FATED TO LOVE YOU-14

Episode kal lai dah luhna

Moderator: writers

Angel Renthlei
Posts: 338
Joined: October 3rd, 2017, 10:10 am

FATED TO LOVE YOU-14

Unread post by Angel Renthlei » January 14th, 2021, 2:04 am

FATED TO LOVE YOU-14


Hun a liam ve zel a, ka pasal nen pawh kan inpawh lehzual. Ka la buai zeuh zeuh reng a, ka mutthilh hma min ven chang te a la awm. Ka pa (Zodina pa) mizia ala danglam chuang lo va, min be hmasa ngai bar lo. A ţawng tam lo hrim hrim a,hriatthiamna chin ka neih laiin eng eng emaw sawipui tur a Zodina a koh hran ţhin hian nuam lo ka ti ţhin a, tun thlengin an thusawi dun ţhin ka la hre lo va, min ngaihsak dan ngai reng a ka pasalin min la ngaihsak tho vang hian ka chungchang a ni lo ang tiin ka inhrilh rilru fo mai. Zodina nungchangah danglamna a awm loh phawt chuan tiin ngaih ka ti ţha lui a, a chhe lam zawng a ngaihtuah loh ka tum lui ţang ţang.

"Iva hma ve?" school aţanga haw pahin a rawn lut kawi ţhin a, ka inpeih hun min nghak a, kan haw dun ţhin. Lokal hun bi a neih deuh vang a nia vawiin a a rawn hma pawh mak ka tih.
"Nidang aiin ka hma deuh" a sana bunlai a bih zawk hnuah min nghah laia a lo ţhutna ţhinah a ţhu a, a pa te lo bawk a, a inchei hi chuan a lang zahawm thei khawp mai.

"I rilţam em?" tiin ka lo zawt leh a, min ngaihsak thei bawk a keipawn ngaihsak dan ka thiam ve deuh tawh. Tluk lo viau mah ila ngaihsakna hi chu a ni aia phu an awm lo.
"Haw hmain kan ei. Duh lo mai ang. Thil i ei em chhunah?" zawhna min lo zawt ve nghal zat. Ka thil ei theih leh theih loh te, ka muţhat theih leh theih loh te hi a buaina a ni ţhin.

"Ei ţha e. Midang rualin ka ei a, ka ei ve ţeuh mai" tih pahin ka pum ka chul a, a lian ve tawhin kawr lian pui hmang a thup bo theih a ni tawh bik lo.
"Ţhat hlauh chu. Taka Florence rawnkal a tum a, a rawn thleng ţep ang" a tih chuan phawk hra chung hian "Dawrah hian maw? Eng nge a rawn tih dawn?"ka lo ti hluai a, a hmangaih chhuhsak tu ka nih miau vangin Florence hi ka hmu hreh.

"Thawmhnaw a duh niang. Mak iva tih hmel ve" a ngaihna a hriat loh hmel kher mai. Florence hnen aţanga ka message dawn te kha ka hrilh duh lo a, a ruk a min rawn biak ţhin engmah a hre ve lo. A hma ang reng a awm turah min ngai a, a thu rawn sawi duh dan ţhin amak em vangin a hma ang kha chuan ka en thei tawh lo.


"Dawrah tak hian a rawnkal ngai lo em a mak ka ti mai mai mawle" ka ti nawi niaih a, a awih ve mai aniang mak ti angin a awm zui lo. Kawr ţhenkhat a sang a khai ka tum lai chuan min rawn hnaih vatin min pui zui mawlh mawlh a, a tan chuan han khai mai kha a harsa ve em em lo.
"I chau lo mi? Hna hnih nei ini ringawt alawm" inthlahrung ru deuh chung hian ka ti a, a tawpna ber a khai zawh hnu chuan ka bulah a rawn ding ve a, puih ka ngaih loh thu ka lo hrilh nawn leh.

"School ringawt ka buaipui vangin thil dang tihna hun ka nei lo a, a theih ang ang tih ve zel ka duh tawh. Kawr khai mai mai kha hna tling lo mahse school chauh a rilru pek ka tum tawh lem lo. Boruak dang hip ve chhin a chakawm tawh a, i awmna a nih phei chuan nuam ka ti lehzual" a tih chuan hmalam ka melh run a, amah ka en ngam lo a ni mah zawk. Paper a eng eng emaw ka ziah te hi a thlek kual ve ţhin a, ka hna a ni bawk a, a nupui kutchhuak a nihna angin a ngaihdan min hrilh ve ţhin.

