Tawnmang lova lasi-4

Episode kal lai dah luhna

Moderator: writers

Melz Hrahsel
Posts: 136
Joined: March 21st, 2020, 8:02 pm

Tawnmang lova lasi-4

Unread post by Melz Hrahsel » October 28th, 2020, 7:52 pm

Tawnmang lova lasi-4
By-
Melz(Msi Hrahsel)




Chapter-4


Weekend a ni a, tlai lam ah Mama te ho nen lui ah kal kan tum a, ka kal loh na chen pawh ka hre tawh lo. Vah chhuah pah in kal kan tum a ni, tun lai chu ka damdawi pawh ka ei tha a. Ka pumna pawh a chhuah loh hram ka beisei, bakah Mama a awm dawn bawk a, buaina tamzawk a thlen pawh ka kiang ah a awm zel dawn avangin ka mangan na tamzawk chu min thlamuan ngei ang.


Kei, U sawmtei, Mama leh U Zorina te nen kal kan tum a, U Zorina hi chu lui kan a chak na a rei tawh hrim hrim. Mama hi kapui ah a sawm ziah a, a hman remchan loh avangin a kal pui lo leh nge nge thin.Khaw pawn deuh ah hian lui lian zet mai a luang a, chu lui chu khawlum lai a kan chen fo na hmun a ni nghe nghe. Hmun dang atanga lo kal ho lah hian an lawm thei phian lehnghal a.


"Tikhan i in la kim tawh a mi a" U Sawmtei nen kan in a kan pen luh rual chuan ka ti a.


"Umm hei bak ken tur ka nei vak lo, shampoo leh towel a ni mai, sahbawn kha i keng dawn tih i sawi bawk sia" tih pah in a towel chu a bat thla mawlh mawlh a.


"Ka keng mai ang, mahse; khawnge Mama te hi an awm reng reng la. Min lo kalsan daih chuan an chak lo khawp ang" ti bai bai in loving room lam te ka phei a, tumah ka hmu chuang lo reng reng lehnghal a.


"Ehe. Ka phone ka theihnghilh daih, a full nasa tawh ngawt ang" U Sawmtei chuan a rawn ti a.


"Ka phone atangin i chhung te call mai rawh" ka tih chuan kawngka pui a pel fel hman der tawh.


Thaw halh in, ka phone ka phawrh a, Mama number ka hmet chhuak a. U Sawmtei an in a ka phei pui khan an la awm reng si a. Ka nu te pawh hi khawi ah nge an awm reng reng ni, an bo leh diak tawh.


Mama ka call hman tep tih a inchung lam atanga Violin ri ka hriat rual chuan ka thil tih tum lai ka ding chat, tu nge ni ang tih ka ngaihtuah chhuak nghal zat bawk. Violin hi ka tum thiam lem lo, a nalh ka tih em avangin tarmawi a tan tal ti in ka lei a ni. Mama'n a tum thiam lo a chutiang bawk in tumah kan chhung a mi te ho in an thiam lo.


Ka phone chu ak tha in inchung lam ah ka chho chat chat a, ka room kawngka bul ka thleng a, a ri a ring tial tial a, a nalh tulh tulh bawk. Thiam satliah a ni lo, a ri zawng zawng ngaihtuah phei chuan thiam tak a ni tih ka hre thei. Ni dang chu ni se, ka thu ni hauh lo a ka room a lo lut an awm vang in ka thinrim khawp ang, mahse; vawin chu a dang a ni violin tum thiam tak hi ka zawn na a rei lutuk tawh. Zir te pawh ka tum ve thin, ka hrisel loh em avangin ka chhung ten an remti lo mai pawh a.


Kawngka ka hawng a, U Zorina ngei ka hmu chiah mai chu ka meng nghal kawk kawk mai. Phawk fe in ka melh a, nuam lo tih hmel zet in ka violin tar chu a dahtha nghal sawk sawk a.


"Ummm...Lsa ka zawng a, a room ah a awm emaw ka tia, a lo awm si lo a. I room lam ka en leh a, hei hi ka hmu thin a" in sawifiah tum in a lo ti thuai thuai a.


"Violin kha i tum thiam hle mai" a mit a en ran in a lam pan in ka phei chat chat a, dawhkan a violin chu ka chul zui thuak bawk.


"Naupang te ka nih lai in ka zir ve a, ka la theihnghilh lo a nih hi. Ka pa hi music lam a tui ve a, thiam tur a min duh ang in ka zir ve thin. I room hi ka lo luh hmasak ber khan tiang em em hian ka lo chik vak lo a, lemziah pawh i thiam khawp mai" tih pah in bang a ka lemziah vel chu a thlir thuak thuak bawk.


"Nia ka tui na ve a nih hi. Mahni a awm chuan hobby kan ngah duh khawp mai" nui ve hak chuan ka ti a.


"Khawnge i U chu" a rawn ti leh a.


