29th APRIL - 19 BY PAPUII SAILO

Episode kal lai dah luhna

Moderator: writers

Ruatpuii Sailo
Posts: 100
Joined: November 22nd, 2020, 10:57 am

29th APRIL - 19 BY PAPUII SAILO

Unread post by Ruatpuii Sailo » April 10th, 2021, 10:39 pm

CHAPTER - 19 BY Papuii Sailo




Atlani leh a thiannu haw hnu chuan riak turin min sawm ngawng ngawng a, ka hnial char char thung. Ka haw dawn ti chung a ka din hluai chuan melh pawh min melh duh eih lo, hmalam a melh ngur a a tum hmak.Chuti chung a han haw san lah chu ka hreh ve leh tum hrang bawk si. A titau tih hriat reng chung a haw chu thil nuam a ni miahlo, patling pui si titau rual pawh a ni tawhlo a sin maw le. Chhuak mailo in a awmdan chu ka en reng a, min zu han melh duh thak lo chuan.




" Pathlawi ve si tih tauh bur bur kha i zak lo mi? " Ka ti ta thlawt.



" Mahni bialpa te hnial bur bur kha i zak zawk daih lo mi? " Min en duh miah chuanglo chuan a tichhuak hmuk a, ka nui ta hak.



" 'In bialpa te thu thuin awm rawh u' tih ni lo a, ' in hotute thu thuin awm rawh u' tih anih avangin ka zaklo hlauh " Ka thusawi vang chuan nghal min tih hmel zet hian min melh a, ka lei ka lo chhuah khum zeuh thung.




" Haw lo in awm tlang nghal la, kan innei a ni nghal mai a " Min rawn kuah hlun chung chuan a ti thawp sut a, a thusawi vang erawhin ka rilru a kal thui hle thung. Ani nen a Inneih hi ka lo la ngaihtuah thleng ngailo, chutiang ngaihtuah thleng turin kum êm pawh kan la inkawp lo bawk. Mahse,tihtak zetin min sawm se ka hnialin ka ring hranlo, a chhan chu ani aia ka dinhmun hrechiang tu leh ka tan innghahna tlak lutuk hi an awm kherin ka ringlo. Chutih rual chuan lo innei dawn ta ila chhungte ka neilo a,man leh mual hlanna tur chu sawiloh tu hnenah nge palai an kal ang tih te thlengin ka ngaihtuah kim hman vek.




" Min neih chu i va hlau awm ve i tah ringawt a " Ngaih that zânlo hmel tak a a tih chuan ka tah nuih hawk a. Ka mittui luang thla pap chu a kutin a rawn tuai hul a, ka hmuiah a rawn fawp zeuh bawk.A nghawngah ka kut pahnih suih zawmin ka hnaih deuh a, ka awmdan chu mak tih hmel zetin a mit ko a rawn san zauh. Fiam ka chak ta tlat.




" Vawikhat nulat ve manah pathlawi neihte chu tunge duh ang a " Thutak zet chuan ka ti a, hnar a tum nghal dat a, a ner nghal sak bawk. Nui lo turin ka insum tang tang thung.




" Anih Tlangval hausa Remruatsanga i nei duh zawk tihna mi? " A rawn tih nghut chuan ka ner ve ta sak a, ka kut ka la thla riai riai bawk.



" Nang pawn Sangkimi kha i nei chak daih zawk ang " Remruata a rawn sawi chhuah kher avang chuan ka ti ve ta kher a, Sangkimi khan a en dan kha ka hai bik chai hlei nem.



" Sangkimi chu engvanga sawi ve ngawt nge i nih? "



" Nang pawh engvanga Remruata sawi ve ngawt nge i nih? " Ka ti leh hmak.



" Zawhna ka zawt che Zothanpui? " A rawn ti leh hmuk a, ka meng kual ralh chu ngaih theihloh hmel zetin ka kawngah a hmer nghet salh.




" A endan che kha ka hai hlei nem, rawn kallo phei ila chuan in lo in chu e kha e viau mai thei asin, i thawmhnaw te pawh i lo haktir bawk a ni lawm ni? " Nui lui sak chung chuan ka ti ta salh salh a, ka lo thik zia ka inhrechhuak nghal iar iar.




" Nang pawh Remruatsanga bulah i awm a, ka call chhang hmanlo khawp khawpin enge in tih hriat va ni bik suh " A rawn tih ram hmarh chuan ka rilru ana zawk.




