Forgiving lies - 35

[Puii Sailo]

CHAPTER - 35

KASH :

“Lo lut rawh, Ryan,” ti ri ka hriat rual chuan ka lut ve nghal a, kawngkhar pawh ka pawt phui zui nghal bawk a. Chief dawhkan hmaah chuan amah ep chiah tur chuan ka ṭhu a.

“Good morning Sir,” tiin chibai ka buk zauh a.

“I ṭha zel em, Ryan?”

Ka ṭha hauh lo, ka ṭha lo takzet. Nuih vak maite chu ka chak a. “Umm…ka zia tawh e.”
A pen kenlai khawng keuh keuh chung chuan a bu nghut nghut a.

“I chawlh lakte chuan a tihahdam thei che em?”

“In ngaihtuahna hun ka neih phah a, chuvanga lo kal chu ka nia.” ṭhut ngil pah chuan thaw la halh a. Min en reng tih hre mah ila, hai der ka tum viau a ni.

“Banna thehluh ka duh a.”

A pen khawn lai chu a tawp chawt a. “Engtin a?” a ti ṭhat a.

“Ka hna hi chhunzawm tlak ka ni tawh loin ka hria, he hna hi thawk tlak ka nilo. Ka hna chauh ngaihtuah loin ka nunah hmeichhia ka seng lut a, ka hna ka dah hmasak loh vang a ni. Chuan, keimah vangin dinhmun hlauhawma ding a awm phah ta bawk si a.”

“I nupui hual,” a ti leh nghut a.

Ex…. “Aw, ka hna chauh ngaihtuah ni ila chuan khatiang thil kha a thleng hauh lo ang. Rilru zawng zawng pe ni ila chuan khatianga a chet hma khan West kha kan man daih tawh tur a nia.”

“Ngaithla teh, chawlh la tura ka tih hma che khan Gates nen kan inbia a, thil thlengah khan i indemin, i inthiamlo hle tih min hrilh a. Chuan, hei hi hria la ka duh, ban i tumna hi ka pawmsak dawn lo che.” Ka boss ngaihdan chu hnial duh viau mah ila hun min pe lo, a sawizawm leh nghal a.

“Detective Ryder nen pawh kan inbia a, in hnathawh danah a lawmin, a beisei phak bakin in hnaah i inpe tih min hrilh bawk a. In hna chu bara tualthattu zawn kha a ni a, mahse credit card list leh camera footage zawng zawng pawh in chhui nawn leh vek thin a. Ryder phei chuan ngaihzawng i nei tih pawh a lo hre lo a, in inhual tih phei chu a hre lo tawp. In hnathawh dan atang khan ngaihzawng nei hman turin a beisei miah loh vang che a ni. Tichuan, Blake West man tura inthawh chhuah dawn ṭepah khan a hre ve ta chauh a, ka ngaihdan chuan tu emaw hnaa rilru pe tawk lo chet dan chu a niloin ka hria,” a ti a.

“Mahse Chief………”

“Chuan Gates nen kan inbiak khan kha kan misuala khan i nupui hual nen pawh a umzuiin, a tibuai che u tih min hrilh bawk a. Chuti chung pawhin i nupui hual himna tur anih ringin i hnathawh leh i nihna diktak pawh i zep a. Ryder leh Gates pawhin awm lo la chuan Rachel Masters kha a hun takah an chhanchhuak hman hauh lo ang an tia sin. Tichuan Blake West pawh kha thlarau leh ramhuai ang maiin kan la ngai zui ta reng anga. Awle, tunah chuan ban i tumna ka pawm loh chhan hi i hrethiam tawh ang chu,” a tih zawm leh ta mai a.

Tinge ka harsatna hi tuman an hriatthiam loh le?

“Keimah vangin……..”

“Ryan, hei hi min hrilh teh,” a tih zawh chuan a ngawi leh dat a. “I hna hi nuam i ti tak tak em?” a ti leh a.

Thawk halh pah chuan, “Nuam ti tehreng mai,” ka ti ve mai a.

