MY TREASURE Chapter #18 by floria Laldansangi

Episode kal lai dah luhna

Moderator: writers

Floria
Posts: 327
Joined: August 28th, 2017, 12:07 pm

MY TREASURE Chapter #18 by floria Laldansangi

Unread post by Floria » November 21st, 2020, 10:58 pm

MY TREASURE
By
Floria Laldansangi


Chapter < 18 >


MAYA...POV


"Tlangval te i rawn pawm taka, anrit ve tawh si, pawm pawm suh, an zawngchhang mai mai," Jamie-i leh Brayden-a ṭhutna lam kan pan chu Jamie-in a lo ti deuh lang lang a



"Naupan amah chauha i kalsan a," lungawi chiahlo a ti nung nung chuan ka ṭhu thla a, "Awwww.... Nathan-a ṭhiannu khan ka lo awmpui ang a tih kha, bakah toilet kan kal tur Bryan hian min zui duh silo a, ka kalsan a nih kha, diklo a awm em ni?" Ka lu ka thing ringawt a



Bryan lah chu ka pawmna aṭangin a ṭhu hrang duh dêrlo, "kha kha alawm, i oawm sek zela, an zawng chhang, Bryan i tlangval tawh nangmah in ṭhu rawh," Bryan-a hau ti tih a a rawn tih chuan Bryan chuan en karin a lu a thing mat mat a, ka awm a rawn bei nghal chial chialin a hmai a thukru nghal tlat bawk chu ka hawi kual a, kan lam panin Nathan-a a rawn pen tih ka hmu zui zat bawk


Nichin maiah a pa hmingpum in a ko a, a inthlahrung a ni ngei ang, "Bryan thil kan tihsual chuan ngaihdam dil kan hreh tur a nilo, mipa chuan pa takin a thiamlohna ah ngaihdam a dil ngam tur a ni, chu chu mipa diktak nihna a ni, mipa diktak ini em?" Ka thle hâ a, min rawn melh zawk a, kan bula chair a rawn ṭhu thla ve chiah Nathan-a bih leh dek dek chuan, "umm," Ti zawi sapin a pa bawk chu a en leh a


"Eng nge tihsual a neih a?" Jamie-i chu en vatin ka mitmei vat bawk


"Le... Daddy bulah eng nge sawi tur?" Ka malah chuan ka ṭhut ṭhat tir a, in thlahrung tih hriat taka a pa en dek dek chung chuan, "daddy, sorry...." A ti zawi sap chu nuih var varin, "engvangin nge sorry itih le?" Ka tih leh chuan min rawn en a, "Lalhriatpui ka tih vangin," A sam a tuai zauhin, "mipa chu hetiang tur hi, Daddy pawh hian a ngaidam ngei angche," Nathan-a lam chu kan hawi a ; Mahse, ani erawhin kan thusawi chu hria ang pawhin a langlo, nilo, a rilru ah thildang daih a ngaihtuah tih a hriat mah mah zawk


"Nathan... Nathan," A rawn hawi awt a, rum tawk a lo melh ram ramin, "i fapa in 'sorry' atih chu," Naupang ka bulah awmlo se chuan ka hau hrep ang, tun aṭang chuan ka ṭawngkam leh naupang hriat a Nathan-a nen a inhauh pawh kan fimkhur a ngaih tawh zia ka hre chhuak tlat a ni


"Ummm," Tih leh a sam rawn tuai zauhin, "Malsawm inbe lawk ang," Tih leh a tho nghal thurh chu ngei tawkin ka en vak a, "Umm" tih chauh a chhan, bakah eng nge maw a ngaihtuah le...? Nichin mai a hmeichhia vang khan min hnawl nawn a tum êmlo angchu maw...? Hmeichhe dang vang mai mai a hnawl nih ka duh ṭhaklo a nia



