KHA HUN KHA. By T Mawii.

[TMAWII]

KHA HUN KHA 4.

T. Lalrinmawii.

Khaw chhunga motor awmin daih seng ta hek lo le, chhim lam aṭanga motor lo tlan remchang apiangah betin ṭhalai awm zawng chu an liam ta duak mai. Tluang taka tlanin Champhai pawh an thleng ta; mahse, vanduaithlak lutuk maiin thisen pek tuma an kal chhan ber leh an ngainat rawn, an presiden thih thu chuan Champhai kawtlaia an awm mek lai chuan a rawn deng ta thut mai le!

A ṭhen kawtlaiah an ṭap a, a ṭhen motor chhungah, a hre hmasa apiang mai chu an ṭap hmasa hi a ni ta ringawt mai a. Chutia buai em ema an awm lai chuan motor hman tur taxi leh auto lah chu a vâng em em bawk si nen. (Damdawi In lamah an lo han tlan chho zo vek chu niin)

Maheri pawh chu inkhai bawr luk chung chuan kawngpui dungah motor zawng pahin a la ṭap ngat ngat mai. Chutah a ṭhianpa Malawma chuan a banah rawn kaiin, "Maher, lo kal rawh, samaritan bus hian min dah chho dawn e," tiin bus-ah chuan a hlang lut nghal nawlh a. Damdawi in leh heta an kal kawng inkarah hian an ṭap chho dun ngat ngat mai a, a hmun an han thlen meuh chuan Champhai leh a chhehvel motor zawng zawng tih theih chu damdawi in leh a chhehvelah chuan an lo ding tlep tuar a. Compound leh tual zawl chu ṭap ri hian a luah khat chuah chuah mai a ni.

Damdawi in inkal pawhna lai takah chuan Zonuni chu ngawi reng hian amah chauhin a lo ṭhu a, Maheri chu mi tu emaw hian kai pheiin Zonuni bulah chuan a kalsan ta a.

"Zo'n, engati nge? Eng vang nge? Kan lo nghak che a nia, kan inthlakna tur leh mamawh zual, pawisa thleng khan rawn âm la, hei Zuala paw'n a lam che a nia, i ti si a. Engati nge min lo nghah leh si loh. Awi kan chhungkaw innghahna leh kan daingul a tliak maw? Zuala, Mazual, i YMA member-te nen kan lo thleng asin min lo chhawn ta che...," tiin Maheri chuan Zonuni chu a kuah a, a rawl tawp tawp chu chhuahin a ṭap hawm hawm mai a. A ṭah chhuak zualpui reha a hawi chhuah chuan Zonuni chu a lo khawng vek mai tih a hre nghal a. Mangang takin ṭanpuitu a au ta chul a; rang takin nurse-ho chuan Zonuni chu damdawi in chhungah an la lut ta a. Vanneihthlak takin rei talbuai lovin ngai a rawn awh chhuak ta hlauh zawk a ni.

Zokhawpui thinlai a na a, a thin a rim a, a tih theih ang ang tia thil sualtitu chhui chhuak turin a inpeih ta auh mai. Tih ngai leh a tih theih ang ang chu a ti nghal zel bawk a, thu neitu lam beng pawh a thleng rang narawh e.
Kar lovah President ruang chu peih felin an rawn zawn chhuak ta...

"Aw a va na em Mazual, ka fapa heti hian maw min lo nghah le?" tia Zuala pa ṭap chu ring lua lo mah se, a hre pha chin ṭap lo reng an awm lo.
Damdawi in aṭang chuan zawn chhuakin, mihring leh motor ruang zuitute chu kawngpuiah chuan an khat mup mup mai le! Au hla chi hrang hrang nena au thla zelin Champhai khawpui kawng chu an zawhpui mup mup mai a ni. Hetia ruang nen an kalnaah hian puana lo tuamtu leh sum leh paia lo raltute hi chhiar sen rual an ni lo a, chhinchhiah sen lah an ni hek lo.

Kar lovah anmahni khaw lam panpui niin, hmel hriat leh hriat loh thliar lovin a thei apiangin ruang tlaivarpui tur chuan Zuala te khaw lam chu an pan ta dûl dûl a, a ropui thei ang bera vuina hun hmangin Zuala thihna chuan Zoram a deng chhuak chiang teh e !

