TANDEM Chapter-2 by Notei Sailo Mk

[Notei Sailo Mk]

Chapter- 2



ROBERT-A POV




Hun eng emaw ti chhunga phone kal tlang a ka lo kawm ve ṭhin hmu tura ka kal chu ka phur kher mai. Ka ṭhiante vanga inhria kan ni a, kan han inkawm chho chu a lo fel zêk lehnghal. Ṭhian ṭha tak kan ni ta reng a, ka ṭhiante khan ka phone aṭangin an lo va be lovang tih tun hnu hian ka hlau ru zek zek. Ka hmangaih ka tawn phah hial si a.





Phûr taka an awmna lam ka pan chuan Bawihi bula lo ding chuan ka mit a la chat. Ani pawh chuan mit khap lêk lo chuan min en char char a, ka rilru chuan, "Nula dangte ang ni ve suh,” tiin ka ngaihtuahna vang chuan ka nui suk. Ni e, nula dangte ang ni ve tur chuan a ṭha mah mah a ni. Nula tam tak ka tawng a, ka mit lak tumin an khawsa a, ka hmaah chuan engkim hlan an huam bawk. Mahse, mipa pa ve tak leh fair ve tak ka nih vang hian khawihchhiat tumna ka nei ngai lo. Farnu pakhat ka nei a, ka farnu hi tuma khawihchhiat emaw nawmchenna atan hman ka phal lo ang bawk hian tu fate mah hi nawmchen nan hman ka duh lo a ni. Chûng hmeichhia, inphal tâk tâk te ang kha a nih loh hram ka duh a ni. Ka ṭhiante pawh hian mak an ti hial ṭhin, an khawsak ang chuan khawsa ve duh ni ila, vengtinah ‘Apa..apa,”min titu an awm nawk tawh ang chu... An nundan ka sawisel lova, an awmdan a ka awm loh vangin kan inkawm loh phah chuang lo.





An bul ka thlen chuan Bawihi chuan min hmel hriattir a, a hming a sawi chuan ka thinlungin a chhinchhiah nghal thlap. Kan inchibai chuan a zakin a laih hmel viau mai. Restaurant kan hmuh hmasak berah chuan kan chawl a, a chow a ei ka hmuh chuan ka nuih a za in a lawmawm ka ti bawk si. Tu nula mahin ka bulah chow an ei ngai lo. Ka sual vang ni lovin ka laka inlak nalh tum reng reng a khawsa kha an ni miau hlawm a. Chow te chu ei nalh a lo har ve bawk nen, lan nalh loh an hlau te pawh a ni ang. Ka hmaa hmeichhe ṭhu erawh a ni hauh lo, ka mit lak tumin a khawsa lova, a unaunu nen kan titi ngawi rengin a lo ngaithla a, a khat tawkin min rawn melh leh zawk ṭhin a, ka lo en ṭhin vang nge a zah hmel thei hle.





Thlah haw tum viau mah ila, an duh ṭhak lo nia. Kal kawina tur an neih thu sawiin kan inṭhen ta kha a nia, ka thinlung erawh an kiangah hlir a awm. Zanah Bawihi'n a number min rawn pek chuan ka zuang lo chauh. Ka dil ngam chiah lo kha ania, ka lawmzia chu pui tak a ni.






Be lawk ngam lo chuan a hnu deuh ah chuan ka be ta a, a naupan ngaihtuahin a puitling phian a, a lawmawm reuh bawk si, ka duh bur mai. Kan inzui hnu pawhin naupangchhia taka khawsak chang a nei ṭhin; mahse, ka pawi ti lo, ka pawm vek; min tihlim êm êm si a. He tlangval senior ṭan tawh hi naute rual veiin ka naupang chhe leh a ni ringawt. Min duh ve thu a sawi ni phei kha chuan kei mi in-control thei lutuk pawh hian ka awmdan ka hloh ṭep nia. Chutiang khawp chuan a zun a uai a nain min hip a ni. Hmangaihte vang chuan a lo danglam theih khawp mai tih ka hre thar bawk.