“Chuan gang division a thawh hi I nuam tihzawng a ni em?”

“Ti lutuk.” Min zawhna chu dik takin ka chhang a.

“Anih chuan I banna hi ka pawm sak dawn lo che. I nupui hual thil tawn kha a rapthlak em em a, thil tamtak sual chhuah tur in nei ang tih pawh ka hria, mahse I chunga hetiang thil I ti hi ka duh lo. I hna hi I thiam em em a, Gates nena ka bula in thawk thei hi ka inchhuang viau asin. I hna hi I ning tawh a, a aia ṭha zawk thawh tur I neih hma loh chuan I ban ka remti lo.” A ti ta hmak mai.

Inseh ruh ṭalh ṭalh chung chuan ka bu ve ta nghat a.

“Sawi duh dang I la nei em?”

“Nei tawh lo, Chief.”

“Anih chuan ka office hi chhuahsan nghal rawh. Hetah tih tur I nei lo, nihnih chauh I la nei.”

Kan apartment ka thlen leh hnu chuan Mason awmdan chu a mak ka ti hial zawk. Mahse ngai pawimawh duh loin beer chu ka hawng nghal a. Coffee table a ka dah hnu chuan a bul sofa-ah chuan ka ṭhu ve nghal a, “Puih theihna che ka nei em? Engmah sawi loin minute 5 zet min en tawh a nia.”

“I pa khan engemaw sawi a nei em……englo…?”

“Phiangsen che hian, Mase! Rachel chungchang em ni? Rachel chungchang sawi a nei em I tihna em ni? Aw, nei e, ka nu pawhin a sawi a lawm, chuan ilo fuihpawrh vang a ni tih ka hre bawk. Mahse he thil hi I theihngilh a ngai. A duh ang ngeiin ka kalsan a lawm.” Ka beer um chu lain ka pindanah chuan ka luhsan ta daih a.

Thla thum leh a chanve a liam tawh, mahse a tir ai mah khan tawrh hrehawm ka ti zawk daih. Hmasawn aiin ka hnung tawlh zel ni maiin ka hria. Engkim mai chu ka hne em em a, thinrim reng ang hi ka ni mai. Darkar tam fe fe chu ngaihtuahna kawmin ka inngaihtuah a. Hun kal tawh siamṭha leh tura, hun liam tawhte kohkir leh theih chu ka chak a ni. A tirah kha chuan hun pek a ngai tiin ka inhnem a, ka hnena a lo kir leh hun ka nghak a ni. Mahse tunah chuan Mason pawh a beidawng ta aniang, Rachel chu lo kir leh tur ang pawhin a sawi ngai ta bik lo. Tunah chuan keimah zawk hma la turin min nawr ta sek mai anih hi. Enge ka tih anga, engtin nge ka awm dawn pawh ka hrethiam tawh bik hek lo.

Ka khuma thil awm chu chet nachang pawh hre loin ka melh ta reng a. Inthing harhin ka beer ken lai chu dawhkanah dahin, ka khum chu ka pan phei a. Chu velvet bawmte chu enge anih ka hrechiang lutuk tlat, a chhunga awm thin zungbun kha chu Mason ka pe daih tawh a, a bawm ruak hi ka lo la kawl ta reng anih hi. Bawmte chu la kangin ka hawng a, beisei loh zetin a chhungah chuan Rachel, ka nupui hual ni tura ka sawm ni a ka pek zungbun ngei kha a lo awm reng mai. Bawm chu chhinin ka hmai ka tuai puat a, khuma thlalak lo let reng chu la kangin ka en tlawk tlawk a.

Khami ni khan eng thil nge thleng ka hrethiam tawh lo, tunge kan thla lo la hman lah ka hre tawh hek lo. Thla chu Rachel-te apartment a lak a ni a, Rachel chuan alama min pawh hnaih tum niawm takin ka kawr âwmah a pawt a. Kei chuan a biang tawn tawnah vuanin duhthawh tak mai chuan ka lo fawp mek a. Ka thinlung na chuan lungawi lohna ruamah bawk chuan min hnuklut leh ta….Ka thlalak ken lai chu hmet khawr lo tura ka insum a ngai hial a ni. Mahse ka thisen so bulh bulh chu ka thunun thei chuang hauh lo, thawk chhuah vek tum niawm tak chuan ka thaw sek sek a. Living room-ah bak chuan ka tlan chhuak leh nghal. He thil hi Mason ka zawh vat a ngai.

