ZOTHANTLUANGA CHAPTER - 10 by Amy Cck

Episode kal lai dah luhna

Moderator: writers

Amy
Posts: 285
Joined: May 15th, 2019, 8:49 pm

ZOTHANTLUANGA CHAPTER - 10 by Amy Cck

Unread post by Amy » January 13th, 2021, 10:33 pm

CHAPTER - 10 💮 by Amy Cck



" Ehe... I dam em? " Zothana bul a hmeichhe thu chuan nui sang chuan a ti let nghal vat a. An pathum chuan an in pawh hmel hlawm viau leh nghal. Tumah in min hmel hriat tir an tum ve bawk lo nen zawh pawh ka zawt ta bik lo.



" Adik vawin khan ka ATM card ka hman zawh khan ka dah khan ka hre sia ka hmu miah lo. Ka thloh a nih ka ring! " Emily chu ka bulah rawn ding in a rawn ti niah niah a. Ka nui sak.



" Min ken tir kha. I purse a dah a buaithlak rih sia tiin! Ka bag pengah sawn ka dah va la mai rawh! " Ka tih chuan a hre chhuak leh hnu hnawh nge lei chhuah tet in a mit sir in Zothana te thutna lam a melh a. Zothana a lo hria nge hre lo a ngai chang ni mai in ka hria.



" Ka van hai hawt tak. Ka u hrilh miah suh aw! " A tih chuan nui sak in lu ka bu nghat. Dawhkan bul a chair a ka bag chu a va en nghal zat a. A lak chhuah rual in min rawn melh leh chu ka nuih ve tawp.



" U Muanpui chaw ei ve nghal la, zanah ka u in a thlah dawn che nia." Emily chuan a ti lang lang a. Muanpuii an tih nu pawh chuan a hnial lem lo a nih hmel.



" Zothanan min thlah hman chuan ka ei ang! " A rawn ti ve nghal a. Zothana pawh chuan a thlah tur thu a sawi ve sup bawk.



"Ka night dawn sia ka han in siam leh lawk. Puipui min lo pui dawn em? " Puipuii en chuan a ti nghal zat a. Puipuii lah chuan a lo aw ve mai leh nghal.



Chokaah chuan kan pathum chuan kan awm a. Ka tan chuan nuam lo tak a ni. Tum loh deuh in an mahni chu ka lo ngaihven leh thin bawk nen. An ni erawh chu ka awm ve tih hre lo ang hmak in an in kawm in an nui a nih chu. Van neih thlak lutuk in Mami a rawn lut ta hlauh.



" Mamm... Hei lo siam zawm mai la. Ka han in thlak ve lawk! " Ka chaw hmeh siam lai chu melh in ka ti ta ngawt a. He ta tang a kal sawn ka chak tawh lutuk ringawt.



Ka room a ka chhoh hnu chuan ka in ti fai a. In hnuai lamah pawh ka chhuk vat duh ta lo. Dik tak chuan Zothana leh kha nu in nel tak a an in kawm a, an in be vel kha hmuh nuam ka ti lo. Kei hian ka thik tihna mi? Ka thil ngaihtuah avang chuan lu ka thing nawk nawk a.



Emily kal hma a ngaih avang in dar 5 velah zanriah kan ei a. Chaw ei kham ve leh Zothana nen an chhuak a. Kei leh Mamin kan ei na kan ti fel mawlh mawlh a. In chhung chet ve hi chu Mami hian hneh viau mahse ka theih vhinah hi chuan tih pui vek ka duh thin. Ka in thlahrung lutuk tur venna pawh ka ti thei ang chu.



" U dik Puipuii kha va ti mu mai rawh. Ka lo chhun zawm mai ang! " Thleng ka seng lai chuan Mamin a rawn ti a. Puipuii lah a mut chhuak chiau hiar tawh bawk nen, ka kawr tlangah min pawt in ka kalna lam a piangah min zui kual ve dat dat reng bawk a.



