KA HMANGAIH CHE Bung 6-na

Episode kal lai dah luhna

Moderator: writers

Maximus cancer queen
Posts: 83
Joined: April 25th, 2019, 6:24 pm
Location: South Mizoram

KA HMANGAIH CHE Bung 6-na

Unread post by Maximus cancer queen » April 8th, 2021, 12:52 am

Ka hmangaih che




Bung 6-na





“Engvanga min duh nge I nih? Ka hmel nge, ka taksa nge? Ka eng ber hian nge hip che? Fanu mal ka nih vang em ni?” Dorisi chuan a ti ta tawp a.




An thutak dun ta sawt a. An mitah inenin thuk tak hmuh tum ang main an inen ngawih ngawih a. Chutah Philipa chuan a kuahna kut chu sawn chho vin Dorisi biangah a dawm a.




Uluk leh thu tak ngunin, “Ka nakruh bo I ni.” A ti sap a.




“Chute chu a thlarau thil tawh e.” a tih lai chuan, “Sap ho chuan soul mate an ti thin. Ka soul mate I ni tihna a nih chu.” Ril ruihin Philipa chuan a ti a.




Dorisi chuan, “Ka soul mate I ni ve em?” tiin a zawt let ta a.



“Aw.” tia inringtawk takin a chhan lai chuan a mit de sar sar pawh a hmuh theih vek.




A tawpah Dorisi chuan, “Anih chuan ka nei ang che.” A ti ta a.



Philipa chuan a thu hriat chu a hre sual emaw a ti rum rum a. A thisen luang te chu a kal chak ta sauhin a hria a.




“I ti tak tak em? Kan inneih sawn hnaih a nih vanga hetia awm hi I ni lo tiraw?”



“Aw, ka nei ang che. Philip Ramnunhlu, ka nei ang che. Kei pawhin neih che ka duh.” Chiang kek kawk hian Dorisi’n a tih leh meuh chuan lawm lutuk avangin Dorisi chu nghet taka kuahin a chawi kang ta lawp a.




Chutia a kuah pah chuan a pidan lo thawl huai chu a va hmu a. Thil thlwng a awm tih a hrethiam nghal vek bawk.


Chuta karah khuma laptop eng vu hmai rang chuai chu a va hmu fuh kher lehnghal.



“Eng thil nge thleng? Khawiah nge I lehkhabu zawng zawng kha?” inlahrangin a ti ta a.



Khuma laptop a va lak kan chiah phei chuan a lan ang aiin a lo chhe sawp zek lehnghal a.





Dorisi chuan thudik hrilh a hreh khawp mai. Ngawi rengin Philipa chu a en tawp a. Chhuanlam han siam tur takngial pawh a haichham a.




Mahse Dorisi awmdan a rawn hmuh chuan a chhan hriain a inhria. Zawh belh lovin laptop chu dawhkanah a dah a.





Dorisi kut hum ruh tlat chu a rawn humsak a. A kut chuan tipharhin a lek kang a. A kut hnungah chuan a fawhsak zeuh a. Kuah zuiin a chalah a fawp vang vang a.



A chetdan chuan Dorisi rilru a hneh kher lehnghal a.
Chumi zan chuan Dorisi chuan Philipa riak turin a chelh ta nge nge a. Pakhat lah a lo lawm em em zui. Mut hmunah chuan zawi te tein an ti ti sep sep a. Zingah chuan hma takah thovin a nu leh pa thawh hmain Philipa chu kawngkhar atangin a chhuah tir ta a.



Ani pawh tho tlang nghalin tihtur tul ang ang a khawih tan nghal a.




Ni a lo tlang sang a. Nu leh pa hna kala an chhuah hnu chuan a ni pawh coaching class kal ngai tawh lo bakah a lehkha chhiar tur nei lo ta chu Mazuali seconhand dawrah bawk a kal ve ta a. Phei pahin ama kawr hak ngai lem loh te chu a khai tel bawk a.




Mazualin Dorisi rawn inkhai bawr lak a lo hmuh chuan mak a ti ngei mai. “Eh! Tlanbo I tum em ni? Eng a tan nge kha kha?” a lo ti nghal a.





Dorisi chuan, “Ka thlawh bosan dawn che u.” nui pah hian a tifiam a.




“Nui lo la chu I ti tak tak emaw ka ti dawn a lawm le.” Mazuali chuan tiin “Tunlai hi I va reh em em?” a ti zui a.



Dorisi chuan Mazuali chu a khai bawr vel a hmuhtir ta a.




“Khai a! Heng zozai hi eng atan nge?” a ti hluai reng a. Dorisi chuan a dawrah khai ve a duh thu hrilhin a pa nen an inkar thil thleng a then a zawng a hrilh tel nghal a. Mazuali chu a lo chet tlak tlak.



“Philipa’n a hre ve em?”