"Ka hrelo. U Sawmtei pawh a tlan haw leh daih a. Enteh" thawk ka la hak a "Violin hi mi i zirtir tawh em" in thlahrung angreng tak chuan ka ni a. Thiam ka chak lutuk ringawt, min zirtir thei tu an awm tih ka hriat nghat phei hi chuan, hmaih ka tum lo bur.


"Aaa...ka hrelo, tumah ka zirtir awm pawh ka hre lo" a bul a chair nghen chhan chu a hmer ran.


"Enteh. Violin hi ka thiam chak lutuk a, min zirtir thei a ngem. Hman atang tawh khan thiam ka chak tawh a, i duh a nih chuan thla bi pawh in min zirtir tawp mai rawh. Violin tum thiam hi ka nun a ka thil tih chak ber te zing a mi a nia" chil lem khalh in ka ti leh a. In nel em em pawh ni lo, hetiang a kan dil ve ta chat mai chu ka in thlahrung ve reng. Mahse, ka thiam chak em a, zah pawh ka dawn thei lo.


"I thiam lo maw, i thiam daih tawh ang chu ka tia" mak tih hmel zet in min melh a, ka towel leh chu ka ban ah ka bat ran bawk.


"Zirtir tu tur ka nei si lo a" ka lo ti va sap.


"Tunlai ah te chuan a harsat loh nen" a ti sup a. A ka room chu a hawi kual ve bawk. Ka drawer lo in hawng deuh ka hmu chiah mai chu ka meng nghal kawk, nilo. Ka drawer saw a hawn lo hram ka beisei, tumah in hmu lo se ka duh, ka damdawi ka dahkhawm na a ni a. Drawer khat tlat deuh thaw in damdawi ka rem bawk.


"Nia. Mahse, ka tan chuan a awlsam lo a niang. Diktak chuan violin hi i thiam ang tih ngaihna ka hre miah lo, diktak chuan rin zawn ngaihna pawh ka hrelo. Football leh Music chu thil in rem lo tak a ni" ka nui sak a, ka drawer lam ka pan a, ka nem khar nghal khap.


"Footballer hi musician an ni thei lo ang tih ziak a awm hleinem tiraw" a nui suk a.


"Ni chiah. Rin ai in kan in mil" ka tum hauh loh ka sawi chhuak leh ta phawng e. In thlahrun hmel deuh in ka hmui hnuai ka pet leh zauh.


"Haha. Kan in mil i ring vak na nge" thle buk in a han ti mai chuh. Ka sawi hma ka ngai vawng vawng, diktak chuan mil lo tak ka ni, a tir lam phei kha chuan ka haw hluah hluah. Mahse, kawm rei hi chuan sual zawk zawk chu a ni bik lo. Ka hrechiang lo te pawh a ni ve thei tho bawk.


"Chutiang lam pawh a ni lo" ka nghawng ka tuai zauh a "Violin ri hi chu a nalh a ni tiraw, engkim mai hi a chawih hliah hliah, ka sawi thiam dan ber chu tuipui kam a awm a" ka chawl dat a.


"Thlifim in min lo chhem heuh heuh ang mai" U Zorina'n a lo tih zawm sup. Kan ngaihtuah na inzawm lutuk leh in mil lutuk vang chuan kan in melh a, kan nui chhuak hak ringawt.


A aw a thian kharh a "i duh chuan ka zirtir dawn che nia" a tih rual chuan ka phur lutuk chu ka zuang zawk a, ka va kuah nghal chawt ringawt. A rum dut a, ka in la hrang nghal hmak, hrep tak a! Nel fahran a kan kuah ringawt chu a, ka U ang in en tur in min ti mah se ka pianpui a ni lo tih ka in hrilh nawn fo a tul dawn ni in a lang. Ka nel hi ka nel mah mah a, ka nel loh lah nel tum in ka bei ngai chuang lem hlei law.


"Inhnuai lam ah zu nghak i la" ka tih chuan a bu nghat a, inhnuai lam ah kan in zui thla ve nghal thuai a.


Inhnuai step kan pen chhuak chiah tih in Mama leh Ka nu a rawn lut a, U Sawmtei lam a lo la theng lo.


"Ls, khawi ah nge maw i lo kal hman le. Sawmtei nen kan zawng nasa lutuk che a nia" U Zorina chuan ka hnung atangin a rawn ti a.


"Ni chiah. Kan nghak rei lutuk che u, Mama, khi a tlai dawn a nia. U Sawmtei pawh chu khawnge maw a awm reng reng le, a rei tawh lutuk kan kal vat loh chuan haw lam ah kan tlai lutuk palh ang" bang a sana in tar chu ka melh zauh a, dar 4:00pm a der tawh tak tak.


"Sawmtei chu a lo kal ve thei lo ang. Keipawh" Mama chuan U Zorina dar a vawn pah chuan a ti sup a. A hmel hlim leh phur zawng zawng te kha a in thlak nghal vek thei, a ngaihna hrelo in kan pahnih chuan kan in melh ringawt.


"Thian a, eng thil dik lo nge thleng a" U Zorina chuan a ti a.


