Lingering Memories 8

Episode kal lai dah luhna

Moderator: writers

Rodingliani
Posts: 196
Joined: February 26th, 2018, 8:27 pm

Lingering Memories 8

Unread post by Rodingliani » October 29th, 2020, 5:14 pm

Lingering Memories


Chapter 8

A tawp tep tawh nia lo chhiar hram hram ru

An inneih ni a lo thleng a, monu leh a thian Amy chu nalh thei ang ber in an in thuam a. Siamtei chu thian ah hman a tum teh lul nen Hunter-an 'mo thian ah i tang tur ani lo. An in then hun ka nghak anga ka nei dawn a. Chutih hun ah chuan mo thian ah i tang dawn nia' a tih bur a vang in a hnawl a, Amy a hmang ta zawk ani.






An mahni lam tura motor a rawn thlen lai tak chuan Siamtei phone chu a rawn ri a, a beng bulah chuan "Captain a nia... I pasal neih hma in a tawp nan biak che a duh." a rawn ti sa sa a.






Hawi zak zak chung in phone chu a la a, "Hello ?"

Aw khur deuh dar dar in Hunter chuan, "Dingpui, khawngaih in ti suh. Inneih hi thulh leh rawh..." a rawn ti tawk tawk a.

"A tlai lutuk tawh. Biakin pan in ka kal dawn mek."

"A la tlai lutuk lo. Inneih thu tiam em pawh i la chham loh kha. Tunah khan rawn chhuk la ka lo hmuak ang che. Biakin hlat zawng in kal rawh."

"Ka - " a bul mai a lung milim ang mai a Alex lo ding khawng auh a hmuh chuan a tek sawk a. Phone chu rang lutuk i Siamtei a pe nghal sawk sawk a. Alex mitmeng vawt lutuk chuan a ti khur thei hial a. Mo hruai tur i mo neitu ber an kal ngai tih pawh a hre lova, a hmu ta thut chu mak a ti hle a.






Alex chuan dimna tel hauh lo in a ban puam ah chuan a rawn tham a, car ah chuan a nawr lut nghal a. A beng bul ah chuan, "Maicham pan dawn ruai ah pawh i bialpa biak ila thulh chuang lo ani maw... Duh tawk teh." a ti vawt raih a.






Inneih thu tiam an chham hnu a inneih hun serh a zawh hnu chuan thla lakna hun an hmang a. Hlim hmel tak a lan a tul si a a nuih luihna lam ah a biang ki te chu kham thum hian hria a. Mipui huhang chu a zo lo in a chau nghulh a,a lu te chu a na ut ut mai a.






Jose chuan Alex beng bulah chuan, "He nula hi hlim tak in siam ang che. I ti na a nih vaih chuan khawvel eng hmu tura ilo piang ve hi i inchhir rum rum khawp in ka siam ang che." a ti a.






Alex chu a nui sak a, in ti neitu tak hian Dingpuii kawngah chuan a kuah a. "He ti khawp a nupui hmeltha hi tun nge tina phal ang?" a ti a. Nui hmel a pu na a a mitmeng erawh a nui hauh lo.






"Hlim reng ang che u." tiin Jose chu an thianho din khawm laih lam pan chuan a kal ta a.
"I bialpa chuan a la na hle anih kha. Amah kha Captain chu em ni?" Alex chuan a ti sap a.

"Jose hi ka bialpa ani bawk lo. Ka thian tha ber te zinga mi anih hi."

"Tunah chuan ka nupui i ni tawh a, Jose emaw mipa dang reng reng i biak that hawrh kha a rem tawh lo ang, Cat."

"Chu chu kan inneih contract ah khan a tel awm reng ka hre lo."

"A tel ang ah ngai rawh."

"Ka hua che, Alex" ti sap in midang hmuh tur chuan hlim awm em em hian a nui var var a.

"Ka lainat che - i huat em em chu pasal ah i nei ta sia."

"Eng kim hi a der vek a lawm."

"Pathian leh Kohhran mipui hma ah dawt hmang in thu i tiam tihna em ni? Eng kim hi a tak vek ani."

"Mahse ka - " Alex-a nu in a banah a rawn kuah tak ah chuan a ngawi ta daih a. Hlim tak a nui sang in a Nu Sangi chu a nuih ta ver ver a.