"Bryan nangmah in lo ṭhu lawk rawh aw," tih leh ka mal aṭanga a hlang thla in, "khawiah mah lo kalsan tawh suh angche, Brayden, i hmui hrufai rawh le," Tih zawm zatin Jamie-i chu ka en a, "kalteh, kalteh, ka kalsan dawnlo," Nui vur vura a tih chuan ka hmui hnuailam ti pawrh tarhin, Nathan-an min lo en run na lam chu ka pan ve vat a



"Eng nge ni a? Tun tut tut a min hrilh i duh?" A pen zau si, a pen khat hi ka tan chuan pên hnih ang vel a ni a, ka tlan a ngai a nita ber ṭhin, a hnunglam ah 5'4ft awrh a sâng in ka'n um dat dat hi chu kan hmuhnawm in a nuihzatthlak viau ta ve ang



"Kal muang deuh teh, eng nge maw i hriat le?" Ka hah hman der tawh, ka hah phei hi chuan ka duh aiin ka vin leh ta ṭhin bawk a


A car din na bula ding dawtin, "engtik maw i nu te chu Mizoram an let dawn a?" A vahan chhe tak e aw....! Duh mahila tunah tak hi chuan a CHHIA a ni tawp...!


Rum tawk a melh vakin, "chumi min zawt tur mai mai chuan chak taka i pen ka umzui che a maw? I...." Ka sawi zo hmanlo, "thu ho mai mai ngaithla hman ka nilo, engtik maw an let dawn?" Alo ti bul hluk leh ta nghal a...!


A zaklo ve ham ham e a...! Ka sawi tur zawk a sawi daih lehnghal


"ka sawi tur a nih chu, chutiang thu ho mai mai sawi turin em ni hetah min hruai?" Ka melh chho ram ram a, a rum nghut duh chauh lehnghal, ka vahan ngei tak êm hepa hi chu, ka duh tluk zetin ka ngei tih ka chiang a ni



"Kartawp ah nge karthar ah?" Ava ninawm chhen e aw..!


"Thawh ṭan karah, eng atan...." Ka ti chiah, "Naupang ho nen zui ve angche u, in ka lei tawh a, awmpui 2 leh driver 1 in an awm chilh angche u," A thusawi chu ka hresual êm lo maw? Ka hresual emaw ka ti hman tak tak zawk; Mahse, a hmel thutak zet ah chuan ka hresual aw zawnglo tih ka hre chawpchilh bawk


"Tu thu in nge ka zui ngawt ang, zui tumna ka neilo," Tih leh inher ka tum chu ka bânrek a man in min pawt let nawk a, "inhnial buainan hun ka nei hauhlo Malsawmdawng, ka sawi ang chuan awm mairawh," A ti ram hmak chu za lo zet a nuihin, "i thusawi zawm turin ka eng nge inih a?" Min en run run a, ka melh chho ve khai khai bawk, "ka engmah, chuvangin ka awmna tur leh ka kalna tur a thu nei turin ka engmah i nilo," Tih kha fak chuan ka bânrek a hmerna chu ka phelhsak ṭauh ṭauh bawk a


A hmer nghet em em lehnghal, "Nathan ka engmah nih duhlo tu chu nangmah ini, theihnghilh suh," Tih leh a kut ṭang chu pakhat te te in ka phelh a



"Malsawmdawng.." A aw chu chang tak a ni, a tawplam chu a ri vin ṭhak bawk


"Lalhriatpui..." Ti let tuarin ka en chho vah a, "tinge i hmeichhe kawp tur kan dâl em ni? Kan hnawk em ni?" Ka saei tumloh zet zet ka sawi leh ta; Mahse, ka rin dan leh ngaihdan diktak a ni


"Hreptak che hian...! Hmeichhia an awmlo a chiang em? Ka sawi angchuan i nu te rualin Mizoram ah let angche u," A thusawi ka awihloh zia chu, awihlo rapthlak tak ka ni, hmeichhia vang a nilo amaw...? Dawheh lutuk mai...!