"Ni e Mam, eng nge thleng, kan sawi fel vek tawh sia" ka lo ti ve vat. Kal ka chak takzet, engtik ah nge ka kal leh dawn tih ka hre miau lo. Chuvangin ka hun neih chhun hi chan ka hlau takzet.


"Sawmtei mawle" a hmui tuai in thawk a la hak a "A nu a tlu sual a, a tar tawh bawk si nen. A na angreng lutuk a, nichin la la khan hmunpui lam ah pan pui nghal a" a tih rual chuan ka sa chhuak pap thei nia mawle.


"Maw. Tinge min hrilh miah loh a, U Sawmtei chu a tha em, eng nge a an a, a mangang ngawt ang. Ka van khawngaih tak, an harsat ve tehreng nen, Nu nang tal te chuan min hrilh tur che a nia. In va ti awm lo tak" chil ka lem leh khalh a.


"Khai aw, va kal ve pawh a va tha ve a, Bawihte kan kal lo mai dawn a mi" U Zorina chuan a ti sup a, pawm tih hriat zet in ka lu a bu ve nghat.


"Ni lo e. Zorin, bawihte i hi nang tal in va chhuah pui rawh, zanin ah muangmar in Sawmtei te in ah chuan kan kal dawn nia. Kei chu Sawmtei thlamuan tur in ka lo va kal ang" Mama chuan a ti ta daih.


"A fair lo, ka kal ve duh alawm" ka lo ti ve vat a.


"Mate I'U Mama thu kha awih phawt mai teh" ka nu in a lo ti ve bawk, ka nu pawh hi eng thil nge maw a hriat chu le. U Sawmtei hi ka unau nu ang chiah a ka en a ni a, hetia Mama thu zawk awih tur a min ti hi ka awih thei lo, engtiang pawh a kal tur a min fuh tur zawk ni in ka hria.


"Buddy, Sawmtei chu kal tir a fin thlak zawk lo maw" U Zorina'n min tan zawng a thu a rawn sawi ve ta chu ka hlim angreng phian mai, amah ka en a ka nuih sak. Eng thil pawh tih dawn a chhungte phalna lak zel ngai a ka awm thin hi a chang chuan hne chang ka ngah thin. 'Kei ai in ka chhungte hian tha an hre zawk' tih thu ah ka in hnem thei hram a ni.


Mama chuan min rawn melh hruk a, U Zorina chu a kai hrang a, living room hnaih lam ah phei dun in an pahnih chuan an in hrilh ru sar sar a, a chang in ka lam an rawn hawi leh zawk thin. Mama chuan eng eng emaw a hrilh leh neuh neuh a, an thusawi ka hre pha lo, chiang tak in ka chanchin an sawi tih erawh ka hria.


"Chuan" nui sang in an lo phei chu ka melh a.


"Lui ah kan kal dawn. Chuan I U tel lo in, i U fel zawk in ka kalpui dawn che a nih chu i lawm em" U Zorina chuan nui sang in a rawn ti sup a Mama pawh chuan a pawm hmel fu tih a hmel ah a lang.


"Teuh lo, U Sawmtei te in ah ka kal ve dawn" ka din na sawh nghet sauh sauh chuan ka ti ve leh nghat a.


"A ngai lo, tih tur i nei lo" Mama chuan a ti tlat thung, Lui kal phal a, U Sawmtei te in a kal a phal lo hi ka awih thei lo zawk, Lui ai in a awmna a hnai fe zawk lehnghal.


"A ngai. U Sawmtei pawh hnem ve ka duh alawm" ka chhang leh a.


"Lui i kal chak thu i sawi a ni lawm ni" U Zorina chuan a lo ti hmak mai. Nichin kha chuan full support min pek tehreng nen, tun ah chuan a rilru zahve pawn min support tawh lo, Mama khan eng thu tak hrilh ang maw.


"Mahse, U Sawmtei ten buaina an tawh lai in ka awm mai mai thei bik lo" ti in mei kawh in ka tang ve bawk.


"Tlai ah chaw an lo ei dawn alawm, I U Sawmtei chu i hmu em em ang, mahse; tun ah chuan kal hrilh suh, a buai bawk nen a rilru i ti buai mai mai ang" ka nu in choka atangin a rawn ti vat.


"An chhung in maw" ka lo ti vat.


"Ni e, in kal dawn chuan kal vat u la. I kal dawn loh chuan han in dah fel ve la" ka nu bawk chuan a lo ti vat a. Ka kal chak na pawh a reh vek tawh.


"Kal dawn e.Nute, kan lo haw tlai lo ang" tih pah in engmah ka hai hma hauh in U Zorina chuan ka dar ah a rawn vuan a, min kuai her mawih a, ka ban ah kai in pawn lam min pan pui nghal dawt dawt.


A bike awmna lamah kan in zui phei a, a helmet pawh a khum chuang lo, a bike a ti nung a, ka chuan na tur in a bike hnung sang dah mai chu a dah rem ha. Ka chuang mai dawn emaw a tih lai a, ka chuang ta lawk lo chu mak ka ti a niang chu a rawn hawi let ha nghe nghe.


