DESTINY AWAITS-28 by NUTTY GIRL

Episode kal lai dah luhna

Moderator: writers

Nutty girl
Posts: 209
Joined: May 2nd, 2020, 11:28 pm

DESTINY AWAITS-28 by NUTTY GIRL

Unread post by Nutty girl » December 3rd, 2020, 10:45 pm

DESTINY AWAITS



BY:


NUTTY GIRL

16-47-10-images.jpg
16-47-10-images.jpg (17.64 KiB) Viewed 3182 times

CHAPTER-28



"Vawiin chawhnu chu hman ve ni sia,in ṭhianpa Rda chu kan va kan ve dawn ami niang?"ka nuin a tih chuan "Ummm,keipawh va in lan ve leh te ka duh,i kal peih chuan kan kal dawn nia,"tiin ka chhang nghal vat a. "I pa pawn kal ve a duh asin mahse hei a fehchhuak ta daih sia,"choka aṭang chuan a rawn ti lawng lawng.



"Scooty i khalh chhuak peih ang chu tiro?"a tih chuan ka peih thuin ka chhang vat a. "Eirawng bawl sa ila,i u in chaw lo chhum mai se,kal ve tak ro ro a hmanhmawh deuha kal zawng,"a tih chuan chaw chhum tur ka sil nghal malh malh. Ti hian chaw chhum mai theihin kan kalsan tawp anga,a awlsam tawh lutuk. Sunday tlai a ni bawk a chawhmeh siam tam vak a ngai lo,changkha rah ka kang tawp a,ka nuin bai a siam bawk a,kan zo fel der a ni mai.


Eirawng kan bawl zawh chuan kan kal thei nghal mai,gate an hawn hun a ni ṭep tawh. Scooty la chhuakin damdawiin lam chu kan pan a. Kan thlen hun chu a fuh lutuk,gate an lo hawng deuh chiah. Tluangi pawh a lo awm ngei a,ka nu leh Rda nu chu an titi mawlh mawlh.A harh tawha mahse a chau ve hle,kan awm chhung chuan men pawh a meng peih lo. Tlemin a zia chho ve telh telh turah ngai ang. Rda a chau bawk nen han awm reng na chi a nih loh avang chuan kan chhuak thuai a.




Nu Thanpuii kan tawh chuan ka nu nen chuan an titi luam a."Mami i lo haw elaw? Kan va in hmu khat ve. Engti in nge i lo haw reng reng a?"tiin nui hmel pu sangin min be nghal luam a."Umm..ka damṭha lutuk lo deuh a,ka rawn haw a nih hi,"tiin ka nuih sen sen. "A va zia love aw,"a ti a,ka nu nen chuan an titi zui leh nghal bawrh bawrh.




"Mami Christy chu va hmu ve ila," a tih chuan ka bu nghauh ringawt a,Professor a awm ang tih ka hlau ngawih ngawih,ka hmu chak fahran tawh lo hle. Aih ti thei dinhmunah tunah chuan ka ding tawh miau lo.Pi Thanpuii leh ka nu chu kal pahin an titi a,an hnungah chuan nuam ti fahran lo inan hnungah chuan ka zui hnak hnak.


"Christy pawh a lian ve reuh tawh ania,tun thleng hian a la sawi lang zeuh zeuh zel che a,"a ti liam puat a,za fahran lo chuan ka nui suk ringawt. Kan luh chuan Christy chu khumah a lo mu bam mai,a lo lian ve tawh reuh lutuk. A hmaa tlema a chum ve te kha a reh tawh a lo cher duk tawh mai. Professor hmuh ka duh lo viau naa a awm ve lo chu mak ka ti lawi si.



"School a kal ve tawh em?"ngawi renga ka awm chuan nuam ka ti vak lo ah a ngai ang tih ka hlauh avang chuan zawhna ka zawt ve ta nge nge. "Aw,kal ve tawh e,a u kalnaah a kal ve a. Nuam a ti ve lutuk apa hian a thlah a,keiin ka hruai leh mai ṭhin a mahse a hrisel lo reuh lutuk a,a kal ṭha pangngai thei ve meuh lo,"khuma Christy mu bam melh vang vang chung chuan a ti sap a.



