KA LALBERA CHAPTER - 35 (LAST CHAPTER) By Ahmangaihi violette khiangte

[Ahmangaihi violette]

CHAPTER - 35 (Last Chapter)



[attachment=0]IMG_20201011_162842.jpg[/attachment]





"I Ni bulah i ha kha va nawhtir la, mutna ah i Ni phone khawih tawh suh aw, anihloh chuan i mit kha a chhe vek mai ang" ka tih chuan "Um...Phone ka khawih tawh dawnlo" tiin a tho zui a, a kalliam chu nui var var chungin ka en a, kan hnena a awm hi ka lawm takzet a ni, amah kha hmuh hian chakna thar ka nei leh ṭhin, apa heti mai ani a, ka kut zalah liau liau a tla in ka hria a ka mawhphurhna ah ka ngai nghet hmiah bawk.






"Duata i mut a chhuak ve tawh em?" ka tih chuan ka awm a rawn ngheng ṭha sat sat a, kan ṭhutdun hian hnunglam aṭanga ka pawm kher hi a duh ṭhin a, hetiang hian thatchhe zeta ṭhuin min ngheng ar ar ṭhin.






"Ka mu duhlo" tih zawng a sawi a, ka awm nghenga ṭhu awn diai chung chuan van lam chu a thlir veng veng a, thla a eng lutuka arsi te chu an lang fiah thei meuhlo, mahse, van chu nalh tak a ni, ral hla taka tlang te pawh thla eng hnuaiah chuan a lang theia a mawi em em bawk.






"Ih maw Duata, nangchu Arsi ah chang ve suh aw, ka tan chuan lungpui ang ni rawh, a chhan chu thilmawi te chu an chuai leh mai ṭhin si a, nangchu chuai ve turin ka phallo che a nia, Arsi ang te khian inthlak danglam ve ngai miah suh aw" ka sawi zawng chuan ka mittui a rawn hnam a ka ṭap titih der mai.






"Nakinah chuan chhum zinna piah ah khian ila kal anga, chuta awm te chuan i hming an lo zawt che anga 'Lalbera' tiin i chhang ngei anga, anmahni tihlimtu i han ni awm si a, kei hi min lo la hre ve reng angem Lalber, min hrereng ang tiraw, ih e...tunah min hre tawhlo mahla, chhum zinna piah i thlen hunah chuan min han hrechhuak leh ngei ngei ang che aw" ka ṭap chhuak hawk mai.






Ka insut zui hlawp hlawp chu phawk zetin min lo en a "I ninawm" a lo ti hluk a, ka kuahna aṭang chuan a talhrang nghalvut bawka, ka inhru hul rang kher mai.





A tukah kan inchekup a, hmasawnna lam chu beiseiloh sa ani a, tlakhniam lam a pan lo anih chuan kan lawm hle tawh zawk, pawn lama chhuahpui pawh a buaithlak ta khawp mai, mahni mai chauha hruai chhuah chi a ni tawh meuhlo.





Social media lamah te Alzheimer Care group ka join ve a, kan natna ang veive tho midangte nen kan harsatna te chu kan in share tawn a, keini chu midang ngaihtuah chuan zia tak kan la ni zawk tih te ka hre lehzela, miṭhenkhat chu chhungkaw pa, ei leh bar daptu tak tak te an ni a, an dinhmun ngaihtuah chuan kan vanneih zia chu ka hre nawn awn awn ṭhin.






"Keini chu kan vannei asin chuvangin vui miahlo ang aw, midang te chu maw nangmah ang thoin an damlo a natna an nei ve tho a, mahse, eitur tuihnai takngial pawh leina tur an neilo a, keini chu Pathianin kan mamawh engkim mai min pe a, chhungkua leh ṭhen leh rual te, malsawmna tam tak kan dawng anih hi" a ke hmehsak pah chuan ka ti sap sap a, ka thilsawi chu a hrethiam phaklo tih hre mahila ka be chhunzawm mawlh mawlh a, thil ṭhenkhat hi chu fiahtakin hre ṭhin mahse, a tam zawk hi chu a hrethiam tawhlo a, ka biaka min lo chhang anih chuan lawmawm tak a ni tawh.





"Mu tawh ang le, ka hmangaih che tuideuhin mula zingah damtakin i tho leh dawn nia" tiin a hmuiah chuan a fawh sak a, a chang chuan a hmuia fawh hi a duhlo ṭhin a, zanin chu a dawh hle hle mai.






