TOXIC_LIPS Chapter - 18 By : Msi (Hmeichhe Naupang Tereuhte)

Episode kal lai dah luhna

Moderator: writers

Msi Miluhlulnui
Posts: 274
Joined: October 18th, 2019, 7:46 pm

TOXIC_LIPS Chapter - 18 By : Msi (Hmeichhe Naupang Tereuhte)

Unread post by Msi Miluhlulnui » November 7th, 2020, 6:40 pm

TOXIC_LIPS #CHAPTER -18

By : Msi (Hmeichhe Naupang Tereuhte)



"Kal ila ngatinge i din reng! Midang pawn min en țhup hi" Norish chuan ka beng bulah a rawn ti sa sa, pên sawn ka tum a mahse ka ke hi charh beh ang maiin a nghet a pên chhuah mai ka harsat takzet. Doctor-a min enna mitmeng chu ka chhiar thiam lo a min hmu chu mak ti hmel pawh a pu lo chhete pawn a danglam bawk hek lo.



"Norish.... ka awm a nuam chiah lo deuh let leh ka duh zawk" tiin Norish-a bulah chuan ka sawi a, ka awmdan laklawh lutuk thup tum chuan midang lakah chuan nui hmel ka hmuh hram hram a Norish lah chuan hnar tûm dat in min en a "helai i rawn thleng tawh a let leh te zawng i inti mualpho mai mai i hming chhiat loh nan reilotê tal awm la i haw dawn nia i ai ka lo awh tawh mai ang" a rawn ti a, a kut chu ka hmer zui leh vak!.



Doctor-a lam ka hawi phei leh a mahse ka lam pawh a rawn hawi tawh lo, a hmaa a din dan ang bawk khan min hnungchhawn zawng chuan a ding leh a rilru tih fîm tum in maimichhing chungin kan thaw chhuak leh deuh ham ham a ka awmdan mak an ti tih hriat zet a phun mer mer ri te chu ka bengah hian a ri chiang hle bawk.



"Kal ang" Norish chuan a rawn ti leh a ka bu vei ve nghat, min kal phei pui a min hruaina hmun hmun ah chuan ka kal ve tawp zel bawk a, helai hmun ka thlen khan William bia a kal hmasak ber tum kha ka ni a mahse ka rin loh lutuk tak maiin Doctor-a alo awm a engmah ka ti leh ta lo.



Mi pawimawh hrang hrang te chu nui lui sângin ka be ve zela an mahni lah in min rawn pan tawk lah bang lo, Camera hma a nuih luih hi helaia ka awm hnu a harsa ka tih ber a ni țhin a mahse zanin hian harsa ka ti lehzual. Midang kan biak chhung zawngin ka hnungzâng chho hi a za mer mer țhin a Doctor-a lam ka mit sir leh zeuh țhin mahse a ni erawh chu min hnungchhawn zawng bawkin a ding leh tho zela ka confidence zawng zawng ka hloh zo vek tawh.



"Wow! You look Gorgeous!" Anita chuan an bul kan thlen rual chuan kut phar chung meuh a ka thawmhnaw hak en in a rawn ti hliai a, ka lo nuih sak ringawt thung ka awm nuam lo ru lutuk avang hian mi min biakna pawh hi chhan let en ah ka en thei tawh thlawt lo! "Chhang let ve la i hmel hmuh a nuamlo si" Norish chuan a rawn ti leh zeuh he mihring hi chu aw... ka pen vir nawk dawn amaw ni.



"A ninawm ka peih lo, min hau reng suh" din țhat pah chuan ka ti hlak a, ka chhan letna pawh hre chang tawh lek lo chuan Anita rawn biakna chu a chhang lehnghal daih a, kei erawh chuan ka mit ka lenkual ru nghal ruai thung, a hmaa Doctor-a te dinna ep chiah ah kan ding a mahse tunah hian a dinna ah a awm miah lo a hmundang ka hawikual pawn ka hmu miah lo bawk.



Light țhenkhat chu an off_a, lamna hmun tur ah chuan lam tur țhenkhat chu an phei sap sap hlawm bawk a Norish pawh Anita nen an kal tur thu min hrilh in an in kai phei ve nghal a, an phei lai chu en in ka ner zeuh "bialnu ka nei leh lo ti law law la țha ni mai tur mipa ve si dawt sawi peih zîp zêp lutuk mai" ka ti zui hlak a, in tur an rawn chawi phei chu ban zeuh in a kil thim lai deuh ah chuan ka tawlh phei a music cool zet a rawn ri chhunzawm nghal zat bawk.



Suresh lah chuan ka awmna chu lo hre leh pek in lam pui ah min rawn sawm chhen a mahse ka peih loh thu in ka chhang zela lungawi lo ru zet chungin midang kaiin a phei ve ta hnu hnu bawk. Ka intur ken chu ka lem leh zeuh a William-a dinna bul vel chu ka en phei leh țhin a mahse Doctor-a ala awm chuang lo.



Lam ho chu ka hmuh chian theih chin chu a mal te te in ka enkual leh mahse ka la hmu chuang lo, a haw tawh amaw ni le ka ti rilru nghal neuh neuh a. Mahse engvanga zanin a helai hmun a rawn kal ve nge a nih ang, hmuh ka lo in beisei hauh lo, Mizoram lamah a awm lo tihna em ni ang nge ni a helai hmunah hna thilah alo chhuk zawk, mahse tunah hmuh turin a awm leh tawh si lo ka hmu sual zawk em ni ang.



Chet hlak in ka lu chu ka kut in ka tuk zeuh "min zawng em ni Mrs. Aria!" Ka hnung mai a aw ri ka hriat avang chuan ka kut che lai ka tawp nghal chawt! Namên lo in ka thinphu a rang nghal a ka kut chu muangchanga la thla riai riai in ka clutch ken chu nghet zet hian ka hmer zui a.



Muangchanga hawi let tum a ka chêt rual chuan kut phah lum zet hian ka bek ah rawn dawm in hmalam min en tir leh chumi rual chuan ka darah khabe nghat in hnunglam ațang chuan min rawn kuah a! Ka thin pawh a hma aia rang leh ring in a phu a chêt mai nachang ka hre tawh lo, a perfume hman Giordani Gold rim chu ka hîp lut ta ngawt pek a!.



"Min hmu thut chuan a țhawng viau che a ni ang maw i nui hmel mawi tak kha a reh nghal riai riai tlat!" Huat a lak theih miah si loh mahse ka tan kher a huatawm ru lutuk tak mai hian ka beng bulah chuan a rawn ti leh sup, kan awmdan chu midangin min hmu thei em tih ka enkual zui nghal a mahse tuman min ngaihsak hauh lo, ka thaw deuh ham ham a ka beng bulah bawk chuan a rawn nui leh a.



