TAMING OF THE BAD BOY 10

Episode kal lai dah luhna

Moderator: writers

Maveni hmar
Posts: 164
Joined: March 17th, 2021, 6:20 pm

TAMING OF THE BAD BOY 10

Unread post by Maveni hmar » April 10th, 2021, 6:06 pm

Chapter _10

Victor chu a in siam malh malh a , dan pangngai ang in a chhuah hma chuan darthlalang ah a han in bih leh thuak a, nui sak in a pindan chu a chhuahsan ta a.



A nu chuan mak ti zet hian a lo melh ha a, " Sikul kal i tum lo em ni? " a lo ti vat a.



" Ni hnih chhung sport chawlh min pe a, Sam te in ah ka va kal lawk ang. "



" Sikul in chawlh chuan ka tlai office bang min rawn lam dawn nia aw. "



" Awle, pi ber. " ti a nui var var in a nu chu a siai sak a, a chhuak ta nghal a. A rilru a Sangpuii suagtuah neuh neuh chung chuan a bike chu a khalh a. Sam te in a thleng tep tih a kawng kawi lai tak ah chuan amah tawk zawng a bike chak tak a rawn tlan nen chuan an in su ta bur mai a. Victor chu a bike atang a tla hlawm tawp in nikhaw hre lo hian a awm zui ta nghal a.



Mipui chu rawn tlan khawm in an rawn bawisawm zung zung a. Amah rawn su tu chu vanneih thlak tak in a him pial thung a. Victor erawh damdawiin lam ah an hruai ta nghal a.



Doctor chuan a check nghal zung zung a, hliam na lutuk nunna ta hlauhawm chu a awm lo na in a ban ding lam ruh a tiak a, a chal a kak bawk a.



A chhungte ho pawh kar loh ah rawn thleng khawm nghal in, a nu hlauthawng chu a tap pur reng mai a. Sam chuan lo kuah in a hnem malh malh bawk a.


**********************************

Sangpuii te class chuan thu awih tak in an zirtirtu thu sawi leh an zirlai a hrilhfiah chu an ngaithla thap hlawm a. Ban dar a rik ve leh an thaw huai hlawm a, an zirtirtu chuah rual rual chuan an thum hak a an in khung fel nghal in an chhuak ta sap sap hlawm a.



Pawn a chhuah ve leh Sam chuan a rawn pan nghal a., " Sangpui, thil hrilh tur che ka nei a. " a rawn ti nghal a.



" Enge ni a? "



" Victor kha _ nimin piah khan bike in a accident a _"



A phu zawk a, mak tak mai in hlauhthawnna chuan a rawn tuam hlup hlup a, a thinphu chu thawk leh khat ah rawn rang nghal in a khur ta dar dar a. Hmel dang lap hian Sam chu a melh bial kal a, " I fiamthu em ni? " a ti tham tiak a.



Victor hmetha tak leh a nui hmel nalh zet te chu a mitthla ah rawn lang zut zut in he khawvel ata lak bo a awm mai tur nia ngaihna lian tak chu nei in a hlauthawng tak zet ani. A thi thei lo ang, thi mai tur chuan a hmeltha lutuk mah mah ani. A ke chu zawi nghual in a din pui zo tawh lo, thutna remchang ah chuan a thu ta hnawk a, a hmel te chu a dang nghal sawp sawp a.



" Fiamthu thawhna chi anih loh chu. "



" Ka _ a na viau em? "



" A chal a kak a, a ban ruh a tliak bawk a, thisen a hloh hnem em vang in a chau a. Tukin khan a rawn harh ve chiah a biak theih ani tawh e. "



" A va pawi ve.... "



" Tunah chuan ngaihtuahawm a ni tawh lova mahse i hming a lam reng sia va hmu ve hrim hrim la ka ti ani. "



" Amah chu a tha ang ti raw? "



"Aw _ a tha a lawm. I kal ve duh chuan ka hruai ang che. "



Sangpuii chuan, " Awle... Mahse in thlak hmasak phawt ka duh a nia. " a ti sap a. Sam nen chuan a bike chuan in lam pan in an in phur ta a.