" Umm... Vawin ni sa nen a vak chau a niang. " Tih leh Puipuii chu pawm ka rual a. Ka nghawngah min kuah bet in ka darah a lu a nghat tha sauh sauh a, Puipuii lah chu a muhil ti tih nghal der bawk a nih chu. Choka atang chuan ka chhuah pui a. In chung ka chho tur chu Zothana room atang in Muanpuii kha a rawn chhuak ve chiah bawk. Zothana leh Emily rual khan a chhuak daih tawh a maw ka ti kha a nia.



" Zothana hi a la rawn let lo a mi? " Kal pelh mai ka tum chu min bia a, a rawn tih avang chuan ka ding leh dat a. Min be deuh thut chu mak ka ti zawk. Tlai atang kan kan in hmu tawh a, chaw ei lai te pawh khan ka awm ve tih hre lo ang hmak in a khawsa a, tunah min be hmasa thut chu ka ham haih lek lek zawk.



" Umm... A rawn let tep ang! " Tha tak chuan ka ti ve mai a. Kal leh mai ka tum chu.....



" Eng chen nge hetah hian awm i tum? " A rawn ti nawn leh a, a thu rawn sawi vang chuan ka ding leh dat.



" Chhan harsa a nih loh chu. I la awm reng dawn leh dawn lo ka hre chak mai mai a! " Ka kal pelh deuh tawh avang chuan a mah zawk chu ka hmaah a rawn ding leh a. Ka chhan mai loh vang nge a chek deuh hlak bawk.



" Harsatna I tawh vang a heta awm i ni tih chu ka hre tho a. Mahse ka lo ngaihtuah mai mai a. I chhungte emaw, I thian leh I hriat ngai pawh ni miah lo te bulah ti hian I awm tawp a nia. Chu tah, inchhungah hian mipa te pawh an awm ve bawk si a. Mi mawl I ni lo a ka sawi awm zia chu i hriat thiam ka ring! " A rawn ti leh nghal zat a. Puipuii ka pawm na chu ka ti nghet nghal vak . A sawi awmzia chu kei leh Zothan hi min ngai dik lo deuh a tihnaah ka ngai hmiah bawk.



" Ka hria lawm. Mahse chutiang in ngaih khaw loh tur a awm lo a nia! " Ka ti chhuak thei tawk. Engvang a zam viau nge ka nih pawh ka in hre lo. Ka hma a hmeichhe ding chu za lo zet hian a rawn nui sak a.



" Ni e, a awm lo ang tih chu kei pawn ka hria lawm. Bakah Zothana hi ka hre chiang a. Mawi lo tak a khawsa duh chi a ni lo tih pawh ka hria. Mahse ka sawi tum zawk tak chu, eng thil mah thleng lo mahse midang in an lo ngai dik lo ve thei ka tih na a nih chu . I din hmun angah phei chuan tum loh deuh a hming chhiat hi a awl a nia. Midang in Zothana hi pasal then hlim hmeichhia nen an cheng dun tih hre ta se! " Min melh ralh chuan a rawn ti a. A tawng dan chu ka ngai thei hauh lo leh nghal.



" Enteh! I ngaihtuah dan chu ka hre thiam a lawm. Mahse hetah hian kei leh Zothana chiah kan awm lo a. Emily pawh a awm ve tho tih I hriat kha! " Ka ti kha ve fak. Mahse ka tawng erawh a ring hran lo. Puipuii ka pawm miau avang in ka aw ki ka san a nih chuan a rawn harh ka hlau a ni ber.



" Emily maw! Ka hria e. Mahse tunah pawh a hna vang in a riak chhuak leh daih a. Chuan Tu nge inah awm ta hi. I thin tih rim tum a sawi chhuak pawh ka ni lo a nia. Ka sawi chhan chu Zothana ka ven thawn vang a nia. A ni chuan hetiang lam hi a sawi pui che ka ring lo. Mipa rilru tha tawp khawk a ni a.