" Remruata chungchang kha chu kan sawifel vek tawh a maw ka tia " Ka ti zawi ta sap. Min lo la ringhlel fo chuan min rinna a neih loh zia a tilang chiang hle in ka hria.



" Bang rawh, hna dang kan zawng zawk dawn nia, thik loh ka tum ve tho, mahse a bulah i awm sawn ka hriatthiam lo ka awmdan hi! " Hmai tuai pawk chungin a ti a.



" Min rin loh vang anih chiah kha "



" Nilo, ka ring lutuk che, mahse mipa dang bulah nilengin i awm tih ka ngaihtuah ringawt pawh hian ka thik lutuk hi ka puak keh lo chauh, chuta karah ka call ila chhang theilo zui "



" Enteh, Hmahruai min ring rawh, Remruata hi ka thian ang bakin ka ngailo, chutiangin a ni pawn " A hmai a dawm sakin ka ti dam thlup a, a thikthu chhe lutuk hi a khawngaihthlak zawk.




" Anih Sangkimi ve thung kha " Meng kual ralh chung a ka tih chuan a rawn nui hawk a.




" Ka ex anih kha " A rawn tih sup rualin ka tum nghal hmak,ka hriat hma pawn ka thik ania, tunah a ex anih thu a sawi phei chu rawn kal tawhlo tawp mah se pawi ka ti ta miahlo.




" Lungngai suh, pathlawi nih hma ât hun lai a mi daih tawh, tunah chuan i tan chiah ka in serhhrang tawh " Nui suk suk chung a a rawn tih chuan ka ner nghal nang.




" Anih engvangin nge i kawr kha i hak tir kher ? " Ka ti chuan " I ha ve chak a mi? " Ti vutin room lam a melh nghal vut a, ka melh nghal nghek a, a nui suk suk duh chauh leh nghal.




Thei tui a kawr a a tih buak avang anih thu a sawi chuan, ' a lo dah leh pawn ha tawh miah suh ang che, paih vang vang rawh ' ka lo ti hmanhmawh a, a nui ri nghal hawk hawk.



*


Zingah chaw eikhamah a hna kal tur rualin ka haw a,In a min dah hnuin a kal leh mai dawn a maw ka tih laiin a awm ve ta reng a, ka insiam chhung zawngin sitting room-ah a lo thu ngat ngat a, hotel lamah min thlah chho leh thlap a, office thlengin min rawn zui chho ta zel nen " Enge i rawn tih ve dawn " Tiin ka zawt ta tawp a, min chhang chuang hlei lo a,thawktu dang lah chuan police form dak thlarh nen a inthuam nen kan inzui chu 'thil tha lo a thleng ta a maw ni aw! ' ti ni awm takin min en zui dauh dauh hlawm leh nghal.




" Remruat.... "



" Remruatsang, ka bialnu hi ka phone call chhang hmanlo khawp a buaiin lo siam tawh suh ang che. " Ka tawng tur chu min rawn sawi khalh nghal zung zung a, Remruata nen chuan mak ti lutukin Hmahruaia kan en dun hau ringawt.




" Yes boss, mahse vawiinah Aizawlah phei kan ngai dawn a, i rem ti em? Rem ti lo mah la a kal a ngai tho tho maw le! " Remruata'n a ti let ve zat. A hnial leh ka rin laiin a duh duh hunah kan inbiak theih dawn chuan ka kal a rem tih thu a sawi awlsam et a, mahse a hmelah hian a duh duh hun chu darkar chanve dan vel anih duh hmel ngawih ngawih.





" Ti teh thut nge? Engmah i sawi lawk bawk silo a " Hmahruaia kal hnu chuan Remruata hnenah chuan ka zawt a.




" Delhi lam atangin ka thianpa a lokal dawn a,hun a neih rei dawn loh avangin Lunglei a rawn thleng phei hman dawn silo a,keimah zawk ka phei mai a ngai a "




" Anih te chuan ka kal ve kher angaih loh chu " Ka lo ti hmanhmawh.




" Angai alawm,hotel insumdawn tawnna tur thil a lokal tur a ni dawn a, chawhnu hian kan phei ang a, zanah ka pa te nen kan pathumin meeting kan nei nghal ang. Bakah ka nu khan a hmu leh chak che aniang, lo hruai ve ngei ngei rawh min ti " A ti duah,chuti anih chuan insiam turin ka haw leh nghal angai dawn tihna ania.




