DESTINY AWAITS-5 (chhun zawmna a awm aw) by NUTTY GIRL

Episode kal lai dah luhna

Moderator: writers

Nutty girl
Posts: 209
Joined: May 2nd, 2020, 11:28 pm

DESTINY AWAITS-5 (chhun zawmna a awm aw) by NUTTY GIRL

Unread post by Nutty girl » October 20th, 2020, 11:05 pm

DESTINY AWAITS


BY:


NUTTY GIRL



CHAPTER-5




Ka kawngah chuan nghet takin min chelh. Chetsawnna chang reng pawh ka hre lo,ka dawh mawl tawp ringawt!A hma aia min pawt hnai salin a hma aia dam zawk leh ngenngawl zawkin min fawp leh salh. A mi min fawhna chu ka feel nghal veng veng.



"Ti khan a chiang a ni lawm ni," a awm sawn rual chuan a rawn ti sup. Ka taksa chu a mur nghal sung sung,ka ngaihtuahna a fim telh telh bawk! Tunah...tunah khan min fawpa, keiin hnialna pakhat mah ka nei lo bawk. Bialpa...Nunpuia ka ngaihtuah chhuah chuan ka inthiamlo nghal ngawih ngawih.



"Ka..ka duh lo che,"min chhing nghal vang vang chuan ka ti bah nia. Ka men leh rual chuan ka hmaa mipa chuan min lo melh run. A hmui a pet sawi zeuh bawk. Nichina kan in fawh lai kha ka mitthlaah a rawn lang nghal uai uai mai.



"Ka duh lo che ka ti tak tak," ka ti ta thlawt. Chu ka thusawi pawh chu a sawitu hian ka awih lo! "Ka ti lui lo che. I bula ka awma i danglam thin ang bawkin nangpawh i danglam thin. Chu chu hrilh hriat che ka tum mai nia,"tiin a nui suk! Chuti khawp chuan a bula ka awmdan danglam hi a hrethei a maw?



"Ka danglam ngai lo,chuatiang rilru..oh nangmah duhna rilru ka nei ngai lo,kei chuan bialpa min hmangaih em em tu ka nei,"tiin a hmaah chuan ka au vak.



"I nei a ni maithei mahse ka bula i awm ang hian vawikhat tal i bialpa bulah i awm ve tawh em? A bulah i awmdan a danglam ngai hauh lo a ni tiraw?"aw ril ruiha a tih chuan chhan ngaihna ka hre tawh lo! Ani bula ka awm ang hian tumah bulah ka la awm ngai miau lo.



"Ka nawr lui lo che ka tih tawh kha,ka hriatthiam tir mai chauh che a ni,"tiin in her vutin an room lam a pan nghal daih. Kalsawn na chang pawh ka hre lo, nu Thanpuiite lo haw thawmah chuan ka insiamtha sawk sawk. Marcus pawh chuan ka bula mut a tum ta bik lo.



Rooma ka luh hnu reilote ah chuan Nunpuia call a lo lut deuh nghal mai. Nichina thil thleng bawk ngaihtuah chhuakin,mahni inthiamlohna hlirin ka khat nghal vek! Nidangah chuan dar 8 velah min lo call thin tunah chuan dar 10 a ri tep tawh. Min lo call hma se khatiang kha a thleng lo ang ti ten ka ngaihtuah leh rih.



Ka pick hma chuan thawk ka la kawk kawk phawt. "Tinge ummm i rawn ti dawn lo ami?"ka ngawih reng avang chuan nui chhuak hawk hawk in a rawn ti. A nui ri ka hriat phei chuan ka inthiamlo zual, ka thinrim zual sauh bawk.


"Engnge min lo call vat loh a,hma takah min rawn call mai la a tha tur,"ka ti nghal hlak hlak. Thil thlengah khan midang puh tur ka zawng ni berin ka hria.