Ramnunsanga chuan chutia Sangpuii leh Sam in phur ta chu meng vawt raih in a thlir zui vang vang a. Victor accident chungchang kha a hre ve tho a, Victor tlawh an tum anih a ring thiam mai a.



An in luah an thlen chuan Sangpuii chu a in thlak sawk sawk a. Sam chuan in chhung chu chik tak a thlir kual in, " Nang mah chauh in em ni i awm? " tiin a zawt a.



" Aih _ ka thian pakhat nen kan luah dun a. Sam? "



" Mmmm... "




" Victor chu a thi ang em le? "



Sam chu a nui sak a, " Aih, thi em lo ang. I khawngaih ve deuh em ni ? " a ti a.



" Khawngaih ve e. A accident thu hian min thawng em a lawm. Awle, ka in peih e. " a ti halh a. Pindan atanga rawn chhuak in damdawiin lam pan chuan an in phut ta nghal a.



Damdawiin an thlen chuan Victor awmna cabin ah chuan an lut tlang nghal a. Ani chu a lu leh ban dinglam tuam bur in khum ah a lo muhil bawrh bawrh a. A hmel chu a dang in a mithmul dum chhah tak chu a ti lang dum leh zual a. A bulah chuan a Nu in a lo thutpui bawk a.



Sam chuan, " Ka Nute, vawiin lam te eng nge a lo an a? " a ti a.



" A zia tawh ang reng khawp mai. "



" A va tih zia ve . Hei ka thiannu Sangpuii anih hi. "



" Aw... Ani maw. Vic_a nu ka nia, i rawn ngai pawimawh a i rawn tlawh ve duh a i va fel ve a " ti a nui sang in a rawn ding chhuak a, a rawn chibai ta a. " Lo thu rawh u. Tunah chuan a ngaihtuahawm tawh lo ania. " a ti zung zung a.



Sangpuii biang chu a sen deuh tan tan a, " Vawiin khan ka hre ve chauh a.. " a ti niah niah a. Victor hmel dang bam chu lainat tak in a melh vawng vawng a. " Lalpa, khawngaih tak in thih tir suh aw.. "tiin a tawngtai ru mawlh mawlh a, Victor a lainat vang chuan a mittui chu a parawl deuh pam a.



Victor chu rawn meng siar siar in a mit chu a khap fak fak a, a khum bul a thu a hmuh chuan a melh ta vawng vawng a. " I lo kal ve duh ani maw? " a ti sap a.



" I thi dawn tawh emaw ka ti hman a. "



Victor chu a thaw hak a, " Ka tui a hal kher mai. Sangpui, min lo in tir teh. " a ti a.



Sangpuii chu a sen ap ap a, zak ang reng tak in Victor nu chu a melh zauh a, a lo nuih var var tih a hmuh chuan a sen zual sauh a. Tui chu kut khur der der in no ah a thli chhuak a, a in tir ta a.



" Ka lawm e. Ka mut dan hi a rem vak lova min lo siam that sak teh. " Victor chuan a ti a.



Ani pawh chuan a lukham te siam rem sak in a thut mut tir ve mai a. " Ka rin aiin a tha daih. I dam leh vat mai ang. Damdawi te ei tha la dam leh thuai ang che. " a ti a.



A nu chuan, " Ni e, a tha leh vat mai ang. Hei hma a sawn chak khawp mai. " a lo ti thuai a.



Sama chuan nui tut tut chung hian, " Damdawi mum lian chi a lo thleng tawh bawk a dam chiah a hmabak tawh. " a lo ti zuk a.



Sangpuii chu a sen ap ap a " Sam, ih... A tlai tawh ang reng sia... haw tawh mai ila. " a ti a.



" Ni e, zuk haw rawh u. Hei ngaihtuahawm anih tawh loh hi... I fel lutuk e, Sangpui. "




Victor chuan a kut na lo lam chuan Sangpuii kut chu a hum bet tlat a., " Aih... Haw lo ang. Min kal san suh. Khawngaih in ka bulah awm ve rih rawh. "tiin zak map lo hian a ngen a.



