BOUND BY HONOR - 19

Episode kal lai dah luhna

Moderator: writers

Puii Sailo
Posts: 126
Joined: October 21st, 2020, 8:05 pm

BOUND BY HONOR - 19

Unread post by Puii Sailo » October 28th, 2020, 6:13 pm

CHAPTER – 19

Kawngka kik thawm chu haider chi rual a nilo. Luca chu khum atang chuan a tho nghal a. Briefs nen chauha a ding ka hmuh chuan ka ip nghal chawih mai. A lo nui suk….

“Mipa a nupui bula mu ta reng chu hetiang hian a taksaah danglamna a nei ve bawk dawn lawm ni?” tih pahin hnuailam a melh ralh a.

“An hmuh duh ang ngei chu an hmu ang,” tih pahin bathroom lam hawiin a bu nghat a. “Tunah bathrobe ha vat rawh.” Kum atang chuan ka zuang tho nghal a, bathroom-ah chuan tlan lutin ka mut kawr chungah chuan satin var, bathrobe chu ka ha nghal sawk sawk. Nizana ka corset a zai chhiat, chhuata ka dah tawp kha chharin bathroom chu ka chhuahsan nghal a. Luca chuan kawr a hak hmain a chemte leh silai paina, a vest hnuaia a hak kha a lo inthawlh tha ve mawlh mawlh a. A ban zaina pem hliah chiah chuan chemte sei deuh zawk a banah a hreng bet bawk. A hmel nelawm loh zet kha a pu leh tawh a, tuman an ringhlel hauh lovang.
Ka biang a sa leh hut hut tawh, ka corset ken lai chu ka mokawr a zai chhiat tak bulah chuan ka theh thla tawp a. Uluk taka dah thlap chi pawh a nilo. Luca taksa lian leh hrawlzet bakah a chemte leh silai paite chuan a ti lang pa takzet. A kekawr chhunga a ralthuam pai pakhat kha chu sawi lan kher pawh a ngai lo. Karei!….. ka thil ngaihtuah mai mai chu leh! Mahse ka ngaihtuah lo theilo, brief ha lo ta se, eng angin nge a lan ang le? Hrep tak hian!!! Kuangkuah at chungin tukverh biang nghengin ka ding a.
Luca nen nupa nun kan hmang lo tih hrechuak ta se eng thil nge thleng ang le? Pasal nei tawh vek an ni a, rinhlelh tur an hmu angem le? Kawngka a va hawn takah chuan keipawh ka inthlahdul lui ve deuh a. Luca chuan thawmhnaw a la ha chuang miah lo. Nu ho chuan Luca an hmuh chuan thenkhat an meng bial kawk a, thenkhat an nui deuh har har bawk.
Italian tawngin an phun deuh sap sap a, tawngtaina thu an chham anih loh chuan anchhia min lawhte pawh a ni mahna le. Ka dinna a hlat bakah an tawng rang lutuk, enge an sawi ka hre thei mai bik lo. Ka thawk chhuah hawk a ngai leh ta..
“Bedsheet la turin kan lo kal a,” Luca nuhrawn chuan a ti a,” a phurna chu a thup thei bik lo. Luca chu tawlh hnungin kawngkhar chu a hawng zau a. Nu ho phur lutuk chu an rawn innek lut tawlh tawlh a ni ber mai. Bedsheet a thisen kai chu an melh hmasa ber a, chutah chhuata mokawr leh corset zai thler, an mit tawpna chu keimah ka ni. Khuma thisen kai chu ka thisen nilo mah se ka hmai a sen tan tan tho.
Engvangin nge hengho hi ka thianghlim leh thianghlom loh finfiah tur chuan an lo phur ve em em le? Lainatna an nei ve miah lo emaw ni le? An thil lo tawn tawh ang chu ka tawn ve tak vangin an lawm zawk pawh a ni mahna.
Ka hmel atangin thil diklo a awm leh awm loh hriat tum niawm hrima min melh hlawm avang chuan ka hawi sawn ta daih a. An duh an hmuh hi, lungawi pui mai rawh se. Mikhual tam zawk chu an haw tawh a, politician ho leh mafia ni ve lote tan tih ve reng tur a awm tlat lo.