"Tinge min lo ngai viau tawh a ni maw? Tak takah vawiin chu kan buai deuh a, khaw thim hnuah bak kan haw lo. Ka pa damdawiinah vawiin lamah an dah teh thut sia,zan lamah ka phei ve zawk a. Hei in ka thleng leh chiah," tiin min rawn call hma theih loh chhan a sawi. Chhan engmah awm loa ka va thinrim khum chung pawn zaidam takin a insawifiah a,tiang mipa hi an awm dawn em ni?



"A..a nih chu i pa chu a zunthlum vang bawk ami?"



"Umm..ni e. Han awm lang chuan a monu hual hian in han enkawl tur a nia,"tiin a rawn nui suk. Engmah sawi ve tur ka hre lo.



"Vawiin chu maw ka ngai riau mai che. Kum thum lai Christmas kan hmang dun tawh a,kumin kan hmang dun thei lo tur ngaihtuah phei chuan lo phei rum rum ka nap," kan ngawih vang vang hnuah chuan a lo ti sup.



"Ummm."



"Tinge i va tawng mawh ve,ka rawn biak tlai vang che a nih chuan tihpalh. Nge min ngai viau a ni maw?"nui hawk chung chuan a rawn tih zawm leh zat.



"A..aw ngai ang." Amah ka ngaih leh ngaih loh pawh ka hre lo tak tak. Heti khawp hian a lakah rilru ka pe lo. Zanina professor thusawi leh a laka ka awmdan khan a ti chiang viau. Mahse chu chu pawm ka duh lo,ka pawm thei lo.



"Ih...thil hrilh duh che ka nei,"ka chhunga min nawrtu nasa lutuk vang leh ka inthiamloh em avang chuan ka ti ta nge nge.



"Yes..ka ngaithla reng che naute,"a rawn tih chuan ka maimitchhing vang vang. Hrilh ta ila thil dik ber a ni ngem? Min hmangaih a ni tih ka hriat tluk zetin a rilru ka tina dawn tih ka hria..Ni lo...ka hrilh thei lo ang.



"A..a ngai leh lo engmah pawh a ni lo. Ka mut a chhuak deuh tawh a,"biak ngaihna ngang ka hriat tak loh avang chuan ka ti ta thlawt.



"Umm..in vah chhuahna i chau a ni maw? Tui deuhin i mu dawn nia,i mumangah min hmu la."



"Umm..muttui le,"phone ka dahthlak rual chuan khumah ka muthla nghal hnawk. Ka ngaihtuahna hi a buai zo vek tawh. Engkim in tanna chu kha zan professor nena kan inhmuh hmasak ber zan kha a ni. Lo chhuak lo tawp ila,a nih loh vek pawhin ka pa thu hnialin Aizawlah han awm ta zawk ila a tha ang ti ten ka ngaihtuah leh hnuhnawh.



Room tukverh chu hawngin thli chu ka in chhem tir heuh heuh. Ti hian ka ngaihtuahna te pawh a mumal ve thei deuh tawh ang chu.
Tun ang em em a rilru mumal loh ka neih awm pawh ka hre lo. Chu pawh khapa vang vek kha a ni.



Engtinnge a laka ka rilru put hmang a hriat theih!


