SERENDIPITY CHAPTER-18

Episode kal lai dah luhna

Moderator: writers

Hmuakteii Fanai
Posts: 95
Joined: May 18th, 2020, 7:27 pm

SERENDIPITY CHAPTER-18

Unread post by Hmuakteii Fanai » February 19th, 2021, 9:57 pm

SERENDIPITY









CHAPTER-18









*DINTLUANGA'S POV*



Ka hmalama Dr. Mala cabin kawngkhar chu kik buai lovin ka hawng nghal tawp a. Hmel rum ul a ka penlut chu mak tih hmel zetin a chair aṭangin arawn ding chhuak zui vut.



"Senior"



"I patient Lalhruaizeli saw khawi khua aṭanga lo kal nge anih ka hre duh" a dawhkan hma a ding khawng luah hian ka ti nghal hmuk. Ka aw ka thluaithlum kual hman lo. 



"Senior"



"Engkim a chanchin i hriat ang ang min hrilh fai kelh rawh" ti hmukin adawhkanah ka inbengkhalh nghal run bawk.



"Sumsuih" ati sup a, chu khaw hming chu.



"Sumsuih" ka lam nawn ve sup. Kumhnih kal ta a Tuirial kan kal ṭum khan a sawi khua hi kan paltlang tih ka ngaihtuahnaah arawn lut nghal zat. Kan zawn ṭum pawh khan he khua aṭang hian patling rual an rawn thawk chhuak bawk anihkha. He khuaah hian tun thlenga hun ahmang anih chuan tuna a chenna chhungkua tehian engvangin nge tun thlengin an chhungkaw zing a mi a ni lo tih hi an zep tlat.



Khang hunlai khan mibo zawn vangin anni ang khaw techuan khawpumin an hre chhuak vek ang. Tun thlenga an enkawl hi ka lawm viau chungin ngati nge Rose an chhartirh hian keini achhungte lam hi min rawn biak pawh loh min biak pawhna tur kan hnutchhiah vek. Khaw mipui techenin an khaw mi leh sa a ni lo tih hi an hre ṭhum dawn chung hian engvanga zep tlat hi nge annih ka hrethiam thei lo.




"Engtik aṭangin nge i enkawl ṭan tawh?" A mit taka melh ngur hian ka ti nghut. Engkim hi tunah hian hriatfai kelh ka duh.



Hospital chhunga an penluh hnu a a awmdan kha alu lamah fel hlel a awm tih ka hria. Kan inhmuhtirha min hriat loh vang khan ka lawm lova, min hre lo luia ka hriat vang khan ka thinrim tel bawk mahse Dr. Mala sawi hmangah erawh ahriatna ahlauh vang ani tih ka hriat hnu erawhin ka dam huai thung. A hriatna bo ta hi ka lawm e ka tihna lam ni lovin min hre reng chunga min hre lo ang hmaka a awm tura ka ngaih vang zawka hahdam lo mai chauh ka ni.



"Kumhnih zet chu kan in enkawl ve tawh" ban chup mai hian ati a, keiin ka melh ngur ngur reng chu nuam ati chiah lo nge athaw dep dep nimai hian ka hria. Nge a ni hian zep ṭhenpui alo nei ve zawk.



"A hriatna hi neih let leh harsa tur a ni em?"



"Senior, ka thawhna hmasa a an rawn luhpui lai khan nikhua engmah a hre lova" a ngawi dat a, sawizawm zel turin ka mitmei thung.



"A luruh khi hi nasa chu anilo. A dam nan phei chuan thla tam a awh lo bawk a chulamah chuan harsatna anei tawh lo. Thla tin check up a arawn kal hichuan a lu na tih mai loh hichu buaina dang a nei lo. Hriatna hlauh a ni tih a inhria a, a hunkal tawh a ngaihtuah nasat apiangin a na hi azual ṭhin. Kumhnih tal tawp ka enkawl a, vawitam ka enkawlna pawh ka thlak kual tawh mahse ahriatna lamah hian hmasawnna ala awm thei lo. A nei let leh thei angem tih hi ka chiang thei bik lo mahse ka theihtawp chu ka chhuah zel ang" ati ta duah. Ka dinna hnunglama chair-ah ka ṭhuthla a ka sam tuai puatin thawk kala hawk.




