By : Msi (Hmeichhe Naupang Tereuhte)
"I hmeichhe chhawr thar tunge an tih khah?? Aw.. Jessie em ni? A ni khan i lawmna a siamsak vak na che nge ka lam i rawn hawi leh tak, mahse hre rawh! Kei chuan mawi takin ka lo hnar fithla țhak ang che" ka ti a, a kut chu na zet tur hian ka sih sak a mahse engah mah ngai lo tih hriat zet hian min la kuah tho.
"Nangmah ngeiin i ban tawh, a aia țha an awm ta alawm tih avanga i ban tawh lakah chuan i hur zia leh i mamawh zia i tilang ngam hi i zak lo em ni? I hmeichhia khan a peih rei pui tawp bawk si lo che a tiraw.... kei zawng i nupui pawh ka zah zozai tawh alawm mawle hetiang hian i nung tih a hre tawp bik si lo a" ka ti leh a, min kuahna chu a phelh thawl deuh, a nupui chungchang ka sawi vang pawh a ni mahna.
"Ka nupui chungchang kha sawi tawh suh!" A rawn ti deuh ta hrâwk! Ka nui chhuak hak a, ka beer can chuan a lu ah ka han chhu deuh pawp a min thlah chiang mah mah "oh! Khatiang ang chiah khan min thlah vat ni la chu i nupui chungchang kha ka sawi miahlo ang mawle" ka ti a, ka ding țha a a lu chu alo tuai vut vut a ana deuh a ni mahna, aw... a zum lai pawn ka chhu hleinem mawle a thi êm bik lo ang.
"Hun hman nuam le boss" ka ti a, ka in her a ka room lam ka pan phei san nghal daih bawk.
A nupui chungchang a hriat a sawi a duh ngailo, ni e... a duh reng nang. Nupui nei reng chungin hetiang hna hi a khawih miau alawm a nupui bulah vawi engzat nge dawt sawiin a phat tel tawh ang. Madam pawh khan a hrilh fo, a mah Madami'n a enkawl theih thu leh Boss in a hlawkna pawh in lam ațanga a tel theih thu a hrilh a chupawh a nupui vang bawk tho a ni mahse a duh lo a Madami'n sawiin awmzia a nei tawh lo tih hria in a tilui duh tawh lo bawk.
A nupui pawh vawikhat ka hmu ve tawh hmelțha deuh mai, ngo veng vawng leh nu lian lampang hi a ni a fel pawh a fel phian a, fa pawh hmeichhia leh mipa an nei a. Tihian ka ngaihtuah țhin, Boss hi ni ilang chuan heng ai hian ka nupui leh ka fate ka thlang zawk ngei ang, hetiang ang mawl lutuk leh rilru neilo lutuk mipa hian khatiang ang nupui pawh kha a phu hlawllo, a nupui kha ka lainat zawk takzet bawk.
Dawhkanah chuan beer can ruk chu ka nghat a ka phone chu ka hmet êng zeuh a Doctor-a missed call alo awm a, a hrilhhai viau ang. Ka phone chu ka la kang a a number chu hmet chhuak in ka dial a a rawn la rang em em mai lehnghal.
A lak rual rual chuan "ka lo inbual daih a phone ri pawh ka lo hrelo a" tiin pangngai takin dawt ka lo sawi nghal thawr a ka ner zui sak bawk. A rawn thaw hawk a "ok, a țha e.. enge i tih a?" A rawn ti sup a, a bulah chuan mipa leh hmeichhe țawng deuh nak nak hi alo awm bawk a.
"Ka inbual zo chiah a ka mu țep, ila buai viau ami i haw tawh dawn em?" Ka ti ve nghal a.
"Haw hman țep ang, i awmna hmun min hrilh la ka rawn kawi ang inah i awm em?" a rawn tih rual chuan ka țhu ngil nghal deuh awt a ni ber, ka hawikual nghal ruak lehnghal ava țul tehchiam lo tak! "Bawihi" a rawn ti leh.
"Aw.. ah... ka awm lo amaw bakah lo kal a ngailo ang hei ka mu tawh dawn khumah ka lawn fel chiah bakah i chau âwm si" ka ti zung zung a zahzelah bedsheet chu kan beng zeuh ava han mawl thlak tak! A rawn nui hawk hawk a "ka lo kal chu ivan hlau âwm ve a" nuih tel deuh reuh pah hian a rawn ti a khumah chuan zawi muangin ka țhu thla a.
"Ah... hlau lam pawh a ni lo, i chauh ka rin vang alawm" ka ti a, a nui ri leh suk a a nui chuan min fan hneh lutuk chu ka mal chu ka hmer tâwk mai. "Umm.. zep loh chuan ka chau tih piahlam a ni chuan i bula awm ka chak a ka ngai bawk che" a rawn ti a chhan dan tur mai ka hriat loh avang chuan ka ngawi ngal a.
"Bawihi" a rawn ti leh sup.
"Umm..." ka ti ve sap a, hetia min koh hian alawm ka lo awm thiam loh em em zel, mahse aman a sawi hian a engemaw riau bik bakah a enge ka nih zia a tilang ve ka ti a, nu leh pa ten min auh leh a ni min auh hi chu a danglam fâl nalh.
"Ka ngai che a" ril zet hian a rawn ti sup a, a thusawi chuan chhunglamah chuan min fan nghal rawih rawih a, a reh tak vung vung avang te chuan ka thinphu ri te thleng hian ka hre thei a khum khuhna chu țhâm deuh tâwkin ka maimichhing ringawt, ka chhunglam a mi nghawng nat zia chuh!
