BOUND BY HONOR - 7

Episode kal lai dah luhna

Moderator: writers

Puii Sailo
Posts: 126
Joined: October 21st, 2020, 8:05 pm

BOUND BY HONOR - 7

Unread post by Puii Sailo » October 22nd, 2020, 12:22 am

CHAPTER – 7

“Ti suh” ka lo ti vat a. “Min en rawh”, ka tih chuan thisen baw nuaih chu hawisanin min en ve mai bawk a. A mittui a tling pam a, ka pa benna avanga a hmui atanga thisen chhuak pawh a khabeah leh a mutkawr fual varahte chuan a kai a. Nghet taka ka chelhna chu a tan ka awm zel ang, tih hrilh hretu a ni. A mitah chiang taka ka en chuan ‘ka innghahna neih chhun i ni,’ ti niawm takin min lo melh ve kar a, kan pahnih chuan Umberto chuan kan pindan lam pan turin min hruai chhuak zui nghal.

“Hmeichhe ho hrep tak hi chuh! Thi ser ser ringawt pawh hi an hmu thei thlawt lo,” thinrim hmel zeta ka pain a ti ri chu ka hre thei a. Kawngka a inkhar leh hmaa Luca mitmeng vawt takin ka hnunglam a rawn melh leh hram pawh chu ka hre thei hial nia. Inchung chhohna pana hmanhmawh taka Umberto zui dawr dawr pah chuan Gianna chuan a khabe vela thisen kai chu a tuai puat a, “Ka haw lutuk”, a ti sap bawk. “Shhh..” chutiang thu chu Umberto hriata sawi lo tura ka duh vang ani. Min ngaihtuah viau mah se ka pa tana thawk, a sipai rinawm a ni tho tho.

Gianna pindana luh ve nghal mai ka tum vang chuan min lo dang a, “I pa thusawi i hriat kha”, Umberto chu ka en reng ringawt. “Gianna hmui kha ka tihfai sak a ngai a lawm’. Umberto chuan luthin pahin, “Eng tham mah a nih loh kha, in pahniha in awm dun tawh chuan buaina in siam ziah. I pa awmdan i hmuh hnu khan harsatna dang siam belh leh i duh dawn em ni?” a ti a. Gianna pindan kawngka a khar zawh hnu chuan ka pindan pan turin zawitein min nam sawn a, ka lut tawh chu inher lehin, “Mipa puitling engngemaw zat hmaah, hmeichhe naupang khawngaih thlak takin kut a tawrh lai khan tuman in chhan ngam lo a, khatiang kha a ni maw mipaten huaisenna an lo tih ve ziah chu!”. “I pasal hualin i pa kut a dan daih kha”. “Keima tan chauh a lawm, Gianna a chhan ve lo.” Umberto chuan a min tih hmel zetin min nuih ringawtin, “Luca hi New York chunga roreltu a ni maithei, mahse hei hi Chicago a nih bakah i pa hi Outfit hruaitu a nia sin”. “Luca kha i hlau a nih kha. Rafaele kutzungtang a tan la ii hmuh avangin i hlau a nih kha”, ka ti hul hak a. “The Vice khan a kut chauh nilo thildang a tan sak lo a i unaupa kha a vannei takzet. Luca khan mipa anih anga a tihtur dik tak a ti a ni”.

Kan khawvel tan chuan a dik mahna. Umberto chuan zawhte note ang main ka luah min beng thek thek a, “Mu tawh rawh”. “Zan laia kan chhuah ruk loh nan kawngkaah hian i ding tlaivar dawn em ni?” cho fe chian ka ti a. “Ngai a neih tum rawh. Tunah chuan inhualna zungbun i bun tawh a, englakah pawh i him ngei theih nan Luca hian engthil pawh a ti hreh dawn lo”.

Kawngkhar ka khar nghal bur a, ‘VEN NGAI’… He Luca hian hmun hla tak atang pawhin min thunun a tum a ni a, kan inneih hma tal chuan a hma ang khan zalen leh hahdam takin ka awm theih ka lo beisei a, mahse a zungbun min pek ka bun tih hre reng chung chuan tuman min hnaih ngam tawh dawn lo a nih hi.