Engkimah a hmasa ber ka ni tih ka hriat phei kha chuan ka awih lo hial zawk. A chhiat loh tehreng nen a kawplawr ve fû turah ka ngai kha ka tisual chhiava a ni. A bialpa hmasa ber ka ni a, chuvang chuan zaidawh takin muang changin engkim hi ka kalpui tur a ni. A bulah chuan ka insumtheihna ka hloh lek lek ṭhin. Mahse, tawn hriat engmah la nei lo a ni a, nawr erawh ka duh hauh lo thung. Mipa bula awmdan tawk a thiamin a inveng thiam hle.




Inhmangaih ve ve kan ni bawk a, buaina kan nei lem lo; kha zan hma zawng kha chuan;



Engnge maw a hriat ni min be duh miah lova, ka call leh message pawh a chhang hek lo. A ngaihna ka hre lo hle. A hnuah phei chuan ka switch off ta daih. Hetiang hian a awm ngai si lova, min tihrilhhai tak zet. Kan hna chung chang vangin phai lamah kan kal a, a thinrimna thlen turin eng thil nge ka tih ka hre hek lo. Message en rawh a tih lah uluk mangkheng a ka ennawn pawh ka hmu bawk si lo.Eng message nge ka hre bawk si lo. Huizzz... hriat loh message zawn chu a har piah lam a ni e!





Haw vat ka duh vangin ka hna pawh chu tlaivar a ka thawh chuan ka zo ve hram. Hmanhmawha insiamin airport lam pan chuan ka chhuak a. Aizawl ka thlen chuan in pawh lut kawi lovin a dawr awmna lam ka pan a, min hmu chu mak a la ti hmel em em zui. Nizan khan ka hrilh lawk vek sia, a hre lo tih dawnin message a chhiar ve vek bawk si.




A dawr kan chhuahsan chuan ka hnungah chuan a rawn kal ve dat dat a... a hnuah phei chuan a rawn tlan ti tih. Nuih za viau mah ila ka insum hram hram a ngai.




Cafè-a kan luh hnu chuan a ngawi reng. A zam hmel em em lehnghal a, thil dik lo eng emaw chu a awm chiang mai. Ani hian min kalsan a tum emaw min kalsan tumna rilru a pu a nih chuan a chak lovang. Min kalsan tur a ni lo hrim hrim. Ka ngaih tehlul a awmdan hian min ngai ve lo tih lah chiang reng . Kuah vawng vawng ka châk a, mahse chumi ti lo tur chuan ka insum hram hram.


DINSANGI POV


“Chhan awm lovin i thinrim,” a tih chuan ka ner sak. Ka thinrim chuan chhan a nei a ni mai. Amah zawk hian nia thinrim a min siam ni.





“‘Min rawn be suh ‘ i tia i thu ka awih mai ania, chuchuan chhan a neih kher a ngai em ni?” ka ti let ve sak.





“Keimah hian maw, engtikin nge ka tih a?” a aw ah chuan mak a tihzia a hriat reng mai. A mit a en kar chuan ka bu nghut a. “Engtikin nge chutiang chuan ka tih a?” a tih chuan dawhkan a a phone dah chu ka melh zeuh a, hrethiam in a la kang vat a, a check ni ngei tur a ni a khawih nuap nuap a. A awmdan zawng zawng chu chik takin ka en a, kei hian ka hre sual emaw ka ti hial hman. Hepa lakah hi chuan ka inrintawkna neih hi a va chaurau thin tak.






Rawn hawi chhuakin, “ Engmah a awm lo, nang hian dawtin min puh a ni zawk lo maw?”a tih chuan ka run hle. Ngawi reng chuan ka phone la in ka message dawn chu ka hmet chhuak a, a hma zawn ah tak chuan ka lek va a, mak a tih hmel viau. “Dawt ka sawi ngai lo. Kei pawh hian mak ka ti viau asin. Ka awih loh avangin ka rawn call che a, i nula kawl khan a rawn chhang a,” ka tih chuan hriatchhuah a nei ni ngei ang; a hmel chu thinrim hmel a pu. “Bialnu dang i duh a nih ringin inthiarfihlim ka tum mai a nia,” a rawn tawng hma chuan ka tih zawm zat.





