ZOTHANTLUANGA CHAPTER - 3 by Amy Cck

Episode kal lai dah luhna

Moderator: writers

Amy
Posts: 432
Joined: May 15th, 2019, 8:49 pm

ZOTHANTLUANGA CHAPTER - 3 by Amy Cck

Unread post by Amy » December 2nd, 2020, 11:34 pm

CHAPTER - 3 đź’® by Amy Cck



Tih thei dang ka neih loh avang chuan ka sawi buai ngam lo. Ngawi reng chuan ka zui a. Dik tak chuan tumah hian han hnial kual emaw thei ka ni lo. Ka chung a an thatna hi ka hnawl a nih chuan khawiah mah kal na tur ka nei chuang lo. Chuvang chuan zak thei lo emaw, khawngaihthlak emaw min tih pawn ka tuar thei mai ang.



" Tah hian... Saw lai saw bathroom a nia, lo in ti fai la, ka thawmhnaw i hak tur ka va la ang! " In chung lam a min hruai chho in room pakhatah min luh pui a, zang khai deuh vah hian a rawn ti a. Kei mah zawk hi ka ham haih lek lek. A u thu sawi kha engmah pawh zawt buai lo in a zawm nghal hmak chu mak ka ti bawk.



" Nang hi min hre lo a mi a? " Chhuah leh mai a tum tawh chu ding leh dat in a rawn ti a, a zawhna vang chuan ka melh ha a, engvang in nge ka hriat ngawt ang tih ka ngaihtuah zui nghal bawk.



" Hre mai lo! " Ka ti tawi tak a. A rawn nui sak thung.


" Ihh... High school ah khan kan class khatah kan awm ho kha. Mahse i zak zum thei sia min hre ve lo a nia. A hma khan ka hriat hnu i ang ka tia tunah ka hre chuak chiah che! " A rawn ti zawm nghal a. Ka ngaihtuah ngial a, ka la hre chuang lo. Chu bakah a sawi ang khan ka zak zum in ka tawng tlem ve thei bawk nen thian kha ka nei lo ang tluk kha a ni ve a.



" Lo in ti fai la, i in thlakna tur chu ka va la ang! " Ti leh maiin a chhuak nghal a. Kawngka a khar rual chuan ka thaw hak. Room chhung chu ka melh kual dan dan a, a zau lutuk lo a mahse a fel fai thlap. Engkim chu a in hung dik thlap a, engmah pawh khawih lem lo chuan bathroom a tih lam kha ka pan a. Ka thawm hnaw chu phelh in shower ka hmang a. Tui lum chuan ka in phuh seng seng a, ka harh hawk in ka hria.




Bathroom chhung a towel var chu la in ka taksa ka tuam a, pakhatin ka lu ka tuam bawk. Nula khan ka in bual lai khan khumah ka in thlakna ka dah tih sawi a min rawn auh vang khan ka thawmhnaw pawh chu sukh fai nghal mai ka tum a, mahse ka ban rek ruh na vang chuan ka buai thei ta tlat lo chu ka chiah ta ringawt. Bathroom darthlalangah chuan ka in en vang vang a, ka in tih fai takah chuan ka hmel pawh hmuh a nuam ta deuh.




Bathroom kawngka hawng a ka chu khum bul a mipa lo ding vang chuan ka tum lo lutuk in ka phu chiam. Thawmhnaw ka la in bela bawk si lo chu ka lai chhe vek.



" Enge ni? " Ka ti zawi sap. A mit meng thim khup chuan min en tlang vek tum ang mai hian min melh ngur a. Ka ban hrawl zet khan a kekawr ip a zen hmuk a. Bathroom ah luh leh dawn in a chi tawh bawk si lo chu ka kut chuan ka towel tlang ka hum ngawt ngawt ringawt.



" Damdawi! " Ti sup in a kut leh lam chu a rawn lek chhuak a. Damdawi hmeh chhuah chi ka hmu ve nghal.



" A... Aw.. Ta khan lo dah la ka lo in hnawih ang! " Ka ti bah nak. Ka kut ruh na a hnawih tur a nih ka ring ve ngawt a. Mahse engtin nge ka ban rek a na tih te a lo hriat hman.



" Nang mah chuan a harsa ang. In thlak la, ka pui dawn che nia! " A rawn ti thum dut a. Ka melh nghal kawk. A sawi dik, mahni a hnawih chu a harsa viau ang. Mahse ka in thlahrung. Tunah pawh hian towel nen chiah a hmaah ka ding a nia. Ka zak lutuk hi ka taksa a lum pup pup thei hial.