"Umm.. ah, i buai âwm sia dah phawt ila i haw hunah min lo call leh zawk la pangngai deuhin kan inbe zawk ang a" pangngai zeta tih ka tum chu ka theilo, ka aw te chu a khur ru vel hial a nih chu! Phat rual loh in ka zâm!.
"Ok... i awmna chu min hrilh la, ka rawn kawi zawk anga chuan ka let leh ang" a rawn ti leh sup, ka ngawi deuh vang vang a ka thâwk ka chelh ngar ngar, ka kut te chu ka hûm ruh zui nghek bawk.
"Um.. Damdawiin ațanga i chhuah dawnah min lo call la chuan ka lo hrilh ang che, tunah ka hrilh che chuan i theihnghilh palh ang" ka ti a a rawn nui chhuak hawk a ka nui ve sêih "a țha e, ka haw har tawh lo ang" a rawn ti leh a midangin an rawn biak buai avang chuan a haw theih vat tur thu sawi leh hram in amah zawkin call chu a ti tawp a.
Phone chu muangchangin ka la thla a ka malchungah chuan ka nghat a, ka en thla a boruak thâwk chhuah tur nei ve chiah ang mai hian ka thaw chhuak nghal ham ham, zêp miah lo in min ngaih thu a sawi a mahse kei khan sawi let ve nachang ka hrelo, ka rindan chuan a rukin ka lakah hian a beidawng rum rum tawh ang a chuan min kalsan vat a tum a ni thei mai ang em?.
Kei hian amah a ka feelings neih ve te ka tilang ve lo a amah pawh ka hnaih lo in ka ngaihsak lo em em bawk a chuan dawt te hrilhin a hriat loh laiin beer te ka lo in san bawk a mahse a ni lah chuan min ngaihsak em em a a hun neih ve chhun pawh ka kianga hman ve a duh thu a sawi bawk.
Aw ni tak e, ka lo haw țep tawh ang a ti bawk a ka phone chu khumah theh thla in rang zet hian ka tho chhuak a closet hmaa bathrobe ka khai chu pawt thla lawk in bathroom lamah ka thlawk phei nghal, beer ka in avangin ka ha pawh vawihnih lai ka nawt a intifaiin ka chhuak leh a ka awmdan leh ka rim velah hian a hriat loh hram ka beisei.
Dressing table hmaah chuan ka ding vâng a, darthlalangah chuan ka in en a ka kun hniam a ka mit chu ka keu deuh a tlemtê in a dul deuh mai bakah alo sen ram a "pawilo, zan a ni tho min hmu chuang lo ang" ka ti a, drawer chu pawt hawng in damdawi pakhat ka la chhuak a ka ban leh ka ke ah chuan ka hnawih a ser chutiangin a awm vak lo bawk, a dam hnu hian ka lo theihnghilh leh țhin a ni lo se tunah te hian a reh vek tawh ang.
Thawmhnaw pangngai mai mai ha in chapal mai mai chu ka bun a khum mawng lamah chuan țhu in ka phone khum a ka theh thlak kha ka ban a call a awm tawh leh tawh loh ka en a mahse alo la awm lo dar 8:30 a ri dawn tawh bawk. Ka phone chu ka hûm ve ngar ngar a naupang angin kawngkhar melh kiau chungin ka țhu ve rân mai.
A khat tawkin phone chu ka hmet êng leh zeuh țhin, zan tirah khan khatiang khan awm mah ila tunah hian ka phur in awm ngaihna ka hre ta lo a ni ber. Mahse ka phur lam ai mah chuan ka zâmna hian min luahkhat hneh zawk tho tho, a vawikhat nan hun a kal muang ka ti ve in sana te chu inher kual zung zung se ka ti ve hle bawk.
Dar 9 a pel deuh âwrh tih ah chuan ka phone a rawn ri a Doctor-a hming ka hmuh avang chuan ka thin a phu rang nghal dup dup, zâm ru deuh tak siin a hring chu muangchangin ka thai chho a phone chu ka bengah ka nghat a ka thaw deuh ham ham "Bawihi, Hospital ațang ka rawn inkhalh chhuak dawn chiah a i awmna chu sawi la" a rawn ti a, ka mal chu ka hmer a.
"Um... ihmaw in Damdawiin ațang khan Kulikawn lamah lo tlanphei la maw... chuan Kulikawn bus stand bulah khan peng alo awm anga tah khan lo kawi la thui lo tê ilo tlan anga kawngsira țhutna lo awm hmasa ber bulah khan ka lo awm ang" ka ti a kei a pawh chu ka tho chhuak ve nghal a.
"Ok... ka rawn thleng har lo ang inthuam lum la " a rawn ti leh hram a, ka nui sêih a.
"Um.. ka hria e ka dah ania kawng i hriat loh chuan lo sawi leh mai rawh" ka ti a, a hriat theih mai a rin thu a sawi a call chu kan ti tawp nghal bawk. Kan Hotel awmna ațanga a hlat tehchiam loh avangin muangchangin ka pan phei a mahse ka thleng leh vat tho.
Țhutthlengah chuan țhu in a lo kal tawh leh tawh loh ka en deuh sek a, ka chungah chuan thingkung lian zet hi a awm a street light chuan a chhun nalh vei phian bawk.
Rei vak lo ah chuan ka hmaah chuan Verna car hi a rawn ding a Doctor-a car ngei a nih avang chuan ka țhutna ațang chuan ka ding chhuak ve vat a, a ni pawh a țhutna lam kawngkhar chu hawngin a rawn chhuk zui ve a kamis a ha a, a chungah coat fual a ha leh bawk a a hnuaiah kekawr ama taksa phuar lam lek lek a ha bawk a, Doctor a ni bawk a a inchei dan hi a smart thei takzet a ni.