A hmaah tanpui ngai, vak vai leh chhenna in nei lo in awm reng lai a en liam chu a thei dawn lo a. Chuvang chuan ka lo ngaih ve dan chu rilru danglam i pu lo a nih chuan chhuah san chu a hun ve tawh viau in ka hria." A rawn ti leh a. A aw chhuak chu a dam dap a. Mahse thin erawh a khei zak thung. Chuan engtin nge vaqi khat chiah min hmuhnaah khang zo zai kha a hriat pawh ka hre lo. Ohh... Zothana hnen atang lo in khawi atang mah in a hre lo ang.




" Chu chu i buaina tur a ni in ka hre lo! " Ka ti ram hmak. Muanpuii lah chu a rawn nui sak duh chauh leh nghal. Thinrim in, vin in , a ang tawn tawn lo a, a tawng kam tin kha dam dap, mahse min hmuhsit zia erawh a thup eih lo thung.




" Thla hnih i awm tawh tih ka lo hria a. Chuan Zothana i phak bak hna a pe bawk che a. Hei bak a buaipui tur pawimawh hi ka tan a awm dawn chuang a mi? " Mi hmul san ak in a ti leh ngat chu ka in hum ruh ngawt ngawt.



Eng emaw sawi tum in a ang zauh hman a. Mahse kawngka pui lamah Zothana aw a hriat vang nge a hmui chu chip in a nui sak ta zawk a.



" I chung a an thatna hi remchangah lak tum buai suh ang che! " Min din hnaih tawh teh lul nen rawn pen hnai leh zual in a rawn ti kha fak a. Nui lui sak in a awm hrang leh nghal a nih chu.



" I lo va let hma ve! " Kan bul a Zothana a rawn din rual in nui sang in Muanpuii chuan a ti nghal zat a. A mizia leh tawngkam in thlang danglam hlawk vang chuan kei mah zawk chu ka ham haih lek leke zawk.




" Ka call drop ringawt a! " Muanpuii en chung chuan Zothanan chuan a ti let sup a.



" A muhil der a law? " Ka lam rawn hawiin a rawn ti nghal sup. Kan lo awm dan vang kha nge chhan mai ngaihna pawh ka hre lo. Zothanan mit meng ti zim sun a min en takah chuan harhchhuak zawk in lu ka chet ta zeuh a.



" Khawi... Ka lo pawm chho ang! " Tih leh rawn ban mai a tum chu rang zet in ka tawlh hnung vat a. Zothana lawm lo rum ri nghut in a zui nghal.



" A ngai lo, ka ti thei a lawm! " Zothana lawm lo hmel chu hmu lo der in ka nui lui sak a. In her in stepah chuan ka pen chho zui nghal zat bawk.



Step a chho eeng chung chuan Muanpuii leh Zothana inbe ri chu ka hre pha reng tho. Ner sak in room ah ka lut a, Puipuii chu ka mut fel a. A la hma viau a mahse room atang ka chhuak duh tawh lo thung. Room chhungah chuan ka vei kual sek a. A khat tawk in pik zet in ka thaw chhuak leh hawk thin.



" Enge i thinrim vak? Sawi sual pawh a neih loh kha! " Ti chhuak hal in khum tlangah chuan ka thu thla dat a. Mahse ka thin erawh a hma zawng ai khan a rim zawk emaw tih tur in a awm a nih chu. Ni e, Zothana te chuan min pui nasa lutuk. Chenna in min pe a, hna thawh tur pawh min buaipui sak vek a. Ka fanu thleng in min duat pui vek. Mahse engvang in nge chung zawng zawng chu Muanpuii bulah khan a sawi chhuah vek kher? Tih ka ngaihtuah a, ka thinrim chhan zawk tak chu ka kha nu khan min hmuhsit nan a hmang kher kha.




Ka room kawngka rawn in kik ri vang chuan ka phu zawk a. Dawhkan a sana ka en chu dar 10 a lo ri vel chiah bawk. " I muhil tawh a mi? " Zothana aw in a rawn ti zui nghal a. Chhang lo chuan rang zet in Puipuii bulah chuan ka mu nghal vat a. Ka mu fel chiah tihah room kawngka rawn in hawng tawm ka hre zawm nghal bawk.