Mu tura ka insiam hnu pawh chuan a la ṭhu ta reng a "Ezra mu ang" ka tih pawh chuan min en ringawt a, ka thilsawi chu a awmzia a hrelo deuh tlatin ka hria, he thu kher hi chu a hre ve viau ṭhin a sin le.






Khumsir lehlamah chuan lawnin a kawr chu ka phelhsaka, ka tih ang ang chuan a awm tawp maia, a ṭang bik miahlo nain ka kawr ka phelhsak zawh hnu pawh chuan a la ṭhu ta ngara, ala mu duhlo em mawni le ka ti neuh neuh a, zan a rei lam tawh si a, zandangah chuan hetiang hunah hian a muthlu lup lup tawh ṭhin.






"Lo kal rawh le" tiin ka kuai mu a, puan ka sin ṭhattir laichuan ngun zetin min ena, "Muhil tawh rawh le Duata" ka ti leh laia a mita mittui tling chu chiangtakin ka hmu a, "Na i nei em ni? Tinge i mittui kha" a biangah dawmin ṭah insum ṭeuhin ka en a, "Thil engemaw min hrilhduh i nei ti raw?" keimah zawk chu ka mittui a luang zung zung lawi a.






"Ka bulah i awm renga mahse ti nge ka ngaih em em che le" a awmah chuan ka kut ka nghata a lungphu ri dup dup chu ka hre thei, "Ka theihngilh hunah che pawh hepa hian a hmangaih reng ang che i tih kha ka la hria a sin, hetah hian keimah kha ka la awm reng tiraw............ka ngai lutuk che Lalber" ka ṭah laichuan ka kut a rawn huma, a hmer vawng vawng a.






"Ka thilsawi kha i hria a mi" ka ti vat a min chhangloin a ngawi renga hrethiam awm pawhin a lang leh chuang siloa a awmdan chuan min ti hnuai rawih rawih a ni.





Ka ṭawngṭaia ani erawh a muhil zui mai a, kei erawh ka muhil ve thei mailo, ka inlet tawn seka zan a rei telh telha ka harh telh telh thung. A lamah tawlh hnaiin ka va kuah a, khawvar dawn hnaihah chuan ka muhil ve ta hram a.


***


Urlawk zanah Nsa te ṭhianho an lo kal a "Zanin chu kan hruaichhuak dawn ania" an ti mauh maia, an ṭhahnem si a ka la hmuh ngailoh te pawh an awm nawk mai.





"Khawiah nge in kal dawn?" ka nu in ngaihṭhalo fe a alo tih chuan "Racing naah kan kaldawna Vîtei pawh duhleh lo kal ve sela zanin chauh chu min lo telpui te teh, kan club in thil pek duh te pawh kan nei a" Johanan alo ti a, "Keiman ka phur dawn ania" Ruatan a lo ti bawk.





Ka hnial zeta, zan thim hnuaiah lehnghal ani hruai chu ngaihven reng angai dawna, an phawsawlh hlawm bawk si a tih chi niin ka hrelo.





"Kal rawh se mahse, fimkhur ula a dinhmun inhriat chian kha" ka pu chuan alo ti ve khauh a. Ka nu nen chuan kan in ena kan phallo hreh bawk si a kan phal chiah bawk silo. "Fimkhur ang che u Vîte kal ve nghe nghe teh" ka nu chuan a ti ta nge nge a.





Inchungah chhoin ka siam zui mawlh mawlh a, a Leather jacket ka hak tir a ka tih ang ang chuan thuawih deuhin alo awm a, kan chhuah hma chuan a hmel chu ka en vang vang a "Zanin chu ride ang aw" nuisak chunga ka tih chuan alo khi ve suka, ka fiamthu pawh a la hre ve a lawm, a biangah chuan ka fawp zauh a, ka chhukpui laichuan a ṭhiante chuan an lo en ṭhap a, "Lo kal rawh le" tiin Ruatan a lo pawt nghalthuai a.





Nsa nen kan inphur a Lalber chu kan hmaah Ruata nen an inphur thunga midang zawngin kan hnungah min zui thung.





"Vîte a tello chuan kan ṭhianho boruak hi a dik theilo, damṭha sela chuan zanin te hian a phur dawn tehlul nen" a ti a, a ṭhianho zingah ro ro pawh Nsa hi chuan a ngaizual bik a, a rawn kan zing hle bawk.