Ani chu a lo insiam sa vek tawh avangin kan In lamah kan inzui thla a, ka insiam min nghak ta ngat ngat. Eng chen nge kan cham dawn ka hre silo nen, thawmhnaw ken dan tur ka hre lo nghal pang a, ka zawh chuan thla thar a phei ngai leh tawhlo tur a, thil tul dang tihfel nghal law law a duh thu a sawi a, tunkar chu kan cham hmel bawk.



"Tereuhte, i lung leng thin lo mi? Ka tih awmzia chu i nu leh pa te i ngai ve thin em? " A tih chuan ka then sak ringawt.




" Leng ve thin bawk e, a tir te phei kha chuan mal ngawih ngawihin ka inhria a,nileng zan khuain ka tap a ni ber,chhung hnai dang belh tur ka nei bawk silo nen thih ve daih kha ka chak, mahse mi pakhatin thihna te hi chu kan dan theih a niloh thu leh ka nu leh pa te'n lungngai a ka tap reng min hmuh an duh a rin loh thu min hrilh a, chuvang chuan ka tap leh tawhlo ang tiin ka intiam a." Kan chhungkaw thlalak en dauh dauh chung chuan ka sawi sep sep a. Ka nu leh pa ka ngaithar hle bawk. Tun hnaiah hian Hmahruaia vangin ka boruak dang ka tawng a, anmahni ngai ngawih ngawih ang khan ka awm tawh ngailo kha ania.




" A hrilhtu awm che ka hre mai " Uang tak a a tih chuan lei chhuah khum zauhin room-ah ka luh san nghal nal nal.




*



" Ka ngai nghal der che... " Rawn ti fan ril ruih tu aw vang chuan ka chhungril tak atang hian ka hlim veng veng, min ngai tak tak tih a aw ah ka hriat theih vang pawh a ni mahna.



" Keipawn " Ka ti let ve nghal vat. " Anih chuan sawi rawh " Nui ri suk chung chuan a rawn ti leh kher tawh.



" Ka ngai che Lalhmahruai, ka duh bawk che " Ka ti nghal tan tan a, kan nui dun nghal hawk hawk. Engtin nge awlsam tak a, ka sawi theih tawh pawh ka hre lo.



" Lo haw leh nghal mai la, Remruatsanga te chuan amah pawn a buaipui thei lutuk tih ka hria, kar khat khat incham te chuan engtin nge awm se min tih? " A rawn vui nuah nuah chu a lawmawm letling zawk.



" I dear ex kha lo be tha leh rih mai rawh "



" I phal tak tak maw? " Phur lutuk a a rawn tih nghal ruai avang chuan phone chu ka hmai zawnah dahin ka melh nghal nghek. Fiam ka tum a, a rawn thinrim ka rin laiin a rawn phur vel lutuk chu a fiamthu tih hre tho mah ila min ti thinrim hlur tho.




" Phal e phal e, i char bet nghal dawn nia " Ka ti hlar, ka aw ah ka thik zia a lang hialin ka hria.



" I thik leh dawn si te chuan rawn sawichhuah loh mai tur alawm " A rawn ti ta chiah reng a. " Nge kha ti kher a min chhan " Ka ti ve tlat thung. Min thlem leh te te phawt, ka thiamloh zawk ni rengah pawh inhauh buai ai chuan tiin a tlawm hmasa zawk hreh ngai miahlo hi mipa diktak anih zia tilang tu pakhat a ni.Eng eng emaw sawiin kan inbe luam a, a khat tawkin min ngaih thu a sawi leh sup thin bawk. Kan inbiak zawh a sana ka en meuh chuam zinglam dar 1 a lo ri tep tawh.Dar 9 vel khan min rawn phone kha ania, reilo te emaw ka tih laiin dar a lo kal tam hman hle mai. Kan inbiakna lah kha a tir a kan sawi bak kha chu chiang fak a han sawi mai tur ka hre tawh miahlo leh nghal.




Zing a ka thawh chuan a reh thiap a, choka lam a ri rak rak ka hriat avangin ka pan vat a, pa Sangpuia'n thingpui a lo siam anih hmel. Remruata nen hi chuan an pian velah hi chuan an inang phian a, hmelah erawh nu Ahruaii hlauh hlauh ani thung. Choka a patling thingpui lum vel chu hmuhnawm ka ti riau bawk, a in uluk tih hriat takin a vun a fai sar a, upa lutuk ti a sawitur a la ni lo. A tlangval laiin a hmeltha ngawtin ka ring.