"Engtin nge niang, ka pa lu ka phumna hmun hi chhuahsan ka tum silo a," Ngeiawm zet a ti let nghatin ka inher sawka, rinv khawng at in ka pensawn nghal vawh vawh bawk, ka hnunglam a a thinrim car chum ri bur chu ka hre reng na in vawikhat pawh ka hawilet duhlo, a hma in a fate fahrah in ah dah a tuma, tunah Mizoram ah kan vai a min thawn a tum leha, a tum ang ngawt chuan engmah a awm âwmlo emai...!


Tunge ka nih? Malsawmdawngzeli ka nih hi, tu thu hnuai ah mah ka awmlo ang bawkin ka duh ka neih nan tu phalna mah ka lak a ngailo, ka duh chu ka nei ngei ṭhin bawk


"Eng nge a sawipui che a, Bryan i nau ti ṭap ziah suh," Naupang veng paha a tih chuan ka thaw kawk kawk a, ka kalna lam chu rum mang khenga melh let lehin, "Mizoram ah thawn mintum," Ti hlar chuan thaw ka la zui leh kawk kawk bawk



"In hahthlak emai a," Tih leh, "zanin chu ka let hma a ngaih hmel, front office kan inthlak a ngai dawn a, heihi Nathan-a theihnghilh niin ka hria hawnsak nghal la," A tih zawm zat chuan paper bag chu ban in, "ummm, takin a, Opa kha ngaihdam minlo dilsak dawn nia, number kan inpe hman ta silo a, Nathan-a ṭawngkam te kha a lo hua ange?" Ka tih duah chuan nui sun sunin, "duh zawk daihla, Old Lion-a ai chuan a zia daih zawk lo'ng maw, tlemin a patê deuh tih mailoh chu," Ka nui ringawt a, "sual viau in, ingeihlo viau mahila ka duh tawh chu ka duh bur tlat," Ka tih let chuan hmel siam danglam sâwng sâwngin, "ok ok, inhau rengin ila duh ve tlat bawk a," A ti zui nung nung ringawt a




Damdawiin aṭanga Jamie-i a pên tak daih avangin naupang ho nen chuan inlam kan pan a, Bryson-a ka pua a, a chau in, damdawi in a hneh tih hriat takin a muhil thaw sek sek bawk


"Mamma playground ah sawn kan infiam thei angem?" Kan kal pelh tak lam hawi let a Brayden-an a rawn tih chuan playground lam hawiin, "nidang ah aw, tunah chuan i nau hi mut tir a ngaia, infel kha," Ka kut lehlam ve ve ah ka kai a, ka darah bag lian ve tak, Mini Mart aṭanga ka lei chawhmeh tlem ka ak tel bawk a, Bryson-a kala paw zui bawk nen, in thlen vat vat bak chak ka nei rihlo



Bryan leh Brayden-a chuan infiam an chak tih hriat takin an en zui vawng vawnga, ka dâr pahnih hniha a nat kham ut ut avangin ka haider tlang ta law law mai



Lift nghah chhungte chu rei ka ti lutuk mah mah, damdawiin kan chhuahsan aṭangin Bryson-a kala paw ngar ngar a, taxi chhungah pawh ka hma puak avangin dar a kham duh ngut ngut khawp mai, a cher viau e ti lovin, puak rei chuan an rit ve tawh mah mah a ni


Inchhung kan lut chiah chu kawngkhar bul chhuatah ka bag ah chu ka nghat tawp a, room a chakzet a lutin, dimte in Bryson-a chu ka mut bawk a, a sirah ka thal thla ve tap bawk, thaw chhuak ham hamin mit ka chhing zui vang vang bawk a, tumloh zetin Nathan-a hmel a rawn lang zui zat bawk a'h...! Tunah tak hi chuan ka hmu peih miahlo a sin...! Arghhhh