Kan kal tum na kan thlen chuan midang ho pawh an lo awm nawka, mei an lo chhem alh hluah a, khua a vawt bawk nen meilum chu kan ai ṭhap a, an ṭhianho chuan thla te an la a, keiin ka lo hmehsaka Lalbera pawn nuam a tih ve hmel riauin ka hria.





Engthil emaw present lianpui mai hi an pe a, lehkhamawia an tuam tlat avangin enge tih a hmuh theihloh a, Bike racing an neih laichuan meilum aiin kan lo ṭhu a, an zawh hnuah Ruata leh Nsa chuan min thlah leh a, in kan thlen chuan vawt ṭha tak a ni. An present pek chu ka en a Racing track suit ani a, ngaihhruihna thu ṭha tak an ziak tel nghe nghe bawk.





A hritlan ka hlauh vang chuan a thawmhnaw thlaksakin ka muttir thuaia, a hritlang vaih anih chuan na engmah a sawi leh awm silo a a buaithlak viau ang. A puansin chu ka thuahsak sauh sauh a, a bula ka va mut lai chuan khum aṭanga inbeng kang meuhin min thlek a, "Tinge, mu ta che" ti a nem mut leh mai ka tum chu ka kut a lo man a.





"Barbie" tiin min ko a!




"Umm..keimah... min hria maw?" ka mu tawh chu ka ṭhuchhuak leh rang kher mai.





"Hria e" chiang taka min enchungin a ti a, ka au chhuak chul chu pawnlam aṭangin Usangpuian min lo ko a. "Usangpui lo lut teh" ka lo ti leh chul a.





"A hria a nia, min hria, a mak lutuk" ka tih laichuan nuisangin min en a, "Ka theihnghilh dawn hleinem che" a lo ti zawisup a, midang ho pawh chu an lo lut sap sap a, kan hlim a ni.





Ka nu chuan a kuah vawng vawng a, ka pu in ṭawngṭaina neih a rawt a, Aruatin a pa malchung a lo chuh ve bawka, thla te kan la a, Usangpuian Video in a lo la bawka, kei leh ka nu chu kan ṭap pur thunga, "Thilmak a thleng a nih hi, a dam leh dawn aniang, Pathianin kan ṭawngṭaina a chhang anih hi" ka lo ti mawlh mawlh a mahse, a daih rei ta chuang lo.





Beiseina kan neihsan tehlul nen darkar 2 vel hnuah chuan "Tunge i nih?" tiin min zawt leh ta a, Doctor hnenah thil awmzia Usangpuian a zawh chuan "Beiseina tisang vak duh suh u, a hriatna thazam chevel hnathawh anih kha" tiin a lo chhanga, kan van hlim reilo tehlul em.





A tuk aṭang chuan mu leh mal kan nei ta meuhlo, khuma a mu chu meng reng chungin a tho lawklo a, tuk dangah chuan ka thawh hma hian a lo tho chhuak ziah ṭhina, tukin erawh thawh a tum hauhlo.





Ka pawmtho lui a, khumah chuan a ṭhu ngawi reng ringawt a, a che chang lo reng reng mai chu mak ka ti lek lek a, engkim chu tih tir chawp vek mai angai a, a awmdan chu ka hrethiamlo a ni.





Chaw kan eidawna, thil ei nachang tak ngial pawh a hrelo, eitur ka barh chu a ṭhiallo a alem heklo a, a ṭhu ngawih ngawih a ni ringawt mai. "Tukin chu enga tinge mawni le?" ka ti niah niah a, Christmas tuk anih vangin Clinic an khar veka a Doctor chu Usangpuian a ko ta ringawt a.





"A awmdan chu a ṭhalo hle mai, amahin engmah a tithei tawh dawnlo anih hmel, hetiang anih chuan Drip khai emaw pipe hmanga eitur pek mai angai dawn anih hi" a ti charh charh a, ka viai riai maiin ka hria, na leh chuang tur pawh ka awm tawhlo.






Nitinin ka sun ni tawh maiin ka hria, kum a thar a ani erawh a chuai telh telh a, a cherin a dawldanga, mut leh ṭhut tawp bak chu engmah a ti thei tawhlo. Ka ṭawngri takngial pawh a hre thei tawhlo a, a hma kha chuan ka biak hian min en vut ṭhina, tunah chuan amelh ngai a melh tlawk tlawk ringawt tawh a, keipawh ka chau ve takzet ta.