Alex-a nu chuan "Puite, i nalh lutuk tlat. Enteh i Pu pawh saw a hlim ngang mai, vawiin ni ang reng reng a a hlim saw ka la hre ngai lo. I Pitei leh i Putea nen pawh an in kawm theih hmel khawp saw ti raw. I Nu leh i Pa Rama te kha la dam nise tun hun hi min hmuh pui ve se ka va ti tak em." tiin a mittui chu a khap per sak sak a.

"Ka Nu Sang, ka - "

"Ka nu tiin mawle, Puite. Tun a tang chuan ka fanu tak tak ini tawh dawn a, 'ka nu' tiin mi ko tawh ang che." Alex nu chuan hmangaihna a khat mitmeng a melh chung chuan a ti a.

"Awle, ka - NU"

Ani chu hlim tak in a nui hawk hawk a, a awm ah kuah bei hle hle in a chal ah chuan a fawp zauh a. "I la fel reng anih hi, ka Puite."

Alex chuan fiamthu zet hian, " Nuuu... kei pawn ka la kuah lo a, kuah bik chung chung reng suh." a lo ti a.

"I thilthu ti chhe nghal ngawt suh, Lalbiaknung."

"Keipui sa hauh an tih kha i hre ngai em? Kha tiang vel khan ka awm?"







A nu chuan hlim tak in a nuih pui ar ar a, a fapa hmeltha tak biang ah chuan a piai zauh a.






Mo thian Ruata chuan " Ka Nute, naupang chhia ang mai a a biang piai rual a nih tawh loh kha." tiin a lo fiam zauh a.






Pi Sangi chu a la nui ar ar reng a, "Mipa hi chu an tar hnu thleng pawh in an naupan chhiatna leh an pangchanna hi a reh thei hlei nem." a ti mai a.






Thla an la mawlh mawlh reng a, thla lak pui duh tu leh chibai duhtu an tam in Dingpuii chuan a hne tak zet tawh a. A Putea te nupa mit a hlimna lo eng chhuak chu hmuh tur awmlo phei se chuan tawmbo daih a duh hial ta ve ang.






"Honey Moon lam te hi..." Ruata chuan a lo ti zauh a.

"Kan hmang dawn lo."

"Innei thar ve lem zan hmasa ber te chu in pahnih chauh a tuma chim buai phak loh na ah in hmang tur a lawm, Mawllianpa."







Alex-a nu chua "Ni e, honey moon hmang a ram hran a zin an duh si lo a, Airfield bula kan picnic spot ah khan kar khat cham in hun fianrial hmang se ka ti a, ka lo ruahman vek tawh a lawm." phur tak in a ti sarh sarh a.

"Ngaihdan tha tak a nih chu. Ka Nute, you are the best." tiin Ruata chuan thump up sign a lo hmuh a.


&&&&&&&&&&&&&&&&


Kar khat chhung teh meuh an pahnih chauh a hun an hman dunna hmun tur Sailo Picnic spot hmun nuam leh reh dam raih,han thlir mai pawh a mi hip zar thei,romantic raih mai 'Shangrila' an tih chu zan dar 10 ah an thleng thei hram a.






"WOW..."

"A nalh a ni ti raw?"

"Vanram ang mai ani." tiin zan boruak thiang kak chu a hip vang vang a, "A nuam hle mai." a ti sep a.







In chhung ah chuan an in zui lut a, Dingpuii chu sofa cchung ah chuan a thu hnawk a, "Ka chau..." a ti halh a.

Alex chuan a jacket chu phelh i a nupui mitmeng ngui raih chu a melh a, "Inbual harh la." a ti dam duai a.

"Chu chu tuna ka mamawh ber ani."

"Lo kal rawh i pindan tur ah ka hruai ang che" tiin an suitcase chu a khai a. "Hei hi i room tur, lo in bual harh rawh." a ti a, a chhuak leh ta mai a.







Muang changnin tui vawt chuan a inbual a, harh deuh hawk hian a in hria a. A i bual zawh chuan a thawmhnaw te a rem fel a, a mut a la chhuah loh em a vang chuan pawn boruak thiang dawng tur i a chhuak ta a.