" Ole... " Tih leh khum lam chu rang zet a pan ka rual a. Khum chung a ka thawmhnaw hak tur lo awm chu ban in bathroom lam ah chuan ka in her leh nghal hmak a. Bathroom a ka luh rual in kawngka lock chu ka hmet ri khap a . Na zet in thawk ka la halh. Minute sawm vel chiah a hmaah khan ka ding a, ka khur chhe lo chauh a nia. Mahse ka dem awm bik lo, a mah kha a zahawm ren run em a ni.




Ka thawmhnaw ken chu ha sawk sawk in ka chhuak leh vat a. Khumah lo thu in phone a lo hmet nuap nuap a, ka thawm a hria chu a rawn hawi nghal vut a, tawi te in ka nuih ta tawp.




" Lo thu la! " Ti sup in a thutna bul khum chu a beng thuk a, chhang lem lo chuan ka kal hnai ve mai a. A bulah ka thut rual in a damdawi ken kha a hmet nuap nuap a, a kut lian leh lum thur thur chuan ka ban chu rawn vuan in a lek sang deuh a, damdawi chu min hnawih in zawi muang chuan ka banrek chu a chul nghal hluau hluau a, ka ban rek a chul lai chu ka en reng ringawt.



" Awmna tur i hriat hma chu hetah hian i awm rih thei ang! " Ka kut chul reng chung chuan a ti sup a. A hmel en a ka hawi chhuak chu chik zet in min lo en reng a nih chu . Zawh duh ka ngah a mahse ka zawt ngam hlawl lo. Engtin nge Bawihtei chu ka bulah ka hruai theih ang tih pawh zawh ka duh a mahse ka sawi chhuak ngam lo.



" Kum engzat nge i nih? " Ka kut zut reng pah chuan a ti leh sup a.



" Ihh... 23 ! " Ka ti tawi tak. Ka sawi zawh rual in chil ka lem kawlh. Engvang a thil ti sual ang mai a zam em em nge ka nih pawh ka in hre lo. Eng mah a sawi tawh lo a, ka ban rek chu a nuai sa hat hat a, rei lo teah a tuam zui nghal mawlh mawlh a. Khawi atang in nge a tuamna a rawn lak chhuah pawh ka hmu hmiah lo.




" I sam tuamna kha la thla la, thil ei tur in i lo chhuk thla dawn nia! " Ti leh din a rual a. Kawngka lam pan in a chhuak nghal hmuk chu ka en zui tlawk tlawk ringawt. A chhuak fel chiah chu ka thaw nghal kawk kawk. Ka bulah engtin mah a awm lo chung khan a mi uap kha a na lutuk ringawt.



Rem lo zet chuan ka sam chu ka hru a, ka ril pawh a tam ve reng. Ka ngaihtuahna buai lutuk vang khan ka ril tam leh tam loh pawh ka hre lo kha a nia. Tunah chuan ka pum te a ri rawk rawk thei hial tawh.



" I va zo hma ve, lo kal rawh thil ei ang! " In hnuai ka chhuk chu Zothana nau khan a lo ti vat a. Ka banah min kaiin min pawt kal nghal dat dat a. Ka chungah a tha lutuk hi kei mah zawk hian awm dan ka thiam lo lek lek.



Dining room ah min hruai lutuk a, dawhkan a eitur lo i chhawp teuh hmaah chuan min nem thu in ei tur in min ti nghal zat a. Han duh lo der emaw polite vak pawh ka tum lo, ei tur ka hmu chiah chu ka ril tam a rawn zual nghal rawi rawi thei. Ka kut a nat vang chuan rem lo zet in ka ei a, ka bul ah a rawn thu thla ve nghal dat bawk.



" I ei ve miah lo! " Hre chhuak thut in ka ti vat. Ka bulah thu in a phone a lo hmet ve mai mai tak tak.



" Ka chhuahnaah thil ka ei a, ka ril a la tam lo kei chu. Ka u khan i thil ei chhung i bulah lo awm pui tur che in min hrilh a! " Min en in a rawn ti sam et a, a thu sawi vang chuan ka melh nghal hawk.



" Chutiang chuan a ti maw? " Ka ti let vat chu nui sak in lu a bu nghat.



" Eng emaw... Ka sawi tum chu zawhna min zawh tur i nei lo a mi? Ka sawi awm zia chu ti hian in inah ka awm ve ringawt sia. " Ka ti chhuak ve tawp. A mak chu ka ti deuh... Engmah zawhna pawh a nei lo a nia.