Kan khum bulah chuan pen thawm chu a tawp chut a. Heti tak hian mutthilh der hi a harsa ang tih ka ngaihtuah ngai lo. Pen sawn thawm engmah ka hre tawh bawk si lo chu ka tak sa a khawng lo chauh tawh. Mipa thaw ri suai suai chu ka ngaithla reng a. Rei lo te hnuah call a dawn a, chuan a pen sawn ri ka hre ve ta chauh bawk. Thaw chhuak hak in mit ka meng a. Engvang a pum pelh tum nge ka nih pawh ka in hre bik lo.




" I harh tawh chuan kan in be thei tawh em? " Rawn ti thum dut tu vang chuan mu reng chung chuan ka phu nghal chiam a. Mipa nui suk riin a zawm nghal a nih chu. Ka harh tih a hre tawh bawk nen mutthilh der leh chu thil tih chi a ni tawh bawk si lo chu ka tho chhuak ta nge nge!



" Engtia rei nge i awm tawh? " Ka ti nghal tawp a, ka melh nghal nghek. A ruk tak chuan ka zak chem chem bawk. Nuih in sum hmel pu deuh chuan min melh a. Ka hawi sawn ta hmak.



In hnuaiah kan in zui thla leh ta nge nge a. Ka hmaah chuan a kal a, kei in ka zui ve dat dat bawk. A pen hlawk phian leh nghal. A thawmhnaw engkim a la ngai vek danah Muanpuii a va thlah a rawn let chiah a, kan room ah a rawn chho nghal tih lah chiang reng.




" Ka sawi hmasa ang! " Choka a kan lut chu ka lam a rawn hawi rual in ka lo tih khalh nghal vat a. Min melh ngur chuan lu a bu ta nghut. Dawhkana tui chu in tum in noah a thli chhuak nghal zat a.




" In atang a in sawn chhuah hi ka lo ngaihtuah a! " Ka ti ta tawl. Ka thu sawi vang nge a che lai chu a tawp ve chawt a, min melh nghal vut bawk.




" Harsatna a awm em ni? " A ti hmuk a. A aw atang chuan a thinrim a ang ka ti viau bawk. Nui lui sak in lu ka thing mat mat a. A tui bottle ken chu dim lo deuh tak in dawhkanah a nghat ri nghal chawrh a nih chu.




" Ihh.... Harsatna chu awm lo e, ka tih chhan... " Ka tih lai chuan a rawn pawt chat nghal hmuk.




" A nih chuan engvang nge? " A ti hmuk chu ka thaw chhuak hak.




" Min buaipui in min pui rei tawh si a. Tih buai belh cheu hi nuam ka ti lo a. Bakah hetia ka awm reng chuan nakinah ka tan a harsa zawk mai mai dawn in ka hria bawk a. " Dam dap chuan ka ti a. Zothana erawh in a pawm chiah lo nge a ner deuh sawk ringawt a nih chu.



" Ka duh thu che ka sawi vang kha a nih chuan theihnghilh rawh! " A rawn ti hmuk chu ka melh haw ringawt. Ka thu sawi kha a man lo nge ka sawi nen a in mil lo lutuk in min chhang let daih chu chhan ve ngaihna ka hre tawh lo.



" Ka ring dik a ni maw? " Za lo zet a nui suk in a rawn ti leh a. Min rawn pan hnaih a ka hma zawn a rawn thleng tawh chu a awmah ka lo nem dat thung.



" Kha vang a ni lo. A chhan chu ka sawi zawh chiah kha. Ka chhungte pawh in ni lo a, min puih na a zarah in bulah hetiang hian ka khawsa a. Ka fanu thleng in min duat pui em em a. Chuvang chuan in chungah pawh hian ka lawm ngawih ngawih. Mahse hetiang a ka awm reng a nih chuan thenawm khawveng te pawh an hmai zah awm a. Nakinah ka la chhuah a ngai dawn tho a. Chuvang chuan.. " Ka ti zuai raih. Min din hnaih in min melh ngur bawk nen nuam duh lo tak a ni.



