TOXIC_LIPS #CHAPTER -21
By : Msi (Hmeichhe naupang tereuhte)
An ni pawh chuan min en ve reng a kalsawn an tum bik lo tih hriat zetin an dinna ngaiah an ding ve reng. Keimah zawkin an mahni en reng chungin ka pan phei a an hmaah chuan ding in ka thaw chhuak ham ham a Mama erawh chuan min en duh țhak lo tih hriat zetin hmundang a en daih thung.
"In dam țha hlawm em?" Ka ti sep, min chhan an tum lo tih hriat zetin an hawisawn sap sap hlawm a "kal ang u kan tlai dawn" Mama zawk chuan a rawn ti ta nghut, ka bag khai hrui chu nghet zetin ka hûm zui nghek!.
"Nia kal ang u" Arema pawh chuan a rawn ti ve lehnghal zat. Chelh beh pawh tum lo chuan an kal chu ka en zui reng ringawt a ka bag hrui chu nghet zeta hûm in ka maimichhing a ka thaw chhuak ham ham "min haw takzet hlawm ang tiraw? Ka hria lawm chelh bet ngam tur cheu pawn dikna ka neilo mahse ka ngaihdam dil nan in tan tihsak theih che u ka nei a nih chuan ka ti ngei ngei ang" bus-a an lut sap sap lai en reng chung chuan ka phun sep a, ka lam rawn hawi tawh miah lova an tlanchhuak lai chu ka thlir zui ta vawng vawng ringawt bawk.
Khawvela chan ka hlauh ber țhinte an ni mahse ka thiltih avangin ka chân țan mek chu a ni si, an mahni dem a chelh bet ngam tur pawh ka nilo tih ka in hria ka âtna avanga ka thiltih chuan min vaw let mek zel chu a ni a mahse an tan tih theih ka nei a nih chuan ka tihsak ang, min haw mahse hlim hlawm se ka duh takzet bawk.
Thaw chhuak hak in Hospital lam chu ka hawi leh a mipui an inpel suau suau a gate chhungah chuan Ambulance ri ruai ruai chungin a lut bawk a țap chunga rawn chhuak tawk an awm bawk. Ka cap khum chu pawt hniam salh in Gate lam bawk chu ka pan phei a midangin min hmuh ka hlau ang reng hle.
Buaina engmah tawk lo in Damdawiin chhungah chuan ka lut thei a Nurse pakhat lo duty-na lam chu ka pan phei a "puih theihna che ka nei em țhiannu?" A hmaa ka va din rual chuan alo ti nghal var a "aw... Dr. Zorema hi a Office-ah a awm em le?" Ka ti nghal a. Amah ka hrilh lawk miau loh avangin ka duh thu in ka hmu ve ngawt theilo.
"Lo nghak lawk rawh aw" a rawn ti a ka bu ve nghat mai bawk.
"Tunah chuan ward a fang mek a a reilo ang mahse amah i hmuh tur thu i hrilh lawk em? Awi! Nangmah... nangmah ini tak tak" a rawn ti zawm hliai, a ngaihna hrelo zetin amah chu ka en a kûn meuhin min lo en chu niin a au rin êm avang chuan ka cap ka pawt hniam zui salh "khawngaihin i sawi lo thei ang em?" Ka ti sep, a chhan pawh midang ka hruai lut lo a tin ni.
"Aw.. aw... ka sawilo ang. Ui... ka hmuh che pawh ka lo inring lo a ui... awmdan tur pawh ka thiam lo ka duh lutuk che a ka kutah hian min sign sak thei ang em please in" zâwi zet hian a rawn ti leh chûl a a awmdan avang chuan ka nui ringawt "aw le mahse pen min lo pe la" ka ti a, phur zet hian pen chu min rawn pe a ka lo ban ve mai bawk.
A kut dinglam chu a rawn dawh a a kut chu vuanin ka sign sak a ala nui chhuak hak lehnghal ka cap chu pawt chho deuhin amah chu ka en a a hmelțha in ala duhawm em em mai lehnghal "ka lawm e... ka in tih theih khum dawn chiang lutuk" a kut en pah chuan a ti zui leh vawng vawng a a awmdan avang chuan ka lo nui leh ringawt bawk.
"Ah... chuan Doctor chu a room-ah i nghak mai dawn nia aw a reilo ang" nuih var var pahin a rawn ti leh nuih pah in pen chu ka pe a "ka lawm lutuk e" ka ti sap a, lift lam chu hmanhmawh zet hian ka pan phei nghal a. Lift ka luh rual chuan button chu ka hmet a a inkhar rual chuan ka cap khum chu ka la thla a ka sam chu ka tuai chho nghal puat a mask ka lo vuah lo kha ka inchhir leh hnu hnawh.
Lift a rawn inhawn rual chuan Doctor-a Office lam chu ka pan a a kawngkhar chu muangchanga hawng in a Office chhungah chuan ka lut a ward ala fang zo lo a ni ngei ang alo la reh deuh țhiap a. Kawngkhar chu ka khar leh thlap a a Office chu tlem in alo ti danglam bawk, a dawhkan bulah chuan a coat leh a white coat alo in bâng a dawhkanah chuan computer leh laptop alo awm bawk a a hming a in chhu kalh bawk.
A dawhkan bula tukverh lam chu ka pan phei a tukverh ațang chuan Damdawiin kawt chiang vak lo hian a lang thei bawk. A office chhung chu a felfai em em a a thim deuh ruih a chu a hahdam ru em em thung. Kawngkhar ri khep ah chuan ka hawi phei a a white coat in bang in min hliah chiah chiah avang chuan min rawn hmu theilo maithei "hrim hrim in tunge medical incharge ni reng reng a?" Lungawi loh hmel zeta ti nghut tu chu Doctor-a a ni tih ka hailo, mahse chhuah mai erawh ka la tum lo thung.
"A ni te chuan chawlh ala a ni lawm ni?" A ti zui leh nghut a, a aw ațang chuan a lungawi hlawllo tih a hriat theih "ER room-a Nurse duty kha ko chhuak la zawt fiah rawh" a ti zui leh hrâwih a ka dinna lam a rawn pan tih a pheikhawk rawn lang ațang chuan ka hre thei.
"Aw.... ka theh lut tawh naktukah ka buaipui zui ang ka âwl laia ka buaipui loh chuan a rial rei dawn lutuk" a ti zui leh a an sawi hi ka hrethiam țhak lo. A thawm ațang chuan ka awmna zawn a rawn thleng tawh tih ka hre thei "țhu dawn lo, kei ni lovin Tc-a zawk a țhu ang. Naktuka ka țhut dawn loh vang reng chuan alawm tunah ER-room-a Nurse duty kha hruai chhuak a zawt fiah tura ka tih che" a ti leh nghut.
A white coat a rawn ban rual chuan a sir ațang chuan ka lo dâk a min hmu chu "Bawihi... hetah" mak ti tih hriat zet hian a ti chhuak deuh hawk a kei erawh chuan ka lo nuih var var thung, ka awmna phên ațang chuan ka ding chhuak a a mitmeng zawhna a khat chuan min en rên rûn a "engmah a ni lo, Nurse chu lo bia la chuan min rawn be leh dawn nia" a ti zui sup a a beng ațanga phone chu la thla in a off zui nghal hmak.
Ka kut ka hnung a suih pah chuan nui deuh sêih chungin amah chu ka en chho a a phone a dawhkana dah thlak pah chuan "min hrilh lawk miah lo" a rawn ti nghal nghut a kei erawh ka lo nui chhuak hak thung "rawn surprise che ka tum hrim hrim a bakah hrilh lawk tur che pawn i number ka neilo hrim hrim a" ka ti a, a smart pants iptê a a kut dah luh hlûn pah chuan min en leh rên râwn a.
"Mami kaltlang a inhrilh a har miah lo Bawihi, min rawn hrilh ni lang chuan rawn hruai tur che ka ni" a rawn ti leh nghut, a fiamthu nge a ti tak tak pawh ka hrethiam lo e a. Ka coat hak iptê ah chuan zen lut in amah chu ka en leh "Hmm... a nih chuan ka lo kal pawh hi i lawm vak lo aniang ka kal leh mai ang" ti a kal tum a ka inher chu hnunglam ațang min rawn kuah chawt a kei a pawh chuan ka lo ngheng hnai ve lehnghal zat tho.
"Chu lam ka sawilo min rawn hrilh la ka rawn hruai mai tur che ania" ka beng bulah chuan a rawn ti sup a, ka bek a a rawn fawh vang vang rual chuan min kuahna kut chu ka lo vawn sak a "rawn surprise che ka tum ve hrim hrim alawm" ka ti a, thaw chhuak suai suai a hneh zeta min kuah bet leh in ka beng ah chuan a rawn fawp leh zeuh a.
"A nih chuan enge i rawn luh rual a lungawi loh hmel zeta i sawi ho kha ni a? Tunah lem i lungawi leh hmel tawh hle sia" ka ti a, a nui ri suk "damlo pakhat a tlanbo a vawiin hi a ril phir an zai hun tur ania tun thlengin an la hmu lo a" a rawn ti a.