"Ava pawi ve aw,"tih bak sawi theih ka nei lem chuang lo a. Professor a awm lo chu lawm tak ka ni,ka awm pawh a nuam sawt. Ka nu leh nu Thanpuiite titi chu ka zawm ve zauh zauh a. Khuma Christy muhil chu ka en leh vung vung ṭhin.



"Pu Rokhuma kha nizan lam khan an lo dah lut tak asin,i va hmu em?"Nu Thanpuii a tih chuan ka nu chuan a hmuh loh thu leh kal a duh thu a sawi a. "Keipawh hei an chanchin va ngaihven te ka duh e ka tia,"tiin Nu Thanpuii chuan a lo chhang vat bawk.



"Mami kan va kal lawk ange,Christy a la muhil tho ti khan lo awmpui la. I kal ve peih dawn chuang lo,"ka nuin a tih chuan ka bu nghauh. Nuho lah hi damdawiin an kal chuan an hmelhriat an zawng ṭauh ṭauh zel a tiin ka rilruin ka phun mawlh mawlh. Hmelhriat an ngah thei em em leh nghal a,ka nu damdawiina ka kalpui peih loh na chhan ber a ni.Gate an khar hma darkar chanve dawn lai a la awm.



Kawngkhar rawn in hawngah chuan ka hnunglam ka hawi vat,ka ṭang nghal ṭeuh mai. Ani pawn min hmu chu mak a ti ve tho tih a hriat mahse engmah sawi lo in a rawn lut a,ka lampanin a rawn kal. Ka hawi sawn nghal vat.
Ṭhut pawh chu ka ṭhu nghet thei tawh lo,ka che deuh sek. Ka nute chu lo let har ka ti tawh ngang mai.



Ka hma zawn chiahah chuan ka lam hawi zawngin a ṭhu a,min melh reng a ni tih pawh chu ka hre reng. Hre lo anga lan tumin ka phone chu ka bih nghal ngur a,vawikhat te pawh ka hawichhuak lo hrim hrim.



"A hma aiin i cher a nih kha,"a rawn tih sup chuan ka rilru chuan 'I buaina tur a awm lo,'ka ti hmak a mahse hetia han tih ngawt chu ka inthlahrung deuh. "Nia,"tih ringawt chuan ka chhang tawi tak.



"Engti in nge i rawn haw reng reng a?"a rawn ti leh sup. He room ka chhuahsan chak zia hi a hre lo em ni le? Hetia min biak sek phei chuan ka awm a nuam lo tulh tulh leh nghal a. "Ka rawn haw mai mai,"ti chuan nin hmel zet chuan ka thaw halh a,a hmel ka en chuan a nui suk nangin a inthiam lo deuh tlata hriatna ka nei,ka chhan dan kha nuam ka ti leh ta chiah lo deuh mahse engmah ka sawi duh lem chuang lo.



"Na em em a siamtu che a nih kha,awm nuam lo mai mai ang hmiang. Na takin a siam che a lawm,"ti ten ka in ngahtuah ta vel a.Boruak chu a ni deuh luk mai. Christy a rawn chet ṭual ṭual chuan ka en vat a,a loharh chu niin. Min rawn melh chuan ka nuih suk. Engmah sawi lo chuan apa chu a melh ve zeuh.



"Apa,"a pa a melh vung vung hnuah chuan a ti sap a,ka nui nghal suk. A pa chu a ngaih ber a la ni tho a nih hi. Ka bulah chuam a zum du mai,a awm lo hran lo,min melh chuan ka nuih leh suk ṭhin a,a hawi sawn leh daih zel.