"Senior ka patient nen hian in in laichinna ka zawt thei che angem?" A rawn tih zawm zat a, ka luhtirha barakhaih hlim hlawl ang hmel erawh a pu tawh lem lo. Mahse azawhna hi chhan tumna ka nei chuang lo. Kha accident atawh chhan kha tihpalh thil nilo tase tu emawin Rose doctor a ni tih hria a a chanchin eng emaw bawh zui tum an awm leh awm loh ka thlithlai ngaiin ka hre ta bawk.



"Ka lawm e, ka kal ange" ti supin ka ding chhuak vut a, cabin kawngka lam ka pan zui nul nul.



Rose awmna cabin chhungah ka penlut a, amutna mawnglama dingchungin a hmel chu ka thlir vang vang. Engtikah nge a hriatna hi aneih let leh ang, chumi hun chu engtianga rei nge ka nghah la ngai ang? Tun dinhmunah hian min hriat loh avangin min haw tlat mai se nuam ka ti dawn hauh lo mahse chumi avang chuan ka hnaih loh phah thei dawn der lo tih ka chiang fu si.



A mutna lam panhnai hrutin khum mawnglama thir inkham chu ka hum a pik zet hian thawk kala hawlh hawlh reng. Amah enkawltu chhungkua tehian khawiah nge an hmuh tih hi hriat ka duh. Tui thiam techenin ataksa tui chhungah takngial pawh an hmu lo.



Khami ni khan ruah asur nasat em avangin zawn a harsa anihkha. Zawng hmu lova kalo tawpsan erawh keimah hi ka indema ka inthiam lo hlur tawh. Tlemte tal khan ṭan han khawh leh deuh ni ila chuan keihian ka hmu mai tur. Ngai a awh thei tawh lo anih phei chuan ka inthiam thei ngaiin ka ring lo. Mahse alo enkawltute chhungkaw chungah erawh ka Rose an lo venhim avangin lawmthu sawisen loh ka ba thung.



"Rose!" abiang lum ve hiam chu ka kutin ka khuap a, anihna hmalam engmah hre lo hmeichhe muhil thaw sak sak mai chuan ka thawk ati sak ṭalh mai.



"I chungah enge thleng?" Thawk kala leh hawk. Keihian ka hmeichhe hmangaih pawh ka venghim thei lo a,mipa azawnga nep ber chu kalo nih ngei hi. A chunga thil thleng takngial pawh hreloin engtin nge ka beidawnsan theih zawk. Ka laktlak loh takzet a ni.




Seni leh Mamawii ka ngaihtuahnaah an rawn lut a mahse thil thlen ni a an awmdan ngaihtuah letin hetiang ti duh turin ka ruat silo. Seni nau chu a ni dawn lo tih ngaihtuahna sen kher ngai lovin ka hre sa. Biakdika a ni theiin ka hre si lo.



"Rose" khum sira chair awmah ka ṭhuthla dawt a. A hmel ka hmu leh thei ka lawm rualin a taksa a harsatna anei erawhin lungawina famkim min thlen mawlh silo.




"I mit meng tawh la" a chala kut nghat chung hian ka ti sup. A mah hmu lova ka hun hmanral tak zawng zawng ka ngaihtuah leta mumal ka nei thei hauh lo anihkha. Tunah ka hmaah arawn inlan leha ahma zawng aia mumal lo tur natmain min amah ka hnaih theih miah lohna turin min dang tlat si.




"I tan theih tawp ka chhuah ang" mit ka chhing vang vang.




"Engkim hre vek la i chunga thil thleng zawng zawng hi min hrilh thei la ni tur" ka ti chhuak hrawih. A botirha a mangan tur zia leh ahlauh tur zia ka chhut ngat phei chuan ka thawk lak ati sak ṭalh mai.



Ka ṭhutna hmun aṭangin ka ding chhuak a, akut hum vang vanga kunhniamin ahmuiah ka fawp zauh. A hmui fawh nuam em em mai kha ala ngai reng. Kawngka lama thawm arawn awm takah chuan inla hrangin ka ding mar nghal vut mahse akut erawh ka thlah phah chuang der lo.