"Hlauthawng suh... tuman min hmu lo ang light on nan pawh minute 15 nghah ala ngai" ka rilru hre thei ni âwm fahran hian a rawn ti leh sup, min kuah nghet lem lo mahse a mi uap a na lutuk ringawt. Kum 6 hnu a ka vawikhat hmuh lehna leh a aw ka hriat leh vawikhatna a ni a, ala danglam lo a mahse a hma zawng ai pawhin min en zawng ringawt pawn keimah ah nghawng a nei nasa tawh zawk.



"Min kalsan rawh, ka hlatah awm rawh" ka awmdan thunun tum zet chuan ka ti a mahse ka aw chu a tawp lam a khur ru tho! "oh! Chu zawng ka sawi tur zawk niin ka hria i thusawi kha i taksa, i mitmeng leh thinlung chen in an pawm ve lo tih a hrechiang tu ber kan ni ang" ngeiawm zet hian a rawn ti leh a, ka taksa a țang nghal awt a! Ka khur ru dar dar bawk.



"I hresual a nih chu!" Ka ti leh a, mahse a sawi kha a dik vek si. Chimawm zet hian a rawn nui ri suk a "um... a hma ang chiah khan ka lo hresual leh pek a nih dawn chu!" A rawn ti ve leh , a aw pek dan han ngeiawm zia mai chuh! A sawi zawh rual deuh thaw chuan min kuahna ațang chuan amah zawk a awm hrang a ka lo rinchhan hman viau aniang ka âwn deuh nghal riai riai a mahse ka bula ban awm chu ka vuan vat thung! Boruak hîp lut ve thei ta chiah ang mai hian boruak chu hîp lut in na zet hian ka thaw chhuak nghal bawk a reilote chhung mah nise min ti danglam hneh lutuk tlat a ni.



Engmah thleng lo ang mai a ka bula rawn dingin a kekawr hak iptê ah chuan a kut a zen lut a amah a palian bawk a min hliah hneh lutuk takzet. Muangchanga ding țha in amah chu ka en chho vang vang a a ni erawh chuan hmalam alo melh ngur a taksa lian zet pawh chu a che eih lo bawk.



"Hetah eng ti turin nge i lo kal a?" Pangngai zawk a tiin hmalam chu ka melh phei ve a mahse milim ang mai a ding in min chhang miah lo, țawng ka tum leh chiah "hna thilah meeting turin ka rawn chhuk" a rawn ti deuh hmuk a ka bu ta nghat.



"A nih chu... engtikah nge i chhoh leh ang?" Kan ti leh ringawt bawk a.



"Naktukah meeting kan nei anga a tuk leh ah ka chho lehnghal ang" a rawn ti pangngai ve leh mai a "umm..." tih ringawtin ka lo chhang thung. A bak sawi tur ka hre leh tawh lo, a ni pawn engmah min zawh chhunzawm tawh lem chuang lo a kei pawh chu ngawi rengin ka ding ve reng a a changin amah chu ka en leh zeuh țhin a mahse hmalam a lo melh tlat țhin avangin ka hawisawn leh nge nge țhin.



"I hlim em?" A ngawih vang vang hnu chuan a rawn ti thûm leh sup, Music ring takin in play mahse kan pahnih inkar chu a rukin a uap churh a kan awmna lai bikah hian boruak a tlem riau in ka hre thar bawk. "Ngatinge chungte chu min zawh a?" Ka ti let a, dawhthei lo zet a a thaw chhuak hawk chu Music karah pawh ka tan chuan ring tak a ni.



"Zawhna ka zawt che a, kha kha min chhan dan tur a ni lo" a rawn ti nghut a "umm.. ka hlim" tih zawngin ka chhang a a ni pawn thawm a nei leh tawh lo. Mahse dawt ka sawi chiang viau a ni khang kum ruk chhung zawng khan amah hi ka mumangah ka hmu fo a. Hreawmna zawng zawng ka kalsan hnu pawh a hlim hle tur ka nih laiin ka hlimna kha a famkim thei tlat lo, a chhan erawh ka hrechiang ngang thung!.



"I hlim chuan a țha a nih chu!" A rawn ti deuh kher a, ka thaw chhuak deuh hak! "A nih nang i hlim em?" Ka ti let ve sep, a ngawi leh deuh vang vang a.



"Ka hlim in i hmu em ni?" A rawn ti a, amah chu ka en chho deuh zawk a min lo melh chhuk rûn avang chuan rang zet hian ka hawisawn lehnghal a second reilotê chauh mah nise ka thinphu a ti rang hman lutuk ringawt.



"Ka hrelo mahse i hlim hmel alawm"



A nui ri suk "ka hlim alawm kum tam tak hnu a thinlung taka ka vawikhat nuih leh theihna a ni ngei ang" a rawn ti a, a thusawi chuan min vaw khawng nghal awt thei! Kum tam tak hnuah......Pên sawn ri ka hria a a dinna lam ka hawi phei nghal vat a mahse midang kara a inzep phei chu ka hmu hman țâwk!.



Rang zet hian a kalna lamah chuan ka tlan phei nghal a midang karah chuan ka inzep phei ve nghal zat, ka ûm phâk țep tih ah chuan tu emaw hian ka ban rêk ah a rawn vuan chawt! Kal luih țalh ka tum a mahse keimah chu min pawt lêng lawp a Doctor-a chhuak lai chu ka hmu thâwi nghal fua.



Thinrim zeta min vuan tu ka en rual chuan Norish chuan ka awmdan chu mak tih hmel zet hian min lo en reng a ka kut chu ka chêt laih laih a "min thlah vat rawh!" Ka ti nghal hlak bawk.



"Khawnge mi â ang mai a kal i tum?" A rawn ti nawn leh, chhang lo chuan Doctor-a kal tawhna hnu chu ka en phei a mahse midang bak ka hmu tawh lo, tal chhuah tum in ka kut ka chêt leh mahse avan hmer nghet tak! "Norish... ka hmanhmawh min thlah vat la" mangang zet chuan ka ti leh, light a rawn êng nghal pup a a êng lutuk a ka mit a vai nghal ruai mai.