" Chutin ka _ hei i dam tawh em hi. "



A nu chuan, " Vic, a chhungte pawn an ngaihtuah ve ang chu mawle. Chutia chelh ngawt chi a ni nang. " tiin a fapa chu a lo khak zauh a.



" Min kal san lo ang. Ka bulah awm rawh se. Sam, ka nu hi lo hruai haw la Sangpuii hian zan in chu min awmpui dawn. "



A nu chuan, " Vic, i ti ang lo em mai a. " a ti hlak a.



" Nu, i hah tawh bawk sia zanin chauh chu a chhawk dawn che a lawm. "



Sam chuan, " Nia, ti khan riah pui mai rawh, Sangpui. I chhungte hnenah chanchin chu ka lo hrilh mai ang, in in ka hriat tawh kha. " a ti vat a.



" Ka _" Victor chu a melh zauh a. "A chi loh em mai, Sam" a ti halh a



Sam chu a nui hak hak a, " I hlau deuh em ni? Damlo anih kha eng tin mah a khawih thei lo ang che. Khawih che a tum anih pawh in i ke artui i hman thiam em kha. " a ti a.



Victor chuan, " Nu, ka ti tak tak. In lam ah va chawl hahdam rawh. Zanin chu Sangpuii hian a chhawk dawn che a lawm. I chauh tawh kha. " tiin a nu chu a ngen a.



" Nia ka Nute, haw san ang. An ngaihtuahawm loh khawp ang "



A nu chuan, " Sangpui, ka haw san che u chu pawi i ti lo ang maw? " a ti a.



Hnial a hreh ve deuh bawk si a, "Ka _ ih _ a _ pawi _ love. " a ti bah niai a.



" Chuti anih chuan in chaw ei tur kan rawn pe ang che u. Sangpui, ka lawm lutuk ania. Tha tak in lo enkawl la, a sual deuh chuan i lo tuk tawlh mai dawn nia. "



Sam chuan nui sang hian, " I kungfu thiam kha thup la kan Victor hi lo dimdawi ve deuh ang che. A ruh te hi i lo ti tliak rum ang e. " tiin a la fiam zui a.


**********************************
Sam chuan Sangpuii te in kawngkhar chu a kik kauh kauh a.



" Lo lut rawh. "



Mipa aw a hriat chuan a chal a chuar nang a. In chhung a luh rual a Ramnunsanga hmel a hmuh chuan mak a ti hle a. " Nang maw? " a ti phawk hra a.



" Khawi ah nge Sangpuii? "



" Damdawiin ah. "



" Eng a? Enga ti nge? Accident a tawk em ni? "



" Aih. Victor an accident a tawk a a riahpui dawn a chumi lo hrilh tur che chuan ka lo kal ani. Mahse nang hi hetah eng nge i tih a? "



" Sangpuii nen in kan luah dun a lawm. "



" Mipa leh hmeichhia _ in khat ah maw? "



Ramnunsanga chu a nui hak a, " I ngaih ang kha engmah a thleng lo ania aw. " a ti khawl a.



Sam chu a meng rum ta hle a, " Ka unaupa hmeichhe hmangaih chu nang in i lo chenpui a maw? " a ti nghat a.



" In kan in luah tawm a. Chu zawng chu ani. A bak engmah a awm lo. "



" Ka ring lo che. "



Ramnunsanga chuan Sangpuii nen an chanchin engkim chu a hrilh fai ta vek a. Thu dik a zep chuan Sangpuii hming a chhe thei dawn tlat ani. Hmeichhe hmingchhiatna chu ho te ani si a.



Sam chu a thaw halh a. " Sangpuii chu a va khawngaihthlak ve a. A Ni pasal chu khawih ve hrep tlak anih chu maw le. Hmeichhe chung a kut thawh thin ho hi ka huat zawng tak an ni. "a ti a.



Ramnunsanga chuan" Mi tha tak chu ani lo chiang bal. Anih Victor chu a tha lo viau em ni? " a ti a.