"Nangmaw?" A û arawn penluta ahnungah anu ni a inchhalin arawn zuilut nghal zat bawk.




"Doctor alo harh tawh em ni?" A fanu bulah arawn ṭhuthla nghal a, ka chhan ngai lovin ala harh lo tihchu arawn hmu chawpchilh ve mai.



"Doctor ka fanu chungah hian thil ṭha lo athleng lovang tiraw" beisei nei zeta min rawn melhtu chu kalo nuih suk.



"Ka thlentir ngai lovang" ti supin Rose kut ka vawn chu ka thlah a, ka kekawr ip zenin ka ding khawng luah. Boruak azia deuh hunah a chhungte hian engkim min hrilh vek turin ka duh ang. Engtianga inchhar nge annih tih zawng zawng nen hriatfai kelh ka duh bawk anga.



A û dinna lam ka melha khum mawnglam thirkham vuana ding ngul chungin Rose chu amelh ve reng. Ka lawm lo ringawt bawka. Unau diktak anni lo tih ka chian viau vang tepawh animahna.



A û tak a ni lo tih ka chian em avangin an kalsawn dawn pawh khan ka lawm lo, thinrim ṭunin min en turin kati anihkha. Ka mitah tak en chunga Rose anih loh thu min hrilh lai khan ka na, ka na takzet. Mahse keihian ka Rose kha ka bel hneh lutuk. A hmel danglam vekin ka hnenah rawn inlan mahse keihian ka hre thei dawn tho tih hi ka hming ka chian tluk zetin ka chiang.



Awmdan tur hre lo hial tur khawpin ka hmuh leh hmasak ber ṭum khan ka thik, chuti chungin a hlauh tur ang zawnga che chhuak lo tura ka insum nasat zia erawh a hre kher lovang. Ka beidawnsan thei lo, ka kianga ngaihngam taka alo let leh hma chu ka hlata awmtir ka tum tawh lo bur bawk.



"Ka kalsan phawt ang che u, buaina awm chuan min rawn be dawn nia" a nu zawk alo bu nghut nghut. A û dinna lam panhnai hrutin adarah ka beng thuk thuk chu min nuih suk. 'Nula angin en ngai suh ang che' tih mai ka chak hlur achu ka insum leh ta zawk.




Zanhnih ngawt hospital hi Rose vanga ka chhuahsan tawh loh avangin ka chau thawngkhawng ve tawh. Zanin chauh chu mut hahdam vang vang ka mamawh tih ka hre bawk.



Cabin aṭangin ka pen chhuak a. Ka fapa Rose nau te nupain an riah pui thung chu biak ka tum viau a chu zan reilam anih tawh avangin ka ṭhulh leh ta zawk. Ka phone ka phawrh zet tawh pawh chu ka kekawr ipah ka thunlut leh nghal bawk a.


""""""""""""""

Ka pindan ka penluh ruala ka u nupui lo ṭhu leh ran tawh chu ngaihsak tumna nei lo hian washroom lam ka pansan nghal vut. Zandangah pawh hetah ka pindanah ngei hian min lo nghak ziah. Chhungkaw mualpho ka hlauh vangin ka sawi chhuak ngai lem lo mahse vawikhat mah ka khawih ngai lo.




Rose bo hnu rei vak loah ama hrisel lohna chhuanlamin inpui lamah an rawn insuan lut a, Biakdika abuai theih em vangin hrisel lo chunga mahni a hun hman hrehawm atih thu chu asawi ve tak kha. Keihian ka awihsak lem lo thung. Hmeichhe hrisel ṭha tak a ni tih ka hrechiang miau.



Ka û kianga min kalsan hnu ngat phei kha chuan let leh tumna kha ka nei tawh bau lo. Ka nunah Rose arawn lut zui ta bawk nen ka engah teh vak athawk tawh lo tihna anih ber chu.



Rose alo haw tawha, tun aṭang chuan a hriselna atan theihtawp chhuah hi ka thupui ber a ni tawp tawh. Hmeichhe dang laka inham buai hman ka nih loh ang bawkin khang kumhnih chhung emaw tunhnuah pawh tumna ka nei chuang lo. Biakdika erawh a nupui khawsak dan zahpuiawm zet hre hauh lova a awm hi ka khawngaih ta zawk.