"Min lo nghak rei em?" A rawn ti nghal a, kei erawh chuan ka lu ka lo thin khum mai thung a ka lai ru țût in ka hria.
"Car chhungah lut ila pawn chu a vawt lutuk emai" hawikual zeuh pah chuan a rawn ti a. "Vawt mahse a nuam alawm, car chhungah chuan ka awm peihlo tah hian awm zawk ila" ka ti a "i chiang chiah maw?" A rawn ti leh.
"Umm... chiang e.." ka ti a, a bu nghut.
Keimah zawk chu ka țhu hmasa a, a ni erawh rawn țhu ve mai lo chuan a coat hak chu a phelh a a che vel chu ka lo en reng, ka bulah chuan a rawn țhu thla a "hetah hian lo țhu teh" a rawn ti sup, mak ti zet hian amah chu ka en deuh hâ a "maw?" Kan ti ringawt bawk.
"Hetah hian lo țhu la" a rawn ti leh a, mahse a sawi ang chuan a kap karah chuan ka țhu ve mai a ka țhutfel rual chuan a coat phelh tak khan min rawn khuh ta hlûn, min kuah bet zui nghal bawk a "a vawi iti zawk lo ami?" Ka ti sep, ka darah khabe nghatin ka nghawngah chuan a rawn fawp zeuh a ka îp châwih thei.
"Ka kuah che hian ka duhtawk, nangmah kha lum țha la ka duh zawk, inthuam lum turin ka hrilh mawlh mawlh che kha" a rawn ti deuh nghut, ka nui a "ka inthuam lum êm hi.... hei bak bak ka tih loh dan deuhin mawza te ka bun ve ania aw" ka ti hlak a rawn nui suk a.
"A țha nih chu" a rawn ti ve sup bawk.
A âwmah ka tukhum ka nghat a, a ni erawh chuan ka dulah min kuah nghet hle thung a chu chu ka thlamuanpui hliah hliah bawk.
"Enge Mama nu chu a an deuh tlemtê in a zia deuh em?"
"Ka sawi fak thei bik lo naktukah kan zai anga a result a zirin test dang pawh tih leh a ngai maithei, a natna hian dam lam pan aiin zual lam a pan zawk zela mihring danah chuan tih theih kan neih tlem tawh takzet mahse Pathian kan nei a a ni'n țha a tih angin a rel mai ang" a rawn ti a, Pathian hming a sawi lan avang chuan ka tîm ru deuh châwih mai.
"A țha chhuak leh êm chu maw...țha chhuak leh hram se" ka ti vang vang a, a rawn thaw deuh ham ham a "beisei phawt ang, Pathian thu thu a ni" a rawn ti ve bawk.
"Hetah daih daih engtin nge i awm daih daih theih?" A rawn ti a, ka hlauh ang ngeiin min zawt ta chat bawk, ka ngawi deuh a "nia... sawilaiah sawn Hotel a awm a tah chuan ka riak dawn a" ka ti țha ve mai a han pehhel kual vak ka tum lemlo bawk. Hotel ni mahse a changkan êm avang leh a hmun a fâl avangin mi pawh an kal fo țhin a keini pawn Irene-i leh Doctor-a ho pawn kan kal tawh kha.
"Zanriah kan ei ho na hmunah khan em ni?" A rawn ti leh a, a aw ațang chuan engah mah a ngailo nge a lungawi lo tih pawh a tilang lo a ka hrethiam lo "umm... tah khan, in lamah ka awm peih lo a tah chuan ka riak dawn a" ka ti a ka sawi zawh rual chuan ka bek ah a rawn fawp vang vang a a chhan lah ka hre hek lo.
"Kan inah lo awm ve tawh mai rawh" a rawn ti a, ka ner deuh nâng a "a âwm ang lo emai ah!" Ka ti hlak a, a rawn rûm deuh nghut.
"Enge ania lawm" ka ti leh țalh, a rawn nui deuh suk a "tunge a ni lo lo ti a?" Chimawm zet hian a rawn ti a, ka âng phâm phâm mai mahse ka tlawm duh bik der lo.
"Nangmah...i rûm nghut vei a nih kha... min hnial i ang êm alawm" ka ti a, a rawn nui chhuak hawk! Nghet zeta min kuahin ka biangah chuan a rawn fawp a kei a pawh chu ka nui ve ta ringawt bawk. Thil tam tak kan sawidun ve a kei pawh chu ka rin ai ka țawng hnem ve phian lehnghal.
A haw dawn meuh chuan dar 10 a ri deuh dawn thuak a kan inthlah fel a Car chhungah a lut mai dawn amaw tih nâk alaiin min pawt let in car nghengin min nem bet a a tawp thei tawh dawnlo amaw tihtur khawpa duhthawh hian min fawp a kei a pawn insûm buai lo in ka lo chhang let ve vat tho lehnghal a tu ve mah mah in in sawi bik tur kan awm teuh lo.
Khumah chuan ka mu nui ver ver mai, hetiang hian ka awm ngai miahlo. Ka biangah chuan ka dawm ve ve a ka ti che vak vak, ka tho chhuak hluai a "ka â a mi a?" Tih pah chuan ka biang chu na lo tê hian kan beng a mahse ka â lo nasa.... khumah chuan ka mu thla leh a inchung chu ka en a ka thaw deuh ham ham.