" A zia tawh lutuk. Ngaihtuahawm ani tawh lo. Tunah tak phei chuan a dam tha ver vawr khawp ang. "


**********************************

" I ril a tam tawh em? Kha ei tur eng eng emaw a tam kha i duh duh kha ei rawh. " Victor chuan a ti a.



" Ka ril a tam lo. "



" Nelawmlo viau teh suh, Sangpui. "



Sangpuii chu a ner nang a, " I thi dawn tawh emaw ka tih vang chauh in ka rawn kal a. He ti khawp hian i tha tih hria ila chuan ka rawn kal hauh lo ang. " a ti ngat a.



" Ka hmuh phak a i awm ringawt pawh hi ka lawm a sin. I rilru i thlak thut anga min haw san daih ang tih hi ka hlau a sin. "



" Haw leh daih ka duh tak tak a nia. "



" I haw daih chuan ka nu khan a dem ngawt ang che. "



" I nu vang chauh in ka awm ang. "



Victor chu a thaw huai a, " Apple kha lo zai la ei ang. " a ti a.



Ani pawh chuan thuawih tak in a zai ve mai a. " Kha ei rawh. "



" Min lo barh mai... Khawngaih in. Ka kut a tha lo tih i hriat kha. "



" Kha... Misualpa! " tih pah chuan a barh ve leh mai bawk a.



Victor chuan, " A tui lutuk ei ve rawh. " tih pah chuan apple zai sa pakhat chu la in a barh ve nghal zat a. " Ti hian khawvel hi tawp thut mai se ka van ti tak. " a ti a.



" I sawi rapthlak em mai. I piangthar tawh ngawt em ni? "



" Hremhmun ah pawh kal dawn ila i awm ve dawn phawt chuan nuam ka ti tho ang. "



Za em em in Sangpuii chu a nui ta hawk hawk a. " Awiii... Victor i à tawh anih hi. " a ti chiam a.



Victor pawh chu a nui ve ta hawk hawk a, " Ka ti tak tak a lawm. " a tih mek lai chuan a nu leh pa chu tiffin keng in an rawn lut a.



" A va za awm hawk hawk ve a Vic. In ril a lo tam tawh em, Sangpui? Hei in chaw ei tur kan rawn keng a." a Nu chuan a rawn ti lut a.



" Tam love. "



A pa chuan, " Enge i an,Bawiha? I zia deuh tawh a nih ka ring , i nui ring thei tawh em mai. " tiin a nui suk a.



" Umm.. Ka zia tawh. "



A nu chuan, " Chaw ei hi ka siam nghal dawn che u em ni ang? " a ti a.



" In haw hun ah kan ei zawk ang e. Kan la tam lutuk lo bawk a. " Victor chuan a lo ti thuai a.



A pa chuan, " Nula, ka fapa i lo awmpui thei hlauh chu ka lawm khawp mai. Kan nu in ngaihngam tak a a fapa damlo i kut ah a dah ngam dan ah mi rintlak tak chu i ni ngei ang. A fapa enkawl tur hian tumah a ring zo lo ania. I lak ah hian ka lawm tak tak ani. " a ti a.



" A... Kei pawh ka lawm e. "



Victor nu leh pa chu an awm rei ang reng phian a an haw hnu chuan Sangpuii chu a thaw huai a.



Nui tat tat in Victor chuan, " I thawveng huai em ni? " a ti a.



" Thawveng huai e. I nu kha a fel in a ngainatawm a , a bula awm pawh a nawm ka ring. I pa kha chu a zahawm khup a, a mi uap a na in huhang a ngah ka ti. "



" Ka naupan lai te pawn ka pa hi chu nelawm hle mahse ka hlau ru tlat thin. Ka nu hi chu Sama ka pawh tluk in ka pawh ani. "



Puar tak in chaw an ei dun a, chaw ei kham hlim a damdawi ei ngai awm ang ang te chu an in ei tir a. Eng eng emaw sawi a an ti ti mai mai chhung chuan a lo tlai ve duai tawh mai a. Sangpuii pawh a ham sek tawh mai a.



