BOUND BY HONOR.

Episode kal lai dah luhna

Moderator: writers

Puii Sailo
Posts: 126
Joined: October 21st, 2020, 8:05 pm

BOUND BY HONOR.

Unread post by Puii Sailo » October 21st, 2020, 9:40 pm

Chapter - 1

Library kawngka chu a ri dat dat a. Sofa thutmut theihah chuan thatchhe fea thu chungin lehkha ka chhiar a. Thing kawngkhar lian leh dum tle hluau mai inhawn ruala ka nu lo pen lut mek chu hmu miah lo ang maiin ka mal lukham chunga mu Liliana chu a che sawn eih lo. Ka nu chuan sam buang uk deuh kharh chu hnunglamah mar takin a zial tawm a. Vei nei tih hriat zetin a hmel chu a dang deuh làp bawk a. "Thil dik lo a thleng em ni" ka tih chuan hahdam luih tuk takin a then lui deuh sak a. " I pain a office-ah a be duh che a" Lily lu zawitea thuthlenga dahthlak pah chuan muangchangin ka tho chhuak thram thram a. Kawm zetin a mu tha nghal sat sat a. Lily hi kum 11 chu ni ve tawh mahse a te chi kan tih ang hi a ni reuh a. Keipawh hi lian ka ni bik lo, Feet 5 leh inches 4 chauha sang ka ni a. Kan thlah hmeichhe ho tumah lian tiha sawitur an awm lo. Ka nu chu ka pan hnai deuh a mahse ka mitah tak pawh min en duh miah lo.
"Buaina ka tawk em ni?" Mahse tihsual ka neih awm ka hre bawk silo. Diktak chuan kan unau zingah chuan Lily nen hian thuawih ber kan ni ziah a. Gianna hi thuawih lo leh dan bawhchhiat vanga hremna tawk ziah thin a ni. Ka nu chuan ka zawhna pawh chhang ta lo chuan " I pa chu innghah rei tir suh" a ti leh ringawt a.
Ka pa office kawngkhar bul ka thlen meuh chuan ka kawchhungte chu a tawt deuh up upin ka hria. Ka hlauhthawnna thup tuma thawk ka lak vang vang hnuah kawngkhar chu ka kik a. " Lo lut rawh" zam hmel lang lo tura inthunun tum tak chungin ka pen lut a. Ka pa chu mahagony dawhkan lianpui, dum tliang hlurh mai hnunga leather thuthlengah chuan a lo thu a. A hnungah chuan mahagony thing atranga siam tho lehkhabu dahna, vawikhat pawh chhiar hlawh ngailo lehkhabu inrem khat dul chu a awm bawk a. Heng lehkhabute hi chhiar atan leh tarmawi atana uluk taka rem an nilo. A hnungah hian kawngkhar ruk, engemaw thlen thut pawha tuma hmuh loha tlanchhuah theihna kawng luhna thuptu atana dah a ni. Dan pangaiin a sam tuak ve pheuh pheuh tawh chu hnunglamah mam zetin a khuih pial a.
A lehkha bih lai chu rawn dakchhuakin, " Thu rawh" a tih takah chuan a hmaa chair inhungah chuan ngil fein, ka mal chunga kut suih atin ka thu thla ve nghal a. Ka hmui pet lo turin ka insum nasa ngang mai, achhan chu hmui peh hi ka pa huat em em a ni tlat. "Dawihzep thawmhnaw" a ti thin. A tawng hun ka nghah reng mai chuan hmuh hmaih neih hlau ni awmtak chuan ngun fe chuan min thlek leh vang vang a phawt a. " Bratva leh Triad-te hian kan lalram min chhuhsak tumin tan an la mek a, a ni telin heng pawlte hi an pung tual tual bawk si. Chuti chung chuan Las Vegas Familia, Mexican ho nena indo mekte nen khaikhin chuan kan dinhmun ala tha zawk fe tho. Mahse Russian ho leh Taiwanese ho vauna hi ngawihsan theih chi a ni