Tawnmang lova lasi-16

[Melz Hrahsel]

Tawnmang lova lasi
By-
Melz Hrahsel

Tawnmang lova lasi-16


"Hmela" Zawi sup a ti chung in kan lam pan in ding ve in a rawn kal nghal a. Zan thim mah ni se a thinrim em vang in seh ruh tun hmel chu kan varanda light in a en phak tho.


"E. Sir Zorina chu" Sawmzuala'n a ti hman tawk ang. A rawn kal hnai a, a awm ah tham nghal chawt in "hmela" a ti nawn leh a, a hmai ah tak na zet in a hnek nghal chawt a, sawmzuala khawlai ah a tlal nghal tawp.


Sawmzuala lah chuan thu lai hriat a tum bek lo, lo ding ve nghal in a hnek leh nghal chawt a, An inzual chu a ni nghal der tawh.


"Duhtawk rawh u" an inkar ah ka tlan lut a, hmeichhe awm nem tih tak ah, an tha chu hneh lo tak ka ni. Ka au tuarh tuarh a, U Zorina ka dan lai in Sawmzuala'n a lo vai hman a, Sawmzuala ka ven lah in U Zorina'n a lo vai leh hman bawk.


Ka duh loh ber chu ka ti ta nge nge "Mama, min lo pui teh, mam, lo chhuak vat teh" ka tih chul tak ah chuan in atangin ka pa nen an rawn tlan chhuak a, U Zorina leh Sawmzuala te pawh an pawt then ve thei hram, zan a rei angreng tawh nen, khua a vawt ve tawh si, zan lam leng chhuak an tam tawh lo.


"Eng thil nge thleng a" Kapa in U Zorina a la hrang a, Mama'n Sawmzuala a la hrang bawk. Ka nu pawh a rawn tlan chhuak zui ve nghal a "I tha maw, i na ve lo ti raw" min ngaihtuah fe in min en kual nghal chawng chawng bawk, ka tawng ka in ka chhang thei lo, ka bu nghat ringawt a, ka chil ka lem khawlh khawlh a, thawk ka la huam huam bawk.


"Eng nge maw in hriat le. Eng thil nge in hriat a, tunlai ah tu mah an insual bur bur tawh ngai lo, awm lo lutuk. Rui pawh in ni lo" thinrim fe in ka pa in a ti leh nghal hrawk a. U Zorina leh Sawmzuala te pawh an in beng dai chhawm ve zel bawk.


"Ehe, kha, in pem nual a nih kha. Inchhung ah lo lut ru, damdawi kan hnawih dawn nia, helai phei chu a vawt si, eng thil pawh thleng se tha zai in chhung ah sawi fel tur" ka nu in a ti ve leh a.


Sawmzula chu ka va melh zauh a, a in beng fai thuak thuak a, U Zorina erawh min la melh ngur reng tho, a in seh ruh zawng in a bek a che ralh ralh thei. Thip zet in min melh a, a kut hum ruh erawh a tla thlah eih lo.


Zan in thil thleng hi ka thiam loh a ni tih ka pawm, chutih rual in khatiang thil kha a thleng ka beisei lo, a pahnih in ka beisei lo, bakah U Zorina helai ah a awm tih tu teh lul in nge ring chuang ang, Sawmzuala lah khatiang khan a chet ka beisei hauh lo. Ka thian a ni kha, hmeichhia an in min en ka ring ngai lo. Zanin a a chet dan kha ka suangtuah na ah pawh a la awm chhin ngai lo.


Couch ah kan thu khawm thap a. Kan in melh hrak hrak hlawm mai, ka nu leh pa in kan dinhmun hi hre chiah lo mah se, mama erawh chuan a hai lo tih a hmel ah a lang chiang nghal vek.


First aid box ka la a, ka nu in U Zorina pem ah damdawi a hnawih sak a, kei in Sawmzuala hmai leh hnui bawr a kak leh duk deuh chu ka hnawih sak ve bawk.


"Sawmzual tihpalh aw" a hriat tham tur in zawi sap chuan ka ti a.


"I thiam loh a awm lo. A thu hrim in eng vang a min lo hnek ngawt nge a nih le, ka hrethiam thei lo reng reng" a tih chuan zam ru tun in a pem ah damdawi ka hnawih mawlh mawlh.


"Ka hre bik lo le" ti chauh in ka chhang thung.


"Ka beisei loh dan daih a ni. Kei ai upa chu ni lo se chuan a chak lo ve viau ang" tih tawngkam a phuh chhuak chuan ka hah a ti dam deuh huai thei. Hetiang kar ah pawh, Sawmzuala'n mahni ai upa a la zah thei tlat chuan amah min ngaihsan tir sawt mai.