A bula ka awma ka danglam ang bawkin ani pawh ka bulah a danglam ve maw? A nih chuan min duh...Nilo ni lo..in ngaihtuah fim ka ngai. Tunkverh chu khar tha sawk sawkin,khumah chuan rizaiin ka inkhuh nghal hlun. Ka ngaihtuahna erawh zanin thil thlengah khan a la bei nghet tlat thung.



~~~


Kha thil thlen atang khan ni thum lai a ni leh tawh. Professor in min nawr lui dawn lo a tih kha a ti tak tak. Khami hnu atang khan engmah a tih zawm lo a. Awm pangngai hmiah hmiahin a awm zawm thei! Mahse kei chuan ka theih ve hauh lo.



Min nawr lui lo a,min ngaihsak angin a awm hek lo. Chutichung chuan keimaha a nghawng chu a na telh telh thung! Keimah ber hi ka diklo niin ka hria. Chet laa,min ngaihven lo chung pawn kei chuan amah..amah chiah hi ka duh. Ni e,ka pawm tawh KA DUH. Keimah ber hi insiamthat ngai chu ka ni. Tunah chuan rilru ka siam fel tawh.



Vawiin lamah Christy an in check up pui leh. Christmas hmaa kal leh tura an tih avangin.



"Marcus lo kal rawh le,pancake an siam dan chu ka zirtir tawh ang che,"tiin Marcus infiam lai chu ka au vat. Mipa mah nise a pi thil siam te hi puih ve tlat a tum thin. Chef tur a ni te pawh a ni mahna.



"Artui hi ti hian i vaw keh anga,"tiin a siam dan tur te chu ka hrilh mawlh mawlh. Uluk tak chuan a ngaithla ve mai. "Ti hian pakhat chu kan kang zo e,"tiin plate hranah chuan ka dah. Omi pawh Christmas chawlh la in,an khaw lamah a haw tawh.



Tlai lama nu Thanpuiite an lo thlen chuan an chanchin ka zawt vat. Tunah chuan jection,drip.tih vel pawh a ngai tawh lo. Amah lah a damtha ve em em tawh bawk.



"My boy,vawiinah engnge i lo tih a?"tiin a fapa a be chhun zawm nghal zat. Hetiang reng hi a ni,ani chuan khami thil thlen hnuah a nun pangngai takin a hmang thei a. Mahse kei erawh chuan a chetdan,awmdan engkim ka lo ngaihtuah reng thin thung!



Christy damtha tawh chu ka lawmna thuahhnih na hi a ni ringawt. A dam tha tawh hrim hrim lawmna leh Professor hlatna hun tha takah ka ngai.



"Nu Thanpui, Christy a dam tha tawh tho sia. Nangni tan buaina tur ber pawh a awm tawh chuang lo a. Haw ka duh deuh a,"ka ti ta thlawt. A awm lo tih chu ka hre tho an ni hi min ruaitu an ni miau. Mahse a thla zawnga in sawi rem kan ni lo a, Christy damloh vang chauha awm ka ni, Christy ber a dam tawh a, tih tur dang ka nei chuang lo.



"Ni e,i pa Zuala nen pawh kan lo sawi deuh a. Christmas a ni tawh dawn a, Christmas hi chu chhungkaw kima awm duh lai te ania kan lo ti ve a. I duhthlanna kha a ni mai,hna pangngai phei chu nise chawlh pek i ni daih tawh ang,"tiin a nui var var.



Chaw kan ei lai chuan Pa Zuala chuan a rawn sawi chhuak ta phawng. "Mami pawh a lung a leng tan tawh, Christmas a hnai tawh bawk a. Kan mamawh lai che in min pui thei hlauha, tunah Christy pawh a dam tha bawka. A lawmawm hle mai,"a ti charh charh.



Professor ka en chuan ka lam pawh a rawn hawi chuang lem lo. Hei hi a tha tawh reng zawk,heinah hian titur ka nei tawh hranpa leh lo. Ka nute pawh ka biak tir lawksa hrim hrim a.


~~~

Scooty ka ken hlauh vangin ka in khalh ho thei nghal mai. Keng lo ilang chuan professor khan min thlah ho ngei a ngai anga,engkim a buaichuar leh vek zawk ang.


In ka thlen chuan boruak pawh a dang nghal zar mai a lawm. Ka nu leh pate chuan nuam ka tih leh tih loh min zawt ta vat bawk. Nuam ka tih thuin ka chhang ve mai. Professor te ina ka awm lai khan han haw zeuh zeuh kha nuam ka ti bik si lo a,ka tlawh reng thei bik lo.



"Ka unaunu duh tak i scooty hi ka ngai hle mai. Khawi chahbi," ka nau Rintluanga chuan ka bula rawn kalin a ti nghal zat. "Kha, lalrintluang va tibal hlek suh ang che,"tiin chahbi chu ka pe ve mai. Han tawng deuh khar khar hi chu ka thil chin than hrim hrim a nih vang hian ka sim thei tawh lo.