"I awmna hmun a nih chuan a nuam vek" tih pahin nui ruh ruh chung hian min kuah a, min kuah rei miah lo mahse ka beisei loh leh ka zawhna chhanna ni miah lo a sawi daih vang te leh min duhna a lan tir na avang chuan min ţhawngin ka lung phu a rang ve deuh a, ka inveng vat. A lan tir lo ngai chuang lo a, awlsam te a tih buai theih a awm ka duh lo.

Thla tlem te chiah kan la innei a, chuti chung chuan a ţawngkam leh chezia ah uchuak leh huatthla la miah si lova ka chunga a rilru put dan a tih lan fo vang hian eng emaw kan tawn a kan lungphu a ran deuh ţhin ang hian ka awm ve ţhin a, ka inthunun vat zel thung. Kan mit leh mit a intawn chang te, ka bula a awm a ka kut a vawn chang te hian ka zam ru hle ţhin. Ka hlauhna ţhin kha a bo tawh a, midang bula awm aiin Zodina bula awm nuam ka ti daih tawh zawk. Hetianga ka awm ţhin chhan hi ka hmangaih ber Zothana a an em vangah ka ngai a, a kianga ka awm hian ka him a, hmangaih tu neiin ka hmuh phakah a awm reng tih ka hriat nawn phah ţhin. Hmangaih tu ka neih miau vang chuan ka thlamuang ţhin a, thil dang hriat belh leh zel tur a dai thuk deuh erawh ka tum hran lo. Tun a kan awm ang hian in ngeih deuh a awm reng ka duh a, ka luh thuk chuan kan boruak nuam tak hi a chhiat phah ka hlau a ni.

"Florence lokal hnuah kan haw nghal thei a ni mai" ka lo ti daih thung. Hetiang thil a sawi hian chhan let dan tur ka hre ngai lo. a bula awm nuam ti viau mah ila chhanna ka la nei rih lo. Chhanna hriat tum ai chuan ngaihtuah loh ka tum zawk ţhin.

Florence pawh a rawnkal thuai a, Zodina a hmuh chuan a hlim hmel khawp mai. Ka ngaihbel mai mai pawh a ni thei tho mahse a ţawng a zangkhai vah a, a nui sang reng bawk a, a awmdan chu lemchan mai mai a ni thei lo.

"Helam a awm ve reng ka duh deuh tawh a, ka pi nen kan in ngaina a, ka nute hnenah let mah ila zin turin min rawn chah reng tho a, ka awm hian a khawhar a reh ve deuh a, ka nu nen kan sawi dun a, ka pite hnen a ka awm hi pawi a ti chuang lo bawk a, vei tawn sek ai chuan ka awm ve deuh reng zawk maithei" a ti zat zat a, ka lam a rawn hawi miau loh vangin Zodina zawk chu a hrilh niin ka hria.

Inngaizawng ţhin, buaipui ka ngaih vanga inţhen an nia, ka tan tak hian awm ve reng hi a nuam lo lam mah zawk. An inpawh bawk a an ti ti mawlh mawlh reng. A duh ang a rawn tih hnu chuan a haw mai ka ring a, rin aiin a leng rei peih daih. An piah deuhah ka awm ve reng a, zawm ve si lovin an ti ti ka lo ngaithla a, Zodina zawk chuan an kianga ţhu ve turin min sawm a, lo hnial ţung a nuam si lo va hreh deuh chungin Zodina bulah ka ţhu ve a, kan ţhutna hma chiah a chair ah Florence a ţhu vang thung.

"Inu leh pate an ţha hrim hrim em? Inneih ni a ka hmuh bak ka la hmu leh miah lo va, an ngaihawm reuh emai min lo biak dawn nia. Remchang hmasa berah ka lo la leng leh ang"
"Aw ţha. Kan vaiin ngai kan awh chho ve mek e" tiin Zodina chuan alo chhang a, Florence nen a kan in endan danglam ta deuh chu a hrethiam ru reng tawhin ka ring.