“Ka hrilh lo. Hrilh chi a ni paw’n ka hre lo. Ka chanchin a chhia a tha a hriat ve vek chuan kan inneih hunah min hmusit lutuk palh ang.”




“Aw Doris! Chutiang a ni ngai hlei nem. Inhmuhsitna tur pawh a awm loh chu. Tichuan I nei tawh mai dawn em ni?”




“Ka duh emaw duh lo emaw Philipa nei turin rilru ka siam fel tawh. Ka tana tha ber tur pawh a ni maithei; bakah, Philipa anga min duhtu hi ka tawng leh tawh lo maithei a sin tunge hria?” Mazuali bulah chuan tiin a thui tak ngaihtuah ang mai hian a ngawi zui rauh rauh a.




Mazuali chuan, “A nun hi sim ta lo se engtin nge I tih ang? I hlim thei dawn em ni?” tiin a zawt ta hlawl a.






Dorisi chuan, “ Chu mi hre tur chuan ka nei dawn reng a lawm. Engpawh ka chungah thleng se pawi ka ti tawh lo. Vanneihthlak taka kan lo innei rei ta lo a nih leh ka maltlat ve tawh ang a a ni mai.” A ti a







Mazuali chuan Dorisi hmel chik taka enin, “Anih leh i nih chak zawng zawng te kha I bansan mai dawn em ni?” a ti leh hram a. Dorisi chuan a nih chak zawng leh a tum zawng zawg te a han thamral mai tr chu rin harsa a ti hle a. Mahse, a hringnun hian chutiang tur chuan a nawr kal miau a lawm le. Th theih dang a nei tawh hrih lo. Hun a her ang a. Hunin remchang dang a rawn pe leh a nih chuan tah chuan a duh zawng a tipuitling ve tawh ang chu.






Dorisi chuan paukhauh tak chuan dar chhin akin, “Damchhung hun ka la nei dawn a lawm.” a ti ta tawp a. Mazuali erawhin a thiannu chu a ring miah lo. Bansan tur niin a hre tlat.







Dorisi nen an inkawm tan atangin a han ngaihtuah a. A tui zawng a nu leh pain an tuipui loh zia leh thlawpna a hmuh that loh zia a hria a. Chhung te belh tur an neih loh zia leh a maltlat nasat zia a hre bawk. Chuti chung chungin theihtawp chhuahin hma lam a pan ve zel thei a. Mi chak tak a ni a ti lo thei lo. Tuna, apain lehkhabu a halsak chu a timah mah lutuk tawh a ti a. A thlavang hauhsak turin a pa lakah chuan eng se su mah a va ni lo tih a inhrechiang ropui si. Tihtheih a nei lo lutuk chu a inhaw hlur a.




Mahse a tih theih ve tawk nia a hriat chu a hrilh ta tawp a.





“Engtik hunah pawh min mamawhna I nei a nih phawt chuan min rawn pan hreh suh ang che. I tan ka awm reng ang.” A ti ta a.






Dorisi pawhin Mazuali chu nuhrawn hrawn a nih zia a hai lo va. Chuti chungin a tan a awm reng thin erawh a lawm tawp thei lo va.




“Ka hmangaih che. Ka pasal tur han ni zawk mai la.” Dorisi chuan tiin an nui dun hawk hawk a.





An thiandun chuan an awm rek rek a. Dorisi chuan, “Mariani te hi engnge an tih ang le? Inneih sawn hnaih pawh an la hre awm tawp si l va. Rawn kal ve se aw.” A ti chhuak hlawl a.



Mazuali chuan, “Bia ila a ni mai a lawm.” A lo ti a.





Chutih mek lai chuan Philipa pawh a theih tawpa inchei ulukin Dorisi te coaching class kalna building kawtah chuan a bike nen a lo ding vang a. Dorisi rawn chhuak hun nghakin a lo ding a ni. An bang har tawh a tiin a sana a bih nVut vut tawh a.






Minute nga dang a liam leh hnu chuan an rawn chhuak ta sap sap mai. Dorisi hmel hmuh tumin a lo thlir reng a. Ramnghaha rawn chhuak a hmuh thleng chuan a mi nghah hmek chu a rawn lang ta lo mai.





Philipa chu a phi cheng tawh mai a.




“Khawiah nge Dorisi?” a bul a rawn thlen chuan a l zawt nghal phawng.





Za lo tak hian Ramnghaha chuan a la rawn nuih sawh zui a. A hnek chak dan chu pui tak a ni.




“Chu te chu I hre zawk lo em ni? A pasal hual I nih kha.” A rawn ti kher a.




Philipa lah chu a dawhthei bik vak lo. Ramnghaha’n Dorisi a en dan a hmu ve vek thin si a.



“I theih lai hian min hrilh vat mai rawh.”