"Hetiang hian awm reng thei ila" ka ti chhuak deuh sep bawk.
★
Zingah chuan dar 9 rik hma bawkin ka tho leh phone pawh en hmasa hlei lo ka charge tawp a chuan bathroom lamah ka lut phei hmasa a vawiin chu hna kal ngei ngei ka duh bawk, ka tihtur zawng zawng te kha ka la theihnghilh lo a tih ngei ngei ka tum bawk ka ti hlawhtling ngei bawk ang.
Hmanhmawh zetin ka insiam zung zung a khua a nawm vak loh avang chuan tlem chuan ka inthum lum ve a ka phone in charge lai chu phawiin ka bag ah tur chu siam leh zung zung in huan lam ațang bawk chuan ka chhuak leh a bus stand lam pan in ka kal a kal pah chuan phone chu ka bih phei a message awm awm chu ka chhang nghal zung zung bawk.
Doctor-a chuan dar 7 velah khan morining wish min rawn thawn daih tawh a keiin dar 9:45-ah ka chhang let thung a a last seen erawh dar 8:30 kha a ni thung message pawh a in one tick hmak bawk.
Siami pawh keimah ka ni tih ka hrilh tawh a min rawn call a min rawn hau nasa hle bawk a engmah in ka chhang lo ka nuih a za hle ringawt thung. Mipa angin ka bia a min lo star ruk hman thu a sawi phei kha chuan ka nui khur char char, henu hi chu mipa lamah hian a awlsam ve hrim hrim.
A zir țhat theih thu leh nuam a tih zia thu te min hrilh a ni e... nuam a ti zawk fê ang lehkha pawh a zir țha thei bawk ang a a chhungte ah a u chiah khan a biak țhin thu min hrilh a mak ka ti lemlo, a tir ațang khan an biak ka ring lo daih tawh. Nakinah chuan keiman eng emaw chu ka la hrilh ang Siami alo hlawhtling a nih phei chuan 'bawihte....' an han ti leh duai duai ang a, ka la țawngkhum ve deuh duah ang nakinah.
Dawr thlen hma in dawr dangah thil ka ei hmasa a ka ril a țam tawh bawk a ka ei hnem ve ngang mai. Room-ah khan mahni a eirawngbawl mai na tur ka dah tel loh avangin chaw ka ei khat viau zel bawk a in a ka awm lai pawh khan ka ei ngailo tluk a ni bawk ka pa nen phur thut a kan ei a nih loh chuan pawn lamah ka eichhuak fo zel țhin.
Dawr ka thleng a midang an thleng vek tawh kei ka tlai leh ber thung. Nizan hmasa thilthleng avang khan ka thawhpui dangte chuan min en dan an ti danglam a kan hai lo nasa mai sia an inthup ve nasa sia maw... mahse kei lah chuan enga tan mah ka lo ngai tawp si lo engmah hrelo ang maiin hna ka thawk mawlh mawlh. Ka sawi tawh kha, heng mai mai hi chu ka tan thil thar a ni tawh lo ngaia ka nei tawh lutuk hi a buaithlak tawh zawk.
Lunch ei hma hret chuan Țhai chuan midang lak ațang chuan min kai hrang nalh a washroom kawngkhar bulah chuan kan ding a "engthil nge a?" Ka ti nghal vat bawk.
"Hman zana mi kha thudik a ni tak tak em? Chuan Dr. Zorema, boss țhianpa nen khan in inngaizawng tak tak ami?" A rawn ti a, aw tih nan ka bu nghat a mak min tih hmel zet hian min en a "ava mak ve" a ti ta nghek.
"Nia" ka lo ti ve mai.
"Ka rin ang ilo ni miah lo" a rawn ti leh a.
"Engti zawngah chuan maw?"
"Ihmaw... lo ngai haw chuang lo la maw keipawn ka haw chuang lo che a hei... i țawng tlem bawk sia hmeichhe țawng tlem deuh nun țha deuh ze zâwi deuh tak mai amaw inih ka lo tia mahse khanu thusawi kha a dik iti bawk sia a mak lutuk a chuvang ania ka rin ang ilo nilo ka tih nachhan" tlang zet hian a rawn ti a, kei erawh chuan ka nuih mai thung.
"Ani reng asin... mi hi an pawnlam landan ang ngawt hi an lo ni ngai miah lo ania keimah ang hian" ka ti a, a mak tihna chu ala thup hleithei lo a ni ber. Ni e.... ka nundan hre leh ta țhin apiang chuan an rin ang ka nih loh zia an sawi fo țhin reng a ni, pawnlamah a sawi ang khan ka lang a ni thei mahse ka lo nih loh zia a fiah ta chiah bawk a mak a ti reng bawk a nih hi. Han thup buai leh vela han zah kual ki kawi ka tum lemlo mahse chumi karah chuan an hriat tak avanga over taka chêt zawm kher ka tum hranpa chuang lo bawk.
"Mahse engtin nge Dr. Zorema nen hian in inkawp daih daih theih a? Nizana thil thleng kha a hre ve vek âwm tho sia...." a tawp lam chu sawi hreh tih hriat zet hian a sawi muang ang reng hle "nia i hmuh ang hi a ni mai" ka ti ringawt a a hriatthiam loh hmel em em mai lehnghal. A hrethiam lo reng bawk ang han sawifiah vak ngaihna ka hriat loh mai bakah a hnenah hian eng mah hrilh ka tum buai hranlo.