“He thil phiangsen hi enge, khawi atangin nge I neih?” Mason chu a ṭhutna ngheng ar ar chungin leh kuangkuah than chung chuan a lo ṭhu a, “Candice min rawn thawn anih kha.”

“Engvangin?”

“Kash, hetiang hian in inhrem tawn reng thei lo ang.”

Ka buk khum nghut hnu chuan ka room a luh leh mai tumin ka inher vut a. Ka thlalak ken lai chu lek kang va chungin, “Min en ta che, a duhthusam ang ngeiin ka kal bosan ta anih hi!” ka ti vin hlur a.

“In chunga thil thleng mek hi inluhlul dun lutuk vanga in siam chawp mai mai anih hi. Khawvela thil atthlak ber a ni bawk. Puitling angin awm tawh la, I nupui hual chu hruai let leh rawh.”

Thlalak chu hmet khawrin, sofa-ah chuan ka vawm thla a. “Mase, he thil hi a tawp tawh. Tunah chuan a tawp tawh.” Luhlul zet chuan ka ti leh hram a.

RACHEL:

Ka ke mu deuh chuah chuah tawh chuan min dinpui nghet lo kher mai. Ka kutzungṭang chu fawpin ka hmaa thlan lung ding chu ka tawk zauh a. “Ka nu, ka pa mangṭha phawt ule,” tiin ka phun zui sap a. Ka mittui hruk hul leh puat pah chuan Candice min lo nghahna car lam chu ka pan ve ta nghal a.

Kum 4 leh a chanve hnuah ka nu leh pate thlan hi ka tlawh ve ngam chauh a, huphurhin hreh viau mah ila tunah chuan ka ti thei ta. Tunah chuan ka journal ziah kher ngai loin ṭawngka ngeiin ka be thei ta, nuam ka tiin ka hlim a ni. An bula awm ang maiin ka inngai a, he khawvelah hian awm ve tawh lo mah se, kan inhnaih leh ta sawt niin ka hre hial.

Ka ṭhutna bula ka journal chu ka zut riak riak a, ka nu leh pate ka biak theihna kawng awmchhun ni thin kha a ni a, ka nui lui sak a. Ka nu leh pate thlan chu tlawh ngam tawh mah ila, ka journal hi chu ka la mamawh reng dawn a ni. Kha leh chen kha ka nu leh pate nen inzawmna min siamsaktu a ni tlat.

Jenkins chhungkaw chenna hmun ka thlen leh hnu chuan ka jacket chu ka zip phui vat a. Vur tla ve lo mah se, January thla hi chu a vawt ve viau tho. Kei chu kawrlum leh kawrban tlawn hak a ngai hi ka lawm daih zawk a, Candice-te chhungkaw hmuh theih loh turin ka ban vela ser awmte a khuhbo theih vang a ni.

Ely-a chuan nui var var chungin kawngka min lo hawn sak a, “Candice-in in kalna tur min hrilh a,” tih pahin ka chalah chuan min fawp zauh a. A sawi duah dawn lo tih ka hre sa, ani hi chu a ṭawng tam loh bakah, thil sawi kual duah chi a nilo ve hrim hrim. Nuih let ve sang pahin inchhungah chuan kan inzui lut a.

“Nia, a nuam ka ti khawp mai. Ka veng deuh hawkin ka hria. Hetiang hi a ni dawn tih hria ila chuan a hma daih khan ka tlawh tawh ang. Paisley I lo hruai ve em?” ka tihzawm nghal zawt a.