Tui lum sa ver vawra ka inbual hnu chuan ka phone chu ka en. Laltluangi missed call a lo awm vang mai, hmeh sawn mai ka tum chiah tihah a rawn call leh.



"Eksek tinge ka message hi ni thum chhung i chhang tawh lo. I nau ka hmu a,i haw tih ka hre chiah. Engnge kan pathlawi chanchin chu,"a rawn ti nghal leng leng mai. Henu vang vek hi alawm professor ka ngaihven tan em em. Professor chung chang bak sawi tur a hriat loh vang hian a message pawh ka seen peih lo.



"Ka hre nang. Engnge chanchin nei vak se i tih. A nung ve a,chaw te pawh a ei anga,zun te pawh a zung ve bawk ang chu,"a chanchin sawi tam ka peih loh avang chuan ka ti nghal vak. Hmanzana thil thleng kha hre ngat phei se hei ai hian a nasa ang.



"Kher a che,ka ti mai mai a nih kha. U Dinpuii nen hian an in ngaizawng tak tak aniang tunah pawh khan an in phur chhuak ka hmu a. Chuvang a lawm ka lo zawh che,"a tih chuan ka ner nghal sawk. Kha zana a rilru put hmang a sawi pawh khan Dinpui lo ngaihtuah chhuah nachang ka hremiah lo kha mak ka ti zawk. Hmeichhe dang a zui kual nghal du du tho sia.


Mahse a awm tho,ani ang pathlawi chhelo hausa bawk si tan chuan hmeichhe pakhat amah hel tang tang tumtu chu a zui kual rei peih lo tawp ang!



"E..taka i awm lai khan an inah a lo kal ngai em?" a tih chuan ka phun nghal hlak.