Norish chu William zawkin a rawn ko hlauh a chumi chu remchangah la in ka lo tal pît a hmanhmawh zetin Doctor-a kalna lamah chuan ka tlan phei a ka kawr hak hmawr lam chu ka chawi kang a, programme an țan tawh dawn tih ka hria mahse chu lam ka ngaihsak hman tawh lo, in pawn lamah chuan ka chhuak a, a thim deuh khup avangin engmah ka hmu hleithei lo.



Ka rin pen sawn ve tawp a thim zingah chuan ka theih ang ang in huan lam chu ka enkual a pangpar kung lian leh a hnah buk zet kar ațanga kawtzawl ațanga light rawn êng bak lo chu êng a awm lo, thaw hak in ka kawr chu ka theh thla hnawk a kal hma leh deuh in a thim laiah chuan mihring ruangâm ka zawng a mahse a âwm ang tur tak ngial pawh ka hmu lo.



Ka kalna tur pawh en lem hlei lo chuan hnunglam zawnga kal in hmundang chu ka melh kual leh a thawm a reh ngawih ngawih avang chuan ka ding deuh dat a, inchhung lam a luh tum a ka hawilet leh rual chiah chuan taksa lian zet ka su nghal dawt a! Ka pai khat tur chu ka kawngah rawn dawm in a lam hnaih ah min pawt phei hrâwk a! A taksa ka deh rual chuan tunge a nih ka hrechiang lutuk tlat!.



"I chet dan hi model lar tak tih atan chuan thil mawi a ni hauh lo" ka hmai zâwnah chuan a rawn ti leh kher a, tal chhuah ka tum a mahse min vawnna chu a ti nghet sauh "ni e.. a ni hauh lo ang i duh chuan min hua in min hmusit thei alawm ti ta che...." ka ti ve deuh hlak a, theihpatawpa na in a âwmah ka nem a mahse a che eih lo, ka tal nghek a mahse nghet zeta min kuah zawm in ka tukhumah a rawn dawm a a âwmah chuan min kuah bet.



Tal chhuah tum in ka che leh a mahse min kuah nghet lutuk a ka thâ pawh a zawi zo tawh "che tawh rih suh" a rawn ti sup a, ka chhip ah chuan khabe nghat in a taksa che awk khawpin a thaw chhuak a "ka rualin Mizoram-ah rawn let rawh!" A rawn ti lehnghal zat, a coat hâk hmawr ah chuan ka pawt nghek!.



"A teuh lo mai, ka rawn let tawh dawn lo khitah engmah tihtur ka nei ve tawh lo helai hmun hi nuam ka ti zawk" tiin chiang zet chuan ka sawi a, rûm nghutin ka ban bul ve ve ah chuan dawm in min nawr hla a a thim êm avangin a hmel ka hmu theilo "ka kutah vuanin min rinchhan la engkim ka paltlang pui vek ang che ka ti a ni lawm ni. Engtiang pawn i nun hmang mah la pawi tihna ka neilo tih pawh vawitam ka sawi, mahse ngatinge i kal?" A rawn ti hrâwih! A aw ri chhuak ah chuan na tuar hrep ang mai hi a ang, min sawi deuh nawk a ka che zui ve awk!.



"I hrethiam lo ang engmah kha..." ka ti zâwi sap.



"Engkim min hrilh a engkim ka hriatthiam theih tura sawi tur che in ka ti che a mahse engmah sawi lo in i kal a khang zawng zawng kha i tan chuan fiamthu ang lek em ni alo nih a?" A tawp lam chu a ri ve chang chang ni maiin ka hria a sawi zawi tawh lutuk.



"I hrethiam lo a nih kha.. khang hunlai kha chuan ka la naupang a ka la â em em bawk a bakah hlauhthawnna namen lo ka nei bawk, khang hlauhthawnna ka neih te kha nang chuan i hrethiam phak kher lo ang tuman an hrethiam lo ang. In chhungkua in zahawm em em a a chhunga cheng mimal te pawh tih mualpho cheu ka duh lo a nangpawh engkim huam in thil hrilh vek che mah ila thudik alo chhuah hunah chuan i dang thei dawn chuang lo khang hunlai a ka hlauhna zawng zawng te khan chhan an nei vek asin. Chuan... ka sawi tawh kha i thil hriat țhenkhat kha chu hmun thum a țhen a hmun khat chauh a ni, a phenah tam tak ala awm, engkim hrilh che ka tum a chumi tur chuan ka inbuatsaih ve mek bawk mahse hreawm tuar leh ka duh tawh lo a ka mit hmuh leh beng hriat ngei a ka thisen zawm pui te ngeiin min diriamna te kha hriat leh ka duh tawh loh avang chauh a kal bo ka ni" ka ti let ve a, ka ban a a vawnna chu a thlah a chumi rual deuh thaw chuan ka pai deuh khat bawk.



Rang zetin a banah chuan ka vuan leh a "mahse... tunah chuan ka thei tawh.. nilo ka ngam tawh bul țan pawh ka ngam tawh engkim huam in" ka ti a, mahse a kut ka vawnna chu min dah thlak sak a amah hmu theilo mah ila ka en chho ve ta rân "ngatinge?" Ka ti zui leh sap.



"A tlai tawh... ka haw chhoh hunah nupui ka nei dawn nang pawn i hlim thu i sawi kha... i duh thâl in i nun i hmang thei ang nawr luihna tello in" a rawn ti a, a tawp lam chu a nui deuh ti tih hial in ka hria a thusawi chuan min va țhawng si em! "tunge chunu i nupui tur chu?" Tih ruai pah a a kut vawn leh ka va tum chu amah zawk alo ding sawn a ka kut chu ka la let leh riai riai.



"Helama i chhuk hnu daih ami ania i hrelo ang ka hmuh rual che a hrilh nghal che ka tum nen a thil a kal diklo ta vek a nih hi" ngeiawm ru zet hian a rawn ti leh a, ka ding ngil țha a ka awmdan chu tih pangngai tum zet hian ka maimichhing a "a nih chu..." ka ti zui sep bawk.



"Imm... chhung lamah tihtur ka la nei sia ka luhsan phawt ang che" ka ti leh a, thaw hak a amah ka kalpel tur chu ka ban rêk ah chuan a rawn vuan a ka ding leh dat ka rilru chuan engmah sawi belh tawh suh ka lo ti nghal mawlh mawlh "eng emaw tal sawi i tum lo em ni?" A rawn ti a, nui ri ve kher in ka hawilet a ka sawi hmaih, ka mize țhenkhat ka la thlahthlam lo, a țul hunah ka hmang thiam viau ka tih kha.