A bialnu hming ka sawilan vang chuan Ely-a chu mak ti leh nuihza hmel a pu deuh a. Bialnu satliah leh ngaihzawngte chu nei ve duah thin mah se a tute mah kan la hmuhpui ngai lo. Mahse chhungkaw thil tih engemaw a awm chuan Paisley hi a rawn hruai ve ziah thin. An pahniha an awmdun lai hi hmuhnawm ka thin a, Ely pawhin a duhzia a tilang hreh ngai lem lo.

“Rawn hruai e, ka nuin rawngbawl a zirtir a. Kei chu choka lama chet hi ka tuina a ni ve lo,” a tih chuan ka nui chhuak hawk a. Ka jacket chu phelhin ka kawrban chuan ka banrek serte chu ka khuh ṭha nghal sat sat a.

“Thla tharah hian a zirlai a zo anga, chumi hnu chuan kan awm dun tawh ang.” Ely bawk chuan a ti leh a, lai hmel a pu deuhin ka hria.

“A ni maw? Ely, thil ṭha tak anih chu!” ka lo tihsak vat a. Choka lam melh pah chuan a nui var var a.

“Nia, anih ngei ka beisei. Enteh maw, midangin min neih khalh hma ngei hian ka taa siam ka duh a,midang ta ni tur anga ka ngaihtuah hian ka tuar thei ngang lo,” a tih chuan chal chuar nang chungin ka lo en a.

Paisley nen hian awmdun an tum tih ka hre tawh a, Paisley pawh hian a hmangaih tih ka hai lo. Ka unaupa zawk hian he nula hi a hmangaih a ni tih a hrechhuak har em a ni. Mahse tinge hetiang thil hi min hrilh tak thut le?

“Keimah hian ka hrechhuak har lutuk a, mahse ka ta ni lo tur ang leh, kan damchhung hun hmang dun thei lo tur anga ka inngaihtuah khan ka thei dawn lo tih ka hria a. A tello chuan ka nun hi a ruak a ni tih ka hriat hnu kha chuan chân mai ka hlau ta anih hi.”

“Ka hria a lawm, Ely. Keipawh…..” ka thusawi chu sawizawm duh loin ka ngawi dat a.

“Ka lawmpui takzet che,” ka ti ta zawk a.
Zawhna mitmeng nena min en reng vang chuan zahzelah kan titi chu a ho zawngin ka chhunzawm ta daih a.

“I thluak luhlul tak kha I thunun theih tak vangin ka lawmpui che,” nui chung chuan ka ti a.

“Chutianga I ngai thei chu a lawmawm hle mai, unaunu,” nui chung chuan min chhang ve mai a. Ka darah chuan vuanin, a hmaah chuan min dintir a. Ka inher rual chuan Candice beisei nei hmel zeta min lo melh kiau lai chu ka hmu nghal a. Ely chuan min nawr pheiin a bulah chuan min ṭhuttir a.

“Hey, Ely. Eng chu nge maw I hriat le?” ka lo ti hlar a, thinrim erawh ka ni lo.

Ka darah chuan a la vuan reng a, Candice chuan min rawn ṭhut hnaihin a laptop pawm lai chu a hawng a. Screen-a thil awm ka hmuh rual chuan din nghal mai ka tum a. Mahse Ely-a kut chuan min nem bet tlat. Tunah chuan min dim lutuk tawh lo.

“Hei hi eng thil nge?”

Ely-a leh Candice-te unau chu an rum rual nghut a, inthurual leh tum sate pawh an ang zawk a lawm. Skype-ah chuan Mason nui hmel a lo lang a, rum zetin ka melh ve reng ringawt. A nui hmelah erawh chuan lungngaihna a lang telin ka hria.

“Hello, bawihi,” a rawn tih chuan ka hrawkte chu a ro nghal hulh hulh a. Kei hian dik lohna ka nei emawni zawk le? Ka mit sa deuh vat vat chu ka khap sak sak a.

“Enge I duh, Mase?”

“Ka ṭhianṭha ber hi ila hmangaih em ka hre duh,” a rawn ti tawng.

“Hmangaih lo.”

“Dawt anih chu!” an pathum chuan an tirual ṭhawt a.

