PEKSANGA 15

Episode kal lai dah luhna

Moderator: writers

Sbk Pachuau
Posts: 127
Joined: August 9th, 2018, 8:19 pm

PEKSANGA 15

Unread post by Sbk Pachuau » April 8th, 2021, 2:04 am

PEKSANGA 15
Sbk Pachuau



Nunpuia'n Chhuanga te kalna hmun ni awma a sawina lai ka thlen chuan uluk zetin ka en kual a, ka zawnte hmel awm rêng rêng ka hmu lo. Nunpuia khan a hre sual a nih te ka ring ta hial a.

Ka phone rawn vibrate cher cher chu la chhuakin ka en vat a, Lalhriata a ni tih hmuh chuan ka chhang thuai a.

"I dinna piah veilam step-ah khan an chhuk a, a hmunah ka naute an awm tawh e."

Ka hawi kual a, Lalhriata chu ka hmuh mai loh avangin khawiah nge a awm ka zawt a.

"I dinna piah lawkah ka awm. Tlem lo kal phei hlek la, kawng thlang lam concrete building hring chunga hi ka awm e," a rawn ti su su a.

A sawina lam ka en chuan ban a lo phar zauh a, ngawi rengin ka pan thla ve nghal zat a. A bul ka thlen chuan a awmna ațang chuan Chhuanga te luhna in chu a lo lang chiang hle a lo ni a, SI pakhat a hruai tel avangin Lalhriata'n chu SI kutah chuan engkim a dah a, eng emaw palh thleng thei lakah a hming lang lo se a duh a ni.

Remruata'n man a tawk kha Chhuanga tan thil lawmawm loh tak a ni a, langsar takin che lo mah se Remruata a case ațanga a fihlim theihna turin a rukin hma a la tih pawh kan hria; mahse, a duh ang ngawtin thil a ti thei dawn lo tih kan hriat avangin eng he hu-ah kan ngai lem lo. A tum angin thil a kal ta lo rêng a, a mantu Lalhriata lakah pawh a lungawi lohna a thup thei lo a ni ber mai.

Kan dinna thlang in ațanga Chhuanga leh mi pakhat lo chhuak leh a kawta police uniform ha pathum lo ding chu kan en reng a, leng satliah anga insawiin Chhuanga chu a pawr khawp mai. A nihna chhuang takin a țawng pang pang a, a aia hniamin chutia thu a han zawt vel chu ngaithei lo tih hriat takin a hrawk a, zawhna lah a chhang țha duh hek lo.

Chhuanga țawngkam ngeiawm tak tak chuan Sub-Inspector thin a ti thawk ta ni ngei tur a ni inchhung lamah an innawr lut ta nawk nawk a, minute 15 hnu velah lo chhuak lehin Chhuanga leh midang pahnih hi kutkawl bun chungin an rawn chhawm chhuak a, police station lam an panpui ta nghal a.

Lalhriata berin a naute chu rintlak an ni a tih avangin ngaihțha takin ka haw a. A nihna takah chuan ka va tel ve a ngaihna a awm hauh lo a, felhlel awm palh thei ka ngaihtuahin kal ve ngei ka duh avanga va chhuak ve chauh ka ni zawk mah a, tunah chuan hna pawh kan zo fel teuh tawh viau e.

Chhuanga phenah hian pi Siami a la inrawlh tih kan hria a, a hranpa taka mantir erawh kan tum rih lem lo. Azuali te unau laka a rilru put dan a thianghlim lem loh avangin thenfai ngei erawh kan la tum hle thung.

Palai kan tirh ațangin kar a liam awrh chauh tihah Cindy chuan naupai chhuanlamin Nunpuia a luh khung ta daih a, an lo inzui nasa ve tawh bawk nen Nunpuia pawhin a lo hnar bik lem lo. Cindy'n a lo nun dan țhin thlaha hmuh theih khawpa a zia a lo danglam tàk chinah phei kha chuan tisa thila inzawmna mai piah lamah Nunpuia pawhin a hriat lohin rilru a lo pe thuk hman ve viau ni awm tak a ni, pi Siami thinur hmaisen pawh pawisa zo lovin an inkawl ve mawp mawp mai a ni.