"Aw,aw..nih leh ka sawi tawh lo ang. A tha em? Vawiin chu lo phei la 24 sale kan zawng dawn nia. Kan vak hrep.dawn nia," tiin a dah zui hmak. Kum thum hnuah ka thiannu nena bazar chu a phur awm tawh viau tho mai.



~~~


Christmas pawh kan hmang zo leh der tawh. Biakin lama kan chet tam avangin Professor pawh ka hmu zeuh zeuh. Nunpuia nen kan in be tam lutuk lem lo. Dik taka sawi chuan biak tam ka peih lo. Ka tum luih ngial pawn ka thei leh lo thin. Nunpuia ka ngaih ai mah hian professor hmuh chakna ka ngah zawk!



Ni 31 a ni bawka kan thianho ti ila,school kan kalpui thin te ne n chuan len kan rawt. Ka pa pawhin 31 ni na na na chu a ti a,zanin ah pawh Tluangite inah kan hmang ho dawn,kei chu ka riak tlang nghal daih ang.



"Va fimkhur rawh u aw, scooty i khalh te khan nang phei chu fimkhur na chang hria ang che,"tia ka nuin min rawn auh chu ka hre vuai vuai chauh a ni. Phur tak chuan chahbi vai vir vut vut chung chuan ka chhuak. Ka phone a rik chuan ka pick vat.



"I rawn thleng tep tawh em?"Tluangi chuan a rawn ti nghal teng tung mai. Bialpa thar a nei bawka a phur fal leh nalh bik tawh ang chu. "Ka rawn chhuak a ni mai hmanhmawh viau su,"tiin ka phone chu ka ak zui hmiah.


Vawiin lamah pukpui velah te len kan tum. Hemite hian kalna tur an hre hle turah ka ngai tawp. Kei ve hi chu ka chhuah ngai lutuk loh avang hian lenna tur hmun pawh ka hre meuh lo. Two wheeler deuh vek kan keng,a hnungah ka zui ve lawp lawp mai.



Haw lamah chuan Laltluangi te an intihthiamloh avangin ka phur vang tawh mai. An in hauhna mai mai te hi a ho ve thei mai siah. Pakhat lahin thikthu lo pe chhe bawk tih kual vel mai a ni.



"E..ehe..saw saw professor car a niin ka hria,"tiin keimahni lam zawnga car rawn tlan phei chu min kawh hmuh chuan a ni ngei e. Min rawn tlanpel ruala a bula hmeichhe thu ka hmuh chuan ka lo thinrim ve em em ringawt. Ka hnung ami lah chuan a laka ka rilru put hmang hre hek lo Dinpuii nen chuan a lo hmeh bel hmiah hmiah.



"A..kei chu ka duh thei lo.. An in ngaizawng tak tak aniang,tun anga an in zui chuan. Nula damlai lusun tur an tam khawp ang,"tiin a nui huah huah.



Professor leh Dinpuii an tihnu ka hmuh dun vang ringawt chuan ka rilru a nuam thei der lo. Khalai hmun bawr velah lah inngaizawng vel bak leng chhuak an awm mang bawk si lo. Thil dang daih ngaihtuah ka tum pawh chuan chu tah bawk chuan ka lut leh thin.



Tluangi nu leh pate inkhawm tura an chhuah hnu lawk chuan an rawn thleng khawm nghal nak nak. Ka sawi tawh kha hmeichhe fel famkim ka ni lo. Nurse ka zir pawh mak an ti ka tih tawh kha.



"Hei,ka putea zarah ka nei nual mai," John an tih paha beer a rawn khai va va chuan mipa ho an lawm dur dur ngei mai. Zan reia ar hem tur te a puma lei tur kan zawng leh rih. Kan thil tih hi a chawp chilh riap riap a ni tawp mai.



Hla nena kan rik hut hut lai chuan Nunpuia min rawn call. Phur lem lo tak chuan ka pick ve vat tho.


"Ummm."



"Tluangi te nen chuan ami in hman ho dawn?" a rawn tih chuan tha takin ka chhang ve mai. Mipa dang an awm dawn tih a chian avangin min veng thawng viau bawk.



"Tinge tunlai hi i awm dan hi a va maksak ve?"a rawn ti chang ta fak. 'A chhan maw, mipa dang duh ka nei,' ti nghek mai ka duh.



"A danglam vak pawh ka hre hleihnem,"ka ti chuai raih. Kan inkar hi ka hne tawh thlawt. Min ngaihsaka min ngaihtuah te hi ka ho hlur tawh. Sual min ti em? Mahse inthiam lo chung chunga ka biak ngai thin te hi a hrehawm em a ni.