"Inu duhzawng ka hria alawm. Ka siam ang a, ka rawn keng ang. A lawm thiam leh dawn ropui si, thil kensak te hi a nuam a nia" a la ti zat zat reng a, a nui har har reng bawk.
"Nunui a awm a, ka nu pawh a zia sawt khawp mai. Naute te nei ila hma an sawn dawrh dawrh mai ang" tiin Zodina bawk chuan pangngai deuhin a lo chhang a, leng tur a a ti miah lo chu ka lo lawm ru khawp mai.Leng tur a a sawm chuan ka tan a ngaihthlak nuam lo deuh deuh tur a sawi zel ka hlau a ni ber.

"Nia pi leh pute hian min hmangaih bik emaw tih mai tur a ni ţhin a, Nunuin naute a neih hunah chuan in inchhung pawh a reh tlawk tlawk tawh lo ang a, ngaihven tur dang a awm hi chuan lunglen te hi a zia deuh ţhinin ka hria" a lo ti veleh a, sawi zel tur a haihchham lo khawp mai. Na angin a awm duh miah lo va, dik lo deuh turah ka lo ngai leh nghal ringawt a ni maithei. Mahse message tawi te te ka hrehawm tih theihna tur min thawn fo tho si.

Zodina ţawng tam lo chi a lo ni bawk a, a bulah min ţhuttir ve run bawk nen Florence pawh a haw ve ta nge nge a. Ka ning ti duh lo mah ila a haw chuan ka thawveng huai. Florence chungchang sawi zui lovin kan insiam mawlh mawlh a, dawr aţanga kan chhuah chuan khua a thim tawh.

"Florence kha hmuh a nuam vak na nge?" ti a min zawh takah chuan ka melh zawk a, min lo en ve lo. Hmalam a en daih a, a car khalh laiah chiah rilru a pe emaw tih mai tur a ni.
"A hmangaih takzet che tih ka hria a, nei la chuan chhungkaw pangngai tak lemchanna tello in din thei awm sia, ka buaina tawhin a kang kai ve ta cheu sia, keimah vang a inţhen inni tih hrereng chung a in kianga awm ve reng kha nuam ka ti lo a, ka inthiam loh veleh deuh vang mai mai a nih kha. Hmuh nuam lo tih chhan tur dang ka nei lo" ka ti a, a thu min rawn thawn ţhin erawh ka la zep sak. Nupa anni thei si lo va, an inţhianna tal hi chu keimah vangin chhe tawh lo se ka ti.

"Chu chauh chu?" a ti hman chauh a, ka lo aw vat vat.
"Kan inneih hnu a ka hmuh leh hmasak na ber anih vang te pawh a niang. Nidangah chuan awmdan ka thiam tawh ang" ka ti thuai thuai. Ka dawih vang leh hlauh vang a ni bik lo va, ka nunah hian buaina dang tlem te pawh nise tih pun a seng luh ka duh tawh lo. Kan awmdan aţang khan a hriatthiam ka ring reng a ni.

"Nangmah vanga chhia engmah a awm lo. Zothana thihna kha i thlen tir a ni lo va, Florence kha ka duh thu a ţhen ka ni. I tel ve ah ngai tawh lo la, tumah in hnuaichhiah tir suh" a ti a, vin miah lo mahse min biak dan pangngai angin a dam ve lo.
"Tim dai lo la, chakna tam tak ila nei tih hria la, i chakna kha midang rahbeh tir suh" a tih zawm leh a, Florence hmaa ka zum zat reng khan a ti buai a nih ka ring ta ber. Engmah sawi lo mah ila ka awmdan aţangin min chhiar vek thei a, min hmangaih takzet zia leh min ngaihsak zia hi nitin ka hriat belh zel.


CONT (Dah ţalh ka duh bawk sia mahse engmah ziah tur ka hre lo. A mak lutuk ka hriat naah engmah a awm lo😂 type tur a awm zung zung ţhin ang kha a awm thei miah lo va keipawn a chhan ka hre lo. Tun chapter phei chu thu inbat lo deuh deuh a awm nual maithei a ni)



Link:
BBcode:
HTML:
Hide post links
Show post links

ADVERTISEMENT (A hnuai a milem hi a nia hmeh zeuh tur chu)

Post Reply

Who is online

Users browsing this forum: Bing [Bot], Google [Bot], Google Adsense [Bot], Ngaia, Puitea Libra and 262 guests