"Zanhnih ngawt ilo haw tawh lo" towel veng chunga ka pen chhuak chu saruak deuh thawthang hian athawmhnaw alo hlip vek hman anih chu. Khumah khuhtu nei hlek lova ataksa awm chu zahpui ahnekin alo nui var var thei.



"Din" arawn ti sap a, a mitmeng aṭang chuan ruih anei tih ka chiang viau bawk. Zandangah hetiang teh hrep hian a khawsa ngai lo. Ka haw hnuin ka pindan aṭangin tihluihna hman ngai lovin a chhuak ve mai zel.



Min kohna uksak map lovin closet lam ka pan a, shirt var la chhuakin ka inthawlh zui mual mual. Hnuailam erawh boxer ka hak vangin thildang hak belh ka tum hran tawh lo.



"In nupa pindan lam pan la aṭhain ka hria" khum mawnga ka din rualin lawm lo zet hian ka ti hluk a, ka thusawi ngai pawimawh lo zeta a mit chetkual ralh ralhtu chu ka melh ngur thung.



"Ka chau mut ka mamawh" ka ti zui leh hluk chu khum mawnglamah arawn tawlhthla ka hma takah arawn ṭhingṭhi zui hmiah.



"Din, i hnenah rawn let leh ka duh" ka awma akutṭang vah kualtir ruai chung hian ati sap. A ruih vang nge mumal lo zet hian ameng phi chiai a a heh hnuailam seh zauh hian ka boxer chhung zenluh mai atum chu akut ka phih nghal sawk.



"Chhuak rawh" ti hrawkin adara chelh chungin leiah ka nghatthla nghal dawt. Mim rawn melh thip hlartu chu ka melh let ve ngur. Hmeichhe zah hre lo hi engvanga phawrh mualpho mai lo nge ka nih pawh hi ka hre hrep tawh lo ve.



Biakdiaka hian ka naupan tet aṭangin ka ngaih hlut apiang min laksak ṭhin. Biakdika thil tih ai mah chuan anu thil tih a ni zawk ang chu. Ka pa laka ka dawn tur zawng zawng hi ka lak aṭang hian anu hian min chhuhsak thiam mah mah. Biakdika phei chuan min en hranna anei lo chungin anu vang hian ka ngaina thei der lo mahse alakah ngaehngawl ka tleirawl lai ang khan ka chhuah tawh em bik lo.



"Din" min din hnaih dat rualin vanvadakin thawk kala hawlh. A luhlul hle mai. Mahse ka mizia ahriatchian avang hian min nawrlui chiam lo se aṭha zawkin ka ring.



Khum lu lampanin a thawmhnaw hlih ho chu ka lakanga, a dinna lam bawk pan lehin ahmaah ka lek va.



"Chhuak rawh" ka ti zui leh hmuk. Chauh nen a ni nena boruak neih chiam hi ka chak miah lo. Luhlul chhuah lovin ka pindan hi chhuahsan sela atan aṭha animai.



"Min hnar thei ngai dawn lo tih hi ka hria alawm" meng si sap hian ka boxer chhanah ka m*****a arawn ṭham a, thawk kala zui hrawih chu a nui hak.



"Chhuak rang rawh" a khabe ahmer chung hian ahmai bul chetah ka tih khum khur khur. Biakdika lam min pansan hnu hian let leh tumna emaw ka hmeichhia anga sawngbawl leh chu ka tum lo bur. Mi nupui it duh tur khawpa mipa h*r ka ni lo tlat. Tunah chuan Rose ka nei tawh chu chu ka tan atawk viau bawk.



"Min thlah teh ana ania" a nghawng hnunglam ka hmer leh rualin arawn ti kha fak a, keiin kalo nuih hawk thung.



"Ṭha taka ka sawi lai hian ka pindan aṭang hian inthiar fihlim mai rawh" ka dawhtheihna limit pel ṭhak a min nawr zui anihchuan keihian tih hreh ka nei hauh lovang. An nupa inkar chhiatna thleng tur phei chuan ka hreh lo nasa. Hetiang hmeichhia kan chhungkua a kawl reng hi ṭul ka ti hran lo bawk.