A ni pawn engmah min zawh chhunzawm tawh lem chuang lo a mahse hriat a chak tih erawh ka hre thung, ka mi rin ngam ngat an nih loh chuan engmah hrilh ka tum ve lo thung a a chhan pawh hriat miah loh a a chhuah leh țhin vang a ni, a chhuah dan lah a dik tawh ngai hek lo țul lo tawp a mualpho ka duh bawk hek lo mualpho sa tawh mah ila.
Lunch ei lai chuan Laldinpuia'n min rawn call a midang chu thawhsan in pawn lamah ka chhuak a "sawi rawh!" Call ka lak rual chuan ka ti nghal tâwng bawk.
"In hmu ila i hman em?" A rawn ti a, ka sana bun chu ka bih zeuh a.
"Hman e... darkar 1 vel chu ka hman" pangngai zet hian ka lo ti ve mai bawk "ok, red pepper-ah lo kal la ka lo nghak ang che ka thleng a ni deuh tawh mai" a rawn ti a Zarkawt-ah ka awm tho a ka hlat vak lem lo tho bawk a a buaithlak vak lemlo ang.
"Ka rawn kal ang" ka ti a, call chu ti tawp in bus stand lam ka pan phei a Chanmari-ah chhuk in ka let phei leh a Red pepper-ah chuan ka lut chho nghal bawk. Laldinpuia chuan min lo nghak reng tawh a a țhutna lam chu pan pheiin a hma a țhutna awm ah chuan ka va țhu ve nghal a.
"Ka reilo viau chuan ka hria" ka ti zui nghal a bu nghatin a nui suk ringawt.
"Eitur i duh em i duh sawi la vawiin chu aman ka lo pe ang" a rawn ti a "eitur chu ka ei deuh tawh tho a intur lam ti zawk ang i chah chah kha ka lo in ve mai ang" ka ti a, a duh chu chah in ka in tur pawh a chah tel ve nghal a.
"Darkar 1 chiah ka nei a i sawi duh chu sawi vat la" ka ti a.
"Inhmuh loh karin ilo in thlak danglam nasa tawh hle mai"
"Ka in thlak danglam pawh ka lo hre vak hleinem min hmu mak mai mai a nih kha ka la ngai reng alawm hei en la ka hmel pawh ka siam danglam êm loh hi" a mood off hmel lutuk on tum chuan kan ti a, a rawn nui chhuak hawk! Hepa thlem leh a mood on sak hi chu a harsa lemlo ka tih tawh kha.
"Mahse... a țha zawk tiang khan a țha zawk tiang khan nung reng rawh. Englo ania hmanni a thil thleng avang khan ngaihdam dil che ka duh a ka thiltih avang khan ka chungah dan i lek kawh thei reng a mahse i ti lo a min haw lo in pangngai takin min la be thei a..." a rawn ti a, intur a rawn thlen avangin a sawi zawm tawh lem lo.
"Ka haw reng che alawm mahse midang hmuh leh hriat ah ka tilang lo mai chauh a nih kha" ka ti a, a rawn thaw hawk a a sam chu a tuai chho deuh puat a "oh! A nih chu... mahse ka chungah engmah itih loh avangin ka lawm hrim hrim" a rawn ti a, a hmel chu hmuh a nuamlo takzet, hetiang hian țhian dun awm lo ila ka duh hle bawk.
"I sawi tur chu chiang deuhin sawi vat la" ka ti hlak a, dawhkanah a kut pahnih chu dahin a suihzawm a, a hmelah chuan a in thiam loh zia leh hreawm a tih zia ka hmu thei, nidang zawng aiin a hmel a nguai bawk a hmuh hreawm tak a ni ringawt.
"Ka thiltih kha a diklo tih ka hria ngaihdam tlak pawh ka ni lo tih ka hre bawk, i țhian ni tlak pawh ka ni tawh lo. Mahse khami hnu khan hreawm ka ti a ka inthiam lo bawk a, min biak duh loh phei kha chuan hreawm ka tih a nasa zual sauh bawk. Ngaihdam dil tur che a rawn biak che ka tum țhin mahse ka ngam thlawt lo ka thiltih kha ka hrechiang a min ngaidam duh dawnlo ang tih ka ring bawk, mahse ka zep lo ang ka țhian țha tak ini mahse i lakah feelings ka nei tlat si a tir kha chuan hreawm tiin ka zak a nangmah ka lo duh ve ngawt che kha ka inten a mahse ka hmu zing tual tual che a ka duhna che pawh a pung tial tial, in thunun harsa ka ti a chuvang ania khatianga ka chêt tak ni. Mahse ka dik loh zia ka hrechiang tulh tulh a nangin țhian țha ber angin min ngai a mahse keiin ka duhna che ka thunun theih loh avangin i chungah khatiang kha ka tih phah a min ngaidam duh dawn kherlo mah la i bula ka sawi duh chu ka sawi ta tho a a zia e..." a rawn ti ta duah a, a thusawi kha ngun takin ka ngaithla kar a a vaiin ka chhinchhiah vek.
Ka țhian a ni, a thiltih ah khan a thiam ka ti biklo chutiang bawkin kei pawh ka thiamlo ka nundan in a zirlo a ka țhiante pawh ni mahse game khelhna ah pawh 'anni chu ka țhian te an ni a thildang min tihtir zawk rawh u' tih a hnêkin ka chapo leh tlawm duh loh luat ah khatiang khan ka che chhuak a kei pawh ka dik biklo a thiltih kha dik biklo mahse amah ngawr ngawr dem tur hian insawi thiam lehna tur engmah ka nei bik hauh lo.