"I lo damlo leh a magic i mamawh leh a ni maw?"ka tih chuan min en ran ran chung chuan a bu nghauh a. "I lo van lian tawh em em,school te i kal thei tawh a,"tiin ka be siam siam. Ka biak rei a,ka titi pui hnuah chuan tlemin a zum lutuk kha ziaawm ve ta deuh.



"Ngati nge i lokal tawh ngai lo a?"a rawn ti reuh a,Professor nen chuan kan in en ringawt. "Nia,sawtah hna ka va thawk daih a,,magic kha naupangte bulah ka va pe ṭhin a,"ka tih chuan a bu nghauh nghauh a. "Api nen pawh in inah kan lo kala,i awm lo a,"a ti leh sup. Min theihnghilh tawh ka rin teh reng nen min lo la hre ve reng chu a mak zawk. "In ina len te,nangmah hmuh te a ngen ṭhin a,a hma khan,"Professor chuan nui suk chuan a ti a,sawi ve tur pawh ka hre lo. Chutia kan awm lai chuan ka nu leh nu Thanpuiite chu an rawn let a,ka lawmzia chu sawifiah sen pawh a ni lo.



"Ehe,Bawiha i lo thleng ani maw?Keipawh ka va haw phei ange,apu lung a lo leng leh tawh lutuk ang,Omi leh Bawihpuia chiah an awm dawn sia,"nu Thanpuii chuan fiamthu chuan tiin kan nui hak hak. Nu Thanpuii chu an driverin a nghah avangin an motorin a haw ve mai bawk.



Tinge anu a rawn kal ve miah loh? tih chuan ka rilru a luah hneh leh lutuk tlat tawh. Nu Thanpuii titi hmang aṭang khan an awmdan hi amak ka ti. Hmangaihi chungchang a sawi tel ve miah lo te,anni hi an la in hruai lo ami le? Nilo,ni lo chutiang ngaihtuah suh tiin lu ka thing nak nak. Motor chak zeta kan lampana rawn tlan nen chuan kan in su ṭep leh nghal.