Muangchang a tho chhuak chuan Bryan leh Brayden-a in um thawm ring lutuk chu chhuah pahin ka hau a, ka bag kawngkhar bula ka hnutchhiah tak la in choka lam ka pan nghal vat bawk


Ka bag a chawhmeh ka phawrh rualin Nathan-a paper bag ka hnawhluh tel chu phawrh chhuakin nernung in, "eng nge le?" Tih leh ka hawng a, paper vek a ni, hna lam thil a nih ka ring ve ringawt a



Nathan-a room a dah tumin a room ka pan a, a khum a dah mai ka tum chu a khum chungah pawh paper leh file tamtak hnawk zet mai a darh neih nuaih mai ka hmuh rualin ka thaw hak, "ka room chu keimah in ka tifai thei," A ti ve kha a nia, heti khaw a hnawka kalsan teh...!


Phun nuah nuah a rem ṭha mawlh mawlh in ka paper lak kân leh chiah chuan ka mit ala nghal zar mai, "DNA test na maw?" Ka phun sap a



"Father : Nathan Lalhriatpuia, Child : Bryan Lalrinsanga," tih inziak chu mak ti lutuk in ka chhiar thla a, "Probability of paternity :...." Ka kut aṭangin ka paper kenlai chu a tawlh thla riai riai a, "a fate an nilo amaw?" Ka phun zui sap bawk


Rang lutuk a paper bawk chu la kâng leh nawk nawkin ka chhiar sual a nih beisei chuan ka chhiar nawn leh a; Mahse, 99.99% zetin pafa an nilo tih chuang kuang mai chuan lungtum a den dawt ang maiin ka nghing dawt thei, engtin nge a nih theih...? Heng naupang 3 te hi a fate an nilo amaw..? A nih chuan tu fate nge an nih ang...?

Ka thil rem khawm sa chu ka haidarh leh sawk sawk a, eng nge ka zawn ka hrelo, nilo, heng naupang ho hi Nathan-a fate an nihloh chuan tu fate nge an nih ang? Chu chu zawn hmuh ka tum niber in ka hria



Paper leh file awm ho zawng zawng ka bihkim vek a; Mahse, engmah hmuh tur a awmlo, DNA test result bawk chu ka en nawn leh a, "engtin nge a nih theih? A nih chuan vawiin chhun a hmeichhia kha Bryan-a te unau hringtu diktak a ni angem? " Ka lu ka thing nawk nawk a, "i â em ni Malsawm, an hring tu nise ka fapa anih leh nihloh min zawt tawp nang," Keimah leh keimah chu ka inbe mawlh mawlh a


Nathan-a room aṭang chuan muangchangin ka chhuak a, ka eirawng bawl lai te chuan, "tu fate nge an nih ang?" Tih leh, "Nathan-an fahrah in a dah a tum chhan kha a ni angem? Mizoram a let tura mintih chhan te hi a ni angem?" Tih ringawt chuan ka rilru a luah khat



"I chawhmeh chhuah.." Tih ri ka hriat rualin ka harh zawk, ka chet hma in Gas chu Nathan-an a rawn off zui zat bawk a


A rawn haw lai ka hrelo pawh a nilo, choka a rawn luhlai ka hrelo hrim hrim zawk


"Eng nge i ngaihtuah a?" Ti hluk chuan min melh hrawk a, kei erawhin khawngaih leh mahni inthiamlohna a khatin kalo en hau thung chu mak tih hmel zet a min melhin, "i damlo em ni?" Ka lu ka thing mat mat thung


"Damdawiin a...." A tih lak mekin, "Nathan, chhun a hmeichhia kha Bryan-a te nu a ni em? I..." Ka ti zet na in ka chip leh ta zawk a, naupang ho nen inzawmna an neilo tih ka hria tih a hriat chuan a lawm hauhlo ang, ni e, inhauh ka ṭan leh dawn a ka hriat avangin ka ngawi rih ta zawk a


