan khatiang hna kha thawh ka ngaih phah a.. keipawn hna dang awm se ka ti ngawih ngawih a awm se chu ka thawk bik lo ang loh theih loh a ni tih min hriatsak a hnêkin min la sawisel sak zawk a.... tu..tu..tun hun thlenga ka thiltih zawng zawng te pawh in tan veka ti ka ni tih min hriatthiam sak lo a. Pa... i hria em? Mi zinga i awm a rethei taka i awm ka duh loh avang leh pawisa i neih tlem bik ka hlauh țhin avangin mahni duhzawng pawh lei thei lo lêkin ka thawh chhuah zawng zawng i lakah ka chhung lut vek a mi anga in zinna a i neih loh bik hlau in zanah rei tak tak hna ka thawk a mahse chungte chu min hriatsak a hnêkin keimah min dem nan min hmansak leh a.



Heng thil zawng zawng hi in tan veka ti ka ni tih engtikah nge hriatthiam ve in tum... e, nilo nangni chuan engtikah mah hriatthiam in tum lo a ni tiraw? Awi leh! Ka lo theihnghilh palh a ni Hmangaihna in a bual â cheu tih in tan pawn fanu pawh ka ni tawh lo tak e.. in ațang ka thawmhnaw in lo paih chhuak vek a a țha alawm khang zawng zawng kha theihnghilh turin min duh a ni tiraw? A țha e, ka theihnghilh khawp ang mahse khang zawng zawng zingah khan nangni pahnih pawh hi in tel bawk. Engkim, a zawng zawng ka hrilh vek kher lo ang che u hriat pawh in mamawh hek lo a țha e, in duhdan chuan ka nung zel mawlh ang mipa hrang hrang hnenah ka in zuar kual anga hmeichhe sual tak ka ni tih in hre zawm zel ang vengchhung pawn keimah avangin an la diriam chhunzawm zel ang che u, a aia nasa in" ka ti a, ka sawi zawh rual chuan ka maimichhing nghal chawt a, bu nghatin ka thaw chhuak nghal ham ham.



"Tuna in fa tur pum chhunga la insiam mek kha nghakhlel takin alo chhuah hun tur thlir ula kei chu chhete pawn min ngaihven tawh lo ang che u. Alo pian chhuah hunah chuan hlimna tam tak nei mawlh ang che u in fanu hi ka lo thi ta a nih pawhin...ka ruang... oh! Ka kal a hun tawhin ka hria hlimna tinreng in neih ka duhsak a che u" ka ti a, an pahnih en chuan ka nui lui a chhuata ka bungrua an rawn khai thlak chu la in kawngkhar lam ka pan a min auhna pawh chu hrelo der hmak in ka thil khai chu pawnah chuan ka dah a.



Inchhungah chuan ka lut leh a, an dinna ah chuan an lo la ding reng "ka thawmhnaw pawh in hmu tenawm zo vek anga tiraw inchhung a tih țawp loh nan ka han la vat vat ang e aw" ka ti a, harsa ti zetin ka nuih lui a inchung step-ah chuan ka tlan chho nghal bawk. Ka room kawngkhar bulah chuan ka ding reng, a hawnna chu ka vuan a muangchangin kawngkhar chu ka hawng riai riai. Ka room chhung chu alo ruak vek a khum chungah suitcase pakhat te tlawng alo la awm bawk.



Ka closet te chu ruak tih hriat zet hian a inhawng huau a ka dawhkana ka thil dah zawng zawng pawh alo ruak vek a room chhungah chuan ka hawikual ruai ringawt bawk. Khumah chuan ka țhu thla a ka suitcase chu ka tuai zeuh nakinah chuan an fa lo piang tur kha he room-ah hian an awm tir ngei anga heng ka hman hnu zawng zawng te hi a ta an la ni vek bawk ang a tun hun hi he inchhung ka rah tawpna ber tu a ni tih ngaihtuah chuan ka țah a chhuak ut ut mai.



Ka mittui rawn luang thla leh tur chu ka hru nghal tâwk! Ka hmai chu hup in ka thaw chhuak nghal ham ham a "thih daih ka chak takzet a ni" ka ti sap bawk. Ka sam chu tuai chho puat in khum ațang chuan ka ding chhuak a, ka room ka lo ngainat ve em em chu ka enkual a "kan inhmuh tawh loh hmel sia i pu emaw i pi thar chu lo duat rawh aw... kei angin an vîn ve vak vak lo ang che" ka ti sap a, ka suitcase chu la thla in a khaina chu ka pawt dawk nghal a.



Inhnuai lamah chuan ka in khai thla a, an dinna ngaiah chuan an lo la ding reng "bawihte... ka thusawi kha ka sawi tum a ni lo.." ka pa chuan an mahni ka kal pel tur chu a rawn ti leh a, ka ding dat a ka suitcase chu nghet zetin ka hûm nghal bawk.



"Ka thinrim luat avanga ka sawi ania i ti dawn em ni? Imm... i thinrim takzet a nih dawn kha he inchhung a hreawm tam tak ka tuarna zawng zawng kha ka chhuahpui vek anga hlimna tam takin tuam thar leh vek ang che u. In fa lo piang tur hlim nui ri khan ka hlim nui ri kha dah bo se... in thinlung leh rilru ațang zawi muangin min paih bo tial tial rawh se aw. Kei ang mai mai a chhuak tur chuan enkawl lo ula, nun țha tak neih tir ula a duh apiang pe bawk ula in duat hlum lo chauh dawn nia. E, chuan taka a tawp nan mualpho miah lo a in la awm theih chhan hi in mumangah hrilhfiah tur che u in ka la rawn in lar ang" ka ti a, nghet zeta ka suitcase chu dawm in ka inher a kawngkhar lam chu ka pan nghal bawk.



Kawngpui bulah chuan ka thawmhnaw vel chu ka thiar phei a, a thim lai deuh ah chuan ka ding rân bawk. Ka phone chu phawrh chhuak in Zorema chu ka call hmasa a a vawikhat naah chuan a la lo, ka call leh a aw ka hriat ngai loh hian a rawn chhang a "Zorema a awm em?" Ka ti nghal sap bawk.