"A nih chuan chu damlo chu nangma zai tur ami?" Ka ti leh.
"Ni love Tc-a zai tur ania tunah a chhungte mangangin an țap mek a Police an rawn in rawlh thuai in ka ring a țha lam beisei phawt ang. Eng ti turin nge ilo kal hrim hrim?" A rawn ti leh a, amah chu ka ngheng hnai zual sauh a "ka hmu chak che a bakah zawh duh che ka nei a" ka ti a, min kuah reng chung chuan min tawlhsawn pui a min kuahna chu thlah a ka hmaa a rawn din rual chuan ka khelah dawm in dawhkanah chuan min hlang chho nghal nawlh a ka inrin hma hauh in ka sir ve ve ah rawn innem khalh in ka mitah tak min melh ta siah bawk. Zâmna bawkin min luh chilh leh tawh.
"I rawn kal chhan chu eng maw?" A rawn ti nawn sup, a har var nalh zet lang tur chuan a nui kiai zui suk bawk "aw... ka sawi tawh kha ka hmu chak che a chuanin..." ka sawi zawh hma hma chuan "stop it!" A rawn ti sup a, a ngaihna hrelo zetin amah chu ka en deuh hâ.
"Sawi nawn leh rawh" a rawn ti a, ka ner deuh nâng enge maw a hriat reuh le "Bawihi" a rawn ti leh rual chuan ka sawi nawn leh mahse ka sawi zawh hma hauh in ka khabe ah rawn dawm in dam zetin min rawn fawp a ka chhan let ve rual chuan a nui ri suk a ka hnarah chuan a rawn fawp zeuh "enge i hriat a?" Ka ti deuh hliai a, ka hmuiah chuan rawn fawp leh zeuhin hnai zetah chuan min en a "nang aia nasa in ka hmu chak ang che ka thluak i chhuahsan lo tih hria la engtiang chiahin nge min hmuh chak han sawi teh" ka nâk a a kut nghah pah chuan a rawn ti a, a hmer zui deuh salh lehnghal.
A hmer nawn leh salh rual chuan ka hmuiah a rawn fawp lehnghal zat a min ti za nghal chuai chuai maiin ka hria. He mihring hian engtia min awm tir nge maw a tum ni "engtiang chiah in nge min hmuh chak han sawi teh Bawihi" a ti leh sup "tam deuhin" a sawi zawh rual rual chuan ka lo ti nghal vat a, a nuih nghawr dat rual chuan kei pawh ka nui zui ve sêih a.
Țawng ka tum leh rual chiah chuan min pawm kang zui nawlh a tlak hlau lutuk a a nghawnga ka vawn nghal țûng avang chuan a nui chhuak hawk a a darah chuan ka chum sak zui pawp! "I ti thut thut..." ka sawi zawh hma hma chuan min țhut thlak pui leh dawt! A malchunga ka țhu chu min siam rem nghal zat a "kha maw...sawi pawh ka sawi zo hman hleinem" ka ti nghal hlak a a ni erawh a nui suk thung.
"Eng thil nge min zawh duh chu sawi la" ka mal bul chêt a a kut rawn nghah pah chuan a rawn ti leh "ti lo hian țhu țha ila" tih pah a tal ka tum chu ka mal ah chuan a rawn hmer zeuh a ka îp zui nghal châwih! A ban rêk ah chuan ka vawn sak a a âwm lama min hnuh phei rual chuan hnuailam ami chu chiang zet hian ka feel thei a ban bula ka hmer tâwk rual chuan veiawm zet hian a rawn nui ri nghal suk mai bawk.
"Tiang hian sawi rawh tumah an lo lut lo ang hahdam la" a rawn tih rual chuan a banah ka hmer sak tâwk! A rawn nui chhuak hawk a "sual thiam suh" ka ti nghal hlak, ka awmdan danglam chu hrethiam tih hriat zet hian ka mal ah a kut nghat lo in ka kawngah a nghat ta zawk a mahse ka pangngai mai mai lo ang a malchungah ka awm miau a tin ni.
Maimichhing chung chuan ka thaw chhuak ham ham a thawmhnaw la ha vek mah ila ka mal inkar chu a sa huam huam thei "nangmah vang vek" tih hlak pah chuan a âwmah ka chal ka nghat thla a a ni erawh a nui che dawt a "thunun a harsa tih piahlam a ni, helai hmun a tih i duh ngawt anih loh chuan i taksa kha chêt miah suh. I taksa ka deh rual a ka danglam nghal țhin a ni tih hria la ka duh vang a nih hi" a rawn ti hnawk ve țuak reuh va, ka thaw chhuak nghal ham ham bawk.
"Englo, Mama nu thih lai khan khutah Mumbai-a i rawn awm lai kha ania chuan a thih dan kha stroke an tia eng emaw tal hriat i nei em tih zawh ka duh che a amah enkawltu ini bawk sia" a âwm a chal la nghat reng chung chuan ka ti chhuak sep a, amah hi ka ringhlel a ni lo ka zawh chhan pawh ka hriat dan a dik em tih fiah ka duh mai chauh a ni "chu thil chu maw min zawh duh chu?" A rawn ti a, uar zet hian ka lo bu nghat nghat.
"Kan zai hnu khan dam lam a pan chho zela a rawn incheck-up hnuhnun ber pawh khan bâwk pakhat mah a awm tawh lo amah pawh a harh țha a damdawi ei pawh a thlah chho zel a dam ang var a ni tawh hna pawh a thawk a Pathian zarah enkawl pawh ngai tawh lo khawpin a țha chhuak chho bawk. Mama sawi leh dan chuan khami zan khan a chau thut a a lu te a hai a a luak te a chhuak thu an sawi a khami hma khan a khua te a lo sik ni tur a ni Mumbai lam a ka rawn chhuk avangin engmah min lo hriattir duh lo alo ni a chuan tiang kha a dinhmun alo ni chho ta a ni" sawi harsa tih hmel zet hian a rawn ti ve a a tawp lam phei chu a zuih ral ni maiin ka hria.
Engdang mah kan sawi zawm tawh lo, kan ngawi dun rauh rauh. A nu a nat hlek pawn a mangang a a chiâi ber ber ah a țang a a nu in a kalsan tih a hriat a Mama awmdan tur ka ngaihtuah rikngawt pawn hreawm ka ti ngawih ngawih thei. A nu a buai apianga a mamawh hmasak ber țhin ka ni ka awmlo erawh ka inthiam lo a min hua pawh a âwm ka ti ngawih ngawih.
"Hriatthiam harsa a ti ngawt ang" ka ti chhuak sep, min rawn kuah a a ni pawh a thaw ve ham ham mai "amah ngaina leh hrechiang tu mai pawn hriatthiam harsa an ti in an ui bawk" a rawn ti ve leh a a nih ka ring a ni. A chhan chu nu Dingpuii kha nu țha leh fel a ni, an veng chhungah pawh M.H.I.P ah pawh in hmang deuh mai ania mi rilru zau leh mi țanpui peih deuh mai ani bawk a ui tu an tam ang tih chu ka rin sa a ni.
Ka thlenna Hotel lamah min phei pui a ka kutah vuanin Mumbai lama chhuk thla tawh lo turin min ti a mahse chhanna mumal ka pe ngam lo, ka chhuk thlak leh ngei a ngai a a chhan pawh hna zawh fel loh tam tak ka la nei a khu lama ka chhuk chuan helamah chhohna hun ka nei mai mai tawh dawn lo tih pawh ka hria mahse chung erawh chu hrilh ka tum lo thung ka chhuk thlak hnuah pawh chhoh leh dan kawng ka dap ka dap mai ang.
Ban na a theh lut a mahse sawrkar lam leh a Hospital neitute lam khan an lo pawm sak lo a a ban na lehkha pawh pawm lo in chawlh rih a ngaih thu an lo hrilh hre daih a a kar khat vel leave an lo pe zawk daih tih min hrilh chuan a thutak ang reng viau nângin ka nuih a zat êm avang chuan hmui hup meuhin ka nui a a ni lah chuan ala la run em em mai lehnghal.
Hotel ka thlen chuan room chhungah video kaltlangin William leh Organizer dang te nen kan in bia a vawiin hian an Agency-in tun thla a an Magazine tih chhuah tura model tur ho audition an neih pui dawn a make-up tello in, hun ka hman ve hman loh avangin an hun neih dan leh thlalak hrang hrang min rawn hmuh a keiin ka ngaihdan hrang hrang ka lo sawi ve thung, an Agency-a share ka neih ve miau avang leh an thawhpui mek ka nihna angin min rawn râwn ve hlawm a kan ngaihdan a in hmu lo hlawm phian lehnghal.
An thil sawi khawm nak nak chu ngaihsak zui lo chuan khum a ka phone dah rawn nghawr dar dar chu ka ban a Norish a nih avang chuan ka pick nghal vat a "i buai em?" A rawn ti nghal zat "umm... buai ve tho meeting kan nei a" ka ti sep.
