BOUND BY HONOR - 21

Episode kal lai dah luhna

Moderator: writers

Puii Sailo
Posts: 126
Joined: October 21st, 2020, 8:05 pm

BOUND BY HONOR - 21

Unread post by Puii Sailo » October 29th, 2020, 6:38 pm

CHAPTER – 21

Inchhungah chuan pen lut zelin, chhawng chunglam chu ka hawi chho a. A hungna darthlalang vek anih vang chuan chiang takin ka hmu thei. Gallery zau tak leh kawngka awmte chu ka han hmu thei a. Living area veilamah chuan choka a awm a. Chutia ka kawi kual vel lai chuan Luca chuan min lo en reng thung. Tukverh lam chu panin pawnlam ka thlir san ta daih a.
Apartment-ah ka la cheng ngai lova, in ropui leh view nuam tak nei mah nise, ka tan chuan tanin a nihna a bo chuang lo.
“I bungrua chu inchung bedroom-ah a awm vek. Nangmah ngeiin i rem duh a rin vangin Marianna pawhin a khawih danglam ta lo anih kha.”
“Tunge Marianna chu?”
Luca chu ka hnungah a rawn ding a, tukverh darthlalang atang chuan kan inmelh kar mai. “Ka in enkawltu a nia, a tul dan a zirin karkhatah vawihnih emaw vawithum emaw a lo kal thin.”
A hmeichhe kawp thin pakhat anih ka ring ringawt a. Achhan chu kan mipa thenkhatte hian nupui nei reng chungin inah hmeichhe dang an hruai haw hreh ngai lem lo.
“Kum engzatnge anih?” Luca chu a kiai deuh suk a, “I thik deuh em ni?” tih pah chuan ka kawngah a rawn kuah a, ka lo ip nghal chawih. Min kuahna chu thlah lo mah se, a hmela lungawi lohna lang te chu ka hmuh hmaih hauh lo. Mahse ka zawhna pawh min chhang chuang bik hleinem. Min kuahna chu tal pitin roof garden tukverh bulah chuan dingin Luca chu ka va en leh a, “Ka chhuak thei angem?” ka ti a. A bek chu a pawng nghal talh talh mai. Mi a a nilo, min khawihna lakah ka tlanchhia tih a hrechiang lutuk tlat. Tukverh chu hawngin ka pen chhuak zui nghal a. Pawnlam chu thli a tamin, hnuailam kawnga motor tlan thawm leh horn rite chu chiang takin a hriat theih.
Tarrace hungna darthlalang hrulah chuan pangpar a awm kual vek a, a laiah chuan lounge furniture var a inhung bawk. Tarrace hungna bulah chuan dingin Central Park chu ka thlir kual a, view mawi tak a ni tih chu phat pawh ka tum bik lo. “Khata tang khan zuanthlak i tum em lo ang chu tiraw?” tih pahin tarrace hungna tlang chu a rawn vuan a. A thusawi chu fiamthu anih leh nih loh hriat tumin ka lo melh chho deuh ha thung. A thutak hmel phian lehnghal.
“Engvang chuan nge ka nunna ka lak ang?”
“Kan khawvela hmeichhe thenkhatte chuan zalenna kawng awmchhun ni a ngaiin mahni an intihlum thin a sin. He inneihna hian mi tangah a siam ang che.” Kan dinna atang chuan lei lam ka thlir thla a, zuangthla ngat ila chuan dam chhuah ngaihna a awm lo. Ka zuan thlak hmain tlanbo ka tum hmasa phawt ang.
“Chutiang chu ka chhungte chungah ka ti ngai lovang. Lily, Fabi leh Gianna-te thinlung a na dawn lutuk,” ka tih chuan Luca a lo bu nghut. A hmelah hian engmah a lang chhuak ve ngai lo. Hei hi min tibuaitu a ni ziah. Tinge hepa hi a inthup theih bik em em le?
“inchhungah lut tawh ang,” tih pah chuan ka kawngah kuahin inchhungah min hruai lut a. Kawngka a khar that lai chuan min hnung chhawn zawngin a ding a. “Minute 30 hnuah meeting ka nei dawn a, a hma thei ang berah lo haw ka tum ang. Ka restaurant ngainat berah dinner ei turin ka hruai chhuak ang che.”
“Oh!” mak tih hmel zetin ka lo ti a.
“Date angin maw?”
Luca chu a kiai suk a, mahse a nui chu a ni miah si lo.
“Chutiang zawng pawh chuan i ngai thei ang. Pangngai takin kan la in date miah hleinem.
Ka kawngah rawn kuahin a lamah min pawt hnai a. Ka lo insangmar at, ani lah a hmel a dur nghal khup bawk.
“Engtikah nge min hlauh hi i bansan dawn?”
“Hlau lo tur chein min duh em ni?”
Amah ka hlauh hian ka tan a tha zawk a, ka himna tur pawh a ni zawk maithei. Luca chuan a mithmul a chuar nang a. “Ka nupui i ni a, kan damchhungin kan awmdun dawn. Ka bula awm turin hmeichhe dawihzep ka duh lo.”
A thusawi chu mak ka ti takzet. Ka nu khan ka pa kha a hmangaih a, mahse a hlau lutuk tho.
“Hlau lotu che an awm dawn em ni?”