"Ah... hetah Damdawiin ațang Nurse Hlutei kha ka nia. Dr. Zorema chu damlo emergency deuh zai tur a nei a tunah operation room-ah a awm mek a, alo chhuah hunah ilo call tih ka lo hrilh dawn nia" a rawn ti a, ka sam chu tuai chho puat in ka thaw chhuak nghal ham ham.



"A ngailo... ka lawm lutuk aw ka lo call tih hrilh lo mai rawh" ka ti a, rang zet hian call chu ka ti tawp zui nghal bawk. Whatsapp-ah ka lut a min call tlang theih loh avangin damlo hmanhmawh deuh a zai tur a neih thu message hmang a min rawn hrilhna chu ka hmu a min rawn hrilhna ațangin darkar khat alo liam tawh bawk, min rawn hrilh tal alawm ka rilru chuan ka ti nghal sep a.



Ka bike ka kawl loh avangin Mama chu ka call a taxi a hmelhriat lo hruai tur leh ka bike nen lo phei turin ka hrilh a. A chhan min la zawt hman hram lehnghal, Nunui'n a fa a pai tih ka hria an inkara in rawlh phêt nuam pawh ka ti tehchiam lo keimah avangin an inkar te alo chhiat leh ka hlau takzet. Mahse manganna ka tawh apiangin amah bak ka pan ngailo a amah lo chu pan ka duh lo bawk chuvanga zanina tibuai reng pawh ka ni.




Mama ka nghah chhungin engmah ngaihtuah theih lohna tur tihtur ka zawng ngar ngar a, a chhan pawh thil thleng kha ka ngaihtuah duh loh vang a ni. Ka ngaihtuah a nih chuan ka țah lehnghal mai ka hlauh vang a ni pakhat a an mahni avanga ka mittui tih tlak leh pawh hi ka duh tawh lo.



Alo thleng a a hnungah taxi-in a rawn zui nghal bawk "mâm... please in maw heng zawng zawng hi i inah min lo dahsak pawisa chu eng zat pawh ni rawh se ka pe mai ang, țhianpa... khawngaih takin a thiar chhoh velah tlawm min lo ngaihsak aw pawisa chu i duh zat zat ka pe ang che" ka ti nghal vat a, Mama chuan mak tih hmel zet hian ka awmdan chu min en reng bawk.



"Hming... thil thleng a awm ami? Tinge heng zawng zawng hi lak vek a ngaih a?" Mak ti tih hriat zet hian Mama chuan a rawn ti a, amah chu ka en a a thim êm avang chuan ka hmu thei em em lo "nakinah ka lo kal hunah engkim ka hrilhfiah vek ang che tunah chuan khawiah emaw kal hmasak ka ngai a ka kal anga ka rawn let hunah ka hrilh vek ang che" ka ti a, a kuta a chahbi ken chu ka la a helmet pawh chu ka ban nghal bawk.



"Khawiah nge i kal dawn?" Ala rawn ti leh țalh helmet chu ka khum mawlh mawlh a "tunah chuan la hre rih lo law law rawh nakinah kimchang zawkin ka hrilh ang che, ka kal aw ka lawm lutuk" ka ti zung zung a, ka bike-ah chuan lawn kaiin chak zet hian ka in khalh chhuak nghal bawk.



Zarkawt lamah kual chho in Miniso bulah chuan ka bike chu ka dah a pa Thangkima te in lam pan chuan ka phei nghal bawk. Door bell chu ka hmet ri tlang tlang a, vawithum ka hmehna ah chuan amah pa Thangkima ngei chuan a rawn hawng a min hmu chu mak a tih hmel kher lehnghal "reilotê kan inbe lawk thei ang em? Eng emaw sawipui che ka duh a" ka ti a, inchhung lam chu a melh leh zeuh a "rawn lut la" a rawn ti ve sup bawk.



He mihring pawh hi haw em em mah ila tunah chuan amah nen hian eng emaw sawidun tur kan nei hmasa, mahse a thiltih erawh kha chu ka la hrechiang ngang thung.



"Tui emaw in tur eng emaw duh i nei em?" Hawihhawm zet chuan a rawn ti a, ka lu ka lo thing nghat thung. Tuna a țawngdan hi chu party-naa mipa leh kan in a mipa ang kha a ni lo a dan a dang daih thung. Ama inchhung a nih vang a ni mahna.



"Eng lam nge a?" Ka bul sofa-a rawn țhut thlak pah chuan a rawn ti a, ka thaw chhuak nghal ham ham a. "Um... ka sawi tawp mai ang a khawiah nge ka nu hi amah hmu turin ka lo kal a nangmah ni ho nen thil sawidun turin" ka ti a, amah chu zawng ru deuh anga lang turin ka hawikual nghal vat bawk.



"Nimin khan Mumbai lamah fashion show liantham zet neihna a tel turin an chhuk a karleh hian alo haw chauh ang, eng lam nge ni a rawn biak i duh ve teh mial a?" A rawn ti a, kei erawh chuan a thusawi avang chuan amah chu ka en deuh kâwk a "Mumbai-ah chuan a kal tak tak maw?" Ka ti nghek bawk.



"Aw kal e... nichin pawh khan min rawn bia alawm tinge a?" A rawn ti a, ka sam chu tuai chho puat in ka thaw nghal ham ham. A mumbai chu kan in ania chuan pa Thangkima hnenah pawh hian ka pa fa a pai thu a zêp bawk a ka pa nen hun hman an duh avangin Mumbai hnai berah a kal bawk a ekhai! Eng ang hmeichhe rapthlak nge ni ngai, ka nu ka chhunfuh an lo ti fo țhin a alo dik tak tak a nih dawn hi.



"A nih... a rai tawh em?" Ka ti a, ka zawhna chu a beisei lo nge ni a meng deuh kâwk a kei erawh chuan ka awmdan pakhat mah in ka ti danglam lo "ngatinge chung thu te chu min zawh a?" A rawn ti a, ka hawisawn a.