“Atthlak lutuk,” ti sup chuan dawhkan a ka kut dah chu a rawn vuan a. Ka tawng leh tur ka ka ka ang chiah chu min tawng khalh a, “Ka hriat lohvin i rilru ka lo ti na ni maw, a pawi ka ti lutuk,” ka kut chu la kang in a fawp zeuh a. A hmel chu nelawm tak a ni, mahse, ka la lungawi chuang lo.




Coffee an rawn dah chu ka in sep a, no dawhkan a dah chuan ka rilru a zawmna awm chu ka zawt zel ang em? Ka rilru ah insual buai nasa hle. Hriat chian ka duh rualin natna min thlen tu a nih ka hlau bawk si.





“Tunge hmeichhia kha?” ka insum zolo chuan ka zawt ta nge nge. “Julie,” tawp mai a.




“Chuan…”



“Thian a nih kha, classmate thin,” a chhanna la duh khawp lo viau mah ila, han zawh leh zel ka inthlahrun avang chuan ka zawt zawm ta lo. Kha nu kha chuan thian angin a en lo tih a chiang reng.




“Reunion neih an rawt tlat a, ka roomah min rawn kal chilh a nih kha,” a tih chuan ka awih hmiah. Mi hneh theih riau na hi a nei nge mawni ka thinrimna chu a reh duak mai. Bakah a hmel a tihtak zia te, a mitmeng en in dawt min hrilh ka ring lo.





Coffee kan in zawh chuan café chu kan chhuahsan a, dawrah pawh let ta lo chuan an in lam pan chuan kan kal a. An in a leng tur hian min sawm fova, mahse ka hnial ziah thin. A zahthlak bakah a mawi lo ka tih vang hian ka hnial char char thin. Vawiin erawh hnialin awmzia a awm tehchiam lo. Kan inah min thlah dawn emaw ka tih kha an in lam min pan pui daih si a, car a tiding duh si lo, ka thu tum bur mai.





Building var, la thar ve ang reng tak hmaah chuan car chu a tiding a. “Kan thleng ta,” ka lam rawn hawi chuan a ti a. Kei erawh chuan ka hma a in ding nalh tak chu ka lo en thung. Car aṭanga kan chhukin an kawt zawl, zau em em pawh ni lovah chuan phul ang mai hian hnim te tak te te a lo ṭo a, chumi sir zelah chuan pot-a pangpar an phun chu an hung thliah thliah a, chu chuan an in chu a chei hle.





“Zam lutuk lo la,” ka kut vuan chuan a ti a. Ka huphurhzia hi hria se min hruai hauh lovang maw le. A chhungte chanchin min hrilh ngai lova, ka zawt hek lo. Eng ang mi nge an nih pawh ka hre lo. Farnu pakhat a nei tih erawh ka hria, chu pawh Bawihi hnen aṭanga ka hriat a ni.





“Min hruai loh mai tur a nia,” ka la ti hram. Inti bo thei ila chu ka intibo chiang ngawt ang.





“ Eng nge maw i hreh viau le... kan seh lovang che. Bakah nakina ila chenna tur tho a nih hi,” a mit a siai zauh a. Hnial ngaihna ka hriat loh avang chuan a banah chuan ka sik hlak.




Inchhung kan lut a, nu pakhat, sam bob cut lek lek, fai veng mai, ṭhutthlenga lehkhabu chhiar a lo ṭhu chu a nu ni turah ka ngai. Kan thawm hriain a rawn hawi chhuak a, a tarmit chung aṭang chuan min x-ray ta emaw tih tur khawpin chiang zet hian ka lu atanga ka ke ler thlengin a en thla vek a, ka zàm lutuk chu hnuai lam ka melh ta daih.





“Bawiha, i lo haw a ni maw?” a ṭhutna atang chuan Robert-a chu a bia a, lu bu nghut chung chuan a nu lam pan chuan min phei pui a. A hma a ṭhutna awmah chuan min ṭhutpui a. A nuin min melh chu Robert-a chuan a hrethiam ni ngei tur a ni. Ka kut chu lain a malchungah chuan humin, “Nu, Adini a nih hi,” tiin min en pahin a nui zui suk a.