" U Zothanan a then then chu min hrilh tawh a, zawh belh vak tur che ka nei lem lo. I chung a thil thleng chu pawi ka tih pui lutuk che. I fanu pawh i hmuh vat ka beisei pui che! " Min lainat hmel deuh a min en in a rawn ti zui vat a. Ka thaw huai, Zothana khan a lo hrilh vek tawh chu ka hahdam huai in ka hria.



" Mahse hetah ka awm theih thu kha a sawi mai sia i u khan. In chhungte dang an awm lo a mi? " Ka ti ve nghal. Midang ka hmu miah lo tak tak.



" Ka nu leh pa an zin a, kan unau chauh in kan awm rih. Chuan ka tihpalh tak zet, nizan khan ka u nen kan chhuak a, haw lam khan kawng a reh tawh sia tiin ka phur lutuk khan motor khalh ka in ti zir a, i lo lang thut sia, ka in thiam lo zia chu. I kut pawh i ti na a, nuam ka ti lo tak zet! " A rawn ti leh a. A hmelah a in thiam loh tak tak tih lah a lang vek bawk.



" A pawi lo... Hei te chu nizan vang kha a ni lo a nia. Engmah na ka nei lo! " Ka ti let vat. Ka kut na te hi chu Fakawma min nam thlukna kha a ni reng sia.



" Ih... I u kha biak ka duh deuh e.. " Thil ka ei zawh chuan ka ti sap. In hnuai a ka chhuk hnu khan a hmel ka hmu leh tawh miah lo. Engtin nge min puih thei dawn chuan tih a tum zawh ka duh. Tih theih vak a neih loh phei chuan eng thil pawh huam a Fakawma hmuh leh mai ka duh.



" A chhuak daih a lawm. " A tih chuan ka melh vat.



" A chhuak maa? " Ka ti nghal hawk.



" Umm.... Mahse a rawn let har lo ang. Lungngai suh aw ka u hian i buaina chu a chinfel sak ngei ngei che ka ring tlat a nia. A hna a nia, a thil buaipui tawh hi chu a tih hlawh tlin hma chu a ban san ngai lo! " Dam deuh dap chuan a rawn ti a, ka nui lui sak. Min thlamuana aw chu hriat a hahdam thlak tak zet.



" Eng hna nge a thawh a? " Ka ti leh nghal a. Zawhna ngah min tih ka ring leh deuh chu ka in thiam lo leh deuh.



" Lawyer a nia. Chuvang chuan a mahah hian min nghat tawp rawh! I ei zawh chuan thil tih lawk tur ka nei a, ka room ah ka chho dawn. Nang pawh i room khan hah chawl ve daih rawh. Ka u chu a lo haw hunah i be dawn nia. " Tih leh din a rual a.



"Ti duh suh... Mamin a rawn ti fel mai ang. I taksa a chauh hmel lutuk a nia, hahchawl rih rawh! " Ka thil ei na seng fel mai ka tum chu a rawn ti leh vat. Chu mi rual in an awmpui nula chu a ko nghal vat bawk.



" E... I hming ka hre ve lo a! " A kal sawn tawh chu ka zawhna vang in a ding leh dat.



" Emily... I duh chuan Emma pawh min ti thei ang! " Rawn hawi let in nui sak in a rawn ti a.



" Ka chungah that I chhuah vang in ka lawm lutuk Emma! " Ka tih chuan nui sak in a kal sawn zuk nghal. Zothana chu ka nghak deuh ren rawn a, mahse a rawn haw mai loh avang chuan in chung a hma a room min kawh hmuhah khan ka chho leh a. Mahse ka awm mai mai thei chuang lo. Room ah chuan ka vei kual chhen a ni ber.



Ka room kawngka rawn in hawng vang chuan ka hawi nghal vat a, mahse an nula kha a rawn lang ta thung. Zothana a rawn haw tawh tih Emma in min hrilh tur in a rawn tir a lo ni a. In hnuai lamah chuan ka in zui thla a. Emmai chuan office ah khan a awm va hmu mai rawh a ti sam et a, mahse ka lut hreh tlat a nih chu. An fel viau nan mahse ka din hmunah hian midang pawh awm se an ngam bik in ka ring. A in thlahrun awm em a mahse hmuh ngei ngei ka ngaih avang chuan zah pawh dawn lo in office kawngka chu ka kik ta kauh kauh.



Chhung lam atang a lut tur a min tih hnu chuan ka lut a, min hmuh rual in a lehkha ken chu a khup nghal hmuk.



" Mamawh i nei a mi? " Min melh run chuan a rawn ti a. A nelawm teh chiam si lo, ka zam leh viau tawh.



