BOUND BY HONOR - 5

Episode kal lai dah luhna

Moderator: writers

Puii Sailo
Posts: 126
Joined: October 21st, 2020, 8:05 pm

BOUND BY HONOR - 5

Unread post by Puii Sailo » October 21st, 2020, 11:58 pm

CHAPTER – 5

Luca chuan “Tiam lo” a lo ti sam et a. Ka pa hmel phur tak pawh kha a bo nghal a. Fabiano chuan tuma hmuh loh turin min rawn hnaihin ka kut a rawn vuan vat a.Luca erawh chuan ka nau a ruka min rawn hnaihtu chu a lo en vat avangin ka bawp, ka kawrfual chhing takin a khuh phak loh chu ka duh aiin a rawn bih hnai tlat. Zam tak chungin ka tawlhsawn hret a, Luca pawh chu a hawisawn ve mai bawk a.

“Nupa tuak thar la ni mai turte hi hunthawl pe ila a that in ring ve lo maw?” Savatore Vatiello-in a tih chuan a awmna lam chu ka hawi phei nghal vat a, ka mak ti hmel pawh chu ka thup hman tawh lo. Luca chuan min lo hmu reng mahse engmah a sawi chhuak lo. Ka pa chu nuih suk pahin chhuak tur chuan a in her nghal a. Ka awih thei lo hial!

“Awmpui in gai a ngem?” Umberto=in a tih chuan ka lo nui nghal var var a. Mahse ka pa in lu a lo thin takah chuan ka nui hmel pawh a tawp chiang ngang mai. “An pahnih khan hun pe rawj”, a ti a. Salvatore Vatiello chuan Luca chu a lo siai zauh bawk.

Midangte an chhuah mek lai chuan kei leh Luca leh Fabiano te Chu kan ding ta thap a. “Fabiano”, ka pa aw ri chu ngaihno a bei mawlh lo. “ Tunah chhuak nghal rawh”. Fabiano chuan ka kut chu thlahin a kalsawn nghal a, mahse a chhuah hma chuan naupang kum 5 mi tih theih tawka rum chuan Luca mit takah a melh ve nghek phawt. Luca chuan engahmah ngai lo tih hriat zetin a hmui a lo ti sawi zeuh duh chauh a. Kawngka an khar hnuah chuan kan pahnih chauhin kan awm ta a. Luca pa mit siai zeuh kha engtihna nge ni ta ang le..? Luca hmel chu ka melh ru zeuh a, ka ring dik chiah. Ka pheikhawk sang bun nen hi chuan a khabe ka chen phal vel chiah chiah. Vawikhat pawh min melh chhin lo. Inzuar thinte thawmhnaw hak ang ka hak vang hian min duh ta lo pawh a ni maithei. Mahse a mak ka ti…, New York a a hmeichhe kawp thinte thlalak tam tak ka hmu tawh a, thawmhnaw tiha sawi tham pawh nilo vek a lawm an hak thin le. “ I kawr hak kha i thlan a ni em?” a tawng chhuah thut vang chuan ka phu nasa lutuk a, ka thlawk lo chauh a lawm.

A aw ri chu a hniamin a hahdam hmel phian. Hepa hi eng ang mihring nge maw a nih le..? “Ni lo”, ka lo ti ve mai a, “Ka pa thlan”, a hmel landan chu a chang viau lawi a, engnge a ngaihtuah ang tih ka hriat theih miau loh avang chuan ka zam leh hle tawh. A jaket chhunglam a zen luh rual chuan silai a phawrh dawn a nih ka lo ring nghal thawt thawt a, mahse bawm dum tetakte a rawn hum chhuah takah chuan ka lam panin a rawn pen hnai zel a. Ka hawi chhuak ngam tawh lo, a awm zawn chu ka melh san ngam ber a ni. Kawr dum, tie dum, jacket dum, a thlarau rawng poawh a dum tho a ni ang. Hei hi hmeichhia zawng zawngte suangtuah thin a ni ngei ang. Mahse a bawm ken lai a hawn rual chuan ka vawt nghal vek ni main ka hria, a chhungah chuan white gold zungbun, diamond lian tawk tak invuah, diamond te tak tetein a hual chhuah leh vek a lo awm a, ka che thei lo. Luca in ka kut a rawn ban lai chuan awmdan mai tur ka hriat loh avangin ka lo en ringawt a, zah vanga sen awp awp chungin ka kut chu ka lekchhuak ve thei hram. A kutin ka kut a rawn tawh rual chuan engtin emaw tak ka awm, zungbun min buntir zawh chuan min thlah lehnghal a. “Ka lawm e”, ka sawi tur a ni em pawh ka hre lo. K ahwichhuah ruala a mit meng vawt ruihin min lo en reng chuan sawi mai tur ka hre tawh lo. Thinrim hmel a pu bawk. Tihsual ka nei em ni… ka kut chu la in ban min kuah tir a, dining room lam panin min hruai chhuak nghal.