"Engmah ni lo e... ka hre chak mai mai in in neihna a rei ve leh tawh sia rai tawh âwm ania ka ti a, ka zawhna mak itih hmel danah ala rai lo niin a lang" ka ti a, ka nui lui sak bawk. Ka nundan sawisel turin engmah alo ni bik tawp lo ve. Pasal nei reng chungin a pasal hlui fa a pai a chuan a pasal ni lai mek lakah zêp in an awmdun theih nan dawt a hrilh a bawk a, ka nundan sawisel turin a nundanah fak tlak pakhat mah ka hmulo, nufa ngei chu kan lo ni e.



"Engthil nge rawn sawi i tum ber a?" Pa Thangkima chuan a rawn ti a, ka nuih sak.



"Ka biak tum ber a awm loh chuan ka sawi lo mai ang. Chuan pa Thangkim ala tlai chhe lo bawk a Mumbai hnai ber i hriat duh chuan kan inah va kal rawh.... fashion show aia lian hmuhnawm thir tur i hmu ang" ka ti a, ka nui lui sak bawk.



"Enge i sawi awmzia?" Bo tih hriat zet hian a rawn ti leh.



"Ka sawi chu âwih la, zanin la la hian Mumbai hnai ber kan inah chuan va kal rawh show lian tak ai pawn hmuhnawm iti zawk ang. Haw viau che mah ila ka duhsak vang zawk che a nih hi, va kal la show i hmuh hunah chuan i nui chiang ngawt ang a chhan min zawt lo la va kal tawp rawh" ka ti a, ka țhutna ațang chuan ka ding chhuak nghal bawk.



"Tunah va kal rawh aw... insiam la kal nghal rawh" ka ti a, ka jacket iptê ah chuan zen in in ațang chuan ka chhuak nghal daih bawk. Engah mah min ngailo tu chu ka ngaih pawimawh nachhan tur a awm lo. A hma ang chiahin buaina siamsak tu ka ni leh ngei bawk ang nuam ka tih zawng alawm le ka siamsak khawp ang. Hemi zawh ah erawh chuan kha mihring Siampuii pasal dawt sawi hmang kha ka target a ni leh ang.



Mama in lamah ka in khalh phei a, bungrua zawng zawng an lo thiar vek tawh bawk. A pawisa alo pe a ni ngei ang pawilo keiman ka pe leh mai ang.



Kawngkhar pawh kik lem lo chuan ka lut pawp a, sofa-ah chuan țhu in hmalam alo melh ngur a ka thawm a hriat rual chuan a rawn hawi chhuak a min hmuh rual chuan a rawn ding chhuak nghal zawk bawk.



"I țha maw? Khawiah nge i kal a?" Ka bul a rawn thlen rual chuan a rawn ti nghal vat a "țhu phawt ila chuan engkim ka hrilh vek dawn che nia" ka ti a, sofa lam chu ka pan phei nghal bawk.



"Khawnge u Zorema? I be lo ami?" A rawn ti a, ka nui a "damlo zai ngai thut a nei a tunah operation room-ah a awm mek. Tihbuai ka duh lo law law a bikin a hnaah chuan" ka ti a, bu nghatin a buai theih zia thu a rawn sawi ve nghal chat a.



Zan tir ațanga thil thleng zawng zawng kimchang takin ka hrilh vek a, ka sawi chhung zawng chuan a kut alo hûm ruh ngar ngar a kei erawh ka rilru na lutuk avangin ka țah a chhuak lehnghal ut ut tawh bawk.



"Mâm... dik taka sawi chuan mi nun ang hmeichhe nunnem leh hmeichhe pangngai tak anga nun hman kha ka duh leh lo, nilo, tunah chuan ka theih ka ring lo ka hlawhchham dawn tlat a inhriatna ka nei a tunah chuan he khawvel ațanga chhuah bo vang vang hi ka chak takzet a ni" ka ti chhuak sap a, ka mittui a rawn tling leh ringawt tawh bawk. Tunah hian Zorema ka kiangah awm thei se ka ti ngawt mai.



"Hmingthanzual, thih chungchang kha sawi tawh hlek suh" a rawn ti tuarh a, ka thâwk chu hîp lêt vakin ka thaw chhuak nghal ham ham.



"Mahse ka duh miau alawm, he khawvel hi ka tan chuan hremhmun nen danglamna a awm lo, nu leh pa ka nei tawh lo anni chuan min duh tawh lo bawk. He khawvel-a ka la dam ve reng nachhan pawh hi ka hre tawh lo dam chhan engmah ka neilo a hma pawh khan ka nun chhan kha ka hre hek lo thi daih ila ka tan chuan a nuam daih zawk ang, mi tan phurrit ka ni lo bawk anga ka hnawksak lo bawk anga miin nun nuam tak an nei bawk ang a, thih ka chak takzet" ka ti chhuak sep.



"Hmingthanzual!" Mama chuan a rawn ti lehnghal tuarh..!.



"Mâm... thih ka chak takzet, damchhan tur pawh ka nei tawh lo hmeichhe pangngai tak ang a nun hman pawh kha ka duh lo ka hlau tawh. Hmangaihna nunrawng zeta ka tluk luh ve a natna nen ka chhuah ka hlau takzet, chuan bialpa pawh nei tho mah ila, nangpawn fa i nei țep tawh a nupui pawh i nei țep tawh mah la ka țhianțha ber i nihna angin vawikhat chiah min kuah thei ang em nghet deuhin" ka ti chhuak sap a, sawi nawn a ngai tawh lo reng reng nghet zetin min rawn kuah nghal chawt a ka mittui a luang zung zung mai.



He khawvel ah hian enge dam reng nachhan tur ka neih? Tu tan nge ka dam? Enga tan nge ka dam? Ka tan chuan he khawvel hi hremhmun nen danglamna a awm lo. Enge hetah ka la tih ve reng ngatinge min la dam tir ve reng, damchhan tur ka nei tawh lo chung pawn ngatinge min la dam tir ve reng ka nunna la mai ta che, ka tan chuan a nuam zawk ang.



Enge nung dam a min la awm tir ve reng nachhan hi min hrilh rawh.



Eng hi nge ka damchhan?