"Nute, ka haw phei phawt mai ang" a pem ka hnawih zo vel chiah ang tih ah. Sawmzuala chu a tho hluai a, ka tho ve nghal vat bawk.


U Zorina leh hnuailam a melh run run reng a, a taksa leh a hmai vel chu pem ve nanag mah se, chu mai mah in a chhungril a na tih ka hmuh hmaih hauh lo. A in seh ruh a, ka hmai ah tak chiang kawk a min lo melh phei chuan ka sa chhuak pup pup ni ber hian ka hria.


"Ka va thlah ang" Sawmzuala zui chhuak tur in kawngka bul ka thleng tawh. U Zorina a lo ding chhuak vut a "keipawh ka haw ve dawn" a ti zui sup. Sawmzuala nen chuan kan in melh ringawt.


"Zorin, biak lawk che ka duh a" Mama'n a lo ti a, a sawi pui tur chu eng tak ni ang maw tih chauh ka lo ngaihtuah leh tawh, eng ti kawng zawng mah hian a tha lam a nih ka ring lo bur.


Mama leh U Zorina room ah an in zui phei a. Ka thla a muang lo kher mai "kal ang" Sawmzual an a ti sup a, rilru bet lo fe chuan ka zui chhuak ve leh ta nge nge tho.


"Zanin kha" thawk a la halh a, a tawng leh hma hauh in "kal thuai rawh. I chhung ten an ngaihtuah ang che" ka lo ti ve vat thung, kan in kiss emaw an in sual buai chung chang kha engmah ka sawi duh lo. Zanin ah hi chuan engmah ngaihtuah lo a ka khum a mut vang vang ka chak ber mai.


Sawmzuala a haw a, Mama leh U Zorina erawh room ah an la awm reng thung. An thusawi ka hre chak kher mai, kawngka an in khar hnan a, an thusawi engmah ka hre thei lo.


"Lo kal teh" ka nu in ka ban ah min rawn kai nghal chat a, choka lam ah min hruai phei zui nghal vat.


"Khawnge, ka pa kha" hawi vat vat in ka ti duh chauh.


"Room ah a lut ve. Mama nen, eng thil chiah nge thleng a. Thil awmzia hi sawi fiah teh. Engvang a zorina leh Sawmzuala kha in sual nge an nih, ka hre lo ti in min chhang miah suh" ka sawi hma hauh in min sawi khalh zo nghal vek.


"Nu, thil chiang zawk nakin ah ka hrilh ang che" ka ti sup a. U Zorina, Mama leh Ka pa te Mama room atangin an rawn in zui chhuak nghal vat a.phei ka tum ve hman, ka nu in ka ban ah min lo chelh vat a "puitling thil tih na ah in rawlh a tul lo" a tih tak ah chuan ka in thunun hman hram a ni.


U Zorina'n min lo melh ran a, ka mit khap sawn hauh lo in ka lo melh ve nghal ran bawk. A chil a lem khalh a, thaw chhuak hawk in kan in a chhuahsan zui nghal vat thung.


A that leh that loh en tum in kal mai ka tum a, kawnka pui ka thleng hman awrh ang "Malsawmtluang chhuak hlek suh" ka pa in khal telh tawlh a a rawn tih tak ah chuan ka ding nghal chawt. Tukverh phen atangin ka melh ran a, a bike a ti nung a. A tlan zui nghal nal nal.


"Eng thil nge thleng" ka nu in mang ang fe in a rawn ti nghal chung chung a, Zorina tlan liam lai chu ka melh ran a. A hmel ah khan thil dik lo tak a thleng tih ka hai lo a, ka pa hmel ah leh mama hmel ah pawh engkim ka hmu vek.


"Pa, U Zorina te nen khan eng thil nge in sawi" in her in ka pa ka hmachhawn ran a. A kawng a dawm a, a chil a lem zui nghal khalh khalh.


"Pa a, eng thil nge thleng a, Mama nang tal in sawi rawh" ka han ti nawn leh a. "Engvang a sawmzuala leh Zorina kha insual nge an nih" chiang ve in ka nu in a ti a.


"Malsawmtluangi vang mawle" Mama'n a ti chhuak nghal thawt.


"Zorina leh Malsawmtluangi hi an in ngaizawng alawm, sawmzuala nen a an leng a hmu khan khawlai ah a sawisa ringawt a nih kha. Zahpui awm leh lutuk" Ka pa in a rawn ti chhuak phawng a. Chutiang teh thlawt a chiang chuan a rawn sawi chhuah ka ring miah lo.