"Ni dawn tak e... nupa hlim tak in nih ngei ka beisei ka lawmpui a che chuan nichina thil thleng kha chu i mumang ang lek in i ngai dawn nia theihnghilh chi tihna" ka ti a, ka kut chu la sawn in inchhung lam chu ka pan phei a kal phei pah chuan ka âwm zâwn chu ka dawm ngar ngar a ka hnungzang hi a za chho leh mer mer bawk.



Inchhung ka luh rual chuan an awm khawmna lam pan nghal mai lo in hmun kil lam bawk chu ka pan hmasa leh a, mi rehna lai deuh âwm ang turah chuan ding in ka âwm dawm chungin thâwk ka la vang vang a ka mittui a rawn hnâm sawk thei ka awmdan danglam thup tum a ka beihna lamah khan ka na zual sauh zawkin ka hria.



A thusawi kha hriat ka in beisei miah lo a chutih rual erawh chuan a kianga khatianga awm ngam tur pawh ka ni lo tih ka hre tel mahse ka awmdan phung ka hloh zo vek a khang kum tam tak a rawn sawi lan khan min kai harh ni berin ka hria mahse a hma ațang daih tawh a ka hlauh chu a thleng dawn ta ngei a amah dem thei pawh ka ni bawk hek lo.



Ka hming an rawn lam ri ka hriat avang chuan ka hmai hup in ka thaw chhuak ham ham a ka ding mar a ka awmdan chu ka siam rem nghal sawk sawk a. Thil thleng avang khan ka landan a danglam phah ang mahse khuh mawina hun ka nei tawh lo.



Kal chhuah ka tum a mahse kawngkhar a Doctor-a lo lut chu ka hmu a ka ding zui leh dat! 'Ka haw chhoh hunah nupui ka nei dawn..." a thusawi chu ka bengah hian a rawn ri nawn a a kal liam lai chu ka en zui ta reng. Han thîk kual vela engmah han sawi vel ngam tur ka ni lo ka ât man ka hmu a a ni pawn nupui țha tak a nei dawn a keiin a ka lo ngaihven ve chiam nachhan tur a awm tawh hek lo mahse khang hunlai khan ka tan a harsat tur zia vawikhat tal min ngaihtuah pui ve ang em? Hlauhna khan min chenchilh tlat a a rual pawh khan ke pên tak ngial pawh kha ka ngam lo.



Ngaihtuah zui duh lo in ka lu ka thing nghat a, ka awmdan chu thup hram hram in ka pen chhuak a ka chhuahna ațang chuan min lo en țhup a William chuan dawhsanah min lo nghak reng tawh, nui lui sangin ka pan chho ve a a mitmengah chuan zawhna hlir a khat bawk a mahse a zawhna chhanna erawh pek a ni lo thung ang.



Lecturn hmaah chuan ka va ding a min en țhup a phun mer mer ho pawh ka hmu chiang na ngang, Norish bula Doctor-a ding pawh ka hmu reng mahse ka melh ngam thlawt lo "ka in nghah rei tir avang cheu in min ngaidam dawn nia... call pawimawh tak ka dawn avangin pawn lamah ka chhuak lawk a a hma pawn ka sawi lan tawh kha tunah hian hna dang buaipui mek ka nei tih" ka ti a, Doctor-a lo ner zeuh chu ka hmuh hmaih lo mahse engah mah ngaih loh luih ka tum a mahsela avan harsa si em!.



"Sawi lan tawh ang in Mrs. Aria hian kan Agency tan contract min sign pui dawn a țha taka kan thawh ho theih ngei kan beisei bawk. Kan Agency alo hlawhtlin zel theih nan kan theihtawp kan chhuah țheuh dawn nia he lamah aw Mrs. Aria" William chuan a kut rawn phar chhuah pah chuan a rawn ti a nui sâng a a kut chu vuan in table mawi zet lam pan chuan min kai phei a.



"Hemi lehkha ah hian 30% share i channa tur lehkha chu a awm tel ve a i sign tel nghal dawn nia" kan din dun rual chuan ka beng bulah a rawn ti zeuh a lehkha chu ka en thla a "a copy mai mai ka sign dawn nge ni a a original ngat" nui lui sângin ka ti let ve a, rum zet hian min melh a.



"Kan pahnih inkar a nihna angin he thil hi ka pa safe ațanga a ruk thei ang bera ka lak chhuah a ni, tichuan a original tih i ring ngam tawh em? Ka chhungte hma a ennawm siam i duh loh chuan sign vat rawh" nuih tel deuh reuh pah hian sehchilh zet hian a rawn ti a ka nuih leh sak ringawt thung. Engtin mah he mihring hian a copy a siam ngam dawnlo tih ka hria, a copy a siam a nih ngat chuan man chhuah a nih nghal dawn vang a ni.



Lehkha ah chuan ka sign a a sawi ang takin 30% share ka neihna tur pawh alo awm thlap a lehkha pakhatah erawh a awm ve lo thung. Share ka channa ngei lehkha zawk chu keiman ka kawl a ti kha chuan ka tan engkim tih a awlsam tawh dawn bawk.



"Thank you Mrs. Aria, nang meuhin kan Agency min thawhpui duh hi kan lawm takzet a ni" William-a pa chuan ka lam a a kut rawn phar chhuah pah chuan a rawn ti a nui sângin ka lo vuan vat a "kei pawh nangni ka thawhpui thei tur cheu hi ka lawm takzet, țha taka kan thawh ho theih ngei ka beisei" ka ti let ve a.



A nupui pawh min in hmelhriat tir ve a thlahpawlh a ni tih zanin hian ka hre ve chiah bawk "William ka let san phawt ang che u naktukah meeting neih hma ka ngai si a" ka taksa si chêt a rawn ding mipa chuan a rawn ti thûm sup, ka taksa si chêt a a rawn din avang chuan a hmaa ka awmdan ang khan ka awm thei tawh lo.



"Ok.. mahse in lamah min rawn zui haw la ka duh asin mawle, pawi love naktuk lamah a ni mai eng emaw hmuh tir tur che ka nei nual ania" tiin William chuan a chhang let a ka bula mipa lian zet ding chu a nui ri suk, a nui ri chuan chhunglamah hian min fan rawih rawih thei.



"Ka rawn be dawn che nia, i pa te pawh ka mangțha tawh lo mai ang ka tlai dawn tlat" a kut lek kan zeuh pah chuan a ti leh a William nen chuan inkuah thuak in en pawh min en lo chuan a kalsawn zui nghal daih bawk. En zui ka duh mahse ka theilo, ka theihnghilh a ka hlat a ngai tih chhunglam hian min hrilh nawn awn awn ni maiin ka hria.