"Khalh fimkhur rawh,an tlan chak hlawm bawk si,"tiin ka nu chuan min hau nghal hlak hlak.Khami te pahnih vang vek kha,ninawm a ka ngaihtuahna an chawk buai vek. Ngaihtuah loh tum chuan ka thil khalh laiah chuan ka rilru pek ka tum ngar ngar. Hui...ka hringnun hi min ti chau zo.



~~~


Zanah chuan Tluangi chuan min rawn call a,Rda chungchang te kan sawi a,zia lam a pan ve hret hret doctorin a ti bawk a. Tluangi pawh a aw aṭang chuan a hlim ve zia pawh a hriat theih.Tluangi pate pawn an dal bik lo a tir khan duh lo ve viau mahse an fanuin a duh miau avang chuan a tlawm zawk ah an ṭang ta nge nge kha a nia.



Professor te ka rilrua an lo lan avang chuan "E..Tluang thil ka lo zawt lawk che,"ka ti hap a. "Yess,min zawt la,"a tih chuan sawi ka hreh leh deuh "A..a ngai lo mai,."ka ti thla rawk, engvanga hepa hi la buaipui leh nge ka nih ka in zawt nawn fo ṭhin,a chhanna ka hmuh chu 'ka la ngaihsak reng a,ka la hmangaih reng vang'tih hi a ni mahse ka chapona hian min pawm pui ve lo.



"Sawi mai mai teh,hfe chak deuh hian min siam ṭhin suh,aninawm,"a rawn ti nghal hlak hlak. "Aw...nih leh Professor leh a nupui hi an inneih leh lo ami?"ka ti chhuak sap,ka sawi zawh chuan kan ngawi vung vung,a reh ṭhap mai.



"A..aw,keipawn mak ka ti mahse a chanchin sawi suh i tih avangin ka sawi duh lo a. Tinge?"aw thian deuh kharh kharh chuan a rawn ti a. Maw? Engvangnge le?



"Ngati mah ka zawt mai mai che,"tiin ka chhang liam puat a.


"Hey,lawk kan sawi ta sa sa,an awmdan mak i ti ve tho a ni maw? Keipawn maw mak ka ti tawp,Professor ka hmuh te hian ka ngei thei tawp a mahse aa hnuah ka han chik a,an in zui ka hmu ngai miah lo a. Professor khan a hmangaih vangin a kalsan che a mahse a nupui a pan miah lo. Tunah pawh an inneih ṭha chuang si lo a,"tiin a rawn sawi chhun zawm mawlh mawlh. Mak chu ka ti a mahse han hriat belh ka duh rih lo.



"An in zui lang duh lo mai mai aniang,a hmain an boruak a ṭha vak lo anga,"ka ti nawi nuai a. "A..awihawm loh emai a,Professor in hmangaih tak tak ni se a ṭum chat ang chu,
ngaihtuah la. A hruai leh daih tawh ang,a mak e,"a rawn tih chuan ka khap vat. A titi tui anga a tawpah min sawi zawm leh ringawt ang.



"Ka dah,ka hre duh mai mai. Ngaihtuah zui duh suh,kei pawn Nunpuia ka nei tawh a lawm,"tiin ka nui lui sak,kan in mangṭha hnu chuan ka dah vat a. Ka thaw nghal hak, ni e tunah chuan Nunpuia ka nei tawh a. Professor kha chuan a hmangaih ve lo che, nangmah tina tu che kha a la ni reng ania.



2 DAYS LATER.



Rda a dinhmun a tlak hniam thut avangin damdawiin lampan chuan ka inkhalh chhuak vat. Zia lam a pan chho zel emaw tih laiin tunah a dinhmun a tlahniam thut a,ICU ah an dah leh.


Ka va thlen chuan Tluangi pawh a mangang khawp mai. Mi ka hnem thiamloh zia ngaihtuah phei chuan a bula awm ve reng hi a hrehawm lek lek. Rda nu pawh kan bulah chuan ṭhuin a mittui a hru leh fap fap ṭhin. Tun thlengin a pa a lo lang ve lo te hi ka dem ngawih ngawih.


"Tluang zing aṭangin engmah i la ei loh kha, thil va ei lawk ila,"ka tih chuan a kal sawn duh loh thu a sawi tlat."Nih leh in eitur ka va lei a nge aw,chak taka i awm angai ania. Rdan hetianga i awm hi hre ta se a duh hauh lo ang,"tiin ka thlem ve ngial a,a bu ta nghauh nghauh.


"Mami,"damdawiin aṭanga ka chhuak tur chu min lo au tu avang chuan ka ding dawt a,hnunglam ka hawi chuan Hmangaihi chu ka lampanin a rawn kal a.


"Inbia ang,thil sawi pui tur che ka nei,"a tih chuan hnial tumin ka ang hman zuau a mahse min lo pawt chat leh vat. "Khawngaihin,"a rawn ti sap a. Nutling puiin khawngaih min dil a nih chuan a pawimawh viau a ni ngei ang.
"Awle mahse thil lei hmasak phawt ka ngaia," ka tih chuan min nghah tur thu chu a sawi a. A hmaa min melh ang kha chuan min melh tawh hauh lo.Huatna mitmeng pawh kha a bo hlauh tawh.


Amah i huatna leh i hmangaihna kha a insuala,chuta chak zawk chuan i hringnun thawnthu ani nena in thawnthu kal dan tur kha a hril tawh ang.


A tawi tih ka hria e☺️Khua a vawt sia ka kut a vawh chuan ka ruh ana nghal zel a,tih lum leh te te a nhai thin, type chak hi a har lutuk a,min lo hrethiam ru aw💕Chhuna class kal a ngaia engmah ka type lawk hman si lo a...😊 inthlahrung takin ka lo in sawifiah tawp.



Ads kha clack keuh la aw💜



Link:
BBcode:
HTML:
Hide post links
Show post links

ADVERTISEMENT (A hnuai a milem hi a nia hmeh zeuh tur chu)