"Nia news-ah khan ka lo hmu che a i hman chuan ka rawn hruai ang che chu ka chhungte pawh hmu ve reng reng la chu bakah kan pahnih in chaw ei ah min sawm a i hman chuan" a rawn ti a, pawimawh tak tak sawi lova an inhnial hlawm tak daih avang chuan video call chu ka hmet tawp a laptop chu ka khup nghal thak "hman loh pawh awm chuang lo a mahse avan zahthlak âwm" ka ti nang nang, a rawn rûm nghut a.
"Zahthlak loh zahthlak loh, i sawi kha zak zawk tur ini ka insiam anga ka rawn lam ang che i chanchin pawh ka hrilh vek tawh lo insiam rawh..." a ti zung zung, pawn lam a thawm a awm avang chuan phone chu ka dah hla a thawm chu ka ngaithla vang vang, mipa thinrim au ri a ni tih ka hai lo.
"Ka rawn be leh ang che" Norish-a bula tih pah chuan call chu ka titawp a khum ațang chuan chhuk thla in kawngkhar lam chu ka pan phei a thawm chu ring tak a ni room ațang pawn chiang takin ka hre thei. Kawngkhar hawnna chu ka herh ri rak a ka hawn rual a ka mi hmuh avang chuan ka meng zui nghal kâwk!.
Mama chu security te leh Cora chuan an lo dang bet reng a a ni lah chuan kal tum phêt tih hriat zet alo tal ve nawk nawk bawk a min hmuh rual chuan 'min thlah rawh u!' A ti zui nghal tuarh bawk. A biang velah chuan thisen a kai a a pilh deuh phungin ka hre bawk.
"Cora..." ka tih rual chuan an vai chuan an rawn hawi nghal țhap a Cora mangang hmel chu ka hmuh hmaih lo chiang hle bawk "Kal tir rawh u" ka ti a ka thusawi chuan a țhawng hlawm ngang aniang an in en hrek hrek hlawm a Cora meuh pawn min rawn pan nghal "mahse... nangmah hmuh a tum țalh a engtin nge kal tir rawh u itih theih?" Ka bula rawn din pah chuan a rawn ti nghal hliai.
"Ka țhianpa ania Mama tih a ka hrilh ziah țhin che kha, thlalak a ka hmuh tir ang che khan amah saw chiang deuhin en rawh" Mama lam melh zeuh pah chuan ka ti a, che lêk lo in min lo en reng "aw.. an inang" a rawn ti a, amah chu ka nuih a "a nih chuan kal tir turin hrilh rawh kan lo inbia ang mahse midang an awm nge awm lo lo en kual ang che" ka ti a, min hnial a tum zet nângin kal tura ka tih avang chuan Mama te awmna lam chu a pan phei a.
Security te bulah chuan kal tir tura ka tih thu a hrilh a midang pawh chuan Mama chu an thlah ve mai a an kal darh nghal sang sang a Mama nen chiah kan awm tawh "lo kal rawh i hliam ah khan damdawi hnawih ang" ka ti a, ka biakna chu hria ang pawh a lang lo chuan ngawi reng a ding in min en reng.
"Mâm... ka biak che chu" ka ti hliai, ding țha in min rawn pan phei a a luhna tur chuan ka lo ding sawn zeuh a room-a a luh rual chuan lut ve nghalin kawngkhar chu chhung lamah ka kalh nghal a room laiah chuan alo ding reng.
"Sofa-ah khan lo va țhu rawh damdawi ka lo lak ang che" ka ti a, engmah pawh sawi lem hleilo chuan ava țhu phei ve mai bawk a rang zetin first-aid kit chu ka la a a bulah chuan ka phei ve nghal vat a, a bulah chuan țhu in box chu ka hawng mawlh mawlh.
"Engtin nge i in tih nat a?" Hlauthawng ru zet chuan ka ti a, mahse a ngai te bawk in chhanna ka dawng lo leh tawh. A insual ngailo a tihnat dan rin dan tur mai ka thiam lo bawk "min chhang rawh... engtin nge i tihnat a?" Ka ti leh, lapua keng chunga amah ka en rual chuan mit sen rûm chuan min lo melh reng a a mit chu mittui in a chîm tih ka hmu chiang hle bawk.
"Tinge ana mi?" Amah en reng chung chuan ka ti sep a a ni erawh chuan a lu a thing nghut. "Engmah a ni lo hnawih rawh" a rawn ti hmuk ringawt a, a kut chu ka hnawih turin a rawn dawh hnai lehnghal zat a rei ngial amah chu ka en leh phawt a ngaih țha zân lo chung chuan a kut chu ka tifai zui ta ringawt bawk.
"Lo awm hnai la i biang kha ka lo hnawih ang" țhut mar pah chuan ka ti a, a rawn awm hnai ve mai "engtin nge i tihnat a? I insual ngai bawk si lo, bike nen i tlu ami?" A biang zawn a lapua lek kan pah chuan ka ti leh, a ngai te bawkin min chhang lo a min be duh lo aniang ka ti rilru nghal bawk. A biang a ka hnawih chiah chu ka zak hnuai a kut rawn zen lut in ka inrin hma hauh chuan nghet zetin min rawn kuah ringawt.
"Enge awmzia? Ana mi?" Mangang ru zet hian ka ti nghal a.
"Na lo, kan inhmuh lohna a rei tawh lutuk a ka ngai che a ka kuah che a nih hi" a rawn ti a, ka thâwk chhuah suai suai rual chuan nghet lehzual a min kuah in ka nghawng ah chuan a hmai a phum nghal a. Amah chu ka kuah let ve a ka awmdan chutianga a rem teh chiam loh avang leh min kuah ngheh êm avangin ka tan chêt mai ngaihna a awm lo.
"Damdawi hnawih phawt ila chuan thil kan sawidun dawn nia" a hnung a chûl zeuh pah chuan ka ti a "reilote chiah a ni mai reilote chiah" ka nghawng a a hmai phum reng chung chuan a rawn ti sup a "i damlo ami?" Ka ti leh ringawt, mahse chhanna ka dawng lo a ngawih leh tak reng avang chuan engmah ka sawi zawm tawh lem chuang lo a.
"A hma ai chuan i taksa te pawh an kuah tham ve tawh zawk a nih hi" a rawn tih rual chuan a hnungah chuan ka chûm zui țawk a za zet hian a rawn nui chhuak nghal hawk hawk "i thau ve tawh ka tihna a nih chu!" Nuih deuh reuh pah hian a rawn ti leh "a hmelchhiat thlak emai min thlah teh" ka ti hlak a, nui ri leh suk in min thlah ve mai bawk a amah chu ka melh zui nghal rawm rawm.
"I țhan belh bawk" a rawn ti leh.
"Hmela!" Ka ti zui nghek a, za zet hian a nui chhuak leh hawk hawk bawk. Ka bula a nuih duh pawh ka rin tawh loh hnu a hetia lungkham neih loh hmel taka a nui leh thei tih ka hmuh hian ka hah a dam sawng sawng a ka phurrit te lak kian ang hawk an ni, ka veng huai thei min haw hlen dawn amaw ka ti hman tawh tak tak.
"Ka tihpalh, khang hun chhung zawng zawng a ka rawn biak loh cheu vangin in duh chuan min haw thei a engtin pawn min ti mah ula ka dem lo ang che u, ka thiam thu sawi tur pawhin dikna ka neilo a in kiang hnaih a awm ngam tur pawh ka ni lo tih ka hria" a biang a damdawi ka hnawih mawlh mawlh lai chuan ka ti a, a ni pawh a ngawi reng a chêt pawh a che lo.
"Ka thlen thlak khan ka phone ka ti bo a mahse a dang ka neih leh hnuah pawh khan in number lak ka duh lo a, nia... helam chanchin engmah hriat ka duh lo a mahse Siami hnen ațangin in dam țha tih chu ka hre leh vek zel tho, he lam chanchin ka hriat chuan min tihbuai leh ka hlau a chuvang chuan ka rawn be duh lo cheu a" ka ti nawn leh a "chuan" a rawn ti ve ta sup.
"Min haw vek mah ula ka dem lo che u ka ti a nih chu, ka tan khang zozai kha min tihsak a mahse keiin a ka rulh let dan cheu erawh natna bak a ni lo min hua in min ânkhum vak vak ula ka tan a nuam zawk in lakah ka inthlahrungin ka in thiamlo takzet zet" țhut țhat pah chuan ka ti a, lapua chu dustbin-ah chuan paih in box chu ka chhin nghal mawlh mawlh.
"Chu zawng chu ami sawi tur i neih?" Mama chuan a rawn ti a, amah pawh en lem lo chuan ka bu nghat "taka, hetah eng ti turin nge i rawn kal a chuan engtin nge ilo luh theih?" Kan boruak țang ru lutuk kalsan tum in țhut ngil pah chuan ka ti a, mit ti zîm sun a sofa nghenchhan nghen pah chuan min lo en reng "luhruk te chu kan hnehsawh êm kha mahse khang mihring ho khan i room an lo veng a min lo hmu hman thawt thawt a!" a khabe tuai deuh nawk pah chuan a rawn ti deuh nghut a, ka nui nghal sêih bawk.