Bedsheet thisen kai entirnaah hian chhungte hnai vai ho chauh tel tura beisei an ni thin a, mahse corridor leh kan bedroom a lo kal khawm zozai en hi chuan, an veng nu ho zawng zawng an inhawr khawm emaw tih mai tur a lawm le.. Hetiang hunah hi chuan hmeichhe pasal nei tawhte chauh an tel thin. Nula thianghlim leh naupang zawkten an hmu ve anih chuan pasal neih an hlau thin a, an tel tir ve ngai lo. Chung nu ho zingah chuan ka nu leh ka nutei te ho bakah, Valentina leh Bibiana-te pawh ka hmu a, mahse a hma lama dingte chu Luca chhungte vek an ni.
Hei hi an tradiotion a ni a, kan tradition a ni ve lo. Tunah chuan i tradition a ni ve tawh tiin ka inhrilh mawlh mawlh a. Luca chuan kawngkhar bul atang chuan min lo en reng a. Kan pahnih hian thuruk thup tur kan nei ta.. Dawt leh inbumna thil reng reng haw lutuk mihring ni thin mah ila, ka pasal thil tih vang hian a chungah ka lawm takzet. Kan khawvelah hi chuan zahngaihna emaw khawngaihna emaw a awm ve lo a, a bikin Luca te ang mihring lak atang hi chuan beisei chi pawh a nilo.
Luca nuhrawn, Nina leh a cousin Cosima-te chuan bedsheet chu an hlip mawlh mawlh a. “Luca” Nina awah chuan lungawi zat lo a lang tel deuh. “I nupui hi virgin a ni a, tuman dim deuhin turin an hrilh lo che em ni?” Lo vin hrep mai chu chak viau mah ila hnuailam ka melh san daih thung. Mahse ka beisei phak loha thain Luca chuan a rawn chhang ta hlauh mai.
“Ka pa nupui i ni a, a fapate hnena midangte chunga zahngaihna lantir thin tura zirtirtu ka pa hi, i chungah rawng takin a che thin i tihna em ni?” Luca chhanna vang chuan a lawm hauh lo tih hai rual a nilo. Hmui a chip zui hmak a lawm. Boruak pik ru tak hnuaiah chuan mi mit ka chungah a fu thup tih ka hria. Hlau chung chung chuan ka chhungte chu ka melh tawk tawk a, mak deuh maiin lainat tih hriat zeta min lo entu ka hmu nual mai.
“Ka lo kal lawk!” Nu ho awm khawm rawn tawn tlang tur chuan Gianna chu a au lauh lauh a. Ka nu chuan khap a tum a, mahse a ngaithla duh chuang lo. Helai hmuna awm ve tur hi a nilo hrim hrim. Mahse engtik laiin nge thu a awih? A tih loh tawp tur hlir a lawm a tih thin le.
A hmaa nu pakhat cher ve tak chu namsawnin, bedroom-ah chuan a rawn lut a. Bedsheet a thisen kai, Luca nuhrawn leh Cosima-ten an lo zar pharh mek chu ten hmel zetin a melh nghal ram ram a. Chumi hnu chuan hmuh hmaih neih hlau tih hriat zetin min rawn melh a, ka hmui Luca fawhna avanga la chhah deuh tapte, ka sam hnawk niai leh ka ban, ka kuangkuah tlatte chu a en uluk kher mai. Min ngaihtuah tih ka hria a, midangte hriatthiam ve loh tur siin ka that thu hrilh theih dan kawng awm se ka ti takzet. Mahse nuho chu an la awm ve tlat bawk si. Luca lam chu a hawi leh a, vanneih thlak takin nuho lo luh tirha a taksa danglam pawh kha a lo zia tawh a. Gianna mitmeng chu mi tamtak tan chuan hlau hlawpa tlanchhiatna tur a ni.
Nuih suk pahin Luca chuan mithmul a lo san khum ak a. Gianna run tawk a tling tlat, Luca chu a pan hnai nghal a, “Gianna’” ka lo ti sap a. “Ka inthlak duh a, min lo pui ta che.”