"Khapa nen khan engtin nge in in hriat a?" Doctor-a kal hnu fê ah chuan William-a bulah chuan ka ti a, ka thusawi chu man lo tih hriat ngawih ngawih hian a whiskey in tur chu a hmui ațangin a dah hla riai riai "tu khapa maw? Mrs. Aria, min hai chu a ni êm lo maw?" William chuan a rawn ti a, a whiskey ken chu a lem zeuh.



"Hai lah love, kha Doctor tun lawk a rawn be tu che kha mawle ka tih a ni nen khan engtin nge in in hriat a?" Ka ti a, ka thusawi a man ta chiah tih hriat zet hian a nui a "ni dawn tak e... a ni pawh kha Mizo ania Dr. Zorema chuvang chuan a ni maw min zawh. College kan kal ho țhin a chuan vawiin khan meeting nei turin a rawn chhuk a tinge.. amah nen khan in in hria em ni?" Chîk zeta min en pah chuan a rawn ti a ka lo nuih lui sak.



"Umm... hria e kan lo inbe tawh alawm nang nen in in hriat daih daih theih dan ka hre chak êm a" ka ti a, a bu nghut. Thil sawi tum ni âwm fahran a a rawn ân zuai rual chuan a nu chuan lo hrethiam rih tura min hrilh in leh William-a hnenah mi hmelhriat tir tur a neih thu a hrilh a mahse keimah zawkin ka kalsan zawk thung.



Norish lah ka hmu tawh lo, chutiang chiahin Anita pawh. He mihring lerh thak lutuk hi chu engtia tih chi nge maw ni tihian bialnu ka nei e êk e bal e te chu ala ti ve zui a a neih loh zia kan hriatchian nen ka hrechiang em em chung pawn a neih thu ala sawi hram ania bialnu te hi a kâ chiah hian a nei a a tak ah nei mang si lo.



Ka chauh chhuanlam in party zawh hma in kei ka haw a Car-ah lut nghalin driver pawh Resort lam pan turin ka hrilh nghal bawk. Seat chu nghengin ka maimichhing a Doctor-a hmel chiang zeta ka hmuh avang chuan ka țhu chhuak nghal deuh zawk a țullo lutuk in ka phone lah chu kan hmet êng ta ngawt pek a!



Motor seat-ah chuan phone chu theh thla in seat hnung chu ka ngheng a ka mit ko chu ka kut in ka hmet a "i țha em Miss?" Driver chuan a rawn ti a ka țhat thu hrilh in leh tlem a tlan muang deuh turin ka hrilh a Car kawngkhar chu ka ngheng a vawt ru viau mahse glass chu ka down tira thli a rawn thaw lut a harh vâwk ka duh mahse ka chhunglam hi a chau ru ngawih ngawih.



Hun kal tawh bawk ka ngaihtuah let a Doctor-a'n ka tan engkim a huam zia min hrilh lai te leh amah ring a a ruala ke pên a kan pahnih a engkim paltlang a duh zia a sawi lai te, engtiang pawn ka nun lo hmang tawh mah ila leh engpawh hre mahse min kalsan ngai loh tur thu a sawi lai te chu ka ngaihtuah let a, ka ban bul ve ve ah in dawm in ka hmer zui ta vak bawk.



Khami ni khan thil zawng zawng hrilh vek tur khan ka rilru ka siam a mahse khani kha ni țha ber a ka hriat loh avangin ka hrilh lo kha a ni a, ni e.. a dik alawm engkim kha hrilh ka duh a mahse a hnu a thil thleng avang khan ka rilru zawng zawng kha a inthlak leh hlawk thei. In ațanga ka haw hnu bawk khan hlauhna in ka khat leh a ka pa ngeiin khatia min tih hnuah khan beiseina engmah ka nei thei tawh lo.



Ka hlau a nun țawp taka let leh mai kha ka hlau a ka nat lutuk avang khan hna thawh tur ka zawn chhung zawng pawh khan let teuh chang pawh ka ngah. Mihring hian thil kan tih reng reng in beiseina tlemte tal pawh kan nei hram hram țhin mahse beisei tur pawh nei tawh lo beidawn ngawih ngawih, a tawp ngawih ngawih han thlen tawh hi chuan nun ram hi a chau ngawih ngawih a kei pawh chutiang chuan ka awm fo thih chak ngawih ngawih chang lah ka ngah, tun hnu pawh hian ala ni fo.



Helaia ka awm hian hlimna famkim neiin nilo, engkim theihngilh a hlim taka ka awm theih ka beisei a ka ring bawk a mahse ka hlimna a famkim thei tak tak lo, pawn lamah nui hmel ka hmuh a ni na mauh mai tam tak chuan mi hlim thei tak ka nih thu an sawi țhin mahse ka nilo, ka chhungril hi a khawhar ngawih ngawih a mal ngawih ngawih a in ngaih chang ka ngah a ka pa chauh ka enkawl lai, harsa taka ka enkawl lai khan mal ngawih ngawih a in ngaih lai ka nei ngailo mahse tun hnuah erawh he khawvel ram zau takah hian keimah chauh a awm ang maiin ka in ngai ziah țhin.



Khang hunlai khan ka la naupang em em a kum pawh ka tling âwrh chauh a ni a mahse ka tawrh zawh loh tur bak bak a natna tam ka dawng a keimah chauh a hmachhawn tur vek!. Engtin nge khatiang hreawmna nen khan hun ka lo hman theih, ni a ral a a ngai te bawkin ka nun bul ka țan leh a khawiah pawh kal ila hmeichhe sual, sual hlawm tih ka ni vek a ka chhungte ngei pawh tiam in. Khang tiang zawng zawng paltlang tur khan engtin nge chakna ka lo neih theih zawk tun hnu a ka ngaihtuah let hian a rapthlak ka ti thar leh țhin.



In duh chuan chapo tiin min sawi thei ang ni e.. ka chapo alawm thil thleng ah hian keimah in demna tur ka hre tlat lo a tin ni. Khang zawng zawng kha tuar in ka paltlang vek a harsa tak chungin tun hun hi ka thleng a engah mah hian indemna tur ka hrelo. Doctor-a chungchangah pawh a ni tho, engkim huam in hrilh vek ila nakinah a mal te te in ka thuruk te phawrh chhuah ala ni anga mihring kan nihna angin a ni pawh tawrh theih loh chin leh zahna chen a nei ve anga a kiangah pawisawi lo ang maiin hun lo hmang ve reng ta ang ila mi hnawksak bak ka ni chuang lo ang.