Office ban hnua inhmuh lawk a duh thu min rawn hrilh avangin Ruatpuia hmu turin an in lam ka pan ding nghal a, ka kal tur thu ka hrilh loh avangin Azuali chuan mak a lo ti deuh a. A u nen inbiak lawk kan ngai tih ka hrilh chuan a u awmna room lamah min kalpui a, amah pawh chu kal leh mai lovin a awm ve ta nghal a.

"Ka pa thurochhiah ang tak kan hai chhuak a. Mahse, kan unau hming lang lovin Remruata te nufa hming a inziak thung a," Ruatpuia'n a țhutna chair nghenchhan ngheng ar ar chungin a ti a.

"Hriatpuitu hming a inziak tel em?" Ka ti vat a.

"Kan unau hming a lang lo tih loh chu a tak ang chiah a ni mai! Mate, lehkha kha Peksanga hi han entir ve teh," tiin Azuali a tir zui zat a.

Ruatpuia sawi ang chiahin chu lehkha chu a hre sa tan lo chuan a lem tih a hriat hauh lo a, an unau hming a awm loh bakah hriatpuitu te hming inziak a dang tih loh chu danglamna a awm lo hle.

"Cindy pasal um hnu lawk khan ka nu zia hi a dang zual a, nitin a chhuah bakah zan lamah pawh chhuah leh zauh chang a nei bawk. Nizan hmasa khan inleng a nei a, pa la valai deuh pakhat leh chu aia û hret tur hi an ni a. Inleng satliah an ni turah ngaiin ka ngaihven zui lem lo a, an leng rei angreng viau tih erawh ka hre thung," Ruatpuia'n a ti a.

"Vawiin chawhma lam khan hmannia dawr atana kan en kha ka luah theih tur thu min rawn hrilh avangin a neitupa nen inbe turin ka chhuak a, ka let leh lamin kan in kawtah a hma zana lo leng te pahnih chuanna motor nen kan intawk a, kawta ka nu lo ding chu hmuin a kutah eng lehkha emaw ni a keng tih ka hmu bawk."

Ruatpuia thil sawi chu Azuali nen ngawi rengin kan lo ngaithla a.

"Envelope var, sei deuh hi ni maiin ka hria a. Ka hmel a hmuh ruala a lehkha ken a thuhruk vat danah eng thil emaw tak a nih ringin en chian ngei chu ka tum nghal êm êm tawp mai a ni. Ka bike pawh garage-a dah lut lovin kawtlaiah ka dah tawp a, inchhungah chuan ka tlan lut ve ta nghal a. A rooma a lutlai ka hmu hman hram a, kawng a khar tàk daih avangin ka hmu zui thei ta lo a, a lehkha dahna tur awm chu rin ka nei tho a. "

"Chuan...?"

"Chawhnu lam khan Remruata kan tura a kal tàk hlauh avangin ka che ta vat a. Thil mawi ni mah suh se a room-ah lutin a lehkha ken kha ka zawng a, safe chu a kalh tlat avangin chuta a dah a nih hlauh chuan ka tan lak ngaihna a awm dawn lo a ni. Vanneihthlak deuhin ka zawn a rin loh vang nge a dressing table drawer-ah a lo awm hlauh a."

"A awm lo tih hre ta se!"

"A hre mai rih lo ang. Hei hi ka xerox a, xerox copy zawk chu ka thun alawm," Ruatpuia'n a tih chuan ka thaw ru huai a.

"A awm lo tih hria pawh ni se a pawina a awm hleinem. Hetianga dik lo lutuka a thil tih hi kan man chhuak a ni tih hre zawk nghe nghe se ka ti a nia," Azuali'n a lo tih chuan a ngaihdan chu dik tihna chen ka nei ve tho mai.

Eng tianga chet lak nge țha ang tih chu kan han rêl zui deuh a, an unau chuan Azuali ngaihdan ang deuh khan inchachhuah law law mai chu țha-in an hre ta deuh a, an duh dan a nih chuan kei pawhin pawi ka ti lem lo. An chhungkaw buaina a ni a, Azuali nen innei dawn mah ila ka nupui a la nih miau loh avangin ka lo sawi ve chiam chu mawi lo deuhin ka hria a, an unau remruatna ang chu țha ve thawkhat thova ka hriat avangin an tum dan ang chu ka pawmpui tawp mai a ni.

Zanriah ei kham chuan ka lo tih fo tawh țhin angin a tuk lama ka dinpui tur case chungchang zir chiang lehin theih ang tawkin ka inbuatsaih a, duhtawk ka ngah hnu chuan mu chungin Azuali ka be leh a.