A khabe leh anghawng ka hmerna thlahin khum lampana ka kal pel vut tawh chu luhlul zetin hnunglam aṭangin min rawn kuah leh thlawp a. Mitchhingin thawk kala hawlh hawlh. Ka rin aiin aluhlul rei zek.



A kut pawh phelhsakin abanrekah ka chelh a, chhuata a thawmhnaw dah ram chu melhin ka nuih suk. Khuma ka phone dah ka lakkang zui zat bawk.



"Hetah ka pindana zan hun i hman tur thu hi i pasal ka hrilh lo techuan a nupui ber awm lo chu ahawihai lutuk anga sin" ka phone ka hmet zui mual mual chu hlauhthawn hmel zetin arawn phihthla khumah a theh phei nghal nawk.



"Ti suh"



"Kala dawh viau lai che hian chhuak mai rawh" ka aw ki ahniam fahran lo chungin min bawrbuai reng vanga ka lawm loh zia chu ka hmel aṭang pawhin a hrethiam viauin ka ring. Ka chauha mut ka mamawh mai bakah Rose lo hmeichhe dang khawih tumna ka nei hauh lo.



"Ka tawpsan dawn lo che" ti tan tanin chhuata athuamhnaw tla achhar a, kawngka lam apan zui nal nal. Hmeichhe pakhat chu a ni ve chiang a ni.



Khuma ṭhuthla dawtin ka hmai ka tuai zui puat a ka pik churh mai chu ka ka hmanga thawk kian duak mai ka chak hluah hluah. Engtikah nge alo harh chhuah ang? Chumi hunah chuan min hre tawh angem? Min hre loin min haw zui tlat ta se engtin nge keihian hma ka lak ang? Zawhna chhan sen lohin ka thluak bur aluah khat ngut ngut.



Khami ni ni khawhrelo a a awm aṭang khan mut mu pawh ka tuah ṭha meuh tawh lo. Ka fapa takngial pawh ka buaipui hman lo. Hospital lamah ka riah chilh deuh tawp anihkha. Ka taksa hi achau ve tak zet tawh.



Khumah avang zawngin ka muthla dawt a, thawk kala zui hawk.



"Rose" ka phun sup. A bo ni aṭanga ka hmuh leh ni hian vei ngut ngut loh ni hi ka nei lo. Ka hna a insawrbing thei lova min siam chang lah atam. Ka hmu kumkhua tawh dawn lo emaw ka tih hnuin ka hmuh turin arawn inlan a, min hre miah lo hian khang hun chhung zawnga ka natna kha abelhchhah bawk.



Mit chhingin  ka chal ka dawm zui vang vang. Ka sirlam a ka phone awm rawn ri chu la mai lo hian ka melh zui ngur.


Muang ruih a tho chhuakin ka phone ka lakkang nghal vut a. Ka phone screen a no hlang zauh rawn lang va va chu reject ka tum zet tawh a chu Rose nu kha anih mai ka rin vangin muangchangin ka bemgah ka nawr bet nghal zat a, lehlam aṭanga ṭawng thawm ka hriat loh avangin ka hmet thim zui hmiah.



Ka mutthla leh dawt a mitchhinga muthilh ngial ka tum ruh hle chungin ka mut achhuak thei tawh der lo lehnghal. Ka tho chhuak leh ta nge nge.



Ka closet lampanin jacket leh kekawr kala chhuaka intawlh mawlh mawlhin hospital lam pan tumin ka pindan ka chhuahsan zui leh ta nghal.



*ROSE POV*



"Ka nu Hruaizeli hi a chanchin kan hrilh tawh aṭhain ka hria" ka û aw ri fuk mai chu chiang lo ruai hian ka hre thei.



"Ka phal lo" ka nuin ati chang fak a, ka û thaw hawk ri pawh ka hre thei.



Ka mitmeng ka meng riai riai a, eng ka hmuh thut vanga ka mit vai riai mai chu ka mit ka chhing zui leh ta hmiah. Thawk kala zui ham ham bawk.