A kiangah khan hun lo hmang ta reng ila ka nun pawh a hma aiin a tawt zual sauh zawk anga Hmangaihna ka huat em em lakah ka tlu lut ve bawk ang. Tu pawn chhungkaw mualpho chu an duh bikin ka ringlo a bik takin chhungkaw zahawm tak tan phei chuan, Doctor-a te chhungkua ka ngaihtuah let chang apiangin hmeichhia chuan kan nun uluk kan lo ngaih zia ka hrechhuak thar leh țhin.



"Miss kan thleng tawh ania" tih ri ah ah chuan ka harh deuh zawk a, ka hawikual a a sawi ang tak tak in kan lo thleng tawh "tihpalh... kan thlenna a rei tawh em?" Tih pah chuan ka phone seat-a ka theh thlak tawp chu ka ban zawk a dar zat en tum a kan hmeh ên nâk chuan dar 11 alo ri dawn tawh.



"Ka inhûng fel ve deuh chiah" a rawn ti a, midangin kawngkhar min rawn hawn a ka chhuak nghal vat a thli a thaw nasa bawk a a vawt deuh vûk mai. "Englo... a tlai tawh bawk sia min hnial lo in hetah riak ve mai rawh aw room pakhat âwl a awm anga midang hian an lo buaipui vek ang che" ka ti sap.



"Mahse... miss.." inthlahrung zet hian a rawn ti a chet hlak in kawngkhar min rawn hawn tu pa chu ka en a "lo buaipui vek rawh aw chuan naktuk zingah i let mai dawn nia" ka ti a, ka kalsan zui nghal daih bawk.



In a ka luh rual chuan kawngka kalh in kitchen ah tui la turin ka phei a tui bottle pakhat chu keng in room lamah chuan ka lut phei a inthlak nghal sawk sawk in ka in tleuh thuak a t-shirt var lian set ha in a hnuaiah kekawr bul chhing zet a dum chu ka ha a khumah ka mu fel nghal thân bawk.



Message awm chu ka en kual a zanin a ka thla an lak țhenkhat te chu min rawn thawn hlawm a ka hmel kha hmuh a nuamlo viau a ka rin nen mahse danglamna tur engmah ka hmu lo a comment țhenkhat te pawh ka chhiar ve nual.



Zingah chuan hma zetah tho in huan chhungah chuan ka tlan kual a insâwizawi in pool sirah chuan thlan tla hluam in ka țhu a, puan pan zet a ka nghawng vel chu hru in tui vawt chu ka in a thli a rawn thaw nghal heuh heuh bawk.



"Miss... breakfast kan peih tawh a kan siam nghal dawn em?" Hemi resort enkawltu chuan a rawn ti a "aih... nakinah kan vaiin kan ei ho vek dawn nia ei nan chuan ala hma deuhin ka hria" ka sana bun en zeuh pah chuan ka ti a dar 8 pawh ala ri lo.



"Aw le... chuan pu Norish leh mipa pakhat an lo kal a huan lamah an nghak reng che a nangmah ko tur che in min ti bawk a" a rawn ti leh, ka nghawng ka hrukna puan chu ka la thla a "aw le, ka kal vat tur thu min lo hrilh sak mai aw" ka ti a, alo hrilh tur thu sawiin a kalsawn zui nghal bawk. Tun ang zing kar kar ah tu nen nge an lo kal ang a țhianpa bawk kha a rawn hruai lek pek aniang chu, chawlh ka hman lai hi chuan rawn kal vak lo se ka duh asin mawle.



Tho chhuak in tui bottle chu ka ban a in lam pan chuan ka chho nghal bawk, ka intifai thuak thuak a t-shirt body fit chu ha in denim jeans tight zet chu ka ha a chapal in thawlh leh tawp in huan lam chu ka pan a, huan a țhutthleng ah chuan Norish leh mipa pakhat hi an lo țhu a alo țhut pui pa chu hnunglam ațang chuan ding meuhin ka en a ka hriat hnu a ang ka ti ang reng hle bawk.



Ka pan phei a Norish-a tukhumah chuan beng zeuhin "enge zing kar kar ah...." ka sawi zawm tawh lo, a bula lo țhu mipa ka hmuh avang chuan ka kâ ka chîp leh riai riai a amah pawh chu ka en reng, a ni pawh chuan min en ve reng a min hmu thut chu hamhaih hmel a pu ve deuh bawk, hetah engtin nge alo kal theih zawk?.



"Zing kar kar ah kan lo leng mi hmuh tir tur che ka nei a, țhu teh!" Tih pah chuan min pawt țhu hnawk a tah chuan ka hawisawn ve ta chauh, kan Doctor-a leh Norish hi engtin nge an in hriat theih a?.



"Heihi Zorema ania ka țhianpa, khita țang hetah meeting nei turin an rawn chhuk a Doctor a nih hi. Mizo a ni sia i hmuh duh takin ka ti khi lam chanchin te i hriat duh takin ka tia ka rawn hruai" tih pah chuan Doctor-a chu min in hmelhriat tira kei erawh chuan Doctor-a chu ka en reng min rawn en ve rual chuan ka lo hawisawn vat a.



"Chuan..." Norish en pah chuan ka ti sep, kan boruak țang ru ut hre lem hlei lo chuan ala nui ang zui lehnghal.



"Chuan.. enge la ni vak ang, nizan khan hmelhriat tir che ka tum a mahse a lo haw daih a tunah ka rawn hruai a nih hi, i duh apiang chu i zawt thei ang" a rawn ti leh a nuih luih ka tum a mahse ka hrelo aikherh an tih ang mai hian ka awm in ka hria.



"Kan in hria alawm, nizan pawn kan inhmu tawh kan lo inbe tawh a" ka ti sep a, Doctor-a erawh chuan engmah a rawn sawi ve lo "a ni maw... engtin nge in lo in hriat daih daih theih a?" Norish chuan mak tih hmel zet hian a rawn ti a han chhan mai dan tur ka hrelo, sawi tur ka baih vai.



"Khi lamah kan inhmu fo alawm, a dam loh in ka enkawl tawh bawk a a sawi ang khan kan in hre tawh" Doctor-a chuan a rawn ti zawk hlauh a ni lo se chuan sawi tur ka hrelo ang. "A nih chu... he naupang hian engmah min hrilh bawk si lo a in lo inhriat tawh tho chuan a țha a nih chu! Hming... amah hi alawm ka țhianpa chaw ei a ka sawm kha mahse hna avangin i rawn tel thei lo a i hmu ve hman ta lo kha ania" Norish chuan a rawn tih zawm leh zat.