A birthday thlen hma ni chuan a khaih chiam a, ICU ah bawk kan lut leh a, January ni 28 a birthday chu tah chuan kan hmang liama, kar 2 zet ICU ah chuan a awm a, khawl hmangin a nung ve ṭawk ṭawk chauh tawh a ni.





Zirtawp zanah Mitei leh ka pa in Aruati an lo hruai a, apa damlai hmel hmuhtir ve hrim hrim turin an lo hruai hi alo ni a, ka nu leh pa bakah ka nau te pahnih an awm ve bawk a, Usangpuian Aruati a luhpui laichuan kil khatah ka nu awm nghengin ka ṭhu zawi renga, ka a riai maiin ka hria.





Inrinni zanah chuan "I chau emai va haw rih la naktuk lamah i awmpui leh zawk dawnnia" tiin ka duhlo chung chu min hruai haw luia, mahni chauha kan nupa Room lianpuia ka mu chu awmngaihna reng ka hrelo, ka thaw sa pup pup a thin a thip hlur bawk.





Khumah ṭhuin ka ṭap vawng vawng a, chutihlai chuan "Ânu" pawn lam aṭangin a lo ti a, Aruati a ni.





"I bulah ka mu duh a ti tlata" Mitein a lo tih chuan kawng kha ka hawnsak nghalthuai a, zanin chu ka khawhar zia a hrethiam ve em mawni dawn ni.





Tuitaka Aruati muhil hmel chu ka en vawng vawnga, a hmelah chuan Lalbera hmel chiang takin ka hmu thei a, ka lung a chhe zual sauh mai.





Khawvar lam hnaih tawh ah ka muhil chu ka harh riai riaia, "Barbie" tia min koh ri chu chianglo zetin ka hre riai riai bawk, ka mit ka meng siar siar a, Lalbera hmel chu chiang takin ka hmu a, kan intawn tirh lai ang maiin a chhipsam chu a buang thar a, damlo hmel a puloa a hmelṭha takzet, engtin nge tunah hetah a awm theih! Ani chu ICU ah a mu mek si a.





"Lo kal rawh le tunah, a hun tawh e" mawi taka min seih chungin a ti a, ka ring theilo.





Ka phone ri vang chuan ka harh chhuak hlawl a, tun maia ka thil hmuh kha ka mumang mai ani tih ka hre chawpchilh nghal bawk. Min phone tu chu Usangpuia a ni a, khua a la var bawk silo tun anga min phone anih chuan chhan dang pakhat chiah a awm thei ang.





Kut khur dar dar chungin Phone chu ka la kang a "Aw...Usangpui" ka tih rual chuan "Tunah khan a kal chiah e" a lo ti a, ka nghilhdup mai!





Ka khawhmuh a fiahlo ruaia ka mit sulh sulh mai!





"U vîte" tih leh kawngkhar rawn sawi dawt dawt riin a zui a, ṭap chhuak theiloin kei ka khur ngawt ngawt thung.





"Ânu" men ṭiau chunga Âruatin a lo tih chuan ka inthingharh nghalthuai a, "Bawihte damdawiinah kan kal angai" tiin ka pawt tho sawk sawka, kawngkhar ka hawn rualin ka pa hmel a lo lang ve zat bawk.






Damdawiin kan pan laichuan tumah reng kan ṭawnglo, min bia pawh nise ka chhang thei kher lo ang, ka khabe khur hlak hlak chu hup betin ri loin ka ṭap hliam hliam a ni ber, nichin mai khan chiang takin a hmel ka hmua, a aw ri te pawh ka hria a, tunah pawh ka bengah ala cham reng a, ka mitthla ah a hmel a fiah em em bawk.





Ka na lutuka, hei baka nat leh chuan dan hi awmtawh pawhin ka ringlo, ani kha ka hmangaih em a sin, amah EZRA, KA LALBERA kha.






Kan va thlen lai chuan an lo nawr chhuak mek a, ka hmuh rualin ka pan ruaka, ka kut pahniha a biangah dawmin ka ṭah hawm hawm a, chu chauh chu a tana ka tih theih chhun a ni ta.