Ka awmdan ka hriat theih hnuhnun ber chu ka lu na lutuk vanga ka talbuai nuai kha. Tuna ka awmna hmun pawh hi ka hre chuang lo. Keihi kan inah ka awm leh tawh zawk anih ka ring tawh, achhan pawh ka nu aw ri ka hre thei tlat a.



Ka mit ka men leh chuan men anuam ta deuh. Ka lu erawh arit luk thung.



Mu chungin ka hmuh theih chin zawng ka melh kual a, mahse hospital-ah kala awm tih ka hriat rualin thaw halh halh hian chil ka lem zui dawk. Engtia rei nge hetah hian engmah hre lova ka mut.



Ka lu ka kan dat rualin cabin chhunga couch lian lo te an dah chunga ka nu ṭhu ka hmu nghal zat. Ka nu hmaah ka û min hnungchhawn zawngin a ding ngul bawk a.



"Kha doctor khan Hruaizeli hi ahria tih i hria em, kan thup reng thei dawn lo. Buaina nasa zawk athlen hmain achhungte tak tak kiangah kan dah mai tawh ṭhain ka hria" zawl dawh hmel zeta ka nu ahrilh mual mual chu enge a awmzia ka hrethiam lo. Keihian tuna ka chhungte lo hi tute nge chhungte dang ka neih? Tumah chutiang hriat ka nei lo.



"Ka rem ti lo" ka nuin zawi chang fak hian achhanglet zui nghal zat chu mak tih lutuk vangin ka meng kawk kawk tawh. Tute nge ka chhung te tak tak chu? Keihian engmah ka hrethiam lo.



Tuna min enkawla hmangaihna zawng zawng min petute hi ka chhungte anni lo maw? Chu chu engtin nge anih theih zawk?




"Ka nu ka nau kha i kaltir tawh ṭhain ka hria, amah i kaltir theih loh vanga hmeichhe pakhatin alo tawrh ve reng hi thil ṭha a ni lo" bung vut a ka û in ati hluk chu ka kut ka hum ruh ṭung tawh. An thusawi hi pakhatte mah ka hrethiam lo. Ka ngaihtuahna abuai kual vek tawh.



"I sawi lo angah ka ngai ange" ti hmakin ka nu arawn ding chhuak nghal zat chu ka û zawk beidawn hmel zet hian thawk ala zui hawk.



"Boruak dawng turin ka chhuak dawn" ti nghutin cabin kawngka lam apan vut chu ka mit ka chhing zui ta ngawt. Eng thil chiah nge ka chungah thleng? Hmangaih taka min enkawltu tehi ka chhungte tak tak an nih loh chuan tute nge ka chhung te nita ang?



Ngati nge ka û khan ka chanchin min hrilh ṭha atih thu ka nu kiangah khan a sawi chhuah ka ngaihtuah ngial pawh hian ngaihtuah chhuah tur ka hre thei chuang lo. Ka mitmeng lehin thawk kala hawk a. Cabin chhunga ka nu veikual sek chu ka melh zui ngar.


"Nu tui ka duh" ka dang ro huam huam mai ka tihnawng hmasa phawt lo anih ngat chuan akang thei mai dawn amaw tih tur khawpin ka ka chhung a sa vek tawh.



"Bawihte" ka mutna lam rawn pan sawk sawkin khumah arawn ṭhuthla dat chu za vak lo hian kalo nuih sak. Ka kut arawn vuana ahmer zui vang vang. Engtik laiin nge hospital hi arawn thlen tih takngial pawh ka hre lo. Engtianga rei nge ni khaw hre lova ka awm tih pawh ka hre chuang lo.



"A....awle" ti sapin ka kut avawnna thlahin khum sira tui awmna lam ni ngei tur chu a ban nghal rawk rawk. Rei tak tui awm lohna hmunah khung beh tui hmu thut ang mai hian ka khawchhungah ka luhthlaktir nghal khawlh khawlh. Ka harh deuh sawng sawng hian ka hre bawk a.



"Nu" ka nu ṭhutna lam hawi hian kati lawi rat. Ka aw a chhuak ṭha hlei thei tlat lo. Ka nu hmel chu chik zetin ka melha mahse engmah danglam hmuh ka nei lo, ka harhchhuah leh tak avanga ahmela lawmna lang chhuak zut zut tih chauh lo chu.