"Eng emaw tak sawi ve la" a rawn ti leh a, a hmel chu hmuh a hrehawm ngawih ngawih, hetiang em em a he mihring inthiamlo hmel hi ka la hmu ngailo chuan mi bulah pawh ngaihdam a dil khat, chutiang chiahin khawngaih pawh. A sual ve pang pang ania mahse ka hnenah hian khawngaih tih leh ngaihdam dilna țawngkam erawh a hmang ve ta a nih hi.
"Vawiin chu i tlak ve duah a ni maw.... ivan inhmeh lo ve" ka ti a, a rûm deuh nghut "fiamthu lo teh!" Ti hluk in a intur a an rawn dah chu ban in a lem nghal zat.
"I ngaihdam dilna kha ka pawm mahse ka haw tawh lo che tihna a ni lo, kei pawh ka dik biklo a nangmah ngawr ngawr dem thei che ka ni biklo in kianga ka awmdan a dik bik lo a khatiang khan awm lo ila chu tun hun hi a thleng miah lo ang a bul pui ber chu keimah ka ni. Mahse khang zawng zawng kha hun kal tawh ania siam țhat theih a ni tawh lo, nangpawh i thil tih kha a dik bik lo a chu eng pawi mah a thleng hman chuang lo a chuvang chuan theihnghilhin a hma ang khan awm leh tawh zawk ang u" ka ti a, amah chu hlim hmel ka hmuh bawk.
A hmel chu hmuh a nuamin a êng sâwt sâwt nghal a ni ber "i ti tak tak em? Min ngaidam tak tak maw?" Mak ti tih hriat zet hian a rawn ti deuh hluai a a awmdan hmuhnawm lutuk leh hlimawm lutuk avang chuan ka nui chhuak hak a uar zet hian ka bu nghat nghat a amah zawk pawh a rawn nui chhuak hawk mai.
A hlim hmel chu ka en reng a kei pawh chu ka nui leh țhin. Hetiang hi a hma ațang daih tawh a thil thleng tawh tur a ni, ka induhtawk ve na avangin ka țhianțha tak ka chân țêp a keimah ka dik bik angin ka inngai tlat bawk a. Thil pawi thleng hman se zawng ka ngaidam theiin ka ring lo mahse eng pawi mah a thleng lo a lawm hle tur zawk ka ni huatna nun pai reng lo in, a ni hi ka unaupa anga ka en rualin ka țhianțha tak a ni, ka tan chuan ka chhungkua a ni a amah chân hi ka duh lo bawk.
Dawr lamah ka let phei leh a midang lunch ei te nen kan lut rual leh ta tho bawk. Apron ka hak mawlh mawlh lai chuan ka phone a rawn ri a tunge a nih tih pawh en lem lo chuan ka pick a loudspeaker-ah chuan dah in "Hello!" Ka ti nghal sep.
"Bawihi" Dr. Zorema aw ka hriat rual chuan phone chu rang zet hian ka ban leh amah alo ni reng chu niin loudspeaker chu off-in ka bengah chuan ka nghat a "aw.... in zai zo tawh ami?" Ka ti nghal sep.
"Kan zo chiah, i message ka hmu ve chiah bawk a ka rawn be nghal che" a rawn ti sup a midang chu eng emaw ti turin a hrilh nghal zat a. "Um.. pawilo, in zai hlawhtling em?" Ka ti leh.
"Pakhat kha chu kan paih sak a a hnu lehlam chu Pathian thu thu a ni tawh... amah pawh a țha rih lutuk e a lung lam kha alo nasa tawh deuh a chu chuan a ti buaithlak leh zo vek a nih hi" a rawn ti a, ka thaw deuh ham ham a a hma khan enkawl duh se chuan tun hun ang em em hi chu a thleng miah lo ang.
"Um.. tlaiah ka lo kal ve ang hna banah"
"Ok....thil i ei tawh em?" A rawn ti lehnghal zat a, a buai nge ni midang chu a be leh zeuh a biak pawh kan inbe țha mumal theilo "ei tawh e... ila eilo tiraw?" Ka ti a, min chhang mai lo lehnghal.
"Aw... kha kha lo bawhzui rawh u, dude.. min lo nghak rawh ka rawn zui ve ang che. Chuan Bawihi ka rawn be leh ang che lehkha buaipui tur a awm a" a rawn ti leh zung zung, a buai hmel lutuk chu a khawngaihthlak zawk.
"Um... kei pawh hna ka thawk leh dawn chiah a ka dah ania thil ei vat rawh aw" ka ti a, ka țawng a hre thei tawh lo nge ni a reh vung vung a phone chu ka off ta tawp.
Kei pawh chu hna ka thawk ve lehnghala tlaiah chuan Damdawiin lamah ka tlang phei nghal bawk a hmundanga kal lem lo in Mama te cabin awmna lam chu ka pan chho nghala a.
Cabin chhungah chuan ka lut a nu Dingpuii pawh alo harh tawh a a bulah Bawihtei chiah alo awm bawk "E.. hmingthan lo kal rawh..țhutna âwl ah khan lo țhu ve tawp rawh" nu Dingpuii chuan zai tih pawh hriat em em loh hian harhvang takin min hmuh rual chuan a lo ti nghal var a.
"Um... nangmah tunah khan i țha hrim hrim em? Na i nei em?" Ka ti a, a khum bulah chuan ka va țhu ve nghal thawr a "nei em em hranlo e.. a nachang te i va hre zawk ve.. Mama'n a rawn tir lui leh tawh che em ni?" A rawn ti a, nuih pahin ka lu ka thing a.