Tumah mah kan tawng tawh lo. Luca hi a thinrim a nih chuan inneihna hi a sut leh duh mai a ngem le? Mahse chutiang chu ni dawn ta se zungbun hi min buntir awm si lo a. Dining room kan thlen chuan kan chhungkaw mipa ho chu hmeichhe ho nen an lo awm vek tawh a. Vatiello lam hian hmeichhia an rawn hruia ve miah lo. Kan in a hmeichhe rawn hruai tur khawpin ka pa leh Cavallaro -te hi an la ring zo lo pawh a ni mahna. Dem theih pawh an ni lo. Keipawhin ka pa leh boss hi ka ring bik miah lo ang. Luca in min vawnna athlah veleh chuan ka nu leh ka naute ka zungbun lo en rengtute dinna lamah chuan ka kal nghal a, Gianna chuan min lo mleh deuh kawk mai. Hetianga ding ngawi reng tur hian ka nu hian eng thu nge maw a hrilh chiah chu le! Gianna hian a thinrim hrikthlak nan engngemaw sawi a duh tih ka hrechiang lutuk tlat. Ka lu ka thin khum avang chuan a meng kual nghal ralh a.

Chaw chu kan kil ta thap a. Mipa hoin sumdawnna chungchang an sawi vangin hmeichhe ho chu kan tawng tam lem lo. Ka kutzungtanga zungbun langsar tak mai chu ka melh leh thin a. A rit mah mah, a tawt mah mah, aaaaa… a lutk mah mah vek a ni mai. Luca ta ka nihna min hriatnawn tir fotu a ni bawk.

Chaw eikhamah chuan mipa ho chu lounge lamah zial zuk paha no te dawm turin leh sawi tur tul ang angte sawi tur chuan an lutkhawm ta diak a. Ka room a ka kir leh hnu pawh chuan ka muhil thei hauh lo, ka pyjama chungah chuan bathrobe ha in, inhnuai lamah ka chhuk thla ta daih a. Engin nge min mawlh ka hre lo, lounge lama chhuah rukna bang phen a awm daihah chuan ka lut a. Ka pu khan office leh lounge te luh leh chhuah theihna kawng ruk siam ngei ngei tur a ti thin. A chhan chu thil pawimawh, chhungkua leh sumdawnna kaihhnawih sawi ho tur a awmin heng pindan pahnihte hi mipa ho in an hmang thin a ni. Thil engnge maw a thlen thut pawh a him taka an tlanchhuah theihna turin heng pindante pawh hian kawng ruk siam a ni bawk. Mipa ho zawng chu lo tlan chhuak thei pawh nise hmeichhe ho tlanchhuak ve theilote hi min ngaihtuah miah lo emaw ni le…