" Thil zawh che ka duh a? " In thlahrung ru deuh tak chuan ka ti sap.



" Han sawi la! " A ti leh hmuk.



" Engtin nge ka fanu chu ka bulah ka hruai ang? Vawin khan inah ka hmu miah lo a. "



" I pasal nu leh pa te in lamah a awm! " Ka thu sawi lai pawt chat in a rawn ti hmuk.



" Maw? Puipuii chu an la phei maw? " Ka ti vat. Ni tak.... Fakawma nu khan a sawi kha, tlem chuan ka hahdam deuh, kha nu leh Fakawma khan an enkawl ka hlau tak zet. Kha nu ngat phei kha chuan a tawng dan atang khan a ngaihtuah dawn lo tih lah ka chiang bawk.



" Lo thu la! " A tih vang chuan a hma a chair ah chuan ka thu ve nghal a. A kiu dawhkan a nghat in a kut chuan a khabe a thai hauh hauh a, eng emaw sawi tur pawimawh tak nei hmel a pu bawk.



" I hriat ang in I pasal hian then che in hmeichhe dang a nei zui nghal a. Kha chu nupa in kar a thleng thei vek a ni a, I hriat ve tho kha. I buaina ber chu I fanu chung changah ka ngai a. Mahse he thil pawh hi a awl sam dawn lo a, I hre chiang a nang pawn I dinhmum chhiat zia chu, I pasal lah in in fanu hi I awm pui a rem ti bik si lo a.



Tunah rih chuan tih theih I nei lem lo viau bawk. Dan ang a ngaihtuah phei chuan naupang chu a chawm thei tu zawk kutah hlan a ngai dawn a. " A ti sup a. A mit meng dur khup chuan min melh run a, a thu tak bawi si chu ka thawk a sak talh.



" Mahse a nu ka nih hi. Ka fanu a nia engvang in nge ka bulah ka hruai theih lo! " Ka ti let vak.



" A chhan chu kei ai I hre chiang zawk in ka hria. Naupang nu ni mah la I enkawl theih loh chuan I pasal pawh a pa ve tho a ni tih I hriat kha. I fanu nen a chenna in tur I nei lo a, enkawl na tur sum emaw thil dang pawh neih I nei hek lo. I pasal... Sorry... I fanu pa hian I fanu hi a enkawl ve duh tkat bawk chuan I tan chance a chhe viau." A rawn ti leh hmuk a. A thu sawi chu ngaihthlak a hreawm tak zet.



Mahse a sawi dik vek , engmah nei ka nei lo. Tunah pawh hetiang hian an mi puihna zarah ka awm thei chauh a. Fakawma chuan in a nei a, hna a nei a, engkim a nei vek!



" Engtin nge ka tih tak ang? " Beidawng lutuk in ka ti chhuak tiau. Mit ka khap fak rual in ka biang a lum thla nghal pap bawk.



" Kawng hnih tih dan chu a awm! " A rawn tih chuan rang zet in ka hawi chhuak nghal vat.



" Kawng khat zawk chu in phah hniam a, i pasal in a let leh a nia. Mahse chu erawh a harsa viau ang a nupui thar kha a chhuah duh loh chuan i awm luih ve theih tlat leh theih tlat loh ah a in nghat ve dawn a. " A rawn ti leh hmuk a. Mahse chu chu thil theih a ni lo tih ka chiang.



" Pakhat zawk chu an mahni nen a in remna siam a, i fanu hmuh tir ve tur a va ngen emaw a ni thung. Chu pawh chu a harsa khawp ang. An phal kher lo ami thei a. " A rawn ti leh chuan ka nui ro hak.



" An phal lo ang! " Ka ti zawi sap. An lak atang a hla tak a awm tur in mjn duh zia ka hre chiang.



" An phal dan kawng i ngaihtuah a ngai a nih chu. Tun atan chuan i tan pawh a tha ber. Kum rei lo te chhung chu i fanu hi i enkawl tir mai an ngai ang. I tan a that ve na chu chu mi chhung chuan nang mah I lo in ti fel thei a nga. Hna te I zawng a nga, I fanu i tu bulah zawk nge awm a duh a thlan hunah i fanu tan in nghahna tlak i nih hman ngei a ngai bawk a. Engtiang pawh in i fanu hian i bul a awm duh mah se i enkawl thei dawn loh chuan a pa ten dan hmang a an kal pui chuan i chan dawn tho tho a, i lo in hma khua ve a ngai ka tihna a nih chu! " A rawn ti leh sup a.