"Chuang la" nui suk hian a ti a. A dar ah a towel a bat ran.


"Mama khan eng nge a hrilh che" tum deuh hmak chuan ka ti a. Ka lak ah thuzep an nei tih ka hriat hian ka thin a ti rim tlat thin.


"Thu pawimawh a sawi lo, ka hriat tur eng emaw mai mai mawle. A ho lutuk, chuang vat rawh le" nui suk in a ti a, ngawireng in a bike hnug ah chuan ka chuang ve leh ta nge nge a.


Lui kan thlen meuh chuan ni pawh a sang tawh lo kher mai. Rin ai tak in mi an lo awm lo, naupang thenkhat leh chhungkaw chaw ei khawm an awm neuh neuh tih mai loh chu, tui luang ri karh karh leh thli thaw heuh heuh te chuan hah an ti dam sawng sawng, Lui tui erawh chhun lam nisa in a chhun na a la lum deuh pup nghe nghe.


Tui dai lai deuh tur zawng in lui kiang a lung pher nuam zet in dawh thla zui ah chuan kan in zui thla hnak hnak a. Bucket lian vak lo in ka shampoo leh sahbawn vel ka khai khawm raih bawk.


Lui chhak lam a mi an tam loh tehreng nen a, lui thlang lam ah chuan tlangval leh nula ho an lo awm nual mai. Keini ang tho a tui daih na lai chuh an nih ve tho ka ring, hmun hul remchang lai ah kan thil ken kan dah a, towel ka ken chhuah hmaih tih ka hrechhuak chiah, van pawi tak, kan choka chair ah khan ka bang tak e....


"Hey, Sawmte i lo chhuak ve mial a ni maw, engtin nge i lo kal ve theih zawk a" Zuali chuan nui deuh hak in a lo ti a, a thian mipa ho in an hual khup bawk.


"Aw nih hi" nui lui ve sak in ka ti a, U Zorina chu a piah sir ah a ding a, midang a lo be mek.


"I lo chhuak thei chu a mak khawp mai. I U in a rawn pawm thleng che a mi" a awki atang chuan min hmusit deuh tih ka hre nghal vek. Kohhran leh khawtlang a a chang chang a ka inhman bak chu ka tlang chhuak teh chiam lo. Chhuak thei ka ni hek lo.


"Sawmtei te chu naute a lawm a nih hi, a bialpa nen an len na ah pawh a chhung te a hruai zel ang chu mawle" Zuali chuan a rawn ti leh nghat. Ka hmui ka pet zauh a, min tih dan chu ka duh lo takzet, chhang ni i la buaina a punlun phah mai mai dawn tih ka hria. A chang hi chuan a harsa thei takzet. Zuali hian a hma daih atang tawh khan min ngeih tawh lo, a chhan pawh thil ho te, a star in min ngaihzawn vang vak.


Hmeichhe lei kal zet mai a ni a, kei ni ang rual chuan ngei lo an awm lo ang. Mahse, tumah in an ti let ngam ngai lo, an khawsak theih chu thu hran, mipa tih dan a thiam a, an zui hul hul reng chu sawi loh zing chhun zan zawm a an in a awm deuh chawt an tam phian bawk nen. Mi nen a an in tih thiam loh chang lah hian a thian mipa ho hi hma theh ber ah a la nei zui thin lehnghal a.


Kalsan mai ka tum lai a "Naute, lo thu ve la. Lal innocent" ngeiawm zet a a rawn ti leh chiah chu ka thin in a diar tawh hlawl lo.


"Engtin maw mi koh a, khatiang khan min tawng khum theih na dan i nei miah lo, midang dawngkhum theih na dan pawh i nei chuang lo. Thian ka ngah lo emaw, ka chhuak tam lo pawh a ni thei. Mahse, tha a in ngai mi pakhat ai chuan ka tha fe zawk, a chhan chu mi zawng zawng chung a leng ni a in hriat lai in, sazu takngial pawh a tluk lo" kut kuangkuah ran in ka ti let ve ta sak.


Thinrim zet in a rawn ding chhuak a, rum zet in ka hma ah a rawn ding khar.


"I sawi zo tawh em" sehchilh nawk in a ti chhuak thak.


"Sawi zo tawh e. Sawi ve tur i nei a mi" amah pan hnaih pah chuan ka ti let ve sak a.


"Nei lo, mahse; hei hi ka nei" tih pah in ka sam ah min rawn kek nghal hrawk a, a sam ah ka kei let zui ve nghal zat. A keh nat pauh leh ka kek na a ni mai, kei ai in na tawrh chu a chhel bik lo khawp ang.


"Bawihte thlah rawh" U Zorina a rawn tlan phei vat a, min thlah hma chuan thlah ka tum bik hauh lo, ka dawh na hi a rei thawkhat tawh. Vawikhat min tih na pawh a ni tawh lo, in theih theih nan teh hian a hmang e maw tih mai tur in, mi tam lai tak te hian chaldelh fe fe a mi tih a ngah.