"Bawihte" mittui tlingpama min melh chung hian ka kutah a hmer zui leh vang vang a. A mit achhin rualin abiangah a mittui aluang nghal zawih bawk.



"Ngati nge i ṭah?" Ka ti sep a, a mittui luang chu hru thuakin arawn meng chhuak a. Min nuih zui var var. Ka nu mitmengah hian min hmangaihna chauh lo chu thildang engmah ka chhiar thei lo.



"Ka lawm lutuk vang alawm" ka banbulah arawn tuai zui hauh hauh.



"Doctor kan ko ange aw" ti hapin khum aṭangin atho chhuak a, cabin kawngka anem tawlh a apen chhuak zui nghal.



Thawk la hawkin cabin kawngka lam ka melh a, ka ngaihtuahna hi abuai takzet a ni. Engtin nge ka hun kal tawh hi ka hriat chhuah leh theih ang. Hriat chhuah tuma ka beih apiangin namen lova ka lu chhunga na insiam avang hian ngaihtuah let loh tawp kha ṭhain ka hre ṭhin. Ka chhungte hi ka chhungte tak tak anga ka hriatlai kha chuan mahse ka û in ka chhungte tak tak tih ka nu hnenah a sawilang anihkha. Ka nu pawn apha miah lo chungin a sawipui ṭha duh lo kha ania. Ka ngaihtuahna buai zet leh engmah hriatchhuah tur awm si lova ka hriatna mang ruai mai chuan ka thin ati ur takzet.




Doctor leh nurse pakhat ka nu telin an rawn inzui lut a, nui hmel pawh hmu lovin an pathum chuan ka melh ding ngar.



"Enge i an le?" Doctor-in hriat nuam zet hian arawn ti sup a. Ka ṭhat thuin ka chhang tawi tak. Han sawi zui chiam tur ka hre der lo.



"In ngaihtuah ngut ngut loh tur aw, i ṭha chho veleh zel mai ang rilru tihah viau lo la" Doctor bawkin ati leh a min melh deuh vang vang chu za vak lo hian kalo nuih tawi tak, nurse in eng eng emaw min check kualsak chu ka dawh mawl ve tawp bawk a.



Min chhuahsan hnu thleng pawhin ka û ala rawn let leh miah lo. Ka nu erawh ka khuma ṭhu chungin eng eng emaw asawi siam siam thung. Mahse athusawi alawi ka hre der lo. Ka ngaihtuahna chu nichin lawka ka ûnem an sawi takah chauh khan atang tlat tawh.




"Nu" zawh ka tum zet a chu ka ngawi leh dat.




"Sawi la" mitmeng nunnem zeta min melh chung hian arawn ti sap a. A hmelah eng emaw tal alantir leh tir loh hmuh tumin ka en chik hle chungin engmah danglam kala hmu ta lo fo chu nichina an thusawi kha ka hresual emaw ka ti hial tawh zawk. Nge ka nu hian engmah lanchhuahtir lo turin a inthup viau zawk.



"Na i nei em ni?" Ka phu zawk chu ameng awk mai.



"Aih....aih...nei lo ka ṭha" ka ti tawi tak thung.



"Engtianga rei nge hetah ka mut tawh"



"Nihnih ngawt mawle, i û in chanchin min rawn hrilh hnuin in kal ni la la la khan ka rawn thleng ve nghal" thawk ala zui hap bawk.




"Nu ka lawm e" ka kut arawn vuana atuai zui hauh hauh.




"Bawihte mu la aṭhain ka hria, i chau lutuk ang" ti sapin ka samah arawn chul a kalo bu nghat thung. Ni e, mu ila khang ka thil hriat zawng zawmg tekha reilote chhung pawh ka mut bopui vek theih chuan ka thawl huai ang tih ka hria.




Ka nuin ka û ko turin min chhuahsana. Muthilh ngial ka tum chung pawn ka harh tulh tulh tawh. Hetiang dinhmunah hichuan chhing khatmah ka chhing thei dawn lo tih ka chiang vek tawh bawk.