"Nia... mahse engti turin nge ilo kal?" Ka ti leh, a pem a neih dan hi chu engti kawng zawng pawn zawt mah ila min hrilh dawn teuh loh avangin zawh nawn ka tum tawh lem hranlo kum sang tam tak pawh ral mahse khang ho zawng zawng kha engtikah mah ka theihnghilh ngai lo bawk ang "hmu tur che in ka lo kal" tih zawng a sawi.
"Chu zawng chu maw?" Ka âwih loh lutuk avang chuan ka ti hliai a a bu nghut "ila danglam miah lo" ka ti zui sep a, box chu la kang in ka tho chhuak nghal a. Eng thil pawh zawt ila tu hnenah mah chhanna țha tak a pe ngailo a zia engmah ala thlak lo he mihring hian "nang chu i danglam tawh" box drawer-a ka dah luh lai a a thu sawi avang chuan ka tawp chawt!.
"Ka la ngai reng" ka ti ve tak na in âwih loh hmel zet hian a nui zui hawk "i danglam tawh, nangmah hrechiang apiang che in i hnenah chu chu an sawi ang i danglam tawh Hming... i danglam tawh lutuk!. Kei chuan a hma a Hmingthanzuali kha ka duh leh tun hnua Hmingthanzuali hi ni lo in" a aw chu a ring lo mahse kan pahnih chauh a kan awm avangin ka hrechiang lutuk tlat!.
Box chu ka dah lut fel a ka zawh chuan a lam chu ka hawi phei a mahse sofa-ah țhu tawh lo chuan curtain zar phui vek bulah chuan a kekawr ipte zen chungin min hnungchhawn zawng chuan alo ding ngur a curtain ka zar phui vek avangin tukverh ațangin engmah a en theih loh.
"I fapa chu enge a an? A dam țha em?" Kan thusawi a lut lo chuan thildang ah ka lut daih a a chhan pawh tunah rih chuan khatiang sawi kha ka duh loh vang a ni "kan thusawi kalsan in hmun dangah pen tum suh Hming" a rawn ti ta chat reng bawk.
"Khawngaihin, khatiang thil sawi tura heta lo kal inih chuan ka ngaithla peih rih lo nakinah pangngai deuh in kan sawi zawk thei ang em tunah rih chuan khatiang thu kha ka sawi peih lo" pangngai tak chuan ka ti a hrethiam se ka ti zui ngawih ngawih bawk "tuna kan sawi loh in engtikah nge kan sawi ang? Kan thih hnuah chauh maw kan sawi ang, ti hian em ni 'kan damlai a khatianga ka lo awm lo kha ka inchhir leh hnuhnawh e..' tiin, huh! Thih hnu a sawi chuan enge hlawkna a neih?" A aw ațang chuan a lungawi hlawllo tih a hriat theih inthunun a tum hle tih pawh ka hre ngang bawk.
"Chutiang lam ka sawilo ka..." ka beng a earbuds ka vuah rawn mur chur chur avang chuan ka thusawi pawh chu sawi zawm lo chuan ka beng a earbuds ka vuah chu ka hmet zeuh "Miss tunah khan News en ngei ngei turin ka duh che thu lawmawm ania a ranglam in i hmuh ngei ngei tur thil a awm" Cora chuan a rawn ti a, rang zetin dawhkan lam chu ka pan phei a Lalmama min biakna pawh chu ngaihsak lo chuan Laptop-ah chuan password ka chhu lut nghal mawlh mawlh.
Mahse ka thil hmuh avang erawh chuan khumah ka țhu thla nghal dawt a ka sam chu tuai chho puat in ka thaw chhuak nghal ham ham. Nikum ațanga Norish nen kan buaipui tawh kan rawih model pakhat chuan NYP Agency a lut fel tih News-ah chuan a rawn inziak a ka tihtur pakhat ka zo ah ka ngai nghal hmiah bawk. NYP lam in Twitter lamah pawh a ni ang model an thawhpui theih avanga an lawm zia thu an tweet a mahse lawm erawh an lawm rei dawn hauh lo.
"Cora... buaipui țan rawh aw a thil rawn report apiang Norish leh ka hnenah chauh a thleng tur a ni, midang an inrawlh tur a ni lo chuan amah kha a fimkhur tur a ni tih hrilh nawn leh ang che an man chhuak tur a ni lo a tawp râk thleng in" ka ti zui sap a a tihtur thu a rawn sawi rual chuan Laptop chu khup in ka nui chhuak hak mahse hemi atan hian min pui tu tur mi dang ka mamawh belh dawn a chu erawh helai a ka chho ta a nih rau rau chuan mail kaltlang lo in hmaichhanah ngei keimah ngeiin ka biak a ngai a ni.
"Tunah pawh khan i danglam zia hre tur ini asin" Mama aw ka hriat rual chuan ka hawi chhuak nghal deuh zawk a dawhkan ah chuan innem khalh rûn chung in min lo en reng tawh "Mâm... hei chu hna lam thil a ni keimah nen engmah inzawmna a neilo" amah en pah chuan ka ti chhuak hap, a ner sawk a ngeiawm zet hian min rawn en a "i danglam tawh zia chu sawi ngai lovin i chezia ah a rawn lang zel ang" ti deuh hrâwih in kawngkhar lam a pan a dan beh pawh tum lo chuan a kal liam lai chu ka en zui ta reng.
Mama kal chhuah hnu lawk ah Cora a rawn lut zui nghala he Hotel in buaina an tawh loh na tura hma la turin ka lo hrilh nghal bawk. Helai hmunah ka la awm rih deuh dawn avangin Mama erawh pangngai deuhin thil ka la sawipui ang ka danglam ni lovin ka nihna leh landan avanga danglam chawp ngai ka ni tih erawh chu ka hrilh lovang, ka thusawi ang ang a âwih dawnlo a nih erawh chuan a bak hrilhfiah ngaihna ka hre dawnlo, enge a tih țhin ala danglam dawn loh ang bawk in amah umzui dan tur ka hre bawk.
Norish a rawn thleng a, a nitei te inah chaw kan ei dawn miau avangin inchei hranpa lo chuan ka zui chhuak ve nghal a Norish a awm avanga Cora pawn min ngaihtuah lo a ni reng bawk "ka rin dan chiahin NYP lam chuan thil an ti, khanu kha a che țha a ruahman anga thil a kaltluang a nih chuan kan tan engkim a awlsam ang" Norish chuan Car khalh reng pah chuan a rawn ti a țawngkaa chhang lo chuan ka lo buk khum nghat thung.
"Helamah kan la awm tho bawk sia mail thawn țhat leh hranpa ngai lovin hmaichhanah ngei ka bia ang ka tan a harsat vak ka ringlo a nin min puih chuan kan tan kawng a in su kaw lehzual dawn a a hma kha chuan ka thawn tawh tho a" ka ti a "a dik ve reng, naktukah ka chhuk ang kei chu i hriat kha media lamah in lan a ngai ka pa in ka kutah a dah a ka tih ngei a ngai" a rawn ti a, ka ner nâng.
"Fair lo ve, i rawn chho lehnghal dawn em?" Ka ti hlak.
"Kan zawh chuan chhoh leh âwm tak ania ka hrelo le nangmah mai a engkim i tih chu ka phallo helamah ngat phei chuan chuvang chuan a rang lam in ka rawn chho leh ang" a rawn ti a, ka thaw chhuak ham ham "mahni in puang ve tawh mai la țha tur" ka ti niah niah "nau-i i hriat kha, keimah ka ni tih an hriat chuan min bitum nghal dawn tih chuvang chuan a theih chhung chu ka thup rih ang, shit! Avan ho ve!" Kawngkual a a kual tur a kual sual avang chuan a rawn ti zui nuah nuah a chhang lo chuan pawn lam chu ka thlir ta daih.
William-a te Agency-ah share ka nei ve tih hre ngat se chuan e... rei a inthup miah lo ang mahse project a hlawhtlin zel theih nan a theih chhung chu ka zêp ang kan tan ala țangkai dawn chauh si a!.
"Nau-i kan thleng" Norish aw ka hriat rual chuan driver seat lam chu ka hawi phei nghal vat a faifûk rât rât chung a chhuk tum in alo in ruahman mek he mihring thawven em em nachhan hi ka hre duh, tunah hian a thawveng lutuk takzet. Car kal hual a ka țhutna lam a rawn pan chu mit khap lêk lo in ka lo melh ngawt ngawt! A faifûk rât rât a a Car chahbi a vawrh leh zeuh zeuh zel bawk. Hetiang a a awm hi ka hmu khat lulai lutuk a mak tihna in ka khat lo theilo.
"Lo chhuak rawh le nau duatte" ka țhutna lam kawngkhar rawn hawn pah chuan ala ti ta deuh deuh, Car ațang chuan chhuk in kawngkhar chu keimah zawkin ka khar leh a "i piangthar ami?" Amah en pah chuan ka ti deuh ngat, min rawn en a a hmel te chu a de sawr sawr a ka hriat.
"A âtthlak emai, thil thleng avang hian ka mood a fuh a nih hi lut ang an lo nghakhlel tawh ngawt ang che" tih pah chuan a kut chu ka vawn turin a rawn dah a âwih lo lutuk a amah melh pah chuan a kutah chuan ka vuan a "i daw heh zîp zêp a nih chu!" Ka ti zui hlak a ka chalah chuan a rawn pen zui kawrh!