Ruang thlak zan chuan beisei phak hauh lohvin Central YMA lam aṭangin hruaitute an rawn lang ta thut mai le! Zanriah ei kham hnu, tlangvalho khawhar riahpui tur la mut hma si, ṭawngṭaina hman zawh hlimah chuan PL Liandinga leh a ṭhiante an rawn thleng ta, chibai inbuk lawp lawpin inhmelhriattirna neih pah zel a ni a. Zonuni chuan khum sira Maherin naupang a lo chhaih lai chu va hrilh ru sa sain, "Maher, i ngaih san deuh kha a lo kal a nia, va chibai ve la ka lo chhawk ang che," a ti a.
Maheri chu kal pheiin a va chibai a, PL Liandinga chu chhoh en he hawin, "Nangmah hi maw PL-a chu? Thuhmahruai hlir a buin rawn ziak teh," a'n ti thawr mai a!
"Awi Maher," tih a rik rual ṭhup laiin PL-a erawh lawm vanga nui var varin, Maheri chu kuahin a dar hnung lamah chuan a bensak thak thak thung a. Maheri kal sawn tur lahin a kut zungpui tihpir khum vah chung chuan, "Sherlockians," a la ti zui sap a.
Buai zualpui pawh a reh fel hma chuan Zonuni pawh Central YMA lam hruaituten an chah angin Aizawlah a chhuk thla a, YMA huaihawtin Aizawl khawpuiah ngei mai, Hmunhlui YMA president kah hlum an duh lohzia entir nan kawng an zawh ta mup mup mai a ni.
Central YMA chuan kawng zawh ni chuan râlna bawm dawh sakin, chuta tling khawm ringawt pawh chu tam tham tak a ni. Central YMA hruaitute hian an thlir liam satliah mai lovin an inbenbelna tur an la ngaihtuah zuisak cheu mai a, hna ṭha tak han inpek rum rum theih ni hek lo le, PWD hnuaiah labour hna hmuhsakin, naupang tet zual chhung leh an sum mamawh zual phuhruk nan an thawk ve ta a ni. YMA nge nge vul zel rawh se. Ṭhian/ ṭhenawm te chhan nana nun hlantu chu, tu mahin an ensan lo ve.
Aw le, Zuala phum fel hnu lawkah chuan commando-ho an rawn thleng ve ta rup mai le! YMA leh Mizoram sawrkar pawhin Zuala thihna leh a thih dan chu a ngaihthah lo chiang hle mai. Zuala kap hlumtute chu an hmuh hma loh veh turin an thuam famkima inthuam chuan Hmunhlui khua chu an awmchilh ta rup mai a ni.
Ṭiau lui kam leh Hmunhlui dai vel, an khaw ṭhenawm leh a chhehvel te ngun lutuka an zawn kual hnu pawhin eng mah thawm hriat tur an la neih belh hauh lo mai a; mahse beidawn erawh an tum lo chiang khawp mai.
Zuala thih aṭang khan Maheri pawhin a dawr kharin Zonuni te nufa chu chawlhkar thum dawn chu a awm chilh rawt a. Chutah Zonuni chuan, "Maher, min awmpui tluka nuam leh hlu a awm lo; amaherawhchu, heti ngawt chuan engtikah mah ka tuar chhel thei dawn si lo a, i dawr pawh a ngaihtuahawm alawm i fapa nen. Min ṭinsan tawh mai la, ka inthlahrung dawn dawn zawk a nia," tiin Maheri chu a titipui malh malh a.

Maheri pawhin dik tiin la awmpui duh viau mah se, a eizawnna leh hna chu thawh zawm ngei a ṭul si avangin a hawsan ve ta nge nge a. Tuk khat chu Maheri dawrah chuan, commando-ho chu mamawh lamin an rawn lut khup khup a, an in-ak bawr em em mai nen; Maheri chuan a lo zawt ta phawng a.
"Pu Zualte, khawi lamah nge in ṭuan dawn le, in awm loh chuan thla a va phang duh dawn ve." Zualtea chuan a ṭhiante pathum nen chuan ding khawtlai zeuhin, "Lo lungngai miah suh u, khang mi sual pathumte kha kan kah hlum emaw kan man emaw hma chuan kan lo haw tawh lo vang, thlamuang deuha in awm theih nan keini kan vak chhuak ve thung dawn a nih hi; Maher, tui deuh deuhin lo mu ula, min lo mut kep ṭhin dawn nia, nih phawt u le," tiin an ṭhiante chu an umzui ve ta nghal a.
Hetia an chhuak ta hian Saikhumphai lam panin mi sual an hmuh hma loh chu chhun leh zan chawl lovin an lo va vak kual chu niin. Chanchin inhrilh zung zung turin tunlai ang hian phone te la tam hek lo le, mi sualho lah khawiah nge an awm hriat ni bawk si lo; an rilru pawh a thlamuang lo teh a nia.