Alex chu pool bul ah thu in zu a lo in mek a. Inbual zo hlim hlawl tih hriat tak hia a sam chu a la hnawng deuh chap a,electric eng paw riai hnuai ah chuan a lang fresh vang mai a. Tawnzau dum a taksa rem thlap hak chuan a pian tha tak chu a ti lang chiang hle a. Kekawr bul vutbuak rawng a hak in a khuh phak chin a bawp sei tak chu pool ah chiah in dim te in a ke chu a phut at at a. "Min rawn zawm ve la." nui sang hian a ti a.






Sawm nawn a ngai lo kher mai, a pan phei vat a a bula thut ve pah in whiskey um chu a melh vang vang a, "Ka lo in ve ange" a ti ta a.






Alex chuan, "Rui nawi hlek suh ang che." tiin a lo thlit sak ve mai a.






Dingpuii chuan vawi khat ah a tlak pawp a, a pum a sat thlak hat hat chuan a then sak a. "Ka lo mamawh hle anih hi." tiin no dang a thli leh nghal a. Hmui phawi hauh lo hian a in zo leh nghal vek a " Mmm... ka zia ta khawp mai." a ti sap a.






Alex hmel ah chuan eng nge a ngaihtuah tih pawh a hriat hauh loh hian a rawn melh vung vung a, "I thinrim zu in pawp pawp mai a, ti kha chuan ruih a awl bik. Muangchang in in la zu tuina a fiah bik a, ruih pawn rilru a fim bik." a ti nghat a.





"Okey.." a ti zang vah a. No thum a in chuan a rui in a thawveng halh tawh a. Alex an meng de sawr sawr a a rawn melh tih a hmuh chuan, " Hey.. Sipai, enga ti nge kha tia min melh reng a ?" tiin a nui ker ker a.

Alex chu a in sangmar ruh teuh a, "Pool sir ah sam huh hniang a hmeichhe hmeltha chung chuang i hmuh chuan eng teh vak nge i ngaihtuah ang. Tui hnuai nula nalh tak..."

"Tui hnuai nula? Aw... chu chu ka nihna a nih chiah chu. Ka awm lohna tur khawvel ah ka awm a, thawk pawh ka thaw tha thei lo anih hi." tiin a nui hak hak a, zu no chu a ban leh nghal zat a.

Alex chuan, "Duh tawk rawh. I rui mah mah dawn tlat." a ti a.







Vin hlar hian, "Thih i duh loh chuan min lo sawisel suh." a ti a. A kut zungchal chu ti pir in silai lem ang ah hmang in mit siai meuh hian Alex chu a tin vang vang a, "Bang! Bang! Sipai, i thi a nia." a ti a, a kut hmawr chu silai kaw hmawr khu chhem kiang ang hian a chhem a, a nui har har reng a.






Nelawmloh zet hian a nui suk a, "Sipai tih leh Captain tih hi a ri reng dawn a ni maw?" a ti hluk a.

"Ka nun ah lo in rawlh lo tura thu pek ini."

Alex chuan a zu no dawm lai chu lak sak in, "Tawk chin a awm." a ti nghut a.

"Eng mah hre lo a ruih chhum hmawk ka duh ani." a ti a. A awm chu chum in, "He thinlung chhungril nat zia hi i hrethiam pha lo ang. A na lutuk a na chhawkna a mamawh a ni."

"A th e, a tha e. Muhil la a that zawk ka ring." tiin zo tak hian a pawm kang nawlh a, in chhung lam ah chuan a pawm lut ta vaw vaw a.

"Min thlah rawh. Eng tia min tih nge i tum?" tiin Dingpuii chuan Alex awm ah chum in a hmai a ham tum chuan a phar a. "Min sual i tum em ni?"






Alex mit ah chuan tuarna a lo lang a, chutah thinrimna in a rawn thlak leh a. "Hmeichhe zu rui chhia leh tha pawh hre hrang lo khawp a harhfimlo mut pui tur khawp a hniam leh hmeichhe mamawh ka ni lo aw, Cat," a ti ngul ngul a. Dimna tel hauh lo hian khumah chuan a mut tir a, in pet ruh teuh in a thlir vang vang a, rum nghat in room chu a chhuah san ta a.





Dingpuii zing tho chu peih lo zet in a zi mar ar ar a, a lu na tluk tluk chu a dawm vawng vawng a. Lu kham bul chu dap in a phone lak mai a tum a, he hmun an kal dawn a Alex an a lak sak kha a la pe let leh hauh lo tih chu a hrechhuak zawk a. Khum bul a no tunga tui in chhawp chu a in khawlh khawlh a, tlem in thing harh deuh in room chu a chhuah san ta a.