"Nakinah kimchang deuhin ka hrilh ang che thil hriatchian hma chu min zawh dan tur ngawt i zawng leh dawn ka hria mahse tunah chuan lut phawt ang an vaiin an lo nghakhlel tawh teh mai che nia" a rawn ti a, min kai reng chung chuan a nitei te in lam chu min pan phei pui nghal bawk. A thawven nachhan hi project hlawhtlin dawn vang a nih loh kha ka ring reng a ni! Thil eng emaw tak a tawng chiang alawm.
"Nite kan lo thleng" kawngkhar hawn pah chuan a au lut a mahse inchhung lah chu alo reh deuh țhiap "nite" Norish bawk chuan a ti leh. Ka hawikual lai chuan choka lam ațang chuan nu pakhat hi a rawn chhuak a "e.. in lo thleng tawh law tinge tah khan in din reng rawn lut tlang ta che u" a rawn ti zung zung a Norish chuan kal turin min mit mei zeuh bawk.
"Khawnge midang hi" tih pah chuan min kai phei zela ka zui ve dat dat ringawt hepa hian a hrechiang ang ka awm țhan lohna ah chuan ka ți dâk zel țhin tih, a hma pawh khan ka ni ziah "an chhuak lawk a nih kha, heihi mi Hmingthani chu" tih pah chuan min rawn en a ka lo nuih var var "aw a nih hi nau-i ka nutei a nih hi fel over lutuk mai a nih hi" Norish chuan a rawn ti a chibai turin a kut chu a rawn dah chhuak a ka lo vuan nghal vat.
"I hmelțha tawp" nuih var var pah chuan ka ti a âwih loh hmel lutuk hian a rawn nui hak hak a mahse ka ti tak tak, a ngo hranlo mahse a fai veng a a hmelțha lutuk ringawt "a âwm ang lo țhin emai nangmah lawm hmelțha le a takah i hmelțha zawk daih a nih hi Norish lah hian an fak thei khawp mai che a" a rawn ti a Norish lah chuan a aw alo thian kharh kharh, he mihring dâwt heh zia hi chuh!.
"Lo țhu rawh u thingpui ka rawn pe ang che u" a ti a, kan țhutfel rual chuan amah zawk chuan choka lam a pan leh "dawheh pa i dawheh zia i hria em? Dawt sawi hnem avanga pum nat awm țhin ta se chuan damdawiin lut zing ber ini ang" Nitei a awm tak loh ah chuan ka ti nghal hlak, sofa nghenchhan nghen ar ar pah chuan min rawn en a "nau-i tuman dawt an ei ngailo nakinah ka nau te ho lo thleng se ka inhmelhriat tir leh ang che" thawveng zet hian min chhang let a a phone la chhuak in min khawihsan daih lehnghal.
Norish-a leh ka pa hnen ațangin ka chanchin an hre vek tawh a helama ka nun hman dan zawng zawng leh kan chhungkaw chungchang chen in ka nun hmasa a ka sual theih zia erawh alo hre ve a mahse engmah min zawt chuang lo, ka sual zia kha chu tu pawn an hria ang mahse kha hmeichhia khan tunah hetiang dinhmun ka thleng tih hria an awm mang lo thung.
Doctor-a erawh chuan message hmang in mi zai tur a neih thu a rawn sawi a ka chhang let a mahse a in one tick ringawt tawh thung. Min thlah hnu khan Hospital lamah a let lehnghal a tunlaiah Doctor te an indaih loh zia ka hre ve a chuvang chuan âwl mang an nei ngailo tih min hrilh tel bawk.
Chaw ei khamah Hotel lamah min thlah let lehnghal a reilote room chhungah a rawn lut ve zawk a eng eng emaw kan sawidun leh bawk a dar 8 dawnah a haw ve chauh.
*Ka ngai che* Doctor-a message chu ka chhiar a ka nui ver ver, Laptop-a ka thil khawih lai chu dah in khumah chuan ka țhu țha a *kei pawn* tiin ka chhang let a, a seen nghal pang a call a rawn lut zawm nghal zat.
Ka chhan rual rual in "i sawi ngei ka hre duh" chauh hmel zet hian a rawn ti zâwi sup, khum lu chu ka ngheng a ka rizai sin chu ka nghawng dawn thleng ka pawt chho "Bawihi..." ka chhan lawk loh avang chuan a rawn thlûk nghal vak a ka nui ri hak.
"Kei pawn ka ngai che" ka ti sep, a reh vang vang "sawi leh rawh" ngenngawl zet hian a rawn ti a "ka ngai che, ka ngai reng zel che, khang kum 6 chhung zawng zawng ka ât luat avanga mahni hreawmna ka insiam hun chhung zawng zawng ah pawh khan ka ngai reng che, zan tin deuh thaw ka mangah ka hmu ziah che a khang hun chhung reilote i kiang a ka awm a hlimna ka dawn nasat hman zia ngaihtuah chungin zan hun kha ka hmangral țhin, hna ka thawh loh hlek chuan ka ngaihtuah nghal ziah che a mahni in thiam lohna avangin ka țap ziah bawk" ka ti sep a, ka vei lutuk kha ka sawi chhuak ta a ni ber.
"A nih, i kal tawh dawnlo a ni tiraw? Sawi teh bawihi khang hun kha chu a liam tawh tunah hian i kal tawh dawnlo a ni tih sawi hram rawh!" A aw ri chhuak ah chuan hlauhthawnna bawk ka hre tel, rizai chu hmer in ka ngawi vang vang "Bawihi" a rawn ti leh nghut a, rilru hah zetin a thaw chhuak hawk tih ka hre thei.
"Um... ka kal tawh dawnlo thil engkim hmachhawn ka huam tawh ka tih awmzia chu a hma ang pawh khan la awm mah ila ka kal lo ang ka tihna a nih chu" ka ti a, hahdam zeta a thaw ri ham ham ri chu ngaihthlak a nuam takzet "kal i tum a nih chuan ka phuar bet che anga che thei tawh lo turin ka siam ang che, pawm kual reng che pawh pawi ka ti lo a nih loh pawn ka ta inih ngei ngei theih nan thildangin hma ka la ang" a rawn ti nghut a a aw ațang chuan a thu tak zia ka hre thei.
"A nih chuan chutiang a ka awm lohna tur chuan ka kal loh a ngai a nih chu, thu ka âwih tawh ang" fiamthu ti tak zet hian ka ti a "Bawihi" a rawn ti nghut a, ka nui chhuak nghal hak bawk.
"Tunah hian i bula awm ka chak zia chu pui tak a ni. I hmui sexy zet kha ka fawp leh chak tawh bawk a rawn kal lo tura ka insûm nasat zia hria lang chuan min nuihzat zawk ang" a rawn ti a ka nui nghal sêih, amah aia nasa in a bula awm ka chak zawk ang "nangmah aia nasa in ka chak zawk ang" ka ti sep a a rawn nui ri suk.
"A nih chuan ka rawn kal ngei a ngai dawn a nih chu"
"Zanin i night dawn ami?" Ka ti a.
"Dawnlo, ka haw thei țep. Aw ni e, lo țhu rawh u enge ni ta?" A tih zawm a, midangin an rawn be buai pawh a ni maithei "aw a nih chu, Bawihi ka rawn be leh ang che tlawhtu ka nei a" a rawn ti a, min rawn be leh vat tura hrilh in keimah zawkin ka off hmasa ta zawk a, phone chu ka âwm ah dah in ka maimichhing a ka thaw chhuak nghal ham ham bawk.
A dp chu ka check sak a, an chhungkaw thlalak chawlhni thawmhnaw nena an lakna chu alo la hmang a hemi hi a hma pawh khan a hmang tawh, a thlak ngailo, a about velah pawh 'ka nunna an nih angin ka hlimna an ni bawk' tih ala hmang bawk. A chhungkua a hmangaihzia ka hria, engkimah a dah hmasa ber zel bawk, a hma khan ka hre tawh thil pawimawh a bikin chhungkaw lam thil leh hna lam thil a tih dawn reng reng in a chhungkua a râwn hmasa ngei ngei an sawi ho hnu vekah a ti chauh zel. A tan chuan hna ai pawhin a chhungkua te an pawimawh hmasa zawk.
Kei pawh hian ka tum ka zawh fel hunah ka hna ka bansan ang, ka nu leh pa (Norish nu leh pa a sawina aw) te tan a ka tih ve theih awmchhun hi ka tihfel hun hunah ka bansan ang. Ka thiltih tum hi ka chunga an thil min tihsak ai kha chuan ala nêp lutuk ang Hmangaihna min pe a kei pawn ka theihna zawng zawng hmangin Hmangaihna in vur let ka duh a, engtikah mah ka tana an thil tih hi ka theihnghilh leh tawh ngailo ang, chu tih rual erawh chuan dik tak tho siin an tan kawng ka hawn zau sak dawn a ni.