“Khawi lam mi nge?” a nu chuan a ti leh a. Min en danah min lawm vak lo tih a chiang si a, nuam lo ka ti ru ngawih ngawih. A hmel a nelawm lo ropui si, ka kal chu ka inchhir ngawih ngawih.





“Electric vengah an awm a, nu, duh tawk rih ang, nuam lo a ti ang,” Robert-a chuan a ti a. A nu pawh chuan a zawh chhun zawm ta lem lo. Nula pakhatin thingpui min rawn pe a, kan in zawh chuan a room-ah min chho pui a. A room-a chhoh duh lo viau mah ila duhthlan tur dang awm hek lo, a nu bula awm reng ai chuan chhoh mai kha ka duh fe zawk.






Room kan lut chiah chu min fawp nghal vawng vawng. Kei pawh chuan ka thiam ang tawkin ka lo chhanglet ve a. Hetiang mipa hi ka ngaizawng dawn tih hria ni ila tun hma te khan bialpa lo neih tur a nia, tlemin ka zei ve deuh tur hi a nia. Aaa... awmzia a awm tawh lo. Chutiang ngaihtuah hman pawh ka nih loh hi... Kan duhthawh dun bawk a, kan inthlah meuh chuan boruak kan mamawh tam dun hle. Kan inen a, kan nui tawp. Infawp ve fo ṭhin mah ila hetiang hian duhthawh takin kan la infawp ngai lo. Inhma tawn a ding kan ni bawk a, min kuahin a âwmah chuan ka bei hle hle mai. “Ka ngai lutuk che,” a ti thawp sut . Ka ngaih ve tho avang chuan sawi lem lo chuan ka kuah nghet leh zual sauh va. Din reng thu awm suh, min kuahna kut chu phelhin ka hmai a rawn khuap a, ka chala fawpin ka hmuiah chuan a fawp leh zeuh.





Khumah chuan ṭhu-in ka phone chu ka en malh malh a, Robert-a inbual chu ka lo nghak a. Ka bul lawka a phone rawn ri chuan min tiphu nasa hle. Screen-a hming lo lang ka hmuh chuan rilru nawm lohnain ka khat nghal. “Ṭhian chauh alawm an nih,” tiin ka inhnem a, rei tak erawh a daih lem lo. Call pawh chu chhang duh lovin a ring quit ṭhak a, a rawn call nawn leh pawh chu ka la duh chuang lo. Ka phone a ni lova, ka lo chhan ve ngawtna tur a awm lo.





A inbual zo a rawn chhuak a, ka bula a phone let reng chu la kangin a en a, min rawn melh zawk a, ka lo en reng vang nge phone chu khumah bawk chuan dahthlain a thawmhnaw dahna lam chu a pan a. Ngawi reng chuan ka phone bawk chu ka bihsan daih a, ka awmdan chu a pangngai lo tih ka inhria, mahse ka thinrim em tih erawh ka chiang chiah lo thung. Julie kha ka thik a ni thei mai ang em? Ni lo, chutianga thikthu chhe em em ka ni lo. Mahse, ti nge ka awmlai hian a biak mai loh. Anni pahnih hi an lo inzui reng a ni lo maw? Ka ngaihtuahna tawt up up chu duh lovin ka thaw chhuak hak.





“I rilru a va hah hmel ve,? Ka hmaah a lo ding reng chu niin; ka lo hmu lo. Ka phone te kha ka bih tak na a, eng nge inziak ka hre miah lo. Chhang lem lo chuan ka nui suk. A thawhnaw hak a inhmeh takzet. T-shirt var leh jogger pants a ha a, hmuh a nuamin a hahdam hle.





Ka hmaah chuan rawn thu hniamin min fawp a, keipawh chuan ka lo fawp let ve vat a. A duhthawh telh telh a, a kutin min chul ruai a. Ka chhungrilah nawmna mak takin min fan mek bawk. Khumah chuan min bawhthlu a, ka hmui mai duh tawk lovin ka nghawng bawr velah te chuan a fawp a, ka taksa chuan a lo dawngsawng tha hle. Ka inveng zo dawna ka hriat tak loh chuan duh tawk tur chuan ka ti a, mahse a tawp ta hauh lo mai. Hlauhthawnnain ka khat a, mangannain min tuam nghal bawk. Ka theih tawpa ka dan pawhin awmzia a awm lem lo. Min nawr lui ngat ngat a, kei ka lo indang char char bawk. Ngawi rengin kan insual a ni ringawt. Ani pawh chuan a duh ang chuan a che thei bik vak lo.