Nui sukin, "chumi ngaihtuah chuan em ni i bai chhuan i liam tir zawih zawih ni, 'a nilo' ka tih tawh kha," Nui sun sun a tih leh choka aṭangin a pen chhuak nghal a


Ka thaw chhuak hak thung, ka khawngaiha, chutih rualin eng nge a rilru ah awm tih ka hrethiamlo, a fate an nihloh chuan pa sual tak ang a langin, kalsan tum lovin emaw ngaihsakloh luih vel aiin, a sawi chhuakin, kan hriat thiam theih turin a sawi thei reng si a


Sawi nise chuan khatiang ṭawngkam chhe tak tak khan ka ṭawng khum fo awm si lova; Arghhhh... "Mahni inthiam chawp a ngaih tawh hi chuan kan thiamlo a ni," Ka pa in a tih ṭhin kha ka hre chhuak rum rum mai, ni e, engmah ka hriat chian hma in ka lei hi ka lo tlak tam mah mah a ni



Chaw ei lai te chuan Nathan-a chu ka lo en leh veng veng ṭhin a, ka khawngaih niber in ka hria


naupang ka mut tir thlengin engmah ka rilru ah a awm theilo, ka mitthla ah lah chuan DNA test result ka hmuh ringawt kha a cham lehnghal a, Nathan-a hmel hmuh leh chuti tho, hria angin ka awm ang nge engmah hrelo angin ka awm zawk dawn...? Chu ringawt pawh chuan thluak a ti na ut ut thei



"Hmmm, Warm milk hi in rawh, zan mut lamah harsatna ineih kha, a ṭha a nia," Tih leh dawhkan ah chuan ka dah ri khap a, laptop ah thil a type leh malh malh tawh



"Naupang ka nihloh hi Malsawm, nangmah khan inla mu hma rawh," Min rawn melh zawk, a tih lai a chhunzawm lehnghal mawlh mawlh bawk


"In mai mai teh, naupan leh puitlin a kawklo, hna i thawk rei thei si a, a ti hahdam dawn che alawm," Ti leh ṭalh chuan alam a nawr hnaiin, "in rawh," Ka tih leh sap chuan a hnar tum ri datin, "engthil nge maw zanin chu i hriat le? Tlai aṭang tawhin i diklo," rawn kûn hniamin Chiang fek fawkin min rawn en a, ka thaw ka lo hip let kawk thung



Ka lungphu zet chu, rang tak a ni, khuangpui vuak thum dup dup ang mai alawm


"Eng.. Engmah..." Ti bah deuh nak chuan ka chil lem khalhin ka insiam rem vata, ka awmdan danglam ta chu hai chi rual ni heklo, nui ri sukin, "duhawm reuh lutuk," A ti ri sup chu a ringlo na in hrechiang tak ka ni, ka biang a rawn sa zui hat hat a, ka nui nghal ver ver bawk


"Nathan..." Milk inchung chuan min rawn melh a

"I nu..." Ka tawp dat, ka lu thingin, "naupang..." A ni thei chuanglo, a nupui hlui emaw a fate chanchin engtin nge ka sawipui theih ang ni..? Natna ka thlen belhin, a lawmlohna ṭul lovah ka siam mai mai in ka ring bawk s; Mahse, engtin ka tih ang, a fate an nilo tih ka hre si a


Nathan-a ka lainat ang zat chiahin Bryan te unau ka lainat tel bawk, an rawn puitling anga, hriat chhuah hun an nei âwm si a, emaw naupang te nu hian rawnlam tumse engtin nge Nathan-a hian a tih ang, a thisen an si lova..? Engti kawng zawng mahin chelh theihna dan a nei bawk silo