Ka mutna sira ka phone dah chu ka ban a, ka hmet eng zui pap. Zinglam dar thum alo hnai thuak tawh chu niin. Ka lukham sira ka phone dahin ka puan sinlai pawt ṭhain mit ka chhing zui nghal hmiah.




Eng emaw min chenchilh tlattu awm renga ka hriat vangin ka mitmeng lehin cabin chhung ka melh kual thuak a, ka nu tepawh anlo la let lo anih hmel.



Khum aṭangin ka tho chhuak a, kelawnga chhuat vawt ka rap chiah tihin cabin kawngka a rawn in nawr hawng ve chiah bawk.



"Nangmaw!?" Doctor rawn penlut chu kalo melh nghal nghek.



"Rose i harh tawh!" Ka dinna lam rawn pan phei mawp mawpin ataksaah min kuah bet nghal thlawp chu ka meng zui kawk!



"Hei min thlah rawh" tiin ka tal zui nghek a, min thlah ahnekin ka tukhumah a dawm zui hmiah.



"Min thlah rawh ka tih chu" uar zet hian ka ti nghek. Ka bekah ahmui a rawn nawr tawkin ka dara vuan chung hian min nawr hla hleka. Keiin rum theihpatawpa ka melh chung pawhin min hmuh hmasak ber ni a a mitmeng ang bawk khan min melh leh reng tawh.



"Tunge i nih?" ka ti nghal ṭhat. Ka insum thei tawh lo. Tunge anih pawh ka hriat loh mipa hian min hnaih lutuk ang hrima a che vel hi ka ngai thei lo ni berin ka hria. A hma a thil thleng kha chu lawm lo viau mahila kala hrethiam thei mahse vawihnih ngawt hi chu hriatthiam ahar ṭalh tawh. Mahse a hmel landan erawhin ka chhungril a khawih tho si hi ka hrethiam lo.



"I pasal nimai tur" ati sup a. Mitmeng thuk ruiha min melhna techuan min ti thinrim hlur tawh.



"Eng....eng...engmaw!?" A thusawi kha hre lo ka nilo, kan indinhnaih viau avangin ka hrechiang lutuk mah mah mahse min ṭhawng em a tin ni. Ka mitmeng leh hmel chena danglam vek chu a ni pawh hian ahmu chiang viau ang.



"Li kir tawh rawh!" Ka hmai bul chetah arawn ti leh sup chu ka nghilh dup nimai hian ka hria. Sawi tur ber ka hre lo. Ka û thusawi kha adik vek tihna em ni? Keihian ka chhungte diktak nilo kiangah hun kalo hmang reng zawk tihna am? Chung chhanna chu ka mamawh mahse engmah ka hre chhuak thei lo.



"Lalzemawi lokir tawh rawh!" Beiseina mitmenga min melhtu doctor chu thinrimna nen ka melh let veta thung. Ka ngaihtuahna zawng zawng a chawkbuai vek tawh.



"Kha hming kha ka hriatah lam tawh suh tunge anih ka hre lo" ti tuarhin ka beng hup chung hian lu ka thing zui nawk nawk. He hming neitu ang hrima ka hma a alam reng hi ka duh lo. Ka hun kal tawh hriat chaknain min fana ka hre thei chuang bawk silo nen he hming hian min ti puakkeh lo chauh tawh.



"Min ngaithla rawh" ka dara vuan chung hian akut lehlamin ka beng hupna arawn pawtthla a, ka hmai bul cheta rawn kunhniamin ka bek tawn tawna dawm chung hian thawk ala hawlh.


"Min thlah rawh" a banrek tawn tawna dawmin uar zeta ka tihkhum leh nghek rualin ka hmui arawn kharchilh zui hmiah!













A thui lo viau inti em?

Nizan avang khan min lo ngaidam hram ru aw ka tihpalh tak zet a ni, ka lo mu hma deuh hlek aa😊chuan ads click leh comment kha ngai pawimawh hram ang u aw🙊hritlang pik churha in awm velohna turin lo in enkawl tha vek ru aw💜💗



Link:
BBcode:
HTML:
Hide post links
Show post links

ADVERTISEMENT (A hnuai a milem hi a nia hmeh zeuh tur chu)