Chutah zan nga an riahna tur tlai lamah chuan, Burma kaina lam khân, phairuang bukin a hliah zeuh zeuhna hmunah chuan fimkhur tak leh, khât pharh mai si hian commando-ho chu thawm chhuah miah lo hian an kal a, a hmasa bera kal chuan hnung lam hawi zauhin, a kut zungchal chu thawm nei lo tura hriat tir nan a hmuiah a dah chho zawk a; amah pawh a ṭhu hniam nghal vat bawk a.
Uluk taka tin chung chuan a hma lawka hnimbuk aṭanga lo chhuak mi pakhat, pawr fap mai leh hlauhthawn hmel taka hawi zawk zawk chunga Ṭiau lui lam pana tlan mek chu a kap ta ṭhuai mai le! Khua a thim hnai tawh a, unau hmel hai vel a ni tawh bawk nen, a duh ang tak chuan fuh lo mah se, a silai rik dan aṭang chuan fuh erawh a nei ngei tih hriat tak mai hian a ri tawi tak mai kha a nia. Thui vak lo an va chhui hnu chuan thisen tam tak lo bua leh, chu hnu chuan Ṭiau kam tui chim chin chu pawhin 'Ṭiau luiah a zuang thla ta a ni ang e,' tih tur khawpin a hnu chu a tawp chiang ta hlauh a.

Khaw thim leh ruah sur buan buan karah chhui zui ta lo chuan, dam khaw chhuak zovin an ring lo bawk nen, riahbuk lamah chuan an kirsan ta a.
Khaw chhung lama haw mai lovin a la dam pahnih chu chhui zelin, ṭiau kai lam chu an zawh chho a. Zokhawthar ram thlen chhoh hma si, Leisen leh Sihkhawpui inrina bul lawk ramhnuaiah chuan thawm an hre leh ta! Chutah thawm dim taka veh zelin mi pahnihte chu an inṭhen phawk a, pakhat chu Ṭiau luiah zuang thlain commando zinga pakhat chuan a tui hleuh ṭan tur chiah chu a kap ta thawr mai le! Ṭiau tui nu bulh bulh chu thisen hian a rawn pawlh belh a, luia a thisen luang chu um ni awm fahran hian a ruang chu a leng thla ve ta nawk nawk a, kar lovah tui lian nu phut mai chuan a len bo ta thuai mai a ni.
Hetih rual deuhthaw hian Ṭiau luia zuang thla lo zawk, sam sen ther thawr tak mai chu a theihtawpa chaka tlanin, lui lam pawh pan ta lo chuan lui hrulah chuan a tlan chho chiam mai a. A vanduai asiamin Zokhawthar lam aṭanga lo chhuk commando an rawn thleng ve chiah mai bawk nen. Silai a puak thawr a, chu sam senpa chu paih ang thlawrh hian a hnung lamah a hlawm nawk a; kah a nihna hmun aṭanga hnai teah chuan hliampui tuar chuan a lo let reng mai a ni.
A theih ang angin a hliam chu lo hup ve mah se, han dam chhuahpui chi a nih hmel lo khawp mai. Chutah amah umtute zinga mi pakhat chuan a hmuh veleh lainatna tel hauh lo chuan a pistol chuan a han tlir zawih zawih a; an hotupa Zualtea chuan rawn khap lo phei se la, ruang hlawm tlak awm lo khawpin an kap sawm vek duh hial awm e.