"Ka tihpalh,ka rawn thinrim deuh hluaia. Nuam deuhin i hmang dawn nia aw,ka lo be leh ang che," a tih chuan amah zawkin a dah hmasa ve teh mial.



Lehlamah Nunpuia a ni,lehlamah professor. Ka awm dan teh thlawt hi a hrehawm a ni tawp. Dawhkana an beer dah chuan min chhawk deuh theih beiseiin ka ban ve ta nge nge. Thil dang nena an pawlh chu ka in duh lem chuang lo. Hetiang pawh hi kum thum dawn lai ka in tawh lo mahse kei chuan sual a nihna em em ka hre lo thung.



Balcony-ah chuan ding tlem te te in ka in hlek hlek. Khaw vawt vuk karah hi chuan Professor nena kan inhmuh zan bak hi ka hrechhuak ngai lo. Khatah khan ka cheng veng veng.


"Lallawmzual,i phone a ri ania," music ri dup dup karah chuan Cc-a chuan a rawn ti.



Thawm reh lai deuh a kal chuan ka pick vat."Hello," number chauh a nih avang chuan pangngai thei ang berin ka chhang.



"Lo chhuak rawh,in kawtah ka awm,"a ti nghal tawng. A aw atang chuan tunge a nih ka hrechiang lutuk. Engtinnge ka number te a neih theih!



"A...inah ka awm lo."




"Ka hria, Tluangi te inah i awm,kei an inkawtah ka awm bawk. Lo chhuk rawh,"a ti leh nghal sup chuan awih lo takin balcony atang chuan ka thlir thla dek dek. A lo awm tak tak.

22-02-45-images.jpg
22-02-45-images.jpg (41.01 KiB) Viewed 4478 times


CHHUNZAWMNA




Professor car ka hmuh avang chuan rang takin in chhungah ka lut. "Tluang khu tah ka chhuk lawk dawn,"tih leh chhuah ka rual. Hetah engnge maw a lo tih dawn reng reng ni.



"Engnge?"darthlang a up loh avang chuan ka ti nghal tawng. "Lo lut phawt rawh,pawh chu a vawt," a rawn tih chuan thuawih tak chuan ka lut ve mai. Ka thu fel chiah tihah chuan a rawn che deuh hrut. Keimah min rawn hnaih thei ang ber tur chuan a lo awn,a phun zui hluk bawk.



"I rim mai mai chu(h)", tiin min melh rum tha khawp mai. Engnge ka rim..oh beer ka in ve tak. Chu pawh amah vang vek hian, ka chunga thinrim ringawt tur hian ka tumah a ni lo bawk.



"Engnge a pawina a awm ami?"ka ti ve nghal siah. Duh leh a bialnu kha va ngaihsak mai mai rawh se. Ka chungah thuneihna pakhat mah a nei lo. Ka thusawi avang chun a thinrim zual sauh a maw tih tur a ni. A hma aiin a hmel a rum zual sauh.



"Vawikhat mah ti tawh suh,"a ti chang leh fak chu ka ngaihdan a ni tawh bik hauh lo.



"Chutianga buai tur chuan ka engmah i ni lo a,i engmah ka ni bawk hek lo. Ka thil tih tur ah chuan lo in rawlh buai duh suh,ka nun a nia ka duh duh danin ka awm ve ang.I duh leh vawiina i hmeichhe phur bulah khan i duh tawkin i sawi dawn nia,a sawt zawk ngei ang,"tiin ka ang tawn tawn,ka sawi zawh chuan thaw ka la nghal ham ham. Chawl miahloa sawi atan chuan a thui deuh a ni.



Min en vung vung chuan a nui ta suk. A thinrim viau emaw ka tia tunah erawh a nui suk leh thung a.



"Engnge?"ka ti vin nghal hlar.



"I thik, heti chen min rawn ngaihven zui miah lo a,ka laka i rilru put hmang hi ka ring sual deuh niin ka hre hman a mahse,"tia nui sukin thu thain hma lam a melh nghal daih.



"Ka thik bawk lo e a. Tlaiah in in phur chhuak a,zan lamah keimah min hmu turin i lo kal leh a,"tiin ka rilrua lo lang lang chu ka sawi chhuak hmiah hmiah. Ka thusawi chu engah mah ngai lo ang maiin a thut ngaiin a thu reng a. A nui suk suk duh chauh. A landan pa zet erawh chuan ka mit a la hle thung. Rei lote chhungin a in thuamdan chu ka en kim vek bawk. Ni dang zawng aiin a lang pa.