Eng emaw rawn êng zawk ah chuan ka phu deuh zawk, khawpui ri dur dur chuan a rawn zawm nghal zat, ka tal a mahse nghet zeta min kuah bet tu an awm tih hriat zet hian ka che hleithei lo, current a awm lo a ni ngei ang engkim chu a thim vek. Ka kut chu ka phar chhuak a ban lian zet ka khawih fuh rual chuan ka phu lehnghal zawk.



Na zet hian ka tal nghek a ka ban vawn lai chu rawn che hrut in min kuah nghet leh sauh "ruah a sur dawn... muhil leh rawh ala hma lutuk" mut chhuak aw zet hian a rawn ti sup a, Mama aw ka hriat rual chuan ka hahdam nghal suai suai thei. Mahse ka mutna hi khawilai nge a malchungah ka mu tihna a mi.



"Khawmaw... khawnge ka mut a?" tih pah chuan talsawn ka tum mahse kâwl a rawn phêt nghal zawk zawk avang chuan rang zet hian amah chu ka kuah bet lehnghal thatchhe zet hian a rawn nui ri nghal suk bawk "ka malchungah țhu in i muhil, current awm loh laia chêt sek kha ka peih lo ania muhil leh rawh, min vengthawng lo la inverter han on chawp kha a peihawm loh ania" a rawn ti leh sup a, mahse ka tal sek.



"Chu pawh nise... khawi ka mu sawn dawn hetianga mut chu a nuamlo" ka ti a, awmsawn ka tum mahse min kuah bet leh thlawp "amak mang e aw... awm hle hle rawh ka tih kha, min vengthawng lo khan a hmaa tui deuh a i mut ang khan mu leh rawh ruah ala sur hnem dawn chauh ka mut a chhuak ania che sek lo la" mut chhuak tih hriat zet hian a rawn ti zâwi leh sup a, khawpui a rawn rik leh tak dur dur ah chuan amah chu tîm dai in ka kuah leh hahdam hmel fê hian a thaw chhuak ta ham ham bawk.



Sofa chungah ka mu reng sia engtin nge a malchungah ka lo mut daih daih theih tih chu ka ngaihtuah neuh neuh, thil tam tak kan sawidun hman a ama lakah ka in bun ruak a ni ber. Ka țhiante hian ka chhungte chanchin an hre vek ka nu chanchin nen lam a chhan pawh ka hrilh vek țhin vang a ni, kawng tam takah min țanpui țhin a Hotel-a pa Thangkima leh a nupui hlui awmdun lai thlalak pawh kha amah kan zui ruk na lama kan lak ania ka tan eng tih mah an hreh lo, chutiang chiahin keipawn.



"Thil ngaihtuah neuh neuh lo khan muhil rawh zing ala ni har dawn ania" Mama chuan a rawn ti sup a, chhang lo chuan ka thaw chhuak ham ham. Ka țhian a ni, nupui te pawh a nei țep tawh bawk hetiang anga awmpui tur ka ni lo tih ka hria mahse amah hi engkima engkima min hrechiang tu ber a ni a amah lo chu harsatna ka tawh reng reng in pan tur ka hre ngailo amah hi engkimah a hmasa berah ka pan țhin. Nupui a neih hunah chuan mahni te tlawng in ka tuar leh ang a boruakah bawk insawi thawl leh ka tum anga mahse a sâwt leh dawn tawp si lo.



Dr. Zorema ka bialpa a awm reng, mahse a ni chuan ka chanchin pakhat mah a hrelo ka chhungte chanchin ngat pawh ka chanchin zawng zawng, ka nundan zawng zawng a vaiin hre vek se chuan kei hi min kalsan chiang khawp ang. A ni chiah a ni, ka nundan hria mipa apiangin min ten hluah hluah hlawm a min kalsan țhin ka hmaah tak ka tenawm zia sawi lah an bang lo, mahse phat tum a han hnial let ka tum lo thudik a ni miau alawm.



Thudik chu eng ang pawn thup bo tum in a ni lo anga sawi phet tum mah la i hlawhtling chuang lo ang eng lai pawn thudik chu a ding chang țhin. Dr. Zorema phei chu Mama sawi ka hriat danah phei chuan nun țha deuh mai hi ania an chhungkaw Doctor a nih chu a sawi bawk. Mi phei chuan an ngaisanga a hun hman tawh ah han mualpho a nei ngailo tluk a ni tih a sawi bawk, chutiang khawpa mi țha khawtlang leh ram pawhin an ngaihsan chu kei mi țawp leh vengchhung pawn hmeichhe sual tih a an sawi nen kan inkawp mek a, kan inkawp tih hria se chu amah ka ti mualpho ngeiin ka ring bawk.



Keimah avangin tuman zahna tawngin, an mittui pawh tla lo se ka duh a sual viau e ti lo chuan khatiang kha ka duh lo chuvang chuan Dr. Zorema nen pawh hian rei tak kan inkawp theih ka ring lo Hmangaihnaa ka tluk luh ve ka hlauh rualin amah ah beiseina thlawn siamsak ka duh lo bawk.



"Um... i harh laklawh i muhil leh thei tawp lovang eng emaw kan sawi dun leh dawn em ni sawi duh i nei tih ka hria ania" min țhut ngil pui deuh pah chuan Mama chuan a rawn ti a, min hriatchian lutuk avang chuan ka lo nui chhuak hak bawk.



"I peih phawt chuan ka peih ka mutthilh theih pawh ka ring tawh lo" ka ti ve sep a, min kuahna a thlah rual chuan ka lo tal thla nghala thim zingah pawh chuan a rûm nghut ri chu chiang tak a ni. Ruah pawh a sur buan buan tawh bawk.



"Lo awm la.... inverter ka han on lawk anga in tur ka rawn la pah dawn nia, i hlau lo ang chu tiraw?" Tiin min rawn fiam pah zeuh "chho mai mai rawh" ka lo ti hlak a, a rawn nui chhuak nghal hawk bawk.



Reilotêah inverter a rawn on a, inchung step ațanga alo chhuk chu ka en reng bawk. He mihring kianga awm tur leh a Hmangaih tak chu hmeichhe vannei an va ni dawn tehlul em! Ka ti rilru rauh rauh bawk.