Engtin tin emaw ka sam a tham na chu U Zorina chuan a phelh a, ka kut in Zuali awm ah ka nem awk a, lui thuk lo lai lungpher ah a tlu phei a, a huh nghal vek. U Zorina chuan min pawm sawn nghal hmak lehnghal, a rawn hawi chhuak leh chiah chu a meng rum kher mai. A khum a chu a tluk na lamah a pilh tih ka hmu thei.


"Ka khup i ti na a, i hre khawp ang" in ti no fahran in a in hnit faih faih. A tah a chhuah pawh ka ring hrep lo a, a mipa ho bul a a in lak khawngaih thlak vel na bak va ni suh.


"I tawngkam nal ah i tawlh tlu palh a nih kha" ring leng lawng a ka tih tak ah chuan kan hnaih a tlangval ho chu an nui hak.


"Eng thil nge thleng a" U Zorina chuan a lo ti vat. Kan buaina a hre lo khawp ang le, midang a biak lai tak kha a nia.


"A tawngkam a thlahdah em a nih kha" ka lo ti ve bawk. Ka ban ah a la vuan ran.


"Engtin nge a tih che a" a ti vut a, ka dar ah a kut a nghat a, uluk fe in min en nghal chat.


"Mawi lo deuh in mawle" ti in ka chhang leh ringawt.


"Amah saw ka khawih sak che i duh em. Nge ni a, a tlangval min lo pan hnai tu te zawk hi" ti chung in min rawn pan hnai mek tu mipa pathum chu a melh ran a.


"I ti tak tak maw" ka lo ti sap.


"Tehreng mai, ka nau hi tuman an tih che ka phal lo" ti chung in tlangval ho chu a pan phei a.


Tlangval pakhat chuan U Zorina awm ah chuan a nam dat a, midang chuan khawih an tum ta mai, U Zorina a lo in dang a, pakhat chu a pum ah a hnek pawp a, chutih rual in midang pawh chu an hmai leh an awm ah te a hnek ve nghal sawk sawk, pathum mah ni se an hneh lo kher mai. Amah a ka hriat loh ka hriat belh leh tak chu insual a thiam hle tih hi a ni.


Tlangval ho leh Zuali te an kalsawn tak ah chuan ka lamah a rawn phei a.


"I tha em" ka lo ti vat.


"Aw tha e, a tlai tawh e, inbual khawmuang tawh lo mai ang, in chiah dai ringawt i la tiraw, inbual pangai chuan kan hman tawh lo ang" ti chung in a t-shirt chu a phelh a, kelawr bul leh tawnzau nen lui lam a pan ding nghal chat. Keipawh chuan hnial lem lo in ka zui lut ve nghal a.


Lui dai tak in ka taksa a han tawk chiah mai chu hah a dam sawng sawng mai. Phai a awm mah ni i la tui chen ka thiam loh avangin a thuk lam la kal ngam lo, ka awm a thlen hi chuan duhtawk tak ka ni. U Zorina erawh a hleuh kual pap pap a, tlangval dang ho te nen an in be kual a, an nui leh hak thin, kan awm na hmun ah hmeichhia an awm loh avangin keimah chauh in ka thu thung.


Khua a tlai tawh bawk nen haw tum in ka tho chhuak a, vaukam lam ka pan phei a, kan thil dah na hmun ah U Zorina chu hmanhmawh zet in a rawn tlan phei a, ka hma ah a rawn ding nghal run.


"Eng nge maw i hriat le, kalsawn teh" ka lo ti hluk. Lui atanga hmanhmawh lutuk a lo phei a ka hma a din ai a tha hi ngaihtuah chuah a nei lo a maw ni.


"Teuh lo mai. Khawnge i towel" a ti sup, a sam a huh hlap a, a sam huh chu min rawn chhuk en zawng in ka hmai ah a far leh fap fap thin.


"Towel ka keng hleinem, ka theihnghilh daih a" ti pah in ka bucket te chu ka ban zauh a.


"Kun tawh suh" ti sup in ka ban ah a chelh ran.


"Eng nge maw i hriat le" ka awki chuh. Ka duh ai in a vin hret. Min pui reng tu a ni a, awki dam tak a biak chu a phu ve reng.


Min chhang lo, ngawi ngul in a towel a la kang a, ka dar ah min bah tir in ka hmalam chu a tuam leh a, ka ban ah min chelh in min kalpui mai a tum a, ka din na hmun a ka din tlat tak ah chuan a rawn hawi let leh a


"Eng nge i la nghah. Haw ang" a ti sup.


"Towel ka mamawh hleinem, huh in ka haw thei" a towel min bah tir chu laksawn ka tum a, ka kut ah min rawn man a, ka chawl nghal dat, a ai a uluk zawk in min bah that tir a.


"Bat rawh. I kawr kha a pan lutuk, i kawrhnuai rawng a lang tlang vek thei. Heng tlangval tamtak zing ah hian an mit fuk na ber leh ngaih melh ber ni tur in ka pha lo che" thutak run a a tih tak ah chuan ngawireng chuan ka zui ve ta hnak hnak a.