“Tlemtein.” A thusawi zawh rual chuan rawn kun hniamin min fawp zui nghal a. Min khawihna avanga ka taksa tang teuh chu a reh rawih thleng chuan hmanhmawh miah lovin min fawp a. Ka kut chu phar chhuakin a tukhumah ka dawm sak a, dimtein a samah ka tham sak ve bawk. Ka kut lehlamin a awmah ka dawm a, a tihrawl che talh talh khawih chu nuam ka ti tlat.
Reife hnuah chuan inla hrangin, “Ka chhia leh tha hriatna thenkhat hian meeting cancel turin min nawr mek. Hrep tak hian!” a ti hluk a. A kutzungpui chuan ka hmui a tuai ne ne a.
“Mahse meeting zawhah hun kan la nei dawn a lawm,” tih pahin a sana a bih zauh a.
“Ka kal a hun tawh tlat. Ka chhuah hunah Romero a rawn kal dawn a, inchhung fan kualna hun thawl i nei thei tawh ang.” A sawi zawh chuan elevator lam panin a chhuak zui nghal. Elevator chu ka en reng a, building hi chhuahsan ta ila, min dang tur an awm a ngem le….tihte chu ka ngaihtuah zui ta mai mai a.
Pawn chhuak ta lo chuan staircase lam panin inchungah ka chho ta zawk a. Kawngkhar pakhat chu a lo inkhar phui loh avangin ka nam hawng a, Master bedroom a lo ni. Living area a lo awm leh a. New York khawpui thlir theihna turin bang zawng zawng chu tukverh vek a ni a, a epah chuan king size khum a in hung bawk. Khum lu chu ft 3 vela sang, a dup lai chu puan dum mawi taka kilh beh a ni. Room tawp lamah chuan closet zau zet mai a awm a, dinglamah chuan darthlalang bang pindan chhunga bathroom awm chu ka hmu nghal bawk a. Chulam chu ka pan phei a, bathtub a inbual chung pawhin New York khawpui chu a thlir theih. Engkim mai chu duhthusam a ni tawp.
“Aria?” min ko ri ka hriat rual chuan ka thaw chhuak hawk. Ka thin chu a phu nghal dawt dawt a, ka aw hriatna lam panin Gallery ah Romero, ka thawmhnaw khai chunga a lo ding ka va hmu a, “Rawn tihbuai che ka tum vang a nilo,” min hmuh rual chuan a lo ti vat a, ka bu nghat.
“I thawmhnawte hi khawiah nge ka dah ang?” Luca khan sofa-ah an dah tawp a tih kha ka theihnghilh daih.
“Ka hre lo. Ih…. Closet-ah sawn i dah mai dawn em ni?” Min kal pelin bag-te chu closet chhunga bench-ah chuan a dah a. A bulah chuan ka suitcase pathum leh box pahnihte kha a lo awm sa diam tawh.
“Zanin hian ka inchei a ngai a ngem? Luca khan a restaurant ngainat berah min hruai a tum a, mahse eng thawmhnaw nge ka hak dawn min hrilh bawk si lo a?”
Romero chu a nui a, “Inchei a ngai lo ang.”
“Ngati maw, KFC-ah a mi?” Diktak chuan KFC-ah ka la kal ngai miah lo. Ka nu leh pate khan hetiang hmunah hian min hruai ngai miah lo. Vawikhat chu Umberto kan nawrluih tlat vangin kei, Gianna leh Lily-te chu Mcdonald-ah min hruai a, chu chu ka fast food ei vawikhatna leh a tawpna a ni nghal.
“Ni chiah lo. Luca chuan surprise che a tum anih ka ring.” Romero chuan a ti a, mahse ka ring ve chiah lo.
“Anih chuan ka thawmhnawte hi phawrh ila a that ka ring,” tih pahin ka bag-te chu ka melh a. Romero chu a hnung tawlh nghal. Hepa hi mi tha tak a ni tih ka hria, mahse a hnaah a rinawm hle ang tih pawh ka hrethiam mai.
“Puih i ngai em?” Romero hi ka underwear vel khawih tur chuan ka duh hauh lo. “Aih, mahnia awm ka duh zawk.”
Min khawngaih hmel a pu a, mahse engmah sawi lovin min chhuahsan ta zawk a. Inhnuai a thlen hun awm vel ka nghak phawt a, ka thawmhnawte chu ka phawrh tan ta nghal a. A chung berah chuan kan unau thlalak a lo awm a, darker 24 pawh a ral hmain a vawithumna atan ka tap leh ta.
Luca chu darker 5 hnu velah a lo kir leh ta chauh a. Pawnfen feng ila, kawrban bul pan leh thawl deuh hek hawk ha ila a tha ang. Ka tahna vang khan ka mit a sen ram tho. Make-up pawh hian engkim a thup theilo anih hi. Luca chuan a hmuh hmaih loh chiang kher mai. Ka mitah tak chuan min melh kar a, khum bul nightstand a kan unau thlalak ka hun chu a thlek vang vang mai.
“I mut duhna lam ka hre silo a, helamah hian i mu duh anih chuan lehlamah ka sawn mai ang,” ka ti a. “Aih, a ngai chuang lo,” a tih chuan ka en vat a, a hmelah chuan a chau tih a lang reng.