Coffee nen a rawn phei a sana ka en zeuh, zing dar hnih alo ri dawn thuak bawk "ala hma ka tih kha... beer in chu ala hun êm lo ania" coffee min rawn pek pah chuan a rawn ti a, ka lo nuih mai thung. A vawh ve deuh ser ser avang chuan coffee a rawn dah chu ka ban vat a ka in zui nghal bawk. Ka chhunglam chu a lum nghal vung vung thei.



"I sawi duh chu sawi leh la, kan la mut hman chuan mut a țha ania" a rawn ti a, ka thaw chhuak nghal ham ham "Dr. Zorema nen kan inkarah thil awm chauh mahse bansan lehnghal ka duh, a ni chuan ka nundan pakhat mah a hrelo hre ngat se chuan midang ang tho in min ten ve ang nangpawn i sawi kha, a ni chu a nun a țha a a fel bawk a mahse kei nen chuan inkawp thei kan ni lo, kei lo hmeichhe țha tak tak an tam chu chu a phu hle bawk. Kan thlen thui hma hian tawp ila ka tan pawn a țha zawk ang" ka ti chhuak sep, coffee chu ka lem leh zeuh bawk.



"Hming.... i ti tawh a kaltlangpui rawh, awlsam taka tih chah mai mai theih turin inzawmna siam suh chuan tunah hun harsa tak i tawk mek heng zawng zawng hi khami rual khan fight chhuah tum rawh i thei dawn tih ka hria chuan u Zorema hi i thlang sual lo bawk ka sawi tawh... kaltlangpui rawh, tuna i bansan a nih chuan a lehpek ah i tan kawng a inhawng tawh dawnlo kumkhua in i tang hlen tawh ang" a rawn ti a, keimah chu ngun zet hian min en reng bawk.



"A pawi ka ti lo, ka tan dam reng hian awmzia a nei tawh lo damchhan ka nei lo duh leh zu hian min ei hlum se heng ka thiltih te hian min ei hlum se pawi tihna ka neilo ka phutawk chiah a ni mai, ngaihsaktu nu leh pa neilo a khawvela awm ve reng ka duh lo thih vat ka duh zawk"



"Hmingthanzual! I thusawi kha i hrechiang chiah maw.... engtin nge khatiang thu kha awlsam zetin i sawi chhuah theih? Pathian pawh i hlau em em lo em ni?" Mama chuan a rawn ti hrâwk! Ka thaw chhuak hak.



"Ka beidawn tawh êm avangin a nih chu ka sawi... tunah te hian dam chakna pakhat mah ka nei miahlo asin, enge ka damchhan lah ka hre hek lo engmah ka nei lo a ka nu leh pa te pawn in ațangin min hnawtchhuak hial asin. Pathian pawh hian he khawvela mi hnawksak leh țangkaina nei ve reng reng lo hmeichhia hi ngatinge min la dam tir ve reng, ka nunna hi la daih zawk se keipawh ka hahdam ni mai tur" ka ti chhuak hap a, ka kut pahnihin ka hmai chu ka hup a na zet hian ka thaw chhuak nghal ham ham.



"Hming...." tih sup pah chuan Mama chuan ka kut pahnih chu a rawn man kawp a a hûm nghal vang vang "chhan eng emaw tak vangin ala dam tir che a nih hi... i tan eng emaw tak buatsaih a nei a ni chumi chu nghak puitling rawh amah ring la. Ni lo se he khawvelah hian i awm tawh lovang mi tu pawh hian dam chhan kan nei vek asin. Heng hreawmna leh natna zawng zawng leh i nundan lak ațang zawng zawng a hruai chhuak tu che a ni chuan a pe ngei ang che. Mahse chu mihring erawh chu nih ka chak hle thung" ka mit a min en reng chung chuan a rawn ti a, a thutak êm avang chuan amah chu ka en ve reng.



"Ivan inhmeh lo tak! Pathian thu te i sawi ve ania" ka ti a, ka nui chhuak deuh hak a, a ni erawh a rûm nghut. Ka hmaah chuan a rawn țhingțhi a ka kut pawh ala hûm reng "ka fiamthu lo Hming... kei chu heti mai hi ka ni tawh kawng tam takah puih chak viau che mah ila ka pui thei lo che mahse u Zorema hi rinchhan rawh... a ni chuan hetiang lak ațang hian a hruai chhuak thei ngei che in ka ring. Engkimah amah ring la i hun kal tawh hrilh la a ni chuan a hrethiam vek ang che" a rawn ti a, ka lu ka thing nar nar.



"Hrethiam se tih chu ka duhthusam a ni alawm mahse mi hi kan pawnlam landan ang ngawt hi kan ni lo ania kan chhungril hi a sual lutuk. Pawnlama țha taka i hmuh te pawh an chhunglam chu sualna nangpawn i hriatchian kha... ka sawi duh tawh lo mu ang... eng ang pawn sawi sawi mah ila min hriatthiam pui lo ang" ka ti a, ka kut a hûm chu la chhuak in ka tho chhuak a ka kalsawn nghal daih bawk.



A tawng ve lo tan chuan engkim a hriatthiam theih loh ang.... kan kal thui hma a tawp ka duh chhan erawh hlauhna lian tak ka neih vang a ni. Suangtuahna hlimawm mahse puitling thei tur si lo neih ka duh lo a chutiang chiahin beiseina thamral leh mai mai tur siamsak tu nih ka duh lo bawk. Ka â pawh in lo ti maithei mahse ka hlau a ni, hlamchhiah leh mai mai nih ka hlau a na taka awm a thinlung hreawm tihnaa khat a awm ka duh bawk hek lo. Heng zawng zawng hi tawng lo ila ka duh lutuk takzet bawk.



I fate kha puitlin an zirna kawngah theihtawpa țâwiâwm in țanpui rawh. An lei Pathian i nihna angin an entawn ber tur leh thu an âwihna ber tur in ni, nang in i zir loh chuan i fate hmakhua kha a êng lo takzet ang. Nu leh pa kara fate țhan len chu duhthusam a ni, mahse loh theih loh tam tak a awm ve a i kianga i fate an awm a nih chuan chak takin awm la harsa mahse theihtawp chhuah in i fate nun țhalo lak ata hum him rawh, khang lak ata kha nangmah chiahin i hum him thei, tu dang i ni lo mihrang i ni lo, a nu leh a pa i nih kha, a nu leh a pa engkima a rin em em leh thurâwn a lakna ber ini.