"Uhh...ka lawm e, vawin thil thleng kha, ka chhungte i hrilh lo ang chu tiraw" kal pah in ka melh zauh a, a sam a tuai chho thuak a, ka hma ah ding chat in thawk a la hak a.


A kawr huh a taksa rem thlap a bet chu ka melh zauh a, a taksa pian dik zet mai chu a pho lang chiang kher mai, a sam atangin tui a rawn far fap fap a, a biang ah te luangthla ngiai ngiai a, a hmui huh deuh hlap chu a pet zauh bawk.


"Unau inkar ah lawmthu an sawi ngai lo" Zorina chuan a ti sup a.


"Unau. I nau ah min ngai tak tak a mi a" nui hak chuam ka ti a.


"Ni mai dawn lo a mi, kan chhungkua ah a naupang ber ka nia; nau neih hi eng ang nge a nih ka hre lo hrim hrim, nang venhim che hi ka kut a ni tih ka hre bawk" ka sam huh deuh chap chu a tuai thuak a.


"Chu ti maw" a mit ah ka melh ran.


"Dawn lawm ni ka naute. Engtik lai pawn i kiang ah venghim tur che in ka awm reng dawn alawm, chu chu ka thutiam a ni" tih thu a sawi rual chiah chuan ka mitthla ah eng emaw hi a rawn lang nghal chuai chuai. Aw ni e, ka nun hlui, tun thleng pawh a ka theihnghilh theih loh a ni.


"Thutiam" ka nui chhuak hak a. Mak ti fe in a ni erawh chuan min melh thung. A thutak lai a ka lo nui chu mak a ti ni ve ngei tur a ni.


"Eng thil nuihzatthlak nge ni a" ka towel bah lai chu a pawt rual leh zauh a.


***Flashback***


Higher kan kal lai a ni a, kei chuan ngaihzawng hmasa ve ber ka nei a, mi ang in khaw hmun ah kan awm hek lo. A ni chu kei ai a Upa daih a ni a, nupui then thawh a ni nghe nghe, a tir kha chuan nupui then tawh a ni tih ka hre miah lo. Tleirawl at lai a ni a, thian ten ngaihzawng an nei sup sup a, keini pawh chuan ngaihzawng neih chu rual pawl loh na ah kan ngai chho tan a, kei ngei pawh ka ni tho.


Kan in zui chho a, khatih hunlai ka chuan ka nu leh pa in hna an nei ve ve a, keimah in in te ka nghak mai thin. Kan in hmuh duh chang phei chuan in siam sa vek in in ka chhuahsan a, ka chhungte an kal liam hun ah in ah hlaw leh in nileng in hun te kan hmang dun thin.


Chutiang chuan kum khat vel kan in zui ve. Mahse, ni khat chu kan in ah a rawn leng a, living room ah kan pahnih in Movie kan en dun a, drink a rawn keng a, can chu la kang in min hawn sak a. Nui sang in min pe zui nghal a.


Ka chips ei na ka kut a balh deuh avangin ka kut sil tur in tui herh haw awm na lam ka pan phei a, ka kut ka sil a, ka let leh a, thu in can chu ka in a, a ban ngheng in ka kuah ran. Can chanve vel ka in ta maw tih ah chuan ka lu a rawn hai chem chem a, ka tha a zawi a, engmah ka hre zui ta lo. Ka rilru chu a fim mahse, ka taksa ka thunun thei lo, dah ang ang in a awm tlat tawh.


"Eng nge tih i tum a" meng tawk tawk peih chauh chuan ka ti chhuak a, min chhang a, a mimeng a inthlak nghal vek! A hmui a liak thuak a, ka taksa zawi zet chu pawm kang lawp in ka room lam min pan pui a, ka tih theih awm chhun chu ka taksa a sawngbawl lai en chauh chu a ni.


"Hetiang in ti suh" ka khum a min nghah rual chuan ka ti chhuak a.


"Ka it zia che hi i hre lo a mi" aw khur leh chakna chhuak tih hriat tak in a ti sup. Ka hmangaih ve ber in hetiang a min ti hi na ka ti a, ka biang ah mittui a luang zawk zawk.


Ka thawmhnaw hak lai chu dim lo zet in a pawt hlim nghal pawrh pawrh a. A mipat na ka taksa a a luh lai te chuan mittui tla zawih zawih in khawngaihna ka dil a, mahse, ramhuai leh tenawm na a khat mihring chu lungtum biak ang mai in a thil tih lai a chawl hauh lo.


A haw a, ka harh chhuah leh hnu pawh chuan keimah in room ah ka in khung nghal chawt a. Karkhat chhung vel chu ka mu mumal lo a, chaw ka ei mumal hek lo. Ka hmangaih leh a lo in ngah ruk na ve em em in hetiang a ka chung a a ti hi ka awih thei lo a, ka ring thiam hek lo. Khami ni atang khan a reh zui ta hmak lehnghal.