Gianna chu kawngkhar awng atangin pindan chhunglam ngun taka a nihthla lai ka va hmu ta mai a. Ni e, a lo awm sa daih tawh. Thil ti ru tih hriat zeta a hawi kual zek zek avang chuan min rawn hmu ve nghal a, mak tih vangin a meng phawk deuh kawk tih loah chuan hlauthawng hmel a pu miah lo. Hmui phunin, “Hetah hian engnge i tih?” ka ti a. pindan chhunga awmte chuan kan thawm an hriat ka hlau bawk si. Eng dnaga min chhang ta lo chuan zaizirin bih ve tura min hrilh pah chuan a tawlhsawn nghal a, “Midang chu an haw vek tawh, ka pa leh Cavallaro-te chuan Salvatore Vatiello thu pawimawh sawipui duh an neih vangin pindan hranah an awm a, a chhungah sawn Luca leh a naute an thukhawm mek”, a ti a. Ka bih ve takah chuan meichhemna thuk hmaa mipa thu kual thapte chu ka hmuchiang kher mai. Luca chu meichhemna thuk tlang marble a siam chu nghengin scotch dawmin a ding. Bula chair-ah chuan a unaupa Matteo pawh dawrh zetin, nui deuh vur chungin a thu a. Thuthleng dangah chuan Cesare leh a bodyguard pakhat chaw ei laia Romero ti a an kohte chu an thu bawk a. Romero leh Matteo hi kum lamah chuan an inrual ka ring, kum 18 vel an ni tihna anih chu. Dan pangngai chuan puitlinga chhiar an la ni chiah loa, mahse kan khawvelah chuan puitling anga en an ni tawh.

“A aia thalo zawk pawh a thleng thei,” tih pahin Matteo chu a then sak a. Luca ang em a hlauhawm hmelin lang ve lo mah se a chhungrilah erawh sakawlh hlauhawm tak a kawl a ni tih a mitmeng atangin ka hrethiam ve mai. “Hmelchhe deuh pawh a lo ni thei a sin, tak zet hian!... i nupui hualte kha lasi nula ang maia duhawm a nih kha. A thawhnaw hak, a taksa, a sam leh a hmel zawng zawng nen,” tih pahin Mtteo chu a faifuk raih a. A u saw chhaih thinrima tum a nih hmel zawk mah. “Naupang anih kha”, Luca chuan a lo ti bung nghut a. Ka thin chu a sa deuh phat a, mahse mipa in hmeichhia a en anga min en loh avang chuan lawm tur ka ni tih ka inhrilh vat a. “Ka tan chuan naupang a ni ve lo”, tih pahin Matteo chu a la then sawng zui. A bodyguard Cesare chu kiu a nghawk zeuh pahin, “Engnge i ngaih ve dan, Luca hi a mit a del em ni?” a ti a. Cesare chu hlauh hmel taka Luca melh paha dar san deuh ak chungin, “Ka lo en chiang lo a,” a ti ta ringawt a.

“Nang engnge i hmuh ve dan Romero, i hmai a mit invuah kha ahmantlak a ni lawm ni?” Romero chu hawi chhuak zawkin a no dawm lai bawk chu a en leh ta daih a. Matteo chu vanvadak meuhin a nui. “Hrep tak hian Luca! I naute hian khanu kha an melh vaih chuan an mipatna tan sakah i vau zawk em ni? I nupui pawh a la nih loh kha.” “Ka ta a nih kha”, Luca chuan a lo ti vawt ruih a. A mitmeng chu sawi loh, a aw ri vang chuan ka hnungzang ruhte chu a vawt nghal rawih2 theiin ka hria. Nuihzat vanga Matteo lu thing mat mat chu a eng reng a, “Kum thum chhung ila nghal dawn. Chutih chhung chuan nang New Yorkah i awm anga, ani hetah. I veng reng thei dawn hlei nem. Nge Outfit mipa hote hi an mipatna tansakah i vau lawk vek dawn? A nih loh chuan amah veng turin mitilreh ruai mai la a that zawk ka ring”.

“A tul apiang ka ti mai ang”, tih pahin Luca chuan a no chhunga scotch chu a ti fawn hliau2 a. “Cesare, kan mimawl pahnih Aria vengtu turte kha va hruai teh”. Ka hming a lam rik dante chuan min tikhur hial thei nia. Vengtu pahnih ka nei dawn tih pawh ka lo hre hlei nem. Umberto hi kei leh ka naute veng utr chuan a tawk lutuk tlat. Cesare chu Umberto leh Rafaelle te hruaiin a lo kir leh a.

Chutia New York mi leh sa in ui ang maia a koh kual vel vang chuan an lungawi loh dun hmel kher mai. An hnung deuhah chuan ka pa pawh a rawn lang ve nghal zat a.



Link:
BBcode:
HTML:
Hide post links
Show post links

ADVERTISEMENT (A hnuai a milem hi a nia hmeh zeuh tur chu)