A tih harh deuh beisei in thingpui sen hang tak ngeng ngawng hian a lum a. Thingpui no chawi in bathlar ah chuan a thu chhuak a. A chheh vel hmun mawi lutuk leh enkawl uluk tih hriat tak chu a thlir kual a. Boruak thiang tak chu hip vang vang in thawk a han la raih raih a. Pool tui in chhek ri a hriat chuan a pan phei thuai a. Alex tui cheng lai a hmuh chuan a phu deuh zawk a, let leh mai hi a tum a.






"Morning, Cat. Nizan i mu tui maw?"

"Ka - i la muhil tur ah ka ngai a."

"Kei chu ka tho har ngai lo, ka tih than a nia." tiin tui a tang chuan a tawn chhuak a. A pian tha leh nalh zet ruak kung ah chuan tui a dir zaih zaih a.







A mit hup in leh lam a hawi thuai a, Alexa taksa nalh leh phiar fat chuan a thawk a ti sak tlat a ni. "Thingpui ka lo siam ve ang che aw." tiin in lam a pan sawk sawk a.

"Mipa saruak la hmu ngai lo ang mai in i lai vel e law.." tiin Alex chuan a nuih zui kiah kiah a.







Thinrim zet hian thingpui chu a lum tau sawk sawk a. Kha tia nuihsawh zui tur khan Alex hi tu nge maw a nih bik teh chai le. Hrep tak a ! A hmelthatna leh a zeina hian nula tam tak chu a lo hneh tawh a ni thei, ani chu a hneh ve hauh lo ang.






Alex lo luh chuan melh pawh melh lo in thingpui chu dawhkan ah a hung a, "Ka phone min pe rawh." a ti mawl tawp a.






Dar a chhin uk a, "I lung a leng tawh em ni? Kha sipai kha be hrih lo la ka tih vang in i sim card erawh ka thlak tih hrilh che ka duh a ni." a ti khauh fung a.

"I va zak thei lo."

"Miin 'Alexa nupui chu mipa dang a be reng' tia an sawi palh chuan ka zak dawn lutuk a, zah theih loh vang nilo in zah hlauh vang zawk a thlak ka ni. Ka sim card pakhat zawk ka vuah sak che kha. Tul ka tih hun ah i sim card chu ka pe let leh ang che."






Thinrim tak hian a melh kha kha a, "Mimal nun in zah tawn sak a in rawlh buai lo tur in thu kan thlung a ni lawm ni?" lungawilo zet hian a ti a.






Aw nem duai hian, "He thil hi kan mimal nun ni lo in chhungkaw nun nghawng thei thil a nih vang a ti ka ni. Sipai pa be lo a ni reilo te chhung awm chu tuar a har in a na ngut ngut em ni?" a ti a.






Hman a a U Mama kawng eng kima a thlamuan pui leh a ngaih em em thin, tuna a U Mama a nihna pakhat mah lang tawh lo, mi hran hlak ni mai awm a lang chu a va melh hrawk a. Han ngainatna emaw pawh ruk riauna emaw pawh a nei tawh lo.

&&&&&&&&&&&&&&&&&&


Siamtei chu rawng a bawl malh malh a, Hunter an a rawn call chuan a thaw hak a, "Hnem thei che ila ka ti - ka thiam bawk si lo." a ti sap a, a pick up ta nghal a. "Hello?"

"Siamte, Dingpuii hian a phone off loh min tiam a, a off leh tlat bawk si a. Ka rilru hi a buai a ni. A aw vawi khat tal ka hriat loh chuan ka puak keh mai dawn in ka in hria." a rawn ti nghal tawng a.

Beidawn hmel tak a nur nang in "Hunter, a ngaihna ka hre bik lo.. kei pawn ka be tlang thei bik bawk silo a.." a ti a.

"An in ah va kal la i phone ah ka rawn bia ang che nga i phone hi a mah chu i pe dawn nia. Khawngaih in min pui hram rawh. Ka in nghahna awm chhun inih kha." tiin Hunter chuan a ngen lawm lawm a.