" A nih chuan ka thil dil ve che kha engtik nge chhanna min pek dawn? " Ka hmai zawn a rawn kun hniam chuan a ti sup a. A thil sawi vang chuan ka ner nang. Engvang in nge thu pakhat sawi lai in thil dang a rawn sawi ziah le.



" Kha kha chu! Englo... Tunah rih chuan kha tiang lam kha ka la ngaihtuah thei lo tih i hmuh thiam ve ka ring. Tunah rih chuan ka fanu nen a kan hma khua chiah in ka rilru a luah bawk a. Chuvang chuan.... "




" Chuvang chuan chhanna min la pe thei lo a! " Ka tawng pawt chat in a rawn ti sup a. Ka hmui ka pet sawi zeuh ringawt. Ka sawi sual chuang lo, pasal tel lo in thla hnih pum hlum er awr chauh a la ral a. Chuan nupa tam tak in then ang kan ni ve lo bawk nen. Tunah mipa dang lo hnaih i la chuan kei ngei pawn tenawm ka in ti viau in ka ring. Bakah mipa lam ngaihtuah hman ka ni hek lo. Ka fanu nen kan din hmun hi ka sawh ngheh ve phawt a ngai si a.




" A tha lawm. Mahse chhanna min pek hunah ' ai ' tih chhanna a theih loh tih chu kei aiin i hre chiang zawk in ka hria! " Ti leh ding ngil a rual a. Ka thaw chhuak halh. Hnai lutuk a kan in awm hnaih hian ka zam chhe thei lutuk hi a hreawm zawk.


*

*

" Ka chau lutuk! " Ka bulah Emily rawn thu thla hnak in a rawn ti sap a. Kei erawh in thawmhnaw zar ka seng ho chu ka thlep fel mawlh mawlh thung.



" Khawnge ka u hi? " A rawn tih chuan a chhuak tih zawng in ka chhang a. A kal na erawh ka hre lem lo.



" Ka thianpa a lo leng a dawn a. Nang pawn I hre ve mai thei. School a kan kal pui tho a nia! Mahse i hre leh ngut a ngem? A lo thleng a niang! " Doorbell rawn ti vang chuan ding in a ti vat a . Mami kawngka hawng tur a a rawn chhuak chu Emily a hawn tur thu in a lo chhang vat a . A chet dan cheng chung chu mak ti lutuk in ka en ta reng.




Emily leh mipa pakhat rawn in zui lut chu ka lo en ve vat a. Sawi kher ngai lo in Emily hian a duh tih ka hre thei. A mizia ka hre chiang ve tawh bawk a. Ka en hian ka hre mai.




" Hei hi mi i u chu? " A thianpa chuan a rawn ti a. Ka nui chhuak hak. Emily erawh a ner nang.



" Ka u chu mipa a lawm. A ni hi chu ka... Ka unaunu tho a nih hi. Tak tak in i hre tawh lo a mi. High school kan kal lai a kan classmate kha. E... I hriat dan tur chuan Silent-i kan ti thin! Chuan Adik hei hi Peka a nia. " Emily chuan a ti lang lang a. Chupa chu ka nuih ve sak a. Emily che lai kual vek lutuk chu Ka nuih a za bawk nen ka hmui ka pet vak ringawt. Nui chhuah ka duh bik si lo. Silent-i tih chuan chupa pawh chuan min lo hre viau leh nghal.




Kan pathum chuan kan in kawm a. Hun rei tak hnu a pangai tak a ka ti ti leh na hmasaber ni hial in ka hria. Ka thawmhnaw dah fel tum in room ah chhoh ka tum uk a. Mahse Emily in hmun leh hmunah min text in la kal sawn bik suh. A ti tlat si a. A ni leh ni lo ang in sawi tur te a haih chham vel a. A chet dan chu a lawmawm tak zet.




" Chuan... In pahnih khan in la in kawm chho char char tihna a mi? " Ka tih ve mai a. Ka tawng loh chuan Emily , a tawng duk zawk a lai chhe lutuk a, in hi a reh ruih a ni ber.