Ka chung a thil thleng chu ka zah em avangin ka chhungte pawh ka hrilh ngam lo, police a report a man tir chu ka chak zek zek, nimahse, ka chhungte ka mitthla ah an lo lang a, kan in ah mipa an hriat loh lai in ka hruai lut tih sawi i la engtiang in nge min ngaih ang. Khawtlang ah eng ang in nge ka than ang tih ka vengthawng ve bawk,


Khawpui chu khawpui a ni nge nge a, thenawm takngial pawh an in hriat chian loh na hmun a ni. Mahse, helai hmun ah chuan mi cheng an tlem vang in mi kan in hrechiang a, chanchin pawh a thang chak a, hmingchhiat pawh a awl bik. Ka nu leh pa khawtlang leh kohhran ah mi hmingtha pawl an ni a, keimah vang a mi in fa enkawl tha lo ti ang a an puh ka duh loh. Chuvangin ka ngawi ta zawk a, Khami ni atang khan mipa tumah hi ka ring leh tawh ngai ta lo.


***End of Flashback***


"Eng nge maw i ngaihtuah le" U Zorin an a rawn tih tak ah chuan ka ngaihtuahna tangin ka harh chhuak nghal nalh, ka thaw chhuak hak a. Ka mittui chu ka hriat loh in a lo luang reng tih ka hre chiah, U Zorina hmuh loh in ka in hru zauh a. Engmah thleng awm lo ang mai in kan in zui leh ta zawk a.


Zanriah kan ei a, U Sawmtei leh a Nau in kan bul ah a rawn ei ve a, U Sawmtei hmel kha ka en reng ka lainat takzet, chaw pawh a ei tha hleithei lo. A rilru a bet hlawl lo tih a hmel ah khan ka hre tlang vek thei.


Zanriah kan ei kham a, U Zorina pawh in kan bul ah zanriah a rawn la ei reng a, diktak chuan hetiang a chaw han ei khawm te hi a nuam ve hrim hrim. Chaw ei te pawh a tui duh phian alawm.


Puitling ho in TV en in chanchin thar an nghal thap a, thingpui hang an dawm var bawk.


"Tirawh Pui pui ka room ah min lo zui la thil tha deuh pek tur che ka nei a nia" ti in U Sawmtei te naupang ber Puipui a kim 7 mi chu ka kai a, inchung lam ah kan in zui chho hnak hnak bawk.


"U Sawmte i room hi a nuam e. A lian ropui si, mahse; kei chu ni i la Captian America lem ka tar hrim hrim ang" ti chung in bang a ka painting tar vel chu a en kual dan dan a.


A hma ah chuan ka thingthi hniam a"Lehkha tha deuh in zir a, in lian deuh nei in room lian deuh i nei a nga, i nalh tih ang ber in i chei dawn alawm tiraw" a lu ah chuan ka tuai zauh a.


"Au Sawmte, mahse; nangpawh lehkha i la zir sia, i van hausa bik em em" tih chuan ka nui chhuak hak.


"Heng zawng zawng hi ka ta a ni vek hleinem. Ka nu leh pa te ta ka țawm mai alawm. Keipawh nakin ah hna te ka zawng ve dawn alawm, Api Nuni le Pa Te-a te hi nangmah ang chiah in naupang an ni ve thin alawm, lehkha tha deuh in an zir a. In lian deuh deuh an sa a nih hi" a kut a chelh ran chuan ka ti a.


He nau hi chu ka ngaina ve thlawt, naupang dang ang lo tak in a zawiawi in a zaidam em em mai bawk si. Engpawh hrilh i la tha tak hian a ngaithla set set zel, kan nuam tih zawng a in an avangin a mimal tak pawn naupang dang ai in ka ngaihsak bik hrim hrim.


"Lehkha thiam chu hausak na maw" ngaihtuah thui hmel zet in a ni a.


"Ni mai lo e. Lehkha thiam na pawh hi tumruh na leh Pathian tel lo chuan engmah a ni lo. Chhel tak a beih tang tang te hi a pawimawh a. A upa thu te awih tur a nia. I lo len deuh hun ah i hrethiam mai ang" ka tih chuan a bu nghat nghat a.


"Ka hrethiam tawh. Pawisa tamtawk ka neih hun ah chuan kawr nalh tawk tawk ka lei thin ang che. Min duat a thil min lei ziah sia" nui sang in a ti leh a.


"Tha dawn lutuk. Mahse, chumi hma in hrisel tak a awm phawt tur aw. High five" ka kut ka lek kang a, ka kut phah ah a rawn beng nghal thak a.


Dawhkan a a box tur hman ni a ka lei sak ka dah chu ka la a. Ka pek rual in lawmthu a sawi a, hlim zet in inhnuai lam ah a tlan tla nghal rawk rawk.