Amah chu ka en deuh hâw a "amah hi maw i țhianpa chaw ei a i sawm kha" ka ti a, a bu nghut. Vawikhat Norish hian a țhianpa chaw ei a a sawm tur thu min hrilh a mahse Mizo a ni tih leh Doctor-a a ni tih pawh min hrilh lo a, kei lah khan hna avangin ka țâwiâwm ve theilo a chuan chu a sawm mihring chu Dr. Zorema hi alo ni reng a khatih lai pawh khan inhmu thei reng dinhmunah kan lo ding reng tawh.



Norish leh Dr. Zorema chu Mizoram lam chanchin sawiin an ti ti a mahse kei erawh chuan engmah ka sawi belh tawh lo, nizan thil thleng avang khan Doctor-a hi ka hmu zak a amah pawh en ngam lo in hnuailam ka bih deuh ngar ngar, min biak ve pawn a rul tawk lek bak in ka chhang lo.



William-a te nen College khatah an lo kal chhuak ho a mahse kum tam tak chu an lo inbe pawp tawh lo tihte thlengin ka hre ve ta vek a. Norish hian an hnena ka sawi ziah Doctor-a tuna a bula țhu mipa hi a ni tih hre ta se engtin nge a tih ang amah avanga ka țah țhin te leh ka mumangah ka mu fo țhin tihte kha a hrilh ang em le.



Ka phone a rawn ri a ka en chuan Cora alo ni "kan chhang lawk ang e" tih pah chuan ka tho chhuak a huan sir lam deuh ah chuan kal in call chu ka chhang a "sawi rawh Cora" ka ti nghal sep bawk.



"Aw... nia Miss, englo ania Manager khan i chawlh thu a hria a a chhan min zawt sek a engtin nge ka chhan ang?" Mangan hmel zet hian a rawn ti a, chet hlak in ka chal chu ka dawm a avan hun lo tak! "Engtin nge a hriat a?" Ka ti nghal sap bawk.



"Ka hre biklo hrilh tu an lo awm a ni maithei, press mite pawn an hre hak vak tawh lo ang tunah pawh Office kawtah a awm reng a, min zawt chhen a chhan dan tur ka hrelo" mangang zet hian a rawn ti leh, a țap țep in ka hre lehnghal.



"Ngatinge Office-ah te chuan i va kal reng reng a?" Ka ti hlak.



"I document vel la turin ka kal a mahse ka thlen rual rual in min lo zawt nghal a tunah pawh office-ah ka in kalh khum mek... engtin nge ka chhan ang?"



"A țha e...hlauthawng lo la midang pawn an zawt che a nih chuan ti hian i chhang dawn nia, a chawl lo a Mizoram lamin Fashion week an hmanna tura an sawmna ah khan ka kal dawn avanga ka inbuatsaih mek thu i sawi dawn nia" ka ti ta ringawt.



"Mahse... kal i tum bawk si lo a" a rawn ti a, ka thaw chhuak hak "an zawh leh che chuan ka sawi ang chuan chhang la chuan kan kal mai aniang chu ka sawi chu i hrethiam tiraw?"



"Aw le... ka hrethiam e chuan khi lam kha chu i tel pui theih tur thu mail in ka lo thawn dawn nia chuan dar 2 velah nizana contract in sign kha document kimchang a rawn thleng dawn a chumi chu ka rawn pe dawn che nia" a rawn ti a, ka dah dawn chuan sawi buai lo turin ka hrilh leh hram bawk. A mangan hian a dang a âwk vek a a sawi tur zawng zawng a theihnghilh vek zel țhin.



Engtin nge Manager chuan chu thu chu a hriat daih daih theih? Chawlh ka la tih hi ka chhungte leh Cora leh Siami bakin an hrelo midang hrilh hre thei tur âwm ang rin ngaihna ka hre bawk hek lo. Oh! Ni tak e, kha Doctor khan midang hrilh a nei a ni ngei ang chutiang a nih loh chuan tumah hian an hriat nachhan tur a awm lo.



Ka nu number chu ka hmet chhuak a, ka call nghal a, a in ring fê hnuah a rawn chhang a a buai viau a ni ngei ang thil a rawn sawi buai nuai lehnghal "nu... nimin a i Doctor min hmuh tir hmeichhia kha a number leh a thawhna Damdawiin min lo hrilh teh" ka ti nghal tawp.



"Aw ka rawn thawn dawn nia.. mahse ngati tut tut nge na dang i nei em ni?" A rawn ti a.
"Nei love amah kha ka be lawk duh a thil chian duh ka neih vang ania tunah min lo thawn nghal aw ka be duh a" ka ti a, a rawn thawn tur thu sawiin call chu a ti tawp a Doctor nu number a rawn thawn chu ka en a ka call a ala chhang thei lawk lo lehnghal.



A thawhna damdawiin chu ka en a "pawilo e... tlai lamah ka kal mai ang ka rin dan hi a dik a nih chuan i chak lo ngawt ang" ka ti zui sep bawk.



Phone chu kekawr iptê ah chuan ka rawlh lut a ka inher chiah mahse taksa lian zet ah chuan ka intauh deuh chawrh a "oh!" Tih hliai pah chuan ka ding hla deuh nghal a rûm ri nghut ka hre zawm zat bawk.



"I damlo em ni ngatinge i chawlh a?" Pangngai zawk hian a rawn ti a amah chu ka en chho a a kekawr ipte zen reng chung chuan min lo melh rûn "engtin nge ka chawl tih i hriat a tumah midangin an hrelo" ka ti a, mak ka tihna a pung leh ta chiah bawk, ka chhungte bakin an hrelo engtin nge he mihring hian alo hriat leh daih daih theih.



"Ka hriatna chu a pawimawh ber em ni? I damlo ami?" A rawn ti leh nghut, a aw a nêlawm miah lo bawk.



"Ka dam alawm ka taksa a chaklo mai chauh alawm a bak engmah a awm lo, i buai lohna turah lo buai suh" ka ti a, amah pawh en tawh lem lo chuan kalpel ka tum a mahse a zâwn ka thleng chiah ka banah rawn vuanin min pawt ding a hmalam chu ka melh lui ngar ngar "thil ei țha rawh, chaw ei loh mai mai te kha ching lo la hrisel țha taka i awm a ngai ania damlo mai mai suh i taksa chak loh zia ka hre thei, mu tam la i rilru seng nasa lutuk suh ang che" dam zet hian a rawn ti sup a ka kut lehlam chu ka hmer zui nghek!.