“Meeting chu a tha maw?” ka tih chuan Luca chu a hawisawn daih a.
“Sawilo zawk ang, ka ril a tam tawh a nia,” tih pahin a kut chu vawn turin a rawn phar chhuak a. Elevator panin kan inzui chhuak ta nghal. Car a kan chuan lai chuan Luca chu a hahdam loh hmel hle a, tawngkam khat mahin min be zui lo. Tawng chhuak hmasa turin min beisei em pawh ka hrethiam chiah lo. Titi han vawrh tur pawhin phurna ka nei bik hek lo. Traffic red light a kan din takah chuan min rawn en zauh a, “I nalh hle mai, “ a ti sup a.
“Ka lawm e,” ka lo ti ve mai. Garage chhawng, gate chhunga awmah chuan car chu a park a, chumi hnuah chuan restaurant te tak te te awmna, Indian cuisine, Lebanese ho chaw atanga sushi thlenga an zawrhna hmun chu kan pan ta a. Korean restaurant zawnah chuan dingin kawngkhar chu min hawn sak a. A chhung kan luh chuan mak ka ti deuh a, a chepin a lun reuh phian. Dawhkante chu inhnaih te te a hun an nih bakah, bar a an intur chhawpte chu chhiar thiam engmah ka nei lo. Waiter chuan min rawn panin Luca a hmuh chuan a nui var var a.
Dawhkan awl awm chhun lamah chuan min hruai a. Kan bul vela thu vete chuan Luca chu mak tih hmel zetin an en a, a palian si, a len ve loh an ring pawh a ni mahna. Dawhkan kil chuan ka thu vat a, Luca pawh ka ep chiahah chuan a thu ve mai. A bula thu chu lehlamah a tawlh sawn deuh a, chep zeta Luca thu pawh a thawl deuh ang chu.
Tunge anih an hriat vang nge, hawihhawm an chhuah ve hrim hrim tih pawh ka hre chiah lo. Waiter chuan kan intur chah min pek pah chuan menu a rawn dah a, a kalsawn lehnghal. “Mak i tih hmel hle mai,” Luca chuan a ti a.
“Thil awmdan ngaihtuahin Asian food ei turin hetiang hmunah hian min hruai ka lo beisei miah lo a.” Restaurant-ah hian mihring an tam bakah kan inhnaih bawk si, a aia chiangin ka chhang theilo. Mahse Luca chuan Taiwanese triad ho ka sawina a ni tih a hrechiang.
“He restaurant hi Asian food an siam tui berna hmun a ni a, kan hmelmate nen inzawmna an nei hleinem.” Ka thaw hawk. A awmzia chu, Familia-te thuhnuaia awm ani tihna a ni maw…
“Tu thuhnuaiah mah a awm lo, independent a ni.” A thil sawi vang chuan ka ngaihtuahna a hria emaw ka ti leh hman tawh.
“New York-ah hian independent restaurant a awm maw?” kan bula thu nupa niawm takte chuan min rawn melh vat a, an tan chuan kan titi hi a mak reng a ni.
“Tlem chu awm ve e, mahse tunah hian kan indawr vel mek,” ka thaw halh ringawt. Ka menu ken lai chu kawh zeuh pahin, “Ka lo pui dawn che em ni?” Luca chuan a ti a. “Aw, Korean food ka la ei ngai miah lo. Tofu i ei thin maw?”
“Aw. Helai hmuna an siam ang chi hi chu ei thin e.” Ka lu ka thing ringawt. Ka awih theilo hial.
“A tui i tih zawng kha min order sak mai rawh. Sathin tih loh chu ka ei thei vek.”
“Hmeichhia salad chauh nilo ei ngamte hi ka duhzawng tak an ni.”
Order la turin waiter chu a rawn kir leh tawh a. Chopstick hman dan ka thiam loh vangin ka buai tawk hle.