Zan lama kan chetna vanga taksa rawl leh na deuh thum anga lan tum tak chungin bathroom ka pan a. Diktak chuan mo thar leh hmeichhe dangte pawh nise, an thianghlimna lak sak an nih hnu a an kal dan ka hre miah lo. Gianna a rawn luh ve hnuah chuan kawngka kharin min kuah nghal thlawp a. “ka haw lutuk, an vaiin ka hua,” a ti a.
“Ka chungah eng thilmah a ti lo,” ka lo ti vat. Gianna chu inla hrang deuhin min thlek haw a, bengchheng lo tura hrilh nan ka kut chu ka hmuiah ka chuktuah a. Hrethiamlo hmel a pu. “Enge i sawi awmzia? I sual let loh vang khan a pawngsual lo che tihna a ni hleinem.”
A sawi zawm leh hmain a ka ka hup sak a. “Ka la thianghlim, Gianna.” Ka kut ka laksawn hnuah chuan a tawlh hnung deuh dat a. “Mahse thisen kha..” a rawn ti leh sar sar a. “A in zai thi a lawm.” Awih loh hmel zetin min en reng ringawt.
“I rilru a buai zo ta em ni?” a tih chuan ka lo meng kual ralh a.
“Shhh… thudik a lawm ka sawi.”
“Anih chuan tinge show in neih kher?”
“A chhan chu, tuman an hre tur a nilo. Tumahin. Ka nu leh Lily pawhin. Tumah i hrilh theilo a nia, Gianna.” Gianna chu a thaw hawk.
“Mahse tinge hetiang thil hi a tih a?”
“Ka hre bik lo, min tihnat a hlau aniang.”
“Saw mihring sawn a tul anih chuan nausen piang hlim pawh a that hreh hauh loving.”
“I la hrechiang hlei nem.”
“Nangpawhin i hrechiang bik lo,” a lu thin pahin a ti a. “Amah saw i ring tih chu min hrilh tum miah suh. Nizanah a mutpui lo che pawh a ni maithei, mahse zan dangah a pawngsual dawn lo che tihna a ni hleinem. A penthouse-ah New York khawpui thlir pahin a pawngsual dawn che pawh a ni maithei a sin. A nupui i ni a, mipa pangngai pa thei tawh phawt chuan mutpui che an chak ngawih ngaih ang che.”
“Ka pa in hmeichhe nasa tak i ni, a tih thin pawh kha a lo awm viau e,” nui sang chungin ka ti a. Gianna thinrim hi ka bengdaih vat a ngai. Min chhang lovin min en ngawih ngawih ringawt.
“Gianna, Luca ka neih dawn khan nupa nun kan hman a ngai dawn tih ka hria a, ka in peih sa thlap bawk. Mahse ka thianghlimna min lak sak hmaa amah hriatchian theihna hun min pe hi ka lawm lutuk, “ka ti a. Mahse hriatchian chu ka duh tak tak em ka hre hauh lo thung. Ka hriatchian em em chu, min fawh khan hrehawm ka ti miah lo tih chauh hi a ni. Ka ngaihtuah let ringawt pawhin ka taksa hi a lum nghal ham ham thei nia! Luca hi mipa nalh tak a ni tih chu ka pha thei bik lo. A hmelthatna hian a nunrawnna a hliah bo zo ta tihna a nilo, mahse ka chungah a nunrawng ve tlat lo. Amah ring tura min nawr mektu hi khawi atanga lo piang nge ka hrethiam bik lo.
Gianna chu a thaw chhhuak ham ham a. “Ni e, i sawi dik maithei,” toilet chhinah chuan a thu nghal hnawk a. “Ka ngaihtuah lutuk che a, nizan pawh chhhin khat mah ka chhing lo. A pawngsual lo che anih chuan text tal pawhin min lo hrilh thei lo em ni?” atih chuan ka mut kawr chu ka phelh nghal mawlh mawlh a.
“Thei e, mahse ka pa emaw, Umberto emaw pawhin i phone an check hunah an hmuh vaih chuan ka chhe vek dawn asin.”