" Ee! Mampuii chu i va tho hma ve! I mu tha lo zawk nge " Min hmuh chuan dam thlup hian a ti a, chair-ah thu thla pahin ka mutthat thu leh ka tih than anih vang zawk anih thu ka sawi siam siam a, ani lah tak a, ka pa khan ka tette atang khan thawh har a phal ngailo a, thlasik khaw vawh lai pawh ni se zing dar 6 velah min kaitho ngei ngei thin a,ka than hnan tawh a ni ber.




" I nu Ahruaii i dah nil der anih chu ! A zingkar hi chu zing dar 7:30 hnu lam atang hian a intan chauh thin a " Nui hawk hawk chung chuan a ti a, nu Ahruaii chanchin a sawilai chuan sawi nuam a ti tih hriat takin a mit meng a de sar sar ni berin ka hria.




Rei vaklo hnuah Remruata a lo tho ve bawk a. Pa Sangpuia nen chuan nizan lama a thianpa nen a an meeting na chung chang vel chu an sawi chhunzawm a, nu Ahruaii'n "hruai ve kher angai lo, i pa secretary a awm ve reng kha, keimah chauh chuan ka awm peihlo a khawhar thlak " Remruata hnenah a tih bur avangin ka kal ve ta lo a, Nu Ahruaii nen kan inkawm ta char char. An chhungkaw chanchin ka hriat belh nual bawk.Pa Sangpuia farnu fa upa ber an awmpui a, tunah erawh anu te'n lo awm phei ve rih lawk rawh an tih avangin an In lamah a phei rih thu a sawi a, mak ka tih ber chu inchhung zau leh lian tak nei si hian awmpui a la miahlo hi a ni.Tlema awm thei ve deuh an In ai a zim zawk nei te pawn an la fer fur thin a nia.




An titi kalsanin pawn lamah ka chhuak a, pangpar mawi tak tak a vul chek chuk a, hmuh a nuamin nun hi a tihlim veng veng.Pangpar hi chu ka khawi ve lo na in mi khawi ka hmuh hian ka kal pek mai thei thin lo. Thla tal hi ka la hman ngei ngei zel a, Dingpuii erawh a letling chiah a ni thung, pangpar hi mawi tihna em em neilo in a thlir liam vel mai mai thin. Hmeichhia inih hi ngainat tum rawh ka tih hian fiamthu ti tak deuh hian "pangpar ka ngainat chuan thenkhat angin mi phallo chung an pangpar ka thliah ve angai palh ang" a ti ziah zel.A sawina chhan pawh hmanah nu Amawii pangpar ui deuh hi, kan veng a mi tho nu pakhat zak theilo deuhin a phallo chung a thliah luih sak tawh vang a ni.




Remruata hian eng vanga min hruai phei ve kher nge anih pawh ka hre tawhlo, tunah pawh ani chu hotel-ah a kal daih a kei erawh Nu Ahruaii bulah a dawrah ka thu ve leh ran tawh. Zing chaw eilaiin dawrah min hruai ve tur thu a sawi tlang hmiah a, mipa pahnih lahin hnial buai lo in an pawmpui hmiah. Pa Sangpuia hian a duat tak zetin ka hria, chutiang chiahin an fapa pawh hian.





" Ni,in lo buai em? Lokal dawn tepah ka nu in min tir leh rih a " Dawr chhungah chuan ka rualpui tur vel hmeichhia hi a rawn lut a, a rawn ri lut nghal bawrh bawrh.




" Mampui, hei hi Teberi anih hi,Teber hei hi Mampuii i u bawihpuia Secretary " Nu Ahruaii'n a ti thuai a, nui sang chungin nin chibai nghal thuai. Ani pawh hi a nelawm hmel hle in ka hria. An sawi danah Pa Sangpuia farnu fa an awmpui ani tih ka hre zawm a, mahse nî tiin a ko bawk si kha ka buai deuh a, a nu u nupui te chu pi awm tak anih laiin. Mahse nu Ahruaii bawkin " Teberi pa hi ka phirpui hi ania, chuvangin an unau hi chuan an duh duh danin min ko mai mai, Remruata pawh hian a tet deuh lai kha chuan a niteii te nupa hi koh dan tur abuai thin " Atih chuan ka hrethiam ta kuar ( CARO Chhiar tawh kha chuan kan hriatthiam mai ka ring)




Nilengin an bulah ka awm ve ta reng a,a nuam ta phian, mi nel ka harsat teh lul nen anni chhungkua hi chu mak tak maiin ka hmuh thar apiang hi ka ngaina nghal em em vek zel maiin ka hria.