Ka rilru a buai tak zet. Zan khua chuan ka in ngaihtuah a, a chang leh zah pawh dawn lo in fakawma ka kuh khung leh tawp mai dawn a mi ka ti thul. Mahse thil theih a ni tawh si lo, Puipuii min hmuh tir thin tur a dil dawn lah a phal lo nasa bawk si chu ka rilru a buai tak zet.



Ka rilru hah lutuk chuan zing khaw var pawh nghak thei lo chuan ka room atang chuan ka tlan chhuak a, Zothana room kha in hnuaiah a awm avang in tlan tha in a room kawngka chu ka pawt hawng a, ka pen lut nghal vat. Room chhung chu a lo thim khup a, khum lam chu pan in puan chu ka keu a mahse a awm miah lo.



" Hetah enge i tih? " Ka hnung lam a tawng thum dut ka hriat rual in ka in her a, min lo din hnaih lutuk chu a awm zawnah ka in tauh dawt a, ka tlu hman tep chu ka kawngah a rawn vuan chawt a, ka au chhuak tep chu a kut leh lam in ka hmui a rawn hup chawt a nih chu.



Zanlai ah shower a nei ngei a sam a hnawm chap a, kawr pawh a ha lo, light eng lo in room din light chiah a eng dul deuh ruih a mahse kan in hnai bawk a, a mut meng thuk ruih chu ka hmu hmaih chuang lo.



" Zan thawh at ching chu i nih ka ring lo a! " Min melh run chuan a ti leh sup a. A mit a melh ve ngar in chil ka lem kalh. Tlem chuan ka tal deuh laih a min thlah takah chuan ka tawlh hrang deuh hret a, mahse khum ka hnaih em avang in khum chuan min lo dang a khum chungah ka thu thla dat.



" Khawngaih in min pui rawh! I sawi ang khan tunah rih chuan ka fanu chu ka bulah ka hruai thei lo. Mahse ka hmuh thei nan... A hmel ka hmuh theih nan eng thil nge ka tih ngai min hrilh rawh. I sawi a piang chu ka zawm vek ang. Chuvang chuan ka fanu ka hmuh theih nan min pui hram rawh? " Khum a thu ran chuan ka ti chhuak sap. Ka tawng ring hran lo. Mahse a hre thei tih ka hria.



" Eng pawh maw? " Ti sup tu chu ka melh chho vat a. A kut a kuangkuah ngur a. Thawmhnaw a ha si lo a, a taksa chu a nalh tak zet. Tower var chiah a veng a, a zamawm rum rum zawk.



" Aw... Engpawh. Ka fanu ka hmuh theih nan chuan ka huam! " Ka ti ve halh.



" Chu thil chu tih sak ta che I la enge a let ah min pek ang? A thlawn a puih I beisei chu ka ring chiah lo a! " Min melh chhur run chuan a rawn ti hmuk. Chhan mai ngaihna pawh ka hre lo. Engmah nei ka nei lo tih hre chiang tu a ni a, chenna in tak ngial pawh nei lo hian enge pe se min tih?



" Ka neih thil a nih chuan i duh a piang ka pe ang che. Chuvang chuan khawngaih in min pui rawh. Mahse nei ka nei loh zia chu i hria a, sum emaw i duh pawn hna thawh tur ka zawng a nga.... " Ka ti hman tawh chu a rawn kun hniam thut a, ka thutna khum sir ve ve ah rawn in nem khal run in ka hmai bul chetah a rawn kun hnai a nih chu. Ka tawng pawh ka tawp chawt.



" Sum chu ka mamawh lo viau tih i hriat ka ring. Thil dang duh ta i la min pe thei a ngem? " A rawn ti zawi ruih a. Min hnaih lutuk chu ka thaw chhuak ngam tawh lo hrim hrim.



" Eng... Eng thil nge i duh? " Ka ti bah nak chu a rawn nui suk a. Ka hmai a lum hawk thung. Ka zam tak zet, ka tha te chu an khur der der hial in ka hria. Chuan ka hlauthawng bawk.



" Ka duh min pe thei dawn ngei tih ka chian hma chu ka hrilh thei lo che. I thei dawn a nih chuan tanpui I ngai na a piangah ka pui thung ang che! I duh thlang rawh! " A rawn ti hmuk a. A mit meng thim dur khup chuan min melh run a, ka hlauthawng lutuk chu tawng ngaihna ka hre lo. Enge kei ve teh lul lakah hian a duh chu ni ang?



Link:
BBcode:
HTML:
Hide post links
Show post links

ADVERTISEMENT (A hnuai a milem hi a nia hmeh zeuh tur chu)