"Tir lui lo nasa lutuk chanchin ka hria a ka lo kal a nih hi" ka ti a Bawihtei lah chuan "nu.. a ti mai mai a nih kha niminah pawh kan inah alo kal daih tawh, bakah maw... Dr. Zorema nen hian an inngaizawng alawm" alo ti thawt thawt a nu Dingpuii chuan zawhna mitmeng hian min rawn en a, ka lo bu nghat.
"Avan lawmawm ve... Dr. Zorema chu a lawm âwm mang e aw.. a duat loh che chuan min lo hrilh dawn nia" a rawn ti a ka lo ner nâng a Bawihtei erawh tifuh in ti zet hian alo nui hak hak bawk.
"Hmingthan... i țhianpa chu a heti mai hi a ni ta si a nangni pawn țhu țha hrilhin lo fuih ngun ula nangni thusawi chu a âwih duh mahna" nu Dingpuii chuan a rawn ti a, amah chu a thaw deuh ham ham a, thu țha hrilh leh fuihna ang kan thiam loh zia mai chuh ka ti dawn amaw ni.
"Mahse hei a ni pawn a mawhphurhna a hria a keini ai daih te chuan a puitling daih alawm pa a ni tawh dawn lehnghala kan tan pawh hun a nei tawh mang lo" ka ti a, thildang dang a sawi tel leh bawk. Diktak chuan mi han fuih vel hi ka thiam ve vak lo leh fuihna chang ka hrelo bawk, an duhthu ania an mahni tal tal in tal rawh se ka ti mai țhin thil han hrilh duah ka thiam lo a han fuih em em ka tum lemlo thung.
Doctor-a Office ka pan chho a, a kawngkhar chu ka kik dat dat a amah ngeiin lut turin min ti a kawngkhar chu hawng in ka lut a a chhungah chuan a țhianpa Tc-a a tih leh mipa pakhat leh hmeichhe pakhat nurse hi an lo awm a dawhkanah chuan lehkha hi alo awm hnawk nuai a an lo buai hmel em em bawk. Oh! Chuan ka sawi tel hram duh Nurse-nu sawn Doctor-a a ngheng chial chial mai.
Tc-a chu a rawn hawi zeuh a, a nui a a țhianpa chu a ko zeuh a Doctor-a a rawn hawi chhuah a min hmuh rual chuan a rawn ding chhuak nghal zawk a Nurse-nu khan alo ngheng na deuh nge ni Doctor-a a tho chiah chu a tlu țep mai nia mawle ka nuih sak "engtik khan nge ilo thlen a?" Ka hma a a rawn din rual chuan a rawn ti a.
"A rei ve tawh, nu Dingpuii ka tlawh kawi hmasa a in buai hmel si ka lo va kal zawk ang" ka ti a, a rûm deuh nghut a "kal lo ang, lo awm rawh ka haw hman țep ka thlah haw ang che" a rawn ti a mahni a haw ka peih vak loh êm avang chuan ka bu ve nghat.
A bulah chuan min țhut tir ve a ka taksa si chêtin a țhu a Nurse-nu chuan min thîk hmel zet hian min melh a min melh rum leh hram țhin, ava han hman ngawih ngawih tak! Nichin khan ani khan min hmu reng, ka thîk turin a awm kual vel a kan thîk loh nasat nen thîk en ah pawh ka en lo, a hmel kha a sorry ve tho alawm.
"A.B-a ka nia heihi min lo ken sak lawk" mipa pakhat ngo ving veng mai mahse Doctor-a ang tho a sa țha ve nelh nawlh chuan a rawn ti a lehkha chu ka ban ve mai "Abraham!" Doctor-a chuan a rawn ti nghut a chupa lah chuan ala nuih mai lehnghal.
"Dude... i bulah ka awm ve reng hi min au vak zel suh" fiamthu zet hian a rawn ti hluk a Doctor-a lah chuan a ngaihsak tawh der lo nichina pa in a a lehkha min pek chu ka en a hming alo intlar țhap a ka hriatthiam ve loh avangin an mahni chu ka en ringawt a Nurse-nu nen chuan kan inmelh leh zeuh țhin.
"Zorema bialnu maw inih a?" Nurse-nu chuan nêlawm loh zet hian a rawn ti a a enge maw mi huat ve ngawt le, ka pen vir nawk dawn amaw ni hetiang mihring hi lawm ka huat em em chu, hmel sorry-i nen danglamna pakhat mah an neilo unau an ni zawk hial lo maw.
"Ni e... i hre reng sia ngatinge min zawh kher a?" Ka ti ve leh kher, Doctor-a te țhian pathum chu an lo nui suk, chunu lah chuan an melh rum nasa mai mai khawp ah! "Ka fiah duh mai ania" a rawn ti ve leh mai.
"Eng hna nge i thawh a?" Lehkha en mawlh mawlh pah chuan a rawn ti leh a "Tluangte" Doctor-a chuan a ti deuh hrâwih a ka va han tlawm âwm mai mai bik lo tak! Hetiang khawp a min tham lo tu chu enge maw ka ngawihsan bik ang ni ka mizia pawh a ni lo.
"Dawr-ah ka thawk a i hriatthiam dan tur chuan thingpui dawrah mahse chutiangin mi ram angin tray kan chawi kual ve vak vak lo a" ka ti a, mi han melh rum nasa zia chuh! I hmel kha a sorry emai ka tih khum dawn amaw ni.
An zawh meuh chuan a țhiante pahnih te nen chuan kan chhuak a min bia a thil min zawt reng bawk a a rul tawk bak lek lek in ka chhang lo, ka mizia an ngaina lo a nih pawn han tih vak ngaihna ka hrelo reng bawk a pawi tihna ka nei lem lo mi han nel vak hi ka duh lo bawk.