Chu thu chuan Hmunhlui leh a chhehvel pawh a deng thleng ta thuai a, tlai zanriah bar hun niin, a tlai deuhho an kham meuh chuan khua pawh a thim chhulh tawh hial a ni.
Chutianga zualkovin thu a rawn thlen takah chuan, YMA lam chuan kuang siam thuai thuaiin miruang awmna pan chuan motor nen an liam thla ta nghal a. Hmunhlui mipui lah chu awm ngaihna ber pawh hre lo hian an lo zi hut hut mai bawk nen.
Maheri chuan a fapa a kai a, Zonuni chu a sawm a, kawtchhuah lam pan chuan an inzui phei ta thliah thliah a. Tlumtea lah chuan a nu Maheri puak chu lo ngen vatin, kar lovah tui takin a muhil nghal a, a thaw ri sâk sâk reng a.
Zonuni fapa naupang ber dawttu Pazawna lah chu a lo intithei ve tumhrang nen. Lungdawh an va thlen chuan mi dang pawh an lo zi vut vut a, chutah aurinna hmang chuan ruang a lo thlen dawn thu leh, mipui zawng zawng chu tu mah kut thawh lo hram tura ngenin an rawn au rum rum a, khaw ṭhenawm hnaiho a thei apiang lo kal khawm nen, a zik hian an zi vut vut mai a ni.

Ruang phur motor a rawn thleng ta le! Mipuiin an chim huk loh nan duty fel taka insiam vek a ni a. Zonuni leh Maheri erawh chu ruang dahna bulah chuan kal an phal a, ruang erawh chu tu ma hmuh phal a ni lo. Maheri chuan Zualtea hnenah chuan,
"Pu Zualte, khawngaihin keini nufa chu min hmuhtir hram teh, kan fate bulah a pa thattu hmel awm dan tal kan sawi theih nan," tiin a han kar ngial ṭhin nain Zualtea chuan,

"Ka pite u, min ngaidam teh u, hmel hmuh tlak a awm lo e, in pa thattu tih erawh kan chiang hle thung, in hmuh aiin hmuh loh ka duhsak zawk che u a ni. A dam laiin chiang takin i hnu a ni lo'm ni Maher?" Tia lo leh zawh pahin, kuang bulah chuan a rifle leh pistol nen chuan a ding zuah mai a. Amah a pa lian bawk nen, tu mah han tawn lui an awm ta bik lo a ni.
Mak deuh mai chu, YMA president Zuala kha a lai leh serh inkar, a phing zawnah tak kah niin, a kaptu erawh kha chuan a chal dar taka verh niin a insawi thung a. A phing an lo kap chhe vek a ni.
Chutiang chiah bawk chuan Samsena, amah kaptu pawh chu kah niin, a hnua thinrim lutuka an kah nawnna lamah khan, a ka zawn chung lam hawia kah leh niin, a hmui chung lam leh hnâr kha, silai mu khan a hlawi chho deuh vek a; a hahmai chung lam chu tlem awmin hmel hmuh tlak a nei bik lo a ni. Ṭiau kama a ruang kuanga an khung hnuah pawh kut za lutuk insum hman loho khan a kuang chhanah an lo zu tlir leh fe mai a, a kuang ringawt pawh chu chik ṭha tak a ni.
Tichuan, damdawi in lamah post mortem turin an phur liam ta a, mipui pawh an ṭin zui ve nghal ta bawk a ni.
Keinin vanduainaa kan ruat, A hmangaihna lantirtu,
Mahse thlaphan mangan buaina;
Lawm nan a siam ta zawk a.
Hringtupa ber ai chu engti kawng maha awh zo awm lo mah se, vanduaina an tawh dan runthlak tak avang hian, Zonuni leh a fate pawhin mite lainat an hlawhin, thu mai ni lo thilpek leh a tak ngeia khawngaihna lantirtu an tawng hnem tak meuh a, pa ber rin tur an neih loh takah chuan a fate nen Pathian bel chawtin, chhungkaw hlim leh awhawm tak an rawn ni chho ta a ni.
Hun a rawn inher zel a, tlachham lutukin awm bik lo mah se Zonuni chuan ngaihtuah sual chang a nei fo a, a fate hriat loh hian a inhru ru leh fap fap ṭhin. A demawm lo e, kum naupang takin (kum 30 chauhin) nuthlawi a ni ta reng mai a, a ngaihtuah ngai loh leh duh dan ni hauh lovin hmeithai a ni ve ta reng mai; hma hun hi kan lo va hre lawk lo hlawm tak em!
Tlai khat chu Zonuni ei tur siama a buai mawp mawp lai chuan a fapa upa ber inkhel zo chu thlan tla hluam hian a rawn lut a, thingrem sei chungah chuan ṭhuin, a sir maia a pa ṭingṭang hlui ve tawh tak leh la perh tlak tak si chu lain, Ngurthangvela hla, 'Mi sual tlan nan,' tih bawk chu a rawn sa chhuak thut mai a!
A hmel leh pianzia, a pa ang tak mai leh, danglamna a awm dawn em ni tih khawpa a pa aw pek ang bawk si chuan a zai ta mai, a nu ei siam mek chu a chawl thut a; a fapa hnenah chuan dam diai leh hnuk ulh ru ṭeuh chung hian, "Puia, kha hla kher sa chuan zai tawh lo mai teh a," a ti ta tawl mai a.
A fapa pawhin hre thiam ve ni awm tak chuan a titawp ve ta mai bawk a.
"Nu, ka pa thihna hi a rei ve tawh si a, i lung a lengin i la ngai ve tho ṭhin em?"