Shower tura kan pen luh hnu pawh chuan Gianna chuan min la en reng a. Luca min khawihna hnuhma a la zawng talh pawh a ni mahna.
“Engpawh nise, kan chhuah hunah Luca hua anga ka lan zui rih a ngai dawn a nia, anih loh chuan midangin min ringhlel mai ang,” ka ti a. “Lungngai suh, chulamah chuan harsatna a awm lo ang, ka la haw reng a lawm, nupuia a neih vang che hian ka ngei hrim hrim. Hepa hian khawngaihna a pianpui ka ring lo hrim hrim.”
“Ka hrilh che tih pawh Luca hian a hre tur a nilo.” Shower chu ka en a, tui sa ver vawr chuan nizan vanga ka chauhna hi tleng fai vek se ka ti. Nakinah living room-a ennawm an chhuah hunah harh vaka ka awm a ngai. Tui lumin min phuh tak sar sarah chuan ka taksa rawl deuh them thumte chu a dam sawng sawngin ka hria.
“I lo lut thei lo,” Gianna chuan thinrim zetin a lo ti vin hlar a. “A pasal i nih leh nih loh lam ka ngaihtuah lo,” ka men rual chuan kawngka a Luca lo lut lui lai mek chu ka hmu a.
Gianna lahin lo dan a tum ve bawk. “Kan inpeih vat a ngai. Chuan… he thil hi ka la hmuh ngai loh pawh a ni hleinem, tih pahin ka taksa ruak deuh kang chu awmze nei fein a rawn melh a. DAWT VEK….
“Chhuak tawh rawh. Anih loh chuan ka inphelh dawn a nia, avawikhatna atan mipa hmanrawn tha ber i hmu mai ang, nula.”
“Mi tenawmpa, ka……”
“Chhuak rawh, Gianna!” ka lo au nghal thawt.
Luca anchhia a lawh leh hlak hnuah Gianna chu a chhuak zui nghal a. Kawngka a khar zui bur hnuah chuan kan pahnih chauhin kan awm ta. Luca chuan enge a tih pawh ka hre lo, hre tur pawhin ka hawi let duh lo. Tui herh haw ri ka hre bawk silo, ka hriat chhun chu, shower hnuaiah hian ka ding nileng thei dawn lo tih zawng chu a ni mai. Shower chu off-in ka inher ve ta nge nge. Luca chuan shaving cream chu brush hmangin a biang velah a lo hnawih mek a, mahse darthlalang atang chuan min lo en reng.
Ka taksa chu khuhbo vat vat duh mah ila, tal buai chiam ka tum bik miah lo. Mahse ka taksa pum mai chu a sa hut hut ni maiin ka hria. A brush chu dahin, towel tih lum sa rack a mi chu la in min rawn pan hnai a, briefs chauh a la ha ta tho. Shower kawngkhar darthlalanga siam chu hawngin lawmthu sawi zui zauh pawhin towel chu ka lo ban nghal vat a. A che sawn duh miah lo. Ka taksa chu a melh kual dan dan a, towel a ka intuam hnuah chuan ka pen chhuak nghal.
“I taksa a puma ka neih hunah chuan hlauh vang nilovin nuam tih vangin khur la ka duh.”
Bathroom atang chuan towel chauh vengin a lo chhuak a, kei chu ka lo inha fel thlap tawh. Maxi dress, orange colour hain , kawnghren rangkachak rawng, ka kawngfek ti lang chiang deuh tur chu ka hreng bawk a. Darthlalang hmaah thuin make-up ka inhnawih mawlh mawlh a.
Luca thil tih mek ka hmuh chuan ka mascara hnawih lai pawh ka chawl tawp. Wardrobe atang chuan kekawr dum leh shirt var a la chhuak a, a towel ven lai chu phelhin saruak ngalngatin a ding anih chu! A zak miah lo. Ka hawisawn nghal. Min hnungchhawn zawnga ding anih vangin min rawn hmu ve lo hlauh. Darthlalang chu ka en ngam tawh lo, zahzelah ka kuttin chu ka en ta vel mai mai. Luca chuan a kawr kilh chunglam pahnihte chu a kilh ve lo.
A bana a chemte dah hliah tur chuan a kawr ban a pawt tawm daih. Silai pakhat a ngalah a hreng bet bawk. Inher pahin, “Silai telloin i chhuak ngai miah lo em ni?” ka ti a. Vawiin chu a awma a silai pai thin kha a pai lo, shirt chauh a ha sia, a langsar dawn lutuk. “Ka duh leh duh lo a ni mai. Silai kah leh chemte hman i thiam em?” a ti zui daih.
“Thiam lo, ka pa ngaihdan chuan hmeichhe tan thiam a ngai ve lo, kan insual ve ngai chuang lo a lawm.”
“Buainain a rawn pan hun che a awm thei. Bratva leh Triad-te hian hmeichhia leh mipa an en hrang ve lo a nia.”