“Dawt sawi i thiamlo hle mai,” Ely-a chuan a tihzawm zat a. Candice lah chuan, “Thla hmasa mai khan i hmangaih reng tur thu min hrilh kha,” a lo ti ve bawk.

“Phatsantu,” tiin ka phun sap a. Mason erawh chu ka chhanna nghak niawm takin a lo ṭhu ngawi reng thung. Ka ṭawng tak mai loh vang chuan aw a thian kharh a.

“I mitmengah khan ka hmu thei a lawm, Rachel. Kash mitmenga ka hmuh ang chiah kha ka hmu. Engmah awm lo, ruak vek ang mai anih kha.”

“Laptop camera lens hi a diklo aniang,” ka ti ta ringawt a. Ely-a hian ka darah la vuan reng lo se chuan ka thlawk chhuak daih tawh hial ang. Ka zahzel chu ka che sek a, an la ngawih ṭhap vang chuan, “Midangte pawh hetiang vek hian an lang,” ka tihzawm leh a. Atthlak ti viau mah ila sawi mai tur ka hre tlat lo a ni.

“Dawt anih chu. Chuan zawhna pahnihna….”

“Haha….A tawk. Pakhat kha a tawk. Sawi belh tawh suh, Mase,” tih pah chuan thawh mai ka tum a, mahse Ely-a chuan min la dawmbet tlat. Ka tih ngaihna hre lo chuan laptop chu chhin tumin ka ban a, mahse Candice ka chet khalh leh hman ta chuang lo. Ka kut chu nemsawnin, ka ban phak loh turah laptop chu a nawr sawn daih.

“Engvangin nge hetiang hian hrehawm takin in insiam luih tlat. Ka ṭhianpa hi i tello chuan mitthi ang mai a ni. A hna atangin ban a tum tihte kha i lo hria em? Chutiang khawp chuan a dinhmun a chhe tawh asin, Rachel.”

“Chu chu ka lo buaina tur a ni hleinem,” tih pah chuan ka thaw halh a. “Dawt min hrilh a, dawt vekin in chanchin phuahchawp min hrilh a, kei chuan ka ring vek a sin. Chuan, i hria em, Mase? I chungah pawh hian ka lungawi lo khawp mai. A chanchin leh nihna diktak engmah hrelo chung khan engtinnge i ṭhianpa kha min neih tir i tum theih zawk? I unaunu angin min en a ni lawm ni, khatiang kha i unaunu chunga a thlen i remti dawn em ni? Ngawi teh, unaunu i neih tak tak pawh hi ka ring tawh lo e a!”

“Ka nei a lawm, nang ai chuan tlemin a upa deuh. A theih chin chinah chuan thudik kan hrilh zel che a sin, Rachel. In inhual tih ka hriat khan ka lungawi lo em em a, in awmdun ka duh loh vang lam a nilo. Mahse kan hnathawh vang khan kan nihna diktak kan hrilh theih rih loh vang zawk che a ni a. Ka ṭhianpa pawh kha a beisei aia hmain hmangaihnaah a tlu lut a, khatiang thil kha a thleng ta anih kha. A ta i nih hma loh chuan a lungawi thei lo a, a inthunun zo ta ngang lo a ni. Thudik i hriat hma loh chuan neih che a tum lo a, a duh chuan in inneih ni thleng pawhin dawt kha a hrilh thei che a sin. Mahse a zah em em che a, chu chu a hrechiang bertu ka ni. Hei hi chiang takin hria la ka duh, i tan chuan eng thil pawh a ti anga, a nunna hial pawh a hlan phal che asin.”

Ka thu hriat chu hnial khan tha deuh hmanga hnial thlak ka duh, mahse sawi tur reng reng ka hre lo. Kash vanga ka tawrhna hi ka hua a, rilru na takin a awm tih ka hriat hian min tina a. Keimah vangin hrehawm a tuar mek tih ka hriatna hian min tina lehzual.