A chang hi chuan naupang nih leh mai te hi ka chak thin. Buaina te chu an mitkhap kar lek ang chauh a ni, lungkham nei miah lo a nun hman leh kha ka chak a ni, ka nat na ka neih hma a, thian te ho nen a kan chhuah ho lai te kha ka ngai a ni. Tunah chuan ka in ven reng a ngai ta si a.


"Pa Te hei en la U Sawmtei min pek hi" in ti thei fe in Puipuia chuan a ti a, midang ho pawh chuan nui sang in an lo lawm thiam em em mai lehnghal a, an fak liam liam a, nuam a ti em em lehnghal a.


"Au Sawmtei hi chuan a duat che mawle" Kapa chuan a lo ti vat a. A malchhung ah a pawm a, a box chu a en sak a, an ti ti dun nasa mai.


"U Sawmte Nu Partei chu engtin chiah che a awm a" a bul a thut pah in ka ti ve a.


"Bathroom ah a tawlh tlu a, a lu a sawh deuh a ni awm e. Nichin khan Kapa chuan min rawn call a, Aizawl an thlen rual rual in Greenwood ah an lut nghal a ni awm e, C.T scan pawh an ti nghal ang" dawhkan ah a no dah pah chuan a ti a.


"A that hlauh chu. Amah a harh chiang tawh em, Greenwood a thawk doctor hmelhriat ka nei alawm. Engmah buaina an nei lo ang, nangpawh hlauthawng suh. A tha leh vat mai ang" Ka pa chuan a lo hnem ve bawk a.


"A hrim hrim in engtin nge a tluk dan ber ni a" U Zorina chuan a ti a.


"Inbual tur a a kal kha bathroom nal ah a tlu a ni awm e, ka phone la tur a ka phei khan ka hmu a. Chuvang a nih kha ka lo kal loh, min lo nghah ve nasat tehreng nen" min rawn melh zauh a. A in thlahrun hmel ngawih ngawih.


"Pawi ti suh, ka hrethiam alawm, remchang dang ah kan kal dawn nia. Khawvel a la tawp mai bik nang" nui sak in ka kuah nghal thuai a.


"Pate. Ka haw phawt mai ang, zanriah ei kham chiah mah i la, kan chanchin ngaihven inleng neuh neuh lo kal an awm ve reng sia. In khar reng chu a fuh lo ang" U Sawmtei chu a ding a.


"U Kei chu ka la leng duh. Pate a te in hi nuam ka ti" Puipuia chuan a lo ti ve vat thung.


"Nia U Sawmte a ni hi chu lo awm se la. Kan lo thlah leh mai ang, tunlai chu a lo leng khat angreng sia" ka lo tuihnih ve bawk.


"Lehkha zir tur a nei a. Naktuk ah an test dawn a, nizan ah zir tur in ka ti mawlh mawlh a, a zir tla peih lo vel a. Zanin ah chuan i zir ngei ngei a ngai" Puipuia en chuan a lo ti ve bawk.


"Naa Au. Ka peih lo e" Puipui a chu a tum bur mai.


"Eng nge ka sawi kha. Naupang fel chuan lehkha zir that tur aw, chuti lo chu i fail daih mai ang" ka lo ti vat.


"Vat in, lo kal rawh" U Sawmtei chuan a ti a. Puipuia pawh chuan a zui ve ta hram.


"Ka va thlah ang" Mama'n a ti a, an pathum in an in zui chhuak nghal a.


U Sawmtei te an haw hnu chuan kan chhungkua in TV kan en a. Mut hahdam ka duh avangin ka room lam ah chuan ka chho zui nghal a. Mama pawh a lo la kir lo, a leng khal a nih ngei ka ring, a mut dawn apiangin ka room ah ka awm leh awm loh min rawn en hmasa ngei ngei thin.


Ka room ah ka lut chho a, ka kawr hak chu hak nuam zawk tur in pyjamas suit in ka thlak a, dawhkan a ka laptop chu la in ka khum lam ka pan ding nghal bawk. Ka bawp ka khawkherh a, ka laptop chu pawm in ka thu ran a.


Ka room kawngka a ri rak a, ka hawi phei chuan Mama a lo ding ran tawh. Nui sang in "muttui aw" a ti sup a, keipawh chuan "muttui le" ti in ka chhang ve nghal vat bawk.


Ka awmdan siamrem in ka laptop chu ka khum ah ka nghat a. Ka lukham la in ka bawh nghal ran a, ka mut hma in ka Facebook ka check a. Inbox zawn sen vat a awm avangin ka click nghal zauh.


Min lo thawn thu hming ka hmu chiah chu ka meng nghal kawk a, ka chil ka lem khalh.


"Nilo, nang chu i kalbo tawh alawm. Ka nun ah i tel ve tawh lo, i lo let leh na chhan tur a awm lo, ka lak atangin i kalbo hlen mai loh" ka hriat tham lek a ti sap in ka laptop ka kuai khup a. Chunglam melh ran in ka khum ah chuan ka mu ta ran a.



Link:
BBcode:
HTML:
Hide post links
Show post links

ADVERTISEMENT (A hnuai a milem hi a nia hmeh zeuh tur chu)