Ni hnih zet chu kan cham tawh, hotel lamah kallo in Nu Ahruaii ka zui ve ta ziah a. Hmahruaia nen kan inbe reng bawk a, nimin phei kha chu vawi li ngawt kan inbe hman.



" Ka nu hian a lo ti deuh deuh mah mah anih pawhin hrethiam hram rawh aw, a khawhar chu thuhran fanu hi a awt lutuk a, chuvang a Teberi pawh hi awmpui kan nia, ka nau chiah hi hmeichhia chu ania, mahse ka nu hian thi sa in a hring a, fa neih lamah harsatna a nei bawk nen fa dang a nei thei tawh bawk silo a. A lo che over hret anih pawhin a fanu angah a ngai vang che ah i ngai hmiah mai dawn nia" Nizana Remruata thu min hrilh a ni. Min venthawn vang nge ka hre lo, mahse keimah tak pawh hian hetia inpawh taka kan awm hi nuam ka ti. A lehlam takah chuan Nu Ahruaii chu ka lainat ru hle, fanu a awh ngawih ngawih avangin a vahnu a chuh chawt a nia.




Mihringte hi chuan kan nunah hian thu hi kan lo neilo teh e!




" Hello ! " Ka rin loh lutuk a hmeichhia in min rawn chhan vang chuan ka call sual a maw tiin ka phone chu ka en tha leh ngat a, Hmahruaia number ngei chu a ni si.




" Hello...! " Lehlam a mi chuan a rawn tih nawn leh vak chuan " Aw.... Ahh.. Hmahruaia khawnge a awm? " Ka tih bah niai a, lehlam a mi chuan nui har har chungin an In-ah Hmahruaia'n a phone a theihnghilh thu a rawn sawi a. Chhang tawhlo in phone ka off nghal hmak. A aw ah kha chuan ka chiang ngamlo nangin Sangkimi kha a ang ka ti ru hle. Mahse an In-ah enge Hmahruaia'n a tih ngawt ang? Anni hi ka awmloh remchangah la in an lo inhnim hnai leh hi a lo maw?





Chutiang a ni lo ang, thil tul vangin a kal zawk aniang. Ka ring tur a ni. Hmahruaia pawn engah mah ka ngai tawhlo a tih kha tiin keimah leh keimah chu ka inhrilh mawlh mawlh, mahse ka hahdam hlawllo. Midang chu engah mah ka ngaiin ka ringlo mahse midang nilo in a bialnu hlui kha a ni miau a. Ni leh lk Sangkimi a ni tih pawh ka hrechiang tawp hlei nem le! Kei hi ka ngaihtuah thui mah mah a ni. Hmahruaia naktukah ka zawt fiah ang a, thil awmzia ka hre turah ngai ang.




Zingah rilru nuam zanlo chungin ka tho a, ka harh rualin phone leh ka tum hman ut ut nangin khanu khan a lo la leh ang tih ka hlau rilru tlat nen ka call ngam ta ngang lo. Chhun lamah ka call mai aniang chu.




Inhnuaiah ka chhuk thla chhat chhat a, step tawp ka thleng tep tih chuan sitting room lamah titi bul bul thawm ri ka hria a, ava biru deuh hlek nen anmahni ka va hmu theilo. Mahse Pa Sangpuia te pafa an nih ka ring mai. Pafa thenkhat ang lo takin an pafa hian enge maw ho mai mai sawi pawhin an titi dun fo tih ni reilo te an bul a ka awm ve chhung hian ka hre hman.




Choka lamah lut tlangin fridge a mi bottle ka la chhuak te te a, sitting room lamah chuan tuiin pahin ka phei ve a, anmahniin min ti tlang nel thiam bawk nen kan thlen tan tirh ang em em chuan ka inthlahrung tawh bik lo.




Ka tui hmuam lai ka phuh thawt a, ka khuh zui nghal bawrh bawrh a, ka khuhna lamah ka mittui a tla phung bawk.





Zanin chapter hi nizana mutchhuak chung2 a lo nghak tu, mahse lo nghak thlawn lawi si U Muani tan kan hlan a nih chu🤦‍♀️😆💖



Link:
BBcode:
HTML:
Hide post links
Show post links

ADVERTISEMENT (A hnuai a milem hi a nia hmeh zeuh tur chu)