Rafaele kutzungte kha signal leh warning a ni a, Luca hian keimah vanga thisen chhuah leh tualthat mai pawh a hreh dawn hauh lo tih a chiang hle bawk. Light pawh off ngam loin ka mu meng kar a, diktak chuan kutzungtang tan lai ka hmuh leh thisen tam tak chhuakte khan min tihlau tlat a ni. Kutzungte bung kha ka roomah pawh hian a lo lut maithei a sin!
Khaw vawh vang chuan ka thaw khu chhuak deuh hlat hlat a, dik tak chuan Chicago thlasik khawvawt lak atang hi chuan ka coat chhah tak pawh hian min tilum zo lo a ni ber mai. Midwest lama mothuam zawrhna dawr lian ber panin ka hmaa kal ka nu chu ka zui dawr dawr a, kawnga vur tlate chu kan rah pah chuan a ri hmerh hmerh mai. Umberto pawhin kan hnungah min rawn zui ve zel a, hepa hian ka hlimthla ang maiin min zui reng dawn a nih hi.

Ka naute pawh ka pa sipaite hoin an rawn chhawm ve dat dat mai. Dar kawngkhar virthei chu kal tlangin, dawr chhung eng chi hrang hrang leh pangpar mawi tak takte hmanga chei chu kan luh rual rualin dawr neitu leh a michhawrte chuan min lo chiau au tirin an lo tlan vat a. Aw ki zang vahin, “Happy Birthday, Ms Scuderi,” ka nuih let ve hram. Kum 18 ka tlin ni a nih angin hlim viau tur chu ka ni. Mahse Luca ka neih hun tur a hnaih phah sawt vangin ka hlim thei lo. Rafaele kutzungtang a tan zan atang khan ka la hmu leh miah lo. Ka birthdayte, Christmas-ahte leh Valentine’s day-ahte tlerueh manto tak tak a lo thawn ziah thin a. Kan inhualna champha phak apiangin engngemaw manto tak min lo thawn ziah bawk mah se, kum thum kal ta chhung kgan vawikhatmah kan inbiak loh bakah inhmu lo.

Internet leh chanchinbu lam atangtein nula hrang hrang nen an thlalak ka hmu fo thin a, chupawh chu a tawp tawh ang. A chhan pawh vawiin hian press lamah kan inhualna puanzar a nih tawh dawn vang a ni. A Hmeichhe kawp hrang hrangte khawvel hmaa tarchhuah an ni tawh lo tur pawh hi a tha viau e. Engvang teh hrep hian nge a hmeichhe mutpuite chu ka lo ngaihtuah le? Ka tan engtihna mah a ni lo. A nundanah buaina ka nei love. Hmeichhe dang a mutpui leh ka tan a hahdam thlak zawk dawn tihna a ni mai.

Dawr neitu chuan nui sang chungin, “Ka hriat sual loh chuan, inbuatsaih nan thla ruk chiah hun an nei tawh a ni maw?” a ti a. Henu chauh hi kan inneihna tur vanga hlim awmchhun a ni hial ang. A mak hran lo e, ani chuan vawiin hian sum tamtak a hmu dawn a lawm. New York mafia leh Chicago Mafia-te inremna tur inneihna a ni dawn tlat. Engkim mai chu a tha ber leh sawiselbo a ni tur a ni. Sum lah ren a ngai hauh bawk si lo.