Ngawi reng chuan kan thu dun vang vang. "Vawiin ah khan khanu nen khan engnge in tih a?"ka ti ta nge nge. Ka rilrua awm reng a ni bawk a,a lak a ka rilru put hmang a hre bawk a,han zawh a zahthlak na ka hre tawh lo.



"A thiante ina a kal kan inah a lo peng a,ka thlah,"tiin tha takin min chhang ve mai. Mak deuh maiin a thusawi ka ring nghal hmiah,nichin a a bialnu nia ka rinna pawh kha a bo vek tawh.



"Ka bialnu a nih i ring tak tak ami?"



"Umm..a hma kha chuan,"ka ti ve nghal sap.Professor nen a tuna kan awmdan hi nuam ka ti. A bula awm reng chakna in ka khat bawk.



"A bialpa nei zawkin chutiang ngaihtuah reng reng suh," a tih chuan professor hian a thik ve tlata hriatna ka nei. Nichin a min tih dan ang chiah khan ka ti ve vat.



"I thik a ni maw?"



"Umm..thik,"a rawn ti hmiah mai. A thil loh thute a sawi ka ring ve ania mahse a ni hauh lo. A thik thu a sawi hmiah. Min chhanna chuan sawi tur min ti hrelo chiang kher mai.



"I in ngaihtuah fim theih nana kal tir hrih che ka ni, i duh duh dana awm tur ni lo in. Mahse tunah chuan chu i hun ka pek che chu a tawp tawh ni rawh se. Ka hlatah i awm tawh lo ang," ka mita min en ran chung chuan a ti sup.Keipawn a kianga awm ka duh, a hmeichhia nih ka duh tawh.



"Professor,"ka tih chuan min rawn melh zawk. "Ka ngai che," ka ti ta sup, mawi em em in a nui nghal hawk thung. Sawi ka tum em em pawh a ni lo mahse amah zawk hian sawi lo thei lo in min siam. A awm mai mai pawh hian keimahah chuan thil a ti thei tak zet.



"Keipawn,"tih paha min rawn fawh chuan uar fahranin ka chhanglet. Ka beer in vang kha a ni ngei ang,ka phur fahran khawp mai. A in la hrang chu ka lo ui ru khawp mai.



" Ka sawi nawn ngawi tawh suh se vawikhat mah i ka ah khan far khat pawh a far tawh tur a ni lo," tak ruih a a tih chuan ka lo "Aw" ve vat mai. Ka hnial miah lo chu mak a tih ve hmel ngei mai. A awm lo hran lo, engnge maw sawi se uar fahranin ka chhang let ziah. Thil dang engmah sawi lo a a thu ka zawm ve ta chu a mak ta ve ang.



Ka inthiamlohna tur bawk thil ka ti leh tih ka hria,ka hrechiang lutuk mahse keimah leh kemaih ngei hi ka in dang zo bik lo. Rilru ti hrehawm duh lo chuan professor darah chuan ka bei hle hle.



"Tinge helai hmunah i lo kal a?"ka tih chuan awlsam zetin 'Ka bialnu tur,ka bialnu ni ta hmu turin ka lo kal,'tiin min chhang! Nunpuia chungchang a sawi chhunzawm miah lo leh kan inthen leh then loh a ngaihven miah lo te chu mak ka ti. Professor mizia hi a mak thlawt!



Christy leh Marcus chungchang ka zawh chuan apite bulah an mut thu a sawi. Ni tak, nu Thanpuii pawn a sawi tak, Christy a damlo te a nih loh chuan api leh pute bulah an unauin an riak ziah.



"Han lut tawh rawh, i thianten i rei an ti ang," a tih chuan a bulah darkar hnih dawn hun ka hmang tawh! "Kumina ka mi hmuh hmasak ber i ni ania lawm hle rawh,"ka tih chuan a nui suk.A tlanchhuah chuan ka ngai nghal veng veng mai. Hei vang hi ania a bula awm reng ka chak. A bula ka awm chuan ka nih dan tur dik tak ka niin ka hria.



In chhunga ka luh chuan tuman ka awm leh awm loh hria awm ang pawhin an awm lo. An bulah chuan thuin an thil ei ho chu ka ban ve nghal zat. Professor bulah kha chuan ka riltam tih reng ka lo hre leh tawh hleinem.



Nunpuia call a rawn luh chuan ka lung a phu nghal dup dup mai. Ka la lo mai dawn em ni ti ten ka ngaihtuah mahse tuna ka kalsan lo a nih chuan mipa pahnih bialnu ka ni mai dawn sin.