“Chopstick ila hmang ngailo em ni?” Luca chuan nui vur vur chungin min zawt a. Hepa hian min nuihzat vel a maw…
“Ka nu leh pate khan Italian restaurant an ngainat berah chauh min hruai thin. An tellovin khawiah mah chhuah phal sak kan ni hleinem.” Lungawi vaklo chuan ka ti a.
“Tunah chuan i duhna apiangah i kal thei tawh ang.”
“Tak tak maw, keimah pawhin maw?”
“Keimah emaw Romero nen emaw, Romero a hman loh changin Cesare i hruai thei bawk ang.” Luca aw chu a ring lo nain, a fiah hle thung. Zawhna atthlak tak ka zawt a ni.
“En rawh le, ka zirtir ang che,” ama chopstick chu a vuan a. A tihdan chu zirin vawitam fe chu ka tisual a, a tawp a tawpah chuan ka vuan nghet ve thei ta. Kan eitur chah alo thlen chuan ka beisei ai daihin eitur pir kan chu a har daih. Stick hmanga tofu ei ka tum chu vawithum zet ka thlauh tawh. Luca chuan min lo en reng a.
“Hetianga thil an ei thin vang anih dawn hi New York nula ho hi an cher em em.”
“Anni ho ai hian i nalh daih zawk.” Luca thusawi vang chuan ka melh vat a, a fiamthu nge a ti tak tak tih hriat ka tum a ni. Mahse dan pangngaiin a hmelah chuan engmah a hriat theih loh. A mitmeng chu ka thlir zui ta reng a. Mitmu paw ka hmuh thin tawh anglo deuhin, rawng thim deuh zawkin a hual leh a, tunah hi chuan a lang vawt miah lo nain, a vawt ruih kha ka hriatna a cham a ni si.
Luca chuan bawngti hem hmin chu min barh tumin ka hmui zawnah a rawn lek a, mak tih vangin mit hmul ka lo san ak. Ka mak tihmel a hmuh chuan min barh ngei a tum tih hriat zetin a kiai suk a. Thlan tur dang ka nei lo, bawngsa chu ka lo ei sak ta nge nge a, a tui zek lehnghal. A hma ai khan a mitmeng chu a thim leh tawh zawk. “A tui hle mai,” ka ti sap a. Tofu min barh leh pawh chu hnial lovin ka ei ve mai. Thiamlo chung chunga chopstick hmanga ei tum ai khan a awlsam daih zawk…
Luca mi pangngai ang taka a awmlai ka hmu hi ka hlim ru tlat. Beiseina min siam sak hial mai. A tilui mai mai pawh a ni maithei, mahse chu lam chu ka ngaihtuah duh lo.
Kan penthouse kan thlen leh meuh chuan dinner kan ei laia ka hahdamnate khan min thawhbo san leh vek tawh. Bathroom-ah chuan mu tura inbuatsaih pahin rei tawk fe ka inkhung a, ka chhuah rual chuan ka mut kawrfual satin dum hak chuan Luca mit a la hle tih ka hre nghal. A lo melh chat mai. Ka chawn thlenga fual a ni a, a kak chu ka mal thlenga thui a ni. Inneih zana ka hak ai kha chuan zia tak a ni ringawt. Mahse a mit a min mamawhna lang chu ka hmuh hmaih bik lo. Bathroom a a luh hnu chuan tukverh bulah dingin khawpui leh inchhawng sang tak takte chu ka thlir a. Nizan ang tho khan ka la zam chhe reng. Infawh aia thuk thleng tur chuan ka la inpeih lo. Ka bula Luca a rawn din pawh chuan ka lo en duh miah lo.