"Chu chu tak tak maw" ka nu in a lo ti vat.


Mama chuan thawk a la hawlh a "kei phei chuan ka hriat na a rei tawh. An in then mai theih ka rin avangin ka sawi lawk lo a, beisei loh thil a thleng leh si a nih hi" an hmel a min duhsak na leh min lainat na te lang thing zawng zawng kha tun ah chuan a bo vek tawh ni ber in ka hria.


"Zorina te chu tlangval sual tak a ni hleinem" ka nu thusawi chu ka tan hahchawlh na ang mai a ni. Tun dinhmun ah chuan hetiang hnem na tawngkam tluk a thlak hlelh hi ka nei lo hial ang.


"Zorina hi i rin ang a ni hleinem. A ni chuan fa kum 4 mi a nei tawh, chu keimah chauh pawh ni lo Malsawmtluangi pawh hian a hria a, a hmu bawk. Damdawiin a kan kal lai pawh in an lo tlawh nghe nghe alawm. Ka thian pa mah ni se, khatiang fa nei tawh kha ka farnu neih chhun nei tur hian ka phal lo. A fa neih na nu nen lah an la in ber eng lehnghal" a tih chuan sawi tur pawh ka hre tawh lo.


"Chu chu tak tak maw" Ka nu in a rawn ti a. Ka pa ka leh a, couch ah a thu a, hnuai lam chauh a bih ngar ngar mai.


"In rin ang kha a ni lo" ka lo ti ve vat.


"Kan rin loh ang chu eng nge" vin zet in ka pa in a rawn ti chhuak nghal thawt.


Ka pa hian tawngkam vin in vawi khat pawh min la be ngai lo. Ka thlavang engtik lai pawn a hauh a, ka lam ah a tang reng thin kha a ni ngai a, tun ah chuan ka lah ah a thinrim takzet tawh. Ka thiam loh vek a ni.


"Mate, mipa chu eng mi pawh ni rawh se. Mahse, fa hmasa nei tawh hi chu tum loh pawh in buaina a awm ngei ngei thin tih hriat tur, bak ah nang chu i la naupang a hetiang mai mai a in ham buai thei i ni lo. Hmabak i la ngah lutuk" ka nu a rawn kal phei a, ka kut ah min chelh zui nghal zat.


"Nu ka hria, mahse" ka sawi zo hman lo.


"Engmah mahse ,tih kha a awm tur a ni lo. I chhungte hian i tan a tha ber tur kan hria tih hre rawh. Zanin ah pawh kan khawlai ah khatiang ang a mawi lo khan a awm ngam a nih chuan engtin nge kan hmuh loh ah phei chuan a khawsak ang" Ka pa in a ti leh a.


"Mam, nang tal chuan hrilh fiah rawh, in rin ang kha a ni lo" beisei nei fe in mama chu ka melh ran a. Thusawi engmah a ngaithla duh bik lo.


"eng chu maw. Ka sawi vek tawh kha, Zorina hi i hmalam hun ah a tel ve lo, ngaihzawng vang mai mai a hmalawm hun ti chhe vek tur in ka phal che i ring a mi" mama a ti a.


"I thian tha ber te zing a mi a ni lawm ni, engtin nge hetiang hian a chung ah i tih theih zawk" ka awki pawh a chuai raih tawh.


"Ka hria, chu vang chuan alawm ka phal loh reng ni. A khawsak dan, a nun dan engkim ka hre vek. I tan a mipa tha ah ngai mah la, i tan a tha lo tih ka hria" An duh loh chhan hi a thian tha ber a nih vang a duh lo nge a nih a, a fa neih vang tih pawh ka chiang tawh lo.


A fa neih chu ka na, zep rual a ni lo, kei ni lo a a ngaihsak chang phei chuan ka taksa hi thil hriam tak a vih ang mai ani thin. Kan in ngaihzawn tirh a min hrilh lo pawh kha a chung ah ka thinrim, nimahse; kan in ngaihzawn hma thil a ni a, thinrim pui chiam in awmzia a nei thui dawn lo tih ka chiang. Kei a nei tu tur ber in pawi ka tih loh lai a, ka chhungte zawk in an pawm thei lo lai hi ka hrethiam lo a ni.


"Engmah sawi a ngai tawh lo. Zan a rei tawh i room ah han chho rawh" Ka pa in seh chilh nak in a tih tak ah chuan chhan zawm chi ah ka ngai tawh lo. Inchung lam ah chuan ka tlan chho nghal hnawk hnawk a.