Inlama kan let leh hnu pawhin a ruang chu ka thawhsan lo, a kut lumna neilo zet chu ka chelh tlata, he kut hi vawi tam ka lo vuan tawh, hlimna ka tawh ṭum te, lungngaihna ka tawh ṭum ten, zingah khua a lo var leh hunah chuan he kut hi ka vawn theih turin a awm tawh dawnlo tih ka hriat chian em vangin ka thlah phallo a ni.






A hmel chu ka en a ka en nawn leh ṭhin, a damlai hmel ang chiahin a la hmelṭha renga hmu leh tawh ngailo tura ka inchan chhin ringawt pawhin ka na ṭhina, vawi tamtak hetiang hun kan thlen hun tur hi ka lo ngaihtuah lawk tawh chung pawhin ngaihtuahna chauh chu atak nen chuan danglam tak a ni, tunah hian theih sela chuan ral riai riaia a kianga zal ve tluka chak chu ka neilo.






A bulah chuan muthlain a biang vawt thler mai chu ka chul riak riak a "Ezra, nang i awmloh chuan....." ka sawizawm theilo, a telloin engtin nge ka awm ang, a telloin he khawvelah hian enge tih tur ka neih tawh chuan le?






Thawk lehkhatah ka awm chu a insep dawrh dawrh a, ka khur hlawk hlawk a ka thaw hleithei der lo. "I awmdan a diklo tlat lo kal teh" ti a min lo pawt sawn tu chu tunge anih pawh ka hrelo a, choka lamah min luhpuia, bathroomah lut tlangin ṭap rawng rawngin chhuatah chuan ka ṭhu a, ka ṭah nasat lutuk na lamah ka luak lo chauha, ka lu a rit luk mai bawk.






Bathroom aṭanga ka chhuah leh chuan ka chhungte pawh an lo thleng ve tawh a, ka nu ka hmu chu ka lung a chhe thar leha, chutiang bawkin Lalbera ṭhiante ka hmuhpawn buaipui ngai khawp hialin ka ṭapa, ruang ka kil ve pawh an phal ta rihlo. Zari leh Margaretin kil khatah min ṭhutpuia, ka lu na ngut ngut vang chuan ka ṭap hleithei meuh tawhlo a ka chau chhe der mai.



*****


Ani chu kan thlah liam ta, lungdam lo mahsela, ani zawng kohkir theih anih tawhlo, tunah chuan chhum zinna piahah ngei mai khan amah a Lalbera nihna diktak nen a kal tawh ngei ang, a kalna a piangah midang te tihlimtu ani ṭhina, chutah pawh chuan an van hlimpui dawn em.





Natna a nei tawhlo anga, hlim leh hawisang takin a awm thei tawh anga chu chu a tan pawh anuam zawk ngei ang chu, ka kiangah zawng natna leh lungngaihna chauh a changa, Pa angchungah chuan hlim takin a awmdawn tih ka chiang a chu chu ka inhnem na ber a ni.






Ezra Malsawmhlua kan Lalbera kha, hetah kan kiangah awm ve tawhlo mahse, kan zavaia thinlungah erawh a cham reng tawh thung ang.



***


Thlasik a hnai veleh ta reng mai, tuk thar kan hmuh apiangin amah nena kan inhmuh theih hun ka hnaih zel ani tih ka hria a hlim ṭhin, hun chelh din chak em em ṭhin khan hun chu kalmuang ka ti a, zing khawvar hun chu nghakhlel takin ka thlir ṭhin, engtikah emaw chuan khi chhum zinna piah ah khian ka la kal ve anga, hlim tak leh danglamna awmloin kan inhmu leh ngei ang.





Min hruai turin ka chhungte an lo kala, ka pasal chhungten min uibet ve thunga, lungphun zawh hma chu keipawn haw ka tum biklo, Gabriela hotel ah hna ka ṭana, engthilah mah tha thona leh phurna ka nei ngailo, ka lungngaihna chu Aruati chauhin min hnem a ni, amah ah chuan ka hmangaih kha a awma, a mitah chiang takin ka hmu a a nui hmelah te pawh, ka tan chuan a hlu ve em asin.





Kum thar ah chuan lung kan phuna keipawh min rawn lam leh ta a, Usangpuian nupui a nei ve dawn bawka awm zel thei niin ka inhre ta lo.