“Anih chuan hmeichhia i that tawh tihna em ni?” A hmel chu a rum nghal ul mai.
“Chu chu ka sawi tum a nilo.” A sawifiah hun ka nghak a, mahse a sawi zawm duh miah lo. Ka hriat loh a tha zawk a ni mahna. Dingin ka dress hak chu ka zut mam a, a pa leh Salvatore Vitiello te hmachhawn tura kal chu ka chak lo takzet.
“I thlang thiam hle mai, i dress khan i mal leh chawn vel a khuhbo vek a,” Luca chuan a ti a. “Ka kawrfual hak hi an hlim chuan ka mal chu an hmu thei tho ang,” fiamthu a sawi ka ni, mahse Luca chu a nui duh miah lo.
“Khawih tum che an awm anih chuan, an kut ka tan nghal ang.” Engtinmah ka chhang lo. Min venhim a tumna avanga ka lawmna leh ka hlauhna a inzat reng. Kawngka a min nghah reng vang chuan thuawi deuhin ka zui ve mai bawk a.
Bathroom- a a thusawi kha ka bengah a la cham reng,’ hlauhna vang ni lovin, nuam tih vangin khur la ka duh.’
Ka bul hnaia a awm ringawt pawhin hlauhnain min man nghal zel a ni sia, nuam tih vanga khurh chu thil theih loh tawp a ni mai. A awmzia pawh ka hre lo hrim hrim. Gianna khan a sawi dik chiah, awlsam takin heap hi ka ring tur a nilo. Ka rilru hmin a tum vang mai mai pawh a ni thei.
Neitu intih hmel fein ka kawngah a kuah tlat a, inhnuai panna step kan thlen rual chuan titi nak nak thawm kan hre thei nghal a. Hall-ah chuan thenkhatin no an lo dawm leh der tawh. Ka ding chat a. “An vai hian bedsheet thisen kai en tura lo kal vek a mi an nih?” ka tawng ring lemlo. Luca chuan nui vur vur chungin min chhuk melh run a. “A tam zawk hi chu an ni ang, a bikin nu ho hi. Mipa thenkhat hi chu nizana kan chet dan kimchang hriat beisei, thenkhat business leh duhsak beiseia min rawn tlawn tumte an nih hi.”
A sawi zawh chuan inhnuai panin step-ah chuan kan chhuk a. Step tawpah Romero chuan min lo nghak a, a sam buang thar chu a thur bam mai. “I tha em?” nui sang chungin min lo zawt a. Ka beng chu a sen deuh tan tan. Luca a lo nui huk. Mipa ho chu tumah hmelhriat ka nei lo, mahse Luca chu mit an rawn siai khum loh leh an rawn nuih var var hlawm.
Zahna chuan ka hrawk a rawn hnawh leh tawh. Enge an ngaihtuah tih ka hria… Nizan lam thil thleng an ngaihtuah chiang a lawm. Luca chu ka hnaih zual sauh sauh a, nghet takin min lo kuah ve mai. “Matteo leh i chhungte dang pawh dining roomah an awm vek.”
“Bedsheet thisen kai chu an en mek em ni?”
“Bedsheet a la zai inthuah hriat tum ang maia chiangin mawle.” Romero chuan inthiamloh hmel deuhin min rawn en a. Min ringhlel lo anih hmel.
“Lo kal rawh le,” tih pahin Luca chuan kawngkhar lianpui lam pan chuan min kai phei a. Dining room kan luh rual chuan min lo en nghal thup a. Nuho chu kil khatah an lo ding khawm a, mipa ho chu dining table seipui chu kilin an thu kual thung. Dawhkanah chuan thei chi hrang hrang leh breakfast atana ei chi a lo inchhawp teuh bawk. Eitur ka hmuh chuan ka riltam zia ka hrechhuak chiah.
Nimin lamah khan chaw mumal ka ei tawh loh bakah breakfast pawh kan la ei lo a, tunah hian lunch ei hun a ni tep tawh. Matteo chu a espresso in chungin kan bulah a rawn ding a. “I la harh lo anih kha.” Luca chuan a lo ti a. Matteo chuan buk nghat pahin, “Espresso no sawm ka in tawh, mahse ka la harh thei chuang lo. Nizan ka in hnem lutuk a.”
“Rui chhe tak i ni. Ka unaupa chu nilo la, Aria i biak dan vang khan i lei ka tan sak ngei ngei ang che,” a tih chuan Matteo chuan min rawn then khum thaw ringawt.
“Ti tura ka hrilh ang khan Luca hi a chet loh hram ka beisei.” Chhan ngaihna pawh ka hrelo. Matteo hian min tihlauthawng tlat. Ka kawnga kuah rengtu Luca nen chuan an in en ta ran mai. Ka zam lutuk chu ka thisen a khang mai dawnin ka hria.



Link:
BBcode:
HTML:
Hide post links
Show post links

ADVERTISEMENT (A hnuai a milem hi a nia hmeh zeuh tur chu)