tawh lo." Ka hrethiam ta hlek lo mai. Ka pa hian sumdawnna min sawipui ngai lo, hmeichhe ho chuang heng mob sumdawnna hi kimchang takin kan hre ve ngai lova. Han sawipui thui tur pawhin hriat ka nei ve lo a ni zawk mah. " Chuvang chuan New York Famila lakah inphah hniamin, Bratva leh Triad-te chona chhanglet tur hian thawhho puia kan sawm mai a ngai dawn a." Familia-te nen inremna maw? Ka pa leh Chicago Outfit mi leh sa zawng zawngte hian Familia-te hi an haw hle thin kha a ni sia. Kum tamtak hmelma anga indoin, nunna tamtak an inlaksak tawn tawh thin kha a ni sia. Tunah lem pawl dangte hmet chimit turin an inhuatna dahthain tan ho an tum a nia.
"Thisen aia inzawmna nghet a awm lo, chu chu Fimilia lam hian an hrechiang lutuk tlat". Ka la hrethiam thei chuang lo. "Thisena piang, thisena thutiam. Chu chu an motto a ni." Hrethiam lo viau mah ila ka bu ve nghut tho a. Diktak chuan ka hriatthiam ve pawh a ngai chiah lo maithei. "Nimin khan Salvatore Vitiello nen kan inhmu a" ka pa leh New York Mob a an hotupa ber, Capi dei Capo an tih thin kha an inhmu maw? New York mob leh Chicago Outfit-te hi kum tamtak chhung an inhmu tawh ngai lo. Ka sawi tawh ang khan, hmelma an ni. An inhmuh hnuhnun ber tuma thil thleng kha a rapthlak takzet. Khami nia thil thleng kha tun thlengin Bloody Thursday tiin an la sawi thin. Ka pa lah Outfit pawl hotupa ber a nilo a. Boss tia an sawi thin, Fiore Cavallaro ruahman angte tih hlawhtlin anih theihna tura tanpuitu leh thurawn petu zinga pakhat ve mai a ni bawk si. " Chhungkaw pahnih kara remna thleng tur chuan chhungkuaah kan insiam phawt a ngai thin" ka pa min en dan avang chuan a thusawi leh zel tur chu hriat ka chak tawh hlawl lo. " Cavallaro nen thuthlukna siamin Familia fapa upa zawk Luca, nakin lawka Capo dei Capi la ni mai tur chu pasal atana i neih kan remti ta a ni." Ka thu hriat chuan min deng na lutuk a, sang tak atranga tla vawng vawng ang mai niin ka inhria. "Tinge kei kher?" " Kar hnih vel liam ta atrang khan Vitiello leh Cavallaro pawh phone in an inbe fo a. Vitiello chuan a fapa tan nula hmeltha ber a duh thu a sawi a.
Ni e, kan sipaite fanu hmeltha satliah ringawt chu kan thehchhuak thei silo a lawm. Fiore lahin fanu a nei bawk silo a, chuvang chuan nang hi nula hmeltha ber leh Luca nei thei tur awm chhun i ni." Gianna hi hmelah chuan kei aiin a tha zawk daih a. Mahse ka aiin a naupang zawk bawk si. " Kei aia nula hmeltha zawk an tam a lawm" ka ti chhuak thei hram a. Ka thaw thei tawh lo. Ka pa lah chuan a thil neih hlu ber ni awm tak chuan min en tlawk tlawk a. " Nula zingah hian i sam rawng ang nei hi an tam lo a sin, Fiore phei chuan rangkachak sam a ti hial thin a sin" tih pah chuan a nui chhuak hawk a. " New York Familia-te nen kan inzawm theihna kawng awm chhun i ni" " Mahse ka pa, kum 15 chauh ka la nih hi, pasal nei thei ka la nilo."



Link:
BBcode:
HTML:
Hide post links
Show post links

ADVERTISEMENT (A hnuai a milem hi a nia hmeh zeuh tur chu)