★
"Hey nangnu hi! Induh hlum țhak i tum a mi nge min theihnghilh tawh zawk?" Phone ațanga rawn ti lang lang tu avang chuan ka nui chhuak hak a Laptop chu khup in khum ațang chuan ka tho chhuak a "i number neih loh te chuan biak dan tur i awm lo êm alawm hei pawh Siami ka dil chawp ania ka theihnghilh reng reng lo che" ka ti let a a âwih loh thu a rawn sawi lehnghal zat.
Curtain ka zar phui chu ka pawt hawng a room chhung chu a rawn êng deuh ta uarh "ok... eng pawh chu nise helam hi chu duhtawk ila nakinah kan inhmuh hunah kan sawi dawn nia tunah hetah Mizoram-ah i awm em?" Ka ti a, tukverh chu ka nem tawlh nghal zui nghal a.
"Awm e.... ka awm char char tawh ang ka pa leh ka nau puih a ngai a" a rawn ti a.
"A nih chuan vawiin chu in dawrah ka rawn kal dawn a i hman chuan nangman min lo dawngsawng la i pa biak ka duh a i awm dawn em?" Ka ti lehnghal zat.
"Awm dawn e... ka thleng țep tawh ilo kal dawn chuan ka lo dawngsawng ang che keimah ngeiin mahse vawiinah programme i nei a ni lawm ni?" A rawn ti leh, dawhkan a lehkha awm chu ka bih zeuh "chawhnu dar khatah ka nei chumi hma chuan ka hman ka insiam anga ka lo kal ang" ka ti a, a thlen țep tawh thu sawiin kan in biakna chu kan ti tawp a room chhunga Cora rawn lut chu ka melh nghal a.
"Cora... chhuak turin lo inpeih rawh aw" ka phone sofa-a theh thlak pah chuan ka ti nghal sap "mahse... chawhnu dar khat ah programme i nei a chuan dar 11-ah pu Norish chhuak tur i thlah a ngai a i hman dawn ami Miss" a rawn ti a, a ipad ken chu ka hmuh theih turin a rawn lek nghal zat.
"Norish chu ka hrilh mai ang mahse ka hman tho chu ka ring ka tihtur ka sawi chuan a hrethiam mai ang project a hlawhtlin theih nana mail thawn ngai lo turin keimah ngeiin hmaichhanah ka va hmu dawn a lo inpuahchah rawh ka intleuh zuai anga kan insiam ang e" ka ti a, min chhanna pawh nghak lo chuan bathroom lam ka pan phei nghal a.
Doctor-a ka chhuahna tur hrilh in inchei teh uak lo in ka chhuak a mipa lian pui pui pathum leh Cora hruaiin Emily te dawr lam pan in Van-ah kan chuang ho a Cora chuan tunkar chho a ka hun hman dan tur a sawi diat diat bawk "engtikah nge Sabina te an lo thlen dawn?" A thusawi lai pawt chat in ka ti a, a ipad ken chu min rawn pe a "naktuk dar 12-ah an rawn thleng ang" a ti a, mail ka dawn hrang hrang chu ka check deuh zuai zuai bawk.
"Mizoram-ah ka tir chho fo a buaipui a ngai êm lo ang chu!" Ka ti zui sap, Cora aw thian kharh kharh ri ah chuan ka hawi chhuak a laih hmel zet hian a sam a bengah alo zep a ka ipad ken chu dah thla in amah chu ka en a a rawn hawi chhuah rual chuan a beng a sen vek! Hetianga a awm tawh hi chuan a chungah thil eng emaw lawmawm tak a thleng tihna a ni țhin "what's wrong with you?" Ka ti ngat, en pawh min en ngam mang lo chuan hmalam a melh ve ngat ngat reuh a "Cora... i sawi dawn nge a hma ang tho khan zêp leh i tum?" Amah en reng chung chuan ka ti leh.
Min rawn en a a biang a sen vek tih ka hmuh rual chuan ka nui chhuak nghal hak "titeh... sawi mai mai rawh ka seh dawnlo che" a awmdan avang chuan ka ti chhuak hliai a, a aw thian leh kharh kharh in a rawn țhu hnai sauh sauh a "Min rawn bia a" tih zawng a sawi "amah khan" zâwi te in a rawn ti leh.
"Wait! What!? Tu amah maw tu maw rawn bia che? Ka hming chhal in kha mihring kha a ni tih min hrilh hlek suh Cora" Chiang zeta amah en pah chuan ka ti nghek a hawi pawh a rawn hawi ngam tawh lo "Cora kha mihring kha a ni tih chu sawi i tum êm lovang chu tiraw?" Amah ka ngaihtuah luat avang chuan a aia dam zawk chuan ka ti leh ngat, a ni lah chu min chhan a tum tawh lo nge ni a hawisawn hmak.
"Cora!" Lungawi lo zet hian ka ti leh nghat, min ngaihsak lo tih hriat ngawih ngawih hian hmundang a en daih "Miss... i kalna tur hmun chu kan thleng tawh e" driver-in a rawn tih rual chuan ka thaw chhuak nghal hak "Cora... i mimal nun control sak che ka tum lo min hrilh ve turin ka duh mai chauh che a ni, kha mihring lakah khan bumna hmang a i tluk luh ka hlauh vang zawk a nia i hriatthiam ngei ka beisei" ka ti sap a, ka chhuahna tura kawngkhar an rawn nem tawlh rual chuan motor ațang chuan ka chhuk thla nghal bawk.
Building lam chu ka pan phei a ka hnungah Cora te chuan ngawi rengin min rawn zui ve zel a. Building kawtah chuan Emily chuan min lo nghak tih ka hmuh rual chuan ka hmanhmawh leh zual sauh "hey..." min rawn hmuh rual chuan a rawn ti nghal var, a bul ka thlen rual chuan min lo kuah nghal a.
"Pawn a ilo awm kher a ngailo asin" amah kuah let ve pah chuan ka ti a ka hnungah chuan a rawn beng dawt a "nang ang khual ropui te chu chhe deuh ten kan dawngsawng ngam nang mawle" a rawn ti a "over lo mai teh!" Ka ti zui hlak a a rawn nui chhuak nghal hak hak bawk.
"Taka... hei ka nau kha ila hria em?" Tih pah chuan a bula mipa ding ve reng chu min hmuh a mahse min hnungchhawn zawngin alo ding thung "Mama" Emily-in a tih leh takah chuan muangchangin a rawn hawi a "amah kha maw?" A danglam tak êm avang chuan ka ti chhuak hliai, Mason-a pawh a nui suk ringawt.
"Hey... ka hmu che chu ka lawm mahse i danglam tawh lutuk a khawlai velah pawh hmu che ila ka hre dawn tawh hleinem che" ka ti a a nui suk a "ka danglam vak pawh ka lo hre hleinem, i dam maw?" Tih pah chuan min rawn kuah a, ka nui chhuak hak ringawt. A sam dum hlap a tukhum thleng vel ni tawh tur chu a chhip ah a khuih pial chho vek a a bek chu a kâwng lutuk lo bawk, a landan a hlauhawm ru viau nangin amah a fresh bawk nen hmuh a hahdam letling zawk.
"A sam tihdan hian a tidanglam êm alawm ka nu in a hauh nasat zia chu aw...." Emily chuan a rawn ti leh a ka nui ringawt "mahse a inhmeh êm hi.. taka i pa chu a awm em?" Ka ti lehnghal a.
"Awm e... i hmuh duh thu pawh ka hrilh tawh a a ni pawh a thlenna ala reilo meeting an nei dawn a hmanhmawh erawh chu a țha tho, Mâm... deliver-na tur ho kha lo enfel rawh aw ka rawn chhuk ve vat ang" tiin a nau a be zui leh a.
"Ka chhuk dawn hrim hrim alawm, a nih u Hmingthan kan inhmu leh dawn nia aw zanriah min eipui ila bat kha" mit min siai zui zeuh pah hian a rawn ti a, a sawi ka hriatchian êm avang chuan nui chhuak hak in helam a ka awm chhunga ka eipui tur thu ka hrilh a a kal zui ve leh mai bawk.
"Ka pa i biak zawh ah thil sawidun ang sawidun tur kan ngah" Building chhung a luh pah chuan a rawn ti a "ka duh hrim hrim kei pawh bakah thil kan sawidun lohna pawh a rei tawh" ka ti zui ve leh bawk.
Pa Damian-a Office kan thlen rual chuan min luh pui a a pa chu tukverh-ah a kekawr ipte zen run chungin keimahni min hnungchhawn zawngin alo ding rûn a, Emily pa hi ka hmuh hmasak ber khan ka hlau lutuk a an in ațang ka haw ru tawp a nih kha ka mizia khan amah a zahawmna lo lang chhuak kha a ngam thlawt lo atin ni, mahse a lan ang ai in a lo nêlawm daih a tun thlengin amah zawk hian sawichhuah ala ching țhin, a nu erawh rin phak bak in a fel a a hmelțha tawp bawk.
"Pa kan lo thleng" Emily-in a rawn tih rual chuan a fanu aw hria in muangchangin a rawn inher ruai ruai a "ka rawn be leh ang che" a ti sup chu ka hre pha, a phone a dah thlak rual chuan a ipte ah a thun zui a "lo țhu rawh u, bawihte, i nu in a rawn be tawh che em?" A fanu lam rawn pan phei pah chuan a rawn ti a a chang hi chuan amah hi ka la hlau tho zel.