Chu zawhna a fapa hnen ngei aṭanga Zonunin a hria chu mak a ti ngei mai, ihe lova chhang nghal vatin, "Ngai ṭhin e, ka lung chu a la leng dawn chauh alawm, fam zun ngaih hi khuareiin a hnem an lo ti ngai a , ka tan hian khuarei hi eng chena rei tak nghah la ngai dawn ni maw? ! Puia, he lam chu duh tawk ang aw, in ril a ṭam tawh ang, chaw kan ei vat dawn nia lo inbual fai la," a ti ta duah a.
Thawh chhuah pahin a fapa pawh chuan zawi te hriat theih si hian, "Kei pawh ka ngai ṭhin," a ti sap a; inbual tur chuan a kal zui ta nghal a.
Zuala fapa upa ber hi Tleipuia niin, unau an nih vang em em pawh ni hran lovin Maheri fapa Ruatsanga nen hian an inkawm ngeih em em mai a, naupang tualchai rual an nih khan unau an nih hi chu an inhre ve chauh a ni mah e.
Tleipuia hi a naupan lai aṭang renga rilru tluang leh dam dap mai hi a ni a, nula lamah pawh a tla na thei phian mai. Amaherawhchu, amah zawk hian an chhungkaw dinhmun en ran chungin, hmeichhe rilru ṭha leh zau, a nu leh naute enkawlpui thei ngei tur a zawng ṭhin thung.
Tlangval nafam chuan nupui neih a rawn hun chho ve ta a, anmahni khua Hmunhluia mi ngei mai, nula chhuanvawr leh hawlh lar em em pawh ni lo, hausa chhungkua pawh ni si lo, a ruka belh chet dawl tak mai chu a thur ta nalh mai le!
Inneih hun a lo thlen meuh chuan, Zonuni phurna leh huphurhna chu a inzat nawk mai. An mo tur Zoremi hian nu leh pa a la nei a, hetih hun lai hian innei an awmin, a inneite nu leh pa ve ve kha an hnungah chiah an ṭhu ve ṭhin a ni.
Zonuni chuan tu nge a ṭhutpui ve tak ang le?
A hlimin a lawm a, chu a lawmna tak chu tifamkima lawmpui turin, a pasal hmangaih em em Zuala chu a ngai tak zet a ni.
A fate leh inlengte hmuhah hlim viauin lang mah se, a chhungril lunglenna chuan dan beh rual loh hian a rawn tur a, a ṭhut hmunah chuan a mittui a dir zung zung ta mai le! A fapa leh mi dangin an hmuh a hlauh em avangin a kun chal mai a, inthup tak tak theih erawh a ni chuang lo.
Hunserh hmang zoa in lam an pan lai chuan inthiar chhuanlamin bual inah chuan a tlan lut ta thuai a. A zualpui a inṭah thawl hnu chuan lo chhuak lehin, inneihnaa an chhungkaw aiawha a thusawi a lo hun chiah bawk nen; ṭahna vanga mit sen râm chung chuan a ding chhuak a, a nui lui san san bawk a.
Lawmthu ṭha takin a sawi a, an chhungkaw chanchin a sawi kai ṭan chiah, "Kum 1996 July thla kha...awi lo her chhuak lo tawp se ṭha tur…," tiin a sawi tum anga sawi thei lovin a tum loh ang tak chuan a chhunzawm ta daih a. Tui baw hnu ang maiin a ruh leh theih tawh si lo.
"Ka lawm e, min lo ngaidam mai teh u...," ti bah nawk nawk chungin an pindanah chuan a tlan lut ta daih a.

Tawp hrih lawk teh se.