"Umm... ka hria e min thlah tawh la" ka ti sep a engmah sawi lo in zawi muangin min thlah a kei pawh chuan engmah sawi tawh lem lo chuan huan lam pan chuan ka phei san daih thung. Thil thleng avanga biak chhiat ka tum lem lo, be chhe ngam tur pawh ka nilo tih ka hre bawk. Puitling kan ni tawh a tleirawl ang mai a thil thleng avanga thinrim a tih tauh a biak chhiat a mawi tawh lo.



Breakfast ei hma chiahin an let a an tlanchhuak lai pawh ka en zui reng bawk. Zawh duh tam tak ka nei a mahse ka zawt ngamlo, Mama nu chungchang chen a zawh te ka duh a a chhan pawh Mama nu a thih khan helai hmun a a awm daih vang a ni.



Darkar tam lo ah Mizoram-a Fashion week ka hman tur thu News lamah a darh a kal loh ka tum a mahse thil thleng avangin tun hnaiah Event lian tham kalna tur ka nei lo a chawlh ka duh avangin ka hnawl deuh vek bawk, chuvanga hemi hi hmang tawp ka ni. Kan ram lam pawn an lawm zia mail-in min rawn thawn leh thlap.



Dar 2 velah Cora a rawn thleng a nizan vela kan contract sign a document kimchang zawk file nen a rawn keng a Fashion week ka hman dan tur leh a hun nen thlap a lehkha ka dawn a rawn keng tel bawk. Kar tawpah hman tur a ni a mahse naktukah emaw a tuk leh ah ka chhoh loh chuan ka nang hman dawn lo, ka lo hnawl avang khan engmah in buatsaihna hun ka neilo a mahse kan ram a ni a, țawng dang leh neuh neuh ngai a awm pawn a awlsam dawn a ka tan a harsat vak ka ring lo.



"Call ka dawng a sawmna kha i hmulo amaw an rawn tia mahse i pawm leh sia an lawm zia thu pawh an rawn sawi leh a" lehkha ka en mawlh mawlh lai chuan Cora chuan a rawn ti a "umm... a țha nih chu! Sabina te kha i hriattir tawh em?" Ka ti nghal zat.



"Hrilh ngai ho chu ka hrilh vek tawh e... mahse Miss hriatthiam loh ka nei" ka bula rawn țhut thlak pah chuan a rawn ti leh "sawi la" amah pawh en lem lo chuan ka ti a, ka lehkha dah hnawk țhenkhat chu a rawn rem khawm a.



"In ramah kal i duh silo a, an sawmna che pawh kha i hnawl reng bawk a mahse tunah kal i duh leh bawk sia, i chawl tih an hriat i duh loh vang niin ka hrelo i kal duh ve hrim hrim in ka hria, chu ringawt chu vawiinah hian ka la ngaihtuah" a rawn ti a, ka thil sawi lai chu mit khap miah lo in ka en ngar ngar.



"Oh! Sorry, sawi loh tawp tur ka lo sawi a ni" inthlahrung zet hian a rawn ti zâwi sep a "a pawilo, a ho lutuk ngaihdam dilna tur pakhat mah a awm hleinem... i sawi chu thil ni thei ve tho ania a âwm lutuk, hreawm tih nan hmang suh" ka ti a, mahse hreawm a tih thu ala rawn sawi hram, henu hi chu a mak ve ania.



"Car ilo ken chuan chhuak lawk ang hmiang Damdawiin lamah kal ka duh a" din chhuah pah chuan ka ti a, phâwk zeta meng in min rawn en chho a "tinge nâ i nei ami?" Hlauhthawn hmel zeta rawn tiin a rawn ding chhuak a, ka banah chuan vuanin min enkual nghal thuak.



Nui chhuak hak in amah chu ka din țhat tira "ka țha lawm... kha Doctor kha biak ka duh mai ania chawlh ka la tih kha amah lo chu sawi chhuak tur an awm lo, chumi thilah chuan biak ka duh a chu zawng chu ni mai" ka ti a, ngaihtuah ve fê ni âwm tak hian a ngawi ve deuh vang vang a.



"Ni ve thei tho" a rawn ti ve ta sep.



"Ka va insiam lawk ang... heng lehkha hi safe-ah kalh hnan tlat rawh aw chuan a copy siam hmasa bawk la" ka ti a, room lam ka pan san nghal daih. Hna thil a chhuak tur ka nih loh avangin pangngai zetin ka in thuam a, trousers pant ha in kawr dum ka ha a, flat mawi hnai ve deuh chhuah vel mai mai na a ka bun țhin chu ka bun leh thaks a bag ak in cap leh mask ka la a room ațang chuan ka chhuak nghal bawk.



rps20201107_183932.jpg
rps20201107_183932.jpg (94.33 KiB) Viewed 5413 times



"Tikha chuan nangmah pawh i ang lo mahse engtin nge Doctor room-a luh dawn hunah kan tih ang?" A rawn ti a, a bulah chuan ka kal phei a "a theih ve mai ang a hma pawn kan tih tawh kha kal ang ka awm rei hman lo ania" ka ti a, amah chu ka pawt chhuak nghal ti tih bawk.



Car-in damdawiin lam kan pan a motor chu aman a dahfel a chumi chhung chuan ka lo nghak ve ngar ngar. Damdawiin lam kan pan a Cora-in nurse bulah Dr. Sonia a awm em tih a zawt a vawiinah chawlh a lak thu in alo chhang thung.



Chhan neiin chawlh a la a ni ngei ang, a number chu hmet chhuak in ka call lehnghal a mahse switch off a in ti hmak.



Ka nu call ka tum a mahse Siami call ka dawng a ka pick nghal vat "Hming... tunah group kha en vat rawh!" A rawn ti nghal tâwng, ka phone chu ka en a ka bengah ka nghat leh "enge group-ah chuan awm a?" Ka ti hû.



"En la ni mai ka dah ania" a rawn ti leh hlak a ala dah daih zui. Bangbo ru zetin group chu ka en a mahse ka thil hmuh avang chuan ka thil nghen mek chu ka nêk rawk rawk.



Chiang zet hian Dr. Sonia thlalak alo awm a 'Ama in ngei ah thi a chhar a ni' tih lian zet hian alo in ziak kulh bawk!.



Link:
BBcode:
HTML:
Hide post links
Show post links

ADVERTISEMENT (A hnuai a milem hi a nia hmeh zeuh tur chu)