" I chauh hmel in i mut a chhuah hmel si, hawh lo mu ve rawh. " Victor chuan a ti a.



Mak tih hmel tak hian a melh ha a, " I bul ah maw? Ka duh teuh lo mai. Khum pakhat ah sawn ka mu mai ang. " a ti a.



" Ka tiam a che _ eng tin mah ka ti lo ang che. Min hlau suh. "



Sangpuii chu a nui hak a, " Ka hlau lo che. Nanga kut lehlam tliak chu eng ah nge ka hlauh viau ang che le? "a tih san mai a.



A bul a pawh mut ve pah chuan, " Min hlauh loh chuan lo mu ve rawh. " a ti a. A phone chu khawih in fb ah a lut a " Kha hei hi ka fb account ania, i duh leh khawih rawh. "tiin a phone chu a pe a.



" Ka lo en chhin ang... " tiin Sangpuii chuan a messages dawn te chu a en kual sak vel a, " I messages te chuh... an va lerh hlawm tak! " a ti hlak a.



" Engah mah ngai suh. Nang ka tawn hma thil vek a lawm. Fb i khawih ve thin em? "



" Aih, ka khawih ve ngai lo hrim hrim. "



" Anih account ka siam sak ang che aw? I duh em? "



" Duh tho mai. Mahse eng tin nge ka khawih chuan ang? Siam leh lo mai rawh. "



" Ka kut a dam ve leh ka siam sak ang che. I phone tur pawh ka lei sak ang che. "



" Ka duh lo. Thil min pek hi tum ziah suh. "



" Thil thlawn pek ni lovin i birthday gift tur mawle. "



" Ka birthday i hre ngawt love aw. "



" Ka hre chiang em mai aw. Kar leh saturday khian kum 17 i tling dawn. "



" Ehe! Eng tin nge i hriat zawk a? "



" Ngaihven zawng hi chu hre thei tak ka ni. I chanchin engkim hi ka hre vek a lawm. "



" Eng tin nge i hriat? Mawh? "



" I thiannu Manui kha ka zawt a lawm. "



" Awii... Awiii... Spy! "



" Ka vei em che a lawm. "



" I sual thiam thei em a lawm. "



" Fel ka tum tawh dawn a lawm... nangmah vang chauh in. " tiin Victor chuan duat tak in a sam chu a chul sak hliau hliau a. " Ka thinlung zawng zawng hi i ta ani a, ka duh in ka hmangaih em em che ani. Eng tik lai pawh in ka rilru ah i awm reng thin a. " a ngawih tak veng veng ah chuan a zuk melh chhuk a. Ani chi amah si chial in tui tak hian a lo muhil siai siai tawh hi a lo ni a. A nui sak a, " Tui deuh in muhil rawh aw, ka naute duat hmelthate. " a ti ta sap a.

££££££££££££££££££££££


HMUN AWL :

Norway ( Thelma-i te ram zanlai ni chhuahna ram) PM Erna Solberg chuan February thla tawp lam khan Mountain Resort ah an chhungkua in a kum 60 na champha an lawm a , an chhungkaw members 13 an kal ani . An ram covid inkaihhruaina danah chuan mi 10 aia tam awmkhawm khap anih vangin thiam loh chantir in pawisa norwegian krons 20000 chawi tir ani.

He PM hian ngaihdam a dil tawh na in Norway Police thupuangtu chuan ," Prime Minister ani a , dan zawm hmasa ber tur ani a . Mahse a bawhchhiat vang in pawisa hi chawi tir ani . Ani hi hrem lohin chhuak ta se ,Dan hmaah kan in tluktlanglo tihna ani ang ." a ti ani.

Mizoram christian za a za in ti ram ah hian hetiang hi lo thleng ve ta se... kan CM hi kan chawi tir ve i ring em ??? Lo ngaihtuah chhunzawm ve mai mai teh.



Link:
BBcode:
HTML:
Hide post links
Show post links

ADVERTISEMENT (A hnuai a milem hi a nia hmeh zeuh tur chu)