Siamtei chuan a bai chhuan lai chu off in a bul thutthlwng hnai ber ah chuan a thu zawi hnawk a. "Ka pui thei lo ang che." a ti sap a.

"Eng vang in maw?"

"In ah an awm lo. Kar khat chhung honey moon tenau hmang tur in an - "

"ENG MAW ???!!"

A tawng sual tih a in hre chawp chilh nghal a "I ngaih ang khan an awm lo ang, ka chiang a ni. I rilru ti hrehawm suh aw... khawngaih in."

"Eng vang in nge ka rin ang che?"

"Alex hian hmeichhe dang duh leh hmangaih em em a nei a, a chhung ten chu nu chu an duh si lo a. I rilru a hmeichhe dang awm reng leh hmangaih dang nei reng chung chuan nang pawn i thei dawn em ni?"

"Hmangaih dang a nei anih chuan eng nga ti nge ka hmeichhe hmangaih awm chhun chu nupui ah a neih si?"

"A chhungte laka in thup nan."

"Mahse, Dingpuii kha a Putea ten an neih luih tir i ti bawk si a."

A in sawi kawlh awk vek tawh si a zep in awmzia a nei tawh lo tih a hriat chuan thu dik eng kim chu a hrilh fai ta vek a.

Hunter a chu Sakeibaknei thinrim ang mai in a rum ngul ngul a, "A Putea leiba rulh nan a in hralh a maw? Eng vang in nge a hma khan min lo hrilh loh? Eng vang in nge a tlai hnu ah chauh i sawi lwh si? A ba chu puk pawh ngai lo in ka rul vek duh a sin." a ti ngawt ngawt a.

"Ka tih palh. Dingpuii khan i hriat kha a hlau em a ni."

"Rang thei ang ber in rawn haw dan ka rawn ngaihtuah ang. Ka hmangaih kha lo veng tlat ang che."

&&&&&&&&&&&&&&&& &&&&


Kar khat hnu ah chuan Alex te nupa chu in lam pan in an in khalh haw a. An tawng tam lo in an in be mang lo a. Sawi tur a hriat miau loh a vang in Dingpuii chu a muhil der ta ringawt a.






"Cat, in kan thleng dawn hnai a nia in ti harh rawh le. I lemchan thiamna kha i chhawr a ngai leh tawh dawn a nia. Picnic spot ang khan nun zalen in i awm thei dawn tawh lo a nia. Kei hi i pasal i hmangaih em em ka ni tih i hre reng dawn nia."

"Zalen tak in ka thinrim pawh ka ang chhuak thei tawh dawn lo tihna a ni maw?" a lo ti zauh a.

"A dik. Duh hun hun ah 'Alex, ka haw lutuk che' tiin min au khum thei dawn tawh lo. Khawngaihthlak reuh chuan." Alex chuan a ti hluk a.






In an thlen chuan a nu leh a pu chuan an lo lawm thiam em em a. A pu chuan a tupa dar a ben thup thup pah chuan, " Hun hlimawm tak i zuk hman ngei ka beisei." a ti a. An awmpui nula chu au in "Lali, hei Mama te nupa thawmhnaw hi an room ah lo han dah fel sak rawh." a tih chuan Lali chu a chw nghal zung zung a.






Alex chuan, "Teh reng mai. Ka nun a ka hlim ber tum a la ni hial ang chu." tiin a pu zawhna chu a chhang a.






Dingpuii chu a nur zauh a. Dik tak chuan kha kar tluan khan in khak fek fek nan leh in melh rum nan te, in hmuh loh der nan te an hmang tluan a ni a, a nun a a hun hlimawm ber chu a nilo tih a chiang ani. Dawt sawi leh a der a nun an zir tan ni mai hian a hre thar a.





A pu chuan a tupa kal san in Dingpuii chu a rawn kuah a, a hnung zangah chuan a beng thuk thuk a, "He chhungkua ah hian ka lo lawm a che. Ka tupa nun a danglamna nasa tak i thlen ang hian kan inchhung ti hlimtu leh enna thlen tu lo ni ang che." thinlung tak hian a ti a.


Chapter 7 viewtopic.php?p=34929#p34929

Chapter 9 viewtopic.php?p=34956#p34956


Dingdongi

Link:
BBcode:
HTML:
Hide post links
Show post links

ADVERTISEMENT (A hnuai a milem hi a nia hmeh zeuh tur chu)