"Eng nge i ngaihtuah leh tak?" Ka phu leh zuk tawh, hnai lutuk mai ka hnar dai lek lek a min en tu, a thaw lum ham ham in ka hmui leh nghawng zawn thawk khum ham ham a, a taksa lumna pawhin a min ur veng veng theih khawp a hnai a min en tu chu thaw dep dep leh kawchhung khur nghal der der in ka en let ve kar a



Ka chil ka lem ri khalh a, awih awmloh khawpin ka taksa chu a khur thei nia maw le...! Ka hmui thleng chuan a khur chhuak beuh beuh thei nia


"Na.. Na.. Nathan..." Ka pian a hnulam a ka vawikhat zàmna leh sawitur ka vânber ṭum a ni hial angchu


Mawi lutuk a nui sukin, a hnar a, ka hnar vawi 2 ngawt tawk zauh zauhin, "ummm, sawi tur inei em ni?" A aw chu a rilruih mai, ka chal ah a chal a rawn nghat riai riai a, mit a chhing zui riai riai bawk, hahdam hmelzet a a mit chhing chu ka en kar a

Kei erawh chet pawh ka che ngam tawhlo, ka khur a, ka khawng at in ka ṭang ṭung thung


A muhil ta emaw tih mai turin a rawn thaw chhuak sek sek a, a hrawkbawk chu ka melh thla a, a chil lem zawng a che ralh ralh chu nalh tak a ni, chu chuan a ti PA lehzual


"Nathan..." Min chhanglo a, ngawi deuh vang vangin, "'Mizoram ah chuan ka nu te chu kan zui ang ; Mahse, i tel ve tur a ni," Muangchangin a rawn meng a, a rawn nui suk bawk, a vahan hmelṭha tak..! A hmui a tih sawih rual a kamsir chuar deuh tap te, a vei kiai zawnga a hmai khuar deuh kak te chu a inhmeh hliah hliah


"Eng in nge i rilru thlak a?" Tih leh inlak hran a rual chu ka hit nghal sawng sawng thei, thlasik lai a puanlum nuam zet a intuam a, laksak daih ang maiin ka hit nghal sung sung nia maw le..!


"I telve dawn chuan ka tih kha," Ka nuih sen sen a, ni e, engmah hrelo ang a awm hi eng nge a pawi na..? Nathan-a berin a fate an nilo tih pawh a sawiloh lai a lo sawi chhuah kha a ṭul in ka hre ta lo; Mahse, tun a chinah Nathan-a harsatna te leh ngaihtuahna te, rilru a awm te hriat chian leh hriat thiam ka tum tawh dawn a ni

"Heta ka hna ka zawh hunah ka rawn zui angche u, ka tiam angche," Nghet charh a a tih chuan rinhlelhna pakhat mah awm lovin ka ring hmiah bawk


Ṭhu ṭha a laptop banin a malchunga a dah leh chuan, "Nathan..." A rawn hawi rualin hip tu awm ang maiin ka hmui chuan Nathan-a hmui chhahlam lek lek chu ka charbet chat a, ka chetdan tehthut chu a in ring hmanlo mai a nilo, keimah pawh ka in ring hmanlo, a meng kawk a, keipawh chuti tho, rang lutuk a inla hrangin, "ka.." Sawi mai tur ka hrelo, a thinrim ka hläu viau bawk; Mahse, rawn nui ri suk a, za zet a nui zui hak hkin, "mu tawh rawh," Tih leh a lu thing mat matin hna a thawk zui lehnghal mawlh mawlh bawk

Ka lungphu rang lutuk chu a rawn zuang chhuak dawnin ka hria, ka thlanfim te a rawn bawl ṭiam ṭiam thei tak tak nia



Link:
BBcode:
HTML:
Hide post links
Show post links

ADVERTISEMENT (A hnuai a milem hi a nia hmeh zeuh tur chu)

Post Reply

Who is online

Users browsing this forum: Google [Bot], Google Adsense [Bot] and 85 guests