"Ummmm,"ka tih chuan nidang ang bawkin a rawn nui chhuak nghal hawk. "Happy new year, kan anniversary pawh a hnai leh ta sawt,"a rawn tih chuan ka kawchhung chu a hit nghal chuai chuai in ka hria. Tha tak chuan ka chhang ve mai zel.



"Ka hman velah ka rawn la zin phei ang. Ti hi chuan vallungleng-a tih kan ni reng dawn tlat," fiamthua a rawn tih leh chuan ka thei tawh thlawt lo. Khawvela ka thil tih hreh ber a la ni.



"Pui,kan in kar hi ti tawp ang,"ka kut hum ruh ran chung chuan ka ti tawp. Min chhang lawk lo,a thaw ri ham ham chu ka hre vek tho. A rilru ana dawn lutuk tih ka hria mahse ka ti lo a nih chuan ka la inchhir dawn lutuk tlat.



"Tinge?" Kei hian engtinnge a chhan ka sawifiah tak ang?



"Ka..ka tihpalh mahse ka thei tawh lo,"ka tih chuan a rawn tho chhuak hak. Kum thum dawn lai in kawp tawh kan nih bakah ka u thianpa a nih avangin ka hrechiang viau bawk, tuna a awm dan tur thlengin!



"A chhan sawi phawt rawh,a chhan diktak min hrilh la. In siamthatna tur ka neih chuan ka insiamtha ang," a rawn ti ta thlawt. Ka lakah hian induh tawkna chhe te tal nei se lo "Aw" mai se ka tan chuan a nuam zawk ngei ang.



"Ka sawi thiam lo. Tawp ila a tha ber ang."ka tih pawh chuan a chhan min hrilh turin min nawr lui tang tang tho. Mi mawl tak a ni! A lakah hian zep ka nei ngai lo hrim hrim tunah pawh hian dawt hrilh tumna ka nei lo. Na dawn mahse ka sawi ngei a ngaiin ka hria.



"Ih...mipa dang..uhh.. professor kha ka duh. Ka tihpalh mahse i bula awm a tir khan ka thlang zawk. Mahse ka..ka thei tawh lo. Ka tihrehawm tam mai mai zawk che,"mitchhing vang vang chuan ka ti. Ka rilru chuan 'tihpalh' tih chu ka sawi nawn awn awn mai. A reh nghal tlawk tlawk mai.



"I hlim zawk em?"zawi tak chuan a rawn ti ta sup. Mipa vanga tah ka nei ngai lo mahse tunah chuan ka tah a chhuak tak zet.



"A bulah chuan i hlim em?"



"Ummm."



"A that chu,"nui deuh hawk chung chuan a rawn ti hluai. "A bula i hlim chuan a that chu. Hun rei lote chhung a bula i awm pawn keiaiin a ti hlim thei che a nih chuan a tha a lawm. I hlim kha ka duh ber,ka hmangaih che tih i hriat kha,"a tih chuan za lo zetin ka nui chhuak hawk. Hepa han mawl em em dan hi,ka chunga thinrima in hrosa kual tur a nih laiin!



"Ka chungah thinrim zawk ta che,"ka ti nghal vak. Min hmangaih thu a sawi let hlauh chuan rilru a ti hrehawm ngei mai.



"Thinrim lo e,ka chelh bet rei mah mah zawk che in ka hria. A tir atang phatin ka kiangah hlim mahla i hlimna ber thlentu ka ni lo. Tuna min kalsan a nih pawhin ka dem lo che.



Hlim takin i awm dawn nia aw.Ani khan kei aiin a ti hlim thei ngei ang che.



I rilru ana a, i rilru a tihnat sak che a ka bula lo let i duh hun a awm a nih chuan min lo pan leh dawn nia. I tan chuan ka lo awm reng ang." Engmah ka sawi ve tawh lo,inthiamlo tur ten min la hrilh fan. Tha takin min mangtha mai bawk.



Min hmangaih em em tu kalsanin ka mipa duh ka thlang zawk a. Ka nat phah leh si a ngem? Ka nat phah a nih pawhin ka thiam loh a ni a,ka phu ve reng a ni.




Engtik ni ah emaw chuan TUEMAW vangin i dan siam ngei kha ii la palzut ngei ang.




Chapter thar a dah awm ka ziah loh avangin tah ka rawn zawm tawp. Ngaidam ngaidam...



Comments lampang pawh aw..Ads kha han click leh siah ula😁.



Link:
BBcode:
HTML:
Hide post links
Show post links

ADVERTISEMENT (A hnuai a milem hi a nia hmeh zeuh tur chu)