Beidawng zetin ka thle bak a, ka kutzungtanga rangkachak dang hmanga phuar ka nih leh hma hi ni 166 chiah a awm tawh. Gianna pawh chuan ka ngaihtuah ang tho a ngaihtuah ve tih hriat takin min en a, mahse engmah a sawi chhuak lo. Kum 16 leh a chanve a tlin meuh chuan Gianna pawh a thinrimna leh a ngaihtuah ang ang rik chhuahpui nghal hluai loh a thiam ve ta. Dawr neitu chuan hmeichhe ho zawng chi fitting room-ah min hruai lut a, Umberto leh midangte chu pawn lamah puanzar hmanga indaidanin kan awm a. Lily leh Gianna chu couch var, thut chakawm takah chuan an thu nghal hnawk a, ka nu ve thung chuan mokawr an phochhuahte chu a enkual nghal zung zung thung. Pindan laiah chuan dingin ka bul vel a silk-te, gossamer-te, brocade-te leh tulle hmanga mo kawr an cheite ka hmuh chuan ka hrawk a tawt nghal ut ut mai. Reilote a pasal nei tawh tur ka nihna min hriat nawn tirtute an ni. Fitting room cheina atan a an tar, hmangaihna thu ziak mawi tak takte chu ka tawrhna min belhchhah saktu mai an ni. Hmangaihna hi enge, suangtuahna awmze nei lo mai mai mawle. Dawr neitu leh a mi chhawrte chuan min lo en reng vangin ka nu thil en lai enpui tur chuan dar chhin akin ka kal sawn ta daih a. He inneihna hi ropui duh vanga inremsiamna chauh a ni tih tuman an hre tur a nilo. Mo ni mai tur hi ka hlim der a ngai. A hnu deuhah chuan dawr neitunu chuan min rawn pah hnaiih a mo kawr zawrh zinga man to ber berte chu a rawn khai chhuak a. “I pasal hual chuan eng ang chi hi nge a duh ang?” a hmel chu a nelawm kher mai. “ Saruak ang chi kha” Gianna chu a lo ti fak a. Ka nu chuan a lo melh rum nghal vat. Ka sen nghal awp awp. Mahse dawr neitunu chuan fiamthu emaw a ti aniang, nuih pahin, “ Chutiangte chu inneih zan atan a ni dawn lo’m ni?” a lo ti ve vat. A man to ber chu ka thlang a. Brocade kawrfual, darbah awm lo, a awm bawr pearl a chei a ni a. A tlangah chuan silver rawngin an thui par chhuak vek bawk a. “I thlang thiam hle mai, a thui parna kha platinum zai anih kha. I pasal mit i tlung ngei ang tih ka chiang” dawr neitunuin a tih chuan ka rilru te tein, kei aiin ka pasal hual hi i hrechiang zawk daih anih hmel ka lo ti hman pek a. Kum thum zet inhual tawh mah ila ka tan chuan hmelhriat loh ang chauh a ni.

Vitiello mansion, Hamptons a innei tur kan ni a, mi zawng zawng chu inneihna atana inbuatsaihin an phar buai ni maiin ka hria. Kan inneihna tur hmun pawh chu la hmu lo mah ila, zawh chawp ngai miah loin ka nu’n engkim min hrilh ve zel. Ka chhungte ho pawh New York an rawn thleng tawh a. Mandarin Oriental Hotel, Manhattan a kan suit-ah chuan ka unaute nen kan awm khawm thap a. Mansion-ah pindan ruak tamtak a awm tho avangin Salvatore Vitiello chuan inneih hma ni nga chhung lek chu awm ve mai turin min ti a, mahse ka pain a a duh bik tlat lo. Kum thum chhung chu tul hrang hrangah thawk ho tawh thin bawk mah se, an la inring lo tawn hle. Inneih ni a thlen hma loh chuan mansion ka rap lo tur ringawt pawh hi ka lawm tawk a tling. Ka pain Gianna leh Lily-te nen suit pakhat intawm min phalsak a, kan hlim ve lutuk tlat. A awmzia chu, ka nu nen chauh suit pakhatah an awm thei dawn tihna a ni. Kan bodyguard-te pawh kan suit ep chiah ah pindan hran luahin an awm ve bawk a.
“ Naktuka bridal shower neih turah chuan kan tel ve kher a ngai em ni?” Lily chuan sofa nghenchhana a ke ban liam then lauh lauh pah chuan a ti a. Gianna chuan a lo fiam let nghat zat, Lily lah a duai duh bik der lo. A mawng a tih sawih khum vel a. Lily hi April thla khan kum 14 a tling ve chiah, naupang te mah nise a taksa nalhna hmang chuan a bul vela mipate hip a tum ran thin. Teen model Thylene Blondeau nen pawh an inang reuh lutuk, mahse Lily sam a buan zawk bakah a ha hmai a awng ve lo.



Link:
BBcode:
HTML:
Hide post links
Show post links

ADVERTISEMENT (A hnuai a milem hi a nia hmeh zeuh tur chu)