"I mu tawh em?"

"Umm..." mutchhuah hmel zetin a rawn ti țiak a.

"I muhil ka rawn ti harh che a ni maw!"

"Ni lo e, ka la muhil lo a."

"I mut tawh kha," ka ti hram a.

"Mu tawh e. Mahse, 'hil' tel lovin alawm ka mut."

Ka nui suk a, a hmel awm dan tur ka mitthla zui zat bawk.

"Ka ngai che."

"Kei pawhin..."

"Kei pawhin ti ringawt zel suh!" ka tih chuan a thaw halh ri chu ka hre pha a.

"Engtin nge ka tih ang a?"

"Ka sawi ang khan sawi ve la."

"Engtin?"

"Min ngai a ni tih sawi ta che!"

"I hre tho a, sawi hranpa vak a ngai tawh chuang em ni?"

"I sawi ngei kha ka hre duh alawm," ka ti tlat a.

"I ho!"

"Sawi rawh le..."

"A va'n ho tak!"

"Ho lo e..."

"Ho..."

"Sawi tawh rawh," ka ti leh ngat a.

"Ka sawi tawh kha..."

"Ka pawm lo."

"Nang chuuu... '

"Min ngai lo em ni?"

"Ngai e," rang zetin min chhang a.

"A nih chuan sawi rawh le."

"Ka ngai che," a rawn ti zawi sap a.

"Min ngaih viau chuan ka lo kal mai dâwn em ni ang?"

"Tunah maw!" a rawn ti hliai a, ka lo 'aw' vat a.

"A tlai tawh êm hi!"

Min ngaiin min thlahlel ve hle a ni tih ka hria a, zan rei pawh sawi lova va pan mai chu ka duh tak tak a. Inven zawh loh a hlauh avangin a room-a ka luh ve a phal tawh si lo a, ka insum leh țang țang rih phawt mai a ni ang chu!

Tlaia an lehkha lak chungchang vel kha pi Siami'n a hre chhuak ta em tih ka zawt a, a la hre lo ni ngei tur a ni boruak danglam a awm lem lo a nih hmel.


*******


Palai vawihnih kalnaah a hun tur vel an sawi fel nghal a, ka hmanhmawh tih hriain ka nu'n ka pa a lo nawr ve bawk nen ka beisei aia hmain inneih ni tur an rawn ti fel nghal thlap a ni.

"U Peksang, i lo kal lawk hman em?" Azuali'n a rawn tih chuan ka buai zual lai a lo ni lo hlauh a. Ka thil khawih laklawh lai chu thawhsanin Azuali te in lam panin ka inkhalh chhuak ta nghal a.

"Engtin nge in ruk ngam zawk le! In va huaisar unau êm êm ve!" tih chu inchhung ka luh ruala ka thu hriat a ni.

Pi Siami thinur rawl chu a ring țha hle a, țawngkam a duhtui loh bakah a anhla a chhe bawk si; inluling thei lova kha chen a lo up beh tawh rawn puak chhuakah ka ngai hmiah mai a ni.

Pa pahnih lo awm ve te chu Ruatpuia'n pi Siami 'inleng' tia a sawite kha an nih ka ring nghal mai a, Ruatpuia chu kut kuangkuah than chungin a lo ding ul a, Azuali erawh sofa-ah a lo țhu fel at thung.

"Khatiang dawt thu phuahchawp lutuk kha eng atan nge i tih rêng rêng? He in hi i hminga dah i duh avangin khatiang thil kha i siamtir a ni lo'm ni? Tu nge huaisar zawk chu a lang reng alawm," Ruatpuia'n a ti nghat nghat a.

"Dawt phuahchawp a ni lo!" pi Siami chu a au a ni ber e.

"Dawt phuahchawp a ni lo maw! Ka pa khan a hming sign tharlam takte hi thlan ațanga rawn tho lehin a rawn sign leh lawk tihna em ni?" Ruatpuia aw pawh chu a nen fahran lo hle.

"Vala, i pa khan a thurochhiah hmasa tih danglam a duh avangin hriatpuituah keini pahnih hi min ko a, i nu hminga dah a duhna chhan kha kan hre lo naa hming chu kan sign hnan ve thlap kha le!" pa upa zawk chuan a lo ti dam duam a.