An zah theihna tur che u in zah tlak takin nung ula an thiltih sualah hauh hreh ngai suh u, mi fate nundan ringawt sawisel lo in i fate nundan kha en la siamțhat tur lai lai chu theihtawp chhuahin siam țha rawh. A nu leh pa te inni tuma tih theih loh kha in ti thei sual a an tlu lut tur kha in veng thei, engkimah in pawimawh ber mi țhenkhat nundan an tehna chu an nu leh pa te anni, nangmahni in zir rawh u.




Zingah chuan intifai hmasa in Mama chhuah lawk hlan in ka insiam zung zung a nizana ruah a sur nasat êm avangin khua chu a vawt deuh sur a ruah tla mai thei tur ang in a awm bawk. Chhum a zîng nasa em em a Mass kan hnaih tawh bawk a boruak pawh a thlasik raih tawh.


rps20201018_220641.jpg
rps20201018_220641.jpg (57.28 KiB) Viewed 4482 times


Ka cap dum chu la in ka bike chahbi chu ka ban zawk a dar 9- a ri deuh dawn thuak bawk.



Number lawng ațanga call ka dawn avang chuan tîm daiin ka pick a "hello" ka ti nghal sep bawk "Bawihi, nizanah i pa Thangkima hnenah enge ilo sawi a?" Ka nu ngei mai chuan a rawn ti siah mai phone chu ka hmaah ka lek kâng a a number a ni tih ka hre leh chiah, ka delete daih tawh avangin ka lo hre tawh lo a nih ngei dawn hi.



Nui sak in phone chu ka bengah ka nghat leh "Mumbai hnai ber awmna ka lo hrilh a nih kha... tinge a pawi viau em ni?" Ka ti ve hmak, buaina ava chawk chhuak tih hriat chu a nuam dangdai hle mai "i thil hrilh avanga ka tawrh hi i hria em? Engvanga lo va kal reng reng nge in nih? Nizanah khan iva kal chiang a ni tiraw?" A rawn ti leh tuarh! Ka nui sak a.



"Bingo! Nizan khan ka va kal alawm... oh taka, aw ka vîn kha hmang vak suh i nau pai tan khan a țhalo ang e i bul hnaiah ka pa awm ngat se chuan a hau ang che" ka ti ve leh kher bawk. Mi nasa pahnih inbia chu kan aw ka chhuak pawh a dam hranlo e.



"Vawikhat pawh lo han kal leh teh... i chak lo tawh ngawt ang" a rawn ti leh zat.



"A ni maw? Mahse vawikhat kal ka la hmabak asin, i nau pai hmaa aw ka vin hmang lo tura hrilh turin... ah... mahse nizanah chuan show aia hmuhnawm thlir tur a nei anga nangni pawn in lo hriattir tawh tho ang a" ka ti leh kher a, thinrim zet hian a rawn au nghek bawk.



"Vawiinah inhmu ang"



"Nang hmu tur che hian ka hun ka ui rih tlat, nakinah hun ka lo insiam dawn nia, naute hriat a aw ka vîn ka hman leh hma in kan dah phawt ang e, chuan taka heihi lo hre rawh. Nu leh pa tih a koh tlak pawh in ni tawh lo nu Siampui tih leh pa Engzual tiin ka ko tawh ang che u aw... keipawh ka hmingin min ko ula. Have a nice day nu Siampuii" tiin call chu ka hmet tawp a, ka thaw chhuak nghal ham ham.



A fanu ngei pawh min khawngaih a hnêkin min la rawn ân khum a, amah ka chhun fuh bawk alawm le ka nasat zia an la hmu zel ang.



Vawiin hi Bethlehem a Dr. Zorema ten free clinic an hawn hun tur kha a ni a mahse kal ka tum lo. Tunah pawh hian a call dawngin ka phone a rawn nghawr leh dar dar tawh mahse ka chhang duh lo.



Dik taka sawi chuan beiseina beidawnthlak siamsak ka duh lo a, amah hlat thei ang bera awm ka duh bawk kei aia hmeichhe țha a phu a kei erawh chuan ka chunga hetiang thil titu te hnenah phuba lak chiah ka hmabak bawk. Nakinah ka inpeih hunah ka nundan zawng zawng ka hrilh vek anga min la pawm cheu a nih chuan ka theihtawp chhuahin ka bansan ang tunah rih chuan kha dawt sawi hmang leh a nupui kha ka target an ni rih.



Ka phone nghawr dar dar chu hmet thim zeuhin ka coat hak chhungah chuan ka thun lut a pawn lam chu ka pan nghal bawk. Ka bike awmna lam chu ka pan a thli a thaw vûk vûk a. Gloves chu bun mawlh mawlh in bike chu ka ti nung a ka inkhalh chhuak nghal bawk.



A hmasa berin Irene-i hnenah ka kal anga ka hna ațangin ka bang bawk ang. Boss pawn min rawn be leh tawh mahse a message ka chhang duh lo Madam pawn min rawn bia a ka chhang duh chuang lo bawk. Ka sawi tawh kha a dawt leh ah chuan ngaihdamna a awm tawh lo ang tih.



Irene-i te inah chuan ka lut a, a nu amaw ni chuan min nghah reng tawh thu alo sawi bawk, tawi khawmuang lo in a room lamah chuan ka chho nghala a closet hmaah chuan alo ding vâng a eng emaw alo sawi sep sep a a landanah chuan Dr. Zorema nen an inkar a chhia chu ala na vak lo niin a lang.



"Ka lo thleng" ka ti a, ka aw a hriat rual chuan rawn hawi pheiin a lama kal tur chuan min hui phei nghal zat a "vawiin chu khua a vawt deuh bawk sia nalh lam ai chuan lum lam ka duh zawk aw engpawh a ni mai. Zorema nen kan inhmu dawn a" thawven hmel zet hian a rawn ti a amah chu ka melh deuh kâwk!.