" Ni chiah lo. Kan thawhna damdawiin a lo in ang a. Hmanni lawk khan kan in hre ve chiah. " Peka chuan a rawn ti ve mai a.



" A nih chuan doctor i ni tihna! " Ka ti leh hran chu nui suk in lu a rawn bu nghut a. Emily en chuan ka nui sak. An in hmeh dawn viau in ka hre leh nghal.



Ka phone rawn ri vang chuan biak chhun zawm lo in ka chhang a. Kal pawh ka kal sawn lem lo. Emily vang bawk in. In luah tur chung chang lam a lo ni bawk nen ka nei rei phian a.



" In luah tur i biak kha a mi? " Phone ka dah rual chuan Emily a rawn ti vat a. Nui sak in lu ka bu nghat.



" Hetah pawh i la awm thei reng a. Hman hmawh vak suh ka tih kha! " A rawn ti leh nghal zat. He nu rilru tha lutuk hi chu malsawmna dawng mawlh mawlh tlak a ni ka ti ngam sak.



" In luah tur i zawng a mi? " Peka pawh chuan a rawn ti sup a.



" Umm... Sang hnih emaw sang thum bawr vel. Mahse a vang reuh phian a! " Ka ti ve mai a.



" Nangmah a i awmna tur maw? " A rawn tih chuan nui sak in lu ka thing mai a.



" Ni deuh tho a mahse ka fanu nen a kan awm nan tur a ni mah zawk! " Ka tih chuan mak a tih hmel ngang mai.



" Fanu i nei tawh maw. I va rang leh si ve. I pasal te... " A tih lai chuan Emily in a lo pawt chat vat a.




" Lo zawn pui ve rawh aw. Hei... Hetah awm rih rawh ka tih pawn a duh tawh si lo a! " A tih ta daih a. Peka pawh chuan engmah min zawt ta lem lo.




Tlai zetah Zothana a rawn haw a. Muanpuii te inah zanriah a ei a vang in Emily nen chiah kan ei a. Hman zan atang khan min be khat leh zual. A duh ang a chhanna ka pek loh vang in ka lakah a thinrim a nih te ka ring hial a. Nge ni a beisei awm ka ni lo tih hrethiam in min hlat a tum zawk pawh ka hre lo.

*

*

Office ah kan awm a. Bathroom ah ka lut ka chhuak chiah chu ka dawhkan hmaah Zothana a lo ding run a. Rang zet in a lam pan chuan ka kal nghal vat.



" Mamawh i nei a mi? " A hma zawn a ka din rual in ka ti vat a. Min melh run chung chuan a bengal zawnah phone bia tih hriat zet hian a ban a leke chhuak a. A ban a lak thlak rual chuan a phone ken chu ka phone a ni tih ka hmu chiah a. Mak ka ti leh zual.



" In luah tur i hmu tawh a maw? " A rawn ti sup a. Rang zet in ka melh ha a. Min melh ngur bawk nen in thlahrung ru deuh tak chuan lu ka bu nghat a. Za lo fahran hian a nui chhuak nghal hawk.



" Min hrilh ve pawh tul i ti lo a? " Ngeiawm lam lek lek hian a rawn ti leh hmuk a.



" Maw? Hrilh che chu ka tum a.. " Ka tih hman tawk chu ka dawhkan chu a beng ri nghal chawrh a. Mit ka chhing sawk.



" Engtikah! I in sawn chhuah dawnah maw? Nge ni a i luah luh hun zawkah! I tan hian enge ka nih hrep a? " A ti leh hrawk a. A aw chhuak bung vut atang chuan a thinrim tak zet tih pawh ka hre thei. Engvang a thinrim vak nge tih erawh ka hre lo thung.



Link:
BBcode:
HTML:
Hide post links
Show post links

ADVERTISEMENT (A hnuai a milem hi a nia hmeh zeuh tur chu)

Post Reply

Who is online

Users browsing this forum: Google Adsense [Bot], Ngaia and 94 guests