“Mahse i hrethiam lo a ni, Rach. Austin a kan lo kal khan Florida a kan hnathawh vanga rawn biru kan ni a, thi tura min duh leh min vehtu an awm vang a ni. Hming lem invuah mai loh kha chu thlan tur dang kan nei lo a, tichuan undercover-a thawk chhunzawmin, carnation tualthattu kha kan zawng ta a ni. Kan hming leh hnathawh tur kha kan thlan a nilo a, mahse he hna hi kum 4 dawn kan lo thawh tawh vangin keini tan chuan thil thar a ni hauh lo thung. Nangni hi kan tawng ang che u tih rin leh beisei ngaihna lah kan hre hek lo. Tichuan, in himna tur zawk anih beiseiin inlakah pawh thudik chu ka zep tlang ta anih kha. Diktak chuan kan chhungte pawhin kan awmna hmun kha an hre reng reng lo, Rachel,” thawk a lak hap hnu chuan a ngawi vang vang a, chutah sawizawm leh in.

“A tirah chuan Kash pawhin hmangaih loh che a tum ve thin a sin, amah zawk khan bialnu nghet kan neih theih loh dan min hrilh nawn fo thin a. Khatih lai khan keimah min hrilh loin amah a inhrilhna leh a infuihna a ni tih ka hre daih tawh. Mahse nangmah ang hi a tawng ngai lo a, a hlat thei ta lo che anih kha. Nang chuan engkim kha dawt leh inbumna ang vekah i ngai tih ka hria, mahse thudik a hrilh theih loh che avanga a tawrhnate kha i hmu thiam ta tlat lo a ni. Ni e, nang chuan dawt a ni tih i hre tlat lo a lawm. A dinhmun atang hian han thlir ve teh…kan hnathawh leh dante avang hian thihna tamtak kan hmuin kan hmachhawn tawh a. Nunna tawizia kan hria a, chuvang chuan holam taka khawhral kan duh ngai lo,” a ti a.

“Mahse, khatiang khan……” ka tih lai mek chu pawt chatin. “Lo ngaithla leh lawk teh, Rachel. Ka’n sawi zo phawt a nge. Kash hian bialnu, bialnu nghet a nei ve tawh thin a, an inkawp rei ve viau bawk. Undercover-a kan hna hmasa ber kan thawh zawh veleh nupuia neih a tum a, mahse kan hna kan thawh zawh meuh chuan mipa dang nupui hual a lo ni der tawh. Megan nen an inkawp lai khan nangmah a en thin dan che hian a en ngai reng reng lo asin. Pasal hual a nei tawh tih a hriat ni khan lawmpuina leh duhsakna a hlan a, a pasal hual chuan a pek ve theih loh tur hlimna a pe thei dawn tih a hre tlat a ni. Ni e, a lung chu a awi bik lo, mahse, vawinna a thil tawn mek nen hi chuan khaikhin chi pawh a nilo. Hetiang zawng zawng hi hrilh chhan che ka nei a, a dinhmunah dingin a thlirna atang hian thlirpui tur chein ka duh che a ni. Hmeichhe pakhat, a khawvel leh a nunna hial ni thei mai tur a tawng tih ka hriatpui a, i puma neih che a duh a, i thinlung thlengin. Chuvang chuan a nghak thei ta lo a, thudik pawh hrilh hman lo chein a nupui ni turin a sawm ta che anih kha. A ta ni tura a duh leh chân che a hlauh em em chu, midangin an neih khalh a hlau a, a thil tih kha a diklo viau em ni? Ni e, thudik hrilh che kha a tih makmawh a ni ngei mai, mahse a hmangaihna che khan a bual â vek a, i kalsan mai a hlauh vangin a hrilh ngam leh ta lo che a ni. Vawi tamtak hrilh che a tum a, i hlim hmel leh i nui hmel a tireh dawn tih a hria a, a sawi ngam ta thin lo a ni.”

Ka biangah chuan ka mittui chu a rawn luang ngiai ngiai a, hruk hul tumin ka kut chuan ka tuai a, mahse a hul thei lo. Rawl chhuahin ṭap lo mah ila, dan rual lohin ka mittui chu a luang thung.