"In in țhen amaw ka tia" ka ti a, a rawn nui a "nia... ințhen zuai hman mahse thil thleng kha a nih loh zia fiahna ka nei a mualpho tak tak hma in vawiinah ka hrilhfiah anga ka hmuh tir bawk ang" a rawn ti a, amah chu en in ka thaw chhuak nghal ham ham. Dr. Zorema khan bialpa a neih thu a sawi a mahse a ni lah chuan thil thleng a nih loh zia fiah a tum bawk a engmah ka hriatpui lo nângin eng emaw tak chu a awm a ni ngei ang.



A closet chu ka en vang vang, hunger vel chu ka keu kual a a thawmhnaw hak tur chu ka lak chhuah sak mawlh mawlh "vawiin bak chu ka rawn kal tawh dawnlo tih hrilh tel che ka duh a" a closet kawngkhar a khai pah chuan ka ti chhuak sep.



"Ok... pawisa chu i ac number min lo thawn mai la ka lo thun ang keipawh naktuk hian ka zin leh dawn a" a rawn ti țha ve mai bawk, a phone a rawn rik avangin engmah ka sawi belh tawh lo, a chhan rual chuan tu hming emaw a sawi tel zeuh.



"Aw... mahse Zorema nen kan inhmu dawn a, aih... amah chu ka la hrilh lo" a ti nghal zung zung, Zorema hming a sawi tel avang chuan ka kal tur chu ka ding leh dat "aw... thil thleng kha a nih loh zia ka fiah tawh a chu chu ka sawipui dawn bawk a. Bakah amah chuan ala hrelo hrim hrim a.... aw.." a ti leh zung zung, thaw chhuak ham ham in kawngkhar lam ka pan a a room chu ka chhuahsan nghal bawk.



Zorema nen an inhmu dawn a chuan bialpa a neih loh zia a fiah dawn bawk a tikhan an inkar chu a țha leh nghal mai ang a keiin engmah tihtur ka nei ve lo. Engmah sawifel ngailo a a tawp tur chu a țha hlei hlei zawk kei ai chuan Irene-i hi a phu fê zawk bawk a an pahnih chuan hlim takin hun an hmang thei ngei ang.



Lawm zawk tur ka ni mahse lawm a hnêkin ka hlim lo tulh tulh zawkin ka hria. Hmingthanzual.... nang aia hmeichhe țha a phu zawk a lawmpui zawk ta che mawle nikhat pawh in in kawp êm loh kha.... a hmaa i awm ang chiah khan awm leh rawh... khatiang nun nen khan i hlim zawk ka rilru chuan ka ti a mahse na zet hian ka lo thaw chhuak leh hawk zel țhin.



Ka rin lawk ang ngeiin Lalmama bawk chuan min rawn call leh mahse ka chhang duh lo ka phone chu ka switch off hmak a Boss hotel lam chu ka pan nghal chat bawk. Building ka thlen rual chuan hnunglam huan ațangin ka lut a room hrang hrang ah chuan thawm ka hre nual.



Ka private room lam ka pan a mahse hawn tum a ka chahbi phawrh chhuah ka tum chu kawngkhar lo inhawng sa ka hmuh avang chuan rang zet hian dah lut leh in kawngkhar chu ka hawng a ka khum ngei a kan hmel sorry-i leh mipa pakhat lo mu chu ka hmu nghal chat, aw... a mipa chu tunge a nih in rin? Lalrohlua ngat mawle.



Engtin nge ka phalna pawh la lo a ka room an lo hman ngam zawk, ka warning-na pawh engah mah a ngailo a nih chuan min zuam sual chiang ngawt ang le. Bathroom-ah chuan ka lut a bathroom chhuatah te chuan bra leh kekawrte alo let nia mawle, ka kawng dawm in ka thaw chhuak hak. Bra leh kekawr te chu chhar in ka chhuak leh bra chu pawt mar in an pahnih ke chu khumah chuan ka țâwn beh sak a hrui dang drawer a awm chu la chhuak in khum lu lamah chuan an ban chu ka țawn beh sak leh ka hnehsawh zawng a ni bawk a awlsam takin ka ti zung zung thei bawk, an rui bawk aniang an taksa ka khawih chhungin an harh lo hrim hrim.



Ka rizai an sin chu ka pawt hlim lawk, ruak vekin an lo mu a tenawm dun lutuk. Madam in chahbi alo pe a ni ngei ang, ka coat hak chu phelh in ka kawr phiar hak chu ka hnawl tawm chho a bathroom-ah chuan lut leh in bucket tê ah chuan tui a khat pângin ka dawh a khum lam pan chuan ka kal leh "hmeichhe luhlul nâwk luih țhat loh zia ka hmuh tir ang che u" tui en pah chuan ka ti chhuak sep.



Vawileh khatah an pahnih ah chuan tui chu ka leih nghal bâwrh, a hit țha bawk aniang pakhat zawk a rawn meng deuh kâwk a pakhat zawk erawh a rûm tuah țuah, an in hnem ngang ania nge. Tui chu ka va dawh leh ka theh leh a thaw kâwk in an rawn meng, thawh chhuah an rawn tum a mahse an mahni phuar beh miau avangin khumah chuan an let thla leh tawp.



"Tunge maw inih le... engthil phiangsen chu nge maw itih le?" Kan hmel sorry-i chuan a rawn ti tuarh!. "I ngam chuan hmang leh rawh mahse ka room a nihna anga ka phalna la hmasa lo a lo awm te ka tih țhin dan Madam khan a hrilh na che nge ava pawi ve" ka ti a, bucket chu an lamah ka theh phei nghal bawk a a lu a ri fawk mai.


"Hmingthanzual engthil nge maw i rawn tih hrep le!" Lalrohlua chuan a rawn ti deuh tuarh a kei erawh ka lo nui chhuak hak "hei i hmuh ang hian tuiin ka theh che u, engthil dang nge ka tih vak ang a ka bual fai zawk hial dawn cheu mi in duh em? Chuan nang kha... vawi engzat nge ka hrilh dawn che min tilui suh min zuam sual ang tih pawh ka hrilh tawh che a ni lawm ni i ât hman i hmu a nih kha" ka ti chhuak fak a, ka closet lam chu ka pan phei nghal bawk.