"Teuh lo! Ka pa khan a hre ngai lo che u a, eng vang mahin a ko lêk lovang che u!"

"I pa thlarau i zah lo hle mai! A duhdan kalha chet i tum tlat hi hria se zawng a rilru a na khawp ang le," Pi Siami chuan a ti hlawng hlawng a.

"I sawi ngam zawk e a! A boral hnua i khawsak dan zawng zawng hi hria se kan unau min veng tur ringawt pawhin a lo let leh duh hialin a nia ka rin! Ka pa hming i tih chhiat zozai te hi kan hre lo emaw i ti a nih chuan i ti sual hle a ni mai," Ruatpuia'n a ti leh sak sak a.

Lo inrawlh vena chi nia ka hriat loh avangin Azuali bula țhu-in ngawi rengin an inhnialna chu ka ngaithla ve tawp a.

"I va han chaltlai tak êm aw! Aia upa zahna nei miah lo i nih hi," pi Siami'n thinur lutuk vanga aw khur deuh dar darin a ti a.

"Zah tlak i ni tlat lo a!"

"Ngawi tawh rawh! Lehkha kha min pe la, duhtawk tawh ang u. In hi ka kutah awm mah se ka thlahthlam dawn hleinem che u, retheiin in awm lo ang," pi Siami chuan a'n ti vei ngial a, a va han lem ber êm!

"I lehkha lem kha i sawi a nih chuan ka pe dawn lo che," Ruatpuia'n a lo ti hmak a.

"A lem a ni lo ka tih kha!"

"A ni tlat sia!"

"A lem a ni ngei a ni tih engtin nge i sawi fiah ang a?"

"Thil har a ni hleinem. Thurochhiah ziahna dik tak zawk kha ka kutah a awm miau a!"

"Kha thil latu kha nangmah i nih ka ring a, ka lo ring dik chiah a nih chu. Mahni inchhunga thil awm ngei pawh ru chhuak duh khawpa mi hlawhchham kha i ni miau a!"

Pi Siami țawngkam chu a na khel khawl hle a, Ruatpuia lah chuan engah mah ngai lo ang mai hian a lo nuih suk duh chauh a.

"Eng anga nasa pawhin min dan tumin bei mah ula he in hi chu ka hmingin ka awmtir dawn khawp. LSC bo ta daih pawh kha in lak tho a nih ka ring a, lo kawl vel mai mai teh u. Khang te pawh ka hmingin a awm har tawh lo turah ngai ila, thurochhiah pawh kan chingfel vat ang," pi Siami'n a ti vel ham ham a.

"I ti thei dawn lo tih hi nang leh kei hian kan hria. I beidawng țawngah ka ngaih sak mai ang che," nuihzat hmel takin Ruatpuia'n a lo ti thung.

"In nu ka ni a, ka kutah a awm ngei tur a ni tawp mai a ni," zak hauh lovin Pi Siami'n a ti a. Chutah, ka awm ve tih hre chhuak thut ni awm takin ka lam a lo hawi a, "I bialnu te unau rapthlakzia kha I lo hria em? Nupuia neih tlak pawh va ni suh! A unaupa rêngin zah a hre lo mai," a ti bawrh bawrh a.

Chhan enah ka en lo a, ka mihring hmuh tawhah a la zakthei lo ber awm mang e tiin ka ngaihtuah daih thung.

"Mate, Pu Liana leh Pu Rokima te chu i phone tawh em?" Ruatpuia'n Azuali a zawt a.

"Aw, an lo thleng har tawh lo ang."

Azuali sawi ang tak takin Pu Liana leh pa pakhat, han en reng reng pawha kum upa lam tih hriat tak hi pi Siami an hmuar hmuar laiin an rawn inzui lut a, an hnung lawka khawtlang hruaitu pathum rawn lut leh hmel a hmuh lehzel takah chuan nu ber mitmeng chu a no lo ngang mai.

Pu Liana leh Pu Rokima chu Azuali pa-in thurochhiah a ziah hriatpuituah țangin an hming an sign ve ve bawk a lo ni a, khawtlang hruaitu te pawh thil awmdan hriatpuitu atan an lo va pun a nih hmel.