Ka room ka thlen rual rual in kawngka ka kalh ngal sawk sawk a. Ka khum ah ka let lut nghal tawp a. U Zorina hoodie dum ka khum a engtik lai a awm chu la in ka kuah a, "ka ngai che" zawi sap in ka ti ringawt.


"Tah i inhmeh lo ka tih thin kha" chu aw ka hriat rual chuan ka hawi chhuak nghal hlawl a. Ka balcony thim lai a tlangval tih hriat tak mai lo ding reng ka hmu chiah chu ka phu nasa kher mai.


"Hlauhawm ka ni lo, naute" a tih rual in ka tlan phei a.


"U Zorin" zawi sap a ti chung in ka kuah nghal chawt a. Insum hman lek lo in ka in hnit nghal hlawp hlawp.


"Tinge, i țah a, tap tur zawk ka ni in ka hre si a" tih chuan ka in ngaihtuah harh nghal zawk "a ni nen khan kan inkar ah engmah a awm lo a nia aw. Ka thian mai a nia, khatiang khan a che ang tih ngaihna pawh ka hre lo, min ring rawh, min ring ti raw, ka bum lo che a nia" ka tih zawm nghal zat zat.


"Shhh, a tawk. Ka ringhlel lo che, ka ring che alawm. Mahse, engvang in nge call tlang i har em em, Chennai atangin i haw daih a, ka rilru nuam lo lutuk leh ngai lutuk che kha ka thi hman tep asin" a tih chuan ka nui chhuak hak.


"I van țah belh awm" ka ti ringawt. A kiang a ka awm hi chuan hetiang hi ka ni tlat thin, ka tap a, ka nui a, ka thinrim in ka hlim leh thin. A chhan chu ka hmangaih a, ka haw phal lo a ni, a tel lo in engtiang tak a awm harsa nge a nih tih ka hre bawk.


"Engvang in nge i phone tlang theih miah loh. Instagram ah pawh ka lo DM che kha" ka sam tuai thuak pah chuan a ti a.


"ka phone ka ti chhia a, ka siam tir mek a. Naktuk ah a lam theih ang" ti chauh in ka chhang.


"Chu chauh chu maw. Thil dang a awm tih i hmel ah khan ka hria a nia, sawi chiang teh" a thawk lum ham ham in ka hmai a ti sa hem hem bawk.


Thawk ka la halh a "awm e. I Fanu kha i ngai pawimawh in ka hria a, in inkar ah tla zep ni in ka in ngai bawk a. Hmeichhe naupang a pa laksak tu misual tak kha ka ni thei lo a ni, chuvang chuan kal mai kha kan tan a tha ber ni ah ka ngai a, chuvang a khatia awm kha ka ni" thawk chhuak hak in ka ti a. a taksa lum thar thar chu ka la kuah ran.


"Min hmangaih miah lo a mi, engtin nge i tel lo a awm thei tur in min ngaih a" a sawi zawh rual in ka lu ka thing nak a "hmangaih teh tehreng mai, ka tihpalh. Khang hun chhung khan ni khat chu sawi loh engtik lai pawh in ka ngaihtuah thin che, mahse, ka tih a ngai ti in ka in fuih ve bawk si a ni" ka sawi zawh rual in ka hmai a, kuai dak a, ka hmui ah duh thawh zet in a fawp nghal vawng vawng a.


A hmui leh ka hmui in si lum thar thar chuan thlasik hun lo in țan tur chu a tu mawi takzet, zawi muang in a in la hrang leh a "engtin nge ka room ah hian i lo awm theih zawk" zawi sap in ka ti a.


"Nangmah kuah lo a haw te chu ka tum reng reng hleinem" a nui suk a nghet zet in ka kuah leh nghal sawt sawt.


"Naktuk ah eng nge i tih dawn" amah bawk chuan a ti leh a.


"Class ka kal ang eng nge a" ka lo ti vat.


"Hmuh che ka duh mawle" ti chauh in min chhang.


"A nih chuan, hun awl neih ka lo tum ang, i hmai kha a na viau em" ka kut in ka chul thuak a. Ka kut a lo man a, a hmui lum thar thar ah a nawr bet chat mai.


"Mu tawh rawh. Ka phei a nge. Ka Pa Sanga in luah ah ka in nghat a, muttui țap tawh suh aw" ka bu nghat a, in thlah nan duhthawh zet in kan in fawp vawng vawng a. Ka balcony sir a thing kung atangin a chhuk a. a bike a ti nung a, a tlan chhuak lai chu ka thlir liam ta a.