Tukverh darthlalang atanga lang thei, a ruangam lian leh pa zet chu hmuh loh tum luih chi a nilo, a hmuhnawm hranpa ve em bawk a ni. Nimin ang tho khan briefs chauh a ha leh tawh a, min kuah tura a rawn phar chhuah chuan ka lo en reng a. Ka thahruite chu an chawl leh vek tawh. Ka awmdan chu a hrethiam anih pawhin engmah a sawi chhuak lo. Ka hnung ruak kang chu zawitein a zut thla a, a tawhna apiang mai chu a sa thla ham ham mai. Engtinmah ka chhan let loh vang chuan a kut chuan chho zawngin a zut leh a. A thil tih vel dan hi ngenngawl taka sawmna a ni. A sawmna hian chhanna pakhat chauh a nei. A lam hawia ding ni mah ila, a mitah ka en ngam lo. A kut phaha ser chu dimtein ka khawih sak de de a, “Thisen hmanga thutiamna a ni em?” tih pahin a hmel hriatthiam har zet chu ka en ve ta nge nge a. Mipate hian thutiam an lak laiin an kut an zai thi thin tih ka hre ru ve tlat.
“Nilo, hei zawk hi,” tih pahin a kut lehlama ser lian vaklo chu min kawhhmuh a. “Kha zawk kha chu…….” A tih lai chuan a kut ser ka khawih chu a melh a. “….. kan insualna anih kha. Kut lawngin chemte ka hum a, anih loh chuan min vit dawn sia.” A mi thah hmasak ber zawh ka chak rilru deuh a, mahse ka kawngah kuahin khum lam min panpui vang chuan ka ngawi zawk a. Khumah chuan thuin a bawp kara ding tur chuan min pawt hnai a, tawng chhuak thei pawh ka nilo. Ka hrawk a ro hulh hulh. Pangngai taka min fawh lai chuan mak deuhin ka hahdam phian, thil dang a beisei dawn lo anga ka ngaih vangte pawh a ni mahna.
A bula mu tura min pawh thluk takah chuan ka beiseina chu boruakah a tham ral riai riai. Min fawhna chu a duhthawh sawtin, a taksa danglam awm chuan ka malah a do run tawh a, ka lo chhang let ve zel bawk.
He thil hi ka ti thei ang, thil thleng tur tho tho a ni tih ka hria. A kut chuan ka awmbawr chu a hup a, hnial lo turin ka inthunun ve hram hram. A kut la sawn tur chuan ka ngen lo a, ani pawhin a la sawn bik lo. Min fawhna hian engkim a ti harsa vek. Luca nen hian nupa nun hmang ta ila, a hrehawm viau a ngem le? Ka hmuia a fawhna chu thlahin, ka beng chu a seh ner ner a.
“Hetiang reng reng hian hmeichhia ka la it ngai lo.” Ka khawng nghal awt.
A thusawi chuan min inngaihnep tir tlat. Ka pasal anih angin ka taksa chunga thuneitu pawh a ni. Chu chu mi zawng zawng ngaihdan pawh a ni ang. Mahse hei aia tha hi ka phu, mit it vang ringawt chuan ka tlawm thei lo ang. Hmeichhe dang a mut pui thin anga min mut pui tur chu ka duh lo. A nupui ka ni a, a nupui anga cheibawl chu ka duh. Ka lu thlesawnin, a awmah chuan ka nem a. A lungawi loh hmel kher mai.
“He thil hi ka ti thei lo.” Ka aw ri chu a zawi mah mah. Mahse ka ten hmel chu thup ka tum lem lo. A hmel chu en lo mah ila, a thinrim tih erawh ka hrethei. Enge a ngaihtuah ang le… Dinner ei turin vawikhat min hruai chhuah vang khan awlsam takin ka mut pui duh mai a beisei maw??? Chutiang chu hmeichhe dangte chunga a tih thin dan emaw ni le… Rei ngial engmah swi lo a min en vang vang hnuah a inla hrang ve ta a.



Link:
BBcode:
HTML:
Hide post links
Show post links

ADVERTISEMENT (A hnuai a milem hi a nia hmeh zeuh tur chu)