Ruatpuia chuan thil awmdan tlangpui chu sawiin thurochhiah ziahna tak leh a lem chu a lek chhuak va va a, LSC chungchang pawh sawi chhuakin hming thlak țuma pi Siami hma lak dan zawng zawng te chu a puan ta vek a.

Khawtlang hruaitu te hial an awm tawh bakah huai taka țang zel turin pi Siami chuan țan chhan țha eng mah neih a nei ve si lo a, hnial buai ngam lovin a țhu kun ta lup reng a. Ruatpuia'n court lama chinfel nge a duh chu lai anmahni inchhûngah tih a zawh pawhin chhanna mumal pe lovin a nê nê kual vel mai mai a.

Court thlen ngai lova chu lai hmuna an sawi fel theih tàkah chuan Ruatpuia chuan pi Siami chu khawtlang hruaitu te hriatpuina ngeiin an in ațanga chhuak turin a ngen a. Assam type in lian vak lo a nei a, chutah chuan a khawsa tawk lek awm e.

An beisei loh lam daiha thil a thlen tàk avangin pi Siami leh a țhuihruai pahnih te chu lungawi lo țeuh chungin an chhuak ta a, bungrua erawh vawikhata ken zawhsen a nih loh avangin remchangah a awmna hmunah motor-a va dahsak a tum a ni.

Pi Siami te thiltih chu dan anga hrem.theih a ni naa Azuali te unau chuan țul an tih lem loh avangin FIR an thehlut duh ta lo a ni.

Tunah chuan ven tak takin thaw a veng ta a, hma lamah hun hlimawm takin min hmuak bawk nen ngaihtuahna pawh a thawl ta halh mai.

Chhuanga pawh phat rual loha chianga man a nih avangin suspend a ni a, bantirna tham khawpa sual ti mah ni se chunglamin ngaihnathiamna lantirin ban tawp lovin an suspend ta zawk a ni.

Buaina dang tawk tawh lovin inneihna tur atan kan inbuatsaih chho ta map map a, harsatna êm êm awm lovin inneih ni chu kan hnaih ve tial tial a.

*******


"I bulah ka lo riak dawn," phone a rawn chhan rual rualin ka ti nghal tawng a.

"Awm ang lo lutuk!" a ti hlak hlak a.

"I room kawngka kha lo hawng ang che."

"Ngai lo. Kawngkapui ațangin lo lut mai rawh."

"Ka lo kal țhinna atang khan ka rawn lawn chho leh dawn, kawngka chu lo hawng ang che," tiin phone ka off a, ka inkhalh chhuak zui zat a.

Balcony ațangin ka lawn chho lai chu min thlir reng a, a bul ka thlen chhoh chuan lungawi loh hmel zet hian min lo en kar a.

"Awlsam deuhin kawngkapui ațangin i lo lut thei reng si a, tlak thlak palh theihna hmun ațanga harsa taka lo lawn chhoh kher kha eng nge a țulna?"

"Kan inneih hnuah chuan lawn a ngai tawh dawn si lo a, a tawpna atan ka lawn a nih kha."

"Naupangchhia ang mai," a ti leh hlak a.

"Ka naupanchhiat lohzia ka lantir dawn em ni ang?" a kawngah kuahin ka taksa si chetin ka pawt hnai nghal a.

"Zanhnih chauh chu i la nghak thei êm êm ang," nui rah rah chungin a ti a, ka lo thaw hawk a.

"A la rei dawn lutuk!" a hmaiah ka hmuiin ka nul thla zai zai a.

"Zanhnih chu maw rei lutuk i tih?"

. "Aw, ni e. Nghah reng hi ka ning tawh," Ka ti hmuk a, a lo nui har har a.

"Dan thianghlima innei tur kan ni si a, kan nghah hram hram a ngai bawk sia," tlema thutak deuh zawkin a ti a.

"Dan hnihnain innei mai ang hmiang."

"Uang suh!"

"Ka uang lo."

"I uang."

"Ka nghak thei tawh lo alawm," tiin a hmui no chekah chuan ka fawp ta vawng vawng a.



(Ka type zawh rualin ennawn leh miah lovin ka rawn vawm lut tawp zel a, ziah dik loh palh a lo awm a nih chuan ngaihnathiamna nen min lo chhiarsak mai dâwn nia aw❤️)



Link:
BBcode:
HTML:
Hide post links
Show post links

ADVERTISEMENT (A hnuai a milem hi a nia hmeh zeuh tur chu)