"I țhiante khan min van hre em em" kan in lam kan pan tawh, kan in lam a ka awm anga ala ngaih miau avangin ka hnial buai duh lo a a tlanchhuah hunah ka let leh mai ang ka ti ringawt bawk "an beng kham hluiin i chanchin ka sawi țhin e an ti țhin a tiang chuan i ngaihruat thiam tawh mai em?" A rawn ti a, ka ner deuh nâng a a ni erawh a nui suk thung.
"Țhian engzat nge i neih a?" Ka ti leh.
"Pathum, ti ila ka kawm ber ber te an nih kha Aijalon, Tc-a, Abraham-a. High School ațanga inkawm chho kan nia tun thlengin kan la inkawm a an ngeiawm hranpa ve hrim hrim ngaia neih erawh a har ang" a rawn ti a ka nui a.
"Ngeiawm te chu ka hnehsawh ve zawng alawm" ka ti a, a ni pawh a nui deuh suk bawk.
Kan inkawtah motor a ti ding a lut turin min ti lui țalh mahse kei pawn haw turin ka tilui a ka nawr nasat êm avang chuan a haw ve mai bawk a kei pawh chu ka pawisa neih ang ang in Taxi in Hotel lam ka pan leh ta tawp bawk. Ka bike ka hmang lo chu ka rin ai pawisa a hek in inkhawl ka harsat daih a, thil hi a na mai mai dawnlo khawp mai.
A tukah chuan dawr hawn ni a nih loh avangin hna ka kal lo a Doctor-a pawh zanah chauh duty a neih dawn avangin chhun lam chu a âwl dawn thung. Mahse hna khawih tur a neih nual avangin keimah zawkin an in lamah ka pan dawn a chu pawh ama rawn sawi vang bawk mawle, kan in a hnathawh a rawn tum zawk za mah a ka awm tawh loh miau avangin amah ka pan zawk a ngaih phah. Inrinni ah erawh kan chhuak dun ve dawn thung.
An in ka thlen chuan midang tumah an lo awm lo a hnathawk pakhat hian chhuat alo nawt a Doctor-a chu a room-a a awm thu leh kal nghal mai turin min hrilh a midang an awm lo nge ni a reh țhiap bawk.
A room-a ka luh chuan laptop nen alo in bih ngur a nizan khan a țhianpa A.B-a hna lamah a puih ve zawk thu min hrilh a chu chu a buaipui a ni maithei. A bulah chuan ka țhu ve reng a hna khawih reng chung siin min ngaihsak reng tho bawk a kei lah chuan ka en pui a kan pahnihin kan khawih kawp a ni mah zawk ang chu ka pa avangin hna țhenkhat hi chu ka thiam ve fû, a thawk lawr nasa ve êm a ni.
Ka mut a chhuah êm avangin khum a mu turin min ti a ka hnial peih lo, khumah ka mu a a ni lah chuan ka bulah țhu in hna a khawih leh thung.
Mo kawr mawi zet amah nena inhmeh zet ha leh a bula mipa ding chu ka en reng, ka mit sulh thei. Ka âwm chu ka dawm a a bula hmeichhe ding kawngah chuan vuan in a nuih a a hmuiah chuan a fawp bawk ka maimichhing nghal sawk a ka mittui a rawn hnâm sawk thei.
Ka nunhlui te hria in min kalsan a nupui a nei zui nghal bawk a a tir khan ka sawi lawk vek tawh a hria a nih chuan min kalsan ngei ngei ang ka tih kha, a chhan pawh thil inthup a hriat aiin a hriat loh a tam zawk. Engkim a vaiin ka hrilh vek a min ring dawn amaw ka ti a mahse min ten zawk, min kalsan a ka rin lawk a nih avangin nat loh ka tum a mahse ka na lutuk takzet a ni.
Tunah a nupui nei lai ka hmu leh bawk a, hetiang hi chu a rapthlak mah mah a ni engtin nge ka nun ang... Hmangaihna hi ka hua, hmangaihna hi ka hua ka hlauh berah ka tlu lut a mahse ka tal chhuak thei si lo.
Ka mit ka meng a Doctor-a nen chuan kan in melh siah ngeiawm zeta a nuih rual chuan ka meng chhuak deuh kâwk! Ka thaw chhuak hak a ka awmna chu ka enkual nghal ruai a ka thaw rang dep dep mai Doctor-a room a ni tih ka hria rang zet hian ka tho chhuak a min hnungchhawn zawnga lo ding Doctor-a ka hmuh rual chuan ka huatna a zual sauh.
Rang zeta che in a nâkah chuan ka han sik pawp, rang zet hian a rawn hawi let a "enge a?" A rawn ti nghal nghut, chhan awm lova ka sih avang chuan a thinrim ve amaw ni, zawk za mah chuan a....!.
"Min hua in ka hmuh lai ngeiin nupui i nei a nih kha" ka ti tuarh, ka thinrim lutuk hi sawi ngaihna ka hrelo.
"Bawihi" a rawn ti a, a rawn nui chhuak hawk hawk, ala nui ngam nia mawle.
"Enge?" Ka ti țeu hlar.
"Midang thîk nachang kan hre ve țan tawh dawn a ni maw...." a la rawn ti, ala nui leh hawk hawk nia. Engtin nge he mihring hi engmah thleng lo ang maia ala nuih ngam zawk a????.....
- rps20201025_215120.jpg (44.09 KiB) Viewed 4975 times