“I nupui hual hian a ring zo vak lo che a nih ka ring a hrilh ve loh che danah hian.” A rawn ti leh chu Philipa a insum zo tawh lo. A hnek thlu tawp a. A kawr awmah tham zuiin, “Thil engmah I rawn hre lo ve. I ngam chuan min han be nawmnah leh teh.” A ti hrawk a. Thlahin A bike-ah a chuang zui a. Dorisi awmna hre tura a han call lahin ph a chhag thei bawk si lo. Nimin thil thleng a chhui let chuan Doris a ngaihtuah lutuk chu a thisen an sa pup pup maiin a hria.





Beidawng zeta a tlan chhuah dawn lai chuan Ramnghaha hmai na, then bawi bawia a lo indawm chuan, “Coaching class a kal ve tawh lovang. A kal khapsak a nih kha I hriat ve loh takin ka hrilh ve mai mai ang che.” A tih chu a hria a. A bike nen chak tawkin a tlan chhuak zui nghal a.






Dorisi chu a thiante nen noodles eiin an lo tawng mar mar a. Chutia an hlim em em lai chuan Philipa chu rilruah pai a nei tih lang vekin a rawn pen lut pawk pawk a. Amah a rawn pan ding nalh bawk a.




Tun ang huna a rawn kal chu mak a tih em avangin ding chhuain a lo chhawn vat a.





Dawrah hian tha te tein an indawr ang chu tih laiin Philipa chuan a kai chhuak ta daih a. Helmet rawn pein amah pawh chuan bikea lawn pahin a vuah nghal a.




Thu pe aw tak hian, “Rawn lawn rawh.” A rawn ti ram hmarh a.





Dirisi chuan a thu zawmin a lawn nghal vat. Philipa chuan khaw pawn lam panin bike chu a khalh zel a. Rei yak an tlan hnu chuan zana thalai dan phal lohva intawl khawmna hmunah an ding hlawl a.






“Enge hetah kan tih dawn?” tia Dorisi’n a zawh chuan Philipa chuan, “Engah nge coaching class I kal tawh dawn lo tih min hrilh loh?” thinrim takin a rawn ti ta a. A aw ki atang reng pawhin a lungawi lo tih a hriat tlat a.




“Tu’n nge hrilh che.” Dorisi chuan a ti let sap a.




“Min hrilhtu a pawimawh lo. Engvagin nge I chawlhsan ang?” a rawn ti leh a.





Dorisi chuan, “Ka hna tur a ni lo a niang.” Tih tein a chhang a.





Dorisi pangngai taka lan a tum leh a hmel hnual ru tak te a hmuh chuan Philipa chu a thinur nasa mai a.






“Saw mihringpa sawn engtia rei chiah nge a tih hrehawm dawn che?” Dorisi pa a huatna zawng zawg nen a ti a.





“Ka pa a nih saw. Min hringtu a nia, a duh duh ka chungah a ti thei a lawm.” Dorisi’n a pa thlavang hauh taka a rawn tih chuan, “Thla zapa I thlawk ve tur apiang kah thlak zel che pawh hi maw? A fanu I nia, a thlawp tlat tur zawk che a ni a sin. Kawng chanve I zo tawh a. I tum ram thleng turin tlem te chiah pen I la mamawh a. Hlawhtling mai thei dinhmuna I din lai hian I kawng thlan a vuak chhiatsak vek che a nih hi.” A ti chu Dorisi chuan a hmaiah a bemg ri thuai a.





“ka pasal hual pawh ni la ka pa zah lo taka I tih hi ka remti ngai lo vang.” Thinrim aw vin thaka Dorisi’n a tih ve takah chuan Philipa chu a ngawi ta tawp a.





“I hma hun I tichhe vek ang a maw?” Philipa’n a rawn tih leh chuan Dorisi chuan, “A chhe dawn hlei nem.” A ti tak naa a mittui a tla ta zawih mai a.




Chu chu Philipa’n a hmuh chuan a nupui tur chu rethei hi a ti em em mai a. “Mi â nu.” tiin lainat takin a banah a pawm ta vawng vawng a.





Hun eng emaw chen hnuah Philipa chuan, “Tun hmain helai hmun hi I kal ngai em?” a ti ta a. Dorisi pawhin rawn hawi chhuakin a hmun hma vel chu a han en a.




“Hluihlawn lai kha chuan vawikhat ka kal ve tawh.” A lo ti a. Philipa chu a lo nui huk a.




“I kal khat thawkhat ve hle mai maw? Zaninah I kal ve duh ang em? Thalai intihhlimna pakhat a nia. I duh chuan ka hruai ve ang che.” A han ti leh a. Dorisi chuan Philipa’n a sawm takah chuan kal a chak ve ta hle a. Tun hmaa kal tina a lo tin lo te kha thei a inti zawk hial mai.






Philipa ban atangin, “Aw.” A lo ti sap a.






Link:
BBcode:
HTML:
Hide post links
Show post links

ADVERTISEMENT (A hnuai a milem hi a nia hmeh zeuh tur chu)
Post Reply

Who is online

Users browsing this forum: No registered users and 80 guests