"Aw... nichinah min lo bia ka haw pahin ka lam kawi mai ang nute Maria-i pawh alo kal dawn a a remchang tho a" tiin Emily chuan a chhang let a, a fanu bul a rawn thlen chuan a chalah a fawp nghal vang vang a "theihnghilh lo la i nu i ngam ngawt a nih loh chuan" nuih suk pah hian a ti leh sup, pa in hetiang ang em em a mahni fate an hmangaih leh an duat hi ka la hrelo, hmuh pawh ka la hmu hek lo, pa Damian-a hian a fate hi a duat hneh lutuk mahse duat dan chin tawk erawh a hre hle thung a a chhungkaw bula a awm a a hmangaihzia a mitmeng ațanga lang chhuak țhin hi tu mihring mah hian an hmuh hmaih ka ring lo bawk.
"E... Hmingthan țhu ta che, tlanchhe rual pawh ni tawh lo khawp in ilo lian ve ta a nih kha" a rawn tih rual chuan ka ner nâng "kan inhmuh apiangin sawi i tum ve ziah" ka ti nghal hlak a, a nui chhuak nghal hawk hawk bawk.
"A be duh che a, kei chu khutah dawr lamah ka lo zu chhuk ang Hming... i zawh hunah min lo hrilh rawh aw ka kal ania pa" kan țhutfel hnu chuan Emily zawk chuan a ti a, hnial pawh ka tum hranlo a chhan pawh kan thusawi tur hi a hre lo se ka duh zawk, thildang chu nise awm ve reng turin ka ti zawk ang a chhan pawh a pa bulah hian rei ka awm ngam țhin thlawt lo a tin ni ka hlau lam pawh a ni lo ka zah vang zawkin.
"I dam țha maw? I hnathawh te chu enge a an a, i puitling chak si a hetiang dinhmun lai i thleng tawh a i nu Lora-i nen pawh kan lo chhuang lutuk che a" Emily chhuah hnu chuan a rawn ti a, ka thaw hak a "nia.. a pangngai a ni mai bansan duh daih chang te chu a awm ve țhin tho a mahse hei eng emaw ti ti in ka la kal ve zel chu nia" ka ti let a, an chhungkua hian min hrechiang êm a kan chhungkaw dinhmun pawh, ka nun hman dan thlengin mahse ka rilru natna turin vawikhat mah an awm in an la țawng ngailo.
"A ni lutuk ang i rin ang aiin i nun pawh a tâwt zawk anga tiraw?" A rawn ti leh sup a, coffee emaw thildang ka duh leh duh loh min zawt nghal a mahse ka duh loh thu in ka chhang thung "umm... thil hi chu hmuh leh hriat ang ngawt hi alo ni chiang lutuk a" ka ti ve sap.
"I mail rawn thawn hmasak ah khan țanpui dilna ni âwm tak i rawn thawn a chumi chu em ni i rawn kal chhan ni a" hrethiam tih hriat zet hian a rawn ti a ka bu nghat a "aw khami kha ka rawn bawh zui dawn a englo ania i puihna ka mamawh lutuk a min pui thei ang tiraw?" Ka ti a, țhu țha in a kiu chu a khupah nghatin a kut chu hmalamah a suih zawm deuh rûn a a awmdan țhin hi lawm tam tak tan hlauhawm țhin em em chu, a zahawm ve vu bawk si.
"A chhan i sawi hreh loh chuan sawi la tih theih ka nei ve te a nih chuan ka tihsak em em ang che" a rawn ti a.
"A chhan chu chiang deuhin ka hrilh tho che ang a mahse Mumbai lam a i hming a Building awm Mason-a enkawl lai mek-ah khuan ka hming in share neih ve ka duh a chu chu min tihsak thei ang em?" Ka ti a, a ngaihna hriat loh hmel zet hian min rawn en a, a khabe chu tuai zeuhin a țhutna sofa hnung chu a ngheng a "Mumbai lamah Building pahnih ka hming in a awm a Mason-a kutah a awm ve ve a eng zawk ah nge i tih a?" A rawn ti a.
"DELIM lampangah zawk khan ania tun thla magazine in tih chhuah pawh kha ka lo hmu a chuan ka hming a share neih ve ka duh a chu thil chu min tihsak thei ang tiraw?" Ka ti nawn leh sap, remti se ka ti takzet bawk.
★ Dr. Zoremsanga POV ★
"Tunlaiah Doctor leh thawktu indaih loh zia i hria chuvanga i ban na theh luh pawm lo pakhat ka ni bawk a chhan dang erawh sawi fak a ngaiin ka hrelo i duh chuan kar khat chawlh kan pek che kha nuam takin i chen thei ang" a thusawi avang chuan ka țhen sak.
"Chu chu chhuanlamah i hmang theilo ang ka banna theh luh in pawm loh chhan hrechiang ber tu hnenah dawt bawkin i khuh mawi leh a eng ang mihring nge maw inih hrep le!" Ka ti zui nghut.
"Ka sawi kha i hrechiang tih ka hria chuvang tak reng chuan alawm i banna pawh pawm lo ka nih reng ni, Hospital neitu ka nihna angin ka thusawi chu i zawm tur a ni chuan i duh a nih chuan ka fapa nihna saw i kutah ka hlan ang" a sawi zawh rual chuan ka nui chhuak hawk!.
"Nihna a buai rual ka ni tawh lo tih chu i hria anga tiraw? Minister ni mah la heng thil in tih chhan hi ka pa in tlawn duh vang tih ka hriat loh lah ring hek suh, naupang chhia kan ni tawh lo ve ve a naupang chhe treat a min treat i tum a nih chuan i tisual ang tih ka hrilh chiang hmasa ang che, saw ram Hospital din i duhna ram saw ka pa ram a ni tih i theihnghilh palh ania nge" ti sup in ka ding chhuak a.
"Chuan Hospital-in tun kum atana kan project neih tur kha naktukah hian ka thlak danglam dawn tih lo hre bawk la i ngam chuan min dang dawn nia chuan thil pakhat leh, ka banna lehkha in pawm lo a nih rau rau chuan kei pawn in chawlh min pek kha ka pawm lo ni teh se nidangah kan sawi zawm leh dawn nia" ka ti leh sup a, kawngkhar lam chu ka pan zui vut bawk.
In lam pan in ka inkhalh chhuak a tunah zing dar 10 a ri thuak, zing chaw pawh ka la ei lo a kha mihring teh hrep avang khan phone pawh khawih hman lo in zing kar ațang in ka buai a ka lehkha theh luh pawh ka buaipui zui hman tawh lo. Bawihi message pawh ka hmu reng mahse chhang hman zia zâng ka ni lo.
Ka phone rawn rik avang chuan ka en a number lawng a nih avang chuan jam laiin ka connect zui sawk sawk a ka tlan chhuah leh rual chuan "Hello" ka ti zui sup.
"Dr. Zorema a ni em aw?" Lehlam ațang chuan an rawn ti a.
"Aw ni e, engthil nge ni ta a?" Ka ti let a, hmanhmawh tawh nen motor chhuak a tam phian lehnghal "e... Tualpui ațanga nimin a lo kal te kha kan nia chanchin kan rawn zawt che a mahse nurse khan Damdawiinah i awm loh thu min hrilh a nangmah be tur che in min ti a kan rawn be tawp che a" inthlahrun hmel zet hian a rawn ti a, kan veng lam a tlan lut turin steering chu ka herh kual zui a.
"Aw... a ni maw, vawiin chu ka kal dawn lo a bakah ka țhut ni a ni lo hrim hrim bawk a engtin nge kan tih ang aw... naktukah in remchan chuan in rawn kal mai dawn em ni ang tah chuan lehkha ka lo pe chhuak cheu ang a in remchan loh pawn tunah ka chhuak tho a ka lam zawk anga ka rawn pe kawi thei tho cheu a" ka ti sup.
"A... ngai lo mai kan tibuai mai mai ang che naktukah kan lo kal mai ang chuan lehkha vel kha buaipui leh kher a ngai tawh lo tiraw?" A rawn ti leh a "aw... ngai tawh love Damdawiin in rawn thlen hunah ka Office-ah in rawn tlang tawp dawn nia aw tumah dil hranpa a ngailo, nimina nangmahni buaipui tura ka hrilh nurse Hlutei kha ka hrilh leh anga aman alo buaipui leh vek dawn cheu nia harsatna a awm lovang aw" ka ti let a, an lawm zia thu rawn sawiin an dah zui bawk.
Hetiang ang thingtlang ațanga lo kal, Damdawiin chinchang engmah hrelo te tana ka lo awm thei țhin hi alawm Doctor nih nuam ka tih em em chhan leh ka chak em em chhan, harsa tak chungin an rawn chhuk a hetah khawpui lama thil awmdan a mik a mak hrelo an tam tah chuan Nurse leh Doctor biak nuam lo tak tak an awm țhin mahse chutiang mihring erawh nih ka duh ve lo, an rawn in entir a a man lak aiin lak loh ka ngah zawk țhin Damdawi leina man tur an daih țâwk țhin a chuta an harsatna tih belhchhah sak tu nih ka duh lo bawk hetiangah chuan bum hmang leh thudik sawi hi a hriat theih fû țhin.