“Ka duh lo,” ka ti ṭuau. Ka hneh zo dawnin ka hre lo, kawng dang ka hre bawk si lo.





“Bawihi,” a thil tih lai chu tawpin min khawih tum a, a kut rawn lek chu ka lo vai kiang a.




“Min khawih suh,” min delh bet reng vang chuan a taksaah chuan ka nam a, a hrethiam ni ngei tur a ni, a inlahrang nghal vat a. Ka tho chu ka banah chuan min pawt letin amah chu ka bawh rawk a.





“Ka tihpalh,” ka sam chu hui kiangin ka bengah chuan a zep a. Chhang lo chuan thawh tum chuan ka inbeng kang a. Ani pawh chuan min chelh bet reng bik lo. Ka tho chu ka bag lain, haw tum chuan kawngkhar lam chu ka pan a. Hmanhmawh tak chuan rawn tho chhuakin ka hnung lam aṭang chuan min rawn kuah a. Ka pen pawh ka ding chat.






“Bawihi, ka tihpalh. Thinrim suh aw, khawngaihin,” a ti sup. Min kuahna chu phelhin a lam hawi chuan ka inher a. A mita en chuan ,” Inṭhen ang,” ka ti a. A mita natna chu ka hmu thei. Ani ai hian ka na daih zawk. Khatiang khan a awm ngai lo hrim hrim. Hmangaih viau mah ila, ka chunga a khawsak dan khan min tina ngawih ngawih.





“Aih, a theih loh,” min rawn kuah a tum chuan hnung lam ka lo pen zeuh. A hnaiha awm hi tunah rih chuan ka duh lo a ni.



Min kal pel chuan kawngka bulah chuan a ding tlat.




“Ka haw duh,” ka tih chuan a lu a thing mat mat. “




“Hetiang chuan i haw dawn lo. Min ngaihdam hma chu,” a ti a .




“Khatianga i awm kha ka beisei ngai lo asin,” ka ti sap.



“Ka hria, ka ti leh ngai tawh lovang,” tiin a kut chuan a hrawk chu a khawih zauh a. Tunah mai chuan sawi tur ka hre rih lo a ni. Ka thinrim bawk si, tihngaihna ka hre bawk si lo.




“A tlai tawh,ka haw phawt ang,” ka tih chuana kut a sana chu a en thuak a, a awm danah a ngaipawimawh lo tih a hriat.




“Haw tawh lo mai rawh, tak tak,” a ti leh a. A tih tak tak loh hram ka beisei.



Chhuanlam tur dang hre tawh hek lovi, “I nu ka hlau, haw vat vat ka duh nia,” ka tih chuan a nuih a zat hmel hle. Kei erawh sawi sual inti zetin ka hmui ka hup thung.




“Haw lovang, ti hian kan innei a ni mai,” a tih chuan ka mengkawk. A hmelah a uang lo tih a chiang hle bawk si. Ka mangan ru takzet.





“ Chi nang, vawi khat pian ve mana inruk a pasal neih ka duh lo,” ka tih chuan a nui suk. Inruk ka sawi chhia ni lovin ti bak chuan hnar ngaihna ka hriat loh vang a ni.





“A nih, palai tirhin,” a tih chuan ka inṭawng awk tih ka hre chiah. Ani lah chuan tifuh inti zetin,” Palai tirh i phal dawn phawt chuan ka thlah ang che,” ala ti zui. Ka haw duh luat vang chuan ka lu ka bu nghauh thung.






Haw tur chuan kan chhuak a, kalkawngah chuan kan ṭawng tlem dun hle. Kan in kawt kan thlen chuan chhuk mai ka tum chu ka banah chuan min vuan a. “Kan ṭha ti raw?" A hmel chu amah anglo takin a confi lo.




“Umm..”





“A rang thei ang berin palai ka rawn tir ang,” ti supin ka chalah a rawn fawp zeuh a.



[nshima]