Ka insiam mawlh mawlh laichuan "Ânu khawiah nge i kal dawn, i zin dawn a mi?" a lo ti sek sek a. "Dawnlo bawihte ka haw dawn a, ka awmloh hunah ṭha deuhin lehkha lo zir rawh aw, zanah Api phone ah ka lo be ziah ang che" ka ti chuan a men pur a.





"Khawiah nge i haw dawn" tih leh ṭah a rual ringawt mai. "Bawihte kan inah ka haw angai tawh alawm, ila naupanga ila hrethiam ve lo anih kha, i len hunah i la rawn hrethiam ve mai ang" a bianga mittui luang tuaihulsak pah chuan ka ti a.






"Ka lo kal ve dawn a lawm, ka kawr pawh keng ve la" ṭap hliam hliam chunga a tih leh chuan tihngaihna ka hre lo kher mai. "Nang chu hetah i awm angai a lawm" ka ti maia, ka kuta a vuan ṭung chu han thlem zui chiam ngaihna ka hrelo.






Min hruai turin ka pa alo thlenga, inhnuai lama kan chhuk hnu pawh chuan Aruati chuan min pawt bet ṭang ṭanga, a awmdan chuan hnuk a ti ulh ṭeuh mai, A pi nen kan thlem ngial hnu pawhin min zui chu a tum tlat maia, a pi thinin a tuar meuh tawhlo, "Thu i awihloh chuan ka vaw nek dawn che ania" a piin a tih chuan min pawm nghet zual sauh sauh a.






"Ânu bulah ka kal dawn Âpa in ka awmloh hunah pawh anu bulah kal zel rawh min ti a lawm" a ti ta reuh a. Ka nu nen chuan kan in ena sawitur reng kan hrelo.





"I pa in engtin maw a tih a?" Apuin a lo tih chuan "Anu kalna apiangah kal ve zel rawh min ti a" insut hlap hlap chungin a ti a, ka hnuk a ulh ṭeuh a ka ṭaplo theilo.





"I mumangah i pa i hmu a mi?" Mitein a lo tih chuan a lu a thinga, "Hmanah khan zanah apa in min pawma, chutah chuan a sawi a, ânu bulah ka awm dawn" a ti leh mauh maia, kan vai chuan kan lungchhia a ni.




"Ka nu, ani hi Ezra nena inzawmna kan neih chhun a ni, ka tan chuan thilpek hlu ber ania, min enkawl tir mai ta che, ṭha takin ka enkawl anga ka pasal lakah ka mawhphurhna chu kan fanu lakah hian ka lo hlen ange" tiin ṭah aw tak meuhin ka dil a ni.





Rei ngial kan sawi ho a, ka hruai ngawt chu an ngaingam chiah silo, chutih rualin ka enkawl ṭhat theih chu an ring vek tho a, amah Aruati lahin ka hruai ve loh a hlau em em bawk si.





"Haw leh ta pawh nila kan fanu i nihna a bo chuanglo a, Âruati nu pawh ila ni reng a lawm, nangtluka enkawl ṭha thei tu tur an awm chuanglo, chungkua kan ni a i hnenah awm chu a sual hran hleinem" tiin ka hruai chu an rem ti ta a ni.





Ka hlim a ni, ka beidawnna zawng zawng te kha beiseina in a rawn thlaka, tun aṭang chuan ka pasal hnen aṭanga thilpek hlu ber mai ka dawn ka fanu nen hmahun kan thlirdun tawh ang.





Engkim tan hun ruat a awm, chu chu a takin ka tawng a ni. Âruati lo piang ve te, ka pasal nena fa kan nei ve ta lo te, kan hnena a lo tlukluh dan te, engmah hi thil thleng palh reng a awmlo, hei hi kan tan khuanun rem min ruatsak zawk alo ni.





Ni e, ruah sur zawhah ni eng mawi tak a lo lang leh ṭhina, chhimbal zam tur pawhin ruah a sur angaia, keini pawh kan nunah ruah surin thlipui tleh ṭhin mahsela ni eng mawitak kan hmu leh ngei ang.





Hma lam hunah chuan enge thleng dawn ka hrelo, mahse, kha leh chen kan tana rem min ruat felsak ṭhintu khan engemaw tak chu ka hmalam hunah rem min ruatsak leh ngei ang, ka tana ṭha tur ang zelin.






"I lo hreve em Lalber nang i ṭhat chuan keini pawh kan ṭha tih hi"









(A tawp ta)