"Min phelh rawh... min phelh rawh ka tih chu" kan hmel sorry-i chuan a rawn ti tuarh kei erawh chu ka lo nui sak "um... ka ti țhang tawh bawk a ka phuar nghet viau cheu nia khumah khan a țawnna țha tak a awm bawk a, ka tih țhin dan ziah ania in chhuak mai mai lo ang e.. ngawi lawk teu thla kan lak lawk ang che u a pawimawh tlat" ka ti a, ka phone chu phawrh chhuakin ka on-a an thla chu eng emaw zat ka la bawk.



"Hmingthan.... hmeichhe mawl nu... i thil tih kha tawpsan rawh!" Lalrohlua bawk a ni, a țawngkam hman avang chuan ka lo nui chhuak hak "ah... ka mawl tih pawh chu iva hre har reng reng ve mawle i bialnu a khawngaihthlak khawp mai... ka lakah mittui tla hialin nangmah hnaih tawh lo tur che in min ti a nang lah chuan ila lerh san ta deuh deuh a i duh khawp i hmu na nge, a siam nawm theih țhin dawn che nen" ka ti a, rûm hrâwihin a rawn tal nghek bawk.



"Hmingthanzuali maw inih?" Kan hmel sorry-i chuan a rawn ti leh "Bingo" ka lo ti zeuh a vawt an ti aniang an khur dar dar bawk. An kut ka phuar chu phelh tum in an che ve sek a mahse an tha an seng thlawn mai a ni, a in bât hneh lutuk tlat.



"Hmingthan..." madam aw ka hriat rual chuan a lam ka hawi zeuh a a chil a lem nghal khalh mai bawk, kan hmel sorry-i nen chuan an in signal zeuh lehnghal "ka hriatpui lo iti leh dawn ami... in va in signal nasa ve oh taka ka lo kal pawh hi in ring lo anga tiraw... mahse min hmu leh thut sia inbiak nan hunthawl pek kher in ngai em?" Ngeiawm zet hian ka ti let kher a, ka coat chu ban in ka inthawlh nghal sawk sawk bawk.



"A fal in inbe lawk ta che u...." ka ti leh kher a, ka tihtur pawh ti lem lo chuan room ațang chuan ka chhuak a huan lam ațang bawk chuan pawn lam ka pan leh bawk. Kha zet zawng awlsam zet chuan ka kal tir mai mai tawh lo tawp ang, min chhaih kawlh suh se... chhaih kawlh chi ka ni lo tih ka hriattir khawp ang ka hmuh leh hunah chuan ngaihdam dil lo in peih at rawh se.



Ka bike-a ka țhu kai tur chiah ka phone a rawn rik leh avang chuan ka la chhuak a Laldinpuia a nih avang chuan ka pick nghal vat bawk "lo kal lawk teh eng emaw sawidun pahin thil in mai mai ang engmah tihtur i neilo tih ka hria ania Arema pawh alo kal dawn min theihnghilh der tawhin ka hria" a rawn ti a, ka nui chhuak hak.



"Ka theihnghilh cheu in ring reng reng amaw ni le ka lo kal ang i inah ami?" Ka ti nghal zat.



"Aw... Arema pawh kan call ang e, vawiin chu hna ka kal dawnlo a inhmu khawm teh ang u, party-naah kan kal ho khat tawh bawk si a inhmu khawm ve reng reng ang u" a rawn ti a, ka thlen vat tur thu hrilhin phone chu ka off zui lehnghal bawk.



A hmaa ka nundan a ka nun hian ka hlim zawk a nih hi, hlimna ka ngah zawk.



Laldinpuia te in lam pan in ka inkhalh phei a, ka thlen chuan midang an lo la thleng lo aniang bike pawh ka la hmulo. In lam chu ka pan chho nghal a kawngkhar pawh kik lo chuan ka lut nghal tawp bawk a țhutkhawmna pindanah chuan no nen alo inchhawp hnûr tawh bawk.



"Iva lo thleng hma leh si ve... lo țhu rawh midang an lo kal mek chumi hma chuan lo in ang" a rawn ti nghal var a, sofa pakhatah chuan ka țhu phei a dawhkana in tur chu ka ban nghal a vawi leh khatah ka tlak nghal pap bawk "ka dry-na a lo rei hman tawh hle mai a, ka ngaihtuah chhuak thut" ka ti a, a rawn nui chhuak nghal hawk a a dang chu min rawn thlit leh.



Ka in lehnghal a, mahse ka lu hi a hai muai muai mai a chak viau aniang ka meng hleithei der lo chuan ka kawchhung hi a sa pup pup a a za mer mer in ka hre bawk "i țha maw Hming..." ka dar a Laldinpuia'n a rawn khawih rual chuan mitmeng phi chiai hian amah chu ka en chho a ka la hmufiah lawk theilo lehnghal.



"Ka la in tlem nen ka rui der nia ka mut a chhuak ringawt ava chak țha âwm ve" ka ti a, a rawn nui chhuak nghal hawk bawk "a chak țha ber chi alawm midang lo kal hma in lo mu lawk rawh ka rawn kaitho ang che" a ti a, min pawm kâng nghal nawlh a ka zawi êm avang chuan ka che theilo.



"Iva rui hma ve" a rawn ti ve leh.



"Nia... keipawn mak ka ti ka rui hma tawp" ka lo ti ve leh a, kal pah a ka mawng a zût rual te chuan ka zauthau zual sauhin ka hria ka ruih vang aniang.



Thil dûp zetah min nghat a a tho kâng mai dawn amaw ka tia mahse ka chungah a rawn innem khalh, a rawn kûn hniam rual a a hmuiin ka biang a tawh rual chuan ka mur nghal ar ar mai "he thil ka nghah rei tawh zia hi... midang lo kal tur kha chu chhuanlam mai a ni, vawiin chu chên ang aw sexy-nu" ka beng bulah chuan a rawn ti sup a, a rawn fawh rual chuan ka lo rûm chhuak hak bawk.



★★★



Link:
BBcode:
HTML:
Hide post links
Show post links

ADVERTISEMENT (A hnuai a milem hi a nia hmeh zeuh tur chu)