In ka thlen rual in motor ka dah fel a inchhung lam ka pan laiin Tc-a call a rawn lut zui a, vawiin chu nilengin ka indaih dawnlo chu a nih ber hi.
"Aw sawi rawh" call ka lak rual chuan ka ti nghal sup a, ka aw hria in ka nu pawh choka ațangin a rawn chhuak ve nghal a min rawn pan nghal vat bawk "chawhnu lam i chhuak hman dawn em?" A rawn ti a bang a sana in tar chu ka melh zui vut.
"Hman âwm tak thil sawipui cheu pawh ka duh dar engzatah nge?" Ka ti let a ka nu chu ka hmaah dingin ka awmdan chu in kuangkuah at chungin min lo en reng a ka lam a lo phei turin ka hui zeuh a a rawn phei rual chuan ka lo kuah nghal vat "dar zat chu ka rawn hrilh ang che i haw chiah ami engtin nge alo tih che a?" A rawn tih zawm a.
"Ka rawn thlen hunah kan sawi zawm dawn nia chaw te kan ei ve phawt ang e ka dah ania" ka ti sup a, call chu ti tawp in phone chu ka kekawr ipte ah ka thun zui a "chaw ei ah min lo nghak leh tawh ami?" Ka nu melh chhuk vut pah chuan ka ti sup.
"Nghak ang chu mawle, ka fapa zingkar ațanga thingpui pawh in hman lo khawp a buai hi chaw ka ei san phal i ring amaw ni le rawn kal rawh i pa nen kan lo la nghak che, chaw ei pah in kan sawi ho dawn nia" a rawn ti a, a chhipah chuan ka fawh sak vang vang.
"Lo ei mai tur cheu nia, a nih chuan ka pa eirawngbawl a ni maw kan ei dawn" ka ti a, a nui hak hak "a ni maithei ni, tukin zing chu i pa in siam a duh tlat pek alawm le kal ang thingpui tui tawk ka lum ang che" a ti a, choka lam pan in kan in kuah phei a. Ka nu pawh a upa ve zela kan unau lakah pawh a pangchang tial tial, duat nuam kan ti a a ni pawh pangchang zel se kan duh a thinrim dan tur ang zawnga awm erawh chu a tu mah mah in kan duh lo.
"Pa... vawiin chu House lamah len phei i tum em?" Ka nu thingpui min siam lem zeuh pah chuan ka ti a, bahkhawr then mawlh mawlh pah in a rawn hawi a, a apron hak leh a thil ken chu a eng emaw ti inhmeh phian lehnghal "min rawn sawm a chawhnu lam chu ka va lang ve ang chu ka ti deuh, lan loh tawp ai chuan chaw ei nghal te kha an tia ei chu ka ei kher lo ang" a rawn ti zui duah a thildang țhenkhat ka nu in a zawt zui nual bawk.
"Aj i dawr ami nizanah Mami'n order a nei em?" Ka kamis kilh hmeh phelh pah chuan ka ti a, ka biak pa lah chu a reh vung vung "Aijalon, infiam kual nan hun ka nei lo!" Ka ti zui nghut, a rawn nui zui ta hawk hawk bawk.
"Nei e mawle, hrilh tur che in min ti tak asin nangman i pek tur thu kha a sawi a" a rawn ti a, ka thaw chhuak hawk! Henu hi chu engtin emaw la tih a ngai a ni "chumi chungchang chu ka zawt reng che alawm fiamthu thawh turin ka rawn be lo che, i thil tur ka leina nen hian kan in cut fel mai dawn mi a awlsam zawk ang" ka ti a, loudspeaker-ah dah in t-shirt chu ka inthawlh zui nghal a.
"A pawilo ang. Tc-a khan a rawn bia che em vawiin tlai chu" a rawn ti zui a.
"Bia e, ka rawn kal dawn nia eng emaw sawipui cheu ka duh chhuahna tur ka nei hmasa a ka zawh hunah ka rawn kal dawn nia ka hmanhmawh ka rawn be leh ang che" ti sup in call chu ka ti tawp a jacket chu la chhuak in ka inthawlh zui nghal bawk.
"Bawiha, hmu duh tu che an awm a inhnuai lamah rawn chhuk lawk mai la nge i room-ah ka rawn tir chho dawn a pawimawh hmel si a" room-a rawn luh pah chuan ka nu chuan a rawn ti a, ka sana bun chu ka melh vut "tunge niang aw... hun ka nei tam vaklo asin. Ka rawn chhuk vat tur thu lo hrilh mai rawh" ka ti a, thingpui alo lum tur thu sawiin a chhuak zui bawk.
Inhnuai lamah chuan ka chhuk a ka nu in țhutkhawmna pindan a a awm thu min hrilh a ka phone kekawr ipte a thun zui pah chuan ka pan phei a mahse mihring lo țhu ka hmuh avang erawh chuan ka ding zui dawt a ka thawm hria in a ni pawh a rawn hawi chhuak ve nghal zat.
"E.... ka lo nghak reng tawh che a" rawn din chhuah pah chuan a rawn ti a, ka bu nghut "lo țhu rawh ka nu pawn thingpui a lum mek ang. Ka hmanhmawh deuh a pawi itih loh chuan i sawi duh chu sawi nghal mai la" a sira țhut thlak pah chuan ka ti a, hmuh ka in beisei lo bawk nen ka ni ve deuh hui mai.
"Nia... i buai tih ka hre tho a in veng ka rawn kal a a remchang êm a ka rawn tlawh kawi che a, ka fanu nen in inkawp leh tawh tih ka lo hria a" a rawn ti a, amah chu ka en reng "i sawi tum ah lut la" ka ti deuh hmuk. A tan ka țawngkam dawnsawn a nuam hauh lo ang mahse insûm harsa ka ti fû, ka pa chu lo dah țha ta ila amah avanga Bawihi hringnun chhe hneh lutuk ka ngaihtuah chhuah poh leh he mihring hi kut thlak lo tura ka insûm a ngai ziah.
"Ka fanu ala ni reng a a ni lo thut dawnlo bawk, a ni chuan min hua a ni maithei mahse reilote ah min huatna hi ka tih reh sak bawk anga a nun hreawm a ka lo siamna avang pawh khan ngaihdam ka dil ang mahse nang leh ka fanu hi in inkawp rem ka ti thei ngailo ang, in chhungkaw dinhmun pawh khatiang kha alo ni tawh ania i pa pawh hausak duh luat avanga ei ru in hetiang dinhmun a thleng ta a tunah ka fanu pawh khawvel pum in an hre tawh a pasal atan chuan nangni ang mihring hi ka duh pui ngailo ang, a pasal pa chu chumi khami chu ania an tih zui atan ka fanu hi ka phal lo" a rawn tih rual chuan ka nui chhuak hawk!.
"I nihna i pho chhuak in kha thu min hrilh nangmah leh nangmah a ti mualpho zawk che tih i hre miah lo niin a lang. Ka pa rual ini a chutih rual erawh chuan Hmingthani pa ini bawk, thil thleng kha ka theihnghilh tihna a ni lo mahselangin a theih chhung chu zah che ka duh a mahse min nâwk lui zawng chuan che lo turin ka duh che tu pawn dawhtheih chin kan nek vek ania" chang hauh lo hian ka ti chhuak sup.
"Chu pawh lo ni tehreng se ka fanu nen hian in inkawp...." a sawi zawh hma hma chuan "kan in țhen ngailo ang" ka lo ti chhuak sup, a tawp chiang hle bawk.
"I fanu hi engtikah mah ka țhen ngailo ang, enge hma hun ah kan tawn dawn ka hrelo mahse engtikah mah ka kalsan lo ang. A kut ka vuan tlat ang a ka hlatah ka awm tir ngai hauh lo ang" ka ti nghet churh, a âwih loh zia a hmelah a lang vek.
"Sawi hi chu a awlsam alawm tiraw mahse a pa ka thâwk ve țêk țêk chhung hi chuan ka fanu anihna angin a chungah thu ka nei a chuan nangni ang mihring nen hian inzawmna neih ka duh ngailo ang, a kawppui ni tur phei chuan ka phal bawk hek lo ka fanu hlat i tum lo a nih leh i pa chunga ka thiltih ang chiah kha i chungah hian...." sawi zo lo chuan a tho chhuak a, no keh ri chuai in a zawm nghal zat a rang zet hian ka hawi let a ka nu chu kut khur dar dar chungin ka hnungah chuan alo ding reng a, rang zeta tho chhuak in ka pan phei nghal vut bawk.
★★★
TOXIC_LIPS Chapter - 21 By : Msi (Hmeichhe Naupang Tereuhte)
Moderator: writers
-
- Posts: 274
- Joined: October 18th, 2019, 7:46 pm
ADVERTISEMENT (A hnuai a milem hi a nia hmeh zeuh tur chu)